Bwe lendi bêla na nsayi yayingi mu tisalu tia samuna

1. Bisamuni biakaka bwe bimonaka mu zonza na bantu bakaka mu tisalu tia samuna? (Tala mpe tifwani.)

BU TWENA kanda dia Yehova, kwe bantu bakaka tusamunaka, mu bungu ti Tata’eto die ku mazulu tuzololo, mpe tuzololo mu bakisa bampwana’eto mu mu zaba. Bisamuni biabingi bitomono zolo tisalu tiawu tia samuna. Kâ kwe bakaka musamu wa mpasi wena mu mona nsayi mu tisalu tiawu tia samuna. Mu bungu dia nti? Mu bungu ti bantu bakaka bamonaka ti ka bêna milongi mia mbote ko. Bisamuni biakaka ka bizololo’â ko mu kwenda kwe bantu tala ti ka babatikisi’â ko. Bakaka bunkuta bu bâka nawu ngatu ba babakiriri nkesi. Bakaka keba basaka mu lembo bakana na bantu. Ni bu sa ti Yehova Yandi batomono zolo, musamu wa mpasi wena kwe mpangi zo mu samuna nsangu za mbote kwe bantu ba balembolo zaba. Kâ, mfunu ya tisalu tio babakulaka, mpe tia bavulu salaka. Diangana Yehova nsayi yitomo bâka nandi mu bungu dia bawu!

2. Tala ti ntangu zakaka kubâka mu nsayi ko mu tisalu tia samuna, mu bungu dia nti fweti lembo nôkena?

² Ngano ntangu zakaka musamu wa mpasi wubâka kwe nge mu mona nsayi mu tisalu tia samuna mu bungu dia misamu mio? Tala ti ni bo, kunôkandi. Kondo kwa lukwikulu mu nge beni kulendi songela ti wa kuluka wena, mpe kuzololo’â ko ti batala kwa nge. Kusongele mpe ti kuzololo’â ko mu bakana na bantu. Ka kwena muntu ko wuzololo mu fwemesa bantu bakaka, nsungula bu wudingaka mu yirika mbote kwe bakaka. Tata’aku die ku mazulu zebi bwe monaka ku mutima, mpe zololo mu kuhana lubakusu lwe naku nsatu. (Iza. 41:13) Mu timoko ti, mbo tutaluzula misamu mitanu mu mpila yi tulendi telamana lwaka lweto na yi tulendi bêla mu nsayi mu tisalu tia samuna.

BIKA ZU DIA NZAMBI DIA KU YIKA NGOLO

3. Nti biabakisa mbikuri Yeremi mu samuna kwe bantu bakaka?

³ Mu ntama, Zu dia Nzambi dia tindisa bisari bia Nzambi bu bieri na bisalu bia mpasi bia sala. Tabongeno tifwani tia mbikuri Yeremi. Wabâ na lwaka mu ntangu Yehova yikamuhana dema dia samuna. Yeremi watâ: ‘Ka nzebi’â zonza ko, ntwenia kwa natiri.’ (Yer. 1:6) Ngano nti biamubakisa mu bâ na butindi bwa samuna? Mu Zu dia Nzambi keri bakilaka ngolo. Yandi watâ: ‘Mu kati diani mweka ntiana tiya tuta nama twe mu bihisi biani, ka nita lenda ko mu lunda to.’ (Yer. 20:​8, 9) Ni bu sa ti teritware ya Yeremi mpasi yeri, nsangu zi bamuhana mu samuna, ngolo za bâ nandi nsatu zeri mu hanaka mu lungisa tisalu tiandi.

4. Nti biyôkaka bu tutangaka na bu tudimbitilaka Zu dia Nzambi? (Bisi-Kolose 1:​9, 10)

⁴ Bakristo ngolo ze nawu nsatu babakaka mu nzila ya Zu dia Yehova, Bibila. Mu mukanda wu katsoneka kwe timvuka tia Kolose, ntumwa Paulo watâ ti luzabu lwa matieleka mbo lwaketi tuma mpangi zandi mu bâ na ‘ndiatulu yifwanene na Yehova,’ na mu tatamana mu ‘buta mbutu mu bisalu biawu biabiansoni bia mbote.’ (Tanga Bisi-Kolose 1:​9, 10.) Mu kati dia bisalu bio mwe na tisalu tia samuna nsangu za mbote. Buna, bu tutangaka Zu dia Nzambi mpe bu tudimbitilaka dio, timinu tieto mu Yehova ngolo tiyikamaka, mpe mfunu ya samuna nsangu za Timfumu tubakulaka.

5. Bwe tulendi bakila ndandu mu ntangulu’eto na ndongokolo’eto ya Bibila?

⁵ Mu tomo bakila Zu dia Nzambi ndandu, tufweti saka keba mu tangaka, mu dimbitilaka na mu longokaka dio mu ntinu-ntinu. Bonga ntangu yifwanane. Tala ti tengi verse yita lembo bakula, kuyôkandi mu verse yakaka. Sarila Mukanda wa dingila wa Mbangi za Yehova peleko tisalulu tiakaka tia dingila mu baka mbangululu ya verse. Tala ti bongele ntangu ya longoka, mbo yika ngolo lukwikulu lwaku mu matieleka mê mu Zu dia Nzambi. (1 Tes. 5:21) Bu bâ na lukwikulu mu mio mi longoka, mbo bâ na nsayi ya zonzela mio kwe bantu bakaka.

TOMO KUBAMA MU BUNGU DIA TISALU TIA SAMUNA

6. Mu bungu dia nti tufweti tomo kubamaka mu bungu dia tisalu tia samuna?

⁶ Tala ti kubamane bubote mu bungu dia tisalu tia samuna, kubâ na lwaka lwalwingi ko mu zonza kwe bantu. Yezu wabakisa milongoki miandi mu kubama ntete kabatambika mu tisalu tia samuna. (Like 10:​1-11) Mu bungu ti basarila mio mia ba longesa Yezu, milongoki miandi nsayi yayingi yeri nawu mu mio mi babêla na lenda mu lungisa.—Like 10:17.

7. Bwe tulendi kubamana mu bungu dia tisalu tia samuna? (Tala mpe tifwani.)

⁷ Bwe tulendi kubamana mu bungu dia tisalu tia samuna? Tufweti toko banza mu mio mi tutâ, mpe ha manima tufweti mia têla mu mpila ya mbote na mu ntêlo za beto beni. Mfunu mpe wena mu banza mpila bantu zi balendi bongela mio mi tutâ, na mu mpila yi tulendi babongela. Bu tuzonzaka na bantu, tulendi bâ mu tidzunu, tulendi songela nsayi na mbote.

8. Mu ntia mpila Bakristo bê ntiana binzu bia lubumba bia zonzela Paulo?

⁸ Ntumwa Paulo watâ kwe bampangi ba Bakristo: ‘Timvwama tie neto mu binzu bia lubumba.’ (2 Kor. 4:7) Ngano timvwama tio ni nti? Ni tisalu tivûkisaka luzingu bu tusamunaka nsangu za Timfumu. (2 Kor. 4:1) Ngano binzu bia lubumba ni nti? Ni bisari bia Nzambi bisamunaka nsangu za mbote kwe bantu. Mu ntangu ya Paulo, bitê bia nkari binzu bia lubumba beri sarilaka mu nata bima bia ntalu, ntiana bidia, vinu na mbongo. Mpila mosi mpe, Yehova watuhana nsangu za mbote. Na lubakusu lwa Yehova, tulendi baka ngolo ze neto nsatu mu tatamana mu samuna.

SAMBILA MU BAKA BUTINDI

9. Bwe tulendi telamana bunkuta bwa bantu na bwa nsangu zeto zi balendi kala? (Tala mpe tifwani.)

⁹ Ntangu zakaka, tulendi bâ na bunkuta bwa bantu, peleko na bunkuta ti bakala nsangu zeto. Bwe tulendi telamana musamu wo wa mpasi? Tataluzuleno lusambulu lwa bantumwa bu babatuma mu lembo vutu samuna. Kani babâ mu bunkuta mpe babika mu samuna, balomba lubakusu kwe Yehova kabahana ‘nguria butindi bwa zonzela Zu [diandi].’ Ho nkatika bendo Yehova wahana mvutu mu lusambulu lwawu. (Bis. 4:​18, 29, 31) Tala ti ntangu zakaka bunkuta bwa bantu lwaka bututâka mu samuna, tufweti sambila Yehova mu baka lubakusu. Lomba kwe Yehova kayika ngolo luzolo lwaku mu bantu, ngatu walembo bâ na bunkuta bwa basamunina nsangu za mbote.

10. Bwe Yehova katubakisilaka mu bâ Mbangi zandi? (Izaya. 43:​10-12)

¹⁰ Yehova watusola mu bâ Mbangi zandi, mpe tu kanisini mu tu bakisa mu bâ na butindi. (Tanga Izaya 43:​10-12.) Tatala mpila ziyà zi kasilaka bo. Ya ntete, Yezu na beto kabâka ntangu zazansoni zi tusamunaka nsangu za mbote. (Mat. 28:​18-20) Ya nzole, Yehova walomba kwe bambazi mu tu bakisa. (Nza. 14:6) Ya ntatu, Yehova watuhana mpeve santu’andi mu tu bakisa mu bambukila misamu mi talongoka. (Za 14:​25, 26) Ya yà, Yehova watuhana bampangi mu tu turisa mu tisalu tio. Na lubakusu lwa Yehova na lwa mpangi zeto za luzolo, biabiansoni bie neto nsatu mu tatamana mu samuna bie neto.

KUBAMA MU SA NSOBOLO, NA MU BÂ NA MABANZA MA MBOTE

11. Bwe lendi bwanina bantu babingi mu tisalu tia samuna? (Tala mpe tifwani.)

¹¹ Ngano wa nôka bâka bu lembo bwanaka bantu babingi ku nzo zawu? Lendi tiyula: ‘Mu ntangu yi bantu ba mu teritware’ani ntia kûma bêna?’ (Bis. 16:13) ‘Ngano ku tisalu bêna, peleko duka badukiri?’ Tala ti ni bo, ngano lendi bwabana na bantu babingi bu samuna mu balabala? Mpangi ya bakala ye na nkumbu Joshua têle: “Nabwa bweso bwa samuna bu ndieri kwe zebe mu mbuka zi batêlaka nkari na mu mbuka zakaka zi bâka bantu babingi.” Yandi na mukento’andi, Bridget, bayizi bwana bantu babingi ku nzo zawu bu baye batala mu nkokela na mu tilumbu tia lumingu ha manima ma midi.—Efz. 5:​15, 16.

12. Bwe tulendi zabila nkwikulu na misamu mitâka bantu lwaka?

¹² Tala ti ha mbatukulu muntu ka wuta zolo ko mu kuwîrikila, dinga mu zaba nkwikulu zandi na misamu mita mu tâ lwaka. Joshua na Bridget ha mbatukulu tiyuvu tie ha matu ma trakte beri sarilaka. Mu tifwani, bu basarilaka trakte ya Bwe lu bongela Bibila? ebu batâka: “Bantu bakaka batâka ti Bibila buku dia Nzambi diena, bakaka kâni. Ngano bwe tabanza?” Mpila yo mbo yisaka ti babatika timoko.

13. Bwe tulendi lendela tisalu tieto tia samuna ni bu sa ti bantu ka bata tu tambula ko ? (Bingana 27:11)

¹³ Ka ndandu’â ko zi tubakaka mu tisalu tia samuna zisaka ti talenda tisalu tieto. Mu bungu dia nti? Mu bungu ti mio mi zololo Yehova na Yezu tuyirikiri—samuna tusamuni. (Bis. 10:42) Ni bu sa ti ka tubwabane’â na muntu ko wutuzonzela, peleko bakariri mu wirikila nsangu zeto, tulendi bâ mu nsayi mu bungu ti tuyirikiri musamu wu tâka Tata’eto dia ku mazulu nsayi.— Tanga Bingana 27:11.

14. Mu bungu dia nti tulendi bêla mu nsayi, tisamuni tiakaka bu tibakaka muntu wuzololo mu tu wîrikila mu teritware?

¹⁴ Tulendi bâ mpe mu nsayi mu ntangu tisamuni tiakaka tibakaka muntu wuzololo mu wîrikila nsangu zeto mu teritware. Nzo ya Zangama ya Munkengi yafwanakasa tisalu tieto na ntangu yi badingaka mwana wu zimbakane. Bantu babingi badingaka mwana wu zimbakane, mwamwansoni bakwe yende. Bu bamonaka mwana, bantu babansoni babâka mu nsayi, na wo mpe mu mweni. Mpila mosi mpe, mu tisalu tia kubika milongoki ngolo za bantu babansoni zidinganaka. Lubakusu lwa bantu babansoni lufwanane mu samuna teritware yayansoni, mpe beto bansoni mu nsayi tubâka muntu bu wubatikaka mu kwiza ku tukutakanu.

TÛLA MABANZA MAKU MU LUZOLO LWAKU MU YEHOVA NA MU BANTU

15. Bu tusarila misamu mie mu Matie 22:​37-39, bwe milendi tu bakisila mu tomo bâ mu nsayi mu tisalu tia samuna? (Tala mpe ha tinima tia ntete.)

¹⁵ Tulendi kurisa tiya tweto mu tisalu tia samuna bu tutûla mabanza meto mu luzolo lweto mu Yehova na mu bampwana’eto. (Tanga Matie 22:​37-39.) Banza’eti bwe Yehova kabêlaka mu nsayi bu katumonaka mu tisalu tieto, mpe bwe bantu babêla mu nsayi bu babatika mu longoka Bibila! Bambukaka ti, bô batambulaka mu tu wirikila mpe babongaka nzengolo ya sarila Yehova balendi baka luzingu lwa mankululu.—Za 6:40; 1 Tim. 4:16.

16. Bwe tulendi bakila nsayi mu tisalu tieto tia samuna bu tukotaka nzo? Hana tifwani.

¹⁶ Ngano wakota nzo mu bungu dia timbevo peleko musamu wakaka? Tala ti ni bo, tûla mabanza maku mu mio milendi sa mu songela luzolo lwaku mu Nzambi na mu bampwana’aku. Mu ntangu ya COVID-19, Samuel na Dania bayizi kota nzo (confinés). Mu ntangu yo ya mpasi, mu nzila ya telefone, na ya mikanda beri vulu samuninaka, mpe batwarisa ndongokolo za Bibila mu Zoom. Samuel wasamuna kwe bantu ba kabwabana na bo ku lupitalu ku keri bukusuluku mu bungu dia kansere. Yandi têle: “Mpasi lwaka zituhanaka, beto zifwatikisaka, mpe timinu tieto zikotesaka mu ntontolo. Tufweti bakila nsayi’eto mu Yehova.” Na misamu mio miamiansoni, Dania wayizi bêla mpe wayôkesa ngonda tatu ku mfulu. Mpe wayizi sarila fauteuil roulant tûka ngonda 6. Dania têle: “Nayêla mu yirika misamu mi ndieri lendaka mu yirika. Nayizi samuna kwe infirmière yeri kwizi tu talaka, kwe bantu beri kwizi tu turisilaka bima ku nzo. Nayizi sa bimoko bia mbote na mukento wumosi wusalaka ku lupitalu.” Ni bu sa ti Samuel na Dania ka bayizi’â sarila ntiana mu ntama ko, bayizi sa mio mi balenda mpe bayizi bâ mu nsayi.

17. Bwe lendi bakila ndandu mu misamu mi tuzonzele?

¹⁷ Yêla mu sarila misamu mia mitanu mi bazonzela mu timoko ti. Muna musamu we ntiana tima timosi tia assaisonnement ya bidia. Bu vukasa bima biabiansoni bia assaisonnement, diangana ndandu ya mbote kwa baka, bidia mbo bi toma. Bu tusarila misamu mio miamiansoni, mbo tubâ ba kubama mu telamana mbanzulu za mbi za bantu, mpe mbo tubaka nsayi yayingi mu tisalu tieto tia samuna.