Ka u Chala Akwaghiwa Paliposi?
Vyo Ibayibolo likwamula
U Chala akwennya chilichosi sona ali na maka aghakubomba chilichosi cho alonda. (Isya Mbupingamu 15.3; Aba Hebeli 4.13) Loli Ibayibolo litakumanyisya ukuti u Chala akwaghiwa paliposi pamo akwaghiwa mu vinthu vyosi. Mumalo mwache likulangizya ukuti u Chala munthu sona ali na malo aghenecho gho akwikalako.
Mo u Chala akubonekela: U Chala muzimu. (Yohani 4.24) Umunthu atangamwennya u Chala. (Yohani 1.18) Amabulaghuzi gha mu Bayibolo ghakulangizya ukuti u Chala ali na malo aghenecho gho akwikalako sona atakwaghiwa paliposi.—Yesaya 6.1, 2; Ubuvumbuli 4.2, 3, 8.
Amalo gho u Chala akwikala: U Chala akwikala amalo aghabuzimu gho ghali kumwanya sona tutangaghennya. U Chala ali na malo aghenecho ‘aghakwikalako kumwanya.’ (Banyafyale 8.30) Ibayibolo likunena akabalilo ko ivipeliwa ivyabuzimu ‘vikabuka ukuti viye vibonekele pamaso gha Yehova,’a vyo vikulangizya ukuti u Chala ali na malo aghenecho gho akwikalako.—Jobu 1.6.
Nanthi u Chala atakwikala paliposi, nkhimba angamphwelelela une pa nemwene?
Inga. U Chala akupwelelela aliwesi pamwene. Nangabuli akwikala kumwanya loli akwennya bosi bo bakulonda ukumuhobosya sona akubapwelelela. (1 Banyafyale 8.39; 2 Syambukulu 16.9) Za twennye mo u Yehova akulangizizya ukuti akubapwelela abanthu bache bosi bo bakumwiputa:
Nanthi mukwiputa: U Yehova akwivwa inyiputo zyinyu pa kabalilo ko mwamulaba.—2 Syambukulu 18.31.
Nanthi mukutamiwa inyinong’ono: ‘U Yehova ali papipi na bo umoyo wabo wafwanthika; Akubafighilila bo umuzimu wabo wafwanthika.’—Salimo 34.18.
Nanthi mukulonda ubulongozi: U Yehova inthi ‘abatangilile ni lyiso lyache’ ukwendela mu mazyu ghache Ibayibolo.—Salimo 32.8.
Amabumyasi aghakukwafyannya na malo gho u Chala akwikala
Ubumyasi: U Chala akwaghiwa paliposi mu chipeliwa.
Ubwanaloli: U Chala atakwikala pa chisu pamo kumwanya ko uswe tukukwennya na maso. (1 Banyafyale 8.27) Ubwanaloli bwakuti inthondwa sona ivipeliwa ivyamwabo ‘vikulumbilila ubuchindamu bwa Chala.’ (Salimo 19.1) U Chala atakwikala mu chipeliwa cho akapela ngati mo umunthu yo akujambula ichituzi atakwikala mu chituzi cho ajambula. Loli ichituzi chingatubuzya ivyakukwafyannya nu munthu yo akajambula. Umwakuyana bulo ichisu cho tukwikalamo chikutubuzya ‘ivinthu ivisita kuboneka,’ ivyakukwafyannya nu Mupeli ngati amaka, amahala sona ulughano.—Aba Loma 1.20.
Ubumyasi: U Chala abaghiye ukwikala paliposi ukuti amanyaghe chilichosi sona ukuti alangizye amaka ghache.
Ubwanaloli: Umuzimu ubuzelu maka gho u Chala akubombezya. Ukwendela mu muzimu ubuzelu, u Chala angennya sona angabomba chilichosi pa kabalilo na malo gho alonda.—Salimo 139.7.
Ubumyasi: Isimbo ilya Salimo 139.8 likulangizya ukuti u Chala akwaghiwa paliposi po likunena ukuti: ‘nanthi ningabuka kumwanya, umwe mukwiza pakuba kulakula, sona nanthi ningaghona mwipumpha, ennya! Umwe mukwiza pakuba mulamula.’
Ubwanaloli: Isimbo ili litakunena ivya malo gho u Chala akwikala. Loli likumanyisya ukuti patalipo amalo gho ghavwamite kwa Chala gho ghangapangisya ukuti apotwe ukutwavwa.
a Ibayibolo likunena ukuti u Chala izina lyache we Yehova.