TIMOKO TIA 28

Ntsi lenda mona mu site Internet’eto?

M’keto moshi tatombatomba misamu mu ordinatere’andi — France

Kanda dimoshi ditasarila ordinatere — Pologne

M’keto moshi tatala video ya nzonza ya mababa mu Internet — Russie

Yezu Kristo wata kwe banlongoki bandi ti: “Bika tshia tsieno tsiakenga ha meso ma bantu, ngâtsi bamona bisalu bieno biabibote mpe bakembesa Tata’eno we ku zulu.” (Matie 5:16) Mu bungu diawudio, tekinolozi ya ntangu yi tusarilaka, ntsiana Internet. Site Internet’eto, jw.org, yena mbuka yilenda mwina mu Internet nkwikulu na bisalu bia Mbangi za Yehova. Ntsi lenda mona mu site yô e?

Mvutu zitukiri mu Bibila za biuvu bio bantu bavulu tsiyulaka. Mbomona mvutu za biuvu biyokele mfunu bitsiyulaka bantu tuka mu tuka. Biuvu biango biabisambanu bahanini mvutu mu trakte Aimeriez-vous connaître la vérité? Trakte yô mu Internet mpe mô yena mu mazu 400 zike. Mbomona mpe Bibila Traduction du monde nouveau [Mbangululu ya nza yamona] mu mazu 140 yike na mikanda miamingi mia longokela Bibila ntsiana Qu’enseigne réellement la Bible?, na nimero zamona za zulunalu La Tour de Garde [Nzo ya Munkengi] na Réveillez-vous! [Vumbukeno!] Poka dia mikanda miango lenda tanga, wirikila mu Internet, peleko lenda dukisa mu mpila ya wirikila, ya PDF, peleko ya EPUB. Lenda dukisa mpe bimoko biakaka mu papela mu hana kwe muntu wô yangalale ngâtsi katanga mu zu diandi! Mikanda miamingi miemô mu mpila ya video mu nzonza zazingi za mababa. Lenda dukisa drame za ntangulu ya Bibila na drame zakaka za bimoko bia Bibila, na miziki miatoma milenda waka mu ntango yizololo.

M’samu miakaka mitatarila Mbangi za Yehova. Mu site yô, mbomona nsangu zamona na video zitatarila tsisalu tsieto mu nza yam’kaka, misamu miturilaka Mbangi za Yehova, na lubakusu lutuhanaka kwe bampangi babwiriri musamu. Lenda baka mpe nsangu zitatarila tukutakanu tweto twa tunene na adrese na nimero za telefone za biro za filiale.

Miamiansoni mio mbo mitatusarisa mu kengisa tshia tsia tsieleka tii ku nsuka za m’toto. Bantu ba ntsi zazansoni, ni baba mpe bô be ku Antarctique, balenda yabakila mambote. Sambila tutasambila ti “zu dia Yehova diamwangana m’swalum’swalu” mu m’toto wam’kaka, mu bungu dia nkembo wa Nzàmbi.—2 Bisi-Tesalonike 3:1.

Ntsia mpila site’eto jw.org yitasarishila bantu babingi mu longoka tsieleka dia Bibila e?
Ntsia misamu zolo mu tala mu site’eto e?