INKANI IYAKUMANYILA 30
Mubukilile Ukumughana u Yehova na Bamwinyu
“Mulughano tubaghiye pakukulila muvintu vyosi.”—EFE. 4.15.
ULWIMBO 2 Zina Linu Ndimwe Yehova
VYO INTI TUMANYILEa
1. Nkimba po mukandagha pakumanyila Ibayibolo mukamanyila ichoni?
NKIMBA mungakumbukila ivintu vyosi vyo mukamanyila po mukandagha bulo pakumanyila Ibayibolo? Mubaghiye ukuti mukaswigha pakumanya ukuti u Chala ali ni zina. Mubaghiye ukuti mukahoboka pakumanya ukuti u Chala atakocha abantu nu moto. Sona mubaghiye ukuti mukahoboka sana pakumanya ukuti abakamu binyu bo bafuye mukwiza pakwikala nabo kwa bwila na bwila mupaladayiso pachisu ichapasi ichifukwa bakwiza pakuzyuka.
2. Umwakukongelezyapo pakumanyila ubwanaloli ubwa mu Bayibolo, ka vintu buli vyo mukakwanisya ukubomba? (Aba Efeso 5.1, 2)
2 Pakabalilo ko mukamanyilagha Amazyu agha Chala, vikapangisya ukuti mwande pakumughana nkani u Yehova. Ulughano lo mukaba nalo, lukabapangisya ukuti mwande pakubombezya imbombo ivintu vyo mukamanyilagha. Mukanda ukusala akiza ivintu umwakukolelana ni fundo izya mu Bayibolo. Mukanda pakwinong’ona nu kubomba ivintu ivyiza ichifukwa chakuti mukalondagha ukumuhobosya u Chala. Ngati mo umwana akweghelela kwa baba wache uwa lughano, numwe bulo mukanda pakumweghelela Ubaba winyu uwa kumwanya.—Belenga Aba Efeso 5.1, 2.
3. Nkimba malalusyo buli gho tungilalusya?
3 Tukulondiwa ukwilalusya ukuti: ‘Ka pakabalilo aka nkumughana nkani u Yehova ukuchila po nkanda ukuba Mukilisitu? Ukufuma pakabalilo ko nkoziwa, ka akinong’onele kane ni vyakubomba vyane nkumweghelela u Yehova umwakubalangizya ulughano abakamu na bayemba?’ Napo tungamanya ukuti ulughano lwitu kwa Yehova na kubanji te lwamaka ngati mo tukulondela, tutakanyokele munyuma. Abakilisitu ababwandilo bope bakakomanapo ni vintu ivyakuyanako bulo na vinivi. Napo vikaba bunubu u Yesu atakabakana, sona nuswe bulo atangatukana. (Ubuvu. 2.4, 7) U Yesu akumanya ukuti tungaba nu lughano ngati lo tukaba nalo pakabalilo ko tukamanyilagha ubwanaloli.
4. Nkimba munkani iyi inti tunenezannye ichoni?
4 Munkani iyi, inti tunenezannye mo tungabombela ukuti tubukilile ukumughana u Yehova na banji. Pisinda pache, inti tumanyile ivyakukwafannya ni vintu ivyiza vyo vingabombiwa nanti tukumughana sana u Yehova, abakamu na bayemba bitu.
MUBUKILILE UKUMUGHANA U YEHOVA
5-6. Ka ntamyo buli zyo u Pabuli akakomana nazyo mubulumbilili bwache, loli choni cho chikamwavwa ukuti abukilile ukumubombela u Yehova?
5 Umutumiwa u Pabuli, akahobokagha pakumubombela u Yehova loli chitakaba chipepe akabalilo kosi. U Pabuli akendagha amabulendo aghatali, loli pakabalilo kala chitakaba chipepe ukwenda amabulendo aghatali. Pamabulendo ghache agha, pakabalilo kamo u Pabuli akakomana ni ntamyo “izya ukwizula ukwa soko” sona “na mavyondongo [vigabenga].” Pakabalilo kamo abalwani bache bakafikagha mupaka na pakumukoma. (2 Koli. 11.23-27) Sona abakamu bache Abachikilisitu pakabalilo kamo batakapalizyanga pa vintu vyo akabombagha ukuti abavwe.—2 Koli. 10.10; Filipi 4.15.
6 Choni cho chikamwavwa umutumiwa u Pabuli ukuti abukilile ukumubombela u Yehova? U Pabuli akamanyila ivyinji ivyakukwafannya nu buntu ubwa Yehova ukufuma mu Masimbo sona ku vintu vyo akakomana navyo pa bumi bwache. U Pabuli akasubalila ukuti u Yehova u Chala amughanite sana. (Loma 8.38, 39; Efe. 2.4, 5) Ivi vikamwavwa ukuti ande pakumughana nkani u Yehova. U Pabuli akalangizya ukuti amughanite u Yehova, ‘pakubabombela nu kubukilila ukubabombela abazelu.’—Hebe. 6.10.
7. Choni cho chingatwavwa ukuti tumughanaghe u Yehova?
7 Nanti akabalilo kosi tukumanyila Amazyu agha Chala, vingatwavwa ukuti tumughane nkani. Pakabalilo ko mukubelenga Ibayibolo, yezya ukwinong’onelapo vyo inkani yo mukubelenga yikubamanyisya ivyakukwafannya nu Yehova. Mwilalusye ukuti: ‘Ka inkani iyi yikulangizya buli-buli ukuti u Yehova anganite? Nkimba inkani iyi yikunavwa buli-buli ukuti imughanaghe u Yehova?’
8. Ka ulwiputo lungatwavwa buli-buli ukuti tumughanaghe u Chala?
8 Izila iyamwabo yo yingatwavwa ukuti tumughanane u Yehova, ko kwiputa kukwache isiku lililyosi nu kubumuzya mo tukwiyivwila mumoyo. (Sali. 25.4, 5) U Yehova akwiza pakwamula inyiputo zyitu. (1 Yoha. 3.21, 22) Umuyemba yumo uwa ku Asia izina lyache u Khanh, akanena ukuti: “Pabwandilo nkamughanagha u Yehova ichifukwa cha vintu vyo nkamanyila ivyakukwafannya na yuyo. Loli nkati nennya ukuti akwamula inyiputo zyane nkanda pakumughana nkani. Ivi vikampangisya ukuti nande ukulonda ukubomba ivintu ivyinji vyo vingamuhobosya.”b
MUBUKILILE UKUBAGHANA ABANJI
9. Ka u Timoti akalangizya buli-buli ukuti abaghanite abakamu na bayemba?
9 Pakati pendapo imyaka ukufuma po u Pabuli akasinta nu kuba Mukilisitu, akakomana nu munyamata yumo izina lyache u Timoti. U Timoti akamughanagha u Yehova na bantu. U Pabuli akababuzya Abafilipi ukuti: “Inte nawe nayumo umuntu uyunji [ngati we Timoti] yuyo akubinong’onela ubwiza.” (Filipi 2.20) U Pabuli atakivwa bulo ku bantu abanji ukuti u Timoti akubomba akiza ivintu pamo akunena akiza pagulu ilya bantu, loli u Pabuli akennya weka ukuti u Timoti abaghanite sana abakamu na bayemba. Tutakukayikila ukuti ivipanga vyo u Timoti akendelagha abakamu na bayemba bakalindililagha umwakuhoboka ukwiza kwache.—1 Koli. 4.17.
10. Ka u Anna nu mulume wache bakalangizya buli-buli ukuti babaghanite abakamu na bayemba?
10 Nuswe bulo akabalilo kosi tukulondiwa ukuti tulondelezyanje izila izya mo tungabatulila abakamu na bayemba bitu. (Hebe. 13.16) Ennya vyo umuyemba yumo izina lyache u Anna yo twamutambula munkani yo yapululila akakomana navyo. Pisinda pakuti ichimpepo ichikulu chabombiwa, u Anna nu mulume wache bakabuka ku mbumba yimo iya Kaboni uwa Yehova uwamwabo nu kwagha ukuti impepo yifwampuye umusonje uwa nyumba iya mbumba iyi. Ivi vikapangisya ukuti imbumba iyi yitakabe na malaya aghakuswepa. U Anna akanena ukuti: “Tukasenda amalaya ghabo, tukaghachapa, ukughasita, ukughapeteka akiza nu kubapa. Uswe tukennyanga ukuti chipepe bulo ukubomba bunubu, loli ichifukwa chakuti tukabomba ivi, vikapangisya ukuti tube pabumanyani ubwiza sana ni mbumba iyi bo buchili bulipo mupaka pakabalilo aka.” Ichifukwa chakuti u Anna nu mulume wache babaghanite abakamu na bayemba, vyovyo vikabapangisya ukuti babombepo zimo umwakuti babavwe.—1 Yoha. 3.17, 18.
11. (a) Ka abantu bakwiyivwa buli-buli nanti tukulangizya ukuti tubaghanite? (b) Umwakuyana ni Isya Mbupingamu 19.17, ka u Yehova akwiza pakutubombela ichoni nanti tukubalangizya abanji ulughano?
11 Nanti twe bachisa sona tukulangizya ulughano ku banji, bangennya ukuti tukuyezya-yezya ukumweghelela u Yehova. Sona bangapalizya sana ichisa cho tungabalangizya ukuchila mo uswe tunginong’onela. Umuyemba u Khanh, yo twamutambula kubwandilo, achili akukumbukila ubutuli bo abayemba bakamulangizya. Akanena ukuti: “Nkubapalizya sana abayemba bosi bo bakansendagha ukuti twendele poka mubulumbilili. Bakizagha nu kunsenda panyumba yane, ukunitizya ukuti tuye tulye poka ichakulya nu kwenelezya ukuti nafika akiza kunyumba yane. Pakabalilo kano nkumanya ukuti yikaba mbombo inkulu sana. Loli bakabombagha ivi umwakuhoboka.” Akabalilo kamo te muntu aliwesi yo angatupalizya pa vintu vyo twamubombela. U Khanh akanena ivyakukwafannya na bo bakamwavwa ukuti: “Inkulonda ngati ningabanyosezya ivintu vyosi vyo bakambombelagha umwachisa, loli ntakumanya ko bosi bakwikala. Nkumanya ukuti u Yehova weyo angabomba ivi sona weyo angabanyosezya mumalo mwa une.” Vyo U Khanh akunena vyabwanaloli. U Yehova akumanya ichintu chilichosi cho tungababombela abanji umwachisa napo chingaba chinandi sana. Akuchennya ichintu cho twabomba ngati chabupi ichapamwanya sana sona akwennya ngati nkongole iyakuti akwiza pakutunyosezya.—Belenga Isya Mbupingamu 19.17.
Nanti umuntu akubukilila ukumubombela u Yehova akwennya izila izya mo angabatulila abanji (Ennya indime 12)
12. Ka abakamu bangalangizya buli-buli ukuti babaghanite abakamu na bayemba muchipanga? (Ennya sona ichituzi.)
12 Nanti we mukamu, ka ungalangizya buli-buli ulughano ku banji nu kubombapo zimo ukuti mubavwe? Umukamu yumo uwa chinyamata izina lyache u Jordan, akamulalusya usongo yumo uwa chipanga mo angabombela ivintu ivyinji ukuti atulepo pachipanga. Usongo akamubuzya ukuti abukilile ukubomba ivintu vyo akubomba kale akiza sona akamupa ubulongozi ubwa mo angabombela ivyinji. Umwakufwanikizya, akasakizya ukuti u Jordan afikaghe mwalubilo Panyumba iya Bumwene nu kubalamuka abakamu na bayemba, amulaghepo pa nkomano sona akabalilo kosi abukaghe mubulumbilili poka na kagulu kache nu kwennya sona izila izyamwabo zyo angabatulila abanji. Pakabalilo ko u Jordan akabombezyanga ubulongozi ubu, akamanyila mo angabombela ivintu ukuti alangizyange ulughano ku bakamu na bayemba. U Jordan akamanyila ukuti umukamu nanti aba mwavwilizyi uwakwavwa te popo akwanda pakwavwa abanji mumalo mwache akubukilila bulo ukubavwa abanji.—1 Timo. 3.8-10, 13.
13. Ka ulughano lukamupangisya buli-buli umukamu u Christian ukuti ande sona pakubomba ngati we songo wa chipanga?
13 Nkimba mungabomba ichoni nanti mwaleka ukubomba ngati mwavwilizyi uwa chipanga pamo usongo? U Yehova akukumbukila imbombo yosi yo mukabombagha sona ulughano lo lukabapangisya ukuti mubombaghe bula-bula. (1 Koli. 15.58) Sona u Yehova akwennya ulughano lo mukubukilila ukulangizya. Umukamu yumo izina lyache u Christian vikamukalalizya akati aleka pakubomba ngati we songo wachipanga. Pisinda pache akanena ukuti: “Nkasala ukuti inti mbombaghe vyosi vyo ningakwanisya pakumubombela u Yehova napo ningaba ne songo pamo hagha.” Akabalilo kakati kendapo, akasaliwa sona ukuba we songo uwa chipanga. Umukamu Christian akanena sona ukuti: “Pabwandilo nkoghopaghako panandi ukuti nande sona pakubomba ngati we songo. Loli nkennya ukuti nanti u Yehova akulonda ukuti nande sona pakumubombela ngati we songo uwa chipanga, inti mbombe ichifukwa chakuti imughanite sona imbaghanite abakamu na bayemba.”
14. Nkimba mwamanyilako ichoni kwa muyemba uwa ku Georgia?
14 Ababombi aba Yehova bakulangizya sona ukuti babaghanite abapalamani babo. (Mata. 22.37-39) Umwakufwanikizya, umuyemba yumo uwa ku Georgia izina lyache u Elena, akanena ukuti: “Pabwandilo nkalumbililagha ichifukwa chakuti imughanite u Yehova. Loli pakabalilo ko ulughano lwane lukakulagha kwa baba wane uwa kumwanya, vikanavwa ukuti nande pakubaghana sana abantu. Nkayezya ukwinong’onelapo intamyo zyo bakukomana nazyo ni nkani zyo zingabafika pamoyo. Pakabalilo ko nkabinong’onelagha nkani abantu muzila yiniyi, vikanavwanga ukuti imanye vyo ningabomba ukuti imbavwe.”—Loma 10.13-15.
AMALUSAYO GHO GHAKUBAPO PALA TUKULANGIZYA ABANJI ULUGHANO
Ulughano lo tungalangizya lungapangisya ukuti abinji basayiwe (Ennya indime 15-16)
15-16. Ngati mo pakulangizizya pavituzi, nkimba malusayo buli gho tukughagha ichifukwa chakulangizya ulughano ku bantu abanji?
15 Nanti tukubalangizya ulughano abakamu na bayemba, nuswe bulo tukupindula. U COVID-19 akati anda, umukamu yumo izina lyache u Paolo nu muchi wache bakabavwa abayemba abinji abachasongo ukuti bamanye mo bangabombezezya amafoni, amatabuleti pamo amakopyuta pakulumbilila. Umuyemba yumo yo pabwandilo akennya ukuti chikaba chipala sana ukuvibombezya ivi, pabumalilo akamanya mo angabombezezya. Umuyemba uyu akakwanisya ukuchibombezya ichipangizo chache pakubitizizyako abakamu bache ku lukomano ulwakukumbikila Imfwa iya Yesu. Abantu abakukwana 60 bakaghiwapo pa lukomano ulu pakubombezya ividiyokofelensi! Umuyemba uyu na bakamu bache bakapindula sana na vyo u Paolo nu muchi wache bakabomba. Pisinda pache umuyemba uyu akamusimbila u Paolo ukuti: “Inkubapalizya sana pakutumanyisya twe bachasongo uswe. Intakwiza pakuluvya lumo mo u Yehova akulangizizya ukuti akutupwelelela sona mo mukabikilapo umoyo pakubomba chilichosi cho mungakwanisya ukuti mutwavwe.”
16 Ivyakubombiwa ngati ivi, vikamumanyisya u Paolo ichintu ichakulondiwa sana. U Paolo akakumbukila ukuti ulughano lwakulondiwa nkani ukuchila amahala pamo amaluso gho angaba nagho. Akanena ukuti: “Nkukumbukila po nkabombagha ngati wakwendela idela. Loli amasiku ghano zyaghanizye ukuti napo abakamu na bayemba batakukumbukila inkani zyo nkanenagha, loli bakukumbukila ivintu vyo nkababombelagha.”
17. Ka tungapindula buli-buli nanti tukulangizya ulughano?
17 Nanti tukubalangizya abantu abanji ulughano, tukungapindula muzila zyo tutinong’onelaghako. U Jonathan, yo akwikala ku New Zealand, akasimikizya ukuti ifundo iyi yabwanaloli. Isiku limo Pachibelusi pamusanya, akamwennya umukamu yo akaba mupayiniya akulumbilila mu musebo. U Jonathan akasala ukuti endaghe nu mupayiniya uyu mubulumbilili Pachibelusi chilichosi pamusanya. Kubwandilo atakamanyagha na mo inti apindulile na vyo akabomba pakumupelela ichisa umukamu uyu. U Jonathan akanena ukuti: “Pakabalilo kala, pa bumi bwane intakahobokagha ni mbombo iyakulumbilila. Loli po nkivwisyanga mo umupayiniya akumanyisizya nu kwennya mo akanenelagha umwakubafika abantu pa moyo, vikanavwa ukuti nande pakuhoboka ni mbombo iyakulumbilila. Umukamu uyu akiza aba mumanyani wane uwa pamoyo sona akanavwa sana ukuti ihobokaghe nu bulumbilili, nu kuti impalamile nkani kwa Yehova.”
18. Nkimba u Yehova akulonda ukuti tubombaghe ichoni?
18 U Yehova akulonda ukuti swebosi tumughanaghe sona tubaghanaghe abanji. Ngati mo twamanyilila, tungalangizya ukuti tumughanite u Yehova umwakubelenga Amazyu ghache nu kwinong’onelapo pa vyo twabelenga sona akabalilo kosi tunenaghe nawe mulwiputo. Tungalangizya ukuti tubaghanite abakamu na bayemba muzila izyakupambana-pambana. Po ulughano lwitu lukukula, inti vitwavwe ukupalamila kwa Yehova na kubakamu na bayemba bitu. Sona inti tuhoboke nu bumanyani ubu kwa bwila na bwila!
ULWIMBO 109 Temwani Ŵanji Kufumira mu Mtima
a Napo tungaba ukuti twamubombela u Yehova kwa kabalilo akatali pamo twamanyila ubwanaloli lunulu, twebosi tungabukilila ukuya pantazi. Munkani iyi, inti tunenezannye mo tungabombela ukuti tubukilile ukumughana nkani u Yehova na abanji. Po mukumanyila inkani iyi, inong’onela ivintu vyo mukwanisizye kale ukubomba nu kwennya mo mungabombela ukuti mubukilile ukuya pantazi.
b Munkani iyi amazina ghamo ghasinta.