INKHANI IYAKUMANYILA 14
ULWIMBO 8 Yehova Ntchiphokwero Chithu
‘Musale Mweka . . . yo Inthi Mumubombelaghe’
‘Loli une na bamumbumba yane, inthi tumubombelaghe u Yehova.’ —YOSWA 24.15.
IFUNDO INKHULU
Inthi twennye ivifukwa vyo tusaliye ukumubombela u Yehova.
1. Nkhimba tungabomba choni ukuti tube swe bakuhoboka naloli, sona chifukwa buli? (Yesaya 48.17, 18)
U BABA witu uwakumwanya atughanite sana sona akulonda ukuti tuhobokaghe nu bumi pa kabalilo aka na munthazi. (Ndumbi. 3.12, 13) Atupelite umwakuswighisya, loli atatupelite nu mwabuke ubwakuti twilaghilaghe pamo ubwakupanga indaghilo pa cho chiza ni chibibi. (Ndumbi. 8.9; Yere. 10.23) Akumanya kuti nanthi tukumubombela sona tukuyezyayezya ukukonkha ifundo zyache, tukuba bakuhoboka.—Belenga Yesaya 48.17, 18.
2. Ka u Satana akulonda ukuti uswe tusubilaghe ichoni, sona u Yehova abombitepo ichoni ukuti asusye ubumyasi bwache?
2 U Satana akulonda ukuti tusubilaghe ukuti tungaba bakuhoboka ukusita u Yehova, sona abanthu bangilaghila bene. (Ubwa. 3.4, 5) U Yehova akasusya ubumyasi ubu umwakwitikizya ukuti abanthu bilaghile bene ukwa kabalilo kanandi bulo. Chipepe sana ukumanya ukuti abanthu bapotwa ukwilaghila bene. Amasimbo ghakunena ivya banavuli na bakolo bo bakaba bakuhoboka ichifukwa chakumubombela u Yehova nu moyo wabo ghosi. Pa banthu bosi aba, u Yesu Kilisitu weyo akaba wakuhoboka nkhani. Ichabwandilo, inthi twennye ichifukwa cho akasala ukumubombela u Yehova. Pisinda pache, inthi tumanyile ichifukwa cho tubaghiye ukumwiputa Ubaba witu uwakumwanya weka. Pabumalilo, inthi twennye ivifukwa vimo vyo tusaliye ukumubombela u Yehova.
ICHIFUKWA CHO U YESU AKASALA UKUMUBOMBELA U YEHOVA
3. Nkhimba u Satana akamupa choni u Yesu, sona u Yesu akabomba ichoni?
3 Pa kabalilo ko u Yesu akaba pachisu ichapasi, akalondiwanga ukusala yo inthi amubombelaghe. U Yesu akati oziwa bulo, u Satana akati angamupa amabumwene ghosi agha pachisu ichapasi nanthi angamwiputa lyoka bulo. U Yesu akamula ukuti: “Epapo Satana! Amasimbo ghakuti: ‘Umuchindikaye Umwene u Chala wako, sona umubombelaye yuyo mwene.’” (Mata. 4.8-10) Choni cho u Yesu akasala bunubu? Za twennye ivifukwa vimo.
4-5. Ka vinthu buli vyo vikamupangisya u Yesu ukusala ukumubombela u Yehova?
4 U Yesu akasala ukumubombela u Yehova ichifukwa chakuti amughanite nkhani. (Yoha. 14.31) Umwakongelezyapo, u Yesu asalite ukumubombela u Yehova ichifukwa chakuti chocho chinthu ichakulondiwa sana cho abaghiye ukubomba. (Yoha. 8.28, 29; Ubuvu. 4.11) Akumanya ukuti u Yehova weyo Chiziwa ichabumi, musubaliwa sona wakupa. (Sali. 33.4; 36.9; Yako. 1.17) Akabalilo kosi u Yehova akamubuzyanga u Yesu ubwanaloli sona akamupanga vyo akalondiwanga. (Yoha. 1.14) Loli u Satana apangisizye ukuti abanthu bafwanje. U Satana mumyasi, mupafu sona wakwighana. (Yoha. 8.44) Pakumanya ifundo izi, u Yesu atakinong’onapo ukuti angamweghelela u Satana umwakumusambukila u Yehova.—Filipi 2.5-8.
5 Ichifukwa ichamwabo cho u Yesu akasala ukumubombela u Yehova, chikaba chakuti akennyanga ivinthu ivyiza vyo vikwiza ukubombiwa ichifukwa chakumubombela u Yehova umwabusubaliwa. (Hebe. 12.2) Akamanyagha ukuti nanthi abukilila ukuba musubaliwa kwa Yehova, akulizelufya izina ilya Baba wache sona akwiza pakupeleka izila iyakwefezyapo ivinthu ivibibi vyo u Satana akandisya.
ICHIFUKWA CHO TUBAGHIYE UKUMWIPUTA U YEHOVA WEKA
6-7. Choni cho amasiku ghano abanthu abinji batakumubombela u Yehova, loli choni cho tubaghiye ukumwiputa yuyo weka?
6 Amasiku ghano, abanthu abinji batakumubombela u Yehova ichifukwa chakuti batazimenye akiza inkhalo zyache sona batakumanya ivinthu ivyiza vyo ababombeye. Umu momo vikabela na ku banthu aba ku Ateni bo u Pabuli akabalumbilila.—Imbo. 17.19, 20, 30, 34.
7 U Pabuli akabalongosolela abanthu bo bakateghelezyanga ukuti u Chala uwabwanaloli ‘we yo akubapa abanthu ubumi nu muyi sona ivinthu vyosi.’ Akongelezya sona ukuti: “Mumwache tuli nu bumi, tukwenda sona tuliko.” U Chala Mupeli, yuyo ‘ukwendela mwa munthu weka akapela inkho izya banthu bosi,’ chochobene tubaghiye ukumwiputa yuyo weka.—Imbo. 17.25, 26, 28.
8. Nkhimba u Yehova te ize abombepo ichoni? Longosola.
8 Pakuba Mupeli sona Mulaghili uwachipeliwa chosi, u Yehova nanthi angalonda angabakakamizya bulo abanthu ukuti bamubombelaghe. Loli te ize abombepo lumo bunubu. Mumalo mwache atupiye ubukaboni ubwakuti aliko sona amughanite aliwesi. Akulonda ukuti abanthu abinji babe bamanyani bache kwa bwila na bwila. (1 Timo. 2.3, 4) Cho chifukwa u Yehova atumanyisizye ukuti tubamanyisye abanthu ivyakukwafannya nu bwighane bwache sona tubabuzye ivinthu ivyiza vyo akwiza pakubabombela. (Mata. 10.11-13; 28.19, 20) Atupiye ichipanga cho tukumwiputilamo na basongo bo bakutupwelelela umwalughano.—Imbo. 20.28.
9. Ka u Yehova akulangizya bulibuli ukuti amughanite aliwesi?
9 U Yehova akulangizya sona ukuti walughano pa mo akubombela na banthu bo bakusubila ukuti ataliko. Ennya amabukaboni agha: Ukwanda kale, abanthu amabiliyoni aghinji basalite ukwendela ifundo zyabo pa cho chiza ni chibibi. Napo vili bunubu, loli umwachisa u Yehova akubapa vyo bakulondiwa ukuti babukilile ukuba nu bumi sona bahobokaghe. (Mata. 5.44, 45; Imbo. 14.16, 17) Abapiye ulusako ulwakuba pa bumanyani na banji, ukuba ni mbumba sona ukuhoboka ni mbombo yo bakubomba. (Sali. 127.3; Ndumbi. 2.24) Ivi vikulangizya ukuti u Baba witu uwakumwanya amughanite aliwesi. (Kuso. 34.6) Pa kabalilo aka, za twennye ivifukwa vyo tusaliye ukumubombela u Yehova sona mo wepe akubombela nuswe.
ICHIFUKWA CHO TUSALIYE UKUMUBOMBELA U YEHOVA
10. (a) Choni cho tukumubombela u Yehova? (Matayi 22.37) (b) Ka mwapindula bulibuli ichifukwa chakuti u Yehova mololo? (Salimo 103.13, 14)
10 Ngati we Yesu, nuswe bulo tukumubombela u Yehova ichifukwa chakuti tumughanite nu moyo ghosi. (Belenga Matayi 22.37.) Nanthi twamanyila inkhalo zyache, tukwanda ukwiyivwa ukuti tuli papipi sana nu Yehova. Umwakufwanikizya, inong’onela mo u Yehova akubombela nuswe ivinthu umwabololo. Pa kabalilo ko Abaizilayeli bakaleka ukumwivwila, u Chala akabalambilizya ukuti: ‘Nyokaniko, napela kuzila zyinyu izibibi.’ (Yere. 18.11) U Yehova akukumbukila ukuti swe banthu bambula ukufikapo sona twe lufumbi. (Belenga Salimo 103.13, 14.) Nanthi mukwinong’onelapo mo u Yehova abeleye mololo sona inkhalo izyamwabo, ka vitakubapangisya ukuti mumubombelaghe kwa bwila na bwila?
11. Ka vifukwa buli ivyamwabo vyo vikutupangisya ukuti tusale ukumubombela u Yehova?
11 Tukulonda sona ukumubombela u Yehova ichifukwa chakuti chocho chinthu ichakulondiwa sana cho tukulondiwa ukubomba. (Mata. 4.10) Sona tukumanya ukuti nanthi tukumubombela umwabusubaliwa, tukwagha ivinthu ivyinji ivyiza. Nanthi swe basubaliwa, tukuzelufya izina lya Yehova, tukulangizya ukuti u Satana mumyasi sona tukuhobosya umoyo uwa Baba witu u Yehova. Nanthi pa kabalilo aka twasala ukumubombela u Yehova, tukuba nu lusako ulwakuti tungamubombela kwa bwila na bwila!—Yoha. 17.3.
12-13. Nkhimba twamanyilako choni kwa Jane nu Pam?
12 Po tuchili swe bana banandi, tungamanyila ukumughana nkhani u Yehova sona ulughano lwitu lungabukilila ukwaka ngati moto po tukukula. Ennya mo vikabela kwa muyemba u Jane nu Pam.a Bakanda ukumanyila Ibayibolo po yumo akaba ni myaka 11 yumo 10. Napo abapapi babo batakalondagha ukumanyila Ibayibolo, bakabitikizya abana babo ukuti bamanyilaghe loli pekapeka nanthi inthi babukaghe kuchalichi icha bapapi babo. U Jane akanena ukuti, “Ivinthu vyo Abakaboni bakatumanyisyanga ukufuma mu Bayibolo, vikanavwa ukuti indeke ukubombezya imilembo iyakuvulungannya ubongo pamo ukuba ni nkhalo iyabwamalaya vyo abamwitu ku sukulu bakabombagha.”
13 Pakati pendapo imyaka yinandi bulo, bakaba balumbilili. Pisinda pache bakanda ubupayiniya ubwakabalilo kosi, loli bakapwelelelagha sona abapapi babo bo bakaba bagosi. Pakwennya vyo vikabombiwa kwisinda, u Jane akati: “Nkhamanya ukuti u Yehova musubaliwa sana pakupwelelela abamanyani bache ngati mo pakunenela pa 2 Timoti 2.19 po pakuti, ‘u Yehova abamenye abanthu bo bache.’” Tutakukayikila ukuti u Yehova akubapwelelela bo basala ukumughana nu kumubombela!
14. Ka amazyu ni vyakubomba vyitu vingavwa bulibuli ukuzelufya izina lya Yehova? (Ennya sona ivithuzi.)
14 Tukulonda ukwavwapo pakulizelufya izina lya Yehova ku mabumyasi ghosi. Tufwanikizye ukuti: Umumanyani winyu uwapamoyo wachisa, wakupa sona wakuhobokela. Isiku limo mukwivwa yumo akunena ukuti umumanyani winyu mulili sona te musubaliwa. Ka mungabomba bulibuli? Tutakukayikila ukuti mungamufighilila. Umwakuyana bulo, nanthi u Satana na banthu bo bali ku chigaba chache bakunanga imbili ya Yehova pakunena ivinthu ivyabumyasi, uswe tukubabuzya abanthu ubwanaloli ubwakukwafannya nu Yehova nu kufighilila izina lyache. (Sali. 34.1; Yesa. 43.10) Tukulangizya ukuti tukulonda ukumubombela u Yehova nu moyo witu ghosi ukwendela mu mazyu na muvyakubomba.
Ka mungatulapo pakufighilila izina lya Yehova? (Ennya indime 14)b
15. Nkhimba umutumiwa u Pabuli akapindula bulibuli ichifukwa chakusintha ivinthu vimo? (Aba Filipi 3.7, 8)
15 Swe bakwisengannya ukusintha ivinthu vimo pa bumi bwitu ukuti tumuhobosye u Yehova pamo ukuti tubombe ivyinji pakumubombela. Umwakufwanikizya, umutumiwa u Pabuli akasala ukuleka ivinthu ivyapamwanya vyo akaba navyo ukuti amukonkhe u Kilisitu nu kumubombela u Yehova. (Gala. 1.14) Ivi vikapangisya ukuti asayiwe nu kupokela ulusako ulwakuti ize alaghile nu Kilisitu kumwanya. Atakadandaghulapo ichifukwa chakusala ukumubombela u Yehova sona nuswe bulo te tukadandaghulepo lumo.—Belenga Aba Filipi 3.7, 8.
16. Nkhimba twamanyilako ichoni kwa Julia? (Ennya sona ivithuzi.)
16 Nanthi twabikapo umoyo pakumubombela u Yehova, tungasayiwa sona tukwiza ukusayiwa. Ennya vyo vikabombiwa kwa muyemba yumo izina lyache u Julia. Bo achili atamanyiye ubwanaloli, akimbagha ukwayala ukufuma po akaba mwana munandi. Umunthu yo akamanyila ivyakwimba, akennya ukuti ali nu luso sona akanda pakumumanyisya. Patakenda akabalilo akatali, u Julia akatchuka sona akanda ukwimba inyimbo mu malo aghakumanyikwa. Pa kabalilo ko akaba pa sukulu iyakumanyisya ivya nyimbo, uwamwabo yo akamanyilagha nawe akamubuzya ivyakukwafannya nu Chala sona ukuti izina lyache we Yehova. U Julia akanda ukumanyila Ibayibolo kabili pa sabata. Pisinda pache, akasala ukuti abikaghepo umoyo pakumubombela u Yehova, mumalo mwakumalila akabalilo akatali pakwimba inyimbo. Loli chitakaba chipepe ukusala bunubu. Akanena ukuti, “Abanthu abinji bakambuzyanga ukuti nkhukomannya bulo uluso lwane, loli une nkhalondagha ukumubombela u Yehova ubumi bwane bosi.” Ka pa kabalilo aka akwiyivwa bulibuli na vyo akasala imyaka 30 yo yendapo? Akati, “Indi nu mutende uwa mumoyo sona nkhusubila ukuti u Yehova akwiza ukukwanilisya vyosi vyo umoyo wane ghukulonda.”—Sali. 145.16.
Nanthi tukubikapo umoyo pakumubombela u Yehova, tungaba nu bumi ubwakuhobosya (Ennya indime 16)c
MUBUKILILE UKUMUBOMBELA U YEHOVA
17. Ka ukwikala mumasiku aghabumalilo kukukwafya bulibuli bo basalite ukumubombela u Chala na bo batasalite?
17 Tukwikala mumasiku aghabumalilo. Umutumiwa u Pabuli akasimba ukuti: ‘Kwasyalako bulo akabalilo akapimpha akakuti yuyo akwiza afike, sona te akabe.’ (Hebe. 10.37) Ka ivi vikutukwafya bulibuli? Akabalilo akakuti abanthu basale ukumubombela u Yehova kachepa. (1 Koli. 7.29) Sona nanthi tusalite kale ukumubombela u Chala, tukumanya ukuti napo tukujimba ku nthamyo izyakupambanapambana, loli zyakabalilo ‘akapimpha bulo.’
18. Nkhimba u Yesu nu Yehova bakulonda ukuti tubombaghe ichoni?
18 U Yesu akabaghomya abamanyili bache ukuti babukilile ukumukonkha. (Mata. 16.24) Nanthi twamubombela u Yehova kwakabalilo akatali, tukulondiwa ukusimikizya ukuti tutakanyokele mwisinda. Tukulondiwa ukubikapo umoyo ukuti tubukilile ukumubombela. Napo te chipepe ukubomba bunubu, loli tungasayiwa nu kuba bakuhoboka!—Sali. 35.27.
19. Ka twamanyilako ichoni kwa Gene?
19 Bamo bakwinong’ona ukuti ukumubombela u Yehova kukulondiwa ivyinji. Nanthi we wachinyamata, ka ukwinong’ona ukuti ungaluza ivinthu vimo nanthi ungasala ukumubombela u Yehova? Umukamu yumo uwachinyamata izina lyache u Gene akati: “Nkhiyivwanga ukuti pakuba ne Kaboni wa Yehova, nkhupinyiwa sana. Nkhennyanga ukuti abamwitu abinji bakuhoboka pakupanga amapate, ukuba ni vibwezi pamo nanthi bakwenelezya amavidiyo gho ghakulangizya ivyankhaza, po une nkhamalilagha akabalilo ku nkhomano na mu bulumbilili.” Nkhimba akinong’onele aka kakamukwafya bulibuli u Gene? Akati, “Nkhanda ukwikala ubumi ubwa pabili, sona nkhahoboka nabo ukwa kabalilo. Loli nthakaba ne wakuhoboka ukwa kabalilo akatali. Nkhanda ukwinong’onelapo ubwanaloli ubwa mu Bayibolo bo nkhabuleka pisinda pache nkhasala ukuti imubombelaghe u Yehova nu moyo ghosi. Ukufuma pa kabalilo kala, nkhwennya ukuti u Yehova akwamula inyiputo zyane.”
20. Nkhimba tubaghiye ukusimikizya ukubomba choni?
20 Uwamasalimo akamwimbila u Yehova ukuti: ‘Wakuhoboka umunthu yo umwe mukumusala nu kumupalamizya kupipi ukuti ikale mumisolo yinyu.’ (Sali. 65.4) Nge twabukilila ukumubombela u Yehova ngati we Yoshwa, yo akanena ukuti: ‘Loli une na bamumbumba yane inthi tumubombelaghe u Yehova.’—Yoswa 24.15.
ULWIMBO 28 Kuŵa Ŵabwezi ŵa Yehova
a Amazina ghamo ghasintha.
b AMAZYU AGHAKULONGOSOLA IVITHUZI: Umukolo ati ivwa vyo abakususya bakunena, akubuka pa kashelofu nu kwivwisya amazyu aghabwanaloli.
c AMAZYU AGHAKULONGOSOLA ICHITHUZI: Ichithuzi ichakufwanikizya bulo chikulangizya ukuti u Julia akabikaghapo umoyo pakumubombela u Yehova