Gidiyoni ooiziwa ira naliyene unolakwi-a vyongo, moi vyevi vyoomukami-a ira asomede modeka vevo andimuwa a wu Efuraimu kamuimbaathu mulandu. (Owel. 8:1-3) Gidiyoni kaasomedile molunduwa. Liye ootonyi-eda ira ali oviyevi-a vowavuruwana koma teto ongi-ana nawo mooma murima, vyevyo vyapangi-ile ira mirima da athwayo dikale m’malo. Andimuwa azelu kanomusazi-eda Gidiyoni vovuruwana mosamala koma teto someda modeka kaimbiwanga mulandu. (Yak. 3:13) Kapanganga vyevi kanokami-a ira mupingo mukale murendele. Vevo athu kaambeeleathu mutamanda Gidiyoni chifukwa yokwaranya khondo yolimbana na Amidiyani, liye ookami-a athwayo ira kapeleke ulemelelo wa Yehova. (Owel. 8:22, 23) Kodi abali audindo kanamusazi-ede avi Gidiyoni? Aliwa kanafuneela peleka ulemelelo wa Yehova chifukwa ya vyevyo kakwakwani-ileathu panga. (1 Akor. 4:6, 7) Mofwanafwani-a, akala ndimuwa unatamandiwa chifukwa ya luso lofunji-a lelo un’na liye, unokoza akami-a athwayo ira kaganizelenga vya m’Mawu a Mulungu, kapena maphuzilo anayo gulu la Yehova linapelekaathu, ira pumwemo munakumela makundo anayo unafunji-a liyayo. Thawi na thawi, andimuwa kanafuneela visaelanga ira kaone akala kanapangi-a ira athu katamandenga aluwa m’malo motamanda Yehova. w23.06 4 ¶7-8

Ngati vyevyo ninavepa iyo kavinaireya ninafuneya vifuka ira, ‘Kodi vyevyo ndinavepa miyovi pivyofwanelela?’ Thawi dinjinji athu kanaganiza ira ninavepa iyo pivyofwanelela wa iyo koma vyevyo vinavepa iyo vinokoza kala vyo-okami-a kwenikweni. Napempelelanga vuto limo-iliwalene, vinokoza kala ndila imo-i yapama yomali-edela vutolo iyana na mwemo ninavepela iyo. Ndipo vyongo vimo-i vyevyo vinavepe iyo vinokoza kala vyo-ongwilizana na vyevyo Yehova unafuna liye. (1 Yoh. 5:14) Mwaisazo, kaganizelani vya makolo anayo kanamuvepa Yehova ira mwaniwa apitilizeve kala mu choonadi. Vyeyvo kanavepaathuvi vinokoza oneya ngati vyofwanelela. Koma Yehova kanakanyi-eda muthu uliwetene ira amutumikelenga. Unafuna ira uliwetene asakulenga mutumikela, ngakale teto a-ima. (Doto. 10:12, 13; 30:19, 20) M’malo mwiwa makolwayo kanokoza vepa Yehova ira aakami-e ira kafiyenga vamurima mwanioyo na yolinga yoi akondenga Yehova koma teto kalanae vausamwali. — Miya. 22:6; Aife. 6:4. w23.11 21 ¶5; 23 ¶12

Chifukwa n’ni tonthoza amo-iwa unatonyi-eda ira nikaana chikondi? Buku limo-i lofotokoza mawu a m’Baibulo laongile ira mawu oyi “tonthoza” anayo Paulo aa-indi-edile liye chito kanatanthauza “imela vakwikwi na muthu ira nimulimbikise vevo ugumanile liye na vuto lilukulu.” Eno namutonthoza m’Kiristu fwi-u unoyo ugumanile na vuto ninomukami-a ira aimele koma teto pitiliza enda vandila yodowa wachela moyo. Thawi iliyetene ineyo nimutonthozile iyo m’bali kapena murongola ninotonyi-edecha ira ninowakonda Akiristu afwi-u. (2 Akor. 7: 6, 7, 13) Tonthoza amo-iwa kogwilizana na chifundo. Chifukwa n’ni ninaonga eno? Murima wachifundo ngunoyo unamulimbikisa muthu ira atonthoze amo-iwa koma teto akami-a. Eno ninaambeelecha kaana chifundo, era eno nitonthozenga athu amo-iwa. Paulo oogwilizani-a chifundo ya Yehova na vyevyo ninapanga iyo votonthoza amo-iwa. Liye aongile ira Yehova ngu “Baba wachifundo ilukulu koma teto Mulungu unoyo unanitonthoza va vuto lililetene.”— 2 Akor. 1:3. w23.11 9-10 ¶8-10