Mumusazi-edenga Yehova Vakhani Yoviyevi-a

1. Chifukwa n’ni viyevi-a wa Yehova kopangi-a chidwi?

MWAGANIZELA vya athu anayo kali vaudindo malambwano, kodi munoona ira mboviyevi-a? Kai kwenikweni. Koma Yehova unoyo ngwakopolo detene ngoviyevi-a. (Sal. 113:5-8) Kavali muthu uliwetene oviyevi-a kwaranya Yehova. Liye kai ovikuza ngakale vang’ono. Mukhanila ninokambilana ndila 4 dedo Yehova unatonyi-edela liye ira ngoviyevi-a vinjinji. Ninoona mwemo Yesu unamusazi-edela liye Babae, vakhani yoviyevi-a. Kambilana vyevi unonikami-a ira nikale vausamwali olimba na Yehova, koma teto ira nikalenga oviyevi-a vinjinji ngati liye.

YEHOVA NGOKOZEYA NIVURUWANA THAWI DETENE

2. Kodi lemba la Salimo 62:8 linaniwandela n’ni vyokuza Yehova? (Onani teto ithuzithuzi .)

² Thawi dinjinji athu onyada katinavuruwana vya afwiwa. Vili eno chifukwa yoi kanopanga vyongo mookaana chifundo chifukwa kanoviona ira mbavadimu, moi vyevi vinopangi-a ira athu amo-i kaapewenga. Koma Yehova ngo-iyana vinjinji na athu anala. Liye ngoviyevi-a moi kaninavuteya fiya wa liye nomuwandela vya m’murimani mwi-u. (Welengani Salimo 62:8.) Mofwanafwana na baba wachikondi unoyo unakala okozeya vuruwana nkhawa da a-imae, Yehova ngokozeya vuruwana mapempelwi-u. Moi oopangi-a ira mapempelo anjinji a atumikae ororomeleya kalembiwe m’Baibulo, tonyi-eda ira liye ngokozeya nivuruwana. (Yos. 10:12-14; 1 Sam. 1:10-18) Koma kodi ninapange avi akala thawi dimo-i ninaviona ira nili oofwanelela onga na Yehova?

3. Chin’ni inanisimikizela ira Yehova unofuna ira nipempelenga wa liye thawi detene?

³ Ninokoza pempela wa Yehova ngakale vevo ninaviona iyo ira nili oofwanelela ira liye aniomeliwengana. Chifukwa n’ni ninaonga eno? Mufanizo la mwana ovolowela, Yesu oomuerekezela Yehova na baba wachifundo, unoyo mwanae alakwi-ile vyongo vinjinji moi oovivwa ira kai ofwanelela ira babae unokoza mulola ira awelele vande. Ndiye kodi baboyo apangile avi mwanae angawelele vande? Yesu aongile ira baboyo angakede muona mwanoyo “oomutamangela nomukumbarela koma teto mukhisa mwachikondi.” (Luka 15:17-20) Yehova uli ngati baba unola. Chifukwa yoi ngoviyevi-a akeda vwa athu kavivwelanga chisoni chifukwa ya vyolakwa vyevyo kapangileathu kapena nkhawa kapempelanga, liye unowavuruwana mwachelu. (Malilo 3:19, 20) Liye unowatamangela mwachifundo ngati mwemo babole apangile liye, nowalimbikisa koma teto asimikizela ira unowaomeliwana koma teto unowapangela chifundo. (Yes. 57:15) Koma kodi Yehova ‘unanitamangela’ avi malambwano? Liye uno-indi-eda chito andimuwa, abali-u anayo mba Amboni koma teto Akristu afwi-u. (Yak. 5:14, 15) Yehova unopanga vyetene vyevi chifukwa unofuna ira nikale va usamwali wapama na liye.

4. Kodi Yesu atonyi-edile avi ira oofuna ira athu kakalenga omasuwa ongi-ana na liye?

⁴ Yesu oomusazi-eda Babae. Liye ali oviyevi-a ngati Babae. Mbaona angali vailambwela, athu koomasuwa ongi-ana na liye. Moi kataova mufuka vyofuka. (Maliko 4:10, 11) Aavepa athu ira kafotokoze maganizwiwa va khani imo-iwene, aluwa koofotokoza momasuwa mwemo kavwelaathu. (Mat. 16:13-16) Moi kalakwi-a vyongo vimo-iviwa vyene, aluwa kataova ira mwina unowanyanyuwela chifukwa kooiziwa ira Yesu ngwachifundo, ooma murima koma teto oleza murima. (Mat. 17:24-27) Kai vyodabwi-a ira o-arela a Yesu koomuiziwa pama Yehova chifukwa yoi Yesu oomusazi-eda vinjinji Babae. (Yoh. 14:9) Aluwa koofunjeda ira Yehova kaali ngati asogoleli aipembezo anayo kali ankhaza, onyada koma teto ovigweli-a. M’malo mwiwa liye ali oviyevi-a koma teto okozeya vuruwana athu amo-iwa.

5. Kodi viyevi-a unanikami-e avi ira athu kakalenga omasuwa ongi-ana na iyo?

⁵ Kodi ninamusazi-ede avi Yehova? Naesaesanga kala oviyevi-a, vinakala vyoorucha ira nikale teto okozeya vuruwana athu amo-iwa. Viyevi-a unokoza nikami-a ira nipewe makalelo anayo kanapangi-e ira kanivuruwanenga vyoonga vya athu amo-iwa monga sanje, nyada koma teto ookululuka. Koma unokoza nikami-a ira nikale achifundo, oleza murima koma teto okululuka. Makalelo anala kanopangi-a ira athu kativuteyenga nifiyeda. (Akol. 3:12-14) Simbwasimbwa andimuwa kanafuneya esaesa ira kakale ovwa vyoonga vya athu amo-iwa. Ira vyevi viwandeye aluwa kanafuneya fwanyeya vaari va abali na arongola. Vyevi vinatapulela ira aluwa kanafuneya esaesa ira kafwanyeyenga vamisonkano davamaso na vamaso m’malo movuruwana va vipangizo vyamakono vo-okala chifukwa yovweya. Akala pivyowandeya kanafuneya esaesa ira kavolowenga mu utumiki limo-i na abali koma teto arongola. Vyevi vinokoza pangi-a abali na arongolayo ira kaaiziwenga pama koma teto ira kakalenga omasuwa avepa likami-edo vathawi ineyo kanafuneelaathu.

YEHOVA NGOLOLELA

6-7. Pelekani visazo vyotonyi-eda ira Yehova ngokozeya chenja vyongo atumikae kamuvepa vimo-iviwa vyene.

⁶ Athu anjinji onyada katinakala ololela kapanganga vyongo na athu amo-iwa. Koma ngakale ira Yehova ngwavadimu kwaranya uliwetene, liye ngoviyevi-a ololela koma teto okozeya chenja. Kaganizelani mwemo apangele liye vyongo na Miriamu unoyo ali murongolae wa Mose. Liye limo-i na Aroni kooambeela dandaula vyokuza Mose, unoyo aimelela Yehova. Veva ninokoza onga ira Miriamu kaalemekeza Yehova. Vyo-arelavo viwa vyali vyoi Yehova oomulunduwela Miriamu, vyevyo vyapangi-ile ira abulele khate. Koma Aroni oochondelela m’malo mwa Miriamu koma teto Mose oovepa Yehova ira amuchili-e murongolioyo. Ndiye kodi Mulungu apangile n’ni? Chifukwa yoi Yehova ngoviyevi-a, oovwela vyevyo Aroni na Mose kavepileathu moi oochenja ilango ineyo amuva-ile liye Miriamu nomuchili-a. — Num. 12:1-15.

⁷ Yehova ootonyi-eda ira ali oviyevi-a na mwemo apangele liye vyongo na Mwene Hezekiya. Zela mwa anamaongela Yehova oomuwandela Mwene Hezekiya ira unokhwa. Koma Hezekiya angavwile vyevyo, oomuvepa Yehova wu aulanga ira amuchili-e. Mwachifundo Yehova oomusomeda, moi oomuenjedela chaka dimo-i 15. (2 Mam. 20:1, 5, 6) Viyevi-a oopangi-a ira Yehova apange vyongo mwachifundo koma teto mololela.

8. Kodi pivisazo viivi vyevyo vinatonyi-eda ira Yesu ngololela? (Maliko 3:1-6)

⁸ Yesu oomusazi-eda Babae. Angali vailambwela, Yesu oopangela vyongo vyapama athu anayo kafuneela likami-edo. Mwaisazo, oochili-a athu vadambo la Sabata ngakale ira asogoleli aipembezo anayo kali ouma murima katafuna ira apange vyevyo. (Welengani Maliko 3:1-6.) Monga muru wa pingo, Yesu ngololela koma teto unopanga vyongo mwachifundo. Mwaisazo, athu amo-i mupingo kapanga chimo lilukulu unowalezela murima koma teto ava-a thawi yokwakwanela ira kalape. — Chiv. 2:2-5.

9. Kodi ninapange avi ira nikale ololela? (Onani teto ithuzithuzi.)

⁹ Kodi ninamusazi-ede avi Yehova? Ninafuneela esaesa ira niganizenga koma teto panga vyongo ngati Yehova va khani yololela. (Yak. 3:17) Makolo anayo kanamusazi-eda Yehova katinadedi-edela ira a-imiwa kapangenga vyongo vyevyo katinavikwakwani-e. Isazo vakhanila ngu Yakobo unoyo khanae ilembiwe va Genesesi 33:12-14. Makolo oviyevi-a koma teto ololela kanafuneela esaesa ira kapewenga erekezela vyevyo mwaniwa unapanga liye na vyevyo mwaniwa m’mo-iwa unapanga liye. Naaluwene teto andimuwa kanafuneya kala ololela. Ndila imo-i ineyo kanapangeleathu vyevi kusomedela vyevyo andimuwa amo-iwa kasakulileathu akala panga vyevi kunasempana na makundo a m’Baibulo. (1 Tim. 3:2, 3) Etene iyene ninafuneela esaesa vuruwana maganizo a athu amo-iwa ngakale ira ninoona vyongo mo-iyana. (Arom. 14:1) Etene mupingo ninafuneya esaesa ira ‘athu etene kaiziwe vyoi nili ololela.’ — Afil. 4:5.

YEHOVA NGOLEZA MURIMA

10. Kodi Yehova unatonyi-eda ira ngoleza murima mu ndila diivi?

¹⁰ Mwina munoona ira thawi dinjinji athu onyada katinasangalala kawandeliwa ira kadedi-e. Nyada unopangi-a ira katikalenga oleza murima. Koma vyevi pivyo-iyana vinjinji na Yehova. Liye ngoleza murima vinjinji kwaranya uliwetene. Mwaisazo muthawi ya Nowa, Yehova oonga ira unodedi-a chaka 120 aanaononge athu otakala. (Gen. 6:3) Vyevi vyoomuva-a mwai Nowa oyi akaena thawi yobala a-ima, alela koma teto manga ingalawa limo-i na banja lae. Vangavirile thawi ngelo wa Yehova oomuvuruwana Abulahamu moleza murima vevo amufuka liye vyokuza onongiwa wa Sodomu na Gomora. Aakale ira ngelola ali onyada oonga ira, ‘Chifukwa n’ni unandifuka vyofuka vyevi?’ Koma vosazi-eda Yehova, ngeloyo oomulezela murima Abulahamu. — Gen. 18:20-33.

11. Mogwilizana na 2 Petulo 3:9, chifukwa n’ni Yehova unapanga vyongo moleza murima malambwano?

¹¹ Malambwano teto Yehova unotonyi-eda ira ngoviyevi-a vokala oleza murima. Liye unana dedi-edela thawi ineyo asakulile liye ira mapeto kaze kafiye. Chifukwa n’ni unaleza murima? “Chifukwa kanafuna ira muthu uliwetene aonongeye, koma unafuna ira athu etene kalape.” (Welengani 2 Petulo 3:9.) Kodi leza murima wa Yehova kuna phindu? Ukaana phindu. Chifukwa vikala athu mamilioni anjinji amurima wapama anayo kasakulile ira kakale asamwalae. Moi ninodedi-edela ira athu amo-iwa anjinji kanopanga teto vyevi. Komave leza murima wa Yehova ukaana malile. Liye unoomeliwa athu koma kai olekelela moi kanaza alola ira athu otakala kapitilizeve kalavo mpakana walewale. — Aheb. 2:3.

12. Kodi Yesu unasazi-eda avi leza murima wa Yehova?

¹² Yesu ukala amusazi-edanga Babae. Liye ukala asazi-edanga leza murima wa Yehova wa chaka masauzande anjinji. Yesu ukala amuonanga Satana aonganga vyonama vinjinji vyokuza Yehova koma teto atumikae ororomeleya. (Gen. 3:4, 5; Yobu 1:11; Chiv. 12:10) Liye ukala teto aonanga athu anjinji kavuteyanga vinjinji moi vinaoneya ira unofunechecha “ira aononge chito da Mdjerekezi.” (1 Yoh. 3:8) Chin’ni inamukami-a Yesu ira adedi-e moleza murima ira Yehova amuva-e ilolezo yoi aononge chito da Mdjerekezi mpakana walewale? Chifukwa imo-i ineyo inapangi-a vyevi chi yoi liye ngoviyevi-a. Liye unoiziwa ira ngu Yehova eka unoyo un’na udindo osakula thawi yoi mapeto a ilambwela kafiye. — Vyo. 1:7.

13. Kodi Yesu atonyi-edile leza murima wa anamarumiwae mundila diivi, nanga chifukwa n’ni?

¹³ Yesu angali va ilambwela oopanga teto vyongo moleza murima na anamarumiwae. Mwaisazo, vevo kakanganaathu ira ndimuwa mbaani, Yesu kaaonile ira mbolepeleya, koma m’malo mwiwa oopitiliza alezela murima. (Luka 9:46; 22:24-27) Liye oororomela ira vira wa thawi aluwa kooza kachenje nokala ororomeleya. Kodi nanyen’ne teto mukala mulakwi-anga vyongo vimo-iviwa vyene moweli-edaweli-eda? Akala chi eno, kodi munoyamikela ira mukaana Mwene oviyevi-a koma teto oleza murima?

14. Kodi ninapange avi ira nikale oleza murima?

¹⁴ Kodi ninamusazi-ede avi Yehova? Nakaana “maganizo a Kristu,” vinakala vyo-orucha ira niganizenga koma teto panga vyongo ngati Yehova. (1 Akor. 2:16) Ndiye chin’ni inanikami-e ira nikaena maganizo a Kristu? Ninafuneya welenganga mabuku a uthenga wapama, ganizelenga vyevyo niwelengile iyovyo, noona mwemo vinanikami-eleathu iziwa maganizo a Yesu vakhani do-iyana-iyana. Moi ninafuneya pempela wa Yehova ira anikami-e na yolinga yoi nikale oviyevi-a koma teto oleza murima ngati Yesu. Nakaana maganizo ngati a Yesu, ninoza niesaese musazi-eda Yehova vakhani yovilezela murima iyo eki-u koma teto alezela murima athu amo-iwa. — Mat. 18:26-30, 35.

YEHOVA UNOWALEMEKEZA ATHU OVIYEVI-A

15. Kodi Yehova upangile avi vyongo mogwilizana na mawu ofwanyeya va Salimo 138:6?

¹⁵ Welengani Salimo 138:6. Athu oviyevi-a kookaana mwai ulukulu chifukwa kanoiziweya na Olamulela Mulukulu wa ilengedwe yetene. Tiyemoni nione visazo vya athu oyeva anayo Yehova aalemekezile liye mundulimu. Amo-i mwa athu anala kaninaaiziwa pama, koma khani diwa doolembiwa m’Baibulo. Yehova oomuwandela Mose ira alembe khani ya kapolo m’mo-iwa ororomeleya zina lae Debora. Liye oo-inda chito mororomeleya wu banja la Isaki koma teto wu banja Yakobo wa chaka dotamangela 125. Ngakale ira kaninaiziwa vinjinji vyokuza muzimaila, Yehova oonechecha ira Mose ulemba m’Baibulo vyongo vyokuza mwemo athu mwamuomeliwanaathu. (Gen. 24:59; 35:8, mawu a m’pedi.) Vangavirile chaka dinjinji, Yehova oomusakula m’busa waizombwe zina lae Davide ira akale mwene ya tundu wa Isaraeli. (2 Sam. 22:1, 36) Yesu angakede baluwa wene, Yehova oowalemekeza abusa oviyevi-a vowatumizela angelo ira kaaiziwi-e vyoi muzinda wavakwikwi wa Betelehemu, mubaluwa mwana unoyo unaze akale Mesiya. (Luka 2:8-11) Koma teto Yosefe na Mariya kangamudowilena Yesu wu kachisi, Yehova oomulemekeza Simiyoni na Ana anayo kali athu okalamba vowaoni-a mwanae. (Luka 2:25-30, 36-38) Vyevi vinatonyi-eda ira, “ngakale ira Yehova ngwavadimu vinjinji, unowaona athu oviyevi-a”

16. Kodi Yesu asazi-edile avi mwemo Babae mwapangela liye vyongo na athu amo-iwa?

¹⁶ Yesu unomusazi-eda Babae. Mofwanafwana na Babae, Yesu unolemekeza athu oviyevi-a. Liye oofunji-a athu “oofunjeda koma teto athu wamba” choonadi yokuza Umwene wa Mulungu. (Vyo. 4:13; Mat. 11:25) Liye oochili-a athu obulela moi aachili-anga, oowalemekeza teto. (Luka 5:13) Vama-iyu ogomi-eda a moywae, Yesu oo-ambi-a manyalo a anamarumiwae, ineyo yali chito ya akapolo. (Yoh. 13:5) Koma teto aanadowe udimu, liye oolemekeza o-arelae etene anayo kalivo va thawi ineyo koma teto ausogolo vowava-a chito yofuneya vinjinji kwaranya iliyetene, ineyo ili yokami-a athu ira kaze kafwanye moyo oomala. — Mat. 28:19, 20.

17. Kodi ninapange avi ira nilemekezenga athu amo-iwa? (Onani teto ithuzithuzi.)

¹⁷ Kodi ninamusazi-ede avi Yehova? Ninotonyi-eda ira ninolemekeza athu vowawandela uthenga wapama vo-olandela tundwiwa, ikalelo iwa, wewo kanakalaathu, koma teto maphuzilwiwa. Ninowalemekeza teto abali na arongoli-u naaonanga ira kanonikwaranya vo-olandela maudindo kapena maluso anayo nin’na iyo. (Afil. 2:3) Yehova unosangalala aona ira moviyevi-a ‘unaambeela ngu iyovano’ tonyi-eda ulemu wa athu amo-i mundila dedi koma teto mundila dimo-idiwa. — Arom. 12:10; Zef. 3:12.

18. Chifukwa n’ni ninafuneya musazi-eda Yehova vakhani yoviyevi-a?

¹⁸ Naesaesanga musazi-eda Babi-u wa udimu vakhani yoviyevi-a, ninoza nikale ololela, oleza murima koma teto athu kanoza kakalenga omasuwa ongi-ana na iyo. Moi ninoza niesaese lemekeza athu amo-iwa ngati mwemo Yehova munapangela liye vyongo. Napanganga vyetene vyevyo ninawande iyo ira nikale ngati Mulugwi-u unoyo ngoviyevi-a, ninokala amtengo wavadimu vinjinji vamaso vae. — Yes. 43:4.