UMUTU 51
Nkimba Mungamuhobosya Buli-buli u Yehova ni Vyakunena Vyinyu?
Po u Yehova akatupelagha, akatupela ni chabupi ichapamwanya nkani ichakunena. Nkimba u Yehova vikumukwafya na mo tukubombezezya ichabupi ichi? Inga vikumukwafya! (Belenga Yakobo 1.26.) Nkimba tungabombezya buli-buli ichabupi ichi ukuti tumuhobosye u Yehova?
1. Nkimba tungabombezya buli-buli akiza ichabupi cho u Yehova atupiye?
Ibayibolo likunena ukuti: “Mukazannyanje nu kwavwana.” (1 Aba Tesalonika 5.11) Nkimba mutanginong’onelako bamo bo bakulondiwa ukukaziwa? Nkimba mungabomba buli-buli ukuti bayivwanje akiza? Mubabuzye ukuti bakulondiwa ku kwinyu. Akabalilo kamo mungababuzya vyo bakubomba akiza. Munginong’onela isimbo lyo mungamubelengela yo mumumenye? Pali amasimbo aghinji gho mungasala ukughabombezya. Mukumbuke ukuti mo munganenela vingalimbikisya abamwinyu pamo hagha. Po akabalilo kosi munenaghe umwachisa nu mwalughano.—Isya Mbupingamu 15.1.
2. Nkimba tutakulondiwa tunenaghe buli-buli?
Ibayibolo likunena ukuti: “Mumalomo ghinyu mutakafumaghe ineno imbibi.” (Belenga Aba Efeso 4.29.) Ivi vikung’anamula ukuti tutakulondiwa tunenaghe amazyu aghabibi ku bamwitu pamo ukubanenela amazyu aghamusamu pamo amazyu gho ghangakalalizya abamwitu. Tutakulondiwa ukubayeba abamwitu.—Belenga Isya Mbupingamu 16.28.
3. Choni cho chingatwavwa ukuti tubakazyanje abamwitu?
Ivintu vyo tukunena akabalilo kosi vikuvumbula vyo vili mumoyo witu sona vyo tukwinong’ona. (Luka 6.45) Po tukulondiwa tuyimanyisyanje swebene ukuti tunenaghe ivintu ivyiza, ivigholosu, ivizelu, ivyalughano ni vyakupala. (Aba Filipi 4.8) Ukuti tubombaghe bunubu tukulondiwa ukuti tusalaghe umwamahala abamanyani sona ivyakusangalusya. (Isya Mbupingamu 13.20) Sona twinong’onelaghepo tasi vyo tukulonda pakunena na mo inti tunenele. Twinong’onelaghe mo amazyu ghitu inti ghabakwafizye abamwitu. Ibayibolo likunena ukuti: ‘Amazyu aghabibi ghali ngati ukulasa ukwa chipeni, loli ululimi ulwa mahala lukupozya.’—Isya Mbupingamu 12.18.
MANYA IVYINJI
Manya mo munganenela ukuti mumuhobosye u Yehova sona ukuti mubakazyanje abamwinyu.
4. Mubanje maso na vyo mukulonda ukunena, akabalilo ko inti munenele na mo inti munenele
Akabalilo kamo tukunenagha ivintu vyo pisinda pache tukwanda pakudandabula navyo. (Yakobo 3.2) Belenga Aba Galatiya 5.22, 23, nu kwamula ilalusyo ili:
Nkimba pa nkalo izi, mungalonda ukuti mwiputile yili kwi yo yingabavwa ukuti munenaghe akiza? Nkimba inkalo izi zingabavwa buli-buli?
Belenga 1 Aba Kolinti 15.33, nu kwamula ilalusyo ili:
Nkimba abamwinyu bo mukwangala nabo sona ivyakuhobosya vingakwafya buli-buli mo mukunenela?
Nkimba choni cho chingabavwa ukuti munenaghe akiza?
Belenga Undumbilili 3.1, 7, nu kwamula ilalusyo ili:
Nkimba kabalilo buli ko mutakulondiwa ukunena pamo ukulindilila akabalilo akiza akakunenela?
5. Munenaghe ivintu ivyiza ivyabamwinyu
Nkimba choni cho chingatwavwa ukuti tutakabanenelaghe ivintu ivibibi abamwitu? Enelezya IVIDIYO, nu kwamula amalalusyo.
Ukuyana ni vidiyo, choni cho umukamu uyu akalondagha ukuti asinte mo akanenelagha ivintu ivyakukwafyannya na bamwabo?
Nkimba akabomba buli-buli ukuti asinte?
Belenga Undumbilili 7.16, nu kwamula ilalusyo ili:
Nkimba tukulondiwa ukukumbukila choni pala twagheliwa ukuti tunene ivibibi ivya muntu uyunji?
Belenga Undumbilili 7.21, 22, nu kwamula ilalusyo ili:
Nkimba amasimbo agha ghangabavwa buli-buli ukuti mutakakalalaghe pala yumo anena ivintu ivibibi ivyakukwafyannya numwe?
6. Mubanje ni chisa pala mukunena ni mbumba yinyu
U Yehova akulonda ukuti tunenaghe ni mbumba yitu umwachisa sona umwalughano. Enelezya IVIDIYO, nu kwamula ilalusyo.
Choni cho chingabavwa ukuti munenaghe umwachisa ni mbumba yinyu?
Belenga Aba Efeso 4.31, 32, nu kwamula ilalusyo ili:
Nkimba tukulondiwa tunenaghe buli-buli ukuti tughomye imbumba yitu?
U Yehova akanena mo akiyivwilagha nu mwana wache u Yesu. Belenga Matayi 17.5, nu kwamula ilalusyo ili:
Nkimba tungamuyezya buli-buli u Yehova pa nkani iya mo tukunenela na ba mumbumba yitu?
Mwaghe akabalilo akakuti mubaghomye abamwinyu
VYO BAMO BAKUNENA: “Une nkunenagha chilichosi cho nkwinong’ona. Vitakunkwafya waghe abanji batakuhoboka na vyo nkunena.”
Ka numwe mukwiyivwa bunubu? Chifukwa buli?
IFUNDO IZYAKUDUMULA
Vyo tukunena vingabavwa pamo vingakalalizya abamwitu. Tukulondiwa twinong’onelaghepo nkani vyo inti tunene, akabalilo ko inti tunenele sona na mo inti tunenele.
Ukunyokelamo
Nkimba mungabomba ichoni ukuti mubakazyanje abamwinyu na vyo mukunena?
Nkimba mutabaghiye pakunena choni?
Nkimba choni cho chingatwavwa ukuti tunenaghe umwachisa sona umwakughomya abamwitu?
IFUNDO IZYAKONGELEZYAPO
Choni cho chingatwavwa ukuti tunenaghe amazyu aghakughomya abanji?
Ennya vyo vingabavwa ukuti mutakanenaghe amazyu aghabibi.
Ennya mo mungabombela ukuti mutakanenaghe ivibibi ivya bamwinyu.
Ennya mo u Yehova akamwavwizya umwanavuli yumo ukuti aleke ukunena amazyu aghabibi.