Yezu solele Saule

Saule Musi-Rome wabâ wabutukila ku Tarse. Farize yabâ, mpe Musiku wa Bayuda wa katomo zaba. Yandi Bakristo keri yinaka. Yandi wabwila bakento na babakala ku nzo zawu, mpe wabatûla ku boloko. Yandi wayika moko kwe bantu beri windaka matari kwe Etiene tii bu kafwa.

Kâ Saule keri’â kangaka kwa Bakristo ku Yerusaleme ko. Yandi walomba kwe mfumu-nganga-nzambi bamutambika ku mumvuka wa Damase mu dinga Bakristo. Saule bu keri pusanaka na mumvuka wo, mbala mosi, mutsamina wa ngolo wakenga ha mbuka yi kabâ, mpe wabwa ha mutoto. Yandi wawâ zu dieri mu têlaka: ‘Saule, mu bungu dia nti ta kunkwamisina?’ Saule wayula: ‘Ngano nge nani?’ Zu diavutula: ‘Meno ni Yezu. Yenda ku Damase, mpe mbo zaba misamu mi fweti yirika.’ Hô nkatika bendo, meso ma Saule mafwa; mpe wafwanana bamusimba koko mu mu nata mu mumvuka.

Ku Damase, Mukristo wa kwikama wabâ kô, wu beri tâka nkumbu Ananiase. Mu timona-meso timosi, Yezu wamutêla: ‘Yenda ku nzo ya Yuda mu nzila yi batâka Ya Sungama, mpe dinga Saule.’ Ananiase watâ: ‘Mfumu, misamu miamiansoni mia muntu wo mia nzebi! Milongoki miaku katâ tûlaka ku boloko!’ Kâ Yezu watâ: ‘Yenda kwe yandi. Saule nsolele mu samuna nsangu za mbote kwe makanda mamingi.’

Buna Ananiase waye tala Saule, mpe wamutêla: ‘Saule, mpangi’ani, Yezu kuntambikiri mu ku zibula meso.’ Mbala mosi, Saule walenda mu vutu mona. Yandi walongoka mu zaba Yezu, mpe wayizi bâ mulongoki’andi. Ha manima ma bateme’andi, bu kayizi bâ Mukristo, Saule wabatika mu samuna mu sinagoge na Bakristo bakaka. Ngano lendi banza bwe Bakristo bayituku mu mona Saule weri longesaka misamu mitariri Yezu kwe bantu? Bawu batâ: ‘Muntu wo ka yandi’â ko weri kwe kumi milongoki mia Yezu?’

Mvula zitatu za mukaka, Saule wasamuna kwe bantu ba ku Damase. Bayuda Saule beri yinaka, mpe badinga mu mu honda. Kâ, bampangi bu bazaba misamu mieri kubikaka Bayuda, babakisa Saule mu dioka. Bawu bamutûla mu titunga, mpe bamukokesa mu bulu dimosi diabâ mu tibaka tia mumvuka.

Saule bu kayenda ku Yerusaleme, wadinga mu monekena mpangi zabâ kûna. Kâ, bawu bunkuta bwa bâ nwawu bwa Saule. Mulongoki wumosi wabâ na nsayi, wu beri tâka nkumbu Barnabase, wanata Saule kwe ntumwa za Yezu. Yandi watomo ba wisa ti Saule wasoba. Saule wabatika mu samuna nsangu za mbote na luhemo, tintwari na timvuka tia Yerusaleme. Ha manima, yandi bamuzabila mu nkumbu ya Paulo.