Kamudimbeliwe Batiziwa

1. Kodi pivifukwa vimo-i viivi vyevyo vinaupangi-eni ira mubatiziwe?

KODI munomuwomeliwana Yehova Mulungu unoyo unauva-ani mphaso iliyetene yapama, tangani-avo moyo? Kodi munofuna mutonyi-eda ira munomuwomeliwana? Ndila yapama ineyo munapangele nyo vyevyo kuvipeleka wa liye votonyi-eda wa amo-i ira moovipeleka vobatiziwa m’mainjeni. Mwapanga vyevyo munotonyi-eda ira muvolowa m’banja la Yehova. Vyo-arelavo viwa pivyoi Yehova unoyo ngu Babinyu koma teto fwinyu, unoza ausogoleleni koma teto usamalelani chifukwa yoi nyo muli muthwae. (Sal. 73:24; Yes. 43:1, 2) Vipeleka koma teto batiziwa unouva-ani teto mwai wokala na idedi-do yoza kaana moyo oomala usogolo. — 1 Pe. 3:21.

2. Kodi ninakambilana n’ni mukhanila?

² Kodi vikala yongo imo-iwene ineyo inaulepeli-ani batiziwa? Akala chi eno, iziwani ira kamuli ekinyu. Vikala athu amo-i anayo kafuneya chenja ikalelwiwa koma teto mwemo mwaganizelaathu ira kafwanelele batiziwa. Vathawiila aluwa kanotumikela Yehova mwatindi koma teto mosangalala, Kodi munafunjede n’ni wa athu amo-i anayo kabatiziwe muthawi ya anamarumiwa? Tiyemoni nikambilane mavuto anayo kagumanilenaathu moi ninoona vyevyo ninafunjedevo iyo va visazo viwa.

ASAMARIYA KOOBATIZIWA

3. Kodi Asamariya amo-i kafuneya chenja vyongo viivi ira kabatiziwe?

³ Asamariya a muthawi ya Yesu kali gulu laipembezo lelo lafwanyeya wu Sekemu na wu Samariya, mizinda dedo dali wu mponto wa Yudeya. Kaanabatiziwe, Aluwa kafuneya funjeda vyongo vinjinji vyokuza Mawu a Mulungu. Aluwa kakeda roromela mabuku 5 owambeela a m’Baibulo (oromoliwa ira Pentatuke), owambeela va Genesesi mpakana Dotoronomo koma teto mwina buku la Yoswa. Komave aluwa kooyembekezela za wa Mesiya mogwilizana lonjezo la Mulungu lofwanyeya va Dotoronomo 18:18, 19. (Yoh. 4:25) Ira aluwa kabatiziwe kafuneya somedela ira Yesu ngu Mesiya wolonjeziwa. Moi pivyevyo “Asamariya anjinji” kapangileathu. (Yoh. 4:39) Koma Asamariya amo-i kafuneya limbana na vuto lasakulo lelo lali vaari viwa na tundu wa Ayuda.— Luka 9:52-54.

4. Mogwilizana na Vyoira 8:5, 6, 14, Kodi Asamariya amo-i kapangile n’ni Filipo angawalaleele?

⁴ Kodi chin’ni yakami-ile Asamariya ira kabatiziwe? Filipo unoyo ali namalaleya angawalaleele “vya Kristu,” Asamariya amo-i ‘koowachela mawu a Mulungu’ (Welengani Vyoira 8:5, 6, 14.) Aluwa katakoondile vuruwana uthenga wa Filipo ngakale ira liye ali Muyuda. Mwina aluwa kooumbuwela mavesi amo-i a mu Pentatuke anayo kanatonyi-eda ira Mulungu kana sakulo. (Doto. 10:17-19) Aluwa koovuruwana vyevyo Filipo aonga liye vyokuza Kristu moi aluwa koona umboni wotonyi-eda ira Filipo arumiwe na Mulungu. Namalaleya Filipo oopanga vizindikilo vinjinji monga ili-a athu obulela koma teto kumi-a viwanda.— Vyo. 8:7.

5. Kodi ninafunjeda n’ni wa Asamariya?

⁵ Asamariya kookoza koonda vuruwana chifukwa ya sakulo koma teto chifukwa yoi vyevyo Filipo aawandela liye vyali vyailendo. Koma aluwa katalolile ira vyevi viireye. Filipo angawafunji-ile choonadi, aluwa katadimbeliwile moi koobatiziwa. Baibulo linaonga ira: “Koma aluwa kangamuroromele Filipo, unoyo alengeza uthenga wapama wa Umwene wa Mulungu, koma teto woonga vya zina la Yesu Kristu, koobatiziwa, alombwana na a-iyanene”. (Vyo. 8:12) Kodi nanyene munosimikizela ira Mawu a Mulungu chi choonadi koma teto ira a Mboni da Yehova katina sakulo moi kanotonyi-edana chikondi yeniyeni ineyo chi izindikilo ya Akristhu oona? (Yoh. 13:35) Akala chi eno, pangavoni yongo mombaraanya ira mubatiziwe teto kamukaikelenga ira Yehova unoza audaliseni mwabatiziwa.

6. Kodi isazo ya Ruben inaukami-eni avi?

⁶ Ruben wau Germany, abaliwele m’banja la Mboni. Komave angali n’ng’onong’ono liye ookaikela akala uli Mulungu. Koma kodi liye apangile n’ni ira a-iye kaikelawo? Liye angazindikilile ira kaaiziwa vinjinji vakhanila, oopangavo yongo. Liye aongile ira: “Vofunjeda vamekha, ndoosaela ira ndiiziwe vyoona. Ndoofunjeda moweli-eda weli-eda khani yoonga ira vyamoyo vyeere chenja kumela wu vyongo vimo-i.” Ruben oowelenga teto buku la izungu loi Existe um Criador Que Se Importa com Você? Buku leli loomukami-a vinjinji Ruben. Liye ooviwandela ekave ira, ‘Yehova ukalawo moi ngu weniweni.’ Angadowile ona likulu li-u, Ruben oowambeela yamikela vinjinji ubali wavailambo yetene. Angawelele wu Germany, liye oobatiziwa angan’na chaka 17. Akala nanyene munakaikela vimo-iviwa vyene vyevyo mufunjedile nyo, musaelenga m’mabukwi-u. ‘Iziwa vyongo molondola’ unoza uukami-eni ira kamukaikelenga vyongo. (Aife. 4:13, 14) Koma teto mwavwa malipoti okuza chikondi na mgwilizano unoyo ulivo vaari va athu a Yehova muvilambo vyo-iyana iyana, koma teto ona umboni wa vyevi mupingo winyu, munoza muwambeele uwomeliwana vinjinji ubali wa vailambo yetene.

SAULO WAU TARISO OOBATIZIWA

7. Kodi Saulo afuneya chenja maganizo olakweya aavi anayo an’na liye?

⁷ Kaganizelani isazo ya Saulo wau Tariso. Liye ali wofunjeda vinjinji moi oofunjeda malamulo a Iyuda teto ali wochuka. (Agal. 1:13, 14; Afil. 3:5) Vathawi ineyo Ayuda anjinji karoromela ira Akristu mba athu oruni-a, eno Saulo oowazuzumi-a vinjinji Akristu. Vopanga vyevi, liye aganiza ira unapanga ifunelo ya Mulungu. (Vyo. 8:3; 9:1, 2; 26:9-11) Eno ira amuroromele Yesu nobatiziwa koma teto kala Mkristu, Saulo afuneya kozeela ira naliyene unoza azuzumi-iwe.

8. (a) Kodi chin’ni yamukami-ile Saulo ira abatiziwe? (b) Mogwilizana na Vyoira 22:12-16, kodi Hananiya amukami-ile avi Saulo? (Onani teto ithuzithuzi.)

⁸ Kodi chin’ni yamukami-ile Saulo ira abatiziwe? Yesu angaongile na Saulo kumela udimu, Saulo oo-iya ona. (Vyo. 9:3-9) Wa malambo maralu liye kaadja moi vinaoneya ira aganizela vinjinji vyevyo vyamuirelevyo. Vanduli voi uiganizela khanila modii-a Saulo ofiya vosimikizela ira Yesu ngu Mesiya moi o-arelae mbanayo kali muipembezo yoona. Vinaoneya ira Saulo vyoomukuza vinjinji chifukwa yosomedela ira Sitefano aphiwe. (Vyo. 22:20) Vanduli va malambo maralu, wofunjeda m’mo-iwa zina lae Hananiya ooza wa Saulo nomukami-a ira aambeele nawili ona koma teto oomulimbikisa ira abatiziwe mombaraanya. (Welengni Vyoira 22:12-16.) Moviyevi-a Saulo oovwela vyevyo Hananiya amuwandelile liye moi oobatiziwa. — Vyo. 9:17, 18.

9. Kodi munafunjede n’ni wa Saulo?

⁹ Ninokoza funjeda vyongo vinjinji kumela wa Saulo. Liye ookoza lola ira nyada kapena ova athu umulepeli-e batiziwa. Koma liye kaalolile ira vyevi vimuireele. Moviyevi-a, Saulo oochenja moywae nokala Mkristu. (Vyo. 26:14, 19) Liye oofunechecha kala Mkristu ngakale ira ooziwa ira unoza azuzumi-iwe. (Vyo. 9:15, 16; 20:22, 23) Angabatiziwe, liye oopitiliza roromela Yehova ira amukami-enga vilela mayeselo o-iyana-iyana. (2 Akor. 4:7-10) Nanyene teto mwabatiziwa nokala wa Mboni da Yehova, munoza mugumanenga na mayesero anayo kanashisenga iroromelo inyu. Koma Yehova na Yesu Kristu kanoza kaukami-eni ira mupitilizeve kala ororomelaya. — Afil. 4:13.

10. Kodi isazo ya Anna inaukami-eni avi?

¹⁰ Anna aulukulele m’banja la Ikadishi wu Eastern Europe. Am’mae kangabatiziwe, Anna oowavepa ababae ira naliyene teto afunjedenga Baibulo moi oowambeela funjeda angan’na chaka 9. Koma vyevi vyoowambeeli-a mavuto. Abalae a Anna anayo kakala limo-i na banja liwa kangavwile ira liye uwambeela funjeda Baibulo koowambeela muruni-a. Aluwa koona ira pivyonyaswi-a muthu i-ya ipembezo ya makolwae. Anna angakwakwani-ile chaka 12 oovepa ilolezo wa ababae ira abatiziwe. Aluwa koomufuka ira: “Kodi usakulile weka ira ubatiziwe kapena vikala muthu m’mo-iwa unoyo uukanyi-ede? Liye oowasomeda ira, “Ndisakulile meka chifukwa yoi ndinomuwomeliwana Yehova.” Ababae koomulola ira abatiziwe. Anna Angabatiziwe abalae koopitiliza munyoza koma teto mupangela vyongo vimo-i vyankaza. M’mo-i mwa abalayayo oomuwandela Anna ira: “Vyookala pama vyaakale ira unapanga makalelo amo-i otakala kapena kala muthu woruni-a iyanana nokala wa Mboni da Yehova.” Kodi chin’ni yamukami-ile Anna ira avilele? Liye aongile ira, “Yehova oondiva-a kopolo, teto am’manga na ababanga koondikami-a vinjinji.” Anna unolemba thawi do-iyana iyana dedo Yehova ukalile liye amukami-anga vamoywae. Thawi na thawi unowelela va vyongo vyevyo alembile liyevyo ira kadiwalenga mwemo Yehova mwamukami-ele liye. Akala nanyene munaova runi-iwa, muumbuwelenga ira Yehova unoza aukami-eni. — Aheb. 13:6.

KONELIYO OOBATIZIWA

11. Kodi pivyongo viivi vyevyo vyalepeli-e Koneliyo ira abatiziwe?

¹¹ Ninokoza funjeda teto likundo lofuneya va isazo ya Koneliyo. Liye ali msogoleli wa gulu la asilikali a Iroma okwakwana 100. (Vyo. 10:1, mawu a mpedi.) Vinaoneya ira liye ali wochuka mudela liwa koma teto vaari va asilikali. Koma teto “oowava-a athu mphaso dinjinji dachifundo.” (Vyo. 10:2) Yehova oomutumiza namarumiwa Petulo ira amulaleele Koneliyo uthenga wapama. Kodi udindo unoyo Koneliyo an’na liye woomulepeli-a batiziwa?

12. Kodi chin’ni yamukami-ile Koneliyo ira abatiziwe?

¹² Kodi chin’ni yamukami-ile Koneliyo ira abatiziwe? Baibulo linaonga ira liye “oomuova Mulungu limo-i na banja lae.” Koma teto Koneliyo oopempela wa Mulungu mochondelela thawi detene. (Vyo. 10:2) Petulo angamulaleele Koneliyo uthenga wapama, liye limo-i na banja lae koororomela Kristu moi thawi ineyo koobatiziwa. (Vyo. 10:47, 48) Koneliyo kaachedwile chenja vyongo vyetene vyevyo afuneela liye chenja nayolinga yoi alambelenga Yehova limo-i na banja lae. — Yos. 24:15; Vyo. 10:24, 33.

13. Kodi munafunjede n’ni wa Koneliyo?

¹³ Mofwanafwana na Saulo, udindo wa Koneliyo wookoza mulepeli-a ira akale Mkristu. Koma liye kaalolile ira vyevi viireye. Kodi nanyene munofuneya chenja vyongo vimo-i vamoywinyu ira mubatiziwe? Akala chi eno, iziwani ira Yehova unoza aukami-eni. Liye unoza adalise vyevyo munaesaesa nyo panga ira mu-arelenga makundo a m’Baibulo vamoywinyu.

14. Kodi isazo ya Tsuyoshi inaukami-eni avi?

¹⁴ Tsuyoshi wau Japan, afuneela chenja chito ineyo a-inda liye nayolinga yoi abatiziwe. Liye ali wo-arela wa mphuzisi mulukulu vasukulu imo-i yoromoliwa ira Ikenobo ineyo yafunji-a athu vyokuza sakaeda maluwa. Mphuzisi mulukuluyo alepela fwanyeya va malilo amo-iwene, Tsuyoshi ngunoyo aimelela vopanga miyambo da Ibuda. Koma Tsuyoshi angafunjedile choonadi yokuza athu okhwa, ooiziwa ira kanabatiziwe akala unapitilize panga miyambo ngati dedo. Liye oosakula ira kapangenga miyambo da Ibuda. (2 Akor. 6:15, 16) Tsuyoshi ookambilana khanila na mphuzisi mulukuluyo. Kodi vyo-arelavo viwa vyali vyoi avi? Mphuzisi mulukuluyo oosomedela ira Tsuyoshi unokoza pitiliza indanga chito koma oopangangana miyambodo. Moi oobatiziwa vangakade mala chaka imo-i kumela vevo aambeele liye funjeda Baibulo.a Akala nanyene munafuna chenja vyongo vimo-i va khani ya chito ineyo muna-inda nyo ira mumusangalasenga Mulungu, iziwani ira Yehova unoza auva-eni nyo limo-i na banja linyu vyevyo munafuneela nyo. — Sal. 127:2; Mat. 6:33.

ATHU AWU KORINTO KOOBATIZIWA

15. Kodi pivyongo viivi vyevyo vyalepeli-e athu awu korinto ira kabatiziwe?

¹⁵ Athu a muzinda wau Korinto kooiziweya ira kali oomeliwa chuma koma teto a makalelo otakala. Athu anjinji a wewo koopanga vyongo vyevyo kavyamusangalasa Mulungu. Vinakeda oneya ira vyevi vyoopangi-a ira vikale vyorucha wa athu anayo kasakula ira kaambeele mutumikela Yehova. Komave namarumiwa Paulo angawelele muzindola nodowa laleela uthenga wapama woonga vya Kristu, “athu anjinji a wu Korinto, anayo kavwile uthenga wapama, koowambeela roromela moi koobatiziwa.” (Vyo. 18:7-11) Vanduli viwa Mbwiye Yesu Kristu ooneela wa Paulo m’masompenya nomuwandela ira: “Ndikaana athu anjinji muzindola.” Eno Paulo oopitiliza laleela muzindola wa chaka imo-i na afu.

16. Kodi chin’ni ineyo yakami-ile athu amo-i awu Korinto limbana na vyongo vimo-i vyevyo vyawalepeli-e batiziwa? (2 Akorinto 10:4, 5)

¹⁶ Kodi chin’ni yakami-ile athu a wu Korinto ira kabatiziwe? (Welengani 2 Akorinto 10:4, 5.) Mawu a Mulungu koma teto zimu owela unoyo ngwakopolo, oowakami-a ira kachenje vinjinji vyongo vamoywiwa. (Aheb. 4:12) Aluwa koo-iya makalelo otakala monga lezela, ba, koma teto gonana vaari va alombwana koma teto a-iyana okaoka. — 1 Akorinto 6:9-11.b

17. Kodi munafunjede n’ni wa athu awu Korinto?

¹⁷ Ngakale ira athu amo-i awu Korinto kookaana makalelo otakala vinjinji, aluwa kataonile ira pivyorucha ira kachenje nokala Akristu. Aluwa kooesaesa panga tindi ira kapitilizeve enda vandila yopanikiza ineyo inadowa wu moyo oomala. (Mat. 7:13, 14) Kodi nanyene munana limbana na ikalelo yotakala ineyo inaulepeli-ani batiziwa? Kamunafuneya gonja. Mupempelenga wa Yehova ira auva-eni zimu owela nayolinga yoi uukami-eni ira kamulakalakenga vyongo vyotakala.

18. Kodi isazo ya Monika inaukami-eni avi?

¹⁸ Monika wau Georgia, oopanga tindi ira a-iye onga mawu otakala koma teto vuruwana noonela vyosangalasa vyoofwanelela nayolinga yoi abatiziwe. Liye aongile ira: “Ndaanabatiziwe ndoofwanya kopolo dedo ndafuneela miyo ira ndichenje vopempela wa Yehova. Yehova ooiziwa ira ndinofuna panga vyongo vyofwanelela, eno thawi detene oondikami-a koma teto ndisogolela.” Monika oobatiziwa angan’na chaka 16. Kodi nanyene vikala makalelo amo-i anayo munafuneya nyo a-iya ira mutumikelenga Yehova mosomedeleya? Pitilizani pempela wa Yehova ira auva-eni kopolo vyoi muchenje. Yehova unopeleka mooumela zimwae owela. — Yoh. 3:34.

IROROMELO INYU INOKOZA SUSI-A MIMWANGO

19. kodi chin’ni inanikami-e limbana na mavuto okala ngati mimwango? (Onani teto ithuzithuzi.)

¹⁹ Kamukaikelenga ira Yehova unouwomeliwanani moi unafuna ira mukale m’banja lae. Vili eno ngakale ira munogumana na mavuto anayo kanaulepeli-eni batiziwa. Va thawi imo-i Yesu oowandela gulu la ofunjedae ira: “Akala mun’na iroromelo yoyeva mofwanafwana na kongolo ya mpilu, munoza muwande wandela mwangola ira, ‘Venyavo vano udowe vale,’ moi mwangoyo unoza uvenyevo. Vyongo vyetene vinaza vikala vyowandeya wa nyo.” (Mat. 17:20) Athu anayo kavwile vyevi kali kangakalile na Yesu wa chaka doeva, eno iroromelo iwa yali iulukulangave. Koma Yesu oowasimikizela ira akala kanakaena iroromelo yokwakwanela, Yehova unoza aakami-e limbana na mavuto okala ngati mimwango. Moi Yehova unokoza ukami-ani nanyene teto ira mupange vyevi.

20. Kodi visazo vya Akristu awale koma teto vya malambwano vyevyo viromoliwe mukhanila viulimbikisileni avi?

²⁰ Akala muonile ira mavuto amo-i anayo mun’na nyo kanoulepeli-ani batiziwa, esaesani ira muwamali-e mombaraanya. Visazo vya Akristu awale koma teto vya malambwano vinokoza uva-ani kopolo. Visazo viwa viulimbikiseni koma teto ukami-ani ira muvipeleke wa Yehova koma teto batiziwa. Mwapanga vyevi munaza mukala ira musakula yongo yofuneya vinjinji vamoywinyu.