Mutinu wa ntete wa Israele

Yehova wahana mfundisi kwe bala ba Israele mu ba twarisa, kâ bawu badinga mutinu. Bawu batâ kwe Samwele: ‘Makanda mamansoni matuzungiriri mitinu mie nawu. Beto mpe mutinu we neto nsatu.’ Samwele wamona ti musamu wa mbi wabâ, buna wasambila Yehova. Yehova wamutêla: ‘Bala ba Israele ka nge’â ko bakariri. Meno bakariri. Buna, ba têla ti balendi bâ na mutinu, kâ mutinu mbo wubalomba bima biabingi.’ Ntono musamu wo, bala ba Israele batâ: ‘Ka mita tu tâla ko. Mutinu we neto nsatu!’

Yehova watâ kwe Samwele ti bakala di beri tâka nkumbu Sawule ni yandi waketi bâ mutinu wa ntete. Sawule bu kayizi tala Samwele ku Rama, Samwele watumba Sawule mu bâ mutinu bu kamutsamuna mafuta ha mutu.

Ha manima, Samwele wakutakasa bala ba Israele mu ba songela mutinu’awu wa môna. Kâ, Sawule ka beri’â mu monaka ko. Ngano zebi mu bungu dia nti? Mu bungu ti ku kati dia bifunda (bagages) kaswama. Bu bamona Sawule, bamunata, mpe bamutûla ha kati dia bantu. Sawule wayôka bantu babansoni mu bula, mpe wa nkatika wa toma wabâ. Samwele watâ: ‘Taleno muntu wu solele Yehova.’ Buna bantu batâ mu ngolo: ‘Bîka mutinu kabâ na luzingu lwa lula!’

Ku mbatukulu, mutinu Sawule, Samwele keri wîlaka; mpe kwe Yehova keri tumamaka. Kâ ha manima, yandi wasoba. Mu tifwani, mutinu ka bâ na nswa ko mu hanaka mikayulu. Tilumbu timosi, Samwele watâ kwe Sawule kamukêla, kâ Samwele ka kulu’â kwiza ko. Buna Sawule wabonga nzengolo ya hana mukayulu yandi beni. Ngano Samwele nti kasa? Yandi watâ kwe Sawule: ‘Ka wafweti’â kolamana Yehova ko.’ Ngano Sawule mbo kaketi baka malongi mu kuba dio?

Ha manima, Sawule bu kaye nwanisa kanda dia Amaleke, Samwele watâ kwe Sawule mu lembo bîka kani muntu wa moyo. Kâ Sawule wabonga nzengolo ya lembo honda mutinu Agage. Yehova watâ kwe Samwele: ‘Sawule kunkariri, mpe ka ta kungwîla ko.’ Samwele watomo nionga, mpe watâ kwe Sawule: ‘Mu bungu ti nge kariri mu tumama kwe Yehova, Yandi mbo kasola mutinu wakaka.’ Samwele bu kabaluka mu kwenda, Sawule wamubaka mu tinkuti, mpe tinkuti tiatendoka. Buna, Samwele watâ kwe Sawule: ‘Yehova ku katuri timfumu.’ Diangana Yehova mbo kaketi hana timfumu kwe muntu weri mu zoloko mpe weri mu tumamanaka.