‘Soleno [. . .] ka nani luzololo lwa sarila’

1. Ngatu tatomo bâ mu nsayi nti tufweti sa, mpe mu bungu dia nti? (Izaya 48:​17, 18)

TATA’ETO die ku zulu beto katomono zolo, mpe zololo ti tayangalala mu luzingu bwawu bu na mu bilumbu bita kwiza. (Ekl. 3:​12, 13) Yandi watusala na lenda dia yirika misamu mia nzitukulu, kâ ka tu hana lenda ko dia titwarisa beto beni, peleko dia bonga nzengolo beto beni mu misamu mitariri mbi na mbote. (Ekl. 8:9; Yer. 10:23) Zebi ti ngatu tatomo bâ mu nsayi, tufweti mu sarila mpe tufweti diatila mu mitieno miandi.—Tanga Izaya 48:​17, 18.

2. Satana nti kazolo takwikila, mpe Yehova nti kasa?

² Satana zololo ti takwikila ti tulendi bâ mu nsayi ni bu sa ti Yehova kena neto ko, mpe bantu balendi titwarisa bawu beni. (Mba. 3:​4, 5) Mu songela ti Satana ngungu yena, Yehova wabika bantu batitwarisa bawu beni ntangu fioti. Ka wena mpasi ko mu mona ti luyâlu lwa bantu ka luta bâ ko. Ku lweka lwakaka, Matsonoko mbo mazonzelaka bifwani bia bakento na babakala babâ na luzingu lwa mbote mu tisalu tia Yehova. Tia ntete ni tia Yezu Kristo. Mu timoko ti mbo tulongoka mu bungu dia nti Yezu kasola mu sarila Yehova. Ha manima mbo tutaluzula mu bungu dia nti tufweti sarila Tata’eto Yehova. Ku nsuka, mbo tuzonzela misamu mitutumaka mu sola mu sarila Yehova.

MU BUNGU DIA NTI YEZU KASOLA MU SARILA YEHOVA

3. Nti Satana kahana kwe Yezu, mpe ntia nsololo Yezu kasa?

³ Mu ntangu yi keri ha mutoto, Yezu wafweti sola nani kaketi sarila. Ntangu fioti ha manima ma bateme’andi, Satana watâ kwe Yezu ti mbo kaketi mu hana bimfumu biabiansoni bie mu nza bu kaketi mu sambila mbala mosi kwa. Yezu wamuvuturila: ‘Katuka Satana! Mu bungu ti wa tsonama wena: ‘Ni Yehova Nzambi’aku fweti sambila, mpe ni yandi kwa fweti sarila tisalu tia mulongo.’’ (Mat. 4:​8-10) Mu bungu dia nti Yezu kasila nsololo yo? Tataluzuleno misamu miamutuma.

4-5. Ntia misamu miatuma Yezu mu sola mu sarila Yehova?

⁴ Musamu wa ntete watuma Yezu mu sola mu sarila Yehova ni luzolo—Yezu luzolo lwa nkatika lwa ngolo lwe nandi mu Tata’andi. (Za 14:31) Musamu wakaka, Yezu Yehova kasarilaka mu bungu ti musamu wo wa mbote wena. (Za 8:​28, 29; Nza. 4:11) Zebi ti Yehova ni yandi watuhana luzingu, tulendi mu kwikila mpe bima biabingi bia mbote katuhanaka. (Mik. 33:4; 36:9; Zaki 1:17) Yehova matieleka kwa keri mu têlaka ntangu zazansoni, mpe wamuhana bima biabiansoni bieri nandi. (Za 1:14) Kâ Satana, watulumuna lufwa. Ngungu yena yidienokenaka, mpe nsatu za yandi beni kwa kakipaka. (Za 8:44) Yezu watomo zaba Yehova na Satana, kani kabwe kazolo’â ko mu bâ ntiana Satana mpe mu kolamana Yehova.—Flp. 2:​5-8.

⁵ Musamu wakaka watuma Yezu mu sola mu sarila Yehova, ni wena’eti na luvivululu lwalwansoni keri kêlaka ndandu zaketi nata tisalu tiandi tia kwikama. (Ebr. 12:2) Wazaba ti bu kaketi bâ wa kwikama mbo kaketi santukisa nkumbu ya Tata’andi, mpe mbo kaketi hana nzila mu katula masumu na lufwa lwa tulumuna Satana.

MU BUNGU DIA TI TUFWETI SARILA KWA YEHOVA

6-7. Mu bungu dia nti bantu babingi lumbu ti balembo sarilaka Yehova, kâ mu bungu dia nti tufweti sarila kwa yandi?

⁶ Lumbu ti bantu babingi balembo sarilaka Yehova mu bungu ti ka beka’eti zaba bifu biandi bia mbote ko, mpe ka beka’eti bakula mio mi kasa mu bungu dia bawu ko. Bantu bango bena ntiana bantu Paulo ba kasamunina ku Atene. Bawu mpe ka bazaba Nzambi ko.—Bis. 17:​19, 20, 30, 34.

⁷ Paulo wabangula kwe bantu beri mu wirikilaka ti Nzambi ya matieleka ‘wahana kwe babansoni luzingu na mwela, na biabiansoni.’ Wavutu yika: ‘Ni mu Yandi, twe ba moyo, tukwe diatiri, tukwe bêleke.’ Nzambi we Mvangi, ni yandi ‘mu muntu wumosi wadukisa bantu babansoni,’ buna ni Yandi kwa tufweti sarila.—Bis. 17:​25, 26, 28.

8. Nti Yehova kalendi lembo sa? Bangula.

⁸ Mu bungu ti ni Yandi we Mvangi mpe we Mfumu ya bima biabiansoni bia yilama, Yehova lenda die nandi dia tuma bantu mu ngolo mu mu sarila. Kâ, kani kabwe kasilaka bo ko. Kani kasila bo, tu heni bidimbu bita tu songela ti wa moyo wena, mpe muna muntu mu beto katomono zolo. Zololo ti bantu babingi babâ ndiku zandi mankululu. (1 Tim. 2:​3, 4) Ntiangu, Yehova katukubikiri mu longesa makani mandi kwe bantu babansoni na mu bazonzela misamu mia mbote mi kayirika mu bungu dia bantu. (Mat. 10:​11-13; 28:​19, 20) Watuhana timvuka ku tulendi mu sila nsambululu mpe ku tulendi bakila lubakusu lwa bakuluntu bê na luzolo.—Bis. 20:28.

9. Bwe luzolo lwa Yehova lumonekenaka?

⁹ Yehova mbo kasongelaka luzolo lwandi bu kahanaka mpe bima bia mbote kwe bantu basolaka mu lembo kwikila ti wa moyo wena. Banza’eti: Tûka mivu miamingi bantu babingi basolaka mu diatila buna bu bazololo, kani batumamana kwe Yehova. Kâ Yehova mbo kabahanaka bima biabiansoni bie nawu nsatu ngatu babâ ba moyo mpe bayangalala mu luzingu. (Mat. 5:​44, 45; Bis. 14:​16, 17) Wabahana lenda dia bâ na ndiku za mbote, dia bâ na kanda, mpe dia mona nsayi mu tisalu tiawu tia ngolo. (Mik. 127:3; Ekl. 2:24) Wa matieleka Yehova bantu babansoni katomono zolo. (Ndu. 34:6) Bwawu bu tazonzela misamu mitutumaka mu sola mu sarila Yehova, mpe bwe katusakumuninaka.

MU BUNGU DIA NTI TUSOLAKA MU SARILA YEHOVA

10. a) Musamu wa ntete wututumaka mu sarila Yehova ni we? (Matie 22:37) b) Bwe wabakila ndandu mu mulemvo wa Yehova? (Mikunga 103:​13, 14)

¹⁰ Ntiana Yezu, musamu wa ntete wututumaka mu sarila Yehova ni wena’eti yandi tutomono zolo. (Tanga Matie 22:37.) Mbo tupusanaka kwe Yehova mu ntangu yi tulongokaka bifu biandi. Mu tifwani, wa kubama wena mu tu lemvokela. Mu ntangu bala ba Israele bu bakolama kwe Yandi, wabalemberela bu katâ: ‘Muna muntu, sobeno ndiatulu’eno ya mbi.’ (Yer. 18:11) Yehova mbo kabambukaka ti bantu ba masumu twena. (Tanga Mikunga 103:​13, 14.) Bu banzaka ntangu Yehova yi kakulemvokelaka, ngano kawukuhanaka nsatu ko mu mu sarila ntangu zazansoni?

11. Ntia misamu miakaka mitutumaka mu sarila Tata’eto die ku zulu?

¹¹ Yehova mpe tusarilaka mu bungu ti musamu wo wa mbote wena. (Mat. 4:10) Tuzebi ti tamana bâ ba kwikama kwe Yehova mbo tubaka ndandu zazingi za mbote. Bu tusarilaka Yehova na kwikama kwakwansoni nkumbu’andi tusantukisaka, mbo tusongelaka ti Satana ngungu yena, mpe mutima wa Yehova tuyangirikaka. Bu tusola mu sarila Yehova bwawu bu, tivuvu tie neto mu mu sarila ntangu zazansoni!—Za 17:3.

12-13. Tifwani tia Jane na Pam nti tita tu longesa?

¹² Ni bu sa ti bantwenia kwa tatiri, tulendi kurisa luzolo lwa ngolo mu Yehova, mpe luzolo lweto mbo lutatamana mu bâ ngolo tii bu tununa. Jane mvula 11 zeri nandi mpe Pama mvula 10 mu ntangu yi babatika mu longoka Bibila. Ni bu sa ti bibuti biawu ka beri’â zolo mu longoka Bibila ko, bahana nzila kwe Jane na Pam mu longoka Bibila na Mbangi za Yehova tala ti mbo baketi kwenda ku nzo-nzambi na kanda. Jane têle: “Mio mia kundongesa Mbangi za Yehova mu nzila ya Bibila, miakumbakisa mu telamana tiya tweri ku nsaka ndiku zani za ku lukolo mu nwa drogue na mu sa bunsuza.”

¹³ Ku nsuka ya buntwenia bwawu, bala bo ba bole bayizi bâ bisamuni. Ha manima, bu beri kwe kipi bibuti biawu bia nuna bayizi bâ mipasuri-nzila mia ntangu zazansoni. Bu bavutu banzaka misamu mio, Jane têle: “Nayizi longoka ti Yehova ndiku zandi kafwilaka tiari, mpe ntiana bu taka wo 2 Timote 2:​19, ‘Yehova bantu bandi ba kazebi.’” Ntembe kâni Yehova mbo kafwilaka tiari bô babansoni basolaka mu mu zolo na mu mu sarila!

14. Bwe tulendi nwanina nkumbu ya Yehova? (Tala mpe bifwani.)

¹⁴ Tuzololo ti bantu babansoni bazaba matieleka matariri Yehova. Banza’eti musamu’ewu: Ndiku ye naku ye na nsayi, yi kabaka mpe yilemvokelaka. Tilumbu timosi, wiri muntu wuta tâ ti ndiku’aku wa mbi wena mpe kena na bunsungu ko. Ngano nti sa? Mbo mu nwanina. Mpila mosi mpe, Satana na bantu bamulandaka bu batâka bungungu mu bungu dia Yehova, mbo tutâka matieleka matariri Yehova, mpe mbo tunwaninaka nkumbu’andi na luhemo lwalwansoni. (Mik. 34:1; Iza. 43:10) Mbo tusongelaka ti tuzololo mu sarila Yehova mu tilundi tieto tiatiansoni, mu nzonzolo’eto na mu nsalulu zeto.

15. Ntia ndandu ntumwa Paulo kabaka bu kasa nsobolo za zinene mu luzingu lwandi? (Bisi-Filipe 3:​7, 8)

¹⁵ Ba kubama twena mu sa nsobolo mu luzingu lweto ngatu tatâ Yehova nsayi peleko tasala bwabwingi mu tisalu tiandi. Mu tifwani, ntumwa Paulo tibuka tia mfunu tieri nandi mu dibundu dia Bayuda, kâ wabika dibundu dio mu kwizi bâ mulongoki wa Yezu mpe mu sarila Yehova. (Nga. 1:14) Buna luzingu lwa mbote lweri nandi mpe wayizi baka bweso bwa yâla na Yezu ku zulu. Kani kabwe ka nionga ko mu nzengolo yi kabonga mu sarila Yehova; beto mpe.—Tanga Bisi-Filipe 3:​7, 8.

16. Nti tuta longoka mu tifwani tia Julia? (Tala mpe bifwani.)

¹⁶ Tamana tatamana mu tûla mabanza meto mu tisalu tia Yehova, tulendi bâ na luzingu lwa mbote bwawu bu na mu bilumbu bita kwiza. Tabongeno tifwani tia mpangi ya yikento ye na nkumbu Julia. Ntete kazaba matieleka, Julia bu kabâ wa fioti mu nzo-nzambi keri tangaka. Mu bungu ti nguria bubote keri tangaka wayizi baka formasio ngatu kabâ titangi tia opéra. Julia wayizi bâ wa zabakana mpe wabatika mu tangaka mu mbuka za zabakana. Mu ntangu yi keri kotelaka ku lukolo lumosi lwa mizike lweri nsangu, mpwana’andi yiberi classe yimosi yabatika mu mu zonzela Nzambi mpe wamubangurila ti nkumbu ya Nzambi ni Yehova. Ntangu fioti ha manima, Julia wabatika mu longokaka Bibila mbala zole mu lumingu. Wayizi bonga nzengolo ya sarila ntangu’andi na ngolo zandi mu sarila Yehova kani kabâ titangi tia opéra. Nzengolo yo mpasi yabâ mu bonga. Têle: “Bantu babingi beri tâka ti lenda diani dia tanga ndieri bebesaka, kâ meno natomo zolo mu sarila luzingu lwani mu tisalu tia Yehova.” Ngano bwe kabanzaka mu nzengolo yi kabonga tûka mvula 30? Têle: “Nsayi ye nani mu nzengolo yi nabonga ya sarila Yehova, mpe lukwikulu lwe nani ti Yehova mbo kalungisa nsatu zazansoni za mutima’ani mu bilumbu bita kwiza.”—Mik. 145:16.

TATAMANA MU SARILA YEHOVA

17. Mu bungu ti nsuka ya nzi yi yeka nguria penepene, ntia nsobolo wuta nata kwe bô basolele mu sarila Yehova na kwe bô beka lembo bwa sa?

¹⁷ Nsuka ya nzi yi yeka nguria penepene. Ntumwa Paulo watsoneka: ‘Ntangu ‘fioti kwa yisiri,’ mpe ‘wô kwiza mbo katula, kazingila ko.’’ (Ebr. 10:37) Bwe musamu wo wuta tu tarila? Ntangu fioti kwa yisiri ngatu bantu basola mu sarila Yehova. (1 Kor. 7:29) Tala ti tasolele mu sarila Yehova, tuzebi ti ni bu sa ti tubwabana na nkwamusu, za ‘ntangu fioti’ kwa zibâ.

18. Yehova na Yezu nti bata tu lomba mu sa?

¹⁸ Yezu watindisa bantu mu bâ milongoki miandi, kâ mpe batatamana mu mu landa. (Mat. 16:24) Tala ti Yehova tusarilaka tûka mivu tabongeno nzengolo ya lembo bîka. Tufweti sarila ngolo zazingi mu tatamana mu sarila Yehova. Kampe mbo wubâ musamu wa mpasi, kâ tulendi bâ mu nsayi, mpe tusakumunu twatwingi tubaka bu tumusarila bwawu bu!—Mik. 35:27.

19. Nti tuta longoka mu tifwani tia Gene?

¹⁹ Bantu bakaka mbo babanzaka ti bamana sarila Yehova kabamona nsayi ya luzingu ko. Tala ti nge ntwenia yena, ngano benzi ti tima hombesa wamana sarila Yehova? Mpangi ya ntwenia ya bakala ye na nkumbu Gene têle: “Mbo ndieri banzaka ti ka ndendi’â nasa nsaka ko mu bungu ti Mbangi ya Yehova ndiena. Kampe bala babingi ba nakula na bo mbo beri zoloko bima ntiana malaki, bâ na fille peleko sa nsaka za jeux video za miangu. Kâ meno mbo ndieri yôkesaka ntangu’ani ku tukutakanu na mu tisalu tia samuna.” Ntia nsobolo mbanzulu zo zanata kwe Gene? Yandi têle: “Nayizi batika mu yirikaka misamu mia mbi mieri yirikaka ntwenia zakaka, nayizi sakana ntangu fioti. Kâ nsayi yi namona ka ya zingila ko. Nayizi batika mu dimbitila mu matieleka ma Bibila ma nayambirika, mpe nayizi bonga nzengolo ya sarila Yehova mu mutima’ani wawansoni. Tûka ntangu yîna mbo nimonaka ti Yehova mvutu kahanaka mu tusambulu twani.”

20. Ntia nzengolo tufweti bonga?

²⁰ Titsoniki tia mikunga watanga mukunga’ewu mu bungu dia Yehova: “Nsayi kwe wô wu solele, mpe wu neti penepene ngatu kabâ ku tupangu twaku!” (Mik. 65:​4, NWT) Buna, tabongeno nzengolo ya tatamana mu sarila Yehova, ntiana Yoswa tatâ: ‘Meno na nzo’ani, Yehova tusarila.’—Yos. 24:15.