JW Télédiffusion mu satelite yitûriri ku mbuka zilembolo na Internet

Ngonda zazansoni, mbo tukêlaka émission ya JW Télédiffusion na timina diadiansoni. Kâ, mpangi zeto zazingi ku Afrique zilembolo na lenda dia landa programe yo mu Internet. Mu bungu dia nti?

Mbuka zazingi ku Afrique zilembolo na Internet ya mbote. Mu mbuka ze na Internet, vula-vula ka yena ya mbote ko peleko ntalu yena. Mu tifwani, tilumbu timosi munkengi wa tizunga ku Madagascar weri dingaka mu benda (télécharger) émission JW Télédiffusion mu cybercafé. Yandi wafuta kampe 9 300 FCFA (16 dollars), yiyôkele mbongo zi bakaka bantu bakaka mu lumingu!a

Ntono misamu mio mia mpasi, bantu babingi ku Afrique bata bakilaka ndandu mu JW Télédiffusion ni bu sa ti ka bena na Internet ko. Ngano bwe?

Tûka 2017, bayizi sa ti bantu babâka ku Afrique sub-saharienne babâ na lenda dia landaka programe ya JW Télédiffusion mu satelite. Buna, ka bafutaka mbongo ko, ntangu zazansoni balendi ya tala, peleko bilumbu biabiansoni mu mazu 16.

Dieka bo, Mbangi za Yehova zayizi sa luwawanu (contrat) na service yimosi yiyôkesaka nsangu mu tele ya satelite. Satelite yi basarilaka nsi 35 za Afrique subsaharienne yisarisaka. Mu ngonda yimosi kampe yôka 7 200 000 FCFA (12 000 dollars) bafutaka. Ntangu zakaka, Mbangi za Yehova mbongo zakaka zidukisaka mu futa tele zakaka ngatu zayôkesa émissions zeto en direct. Mpila yo bantu babingi yibakisaka mu tala tukutakanu twa tunene peleko programe zi bakubikaka mu bungu dia vizite za Betele.

Bantu babingi, na bô balembolo Mbangi za Yehova, batalaka JW Télédiffusion mu satelite tûka ku nzo zawu. Kâ, mpangi zazingi zilembolo na lenda dia sumba bisalulu mu baka JW Télédiffusion. Mu ba bakisa, bayizi tûla bisalulu bio mu Nzo za Nsambululu yôka 3 670 ngatu bampangi balandaka programe ya JW Télédiffusion. Bisalulu bio na mbongo zi banatinaka bio mu mbuka zo, kampe 40 580 FCFA (kampe 70 dollars) bifwaka, tala ti mu Nzo ya Nsambululu tele ye mô peleko projecteur. Tala ti kâni, ntangu zakaka kampe 307 253 FCFA (530 dollars) bifwaka.

Mpangi zeto matondo zivutulaka mu bungu dia JW Télédiffusion. Mpangi yimosi ye mukuluntu ku Cameroun yitêle: “Ntiana mane yena mu bungu dia makanda meto ha kati dia sese.” Odebode, mpangi yimosi ya ku Nigéria, têle ti: “Mbala zitatu tutalaka JW Télédiffusion mu kanda, mu lumingu. Bala bani timina dibâka nawu mu kulu ya tala. Beto balombaka mpe mu talaka yo ntangu zakaka.” Rose mpe bâka ku Nigéria, têle: “Nsayi ye nani mu tâ ti JW Télédiffusion mu satelite yayizi kundukisa mu tifu tiani tia tala nsangu ntangu zazansoni mu tele zakaka. Bu ndieri landaka nsangu, nkesi ndieri kulu bakaka mu mio mi ndieri monaka, mpe tension’ani mbo yeri nakaka. Kâ JW Télédiffusion, mutima yitungaka mpe yilembekaka! Tele yena yi ntomono zolo. Kabu dia dinene diena ditûkiri kwe Yehova.”

Munkengi wa tizunga wumosi ku Mozambique wutêle ti mu tizunga tiandi, bayizi tûla bisalulu bibakisaka mu baka JW Télédiffusion mu Nzo za Nsambululu. Mpangi za mu tizunga tio heure mosi zikulu titûrilaka peleko yôka heure mosi ntete babatika mu tala JW Télédiffusion ya satelite.

Ku lukutakanu lwa nsi zazingi lwa 2019 lwayôka ku Johannesburg, ku Afrique du Sud, bayizi sarila JW Télédiffusion mu yôkesa binzonzi bia nguri, ntiana bia mpangi za Timvuka titwarisaka, mu mbuka 9 zakaka. Sphumelele, salaka mu service ya télédiffusion ya filiale ya ku Afrique du Sud, têle ti: “Tûka ntama, wafwanana ti bayôkesa binzonzi mu Internet. Kâ wafwanana mu bâ na Internet ya mbote na mu futaka connexion. JW Télédiffusion mu satelite ka yafwiri ntalu yayingi ko, mpe tima tia nsungu tiena.”

Mu bungu dia makabu meno ma luzolo ma luhanaka mu bungu dia tisalu tisalamaka mu nza yayansoni, mpangi zazingi za ku Afrique zilendi tala JW Télédiffusion mu satelite. Matondo tuvutulaka mu bungu dia makabu ma mpila na mpila ma lusaka mu donate.jw.org.