Ka Mukukumbukila?

Ka umwaka ughu mwabelengite inkani izya mu Ichitembe cha Mulindlili umwakubikapo umoyo? Nanti momo mukapangila mukabomba akiza sana, ennya nanti mungakwanisya ukwamula amalalusyo aghakukonkapo agha:

Ka ‘ukuba ni nyinong’ono impya’ kukongelezyapo ichoni? (Loma 12.2)

Kukongelezyapo ivyinji ukuchila ukuba bulo nu bumi ubwakubomba imbombo inyiza. Kukongelezyapo ukwimanya akiza mo tubeleye nu kusinta ivintu pa bumi bwitu ukuti zikolelane ni fundo izya Chala.​—w23.01, pp. 8-9.

Ka tungalangizya buli-buli ukuti tuli maso po tukwennya ivintu vyo vikubombiwa muchisu?

Twe bakuhoboka ukwennya mo ivintu vyo vikubombiwa muchisu vikukwanilisizya amabulaghuzi gho ghali mu Bayibolo. Mumalo mwakusakizya bulo vyo inti vibombiwe, vyo vingapangisya ukuti tuvulungannye ukukolelana kwitu muchipanga, tungabomba akiza ukuti ukunenezannya kwitu kufumaghe mu vintu vyo igulu lya Yehova likufumusya. (1 Koli. 1.10)​—w23.02, p. 16.

Ka ukoziwa ukwa Yesu kupambanite buli-buli nu kwa bamanyili bache?

U Yesu atakalondiwanga ukuti ipeleke sona kwa Yehova, ichifukwa chakuti ichisu cho akapapiliwamo chikaba ukuti chikapelekiwa kale kwa Chala. U Yesu akaba muntu uwakufikapo, atakaba ni mbibi nayimo-yimo. Atakalondiwanga ukuti apinduke ku mbibi.​—w23.03, p. 5.

Ka tungabavwa buli-buli abamwitu kuti bope bamulaghepo pa nkomano?

Twamulaghe amaansala aghafupi, umwakuti tubape abamwitu ulusako ulwakuti bope bamuleko. Tutakanenaghe ifundo izyinji pakabalilo koka. Ivi vingavwa ukuti bope abamwitu bamuleko.​—w23.04, p. 23.

Nkimba ‘Izila iya Buzelu’ yo yineniwe pa Yesaya 35.8 yikimilagha ichoni?

Izila iya buzelu iyi, ichabwandilo yikimilagha ubulendo ubwa Bayuda ubwa kufuma ku Babeloni ukuya ku Izilayeli. Buli pakunena izya masiku ghitu ghano? Imyaka amahandiledi aminji bo umwaka uwa 1919 ghutafike, imbombo iya kuyannya izila iya buzelu yikabombiwa​—Ukusanuzya nu kupulinta ama Bayibolo ni vintu ivyamwabo. Ukufuma kale abantu ba Chala bakwenda Pazila iya Buzelu’’ ukuya ku paladayiso uwabuzimu, yo akubalongozezya ku visayo ivya mu Bumwene.​—w23.05, pp. 15-19.

Ka pa Isya Mbupingamu chaputala 9 pakwaghiwa bulongozi buli ubwa bakolo babili abakufwanikizya bulo?

Pa Isya Mbupingamu chaputala 9 pakunena izya ‘mukolo umupunganu’ yo ukwitizya kwache kukulongozezya ku ‘bufwe’ loli uwamahala ‘mukolo’ yo ukwitizya kwache kukulongozezya ku ‘mahala aghenecho’ nu bumi. (Mbupi. 9.1, 6, 13, 18)​—w23.06, pp. 22-24.

Ka u Chala akalangizya buli-buli ukwiyisya nu bololo pa mo akabombela ivintu nu Loti?

U Yehova akamubuzya u Loti ukuti afume mu Sodomu nu kuchimbilila ku maghamba. Loli pakabalilo ko u Loti akalaba ukuti achimbilile ku Zowali, u Chala akamwitikizya.​—w23.07, p. 21.

Nkimba umuchi angabomba ichoni nanti umulume wache akwenelezya ivituzi ivyakusikula?

Abaghiye ukukumbukila ukuti atakiyipe inongwa. Akulondiwa ukubikapo umoyo pakughomya ubumanyani bwache nu Chala sona ukwinong’onela inkani izya mu Bayibolo izya bakolo bo bakasangalusiwa nu Yehova. Angamwavwa umulume wache ukuti aleghuke ivintu vyo vingamupangisya ukuti enelezye ivituzi ivyakusikula.​—w23.08, pp. 14-17.

Ka ukumanya ivintu kungatwavwa buli-buli ukuti tube bololo?

Tubaghiye ukwennya inkani pamo ilalusyo lyo balalusya ukuti zila yoka iya kumanyila vyo abantu bakwinong’ona pamo ukupasya navyo. Tubaghiye ukuba bakwisengannya ukwamula umwa bololo.​—w23.09, p. 17.

Ka tungamanyilako ichoni kwa Maliya pankani iya kwagha amaka gho tukulondiwa?

Akati amanya ukuti inti abe we mama uwa Mesiya, u Maliya akagha amaka ukufuma ku banji. U Gabiliyeli nu Elizabeti bakamukazya u Maliya ni fundo izya mu Masimbo. Nuswe bulo tungagha amaka ukufuma ku bakamu na bayemba.​—w23.10, p. 15.

Ka u Yehova akwamula buli-buli inyiputo zyitu?

U Yehova alayizizye ukwamula inyiputo zyitu sona akwennya tasi mo vyo tukulaba vikulemelana nu bwighane bwache. (Yere. 29.12) U Yehova angamula inyiputo zyitu muzila izyakupambana-pambana, sona akabalilo kosi akutwavwa.​—w23.11, pp. 21-22.

Aba Loma 5.2 pakunena ivya ‘lusubilo,’ choni cho lukatambuliwa sona mu vesi 4?

Nanti umuntu ivwa amazyu amiza, akwanda ukuba nu lusubilo ulwakuti angize ahoboke nu bumi ubwa bwila na bwila mu paladayiso pachisu ichapasi. Loli nanti akomana ni ntamyo ni vyakumala mahala po amanya ukuti u Yehova akuhoboka nawe, akuba nu lusubilo ulwakughoma nkani sona akusubila ukuti vyo akulindilila vikwiza pakubombiwa.​—w23.12, pp. 12-13.