ICHIMANYILO 2

Izila Iyakunenezannya

2 Aba Kolinti 2.17

IFUNDO INKULU: Munenaghe mo mukunenela bwile sona umwakufuma pasi pa moyo nu kulangizya ukuti mukubinong’onela abantu.

Mwipute nu kwisengannya akiza. Mumulabe u Chala ukuti abavwe ukuti mutakapasyanje nkani mumalo mwache mubike inyinong’ono zyinyu pa butenga bo mwaya pakunena. Mwivwisye akiza ifundo izikulu zyo mukulonda ukuti muye munene. Mutakabelengaghe bulo mo visimbiliwe mwibuku pamo pipepala, mumalo mwache muzilongosole ifundo mu mazyu ghinyu na ghinyu.

Nanti mwaya pakubelenga Ibayibolo pamo ibuku limo, mukulondiwa ukuyimanya akiza inkani yosi umwakuti muye mubelenge akiza ukusita ukwiluma-luma. Nanti mukubelenga amazyu aghamo gho umuntu yumo akanena, mubelengaghe ukuyana na mo umwenecho akiyivwilagha, ukusita ukukokomezya.
Munenaghe ukufuma pasi pa moyo. Mwinong’onelaghe ichifukwa cho abantu bakulondiwa ukwivwa ubutenga bo mukunena. Mubikeko inyinong’ono ku bantu. Mwenelezye ukuti icheni chinyu, amajesika na mo mukubombela, vikulangizya ukuti mubaghanite abantu.

Ukunena umwakusatuka, chitakung’anamula ukuti munenaghe umwambula muchizi. Munenaghe akiza sona umwamuchizi ukuti ubutenga bwinyu bube bwakulondiwa sona bwakwivwika kwa aliwesi.
Mubennyanje abantu. Mubennyanje abantu nanti kuchigaba chinyu chakwitikizyiwa. Nanti mukunena inkani yinu, mwennyanje umuntu aliwesi pamwene pakabalilo koka, mumalo umwakwennya bulo abantu bosi pakabalilo koka.