Mwe Bakamu Abachinyamata​—ka Mungabomba Buli-buli Ukuti Mumuyezyange u Yesu?

1. Nkimba umwanavuli uwa Chikilisitu angabomba ichoni ukuti ivintu vimwendele akiza?

UMWENE u Devedi akamubuzya u Solomoni ukuti: ‘Ube wamaka sona ubombe ivintu ngati we mwanavuli.’ (1 Nyafya. 2.1-3) Ubulongozi ubu bwakulondiwa sana ku banavuli bosi aba Chikilisitu bo bakulonda ukumuyezya u Yesu amasiku ghano. Bangabomba bunubu nanti bakwivwila indaghilo izya Chala sona bakukonka ifundo izya mu Bayibolo pachilichosi cho bakulonda ukubomba pa bumi bwabo. (Luka 2.52) Choni cho chakulondiwa sana ukuti abakamu bachinyamata babe Bakilisitu bakughoma mwabuzimu?

2-3. Choni cho chakulondiwa nkani kwa mukamu uwachinyamata ukuti ize abe mu Kilisitu uwakughoma mwabuzimu?

² Umwanavuli uwa Chikilisitu ali na mabudindo aghinji gho abaghiye ukukwanilisya mumbumba sona muchipanga. Mwe bakamu bachinyamata tutakukayikila ukuti mwinong’onoyepo kale pa ma budindo gho mungize mube nagho muntazi. Mubaghiye ukuti mukulonda ukuti mwize mube mwe mupayiniya uwakabalilo kosi, umwavwilizi uwakwavwa sona pisinda pache usongo uwa chipanga. Lumo mungize mulonde sona ukusenda nu kuba na bana. (Efe. 6.4; 1 Timo. 3.1) Ukuti mwize mukwanilisye ivyakwibikila ivi sona ukuti ivintu vize vibendele akiza ukuba Bakilisitu abakughoma mwabuzimu kwakulondiwa sana.b

³ Nkimba choni cho chingabavwa ukuti mube mwe Bakilisitu abakughoma mwabuzimu? Pali amaluso aghakulondiwa nkani gho mukulondiwa ukuti mumanyile nukuba nagho. Nkimba pa kabalilo aka mungabomba ichoni ukuti mwisengannye ubudindo bulibosi bo mungize mube nabo sona namo mungize mubombele ukuti ivintu vibendele akiza?

VYO MUNGABOMBA UKUTI MUBE MUKILISITU WAKUGHOMA MWABUZIMU

4. Ka mungavyagha kwiyi ivifwanikizyo ivyiza vyo mungeghelelako? (Ennya sona ichituzi.)

⁴ Musale ivifwanikizyo ivyiza vyo mungeghelelako. Mu Bayibolo muli ivifwanikizyo ivyiza vyo abakamu abachinyamata bangeghelelako. Abanavuli abakwisinda aba bakamughanagha nkani u Yehova sona bakabombagha chilichosi cho bangakwanisya ukuti bakwanilisye amabudindo ghabo agha kupwelelela abantu ba Chala muzila izya kupambana-pambana. Mungagha ivifwanikizyo ivyiza ivya Bakilisitu abakughoma mwabuzimu mumbumba yinyu sona muchipanga. (Hebe. 13.7) Sona muli ni chifwanikizyo chakufikapo icha Yesu Kilisitu. (1 Pita. 2.21) Po mukubikapo umoyo pakumanyila ivifwanikizyo ivi, inong’onelapo inkalo inyiza zyo bakaba nazyo. (Hebe. 12.1, 2) Pisinda pache mumanye mo mungabombela ukuti mubeghelele abanavuli aba.

5. Ka mungabomba buli-buli ukuti mube nakinong’onele akiza sona choni cho chakulondiwa ukubomba bunubu (Salimo 119.9)

⁵ Mube na ‘mahala sona musungilile akinong’onele akiza.’ (Mbupi. 3.21) Umuntu yo akwinong’ona akiza, akwing’onelapo tasi pa vintu vyo asala po achili atabombite. Mubikepo umoyo ukuti mumanyile mo mungabombela sona mubukilile ukubomba bunubu. Chifukwa buli? Ichifukwa chakuti amasiku ghano ichisu chizuye na bachinyamata bo bakusala ivintu pakwendela inying’ono zyabo sona bakubomba ivintu ukuyana namo bakuyivwila. (Mbupi. 7.7; 29.11) Amafilimu, amativi, intaneti sona amalo aghakwangalilapo agha pa inteneti vingakwafya mo mukwinong’onela sona mo mukubombela ivintu. Loli ka mungabomba buli-buli ukuti mwinong’onaghe akiza? Ichabwandilo mumanyile ifundo izya mu Bayibolo sona mwinong’onelepo ichifukwa cho ifundo izi zyakulondiwa. Pisinda pache mubombezyange ifundo zyo mwamanyila, ukuti zibavwe ukuti musalaghe akiza ivintu vyo vingamuhobosya u Yehova. (Belenga Salimo 119.9.) Nanti mungamanyila muzila iyi vikwiza pakubavwa ukuti mwize mube Mukilisitu uwakughoma mwabuzimu. (Mbupi. 2.11, 12; Hebe. 5.14) Ennya mo mungapindulila muzila ziwili izi: (1) mo muku bombela ivintu na bayemba (2) pa nkani iya mo mukusalila ivyakuvwala sona namo mukwiswefezya.

6. Ka umukamu uwachinyamata uwakwinong’ona akiza, angalangizya buli-buli ukuti akubachindika abakolo?

⁶ Umwanavuli yo akwinong’ona ngati mo u Yehova akwinong’onela, akubachindika abakolo. Umukamu uwachinyamata angalonda ukuba pa bumanyani nu muyemba uwa Chikilisitu. Loli umukamu uwachinyamata yo akwinong’ona akiza nanti asimikizya umoyo ukuti inti basendane nu muyemba uyu, popo anganena, ukumusimbila pamo ukubomba ivintu ivyakulangizya ukuti akulonda naloli ukuti bize basendane. (1 Timo. 5.1, 2) Nanti umukamu uwachinyamata ali ni chibwezi, akufighilila imbili iya muyemba umwakusita ukuba pabene ukusita umuntu yumo ukubenelezya.​—1 Koli. 6.18.

7. Ka ukwinong’ona akiza kungamwavwa buli-buli umukamu uwachinyamata nanti akusala ivyakuvwala na kametele akisisi?

⁷ Izila iyamwabo yo umukamu uwachinyamata angalangizizya ukuti wakwinong’ona akiza, ko kusala akiza ivyakuvwala sona akametele akisisi. Abantu abinji bo bakupanga amasitayelo agha myenda, bakwitizya amalonda batakumuchindika u Yehova sona bali ni nkalo imbibi. Bangapanga ivyakuvwala ivyakufyenya pamo ivyakuti umwanavuli abonekaghe ngati mukolo. Nanti bakusala ivyakuvwala, abakamu abachinyamata bo Bakilisitu abakughoma mwabuzimu, bakukonka ifundo izya mu Bayibolo sona bakweghelelako ivifwanikizyo ivyiza ivya bakamu muchipanga. Umukamu angilalusya ukuti: ‘Ka vyo nkusala vikulangizya ukuti nkwinong’ona akiza sona nkuchindika inyinong’ono izya banji? Nkimba mo nkuvwalila vikupangisya ukuti chibe chipepe ku banji ukumanya ukuti ne mubombi uwa Chala?’ (1 Koli. 10.31-33; Titi 2.6) Umukamu uwachinyamata yo akwinong’ona akiza, atakwiza pakuchindikiwa bulo na bakamu na bayemba loli akwiza pakuchindikiwa sona nu Baba witu uwakumwanya.

8. Nkimba umukamu uwachinyamata angamanyila buli-buli ukuba musubaliwa?

⁸ Mube basubaliwa. Umunyamata yo musubaliwa, akabalilo kosi akuyezya-yezya ukukwanilisya amabudindo ghosi gho ali nagho. (Luka 16.10) Inong’onela ichifwanikizyo ichakufikapo icha Yesu. Atakabapo lumo mupopo pamo ukupotwa ukukwanilisya amabudindo gho akaba nagho. Mumalo mwache, akakwanilisya imbombo yache yosi yo u Yehova akamubuzya ukuti abombe, napo pa kabalilo kamo chikabanga chipala ukubomba bunubu. Akabaghanagha abantu loli nkani-nkani abamanyili bache, umwakuti akaba wakwisengannya ukupeleka ubumi bwache ichifukwa icha babo. (Yoha. 13.1) Mubikepo umoyo pakubomba imbombo yiliyosi yo babapa, nanti mukulonda ukumuyezya u Yesu. Nanti mutakumanya mo mungabombela imbombo yimo, mwiyisye nu kulaba ubutuli ku bakamu abakughoma mwabuzimu. Mutakabanje mwe bakata pakubomba imbombo. (Loma 12.11) Mumalo mwache, mumalizyanje imbombo yo babapa, ichifukwa ‘mumanye ukuti mukumubombela u Yehova,’ abantu pole. (Aba Kolosi 3.23) Ichifukwa chakuti mwe bambula ukufikapo, mukulondiwa ukuba bakwiyisya sona ukwitikizya ivintu vyo mwapuvya.​—Mbupi. 11.2.

MUMANYILE AMALUSO GHO GHANGABAVWA PA BUMI BWINYU

9. Choni cho umukamu uwachinyamata akwenela ukuba na maluso?

⁹ Ukuti mube mwe bantu abakughoma mwabuzimu, mubaghiye ukuba na maluso. Ivi vikwiza pakubavwa ukuti mwitikizye amabudindo muchipanga, ukwagha imbombo yo yingabavwa umwe ni mbumba yinyu, sona ukuba pa bumanyani ubwiza na banji. Za twennye ghamo mwa maluso agha.

10-11. Ka umukamu uwachinyamata angapindula buli-buli sona ichipanga chingapindula buli-buli nanti akusimba nukubelenga akiza? (Salimo 1.1-3) (Ennya sona ichituzi.)

¹⁰ Mumanyile ukubelenga nu kusimba akiza. Ibayibolo likunena ukuti umuntu akuba wakuhoboka sona ivintu vikumwendela akiza, nanti akubelenga Amazyu agha Chala isiku lililyosi nukwinong’onelapo. Nanti umuntu akubelenga Ibayibolo isiku lililyosi akwiza pakumanya mo u Yehova akwinong’onela. (Belenga Salimo 1.1-3.) Vyo vikwiza pakumwavwa ukuti inong’onaghe akiza nu kubombezya vyo akumanyila mu Masimbo. (Mbupi. 1.3, 4) Abantu bo bakubomba bunubu bakulondiwa sana muchipanga. Chifukwa buli?

¹¹ Abakamu na bayemba bakulonda abanavuli bo bangakwanisya ukumanyisya nu kubapa ubulongozi ubwa kufuma mu Bayibolo. (Titi 1.9) Nanti mukubelenga nu kusimba akiza, vikwiza pakubavwa ukuti mwisengannyange akiza inkani, sona mupeleke ifundo zyo zingabavwa nu kughomya ulwitiko lwabo. Vikwiza pakubavwa sona ukuti musimbaghe ifundo zyo zingabavwa po mukumanyila pa mwebene, pa nkomano izya pa chipanga, izya dela sona izya chigaba. Vyo mukusimba vikwiza pakubavwa ukuti mughomye ulusubilo lwinyu nu lwa banji.

12. Choni cho chingabavwa ukuti munenezannyanje akiza na bantu?

¹² Mumanyile mo munganenezannya akiza na bantu. Umwanavuli uwa Chikilisitu abaghiye ukumanyila ukunenezannya akiza na bantu. Umwanavuli yo akunenezannya akiza na bantu, akwivwisya inyinong’ono na mo abanji bakuyivwila. (Mbupi. 20.5) Angamanyila mo umuntu uyunji akwiyivwila pakwivwa amazyu, mo akunenela sona mo umubili bwache bukubonekela. Mutangamanyila ukubomba bunubu nanti mutakwangala na bantu akabalilo akinji. Nanti akabalilo akinji mukubombezya ivintu ivya tekinoloje pakunenezannya na bantu, ngati amaimelo na mameseji, vingapangisya ukuti manye mube na maluso agha kunenezannya na bantu pamaso na pamaso. Cho chifukwa mubaghiye ukulondelezya izila izya mo munganenezannya na bantu pamaso na pamaso.​—2 Yoha. 12.

13. Nkimba vintu buli ivyamwabo vyo uwachinyamata angamanyila? (1 Timoti 5.8) (Ennya sona ichituzi.)

¹³ Mumanyile mo mungaghila indalama izya vyo mukulonda. Umwanavuli uwa kughoma mwabuzimu abaghiye ukwiyavwa nu kwavwa imbumba yache. (Belenga 1 Timoti 5.8.) Muvyisu vimo abakamu abachinyamata bakumanyila imbombo ukufuma ku bapapi pamo kubakamu babo. Muvyisu vimo bakumanyila amaluso agha po bachili bali kusekondale. Mulimosi mo vingabela chiza ukumanyila amaluso gho ghangize ghabavwe ukwagha imbombo. (Imbo. 18.2, 3; 20.34; Efe. 4.28) Mube ni mbili iyakuti mwe bantu bakulimbikila imbombo sona nanti mwayagha imbombo mukubikapo umoyo ukuti muyimalizye. Nanti mungabomba bunubu vikwiza ukubavwa ukuti mwaghe imbombo nu kubukilila ukuyibomba. Inkalo na maluso vyo twanenezanya vyakulondiwa nkani kwa mwanavuli uwa Chikilisitu ukuti ize akwanilisye amabudindo ghache aghamuntazi. Za twennye ghamo mwa mabudindo agha.

MWISENGANNYE AMABUDINDO GHINYU AGHA MUNTAZI

14. Ka umukamu uwa chinyamata angisengannya buli-buli ukuti ize abe mubombi uwa kabalilo kosi?

¹⁴ Umubombi uwa kabalilo kosi. Abakilisitu abinji abakughoma mwabuzimu bakanda ubupayiniya ubwa kabalilo kosi pom bachili banandi. Ubupayiniya bukwavwa abachinyamata ukuti bamanyile mo bangabombela imbombo na bantu aba nkalo izyakupambana-pambana. Bukwavwa sona ukuti babombezyange akiza indalama umwamahala, umwakuleka ukunanga izyinji ukuchila zyo bakuzyagha. (Filipi 4.11-13) Izila inyiza iyakuba mubombi uwa kabalilo kosi, ko kwanda ubupayiniya ubwa kabalilo akanandi. Abinji bakubomba ubupayiniya ubwa kabalilo akanandi ukwa kabalilo, ko kukubavwa ukuti bande ubupayiniya ubwa kabalilo kosi. Ubupayiniya bukwighula izila izyinji izyakuba mubombi uwa kabalilo kosi ngati ukwavwa pambombo iya vyakuzenga-zenga sona ukubombela pa Beteli.

15-16. Choni cho chingamwavwa umukamu uwa chinyamata ukuti ize abe mwavwilizyi uwakwavwa pamo usongo uwachipanga?

¹⁵ Mwavwilizyi pamo usongo uwachipanga. Abanavuli bosi aba Chikilisitu babaghiye ukuba ni chakwibikila ichakuti bize bababombele abakamu na bayemba ngati basongo muchipanga. Ibayibolo likunena ukuti umwanavuli yo akulonda ubudindo ubu “akunyonywa imbombo inyiza nkani.” (1 Timo. 3.1) Bo achili ukubomba ngati we songo uwachipanga, umukamu akubomba tasi ngati mwavwilizyi wakwavwa. Abavwilizyi bakwavwa, bakwavwa abasongo bachipanga muzila izya kupambana-pambana. Abasongo aba chipanga na bavwilizyi bakubabombela abakamu na bayemba umwakwiyipa sona bakubikapo umoyo pa mbombo iya bulumbilili. Abakamu bachinyamata banganda ukubomba ngati bavwilizyi abakwavwa pa chipanga napo batakwanisizye imyaka 20. Umwavwilizyi yo akubukilila ukubomba akiza bangamusala ukuti abe we songo uwachipanga, napo ali ni myaka iya muma 20.

¹⁶ Ka mungabomba buli-buli ukuti mube pa mabudindo agha? Ibayibolo lili nu bulongozi ubwa nkalo zyo mubaghiye ukuba nazyo ukuti mukwanilisye ukuba pa mabudindo agha. Napo vili bunubu, mukumbukilaghe ukuti inkalo zyosi zyaghona pakulighana Ibayibolo, u Yehova, imbumba yinyu sona ichipanga. (1 Timo. 3.1-13; Titi 1.6-9; 1 Pita. 5.2, 3) Mubikepo umoyo ukuti mwivwisye akiza inkalo yiliyosi payene. Mumulabe u Yehova mulwiputo ukuti mukwanisye ukuba ni nkalo izi.c

17. Ka umukamu wachinyamata angisengannya buli-buli ukuti ize abe umulume sona umutu wambumba? (Ennya sona ichituzi.)

¹⁷ Umulume sona umutu uwa mbumba. Ngati mo akanenela u Yesu, abanavuli bamo abakughoma mwabuzimu bakusala ukwikala ukusita ukusenda. (Mata. 19.12) Loli nanti mwasala ukuti musende, mukwiza ukuba na mabudindo agha kongelelapo, ngati ukuba umulume nu mutu wambumba. (1 Koli. 11.3) U Yehova akulindilila ukuti umulume amughane umuchi wache, amupe ivyakulondiwa pa bumi, ukuba mumanyani wache umwiza sona ukumwavwa ukuti abe pa bumanyani ubwiza nu Yehova. (Efe. 5.28, 29) Inkalo na maluso vyo twanenezyannya mu nkani iyi ngati ukuba na kinong’onele akiza, ukuchindika abakolo sona ukuba musubaliwa vikwiza pakubavwa ukuti mube umulume umwiza. Mukwiza ukuba mwe bakwisengannya ukukwanilisya amabudindo ghinyu ngati ukuba umulume nu mutu uwambumba.

18. Ka umukamu uwachinyamata angisengannya buli-buli ukuti ize abe we baba?

¹⁸ Ubaba. Nanti wasenda ungize ube we baba. Ka mungamanyilako ichoni kwa Yehova pa nkani iyakuba we baba umwiza? Mungamanyilako ivyinji. (Efe. 6.4) U Yehova akamubuzya umwana wache u Yesu pazelu ukuti amughanite sona akuhoboka nawe. (Mata. 3.17) Nanti wiza waba we baba ukenelezyanje ukuti ukubasimikizya abana bako kabili-kabili ukuti ubaghanite. Ukabapalizyange pa vintu vyo babomba akiza. Aba baba bo bakukonka ichifwanikizyo icha Yehova bakubavwa abana babo ukuti bize babe bakolo sona banavuli aba Chikilisitu abakughoma mwabuzimu. Mungisengannya akiza ubudindo ubu umwakubukilila ukulangizya ulughano ku ba mumbumba yinyu na muchipanga nu kubabuzya ukuti ubaghanite sona bakulondiwa sana. (Yoha. 15.9) Ivi vikwiza pakukwavwa ukuti muntazi mwize mube umulume sona ubaba umwiza. Mu kabalilo koka kanako mukwiza pakuba mwe bakulondiwa kwa Yehova, kumbumba yinyu na ku chipanga.

KA INTI MUBOMBE ICHONI?

19-20. Choni cho chingabavwa abakamu abachinyamata ukuti bize babe banavuli Abachikilisitu abakughoma mwabuzimu? (Ennya ichituzi ichapachifwambo.)

¹⁹ Mwe bakamu ba chinyamata inti vilondiwe ukuti mubombepo zimo ukuti mube mwanavuli uwa Chikilisitu uwakughoma mwabuzimu. Mukulondiwa ukuti musale akiza ivifwanikizyo ivyakuti mukonke, mube na kinong’onele akiza, mube mwe basubaliwa, mube namaluso gho ghangabavwa pa bumi bwinyu sona mwisengannye pa mabudindo gho mungize mube nagho muntazi.

²⁰ Po mwikwinong’onela ivintu vyosi vyo mukulondiwa ukuti mubombelepo imbombo, mungiyivwa ukuti chakutamya ukuvikwanilisya. Loli mungavikwanilisya. Mukumbuke ukuti u Yehova akulonda hee ukubavwa. (Yesa. 41.10, 13) Sona abakamu na bayemba muchipanga bangabavwa. Nanti mwiza mwaba umwanavuli yo u Yehova akulonda ukuti mube, ubumi bwinyu bukwiza ukuba bwakuhobosya. Tubaghanite sana mwe bakamu bitu abachinyamata! U Yehova abasaye pa vintu vyosi vyo mukuyezya-yezya ukubomba pa kabalilo aka ukuti mube mwe bakilisitu bakughoma mwabuzimu.​—Mbupi. 22.4.