Vyofuka Vyokumela wa Owelenga
Kodi mba “maganizo” aavi anayo Yehova unaze liye a-ele m’murimani mwavilambo vachineneeva?
Vofotokoza vya mwemo isauso ilukulu inazeathu iyambeele, lemba la Chivumbuluso 17:16, 17 linaonga ira: “Nyanga 10 dedo udionilewe dile koma teto ilombo, vinoza viidane na hulelo. Vinoza vitukule vyongo vyae vyetene noli-iya lingali mandave moi linoza lidje minoku dae nolivyi-a na mulo. Chifukwa Mulungu oo-ela pulani m’murimani mwiwa ira kapange mogwilizana na maganizwae koma teto ira kakwakwaneli-ede maganizwiwa ofwanafwanale, vopeleka umweniwa wa ilombo.” Mabukwi-u kookala kafotokozanga ira “maganizo” anayo Yehova unaze liye a-ele m’mirima mwa vilambo mboi aononge vipembezo vyonama.
Komave vanofuneya chenja mwemo navwela iyo likundo leli. “Maganizo” anayo Yehova unaze liye a-ele m’murimani mwa vilambo, mboi “kapeleke umweniwa wa ilombo.” Ira nivwecheche mwemo vyevi vinazeathu viireele, tiyemoni niganizele vyofuka vyo-arelavi.
Kodi ngu mbaani unoyo unaromoliwa muulosila? Ulosila unaonga vya “hule” lelo linaiziweya teto ira “Babulo Mulukulu” moi huleli linaimelela vipembezo vyetene vyonama. Koma “ilombo yofiila vinjinji” inaimelela bungwe logarati-a murendele la League of Nations lelo lambeele inda chito mu 1919, moi vathawiila linaiziweya ira United Nations. (Chiv. 17:3-5) Koma teto “Nyanga 10” dinaimelela maulamulilo etene aathu anayo kanakami-a ilombo inela.
Kodi vali gwilizana oyi avi vaari va hule na ilombo yofiila vinjinji? Huleli ligarati va ilombwela tapulela ira linoikami-a lamulela iliyetene ineyo inafunaathu panga koma teto panga vyevyo huleli linafunaathu.
Kodi chin’ni ineyo inaze iireele huleli? Ilombo koma teto nyanga 10, dedo dinakami-a ilombwela vinoza viidane na huleli. Votonyi-eda uwaliwa, aluwa kanoza kawake chuma ya huleli koma teto tonyi-eda vyongo vyotakala vyevyo huleli lapangaathu. Moi kanoza kapeleke iweluzo ya Yehova wa huleli voonechecha ira lionongiwa. (Chiv. 17:1; 18:8) Anala kanaza kakala mapeto avipembezo vyetene vyonama. Koma vyevi vya-anaireye Yehova unoza apangi-e ira vilambo vipange vyongo vyevyo kavinaireyevo mumbili ya ulamulilo wa athu vailambwela.
Kodi Yehova unaza apangi-a ira vilambo vipange vyongo vyoi avi? Liye unoza a-ele maganizwae, m’murimani mwa nyanga 10 anayo mba maulamulilo aathu. Vyevi vinoza vipangi-e ira maulamulilwala “kapeleke kopolo diwa na ulamulilwiwa wa ilombo yofiila vinjinji” lelo tibungwe la United Nations. (Chiv. 17:13) Kodi vyevi vinatapulela n’ni? Kodi maboma aathu kanaza kasakula ekiwa ira kapeleke kopolo na ulamulilwiwa wa ilombwela? Naari! Ulosila unotonyi-eda ira Mulungu mwinyailo ngunoyo unaze apangi-e vyevi. (Miya. 21:1; erekezelani na Yesaya 44:28.) Kodi wewu unaza ukala chenja wa vang’ono vang’ono wa ulamulilo? Naari! Vyevi vinaza viireya mwazizizi koma teto mombaraanya vinjinji. Vanduli viwa ilombwela inoza i-indi-ede chito kopolo diwa vopeleka iweluzo ya Yehova wa mabungwe etene avipembezo vyonama vowachosa moi katinaza kakalavo teto nawili mpakana walewale.
Ndiye kodi ninadedi-edela ira chin’ni ineyo inaze iireye usogolowu? Kanidedi-edele ira ninoza niambeele vwa khani dotonyi-eda ira mwavang’ono vang’ono maboma kowambeela kami-a vinjinji bungwe la United Nations. Vyevyo ninadedi-edela iyo pivyoi, mwazizizi Yehova unoza apangi-e ira vilambo vipeleke kopolo diwa wa ilombo. Vyevi vyaza viireya nize niiziwe ira isauso ilukulu i-alile vang’ono ambeela. Eno tiyemoni nipitilize kala maso moi nikaleve oganiza pama chifukwa chineneveva vyongo vinochenja mwazizizi. — 1 Ates. 5:6.