Davide na Sawule

Davide bu kamana honda Goliate, mutinu Sawule wamusola mu bâ mfumu ya binwani biandi. Davide wanunga mizingu miamingi mpe wayizi bâ nsangu. Davide bu keri kâlaka ku muzingu, bakento ku mbazi beri dûkaka, mpe tina beri tinaka bu beri tangaka: ‘Sawule hondele mafunda, mpe Davide hondele makumi ma mafunda!’ Sawule wasila Davide timbanda, mpe wadinga mu mu honda.

Davide wazaba mu tomo sikaka harpe. Tilumbu timosi Davide bu keri sikaka harpe mu bungu dia Sawule, mutinu wamulosela dionga. Davide wahengama hô nkatika bendo, mpe dionga diaye tsokama mu tibaka. Ha manima, Sawule wayêla mu honda Davide mbala zazingi. Dieka bo, Davide wadioka mpe waye swama ku sese.

Sawule wabonga binwani 3000 mpe wayenda mu kwe dinga Davide. Yandi wakota mu bulu dimosi dia matari dia swamina Davide na bantu bandi. Bantu ba Davide batâ mu malembe: ‘Bu ni bweso bwaku bwa honda Sawule.’ Davide wayenda ha mbuka ya bâ Sawule, mpe wazenga lweka lwa tinkuti tia mutinu. Sawule ka zaba ko. Ha manima, Davide wayizi bâ na mutima lwaka bu kalembo songela buzitu mu bungu dia mutinu wa sola Yehova. Yandi ka bîka bantu bandi ko mu yirika musamu wa mbi kwe Sawule. Yandi watâ mpe mbila Sawule bu kamutêla ti bweso kabaka bwa mu honda. Ngano Sawule mbo kaketi soba mabanza mu Davide?

Kâni. Sawule watatamana mu dinga Davide. Mpimpa yimosi, Davide na mwana wa mpangi’andi Abishayi bakota mu mbuka ya bâ Sawule. Abnere mpe, weri kêlaka mutinu, ku tolo kabâ. Abishayi watâ: ‘Bweso bweto bwena! Kumbîka namuhonda.’ Davide watâ: ‘Yehova mbo kakipa Sawule. Tabonga kwa dionga diandi na yuki diandi dia mamba mpe tôko.’

Davide wanaka mongo wakaka wabâ ha zulu mbuka yabâ Sawule. Yandi watâ mu ngolo: ‘Abnere, mu bungu dia nti lembolo kengerelaka mutinu’aku? Ngano yuki na dionga dia Sawule kwe biena?’ Sawule wabambukila zu dia Davide, mpe watâ: ‘Bweso bu bêleke naku mu ku ngonda, kâ kusiri’â bo ko. Nzebi ti ni nge bâ mutinu wa Israele.’ Sawule wakala ku nzo’andi ya timfumu. Kâ bantu babansoni ba kanda dia Sawule ka beri’â yinaka Davide ko.