TIMOKO TIA 18

Ntsia mpila tusarishilaka bampangi beto mu ntangu ya mpashi e?

Mbangi za Yehova zitayika moko mu salu tsia hana lubakusu mu ntangu ya mpashi ku République dominicaine — République dominicaine

Mbangi za Yehova zitayika moko mu vututunga Nzo ya Kimfumu ku Japon — Japon

Mbangi ya Yehova yita bomba muntu ha manima ma mudikutulu wa mutoto ku Haïti — Haiti

Bunakwa mbashi za tâpulukusu mbo zibwa, Mbangi za Yehova lusalusu babatika kubikaka mu bakisa bampangi bawu babwiriri nsamu. Diambu diango dia dimonekesaka ti nkatika zolosono bazolosonoko. (Za 13:34, 35; 1 Za 3:17, 18) Mbo tsia lubakusu tuhanaka e?

Mbongo tuhanaka. Mundiala mbo watula ku Yudea mu tsikeke tsia ntete, bakristo ba ku Antiokia batambikila bampangi bawu ba tsimpeve mbongo. (Bisalu 11:27-30) Beto mpe mpila ni yimoshi, mbo tuwa ti bampangi beto be ku hata dimoshi babwiriri m’samu wampashi, makabu ma mbongo tutambikaka mu nzila ya tsimvuka tsia ko kutubelaka mu lungisa nsatu za tsinsuni za bo bakekolo.—2 Bisi-Korente 8:13-15.

Lusalusu lo lufwanakane tuhanaka. Bakuluntu bo be ha mbuka yo yibwiriri m’samu mbo babatsika tombaka mu zaba kantsia huma mpangi moshi moshi ya tsimvuka kena mpe talati bubote kena. Ha manima, komite moshi ya lubakusu mbo yitwarisaka salu tsia kaba madia, binkuti, mamba ma nwa, mbuka ya sekela mpe na lusalusu lwa bilongo. Mbangi zazingi zo zizebi bisalu bia mpila na mpila bakwendaka ha mbuka yibwiriri m’samu mu tike ya bawubeni ngati bayika moko mu salu tsia lubakusu peleko mu vututunga nzo za bampangi na Nzo za Kimfumu zo zimwangane. Mbo twena ti tsiwisa tieneto mpe tayukunu mu sala tsintwari, ntsiangu tulendaka mu kuluvukasa ntaku zo zifwanakane na bisari mu ntangu ya mpashi. Ninga ntetentete “bo batwe tsiminu tsimoshi” tutoko sarisaka, tala ti tulendele bantu bakaka mpe batusarisaka nibaba ka mu ntsia dibundu.—Bisi-Ngalate 6:10.

Tsindisa tubatsindisaka mu nzila ya Bibila. Bantu bo babwiriri nsamu, nsatu mbombolo yi vulu baka nawu. Mu ntangu za mpila yo, kwe Yehova, “Nzambi ya mbombolo zazansoni” tubakilaka ngolo. (2 Bisi-Korente 1:3, 4) Mbo tuyangalalaka mu tela bampwaneto be mu mpashi ntsilulu za Bibila mpe ti Kimfumu kia Nzàmbi mbo kikwizi manisa m’samu miamiansoni mitanatina bantu mpashi.—Nzabukusu 21:4.

Mubwenabwe Mbangi za Yehova balombo zingilaka mu hana lubakusu mu ntangu ya mpashi e?
Bwe tusarilaka Bibila mu hana mbombolo kwe bo babwiriri mpashi e?