Yonatani Ali Olimba Murima Koma Teto Ororomeleya

Mwana wandimuwa wa Mwene Sauli ali Yonatani teto ali silikali olimba murima. Davide oonga ira Yonatani ootamanga kwaranya iombakhanga teto ali wakopolo kwaranya phodogoma. Dambo limo-i Yonatani oona asilikali 20 Aifilisiti kangali vamwango. Liye oomuwandela mtumiki unoyo amutukulela vida ira: ‘Anala-i ninokoza agonji-a. Tiyemo nione akala Yehova unanisimikizele vyevi. Kaniwandela ira nidowe niiziwe ira chi thawi yapama teto ninowagonji-a.’ Thawi ineyo Afilisitayo kookuwa ira: ‘Zani uno niwane!’ Yonatani na mtumikaeyo koogwela vamwangovo moi koowagonji-a.

Voi Yonatani ali mwana oowambeela, liye ali ofwanelela za landa umwene wa Sauli. Koma liye ooiziwa ira Yehova oomusakula Davide moi kaamupan- gela sanje. Yonatani na Davide koogwilizana vinjinji teto koolonjezana ira katetezanenga. Yonatani oomuva-a yowara, supada, uta na lamba votonyi-eda ira ali fwae wa vamurima.

Vathawi imo-iwa, Davide amutawanga Sauli, fwaela oodowa muwandela ira: ‘Limba murima teto kuove iliyetene. Yehova uusakula ira ukale mwene. Ngakale ababanga kanoiziwa vyevi.’ Kodi nyo munofuna mwangan’na fwinyu wapama ngati Yonatani?

Yonatani oo-ela moywae vangozi vofuna mukami-a Davide. Liye ooiziwa vyoi Mwene Sauli oofuna mupha Davide, moi oomuwandela babaeyo ira: ‘Babani munoiziwa ira munochimwi-a? Kodi Davide uchimweleni n’ni ira mufunenga vyomupha?’ Koma Sauli oomulunduwela vinjinji Yonatani. Vangavirile chaka dinjinji, Sauli na Yonatani kookhwela ukondo.

Yonatani angakhwile, Davide oomusaela mwana wa Yonatani zina lae Mefiboseti. Angamufwanyile, oomuwandela ira: ‘Na babawo noogwilizana vinjinji eno ndinousamalela wa moywao wetene. Unakalenga m’mba mwanga teto ninadjelenga limo-i.’ Veva Davide ootonyi-eda ira kamudiwalile Yonatani.