NDONGOSOLO 49
Mutinu wa mbi wa mukento wabaka nsembolo
Tûka fenetre ya nzo ya timfumu ya ku Yizreyele, mutinu Ahabe lenda dia bâ nandi dia mona musitu wa vinu wa muntu wumosi wu beri tâka nkumbu Nabote. Ahabe wazolo musitu wo wa vinu, mpe wadinga mu sumba wo kwe Nabote. Kâ Nabote wakala mu mu tekela wo mu bungu ti mbo kaketi kolamana mu musiku wa Yehova, tala ti wateka mutoto wu kabiarila. Ngano Ahabe wazitisa Nabote mu bungu ti musamu wa sungama kayirika? Kâni. Ahabe watomo baka nkesi. Keri’â zolo ko mu dûka mu chambre’andi mpe wakala mu dia.
Mukento wa Ahabe, mutinu wa mbi wu beri tâka nkumbu Yezabele, wamutêla: ‘Nge ni mutinu wa Israele. Lendi baka bima biabiansoni bita kekolo. Mbo nikuhana musitu wo.’ Yandi watsoneka mikanda kwe mbuta za hata dio, mu ba lomba mu kwikisila Nabote ti Nzambi kavweza na mu mu winda matari ngatu kafwa. Mbuta za hata dio zayirika musamu wa ba lomba Yezabele. Ha manima, Yezabele watâ kwe Ahabe: ‘Nabote fwiri. Musitu wa vinu weka wa nge.’
Nabote ka bâ yandi kaka ko Yezabele wu kahondesa. Yezabele wahondesa bantu babingi beri zoloko Yehova. Yehova wamona misamu miamiansoni mieri yirikaka Yezabele. Ngano Yehova nti kaketi mu sa?
Ha manima ma lufwa lwa Ahabe, mwana’andi Yehorame wayizi bâ mutinu. Yehova watambika muntu wu beri tâka nkumbu Yehu mu semba Yezabele na kanda diandi.
Yehu wanaka ha zulu tipusu tii ku Yizreyele, kweri bâka Yezabele. Yehorame wayizi bwana Yehu mpe wamuyula: ‘Ngano tidzunu tie ha kati dieto?’ Yehu watâ: ‘Ka kulendi’â kwa bâ tidzunu ko, nguri’aku Yezabele bu kata tatamana mu yirika mbi.’ Yehorame wadinga mu baluka na mu dioka. Kâ Yehu wamukubula dionga, mpe Yehorame wafwa.
Buna, Yehu wayenda ku nzo ya timfumu ya Yezabele. Yezabele bu kawâ ti Yehu weri kwizaka, wasa bumpala, wayirika nsuki mpe wamukêla ha fenetre. Yehu bu katûla, Yezabele wamuhana mbote na kondo kwa buzitu. Yehu watâ kwe bisari biabâ penepene na yandi: “Mu loseno ha mutoto!” Bawu banunguna Yezabele ha fenetre, wabwa ha mutoto, mpe wafwa.
Ha manima, Yehu wahonda bala 70 ba Ahabe, mpe wakatula nsambululu ya Bale mu nsi yayansoni. Ngano mweni ti Yehova misamu miamiansoni mia kazebi, mpe mu ntangu ya delakana mbo kasemba bô bayirikaka misamu mia mbi?
“Tima ti babiarilaka mu nsalulu za bumbaki ka tinataka ndandu ko ha manima.”—Bingana 20:21