Kodi Ninapange Avi Ira Nipelekenga Malangizo Apama?

1. Kodi mbaani unoyo unafuneya peleka malangizo? Fotokozani.

KODI munoomeluwa peleka malangizo wa athu amo-i? Athu amo-iwa kavinaarucha peleka malangizo, koma athu amo-iwa kanoova koma teto katinamasuwa peleka malangizo wa athu amo-i. Kaya vyongo vili avi, thawi detene ninofuneela pelekanga malangizo. Chifukwa n’ni? Chifukwa Yesu oonga ira o-arelae kanoza kaiziweye akala kanaomeluwana. (Yoh. 13:35) Moi ndila imo-i ineyo ninatonyi-edele iyo ira ninowaomeluwana abali na arongoli-u, kuwava-a malangizo akala vanafuneela panga eno. Mawu a Mulungu kanoonga ira: “Fwao wapama ngunoyo unauva-a malangizo moovira m’mbali.” — Miya. 27:9.

2. Kodi andimuwa kanafuneya kozeya panga n’ni, nanga chifukwa n’ni? (Onani teto bokosi loi “Peleka Malangizo va Misonkano da Muwari Mwa Mulungu.”)

² Andimuwa kanafuneya iziwa mwemo kanapelekeleathu malangizo apama, koma teto okami-a wa athu amo-i. Yehova na Yesu koopeleka udindo wa alombwana anala osamalela khosa mupingo. (1 Pe. 5:2, 3) Ndila imo-i ineyo andimuwa kanapangeleathu vyevi, kupeleka malangizo okumela m’Baibulo vokamba khani mupingo. Aluwa kanopeleka teto malangizo wa muthu uliwetene vaekha, koma teto kanokami-a athu anayo ka-iile tumikela Yehova ira kawelele mupingo. Ndiye kodi etene iyene koma teto andimuwa ninapange avi ira nipelekenga malangizo apama?

3. (a) Kodi ninapange n’ni ira nikale mulangizi wapama? (Yesaya 9:6; onani teto bokosi loi “Nimusazi-edenga Yesu Napelekanga Malangizo.”) (b) Kodi ninakambilana n’ni mukhanila?

³ Ninokoza funjeda mwemo ninapelekelenga iyo malangizo wa athu amo-iwa, vofunjeda mwemo athu oromoliwa m’Baibulo mwapelekelaathu malangizo. Koma teto vofunjeda isazo ya Yesu. Liye thawi detene oopeleka malangizo apama vinjinji. Zina limo-i lelo Yesu ava-iwe liye lali loi “Mulangizi Odabwi-a.” (Welengani Yesaya 9:6.) Mukhanila ninokambilana vyevyo ninapange iyo, akala nivepiwe ira nipeleke malangizo, koma teto vyevyo ninapange iyo, akala ninafuna peleka malangizo naanavepiwe. Ninokambilana teto upama opeleka malangizo va thawi yofwanelela koma teto mundila yofwanelela.

MUTHU M’MO-IWA ANIVEPA MALANGIZO

4-5. Muthu m’mo-iwa anivepa malangizo, kodi chiyofuka iivi ineyo ninafuneya iyo vifuka? Pelekani isazo.

⁴ Kodi nipangenga avi muthu m’mo-iwa anivepa malangizo? Thawi dinjinji muthu anivepa malangizo, ninosangalala moi ninofuna peleka malangizwayo va thawi ineyo. Koma naanapeleke malangizwayo, ninafuneela ganizela akala ninaiziwa pama khaniyo ira nikwakwani-e peleka malangizo apama, koma teto okami-a. Moi ninafuneela vifuka ira, kodi miyo ndili ofwanelela peleka malangizo va khani inela? Thawi dimo-i ndila yapama inakala mukami-a muthuyo ira afwanye muthu m’mo-iwa unoyo unamuva-e malangizo ofwanelela va khaniyo.

⁵ Nierekeze ira fwinyu ukaana marenda alukulu. Ndiye unauwandelani ira uwambeela saela mitundu da mirombwe dedo unafuna liye ira awachelenga. Vanduli viwa unaaufukani ira, kodi mirombwe dapama tiivi? Ngakale ira vikala mirombwe dedo munadiomeluwena nyo, nyoovo kamuli dokotala, koma teto kamwafunji-iwe kami-a athu obulela. Ndila yapama yomukami-ela fwinyuyo kumusaelela dokotala kapena muthu unoyo unamukami-e.

6. Chifukwa n’ni chipama ambeela dedi-eda naanapeleke malangizo?

⁶ Ngakale nionanga ira nili ofwanelela peleka malangizo va khani imo-iwene, chipama dedi-a vang’ono naanamusomede muthu unoyo univepile malangizoyo. Ninaonga eno chifukwa yoi lemba la Miyambo 15:28 linaonga ira: “Murima wa muthu olungama unowambeela ganiza waanasomede.” Nanga bwanji akala ninaiziwa yosomeda iwa? Ninafuneelave dedi-a vang’ono ira nisaele, nipempele koma teto iganizela pama khaniyo. Napanganga vyevi malangizwi-u kanoza kakale okami-a vinjinji, koma teto kanoza kakale ogwilizana vinjinji na vyevyo Yehova Mulungu unafuna liye. Tiyemoni nione isazo vakhanila wa namaongela Natani.

7. Kodi ninafunjeda n’ni va isazo ya namaongela Natani?

⁷ Mwene Davide oonga na namaongela Natani ira oofuna mumangela kachisi Yehova. Mombaraanya Natani oomuwandela ira unokoza manga kachisiyo. Koma yowambeela Natani oofuneela fukeda wa Yehova. Chifukwa n’ni ninaonga eno? Chifukwa Yehova kaafuna ira Davide amange kachisiyo. (1 Lim. 17:1-4) Monga mwemo nionele iyo va khani inela, navepiwa malangizo chizelu ganizela “naanaonge.” — Yak. 1:19.

8. Kodi chifukwa imo-iwa yonipangi-a kala osamala napelekanga malangizo choi avi?

⁸ Tiyemoni teto nione chifukwa imo-iwa yonipangi-a kala osamala napelekanga malangizo. Akala vimo-iviwa vyene vyotakala vinaireye chifukwa yamalangizo anayo nipelekile iyo, na-iyene teto ninokoza kaana mulandu. Eno pivyofuneya vinjinji ira nikalenga osamala naanapeleke malangizo wa muthu.

PELEKA MALANGIZO VA THAWI INEYO KANIVEPIWE

9. Kodi andimuwa kanafuneya simikizela n’ni kaanapeleke malangizo? (Agalatiya 6:1)

⁹ Thawi dimo-i andimuwa kanafuneya pelekanga malangizo wa abali na arongola anayo kaambeele volowela va “ndila yolakweya.” (Welengani Agalatiya 6:1.) Thawi dimo-i muthu unokoza sakula vyongo vyolakweya vyevyo vanduli viwa vinokoza pangi-a ira apange chimo lilukulu. Andimuwa kanafuneya mukami-a muthuyo pitiliza mutumikela Yehova, koma teto mukami-a ira aendenga vandila yodowa umoyo oomala. (Yak. 5:19, 20) Koma ira malangizwiwa kakale okami-a, yowambeela aluwa kanafuneya simikizela akala muthuyo uwambeele volowela va ndila yolakweya. Yehova unolola ira uliwetene asakulenga vyongo mogwilizana na ikumbumtimae.(Arom. 14:1-4) Koma kodi andimuwa kazindikila ira muthu m’mo-iwa upanga vyongo vimo-iviwa vyene vyevyo vinaononge usamwalae na Yehova kanamuva-e avi malangizo?

10-12. Kodi andimuwa kanapange n’ni kapelekanga malangizo wa muthu unoyo kawavepile? Pelekani isazo. (Onani teto ithuzithuzi.)

¹⁰ Kavinakala vyokweya ira andimuwa kapeleke malangizo wa muthu unoyo kawavepile. Chifukwa n’ni ninaonga eno? Namarumiwa Paulo oonga ira muthu unokoza volowelanga undila yolakweya moozindikila. Eno andimuwa yowambeela kanafuneya mukozeeli-a muthuyo ira aawachele malangizwayo.

¹¹ Peleka malangizo naanavepiwe uli ngati zala mbewu va teya yolimba. Mulimi aanazale mbewu va teya yolimba vinjinji unaambeelecha tipula teya. Vyevi vinopangi-a ira teyeyo ikale yofewa koma teto ikale yowandeya zalavo mbewu. Vanduli viwa uno-elela ma-inje va mbewudo ira diulukulenga. Mofwanafwana na vyevi, vikala vyongo vinjinji vyevyo ndimuwa unafuneya liye panga apelekanga malangizo aanavepiwe na yolinga yoi muthuyo aawachele malangizwayo. Mwaisazo, ndimuwa unokoza sakula thawi yapama yoi aonge na muthuyo, nomusimikizela ira unomufunela vyapama koma teto unomuomeluwana, moi vanduli viwa unokoza muwandela ira vikala vyongo vimo-i vyevyo unafuna liye ira akambilane na liye. Mulangizi aiziweyanga ira ngwachikondi koma teto ooma murima, vinokala vyoorucha ira athu amo-iwa kawachele malangizwae.

¹² Vokambilanavo, ninokoza onga ira ndimuwoyo unokoza pitiliza fewi-a teya vomuumbucha muthuyo ira uliwetene unolakwi-a vyongo moi unofuneela malangizo thawi dimo-i. (Arom. 3:23) Mofaasa koma teto mwaulemu ndimuwoyo unokoza mutonyi-eda m’baliyo malemba vomuwandela ira uwambeela volowela vandila yolakweya. M’baliyo azindikila lakwa wae, ninokoza onga ira ndimuwoyo “unokoza zala mbewu” vomufotokozela movweya pama vyevyo unafuneya liye panga ira asakaede nawili vyongo. Vomari-a, ndimuwoyo unokoza “elela” ma-inje mbewu vomuyamikela m’baliyo kumela vati vamurima koma teto pempela limo-i na liye. — Yak. 5:15.

13. Kodi andimuwa kanasimikizele avi ira muthu uvwechecha malangizo anayo kamuva-ileathu?

¹³ Thawi dimo-i vinokoza wandeya ira opeleka malangizoyo unaonga vyongo vimo-i koma unoyo unava-iwa malangizoyo vwanga vyongo vimo-i. Kodi andimuwa kanapange avi ira kasimikizele akala vyevyo kanaongaathuvyo vivweile? Aluwa kanokoza panga vyoi kamufuke vyofuka mwazelu koma teto mwaulemu. (Nam. 12:11) Vyosomeda vyevyo unasomede liye vinokoza akami-a andimuwayo iziwa ira muthuyo uvwechecha malangizwayo kapena naari.

PELEKA MALANGIZO VA THAWI YOFWANELELA KOMA TETO MUNDILA YOFWANELELA

14. Chifukwa n’ni kaninafuneya peleka malangizo nangalunduwile? Fotokozani.

¹⁴ Etene iyene kanili angwilo, eno thawi dimo-i ninokoza onga kapena panga vyongo vyevyo vinakumudwi-e athu amo-iwa. (Akol. 3:13) Baibulo linaonga ira thawi dimo-i muthu unokoza onga kapena panga vyongo vyevyo vinanipangi-e ira nilunduwe (Aife. 4:26) Komave niesaesenga ira kanipelekenga malangizo nangalunduwile. Chifukwa n’ni ninaonga eno? Ninaonga eno chifukwa yoi “muthu unoyo unaonga angalunduwile kanapanga vyongo mogwilizana na chilungamo ya Mulungu.” (Yak. 1:20) Napelekanga malangizo nangalunduwile, vinakeda pangi-a ira vyongo vitakale vinjinji. Koma vyevi kavinatapulela ira kaninafuneya mufotokozela muthu unoyo unipangi-ile ira nilunduwe kapena teto fotokoza mwemo ninavwela iyo m’murimani. Koma ninafuneya dedi-a ira murimi-u ukale m’malo naanaonge iliyetene na muthuyo. Tiyemoni nione isazo ya Elihu unoyo apelekile malangizo apama wa Yobu.

15. Kodi ninafunjeda n’ni va isazo ya Elihu? (Onani teto ithuzithuzi.)

¹⁵ Wamalambo angasene, Elihu akeda muvuruwana Yobu vevo avi-elela liye unduli vowasomeda afwae aralu anayo kamuimba mulandu. Liye oomuvwela chisoni Yobu. Koma vevo Yobu avi-elela liye unduli ira ali oolakwa, liye oonga vyongo vinjinji vyonama vyokuza Yehova koma teto akeda ganizela vyongo vinjinji vyokuza liye eka moi vyevi vyoopangi-a ira Elihu alunduwe vinjinji. Komave ngakale vyali eno, Elihu oodedi-eda mpakana thawaye yoonga yangakwakwanile moi oopeleka malangizo wa Yobu mooma murima, mofaasa koma teto mwaulemu. (Yobu 32:2; 33:1-7) Isazo ya Elihu inonifunji-a likundo lofuneya la choonadi loi: Malangizo kanafuneya pelekiwanga va thawi yofwanelela koma teto mundila yofwanelela, mwaulemu koma teto mwachikondi. — Nam. 3:1, 7.

PITILIZANI PELEKA KOMA TETO WACHELA MALANGIZO

16. Kodi ninafunjeda n’ni va Salimo 32:8?

¹⁶ Lemba losogolela khanila linaonga ira “Yehova unopeleka malangizo koma teto niing’anela.” (Welengani Salimo 32:8.) Vyevi vinatonyi-eda ira liye unopitiliza nikami-a. Yehova kanakeda niva-a malangizo koma unonikami-a. Inela chi isazo yapama vinjinji wa iyo. Nakaana mwai opeleka malangizo wa athu amo-i, nimusazi-edenga Yehova vowalimbikisa athu anayo niava-ile iyo malangizwayo koma teto akami-a ira kasakule vyongo mwazelu.

17. Kodi andimuwa anayo kanapeleka malangizo okumela m’Baibulo, kanaelekezeliwa na n’ni? Fotokozani. (Yesaya 32:1, 2)

¹⁷ Va thawi ila kwaranya wale letene, ninafuneya kala okozeya peleka koma teto wachela malangizo. (2 Tim. 3:1) Andimuwa anayo kanapeleka malangizo okumela m’Baibulo, kali ngati “mi-inje muilambo yookaana ma-inje.” (Welengani Yesaya 32:1, 2.) Afwi-u anayo kanaiziwa vyevyo ninafuneela iyo koma teto niwandela vyevyo ninafuna iyo vwa, kanoniva-a mphaso ya tengo wavadimu vinjinji ngati “maapozi m’mbale da siliva.” (Miya. 25:11) Eno etene iyene tiyemoni nipitilize funjeda vyevyo ninapange iyo ira nipelekenga koma teto wachela malangizo apama.