Ka Muzimenye?
Ka injelwa zyo zikwaghiwa ku Babeloni ni zila zyo bakabombezyanga imbombo pakukoma, zikulangizya buli-buli ukuti Ibayibolo lyabwanaloli?
ABANTU bo bakufukula ivintu ivyapasi, bazyaghite injelwa amamiliyoni aghinji zyo bakabombezya imbombo pakuzenga itawuni iya Babeloni. Ukuyana nuwakufukula yumo izina lyache u Robert Koldewey, akanena ukuti injelwa zimo bakakomelagha kuzi kwa tawuni ko itope likaba lyiza sona kukaghiwanga inkwi izyakochela.”
Abakufukula ivintu ivya pasi abakale, basimikizizye ukuti bakagha ubukaboni ubwakuti abasongo aba boma bamo bakabombezyanga injelwa pakuzenga amalo gho bakayivizyangako abantu. Upulofesa yumo uwaku univesite iya ku Toronto yo amenye ivya mbili ni chinenelo icha ba Assyria, izina lyache u Paul-Alain Beaulieu, akanena ukuti: “Ivintu ivyakusimbiwa ivya ku Babeloni, vikulangizya ukuti umwene akalamula ukuti abantu bo batakumuchindika nu kumwivwila pamo batakuchindika ivintu ivyakuchindikiwa, babaghiye ukubataghila ku malo ghanagha nu kubocha.” Umwakufwanikizya, inkani yimo yo yikasimbiwa mukabalilo aka Mwene u Nebukadinezala, yikunena ukuti: “Mubanangannye, mubochannye, mubasalule, . . . mumuvuno . . . ilyosi lwabo liye mumwanya, mubaghoghe umwakubataghila mumoto.”
Ivi vikubakumbusya abantu bo bakubelenga Ibayibolo ivintu vyo vilongosoliwe mwa Daniyele chaputala 3. Tukubelenga ukuti u umwene u Nebukadinezala akachimika ichifwani ichikulu nkani cho chikapangiwa nu golide mwikombe ilya Dula, kuzi ukwa tawuni iya Babeloni. Abanyamata batatu abachihebeli, amazina ghabo ghakaba u Shadileki, u Misheki nu Abedinego bakakana ukuchifughamila ichifwani chila, ivi vikapangisya ukuti u Nebukadinezala akalale sana nu kubalamula abambombo bache ukuti basonkelezye umoto muchiliba ‘amabulendo 7 ukuchila mo bakasonkelezezyanga akabalilo kosi,’ nukubataghila abanyamata batatu bala muchiliba icha moto.’ Uwantumi akabapoka abanyamata bala ukuti batakapye nu kufwa.—Dani. 3.1-6, 19-28.
© The Trustees of the British Museum. Licensed under CC BY-NC-SA 4.0. Source
Injelwa iyakocha yo pali izina ilya Nebukadinezala
Injelwa zyo zikwaghiwa ku Babeloni zikulangizya ukuti vyo Ibayibolo likunena vyabwanaloli. Injelwa inyinji zili na mazyu gho ghakumupala Umwene wabo. Amazyu ghamo ghakasimbiwa ukuti: “Umwene u Nebukadinezala uwaku Babeloni . . . Pa njelwa zimo pakasimbiwa amazyu aghakuti inyumba yo une ne Mwene Usongo Nkani nkazenga . . . Nge abizukulu bane biza bikalamo kwa bwila na bwila.” ivi vikukolelana sana na mazyu gho ghasimbiwe pa Danieli 4.30, po u Nebukadinezala akipala ukuti: “Ka uyu te we Babeloni Umukulu yo une nazengela inyumba ya chimwene sona na maka ghane nu bukulu nu buchindamu bwane?”