Umwene Unoyo Unaze Ulamulele Mpakana Walewale

Dambo limo-i ma-iyu, Nebukadinezara ooro-a vyoro-a vyodabwi-a. Vyoro-avyo vyoomuvuti-a vinjinji moi ma-iyu anayo kaagonile teto nawili. Vanduli viwa ooitana amasengae nowawandela ira: ‘Ndiwandeleni, ndiro-ile n’ni miyo?’ Amasengayo koomuwandela ira: ‘Muniwandele vyevyo muro-ile nyo moi iyo ninouwandelani vyevyo vyoro-avyo vinatapulelaathu.’ Koma Nebukadinezara oonga ira: ‘Naari. Nyo mundiwandele vyevyo ndiro-ile miyo, mwa-andiwandele ndinouphani.’ Aluwa koomuwandela teto nawili ira: ‘Kaniwandeleni vyoro-avyo moi iyo ninouwandelani vyevyo vyoro-avyo vinatapulelaathu.’ Liye oonga ira: ‘Etene nyen’ne munakeda funa ndinami-a. Kaongani ndiro-ile n’ni?’ Aluwa koomusomeda ira: ‘Kavali muthu unoyo unaiziwe vyevyo muro-ile nyo. Vyevyo kai vyowandeya.’

Nebukadinezara oolunduwa vinjinji moi oolamula ira alombwana etene azelu kaphiwe. Va teto Daniyeli, Sadirake, Mesake, na Abedinego kophiwa. Daniyeli angavwile vyevi oomuvepa mwene ira imuva-e thawi ira aone vyevyo unapange liye. Vanduli viwa liye na afwayale koopempela wa Yehova ira aakami-e. Kodi Yehova apangile n’ni?

Zela m’masomphenya, Yehova oomuwandela Daniyeli vyoro-a vya Nebukadinezara koma teto vyevyo vyoro-avyo vyatapulelaathu. Dambo lo-arela Daniyeli oodowa wa atumiki a mwene nowawandela ira: ‘Kamuphe muthu uliwetene. Miyo ndinodowa ndamuwandele mwene vyevyo uro-ile liye.’ Atumikayo koomulanda nomudowana wa mwene. Angafiile wewo Daniyeli oomuwandela mwene ira: ‘Mulungu uuiziwi-ani vyevyo vinaze viireye usogolo. Vi pivyevyo mwaro-ile nyo: Moona ifanizilo ilukulu. Muruwa wali wagolide, vamurimani na mandae vyali vya siliva, ingulu na tambala dae vyali vya mkuwa, mendo dae dali da isulo teto manyalwae kali aisulo yotangani-eya na ulongo. Vanduli viwa libwe looduliwa umwango moi loovaza manyalo a ifaniziloyo. Ifaniziloyo yoophwanyeya notanduwa tumbulu lelo lapurumuwile na lipevo. Vanduli viwa libwen’le looulukula nokala mwango ulukulu moi loozaala vailambo yetene yavati.’

Vanduli viwa Daniyeli oonga ira: ‘Vyoro-a vinyu vinatapulela ira: Umweninyu ngu muru wa golideyo. Siliva unaimelela umwene unoyo unaze ukalevo vanduli vinyu. Vanduli viwa vanoza vaze umwene umo-iwa okala ngati mkuwa unoyo unaze ulamulele va ilambo yetene. Vanduli va umwene unoyo vanoza vaze umwene olimba ngati isulo. Vomari-a vanoza vaze umwene ogawaneya, mbali dimo-i dinoza dikale dolimba ngati isulo koma dimo-i dinoza dikale doolimba ngati ulongo. Libwe lelo laulukulile nokala mwango, linaimelela Umwene wa Mulungu. Umweneyo unoza uphwanye maumwene etene moi unoza ukalevo mpakana walewale.’

Nebukadinezara angavwile vyevi ookokora noorama mpakana kovae vati. Vanduli viwa oonga ira: ‘Mulungwawo ngunoyo ukami-ile ira uiziwe vyevyo vyoro-avi vinatapulelaathu. Kavili teto Mulungu m’mo-iwa ofwanafwana na liye.’ Nebukadinezara oomuva-a Daniyeli udindo woi aing’anelenga athu azelu. Oomu-ela teto kala olamulela muigawo yetene ya Babulo. Kodi muona mwemo Yehova mwasomedele liye pempelo la Daniyeli?