Kwe beto “bubote bwena mu pusana kwe Nzambi”!

1-2. a) Nti tufweti sa mu kurisa tindiku tia ngolo na muntu? b) Nti tuzonzela mu timoko ti?

NGANO ndiku ye naku yi lwe penepene? Bwe wakurisila tindiku tiaku na yandi? Kampe wayizi yôkesa ntangu yayingi na yandi, wayizi zaba misamu miandi mia luzingu, mpe wayizi zaba bima bi kazololo na bi kalembolo zolo. Wayizi zaba bifu biandi bia mbote bi ta zolo mu landa. Wayizi batika mu zolo ndiku’aku.

² Ntangu na ngolo zifwananaka mu kurisa tindiku tia ngolo na muntu. Ni bo mpe tulendi sa mu kurisa tindiku tia ngolo na Yehova. Timoko ti mbo tizonzela bwe tulendi bêla na tindiku tia ngolo na Nzambi mpe ntia ndandu tubakaka. Ntete-ntete, tadimbitila mu bungu dia nti we musamu wa mbote mu pusana kwe ndiku’eto yiyôkele, Yehova.

3. Mu bungu dia nti tufweti dimbitila mu ndandu zi tu natinaka tindiku tieto na Yehova? Bangula.

³ Ntembe kâni mbo tambula ti musamu wa mbote wena mu bâ na tindiku na Yehova. Kâ bu tudimbitila bwe wuta zolo tâ, wulendi tu tuma mu tatamana mu pusana kwe Yandi. (Mik. 63:​6-8) Mu tifwani, tuzebi ti bidia bia mbote, sport, tifu tia bwaka tolo twa fwanana, mpe tia nwaka mamba ma fwanana, bia bibote biena mu bungu dia beto. Kâ, bantu babingi balembo saka keba mu bima bio, mpe bayambirikaka tikolela tiawu. Tamana vulu dimbitilaka mu ndandu zi tu natinaka bifu bia mbote, mbo tutomo bia sarila. Mpila mosi mpe tuzebi ti bâ ndiku ya Yehova musamu wa mbote wena mu bungu dia beto, kâ bu tudimbitila mu ndandu zilendi tu natina tindiku tio, mbo tutatamana mu pusana kwe Yandi.—Mik. 119:​27-30.

4. Titsoniki tia mikunga bwe katâ mu Mikunga 73:28?

⁴ Tanga Mikunga 73:28. Titsoniki tia Mikunga 73 Mulevite weri wu basola mu tanga ku tempelo ya Yehova. Kampe na kwikama kwakwansoni keri sarilaka Yehova tûka mivu miamingi. Kâ, ntangu zazansoni nsatu yabâ nandi ya bambuka na ya bambula bantu bakaka ti “pusana kwe Nzambi” musamu wa mbote weri mu bungu dia yandi na bawu. Mu bungu dia nti we musamu wa mbote mu tomo zaba Yehova na mu kurisa tindiku tieto na yandi?

“PUSANA KWE NZAMBI” NSAYI KUTUNATINAKA

5. a) Mu bungu dia nti tindiku na Yehova ti tu natinaka nsayi? b) Bwe ndwenga zi tu hanaka Yehova zitubakisilaka mpe zitukengerelaka? (Bingana 2:​6-16)

⁵ Bu tutomo pusana kwe Yehova, mbo tutomo bâ mu nsayi. (Mik. 65:4) Misamu miamingi mie kô milendi sa ti tabâ mu nsayi. Mu tifwani, mu ntangu yi tutangaka misamu mi katutêlaka mu Bibila, mpe bu tusarilaka mio, mbo tukwizi bâka na ndwenga. Ndwenga zo mbo zitukengerela mu misamu mia mbi na mu makuba ma manene. (Tanga Bingana 2:​6-16.) Ntiangu Bibila ditâka: “Nsayi kwe muntu bakiri ndwenga, mpe kwe muntu bakiri lenda dia swasikisa.”—Bin. 3:​13, NWT.

6. Nti biasa ti titsoniki tia Mikunga kahombesa nsayi’andi?

⁶ Wa matieleka, ndiku za Yehova mpe misamu mia tiari babwabanaka na mio. Titsoniki tia Mikunga 73 wayizi hombesa nsayi’andi mu ntangu yi kabatika mu bâ na mbanzulu za mbi. Wayizi batika mu bakaka nkesi na mu bâ na tifu tia dienokena mu bungu ti mu mbanzulu zandi bantu ba mbi beri lembo zitisaka Nzambi peleko mitieno miandi, luzingu lwa mbote lweri nawu. Mbo keri banzaka ti bantu ba mbi, mpe bê na lulendo, lenda dia bâ nawu dia baka bima biabiansoni bi beri zoloko, tikolela tia mbote tieri nawu, mpe ka beri’â monaka mpasi ko. (Mik. 73:​3-7, 12) Mu bungu ti mbi keri monaka, wayizi banza ti ka kwena ndandu ko mu sarila Yehova. Mu tiari tiandi, yandi watâ: “Diangana, mpamba kwa nalunda mutima’ani wa verela mpe mpamba kwa nasukurila moko mani mu kondo kwa mambu.”—Mik. 73:​13, NWT.

7. Mu ntangu yi tubâka mu tiari nti tulendi sa? (Tala mpe tifwani ntete.)

⁷ Ni bu sa ti titsoniki tia mikunga tiari tieri nandi, wasa tima mu soba mbanzulu zandi. Wakota ku “mbuka ya yinene ya santu ya Nzambi,” kûna Yehova wasungika mbanzulu zandi. (Mik. 73:​17-19, NWT) Yehova we nkatika ndiku’eto, zebi ntangu yi tubâka mu tiari. Tamana mu sambila ngatu katutwarisa, tamana tambula lubakusu lu katuhanaka mu Zu diandi mpe mu nzila ya timvuka, mbo tubaka ngolo ze neto nsatu mu telamana tiari. Mu ntangu yi tubâka na misamu miamingi mpe ka tuzebi’â ko nti tusa, Yehova mbo katubakisa mu bâ ba dzuna.—Mik. 94:19.a

“PUSANA KWE NZAMBI” LUZINGU NA TIVUVU KUTUNATINAKA

8. Ntia misamu miakaka mia mfunu misaka ti pusana kwe Nzambi musamu wa mbote wena kwe beto?

⁸ Bubote bwena kwe beto mu pusana kwe Nzambi mu bungu dia misamu miole miakaka mia mfunu. Wa ntete, mbo tubâ na luzingu lwa mbote tamana bâ na tindiku tia mbote na Nzambi. Wa nzole, mbo tubâ na tivuvu tia ngolo mu bungu dia bilumbu bia ku matu. (Yer. 29:11) Tataluzuleno ndandu zango.

9. Mu bwe tindiku na Yehova titunatinaka nguria nsayi?

⁹ Tulendi bâ na luzingu lwa mbote mu ntangu Yehova yi kabâ ndiku’eto. Lumbu ti bantu babingi batâka ti nzambi kena kô ko, buna ka bazebi’â ko mu bungu dia nti bantu bê ha mutoto, mpe mbo babanzaka ti mu bilumbu bita kwiza bantu mbo bazimbakana. Kâ mu nzila ya ndongokolo’eto ya Zu dia Nzambi tayizi bâ na lukwikulu ti Nzambi “ni yandi sendaka bô bamudingaka mu mutima wawansoni.” (Ebr. 11:​6, NWT) Yehova watusala na nsatu ya mu sarila, ntiangu bu tumusarilaka nsayi yayingi yibâka neto.—Lub. 10:​12, 13.

10. Yehova nti kakanisini kwe bô bamukwikilaka? (Mikunga 37:29)

¹⁰ Mu bungu dia bantu babingi, tivuvu tisukini kwa mu luzingu lwawu lu—sala, bâ na kanda, lunda mbongo mu bungu dia ntangu yi ba nuna. Kani dia Nzambi mu bungu dia bilumbu bia ku matu ka bazebi’â dio ko. Ku lweka lwakaka, bisari bia Yehova tivuvu tiawu batûlaka mu yandi. (Mik. 25:​3-5; 1 Tim. 6:17) Lukwikulu lwe neto mu Nzambi yi twe na tindiku, mpe lukwikulu lwe neto ti mbo kalungisa makani mandi. Bima biabingi bia nkatika bia mbote tuta kêla, nsungula sarila ku tumusarila ntangu zazansoni ku Paradi.—Tanga Mikunga 37:29.

11. Tindiku na Yehova nti titunatinaka, mpe nti timunatinaka?

¹¹ Bâ ndiku ya Nzambi wa mbote wena mu bungu dia beto mu misamu miakaka. Mu tifwani, Yehova kanisini ti mbo katulemvokela tamana soba mabanza. (Iza. 1:18) Buna, ka tulendi’â tatatamana mu bâ na lwaka ko mu bungu dia masumu ma tasa mu ntama. (Mik. 32:​1-5) Mpe nsayi yibâka neto bu tutâka Yehova nsayi. (Bin. 23:15) Wa matieleka, misamu miakaka mie kô mia mbote mitutâka nsayi mu bungu ti tindiku tie neto na Yehova. Kâ, bwe tulendi tatamana mu bâ na tindiku na Yehova?

BWE TULENDI TATAMANA MU “PUSANA KWE NZAMBI”

12. Nti wayizi sa mu bâ ndiku ya Nzambi?

¹² Tala ti wa batusu wena, misamu miamingi wayizi sa mu bâ ndiku ya Yehova. Matieleka mamingi matariri Yehova na Yezu wayizi longoka, wayizi soba mabanza maku mu masumu ma wasa mu ntama, wayizi tûla timinu tia ngolo mu Nzambi, mpe wayizi sarila ngolo mu diatila mu luzolo lwandi. Kâ mu bâ ndiku ya Nzambi, tufweti tatamana mu sa misamu mio.—Kol. 2:6.

13. Ntia misamu mitatu milendi tu bakisa mu bâ ndiku za Yehova?

¹³ Nti bitubakisa mu bâ ndiku ya Yehova? 1) Tufweti tatamana mu tanga na mu longoka Bibila. Bu tutangaka Bibila, ka tusukinandi kwa mu longoka misamu mitariri Nzambi. Kâ tufweti dinga mu bakula mpila ya banzila ya Nzambi, mio mi kazololo beto tayirika mpe tadiatila buna bu kazololo. (Efz. 5:​15-17) 2) Tufweti yika timinu tieto ngolo bu tudimbitila mu mpila zazingi zi katusongelaka luzolo lwandi. 3) Tufweti tatamana mu yina misamu mi fwemesaka Yehova, mpe tufweti sa keba mu lembo bâ ndiku za bantu bayirikaka misamu mio.—Mik. 1:1; 101:3.

14. Nti tufweti sa ntangu zazansoni mu tâ Yehova nsayi? (1 Bisi-Korente 10:31) (Tala mpe bifwani.)

¹⁴ Tanga 1 Bisi-Korente 10:31. Mfunu wena kwe beto mu tatamana mu yirika misamu mitâka Yehova nsayi. Mifweti yôka mio mi tusaka mu tisalu tieto tia samuna na ku tukutakanu. Ndiatulu ya mbote yitâka Yehova nsayi mbo yitarilaka mio mi tuyirikaka mu luzingu lweto lwalwansoni. Mu tifwani, mu ntangu yi tubâka na bunsungu mu misamu miamiansoni mpe bu tusongelaka ndiambu kwe bampwana’eto, mbo tutâka Yehova nsayi. (2 Kor. 8:21; 9:7) Zololo mpe tasongela ti kabu dia luzingu ntalu diena kwe beto. Mbo tutatamana mu bâ ndiku na Wô hanaka luzingu bu tutatamana mu bâ na bifu bia mbote mu misamu mitariri bidia, malavu mpe bu tukipa tikolela tieto mu mpila ya delakana. Yehova bu kamonaka ngolo zi tusaka mu misamu miamiansoni mi tuyirikaka mu mu tâ nsayi ni bu mi bâ mia fioti, mbo katomo kwizi tu zolo.—Like 16:10.

15. Bwe Yehova kata zolo tabongela bantu bakaka?

¹⁵ Yehova mbote kasaka kwe bô bamusarilaka na kwe bô balembo mu sarilaka. (Mat. 5:45) Zololo mpe tasongela mbote kwe bantu bakaka. Mu tifwani, ka tufweti’â ‘tazonzelaka muntu bubi ko, tabakanaka ko, [. . .] tufweti songela bulembami kwe bantu babansoni.’ (Tite 3:​2, NWT) Buna, ni bu sa ti bantu ka bakwikilaka Yehova ko, ka tubanza ko ti tubayôkele. (2 Tim. 2:​23-25) Mbo tubâ ndiku ya Yehova bu tusarila mbote kwe bantu babansoni.

TULENDI “PUSANA KWE NZAMBI” NI BU SA TI TUTÊLE MAKUBA

16. Ntangu fioti ha manima bwe titsoniki tia Mikunga 73 keri monaka?

¹⁶ Ntangu zakaka lendi banza ti kusiri’â ndiku ya Yehova ko mu bungu dia misamu mi wayirika. Ntiana bu tumweni wo, musamu ni wo wa turila titsoniki tia Mikunga 73. Wadila: ‘Kâ meno, fioti kwa fiasiri konga malu mahambukiri, fioti kwa konga ntambi za sielomokene.’ (Mik. 73:2) Watambula ti wayizi bâ ‘nduri,’ ‘tizoba’ ‘ntiana tibulu’ ha meso ma Yehova. (Mik. 73:​21, 22) Ngano mu bungu dia makuba mandi mbo keri banzaka ti Yehova keri’â vutu mu zoloko ko, peleko ka mu lemvokela ko?

17. a) Ni bu sa ti wa nkatika wa nôka weri, titsoniki tia mikunga nti kasa? b) Ntia malongi tulendi baka mu tifwani tiandi? (Tala mpe bifwani.)

¹⁷ Tala ti titsoniki tia mikunga wabanza ti Yehova wamuyambirika, mbanzulu zo za ntangu fioti kwa zeri. Ni bu sa ti mpasi zazingi keri monaka, wazaba ti nsatu yeri nandi ya bâ penepene na Yehova. Watsoneka: ‘Mboko meno mbo nibâ ha lweka lwaku [Yehova] ntangu zazansoni; wasimbiri koko kwani kwa lubakala; mu malongi maku kuntwarisila, mboko ha manima, mbo kunata ku mukembo.’ (Mik. 73:​23, 24) Beto mpe tufweti lomba kwe Yehova katutindisa mu ntangu yi tumonaka ti timinu tieto ka tisiri’â ngolo ko, peleko mu ntangu yi tubâka ba nôka mu bungu dia makuba meto. (Mik. 73:26; 94:18) Ni bu sa ti masumu ma manene tasiri, tulendi kâla kwe Yehova na lukwikulu ti “zebi lemvokela.” (Mik. 86:5) Mu ntangu yi tumonaka mpasi peleko yi tubâka ba nkatika ba nôka, nguria mfunu wena mu pusana kwe Nzambi’eto.—Mik. 103:​13, 14.

“PUSANA KWE NZAMBI” NTANGU ZAZANSONI

18. Mu bungu dia tufweti tatamana mu pusana kwe Yehova ntangu zazansoni?

¹⁸ Tulendi tatamana mu pusana kwe Yehova ntangu zazansoni. Kani kabwe ka tubika ko mu longoka misamu mu yandi. Bibila mbo ditâka ti ‘nzila za Yehova, ndwenga zandi, na luzabu lwandi ka biena bia zabakana ko.’—Rom. 11:​33, NWT.

19. Ntia lukwikulu Mikunga mita tu hana?

¹⁹ Mikunga 79:13 yitêle: ‘Mboko beto kanda diaku, twila dia mpaka’aku, nge tukumbisa mankululu; nkumbu’aku mpe tusamuna mbandu basiri mbandu.’ Nge mpe lendi bâ na lukwikulu ti mbo baka tusakumunu twa ntangu zazansoni bu bâ ndiku na Nzambi. Mpe mbo tâ na lukwikulu ti: ‘Ntangu zazansoni tisikamanu tia mutima’ani ni nge Nzambi’ani.’—Mik. 73:26.