Landa luhemo lwa Yezu mu tisalu tia samuna

1. Ntia tifu tiswasikisaka kanda dia Yehova na bantu bakaka?

TIMA timosi tiswasikisaka bisari bia Yehova na bantu bakaka batitâka Bakristo ni luhemoa lwawu mu tisalu tia samuna. (Tite 2:14) Kâ ntangu zakaka, wulendi bâ musamu wa mpasi kwe nge mu bâ na luhemo mu tisalu tia samuna. Kampe lendi bâ na mabanza mamosi na mpangi ye mukuluntu yi salaka tisalu tia ngolo, têle: “Ntangu zakaka, ka nibâka na nsatu ya samuna ko.”

2. Mu bungu dia nti wulendi bêla musamu wa mpasi mu tatamana mu samuna na luhemo?

² Kampe mbo tuzoloko mu sala bisalu biakaka mu tisalu tia Yehova kani tasamuna. Mu bungu dia nti? Mu bungu ti bu tutungaka peleko bu tukipaka Nzo za Nsambululu, bu tubakisaka mpangi zeto zi bwiriri katastrofe, peleko bu tubatindisaka mbo tukulu bakaka ndandu za mbote mpe nsayi wu tutâka. Tidzunu na luzolo bi tumonaka bu tusalaka na mpangi zeto bia tuzololo mpe nsayi bitutâka, tuzebi ti mio mi tuyirikaka mu bungu dia bawu mia bazololo. Ku lweka lwakaka, kampe tûka mivu miamingi tusamunaka ku teritware yimosi, kâ ka tubakaka ndandu za mbote ko. Peleko tulendi bwabana na bantu bakalaka nsangu zeto. Mu bungu ti nsuka yeka penepene, tuzebi ti bantu balendi tomo tu telamana. (Mat. 10:22) Nti bilendi tu bakisa mu tatamana peleko mu yika luhemo lweto ngolo mu tisalu tia samuna?

3. Bwe Like 13:​6-9 yisongelaka luhemo lwa Yezu?

³ Tulendi baka malongi mu musamu wutariri luhemo mu tisalu tia samuna bu tutaluzula tifwani tia Yezu. Bu keri ha mutoto, luhemo lwandi ka lwa dimina ko mu tisalu tia samuna. Ntangu bu yeri kwe yôke, tisalu tiandi tiayizi kula. (Tanga Like 13:​6-9.) Ntiana muntu weri kunaka mbutu za vinu wayôkesa mvula tatu mu kipa muti wa figue weri lembo butaka mbutu, Yezu wayôkesa kampe mvula tatu mu samuna kwe Bayuda, babingi ha kati diawu ka batambula ko. Kâ, Yezu kabika ko mu basamunina, wayizi bâ ntiana muntu weri kunaka mbutu za vinu wabâ na tivuvu ti muti wa figue mbo waketi buta mbutu. Yezu watomo sala ngolo mu samuna kwe Bayuda ngatu kababakisa mu kwikila nsangu za mbote.

4. Misamu miyà mi tulendi longoka mu tifwani tia Yezu ni mie?

⁴ Mu timoko ti mbo tumona bwe Yezu kasongela luhemo, nsungula mu ntangu ya ngonda 6 za mansukina zi kayôkesa mu tisalu tiandi tia samuna. (Tala note ya ndongokolo yitêle “Après cela” ya Like 10:1.) Mbo tutatamana mu bâ na luhemo bu tulongoka misamu mi kalongesa na bu tulanda misamu mi kayirika. Tataluzuleno tifwani tia Yezu mu misamu miyà: 1) Watûla mabanza mandi mu luzolo lwa Yehova, 2) wasa keba mu mbikululu za Yehova, 3) wasikirila Yehova mu mu bakisa, mpe 4) lukwikulu lweri nandi ti bantu bakaka mbo bamuwirikila.

WATÛLA MABANZA MANDI MU LOZOLO LWA YEHOVA

5. Bwe Yezu kasongela ti watûla mabanza mandi mu ndungananu ya luzolo lwa Nzambi?

⁵ Yezu wasamuna nsangu za mbote na luhemo lwalwansoni mu bungu ti wazaba ti Nzambi wazolo kasala tisalu tio. (Like 4:43) Kwe Yezu samuna nsangu za mbote ni tisalu tiayôka mfunu mu luzingu lwandi. Mu ngonda za mansukina za tisalu tiandi wasa nzietolo ‘mu mimvuka na mu mahata’ mu kwe longese bantu bakaka. (Like 13:22) Wakubika mpe milongoki miamingi mu samuna nsangu za mbote ntiana yandi.—Like 10:1.

6. Ntia tintwari tie ha kati dia tisalu tia samuna na bisalu biakaka bi tulendi sala? (Tala mpe tifwani.)

⁶ Lumbu ti mpe samuna nsangu za mbote ni tisalu tiyôkele mfunu Yehova na Yezu bazololo talungisa. (Mat. 24:14; 28:​19, 20) Tisalu ni tisalu titusalaka mu bungu dia Yehova tintwari tiena na tisalu tia samuna. Mu tifwani, Nzo za Nsambululu tutungaka ngatu bantu batusamuninaka bizi basambila Yehova, mpe tisalu titusalaka ku Betele na mu mbuka zakaka mbo tibakisaka mu tisalu tia samuna. Mu ntangu yi bwaka katastrofe mbo tudingaka mu zaba tala ti mpangi zeto bima bie nawu nsatu bie nawu. Musamu wo mbo wubabakisaka mu vutu karila tukutakanu na mu samuna. Bu tubambuka ti tisalu tia samuna ni tisalu tiyôkele mfunu Yehova ti kazololo tasala, nsatu’eto ya vulu samunaka mbo yiyikama ngolo. János, we mukuluntu ku Hongrie têle: “Mbo nimbambukaka ti ka kwena tisalu ko titusala tia Yehova tiyôkele tisalu tia samuna; tio ni tisalu tieto tia ntete.”

7. Mu bungu dia nti Yehova kazololo ti tatatamana mu samuna? (1 Timote 2:​3, 4)

⁷ Tulendi yika luhemo lweto ngolo mu tisalu tia samuna bu tumwina bantu buna bu bamwinaka Yehova. Zololo ti bantu babingi bawâ nsangu za mbote mpe batambula zo. (Tanga 1 Timote 2:​3, 4.) Mu bungu ti nsangu zo zilendi vukisa bantu, Yehova lubakusu katuhanaka mu tomesa mpila’eto ya zonzela nsangu zo kwe bantu. Mu tifwani, mukanda wa Zolo bantu—Kubika milongoki malongi wutuhanaka malendi tu bakisa mu batika bimoko na kani dia kubika milongoki. Ni bu sa ti bantu ka batambulaka ko lumbu ti, mu ntangu ya mpasi ziyôkele balendi tambula. Misamu mi tubatêlaka lumbu ti milendi batuma mu bilumbu bita kwiza mu tambula mu sarila Yehova. Musamu wo wulendi yilama tala ti tutatamane mu samuna.

WASA KEBA MU MBIKULULU ZA BIBILA

8. Bwe luzabu lwa mbikululu za Bibila lwabakisila Yezu mu sarila ntangu’andi mu mpila yiyôkele bubote?

⁸ Yezu wabakula bwe mbikululu za Bibila zaketi lunganana. Wazaba ti tisalu tiandi tia samuna mvula tatu kwa na ndambu tiaketi sa. (Dan. 9:​26, 27) Wazaba mpe mbikululu zeri tâka mu ntia ntangu mpe bwe kaketi fwila. (Like 18:​31-34) Mu bungu ti wazaba misamu mi babikula Yezu wasarila ntangu’andi mu mpila yiyôkele bubote. Buna, wasamuna na luhemo mu manisa tisalu ti bamuhana.

9. Bwe luzabu lwa mbikululu za Bibila lutubakisilaka mu tatamana mu samuna na luhemo?

⁹ Bu tubakulaka mbikululu ze mu Bibila wulendi tutuma mu samuna na luhemo. Tuzebi ti nsuka ya nza yi ka yisiri’â mala ko. Tuzebi ti misamu mia lumbu ti na ndiatulu ya bantu mbo bisongelaka mio mitâka Bibila mu bungu dia bilumbu bia mansukina. Mbikululu ya Bibila mbo yitâka ti mutinu wa ku side na mutinu wa ku nore mbo banwana ‘mu ntangu ya mansukina.’ (Dan. 11:40) Mbikululu yo mbo yimonekaka ha kati dia gouvernema ya Grande-Bretagne ye tintwari na gouvernema ya États-Unis bata nwana na gouvernema ya Russie na nti zi bê tintwari. Mbo tubakulaka mpe ti lutumu luyôkele mu nza lwa Anglo-Américain mbo bamonekesaka lo mu malu ma tifwiti tizonzelaka Daniele 2:​43-45. Mu nzila ya ndongokolo’eto ya mbikululu za Bibila lukwikulu lwe neto ti ntamana Timfumu tia Nzambi mbo tifukisa gouvernema za bantu. Mbikululu zo zazansoni zisongele ti nsuka yeka nguria penepene. Buna, tufweti sarila ntangu’eto mu mpila yiyôkele bubote mu samuna nsangu za mbote.

10. Mu ntia mpila zakaka mbikululu za Bibila zitubakisilaka mu tatamana mu samuna na luhemo?

¹⁰ Mbikululu za Bibila nsangu mpe zituhanaka zi tusamunaka na timina diadiansoni. Mpangi ya yikento Carrie sarilaka ku République Dominicaine têle: “Bu nibanzaka mu bima bia mbote bi tu kanisini Yehova mu bungu dia bilumbu bie ku matu mbo wukuntumaka mu zonzela bio kwe bantu bakaka.” Vutulu tâ: “Bu nimonaka misamu mi bwabanaka na bantu lumbu ti, mbo nibakulaka ti makani mo ka mena kwa ma meno ko, kâ mpe ma bawu mena.” Mbikululu za Bibila mbo zitutindisaka mu lembo bika mu samuna mu bungu ti tuzebi ti Yehova na beto kena mu tisalu tio. Leila bâka ku Hongrie têle: “Izaya 11:​6-9 mbo yisongelaka ti na lubakusu lwa Yahova muntu ni muntu wulendi soba. Musamu wo meno wubakisaka mu samuna nsangu za mbote kwe bantu ba nibanzaka ti kampe ka bazololo’â ko mu wirikila zo.” Christopher, mpangi ya bakala yibâka ku Zambie têle: “Ntiana bwa bikula wo Marke 13:​10, nsangu za mbote mbo basamuna zo mu nza ya mukaka, mpe bweso bwena kwe meno mu hana lubakusu mu ndungananu ya mbikululu yo.” Ntia mbikululu za Bibila zikutumaka mu tatamana mu samuna?

WASIKIRILA YEHOVA MU BAKA LUBAKUSU

11. Mu bungu dia nti Yezu keri na nsatu ya sikirila Yehova mu tatamana mu samuna na luhemo? (Like 12:​49, 53)

¹¹ Yezu Yehova keri sikirilaka mu tatamana mu samuna na luhemo. Mu ntangu Yezu yi keri samunaka, na buzitu keri zonzaka kwe bantu, kâ wazaba ti nsangu za Timfumu mbo zaketi tâ bantu nkesi mpe babingi mbo baketi za telamana. (Tanga Like 12:​49, 53.) Mu bungu dia tisalu tiandi tia samuna, mfumu za mabundu mbala zazingi bayêla mu mu honda. (Za 8:59; 10:​31, 39) Kâ Yezu watatamana mu samuna mu bungu ti wazaba ti Yehova ni keri nandi. Yandi têle: ‘Ka ndiena meno kaka ko, kâ Tata wakuntambikiri na meno kena [. . .] Ka kunsisiri’â meno kaka ko, mu bungu ti mu ntangu zazansoni mi kazololo Yandi ni mio nita yirika.’—Za 8:​16, 29.

12. Bwe Yezu kakubikila milongoki miandi mu tatamana mu samuna ntono mpasi?

¹² Yezu wabambula kwe milongoki miandi basikirila Yehova ngatu kababakisa. Wabatindisa mbala zazingi ti Yehova mbo kababakisa ni bu sa ti mpasi beri bamwisaka. (Mat. 10:​18-20; Like 12:​11, 12) Wabalwengesa mu sa keba. (Mat. 10:16; Like 10:3) Wabalomba mu lembo tuma bantu mu ngolo mu wâ nsangu zawu. (Like 10:​10, 11) Wabatêla mu dioka tala ti mpasi beri bamwisaka. (Mat. 10:23) Ni bu sa ti Yezu luhemo lweri nandi mpe Yehova keri sikirilaka, katûla luzingu lwandi mu mpasi ko.—Za 11:​53, 54.

13. Mu bungu dia nti lendi bêla na lukwikulu ti Yehova mbo kakubakisa?

¹³ Lubakusu lwa Yehova lwe neto nsatu mu tatamana mu samuna na luhemo ntono telamana ku batutelamanaka lumbu ti. (Nza. 12:17) Mu bungu dia nti lendi bêla na lukwikulu ti Yehova mbo kakubakisa? Bambukila lusambulu lwasa Yezu mu Za tikapu 17. Yezu walomba kwe Yehova mu kengerela ntumwa zandi, mpe Yehova wahana mvutu mu lusambulu lo. Buku dia Bisalu mbo disongelaka mpila Yehova yi kabakisila bantumwa mu samuna na luhemo ntono nkwamusu. Mu lusambulu lwandi, Yezu walomba mpe kwe Yehova kakengerela bô batûla timinu mu mio mieri basamuninaka bantumwa. Beto mpe wutarilaka. Yehova tatamana katatamanaka mu hana mvutu mu lusambulu lwa Yezu, mbo kakubakisa ntiana bu kabakisa bantumwa.—Za. 17:​11, 15, 20.

14. Bwe tuzabiri ti tulendi bâ na lenda dia tatamana mu samuna na luhemo? (Tala mpe tifwani.)

¹⁴ Ni bu sa ti musamu wa mpasi wena mu samuna nsangu za mbote na luhemo bu tuta kwe pusane ku nsuka ya nza yi, mbo tubaka lubakusu lwe neto nsatu. (Like 21:​12-15) Ntiana Yezu na milongoki miandi, mbo tubikaka bantu basola tala ti mbo batuwirikila peleko kâni. Ka tudisikitaka na bawu ko. Mpe mu ntangu tisalu tieto yi balembo tomo tia haninaka nzila, mpangi zeto mbo zitatamanaka mu samuna nsangu za mbote mu bungu ti Yehova basikirilaka ka ngolo zawu’â ko. Ntiana kwa mu mbandu ya ntete Yehova wahana ngolo kwe bisari biandi, lumbu ti mpe mbo katuhana ngolo ngatu tisalu tia ‘samuna nsangu za mbote tia lungana’ buna bu kazololo. (2 Tim. 4:17) Lendi bâ na lukwikulu ti wamana sikirila Yehova mbo bâ na lenda dia tatamana mu samuna na luhemo.

WATATAMANA MU BÂ NA MABANZA MA DELAKANA

15. Nti bita songela ti Yezu mabanza ma delakana meri nandi mu tisalu tia samuna?

¹⁵ Yezu mabanza ma delakana meri nandi mu tisalu tia samuna. Musamu wo wamubakisa mu bâ na luhemo mu tisalu tiandi tia samuna. Mu tifwani, mvula mosi ha manima bu kabatika mu samuna, Yezu wamona bantu babingi babâ ba kubama mu wâ nsangu za mbote mpe wabafwanakasa na musitu wa yela wu bafweti tia mbutu. (Za 4:35) Kampe mvula mosi ha manima, watâ kwe milongoki miandi: ‘Musitu wa wunene wena.’ (Mat. 9:​37, 38) Ha manima wavutu tâ: ‘Musitu wa wunene wena [. . .] Lombeno kwe Mfumu ya musitu katambika bisari ku musitu’andi.’ (Like 10:2) Yezu lukwikulu lweri nandi ti mbo kwaketi bâ bantu baketi mu wirikila, mpe nsayi ya mu baka bu basila buna.—Like 10:21.

16. Bwe bifwani bia Yezu bibakisilaka mu bâ na mabanza ma delakana mu tisalu tia samuna? (Like 13:​18-21) (Tala mpe tifwani.)

¹⁶ Yezu walongesa kwe milongoki miandi mu bâ na mabanza ma delakana mu tisalu tiawu, musamu wo wabantindisa mu lunda luhemo lwawu. Mu tifwani, tataluzuleno bifwani biandi bia biole. (Tanga Like 13:​18-21.) Yezu wasarila mbutu ya moutarde mu longesa ti nsangu za Timfumu mbo zaketi yangana mu mpila mosi ya nzitukulu, mpe ka kwena tima ko tiaketi kabakasa musamu wo wa lungana. Wasarila levire mu songela bwe nsangu za Timfumu zaketi tomo yangana mpe bwe zaketi tulumuna nsobolo zaketi moneka ku matu. Buna, Yezu wabakisa milongoki miandi mu mona ti nsangu zi beri samunaka mbo zaketi buta mbutu.

17. Ntia misamu mita tuhana lukwikulu mu tatamana mu bâ na mabanza ma delakana mu tisalu tia samuna?

¹⁷ Bu tudimbitilaka mu mpila tisalu tia samuna tibakisilaka bantu bibingi mu za ya mukaka mbo wututindisaka mu tatamana mu samuna. Mivu miamiansoni, milio za bantu batambulaka mu kwiza ku Mbambukulu na mu longoka Bibila na beto. Mafunda ma bantu bakwizi batusuku mpe bakwizi salaka na beto mu tisalu tia samuna. Ka tuzebi’â ko bantu ba kwa bavutu tambula nsangu zeto, kâ tuzebi ti Yehova yungi dia bantu kata kutakasa divuka mu ntangu ya mpasi ziyôkele. (Nza. 7:​9, 14) Yehova Mfumu ya musitu lukwikulu lwe nandi ti bantu babingi bavutu tambula nsangu za mbote, buna mbo tutatamana mu samuna.

18. Bantu bu batumonaka nti tuzololo babakula?

¹⁸ Tûka ntama milongoki mia Yezu mu luhemo lwawu lwa samuna babazabiri. Bantu bu bamona butindi bwa zonzela bwa bantumwa, ‘babakula ti bantu bo na Yezu babâ.’ (Bis. 4:13) Mu ntangu bantu yi batumonaka mu tisalu tia samuna, tuzololo ti babakula mpe beto tifwani tia luhemo tia Yezu tulandaka.