NDONGOSOLO 3

Adame na Eva bakolamana Nzambi

Adame simbiri mbutu yi babayimina yi mu heni Eva

Tilumbu timosi, Eva bu kabâ yandi kaka, nioka yimosi yamuzonzela. Nioka yamuyula: ‘Ngano wa matieleka wena ti Nzambi waluyimini mu dia mbutu za miti miamiansoni?’ Eva wamuvuturila: ‘Tulendi dia mbutu za miti miamiansoni, kâ ka tulendi’â tadia mbutu ya muti wumosi ko. Tala ti tudiri mbutu za muti wo, mbo tufwa.’ Buna nioka yatâ: ‘Ka lufwa ko. Diangana, tala ti ludiri yo, mbo lubâ ntiana Nzambi.’ Ngano wa matieleka wabâ? Kâni, bungungu bwabâ. Kâ Eva wakwikila. Bu keri tomo talaka mbutu za muti wu babayimina, wayizi tomo bâ na nsatu ya dia zo. Yandi wadia yo, mpe wahana yo kwe Adame. Adame wazaba ti bu kaketi lembo zitisa Nzambi mbo baketi fwa. Kâ yandi wayizi dia mbutu yi babayimina.

Mbazi bata kengerela mwelo ya nsaba ya Edene na mbele ya tiya, mu ntangu Adame na Eva yi bata duka ku nsaba

Ha minima, Yehova wazonza kwe Adame na Eva. Yandi wabayula mu bungu dia nti bayizi lembo tumama. Eva wayizi tâ ti nioka yamutuma, mpe Adame wayizi tâ ti ni Eva wamutuma. Mu bungu ti Adame na Eva ka bayizi’â tumamana Yehova ko, Yandi wabadukisa ku nsaba. Mpe, mu ba kabakasa mu kâla ku nsaba ya Edene, Yehova watûla mbazi ha mwelo na mbele ya tiya.

Yehova watâ ti mbo kaketi semba mpe wô wahuna Eva; ka yabâ nkatika nioka ko yazonza kwe Eva. Nioka ka zena na lenda ko dia zonza. Mbazi ya mbi yabâ yazonzesa nioka. Yandi wadinga mu huna Eva. Mbazi yango, Satana bamutâka na Diabulu. Mu bilumbu bita kwiza Yehova mbo kahonda Satana; buna Satana ka vutu’â bâ na lenda ko dia huna bantu mu ba tuma mu yirika misamu mia mbi.

‘Diabulu tihondi tiabâ tûka ku mbatukulu, mpe ka yizi’â tatamana mu matieleka ko, mu bungu ti matieleka ka mena mu yandi ko.’—Za 8:44, note