“Mwimaye Nkani, Sona Mutakayinganaye”

1-2. Ka Umukilisitu akuyana buli-buli ni nyumba intali iya ku Tokyo, Japan? (1 Aba Kolinti 15.58)

MU 1978, ku Tokyo, Japan, kukazengiwa inyumba intali sana. Abantu bakanda ukupasya nanti inyumba iyi inti yibukilile ukwimilila, ichifukwa chakuti mutawuni yila mukabombiwanga utusenyenta pipipi. Nkimba abakuzenga bakabomba ichoni ukuti inyumba iyi yitakawe pakabalilo ko kukubombiwa utusenyenta? Abakuzenga bakazenga inyumba iyi ukuti yibe yakughoma sona bakayizenga ukuti yipetaghe umwakuti nanti akasenyenta kabombiwa yitakawe. Abakilisitu bakuyana bulo ni nyumba iyi. Ka muzila buli?

² Umukilisitu akulondiwa ukubukilila ukuti imaye nkani sona abe wakwisengannya ukwivwila. Akulondiwa ukuti abanje wakughoma sona atakayinganaye akabalilo kosi po akwivwila indaghilo izya Yehova ni fundo zyache. (Belenga 1 Aba Kolinti 15.58.) Akulondiwa ukuti abanje ‘uwakwisengannya ukwivwila mwalubilo’ ukusita ukudandaghula. Mumazyu aghanji tunganena ukuti akulondiwa ukuti abanje “mololo” pamo wakwisengannya ukwivwila nanti angakwanisya pamo akulondiwa ukubomba bunubu. (Yako. 3.17) Umukilisitu yo ali ni nkalo ngati izi, vikumwavwa ukuti atakabe muntu uwa kukakamila nkani ivintu. Munkani iyi, inti twennye mo tungabombela ukuti tutakayinganaye. Inti twennye sona ivintu 5 vyo u Satana akuvibombezya imbombo ukuti chibe chakutamya ukuti tubukilile ukumwivwila u Yehova.

KA TUNGALANGIZYA BULI-BULI UKUTI TWIMITE NKANI?

3. Nkimba pa Imbombo 15.28, 29 pakwaghiwa indaghilo buli?

³ U Yehova weyo ali nu budindo ubwakupanga indaghilo sona akabalilo kosi akupanga indaghilo zyo zikuba zipepe umwakuti abantu bache bakuzivwisya mwalubilo. (Yesa. 33.22) Umwakufwanikizya, akagulu akakwenelezya akamukabalilo aka Bakilisitu ababwandilo, kakatambula izila zitatu zyo Abakilisitu bakalondiwanga ukubukilila ukwima nkani: (1) umwakukana ivifwani nu kumwiputa u Yehova weka, (2) umwakwivwila indaghilo izya Yehova ukuti ibanda lyakupaghuliwa sona (3) umwakwivwila indaghilo izya mu Bayibolo pankani iya bulowe (Belenga Imbombo 15.28, 29.) Ka amasiku ghano Abakilisitu bangamwivwila buli-buli u Yehova pa vintu vitatu ivi?

4. Choni cho tukumwiputa u Yehova weka? (Ubuvumbuli 4.11)

⁴ Tukuvikana ivifwani loli tukumwiputa u Yehova weka. U Yehova akabalamula Abaizilayeli ukuti bamwiputaghe yuyo weka. (Kumbu. 5.6-10) Wepe u Yesu po akagheliwanga nu Satana, akanena ukuti tukulondiwa ukumwiputa u Yehova weka. (Mata. 4.8-10) Ivi vikulangizya ukuti tutakulondiwa ukwiputa ivifwani. Tutakulondiwa ukumwiputa umuntu aliwesi, ngati balongozi abavipanga, abandale, abantu bo batchukite ni vyalwangalo, amapuleya, pamo abantu abakwimba. Tukubukilila ukuba kuchigaba icha Yehova nu kumwiputa weka yuyo akapela “ivintu vyosi.”—Belenga Ubuvumbuli 4.11.

5. Choni cho tukwivwila indaghilo izya Yehova pa nkani iyakuti ubumi ni banda vyakupaghuliwa?

⁵ Tukwivwila indaghilo izya Yehova izyakuti ubumi ni banda vyakupaghuliwa. Chifukwa buli? Ichifukwa chakuti u Yehova akanena ukuti ibanda likwimila ubumi, bo chabupi ichapamwanya nkani ichakufuma kwa Chala. (Levi. 17.14) Pakabalilo ko u Yehova akabitikizyanga abantu ukuti bande pakulya inyama loli akababuzya ukuti batakalyange inyama poka ni banda. (Ubwa. 9.4) Akapyanizya sona ululaghilo ulu pakabalilo ko akapelekagha indaghilo izya Mozesi ku Baizilayeli. (Levi. 17.10) U Yehova akabavwa abakamu aba mukagulu akakwenelezya akabakilisitu ababwandilo ukuti bapeleke ubulongozi ku Bakilisitu bosi ukuti batakalyanje “ibanda.” (Imbo. 15.28, 29) Tukulangizya ukuti twimite nkani pakwivwila pankani iyibanda, pakabalilo ko tukusala ubutuli ubwa chipatala bo tungapokela.b

6. Nkimba tungabomba ichoni ukuti twivwilaghe ifundo izyapamwanya izya Yehova?

⁶ Tukwivwila ifundo izyapamwanya izya Yehova. (Hebe. 13.4) Umutumiwa u Pabuli akutubuzya ukuti “ghogha” ivinyonywa vyosi ivya moyo winyu. Ivi vikung’anamula ukuti tukulondiwa ukubomba chilichosi cho tungakwanisya ukuti tufumyemo ivinyonywa vyosi ivibibi mumoyo witu. Tutakulondiwa ukwennya ichintu chilichosi pamo ukubomba chilichosi cho chingapangisya ukuti tubombe ubwamalaya. (Kolo. 3.5; Jobu 31.1) Nanti twagheliwa ukuti tubombe ichintu chimo ichibibi, tukulondiwa ukuti mwalubilo tukane inyinong’ono izibibi pamo ichintu cho chingavulungannya ubumanyani bwitu nu Chala.

7. Nkimba tukulondiwa ukubomba ichoni, sona chifukwa buli?

⁷ U Yehova akulindilila ukuti inti mube bakwivwila “nu moyo winyu ghosi.” (Loma 6.17) Akabalilo kosi vyosi vyo u Yehova akutubuzya ukuti tubombe, vikuba vyiza sona tutangasinta indaghilo zyache. (Yesa. 48.17, 18; 1 Koli. 6.9, 10) Tukubomba chilichosi cho tungakwanisya ukuti tumuhobosye u Yehova sona tukuba ni nyinong’ono ngati zyo uwa masalimo akaba nazyo, yo akanena ukuti: ‘Nasimikizya ukuti akabalilo kosi inti nkonkaghe ubulongozi bwinyu bosi, mupaka pabumalilo.’ (Sali. 119.112) Napo vili bunubu, loli u Satana inti abukilile ukuyezya-yezya ukupangisya ukuti chibe chakutamya ukwima nkani. Nkimba akubombezya zila buli?

KA U SATANA AKUYEZYA-YEZYA UKUBOMBA ICHONI UKUTI TULEKE UKWIMA NKANI?

8. Ka u Satana angabombezya buli-buli izila iyakuyivya ukuti tutakasale akiza ivintu?

⁸ Ukupinyiwa. U Satana akubombezya ivintu ivya kumubili vyo vingatuvulazya ni nyinong’ono zyitu ukuti chibe chakutamya ukwima nkani. U Satana akulonda yumo ukuti “amumile,” umwakuti avulungannye ubumanyani bwitu nu Yehova. (1 Pita. 5.8) Abakilisitu ababwandilo, bakaboghofyanga, bakabakomagha sona bamo bakaghoghiwa ichifukwa chakuti bakasimikizya ukwima nkani. (Imbo. 5.27, 28, 40; 7.54-60) Amasiku ghano u Satana akubukilila ukubomba umwakuyana bulo. Ivi vikubonekela akiza ku bakamu na bayemba bitu ku Russia ni vyisu ivyamwabo ko abakususya bakubanyoza nu kubapangila inkaza.

9. Nena ichifwanikizyo cho chikulangizya ukuti tukulondiwa ukucheba nu kukakamiziwa.

⁹ Ukukakamiziwa. U Satana akubombezya “buchevu” ukuti tupinyiwe. (Efe. 6.11) Inong’onela vyo umukamu u Bob akakomana navyo po akaba muchipatala pakabalilo ko akalondiwanga ukupangiwa opaleshoni inkulu. Akababuzya abadokotala ukuti mulimosi mo ivintu vingabela atakwitikizya ukuti bamubike ibanda. Abadokotala bakitikizya ukuchindika vyo akasala. Napo vikaba bunubu, loli bo bachili batamupangite opaleshoni, u dokotala yumo akiza pakumwennya u Bob po abamumbumba yache bosi bakaba ukuti babwela. Akamubuzya u Bob ukuti abadokotala batangabombezya ibanda, loli bakulonda ukuti libepo umwakuti nanti vingatamya lingalondiwa. Udokotala uyu akinong’onagha ukuti u Bob angasinta inyinong’ono zyache po abamumbumba yache na bamo. Loli u Bob akabukilila ukwima nkani ukuti atangitikizya ukupokela ibanda mulimosi mo vingabela.

10. Choni cho ukwendela inyinong’ono izya bantu kwakoghofya? (1 Aba Kolinti 3.19, 20)

¹⁰ Inyinong’ono izya abantu bo batakwivwila indaghilo izya Yehova. Nanti tukwinong’ona ngati mo abantu bo batakwivwila indaghilo izya Yehova bakwinong’onela, nuswe bulo tunganda ukumuleka u Yehova nu kukonka indaghilo zyache. (Belenga 1 Aba Kolinti 3.19, 20.) “Amahala agha bantu abamuchisu ichi,” ghakubapangisya abantu ukuti batakamwivwilaghe u Chala. Abakilisitu abanandi bulo aba muchipanga icha Peligamu nu Tiyatila, abantu bo bakabazyungulila bakabapangisya ukuti bande pakubomba ubwamalaya nu kwiputa ivifwani. U Yesu akapeleka ubulongozi ubwamaka ku vipanga vyosi vibili ivi, ichifukwa chakuti bakanda ukusendelako inkalo iya bwamalaya. (Ubuvu. 2.14, 20) Amasiku ghano, abantu bo batuzyunguliye bangayezya-yezya ukuti batupangizye ukuti twande pakwendela inyinong’ono zyabo imbibi. Abamumbumba yitu na bapalamani bitu bangayezya ukutudeba ukuti tukukwimisya nkani ivintu vyo vingapangisya ukuti tuleke pakwivwila indaghilo izya Yehova. Umwakufwanikizya, banganena ukuti te chakulondiwa nkani ukubukilila ukuba ni nkalo inyiza sona banganena ukuti ifundo izya mu Bayibolo zyo tukwendela zyakale sana.

11. Nkimba tubaghiye ukucheba ni choni ukuti tubukilile ukwima nkani?

¹¹ Pakabalilo kamo tunginong’ona ukuti u Yehova akutupa ubulongozi bo butakwivwika akiza. Tungagheliwa nu kufika pakuti tungachila “pa zizyo amasimbo ghakunena.” (1 Koli. 4.6) Abalongozi abavipanga mukabalilo aka Yesu bakachilagha vyo amasimbo ghakunena. Abalongozi aba, bakongelezyako indaghilo zyabo, ichi chipangisya ukuti chibe chakutamya ku bantu ukwivwila Indaghilo izya Yehova. (Mata. 23.4) U Yehova akutupa ubulongozi ubwakwivwika akiza ukwendela mu Mazyu ghache na mugulu lyache. (Mbupi. 3.5-7) Ivi vikutwavwa ukuti tutakapululile vyo visimbiwe mu Bayibolo pamo ukuti tubapangile indaghilo Abakilisitu abamwitu pa vintu vyo umuntu aliwesi angasala paweka.

12. Ka u Satana akubombezya buli-buli “amazyu aghamahala agha buzimbuli”?

¹² Ukuzimbuliwa. U Satana akubombezya “amazyu aghamahala agha buzimbuli” ni “Nyiho izya bantu aba, muchisu ichapasi ichi” ukuti apusike abantu nu kubalesannya. (Kolo. 2.8) Ku Bakilisitu ababwandilo, ivi vikongelezyapo vyo abantu bo bakatingi bamahala bakamanyisya ivyakukwafyannya na kinong’onele aka bantu, ivimanyilo ivya Chiyuda vyo vitakafumagha mu Masimbo ni vimanyilo vyo Abakilisitu bakalondiwanga ukwivwila ivyakufuma mu Ndaghilo izya Mozesi. Ifundo izi zikabapusikagha abantu ichifukwa chakuti zikabapangisyanga abantu ukuti bafumeko kubwanaloli ubwamahala aghenecho bo bukufuma kwa Yehova. Amasiku ghano u Satana akubombezya imbombo ama TV, amawayilesi na mafoni ukuti asasye ivintu ivyabumyasi vyo vite na mabukaboni sona inkani izyabumyasi zyo abalongozi abandale bakunena. Mukabalilo aka COVID-19 pakaba inkani izyabumyasi izyakupambana-pambana.c Abakaboni aba Yehova bo bakivwila ubulongozi ubwakufuma ku gulu, vikabavwa ukuti batakapusikiwe na mabumyasi agha ngati mo abantu bo batakivwilagha ubulongozi ubu bakapusikiwa.—Mata. 24.45.

13. Choni cho tukulondiwa ukucheba ukuti tutakatimbaniziwe?

¹³ Ivyakutimbanizya. Tukulondiwa ukwennya amaso ghitu pa “chicho chiza.” (Filipi 1.9, 10) Nanti twatimbaniziwa, tukutagha amaka ghitu na kabalilo kitu akatali. Ivintu vyo tukubomba ngati ukulya, ukung’wela, ivya lwangalo ni mbombo yo tukubomba, vingatutimbanizya nanti tukuvyennya ukuti vyakulondiwa nkani pa bumi bwitu. (Luka 21.34, 35) Umwakongelezyapo, isiku lililyosi tukwivwa nu kubelenga inkani izyakukwafannya na mademo nu kususannya ukwa bandale. Tukulondiwa ukwenelezya ukuti ivintu ivi vitakatutimbanizye. Nanti tutakucheba, nuswe tunganda ukusapota ichigaba chimo mumoyo na munyinong’ono zyitu. U Satana akubombezya izila zyosi zyo zyatambuliwa pamwanya apa ukuti apangisye ukuti tupotwe ukubomba ivintu ivyiza. Za twennye mo tungazikanila izila zyache nu kubukilila ukwima nkani.

KA TUNGABUKILILA BULI-BULI UKWIMA NKANI?

14. Nkimba chintu buli cho chingatwavwa ukubukilila ukuba kulubazu ulwa Yehova?

¹⁴ Mwinong’onele ichifukwa cho mukiyipa ubumi bwinyu kwa Yehova nu koziwa. Mukabomba bunubu ichifukwa chakuti mukalondagha ukubukilila ukwima nkani kulubazu ulwa Yehova. Inong’onela cho chikabavwa ukuti musubalile ukuti mwabwagha ubwanaloli. Mukamumanya u Yehova nu kwanda ukumuchindika nu kumughana ngati we Baba winyu uwa kumwanya. Ulwitiko lwinyu lukakula umwakuti lukabavwa ukuti mupinduke. Mukaleka ukubomba ivintu vyo u Yehova avibengite nu kwanda ukubomba ivintu vyo vingamuhobosya. Tukusubila ukuti mukiyivwa akiza mukati mwamanya ukuti u Chala angabahobokela pa vintu ivibibi vyo mukabombagha. (Sali. 32.1, 2) Mukanda ukwaghiwapo pa nkomano izya Chikilisitu nu kwanda ukubabuzyako abantu abanji ivintu ivyiza vyo mukamanyilagha. Ngati Mukilisitu uwakwiyipa nu koziwa, pakabalilo aka mukwenda pa musebo uwakubuka ku bumi, sona mukubomba chilichosi cho mungakwanisya ukuti mubukilile ukwenda mumusebo ughu.—Mata. 7.13, 14.

15. Choni cho ukumanyila nu kwinong’onelapo kwakulondiwa?

¹⁵ Ukumanyila Amazyu agha Chala nu kwinong’onelapo. Ikwi lingabukilila ukuba lyamaka nanti amagululuzi ghache ghingiye nkani pasi. So nanti nuswe bulo tuli nu lwitiko ulwakughoma mwa Yehova, inti tubukilile ukwima nkani. Pakabalilo ko ikwi likukula, amagululuzi ghakwingila nkani pasi sona ghakusatila mulubazu. Nanti tukumanyila nu kwinong’onelapo, tukughomya ulwitiko lwitu nu kusimikizya nkani ukuti izila izya Chala nyiza. (Kolo. 2.6, 7) Ukwinong’onelapo mo u Yehova akulongozezya, akufighilila nu kupwelelela kukabavwa ababombi bache mukabalilo aka kale. Umwakufwanikizya, u Ezekiyeli akenelezyanga nkani pakabalilo ko uwantumi akapimagha itempeli muchisetuka cho akennya. Ichisetuka ichi chikamughomya u Ezekiyeli, sona nuswe tukumanyilako vyo tungabomba ukuti tubukilile ukumwivwila u Yehova pankani iyakwiputa ukuzelu.d (Eze. 40.1-4; 43.10-12) Nuswe bulo tungapindula nanti tukupaghula akabalilo akakumanyilila nu kwinong’onelapo ivintu ivyapamwanya vyo vili mu Mazyu agha Chala.

16. Ka umoyo uwa kwima nkani ghukamutula buli-buli u Bob? (Salimo 112.7)

¹⁶ Ukuba nu moyo uwa kwima nkani. Umwene u Devedi akanena ukuti atangaleka ukumughana u Yehova po akimba ukuti: ‘Umoyo wane wakwima nkani, We Chala.’ (Sali. 57.7) Nuswe bulo tungaba nu moyo uwa kwima nkani, nu kumusubila u Yehova akabalilo kosi. (Belenga Salimo 112.7.) Ennya mo ifundo iyi yikamutulila u Bob, yo atambuliwa kubwandilo. Pakabalilo ko abadokotala bakamubuzya u Bob ukuti inti babike ibanda limo palubazu ilyakuti nanti lingalondiwa bangalibombezya imbombo, akamula ukuti nanti pangalondiwa ukuti abikiwe ibanda, inti afumemo mwalubilo muchipatala. Pisinda pache, u Bob akanena ukuti, “Intakakayikilagha vyo nkalondagha ukuti imbombe sona intakapasyanga na vyo vingabombiwa.”

17. Nkimba tukumanyilako ichoni kwa Bob? (Ennya sona ichituzi.)

¹⁷ U Bob akima nkani ichifukwa chakuti akasalila zila pakabalilo ko akaba ukuti achili atabukite ku chipatala ukuti inti ize abukilile ukwima nkani. Ichabwandilo, akalondagha ukumuhobosya u Yehova. Ichabubili, akamanyilagha inkani izyakukwafannya nu kupaghuliwa ukwi banda nu bumi ukufuma mu Bayibolo na mabuku ghitu aghakulongosola Ibayibolo. Ichabutatu, akasimikizya ukuti nanti angabukilila ukwivwila indaghilo izya Yehova, akwiza pakupindula kwa bwila na bwila. Nuswe bulo tungaba nu moyo uwa kwima nkani napo tungakomana ni ntamyo inkulu.

18. Ka inkani iya Balaki yikutumanyisya ichoni pa nkani iyakumusubila u Yehova? (Ennya ichituzi icha pachifwambo.)

¹⁸ Tumusubilaghe u Yehova. Ennya mo u Balaki akabombela ivintu ichifukwa chakuti akasubilagha ubulongozi ubwakufuma kwa Yehova. Pakabalilo kala, aba Izilayeli batakaba bakwisengannya ukuti bangalwa inkondo sona batakaba ni vilwilo. Loli u Yehova akamubuzya u Balaki ukuti abuke aye alwe nu Sisela usongo uwa basilikali aba ku Kanani na basilikali bache, bo bakaba ni vilwilo ivyinji sana. (Balo. 5.8) Umulaghuzi u Debola akamubuzya u Balaki ukuti ike ukufuma kumaghamba nu kwiza pamalo agha tambalala ukuti alwe nu Sisela na magaleta ghache aghavijela 900 aghankondo. Napo vikaba bunubu, amageleta agha ghakuchimbila nkani pa malo aghakutambalala, umwakuti nge chikaba chakutamya ku Baizilayeli ukuti bawine inkondo na magaleta aghalubilo agha. Napo u Balaki akamanya ukuti vili bunubu loli akivwila. Pakabalilo ko abasilikali bakikagha Ighamba ilya Taboli, u Yehova akapangisya ukuti kutonye ichivula ichikulu ichamabwe. Amageleta aghankondo agha Sisela, ghakanda ukwingila mumatipa sona u Yehova akapangisya ukuti u Balaki awine inkondo. (Balo. 4.1-7, 10, 13-16) Umwakuyana bulo, u Yehova akwiza pakutupa ubupoti nanti tukumusubila nu kwivwila ubulongozi bo akutupa ukwendela mwigulu lyache.—Kumbu. 31.6.

MUSIMIKIZYE UKUTI MUKUBUKILILE UKWIMA NKANI

19. Choni cho mukulonda ukubukilila ukwima nkani?

¹⁹ Tukulondiwa ukubukilila ukulwisya ukuti tube bakwima nkani pakabalilo ko tukubukilila ukwikala muchisu icha ntamyo ichi. (1 Timo. 6.11, 12; 2 Pita. 3.17) Tuyezye-yezye ukwima nkani umwakuti tutakayinganaghe ni vintu ngati ukupinyiwa, ukukakamiziwa, inyinong’ono izya abantu bo batakwivwila indaghilo izya Yehova, ukuzimbuliwa ni vyakutimbanizya. (Efe. 4.14) Mumalo mwache, za tubukilile ukwima nkani sona akabalilo kosi tubukilile ukumughana u Yehova nu kwivwila indaghilo zyache. Pakabalilo kanako tukulondiwa sona ukuba bololo. Munkani iyakukonkapo, tukwiza pakunenezannya mo u Yehova nu Yesu bakulangizizya ukuti bololo.