Mumuyezye u Yehova, Mube mwe Bololo

1. Nkimba Abakilisitu bangayana ni kwi muzila buli? (Ennya sona ichituzi.)

PALI ichili ichakuti “impepo iyamaka yitangapyola ikwi lyo likupeta.” ichili ichi chikulangizya ukuti ikwi likulondiwa ukuti lipetaghe po impepo yikuputa umwamaka ukuti libukilile ukuba lyamaka. Nuswe bulo tukulondiwa ukubukilila ukuba bololo pala twakomana ni ntamyo umwakuti tubukilile ukumubombela u Yehova umwakuhoboka. Ka vingabombiwa buli-buli? Tungalangizya ukuti swe bololo nanti ivintu vyasinta pa bumi bwitu nu kuchindika ifundo izya bamwitu na vyo basala.

2. Ka nkalo buli zyo zingatwavwa nanti ivintu vyasinta pa bumi bwitu, sona munkani iyi inti tunenezannye ichoni?

² Pakuba babombi aba Yehova, tukulonda ukuba bololo. Tukulonda sona ukuba bachisa na bachililizi. Munkani iyi, inti twennye mo inkalo izi zikabatulila Abakilisitu bamo ukuti bakwanisye ukujimba pakabalilo ko ivintu vikasinta pa bumi bwabo. Inti twennye sona mo inkalo izi zingatulila. Loli ichabwandilo, za tumanyileko ukufuma kwa Yehova nu Yesu bo vifwanikizyo ivyiza nkani pankani iyakuba bololo.

U YEHOVA NU YESU BOLOLO

3. Ka tukumanya buli-buli ukuti u Yehova mololo?

³ U Yehova akwitiziwa ukuti ‘we Lyalabwe’ ichifukwa chakuti wakwima nkani, atakuyingana. (Kumbu. 32.4) Napo vili bunubu, loli u Yehova mololo. Po ivintu vikusinta muchisu ichi, u Yehova mololo sona inti inelezye ukuti chilichosi cho atulayizizye chakwanilisyiwa. U Yehova akatupele muchifwanikizyo chache, umwakuti atupiye uluso ulwakuti tusintaghe nanti ivintu vyasinta pa bumi bwitu. Mu Bayibolo tukwaghamo ifundo zyo zikutwavwa ukuti tusale ivintu umwamahala napo tungakomana ni ntamyo. Ichifwanikizyo icha Yehova ni fundo zyache, vikutwavwa ukumanya ukuti napo ‘we Lyalabwe’ loli u Yehova mololo.

4. Nena ichifwanikizyo cho chikulangizya ukuti u Yehova mololo. (Abanya Levi 5.7, 11)

⁴ Izila zyosi izya Yehova ngolosu sona zya bololo. U Yehova atakubakalipila abantu. Ennya mo u Yehova akalangizizya ubololo ku Baizilayeli. Atakalindililagha ukuti aliwesi inti apeleke isembe iyakuyana bulo, napo angaba umupina pamo umukabi. Akabalilo kamo akitikizyanga ukuti umuntu apeleke isembe ukuyana na mo ivintu vibeleye pa bumi bwache.—Belenga Abanya Levi 5.7, 11.

5. Nena ichifwanikizyo cho chikulangizya ukwiyisya ukwa Yehova ni chisa cho ali nacho.

⁵ Ukwiyisya ukwa Yehova ni chisa cho ali nacho vikumupangisya ukuti abe mololo. Umwakufwanikizya, u Yehova akalangizya ukuti wakwiyisya pakabalilo ko akaba papipi ukubanangannya abantu ababibi aba mu Sodomu. U Yehova akamubuzya u Loti yo akaba muntu umugholosu ukwendela mubantumi ukuti achimbilile kumaghamba. U Loti akoghopa ukuti abuke kumaghamba. U Loti akalaba ukuti u Yehova amwitikizye ukuti ni mbumba yache bachimbilile ku Zowali, yo yikaba tawuni yinandi bulo yo u Yehova akalondagha ukuti yope ayinangannye. U Yehova nge akakakamila ukuti u Loti abombe vyo akamubuzya. Loli u Yehova akamwitikizya u Loti ukuti abuke ku Zowali sona atakayinangannya itawuni yila. (Ubwa. 19.18-22) Akabalilo kakati kendapo, u Yehova akalangizya sona ichisa ku bantu aba ku Ninive. Akamutuma umulaghuzi u Yona ukuti aye ababuzye abantu ababibi aba ku Ninive, ukuti u Yehova inti abanangannye poka ni tawuni yabo. Loli abantu aba ku Ninive bakati bapinduka, u Yehova akabapelela ichisa sona atakayinangannya itawuni iya Ninive.—Yona 3.1, 10; 4.10, 11.

6. Nena vyo vikulangizya mo u Yesu akamuyezezya u Yehova pankani iya bololo.

⁶ U Yesu akayezya ubololo ubwa Yehova. U Yehova akamutuma pachisu ichapasi ukuti ize alumbilile “pakasi pa ng’ozi zizyo zisobelite, abantu bene aba Izilayeli.” Loli u Yesu akalangizya ukuti mololo pakabalilo ko akalumbililagha ku bantu. Umwakufwanikizya, umukolo yumo yo atakaba Muizilayeli akamulaba u Yesu ukuti amupozye umwana wache umulindu yo akaba “nu muzimu umubibi.” U Yesu ichisa chikamulema, vyo vikapangisya ukuti abombe vyo umukolo yula akalaba, umwakumupozya umwana wache. (Mata. 15.21-28) Ennya ichifwanikizyo ichamwabo. Kubwandilo ukwa bulumbilili bwache u Yesu akanena ukuti: “Umuntu wesi yuyo akunkana. . . , nane bulo inkwiza pakumukana.” (Mata. 10.33) Loli ka u Yesu akamukana u Pitala, napo akamukana katatu? Awee. U Yesu akamanya ukuti u Pitala akipelela ichisa pa vyo akabomba sona akalangizya ukuti akaba muntu umusubaliwa. U Yesu akati azyuka, akabonekela kwa Pitala nu kumusimikizyila ukuti akamuhobokela sona achili amughanite.—Luka 24.33, 34.

7. Umwakukolelana na Aba Filipi 4.5, ka tukulonda ukuti abantu batwennyange buli-buli?

⁷ Twennya kale ukuti u Yehova u Chala nu Yesu Kilisitu bololo. Buli pakunena ivya uswe? U Yehova akulonda ukuti nuswe bulo tube bantu bololo. (Belenga Aba Filipi 4.5.) Tungilalusya ukuti: ‘Ka abantu bakunennya ukuti ne bololo, sona ne muntu wakwivwisya? Pamo bakunennya ukuti ne muntu wakukakamila? Ka ne muntu yo akulonda ukuti abantu babombaghe ivintu ndendende ngati mo une nkulondela? Pamo ne muntu uwakwivwisya inyinong’ono izya bantu abanji nanti chakulondiwa?’ Mo tukubombela ivintu pankani iya bololo tungalangizya ukuti tukumuyezya u Yehova nu Yesu. Za twennye ivyakubombiwa vibili vyo vikulangizya ukuti ukuba mololo kwakulondiwa sana nanti ivintu vyasinta pa bumi bwitu sona nanti tukwennya ukuti ifundo ni vyakusala ivya banji vikupambana ni vyitu.

MUBE MWE BOLOLO NANTI IVINTU VYASINTA

8. Choni cho chingatwavwa ukuba bololo nanti ivintu vyasinta? (Ennya sona amazyu aghamuntende.)

⁸ Tukulondiwa ukuba bololo nanti ivintu vyasinta pa bumi bwitu. Ukusinta uku kungapangisya intamyo zyo tutinong’onelaghapo ukuti tungaba nazyo. Umwakufwanikizya, aliwesi umwakuchenusya bulo anganda pakubina nkani. Ukusinta ukwa mo tukwaghila indalama pamo ukusinta ukwa boma lyo likulaghila, vingapangisya ukuti ubumi bwitu bube bupala. (Ndumbi. 9.11; 1 Koli. 7.31) Chingaba sona chakutamya nanti igulu ilya Yehova lingatubuzya ukuti tumubombelaghe u Yehova muzila iyinji pamo ku malo aghanji. Mulimosi mo vingabela, tungakwanisya nu kwitikizya ukusinta kulikosi ko kungabapo nanti tungabomba ivintu 4 ivi: (1) ukwitikizya ukuti pakabalilo aka ivintu vyasinta, (2) ukwinong’onela vyo mungabomba pakabalilo aka mumalo mwakwinong’onela vyo mukabombagha kwisinda, (3) ukwennya ivintu ivyiza vyo mwakomana navyo pa bumi bwinyu, sona (4) ukubabombela abanji ivintu ivyiza.b Za twennye mo abakamu na bayemba bitu bamo bapindulila ichifukwa chakubomba ivintu ivi.

9. Ka imbumba yimo yo bakaba bamishonale bakakomana ni ntamyo buli zyo batakinong’onelaghako?

⁹ Ukwitikizya ukuti pakabalilo aka ivintu vyasinta. U Emanuele nu Francesca bakabatuma ukuti baye babe bamishonale ku chisu chimo. Pakabalilo ko bakandagha bulo ukumanyila ichinenelo ichachilendo nu kumanyana na bakamu na bayemba muchipanga chabo ichipya, po u COVID-19 akandagha yo yikapangisya ukuti bikalaghe kubutali na bantu abanji. Pisinda pache umama uwa Francesca akafwa umwakudumuka bulo. U Francesca akalondagha hee ukuti aye abe poka na bamumbumba yache, loli akapotwa ukubuka ichifukwa cha COVID-19. Choni cho chikamwavwa kuti amalane ni ntamyo izi? Ichabwandilo, u Emanuele nu Francesca bakiputa poka kwa Yehova ukulaba amahala gho ghangabavwa ukumalana ni ntamyo izyi siku lililyosi sona ukuti bachepesyeko ichitima cho bakaba nacho. U Yehova akamula inyiputo zyabo pakabalilo akiza ukwendela mwigulu lyache. Umwakufwanikizya, bakakaziwa sana ni nkani iya mukamu yumo yo bakelezya muvidiyo yo akanena ukuti: “Nanti tukwitikizya mwalubilo ivintu ivipya vyo vyasinta, vingatwavwa ukuti twande sona ukuba bakuhoboka. Ivi vingatwavwa ukubomba chilichosi cho tungakwanisya ukuyana na mo ivintu vyabela.”c Ichabubili, bakasala ukuti bongelezye izila izyakulumbililila pakubombezya ifoni, ivi vikabavwa ukwagha umuntu uwakumanyila nawe Ibayibolo. Ichabutatu, bakitikizya ukuti abakamu na bayemba babavwe umwakuti bakaba bakupalizya sana ichifukwa cha lughano lo bakabalangizyanga. Umuyemba yumo akalangizya ichisa pakubatumila, ubutenga bo bukabanga ni vesi ilya mu Bayibolo isiku lililyosi kwa mwaka ghosi. Umwakuyana bulo, nuswe nanti tukwitikizya ukusinta kosi ko kungabapo, tungaba swe bakuhoboka na vyo tungakwanisya ukubomba.

10. Ka umuyemba yumo akabomba buli-buli ukuti abelele ni vintu vyo vikasinta pa bumi bwache?

¹⁰ Ukwinong’onela vyo mungabomba pakabalilo aka, mumalo mwakwinong’onela vyo mukabombagha kwisinda. Umuyemba yumo izina lyache u Christina uwa ku Romania yo akwikala ku Japan, akawa maka pakabalilo ko ichipanga icha Chizungu cho akiputaghamo bakachimazya. Loli atakabukilila ukwinong’onelapo pa vyo vikabombiwa. Mumalo mwache, akanda ukubuka ku chipanga icha chinenelo icha chi Japanese nu kubomba chilichosi cho angakwanisya pakulumbilila muchinenelo icha chi Japanese. Akamulaba umukolo yumo yo akabombagha nawe imbombo ukuti amumanyisyange ukumanya mo anganenela akiza ichi Japanese. Umukolo uyu akitikizya ukubombezya Ibayibolo na kabulosha akamutu uwakuti Mungahoboka nu Bumi kwa Bwila na Bwila! pakumumanyisya u Christina ichi Japanese. U Christina akamanyila ukunena akiza ichi Japanese, loli ichakulondiwa nkani chakuti umukolo yo akamumanyisyanga, akalondagha ukumanya ivyinji ivyakukwafannya ni Bayibolo. Nanti tutakubukilila ukwinong’onela ivintu vyo vyabombiwa sona tuli ni nyinong’ono inyiza napo ivintu vingasinta umwakuchenusya bulo, vingapangisya ukuti ivintu ivyiza vyo tutinong’onelaghapo vibombiwe.

11. Choni cho chikavwa imbumba yo yikakomana ni ntamyo iyakusoba kwa ndalama?

¹¹ Ukubabombela abanji ivintu ivyiza. Imbumba yimo yo yikikalagha muchisu cho imbombo yitu iyakulumbilila yikakaniziwa, yikanda ukukomana ni ntamyo iyakusoba ukwa ndalama ichifukwa chakuti indalama iya muchisu chabo yikawa amaka. Ka bakabomba buli-buli ukuti babelele na mo vintu vikabela? Ichabwandilo bakayezga ukuchepesyako ivyakughula. Ichabubili, mumalo mwakubika amahala ghabo ghosi ku ntamyo zyo bakaba nazyo, bakinong’ona ukuti babikepo umoyo pakwavwa abanji umwakutangwanika ni mbombo iya bulumbilili. (Imbo. 20.35) Umulume akanena ukuti, “Ichifukwa chakuti tukamalilagha akabalilo akatali mubulumbilili, vikatwavwa ukuba na kabalilo akanandi akakwinong’onela intamyo zyo tukaba nazyo sona vikatwavwa ukuba na kabalilo akinji akakubomba vyo u Chala akalondagha ukuti tubombe.” Nanti ivintu vyasinta, tukulondiwa ukumbukila ukuti ichintu ichakulondiwa hee, ko kubukilila ukwavwa abanji nkani-nkani ukwendela mumbombo iya kulumbilila.

12. Ka ichifwanikizyo icha mutumiwa u Pabuli chingatwavwa buli-buli ukuba bololo mubulumbilili?

¹² Tukulondiwa ukuba bololo, nanti tuli mubulumbilili. Abantu bo tukubalumbilila bakusubila ivintu ivyakupambana-pambana ivyakukwafannya nu Chala, sona bakufuma mu malo na kikalile akakupambana-pambana. Umutumiwa u Pabuli akaba mololo, sona nuswe tungamanyilako kukwache. U Yesu akamusala u Pabuli ukuba “mutumiwa pakasi pa bantu babo bate ba Yuda.” (Loma 11.13) U Pabuli akalumbililagha ku Bayuda, Bagiliki, abantu abakumanyila, abantu abamukaya, bo bakaba na mabudindo muboma na kubamwene. Ukuti abafike pa moyo abantu abakupambana-pambana aba, u Pabuli akaba ‘ivintu vyosi ku bantu aba inko zyosi.’ (1 Koli. 9.19-23) U Pabuli akinong’onelagha nkani ivyakukwafannya na ko abantu bakafumilagha sona vyo bakasubilagha. Ivi vikamwavwa ukuti abe mololo pakabalilo ko akanenagha nu muntu aliwesi ukuti amwavwe ukupalamila kwa Chala. Nuswe bulo, tungabomba akiza mubulumbilili nanti twe bololo sona tukuyezya ukwinong’onela mo tungamutulila umuntu aliwesi paweka.

MUCHINDIKAGHE INYINONG’ONO IZYA BANJI

13. Nkimba koghofya buli ko kukuneniwa pa 1 Aba Kolinti 8.9 ko tungacheba nanti tukuchindika akinong’onele aka banji?

¹³ Ubololo bukutwavwa ukuti tuchindikaghe inyinong’ono izya banji. Umwakufwanikizya abayemba bamo baghanite ukupoda po bamo batavighanite. Abakilisitu bamo bakuhoboka pakung’wela ubwalwa bumo panandi, loli bamo bakusala ukuti batakang’welaghe. Abakilisitu bosi bakulonda ukuti bangaba nu bumi ubwiza, loli aliwesi akusala umwakupambana pa butuli bo angapokela nanti abina. Nanti tukwinong’ona ukuti akabalilo kosi tukunenagha ubwanaloli sona tukuyezya ukubapangisya abakamu na bayemba ukuti babombaghe ivintu vyo uswe tukubomba, vingabapuvya abanji nu kupangisya ukuti muchipanga mube ukugabinkana. Tukusubila ukuti tutakulonda ukubomba bunubu! (Belenga 1 Aba Kolinti 8.9; 10.23, 24) Za twennye ivifwanikizyo vibili vyo vikulangizya ubwiza ubwakubombezya ifundo izya Mumasimbo ukuti zitwavwe ukubomba ivintu umwapakasi-kasi nu kubukilila ukuba bamutende.

14. Nkimba fundo buli izya mu Bayibolo zyo zingatwavwa nanti tukusala ivyakuvwala na kametele?

¹⁴ Akavwalile na kametele. Mumalo mwakubika indaghilo izya mo tungavwalila, loli u Yehova atupiye ifundo zyo zingatwavwa pa nkani iya kavwalile. Tukulondiwa ukuvwala muzila yo yingamuchindika u Chala, ukulangizya ubololo, ukwiyisya nu “mwamahala.” (1 Timo. 2.9, 10; 1 Pita. 3.3) Tutakulondiwa ukuvwala muzila iyakuti abantu binong’onelaghe bulo ivya mo tukubonekela. Ifundo izya mu Bayibolo zingabavwa abasongo ukuti batakapange indaghilo izyakukwafannya na kavwalile sona akametele. Umwakufwanikizya, abasongo muchipanga chimo bakalondagha ukuti babavwe abachinyamata bo isisi lyabo likaba lifupi loli ilyakusampalala bo bakeghelela kubamwabo pankani iya kametele ko kachukite. Ka abasongo aba nge bakabavwa buli-buli ukusita ukubikapo indaghilo zyabo? Uwakwendela idela akabapa abasongo ubulongozi bo bangababuzya abakamu abachinyamata, ubwakuti “Nanti mukunena inkani kuntazi, po mwamanya ukuti abakamu na bayemba bakubika nkani amahala pa mo mukubonekela ukuchila vyo mukunena, mumanye ukuti pali intamyo iya mo mwavwalila na mo mwametela.” Akalongosolele akapepe bulo aka, kakabavwa abakamu abachinyamata ukwivwisya vyo bangabomba sona ukuti abasongo batakulondiwa ukupanga indaghilo pa nkani iyi.d

15. Nkimba fundo ni ndaghilo buli izya mu Bayibolo zyo zingatwavwa ukusala akiza ubutuli bo tungapokela nanti twabina? (Aba Loma 14.5)

¹⁵ Ubutuli bo tungapokela nanti twabina. Umukilisitu aliwesi akusala weka ubutuli bo angapokela nanti abina. (Gala. 6.5) Nanti Abakilisitu bakusala pankani iya butuli bo bangapokela nanti babina, babaghiye ukwivwila indaghilo izya mu Bayibolo izyakuti batakapokele ibanda nu kubomba ivyamizimu. (Imbo. 15.20; Gala. 5.19, 20) Aliwesi angasala ubutuli bo angapokela nanti abina. Abakilisitu bamo bangasala ukuti bapokele ubutuli ukufuma ku vipapatala ivya mutwaya nanti babina, loli bamo bangalonda ukuti bapokele ubutuli muzila izinji. Napo tungaba ukuti tukumanya ivyinji ivyakukwafannya na mo imilembo yo tukupokela yikubombela imbombo ukuti yakwavwa pamo yakuvulazya, loli tukulondiwa ukuchindika vyo abakamu na bayemba bitu basala pankani iya butuli bo bangapokela nanti babina. Ivi vikutwavwa ukumanya ukuti tukulondiwa ukukumbukila ifundo 4 izi: (1) Ubumwene ubwa Chala bweka bobo bukwiza pakumazizya zila imbina zyosi. (Yesa. 33.24) (2) Umukilisitu akulondiwa ukuti “abombaye ukuyana na mumo asimikizizya” cho akwennya ukuti chingamwavwa pakabalilo ko akusala ubutuli bo angapokela nanti abina.(Belenga Aba Loma 14.5.) (3) Tutakulondiwa ukubalonga abamwitu pa vintu vyo basala nu kubapangisya ukuti binong’onaye ukuti batasalite akiza. (Loma 14.13) (4) Abakilisitu bakulangizya ulughano sona bakwivwisya ukuti ukukolelana muchipanga kwakulondiwa sana ukuchila vyo umuntu akusala pa weka. (Loma 14.15, 19, 20) Nanti tukusunga ifundo 4 izi mumoyo witu, zikutwavwa ukuti tubukilile ukuba pa bumanyani na bakamu na bayemba bitu nu kupangisya ukuti muchipanga mube umutende.

16. Ka abasongo bangalangizya buli-buli ukuti bololo nanti bakubomba ivintu na basongo abamwabo? (Ennya sona ivituzi.)

¹⁶ Abasongo babaghiye ukuba ichakwenezyapo ichiza pa nkani iyakuba bololo. (1 Timo. 3.2, 3) Umwakufwanikizya, usongo atakinong’onaghe ukuti akabalilo kosi inyinong’ono zyo angapeleka inti bazitikizyanje ichifukwa chakuti we songo mumyaka ukuchila abasongo abamwabo. Akulondiwa ukumanya ukuti umuzimu uwa Yehova ghungabombezya usongo aliwesi ukunena ifundo yimo yo yingabavwa ukuti basale akiza ivintu. Sona nanti abasongo abinji bakolelana ni fundo yimo yo yitakususannya ni fundo izya mu Bayibolo, usongo yo mololo akulondiwa ukukolelana ni fundo yo yaneniwa napo paweka inong’onagha ukuti angasala muzila iyamwabo.

AMAPINDU GHO GHAKUBAPO NANTI SWE BOLOLO

17. Ka tungapindula buli-buli nanti swe bololo?

¹⁷ Nanti twe bololo, tukupindula muzila izyakupambana-pambana. Tukuba bakuhoboka ichifukwa chakuti tukuba pabumanyani ubwiza na bakamu na bayemba sona muchipanga mukuba umutende. Tukuhoboka nu buntu na kikalile akakupamba-pambana ko kali pakasi pa bantu ba Yehova. Sona chakuhobosya sana ukumanya ukuti tukumwiputa u Chala ngati mbumba yoka iyakukolelana napo twafuma mumaluko aghakupambana-pambana. Ichintu chakulondiwa nkani ukuchila chilichosi, chakuti swe bakuhoboka sana pakumanya ukuti tukumweghelela u Chala witu u Yehova yo mololo.