Lubakusu mu ntangu ya katastrofe mu 2021—Ka tuyambirikandi mpangi zeto

Mu muvu wa tisalu wa 2021,a nza yatatamane mu nimbuka mu bungu dia timbevo tia coronavirus. Ntiana bwa têle mutu-diambu wa “Lubakusu mu ntangu ya coronavirus,” tayizi sarila milio zazingi za dollarb mu bisalu bia lubakusu mu ntangu ya epidemi, mpe komite za lubakusu 950 bayizi kubika.

Diangana, coronavirus bu yita mwisa bantu mpasi, katastrofe zakaka zamwisini mpangi zeto mpasi mu nza yayansoni. Mu bungu dia kastrofe zo yôka 200, komite ya bantwarisi ya Timvuka titwarisaka yaheni nzila ngatu basarila 8 millions de dollars na lubakusu lwakaka lu baheni mu bungu dia coronavirus. Tala mpila zole zi bayizi sarila makabu maku mu bakisa bantu babwabane na katastrofe.

Mudikutulu wa volcan Nyiragongo

Mu tilumbu tia 22 mai 2021, Volcan Nyiragongo, ku Congo (Kinshasa), yabatika mu dikita. Tiya twamwangasa nzo, tukolo na mbuka yi balundilaka mamba. Kâ tiya to ka twabâ musamu wa wumosi wa mpasi ko. Mu bilumbu bialanda, mfumfuta ya volcan yitulumunaka bimbevo yabwa ku Goma mpe midikutulu miamingi miayizi vutu bwa. Lweka lwa bantu lwalwîngi lwa hata dia Goma bayizi ba lomba mu duka. Bantu babingi bayizi dioka, bakaka ku Rwanda.

Ha kati dia bantu badioka, Mbangi za Yehova 5 000 zabâ. Bakaka bahombesa nzo zawu mu bungu dia volcan, Nzo za bakaka bayizi za kotela kwe mivi bu bamana dioka. Komite ya lubakusu ya ku Rwanda na ya ku Congo (Kinshasa) zasala ha timosi mu hana lubakusu. Mu bungu dia komite yimosi ya lubakusu, filiale ya Congo (Kinshasa) yitêle: “Ntono musamu wo wa mpasi ku hata, mpe ntete balomba kwe bantu mu katuka, komite yabatika mu kaba bidia, mamba, mavunga na binkuti.” Ku hata dimosi kwa kutakana mpangi zeto kampe yôka 2 000, komite yimosi ya lubakusu yakaba maske mpe yasongela bwe balendi lembo samburila coronavirus na cholera.

Mu ngonda zitatu zalanda, mpangi zeto zayizi kaba 6 tonnes ya loso, 6 tonnes ya masangu, 3 tonnes ya mafuta (huile) na 3 tonnes ya mamba. Mu lembo dukisa mbongo zazangi, filiale yasumba bidia biabingi mu tizunga, kani basumbila bio mu nsi za nzenza.

“Mpangi yimosi ya yikento, yahombesa nzo mu bungu dia volcan, yitêle: “Tayizi tomo nôka mpe mu mpasi tabâ. Kâ ha manima, kanda diandi diayizi baka lutindusu lwa tinsuni na lwa timpeve. Bwawu bu yandi têle: “Na lubakusu lwa Yehova, ka tuta kondo bima ko. Tayizi mona ti Yehova dema dieto kata nata, mpe beto kata bakisa mu nata dio.”

Mbaya ya ngolo ku Venezuela

Venezuela tûka mvula zazingi yibwabanaka na mbaya ya nzitukulu. Mpangi zeto luzingu lwa nkatika lwa mpasi lwe nawu, bidia bi bakondoko mpe miangu miamingi mie mu nsi yo. Kâ, organizasio ya Yehova ka yabayambirikiri’â ko.

Mu muvu wa tisalu wayôkele, yôka 1,5 million de dolars bayizi sarila mu sumba bidia na mu nata bio mu makanda me na nsatu lubakusu. Filiale ya ku Venezuela yitêle: “Musamu wa mpasi wena mu nata 130 tonnes ya bidia mu mbuka za nsi yayansoni, na mu hana bio ha moko ma mpangi zeto ze na nsatu lubakusu.” Ngatu bidia bialembo beba, bampangi bima bizingilaka ntangu yayingi basolaka. Filiale yivutulu tâ: “Bidia mu bikunku na mu binà (saison) tusumbilaka bio, bu bilembo bâka ntalu. Mpe, mu mpila yilembo dingaka mbongo zazingi tunatinaka bio.”

Leonel, mpangi yimosi ya komite ya lubakusu ku Venezuela, tisalu tiandi kazoloko. Yandi têle “Tisalu tia lubakusu tia nzitukulu tiena. Bweso bo, bwatomono kuntindisa tûka lufwa lwa mukento’ani’ani mu bungu dia coronavirus. Namweni me beni bwe Yehova kalungisilaka kani diandi dia lembo yambirika kanda diandi.”

Mpangi yimosi yabakiri lubakusu, yabâ mu komite ya lubakusu mu ntama. Yandi têle: “Bwawu bu ni meno ndieka bâka lubakusu. Ka nabakiri’â kwa lubakusu lwa tinsuni ko. Bampangi mpe bakumbakisi, meno na mukento’ani mu bâ ba dzuna. Bawu batomono tu kipa, batutindisi, mpe batubombele.”

Katastrofe zakaka ze kô zilembo bâka na bidimbu. Kâ, vula vula organizasio ya Yehova yilendi kulu baka, mpe yilendi kulu hana lubakusu, mu nzila ya makabu ma lusaka mu bungu dia tisalu tia mu nza. Mpila zakaka mu donate.jw.org bazonzelaka zo. Lukabu lweno lwa tutomo zoloko.