Miamiansoni mu bungu dia nsayi!

BAKENTO bole beri kwe yende ku tizunga ti bavulu sarilaka ku Baguio die hata dia Philippines. Bayizi mona prezentware ya Mbangi za Yehova, kâ ka bapusana ha prezentware yango ko. Helen, mpangi ya yikento yatelama ha prezentware yabasongela nsayi ku tidiri. Bakento bo batatamana mu landa nzila’awu, kâ bayizi yituku mu nsayi yayingi ya basongela Helen.

Ha manima, mu ntangu bakento bango beri kâlaka ku nzo’awu mu kati dia bus, bayizi mona pancarte ya yinene ku Nzo ya Nsambululu yi batsoneka jw.org. Babambuka ti bitsono ni bio kwa mpe batoko mona ha prezentware ya Mbangi za Yehova. Ba bole bakôka mu bus mpe baye tala programe za tukutakanu za bimvuka za swaswana zi batsoneka ha mwelo wa Nzo ya Nsambululu yango.

Bakento bo ba bole, bayenda ku tukutakanu twalanda. Mpe nani bamona bu beri kwe yende mu Nzo ya Nsambululu? Helen! Ho nkatika bendo babambuka ti, ni yandi wabasongela nsayi yayingi. Helen têle ti: “Bu beri pusanaka kwe meno nayizi bâ na mwa bunkuta, nayizi banza ti kampe musamu wa mbi nayirika.” Kâ bakento bo ba bole babangurila Helen ka ntia musamu wayôka.

Bakento bo lukutakanu lwa bazolo; mpe ka batimona banzenza ko. Bu bamona bantu beri kombaka Nzo ya Nsambululu ha manima ma lukutakanu, bayula tala ti bawu mpe balendi komba. Wumosi wa bakento bo ka wasala bê ku Philippines ko, kâ wo wakaka ku tukutakanu kakwendaka mpe wabatikiri mu longoka Bibila​—mio miamiansoni mu bungu dia nsayi!