Kani di basa kwe Yehova

Kampe ngonda zole ha manima, bu bamana dûka ku Ezipte, bala ba Israele batûla ku mongo wa Sinayi. Ni kûna baye bêla. Yehova watâ mbila Mose. Buna Mose wanaka ku mongo. Kûna, Yehova wamutêla: ‘Bala ba Israele bawu mvukisi. Bawu bamana kuntumamana, mpe bamana zitisa misiku miani, mbo babâ kanda diani.’ Ha manima, Mose wakoka ku mongo mpe watâ misamu mia mu têla Yehova kwe bala ba Israele. Ngano bala ba Israele nti basa? Bawu bavutula: ‘Mbo tuyirika miamiansoni mi tu lomba Yehova mu sa.’

Mose wanaka ku mongo wa Sinayi. Yehova wamutêla: ‘Mu bilumbu bitatu, mbo nikuzonzela. Kâ, tâ kwe bantu ka banakandi ku mongo.’ Mose wavutu koka mpe watâ kwe bala ba Israele mu kubama mu wirikila Yehova.

Bilumbu bitatu ha manima, bala ba Israele bamona nzazi na tuti dia ndombi ku zulu mongo. Bawu bayizi wâ mpe mubamunu wa ngolo wa nzazi na lwaza lwa mpungi. Yehova wakoka ku mongo mu tiya. Mu bungu ti bala ba Israele bunkuta bwabwingi bwabâ nawu, babatika mu teketa. Mongo waningana mu mudikutulu wa mutoto wa ngolo, mpe mwisi wayabama mongo. Lwaza lwa mpungi lwayizi tomo bâ ngolo. Buna, Nzambi watâ: ‘Meno ni Yehova. Ka lufweti’â lwasambila nzambi yakaka ko.’

Mose wavutu naka ku mongo; Yehova wamuhana misiku mu bungu dia bala ba Israele ngatu balongoka bwe bafweti mu sambila mpe bwe bafweti diatila. Mose watsoneka misiku miango mpe ha manima watanga mio kwe kanda dia Israele. Bala ba Israele basa kani edi kwe Yehova: ‘Mbo tuyirika miamiansoni mi tu lomba Yehova.’ Bawu bayizi sa kani kwe Nzambi. Kâ, ngano dia bazitisa?