Musamu wa mbote wena kwe beto mu bâ ndiku na mpangi zeto!

1-2. Ntia musamu we mfunu kwe Yehova, mpe nti kazololo tasa?

MPILA yi tubongelaka bantu bakaka mfunu yena kwe Yehova. Yezu walongesa ti tufweti zolo mpwana’eto ntiana beto beni. (Mat. 22:​37-39) Mbo wutarilaka mpe nsayi yi tufweti songela kwe bantu balembo sarilaka Yehova. Bu tusila bo, mbo tulanda tifwani tia Nzambi’eto Yehova, yandi ‘tekesaka mwini kwe bantu ba mbi na kwe bantu ba mbote, nokesaka mpe mvula kwe bantu ba sungama na kwe bantu balembolo ba sungama.’—Mat. 5:45.

² Ni bu sa ti Yehova bantu ba kazololo, kâ mbo katomo zoloko bô bamutumamanaka. (Za 14:21) Zololo ti talanda tifwani tiandi. Tu lombele tabâ na “luzolo lwa ngolo” mu mpangi zeto na mu basongela “luzolo lwa ku mutima.” (1 Pi. 4:8; Rom. 12:​10, NWT) Mu ntangu yi tubâka na luzolo lwa ngolo na lwa ku mutima mu bungu dia muntu, luzolo lo mbo lufwanakanaka na luzolo lubâka neto mu bungu dia muntu wa mu kanda dieto peleko ndiku’eto yi tutomono zolo.

3. Nti tulendi simba mu bungu dia luzolo?

³ Luzolo lwe ntiana muturila (plante), bafweti lwa kipa ngatu lwa kula. Ntumwa Paulo wahana malongi ema kwe Bakristo: “Tatamaneno mu zolosono ntiana bantu ba mu kanda.” (Ebr. 13:​1, NWT) Yehova zololo ti tatatamana mu kurisa luzolo lweto mu bungu dia bantu bakaka. Timoko ti mbo tizonzela mu bungu dia nti tufweti bêla na tindiku na bampangi mpe bwe tulendi tatamana mu sila bo.

MU BUNGU DIA NTI TUFWETI BÊLA NA TINDIKU NA BAMPANGI

4. Tintwari na Mikunga 133:​1, bwe tulendi tatamana mu zolo bumosi bwe mu timvuka? (Tala mpe bifwani.)

⁴ Tanga Mikunga 133:1. Mbo tutambula musamu watâ titsoniki tia mikunga bu katsoneka ti tindiku tia matieleka na bô bazoloko Yehova tia ‘mbote’ tiena mpe tia ‘nsayi.’ Ntiana muntu wuta lembo sa keba mu tima tia toma ti kamonaka bilumbu biabiansoni, mpila mosi mpe tulendi lembo sa keba mu butoma bwa bumosi bu twe na bo na bampangi. Mbo tuvulu monanaka na bampangi, kampe mbala zazingi mu lumingu. Bwe tulendi tatamana mu bazolo? Luzolo lweto mu bampangi mbo lukula tala ti tubongele ntangu ya bakula ti muna muntu ntalu kena mu timvuka.

5. Nti luzolo lweto lutumaka bantu bakaka mu sa?

⁵ Bantu bakaka bakwizaka ku lukutakanu mu mbala ya ntete, mbo batomo yitukuku bu bamonaka luzolo lwe ha kati dieto. Mu bungu dia musamu wo, balendi tâ matielaka babakiri. Yezu watâ: ‘Ni bo bantu babansoni bazabila ti beno milongoki miani miena tala ti lubêle na luzolo beno na beno.’ (Za 13:35) Tabongeno tifwani tia Chaithra, weri ku universite mpe weri longokaka Bibila na Mbangi za Yehova. Watambula mukanda wa mbila mu kwiza ku lukutakanu lwa lunene. Ha manima ma tilumbu tia ntete tia lukutakanu lwa lunene, watâ kwe mulongi’andi: “Kani kabwe bibuti biani ka bieri’â kumbumbaka ko. Kâ ku lukutakanu lweno lwa lunene, mbala 52 bayizi kumbumba mu tilumbu timosi! Nayizi mona luzolo lwa Yehova mu nzila ya kanda di dia timpeve. Nzololo nabâ mu kanda di.” Chaithra watatamana mu kula mu timpeve mpe wabaka bateme mu 2024. Mu ntangu bantu yi bakwizaka mu mbala ya ntete ku lukutakanu lweto, yi bamonaka nsalulu zeto za mbote na luzolo lweto, mbo bibatumaka mu sarila Yehova.—Mat. 5:16.

6. Bwe tindiku na bampangi tilendi tu kengerela?

⁶ Tindiku na bampangi tilendi tu kengerela. Paulo walwengesa mpangi zandi bu katâ: ‘Kâ yendeno hanasane butindi beno na beno lumbu basiri lumbu [. . .] ngatu kani wumosi mu beno kalembo kubisa mutima bu kawubakana mu disumu.’ (Ebr. 3:13) Tala ti ba nôka twena mpe ka tuta vutu lenda ko mu yirika misamu mia mbote, Yehova lendi sarila bampangi mu tu hana lubakusu lwe neto nsatu. (Mik. 73:​2, 17, 23) Lutindusu lwa mpila yo lwa mbote lwena mu bungu dia beto.

7. Ntia tintwari tie ha kati dia luzolo na bumosi? (Bisi-Kolose 3: 13, 14)

⁷ Mu timvuka tia bantu basarilaka ngolo mu songasana luzolo twena, ntiangu tubakaka tusakumunu twatwingi. (1 Za 4:11) Mu tifwani, luzolo mbo lututumaka mu ‘tatamana mu tikorela beto na beto,’ musamu wo mbo wutubakisaka mu bâ mu bumosi. (Tanga Bisi-Kolose 3:​13, 14; Efz. 4: 2-6) Buna, mu ntangu ya tukutakanu tweto, mbo tuyangalalaka mu nsayi yibâka mu timvuka tieto tiyôkele timvuka ni timvuka mu nza.

TATIZANGULENO BETO NA BETO

8. Bwe Yehova katubakisilaka mu bâ mu bumosi na mpangi zeto?

⁸ Bumosi bweto mu nza ya mukaka timangu tiena. Yehova saka ti tabâ mu bumosi ni bu sa ti bantu ba masumu twena. (1 Kor. 12:25) Bibila mbo ditâka ti ‘talongokele kwe Nzambi mu zolosono beto na beto.’ (1 Tes. 4:9) Wuzololo tâ mu nzila ya Matsonoko, Yehova tu têlele nti tufweti sa mu bâ na tindiku beto na beto. Mbo tubâ bantu Nzambi ba kalongesaka bu tutomo taluzula malongi mandi mpe bu tusarila mo. (Ebr. 4:12; Zaki. 1:25) Mpe Mbangi za Yehova ngolo zisarilaka mu sila bo.

9. Nti Bisi-Rome 12:​9-13 yita tu longesa mu tifu tia tizangula beto na beto?

⁹ Bwe Zu dia Nzambi ditulongesaka mu bâ na tindiku na bampangi? Tataluzuleno musamu watâ Paulo mu Bisi-Rome 12:​9-13. (Tanga.) Tala ntêlo zi kasarila, “bâkeno bantu ba ntete mu kwe tizanguri beno na beno.” Bwe wuta zolo tâ? Tufweti dinga mpila ya songela “luzolo lwa ku mutima” kwe bampwana’eto mu mpila zazingi, mu tifwani bu tulemvokelaka, bu tusongelaka ndiambu na bu tukabaka. (Efz. 4:32) Ka tufweti’â takêla ko ti mpangi’eto kapusana kwe beto, tufweti bâ “bantu ba ntete” mu sila bo. Yezu watâ: “Kaba kuyôkele nsayi na baka.”—Bis. 20:​35, NWT.

10. Bwe tulendi bêla bantu basalaka “bu tutizangulaka beto na beto”? (Tala mpe tifwani.)

¹⁰ Bu katâ ti tabâka bantu ba ntete mu tizangulaka beto na beto, ha manima Paulo wavutu tu lwengesa bu katâ “bêno bantu basalaka bwabwingi, bêno ka lubê na mande.” Muntu wulembolo na mande luhemo lwe nandi mpe sala kasalaka. Mu ntangu yi bamuhanaka tisalu mbo katomo tia salaka. Bingana 3:​27, 28 yitêle: ‘Kukalandi mu sa mbote kwe wô kekolo yo tala ti koko kwaku kulendi bwa sa.’ Ntiangu, bu tumonaka muntu we na nsatu lubakusu mbo tusaka mio miamiansoni mi tulenda mu mu bakisa. Ka tulembeketa ko, mpe ka tubanza ko ti muntu wakaka mbo kayirika wo.—1 Za 3:​17, 18.

11. Nti bilendi tu bakisa mu bâ na tindiku na bampangi?

¹¹ Mpila yakaka yi tutizangulaka beto na beto ni ya bâka na manzangu ma lemvokelaka bampangi bu batuyirikaka musamu wa mbi. Bisi-Efeze 4:26 yitêle: ‘Bwisi ka butiyirilandi na nkesi zeno.’ Mu bungu dia nti? Verse 27 yitêle: ‘Ka luhanandi nzila kwe Diabulu.’ Mu Zu diandi, Yehova mbala zazingi katutêlaka mu tilemvokela beto na beto. Bisi-Kolose 3:13 mbo yitutindisaka mu ‘tatamana mu tilemvokela beto na beto.’ Lemvokela makuba ma bampwana’eto mpila yena ya mbote mu bâ ndiku nawu. Bu tusila bo, mbo tubakisa “mu simbirila bumosi bwa mpeve mu kolo dia tidzunu.” (Efz. 4:​3, NWT) Wa matieleka, mu ntangu yi tulemvokelaka bampangi mbo tubakisaka kanda dia Yehova mu tomo bâ mu bumosi na mu tidzunu.

12. Bwe Yehova katubakisilaka mu lemvokela?

¹² Wa matieleka, wulendi bâ musamu wa mpasi mu lemvokela bantu batuyirika misamu mia mbi. Kâ tulendi lenda na lubakusu lwa mpeve santu ya Nzambi. Batulwengese mu ‘bâ na luzolo lwa ku mutima beto na beto,’ mpe mu bâ “bantu basalaka bwabwingi,” Matsonoko matulwengese: ‘Tabâ na tiya mu nzila ya mpeve santu.’ Muntu we na “tiya” “luhemo lwalwingi lwe nandi” mu bungu ti mpeve santu yimutwarisaka. (Tala mpe note ya Bisi-Rome 12:11.) Buna mpeve santu ya Nzambi yilendi tu bakisa mu songela luzolo na mu tilemvokela beto na beto mu mutima wumosi. Ntiangu, tutomo lemberelaka Yehova katubakisa.—Like 11:13.

‘KA HABÂNDI TIHAMBULA HA KATI DIENO’

13. Nti bilendi tulumuna tihambula ha kati dieto?

¹³ Mu timvuka mwe na bantu ba mpila na mpila batûka mu mbuka za swaswana. (1 Tim. 2:​3, 4) Tala ti ka tusiri’â keba ko, luswaswanu lo lulendi nata tihambula mu nsololo zi tusaka ntiana ndwatulu’eto, mpila’eto ya tikipila, mpila’eto ya bukusulu na nsaka. (Rom. 14:4; 1 Kor. 1:10) Mu bungu ti “Nzambi watulongesa mu zolosono beto na beto,” tufweti sa keba mu songela ti nsololo zeto ziyôkele za bantu bakaka.—Flp. 2:3.

14. Ntangu zazansoni nti tufweti sarila ngolo mu sa, mpe mu bungu dia nti?

¹⁴ Mu lembo kotesa tihambula mu kati dia timvuka tufweti sarila ngolo mu titindisaka na mu kwe yikasane ngolo ntangu zazansoni. (1 Tes. 5:11) Bwawu bu, bantu bakaka bakota tiozi peleko babakatula mu timvuka kâla bata kâla. Diangana, na nsayi yayansoni tuta babwana! (2 Kor. 2:8) Tataleno musamu wa turila mpangi yimosi ya yikento ya kota tiozi tûka mvula 10. Bu kakâla mu timvuka yandi têle: “Bantu babansoni bakumbwana na nsayi mpe bakungana mbote ya koko.” (Bis. 3:19) Nsayi yo, nti ya mu sa ku mutima? Têle: “Nayizi mona ti Yehova mbo keri kumbakisaka mu vutu bâ mu nsayi.” Bu tubâ na tifu tia titindisaka, mbo tubâ bantu Yezu ba kasarilaka mu tindisa bô bata ‘timuka na madema.’—Mat. 11:​28, 29.

15. Nti tulendi vutu sa mu bakisa timvuka mu bâ mu bumosi? (Tala mpe tifwani.)

¹⁵ Mpila yakaka ya singasa bumosi ni mu nzonzolo’eto. Yobe 12:11 mbo yitâka: ‘Ngano kutu ka misamu’â ko diswasikisaka ntiana munwa bu wuzabaka luwu lwa bidia?’ Ntiana kwa muntu wuzebi lamba, ntete kakaba bima kwe bantu bakaka mbo katoko bia bimba mu zaba tala ti bitomene, beto mpe tufweti toko banza mu mio mi tutâ ntete tazonza. (Mik. 141:3) Ntangu zazansoni tuzololo ti mio mi tutâ mia tindisa, mia bâ mia mbote, mpe bô bata tu wirikila babakila mio ndandu.—Efz. 4:29.

16. Nani fwanane mu tomo sarila nzonzolo yi tindisaka?

¹⁶ Babakala ba kwela na bibuti bafwanane mu bâ na nzonzolo yi tindisaka. (Kol. 3:​19, 21; Tite 2:4) Bakuluntu mpe bafweti bâ titeko tia lutindusu mpe tibombaka twila dia Yehova. (Iza. 32:​1, 2; Nga. 6:1) Tingana timosi tia Bibila titâka: “Musamu wu batêle mu ntangu ya delakana wa nkatika wa mbote wena!”—Bin. 15:​23, NWT.

LUZOLO ‘MU NSALULU NA MU MATIELEKA’

17. Bwe tulendi bêla na lukwikulu ti luzolo lweto mu bampangi lwa matieleka lwena?

¹⁷ Ntumwa Za watudindisa ‘mu lembo zolo kwa mu nzonzolo na mu lungweri, kâ mu nsalulu na mu matieleka.’ (1 Za 3:18) Tuzololo ti luzolo lweto mu mpangi zeto lwatuka ku mutima. Bwe tulendi lendela? Bu tuyôkesa ntangu yayingi na mpangi zeto, tindiku tieto na bawu mbo tikula, mpe luzolo lweto mbo luyikama ngolo. Dinga mpila yi yôkesa ntangu na bampangi ku tukutakanu na mu tisalu tia samuna. Bâ na tifu tia kwe talaka bampangi. Bu tusila bo, mbo tusongela ti ‘talongokele kwe Nzambi mu zolosono beto na beto.’ (1 Tes. 4:9) Mpe beto beni mbo tutatamana mu mona ti: ‘bo ntia mpila bubote, yo ntia mpila nsayi bampangi mu bâ ha timosi!’—Mik. 133:1.