ISOMO 11
Buni B’unamona Mutali Nunse kwa Kusoma Biblia?
Ndi use wabezaga wakala lwango lwa kukita mulimo munene mu kalamo kobe? Ndi u buli go, mango unamona buno buli bubibu kukita mulimo wongo, tondo ndi walingila kukita bibyo biteli bibibu ku mulimo wongo unagusila. U buli go na kusoma Biblia. Mango uneibuzya buno, ‘kuni kuninalingila?’ Mu lino isomo, twamone bibyo binakukasya kubogelabogela kusoma nu kwijigisya Biblia.
1. Kabamba kakizi twatunganana kusoma Biblia bindi binsania?
Muntu ukusoma Biblia aba “mulembe wa Yehowa” bindi binsania abe na mbogimbogi, nu binsania byekukita tabineida mponga. (Soma Nimbo 1:1-3.) Mu kulinga, ibikile tangi nkungu nkeke za kusoma Biblia busi na busi. Gaunaendelela kumenya byeingi mu Biblia, unu buwatunde kusoma Biblia.
2. Kikizi kinatukasya kumona mutali kwa kusoma Biblia?
Kwa kumona mutali nunse kwa kusoma Biblia, twatunganana kwemana nu kwesela (kukengela nunse) bibyo bitukusoma. Twatunganana kusoma nu ‘kukengela’ nunse ku kabamba ka musagu utukusoma (Yosua 1:8) Mu nkungu z’ukusoma, ibuzye zeno mbuzya: ‘Musagu wono wanigisya kikizi ku kabamba ka Yehowa? Buni buninakambya musagu wongo mu kalamo kane? Buni buninakambya mamano masanzo kwa kukasya bango?’
3. Unatunda kusoma Biblia mu nkungu nkizi?
Ndi buli bubibu kwobe kumona nkungu za kusoma Biblia? Bubo buli bubibu ku bantu beingi. Tondo londa b’unakambya busoga ‘nkungu . . . ziuli nazo.’ (Baefeso 5:16) Unakita bubo kwa kwibikila nkungu za kusoma Biblia busi na busi. Bantu bamozi bekwibikilaga nkungu za kusoma Biblia mu nindunindu, bango bekutundaga kusoma Biblia mu kyumuno kya mu musi. Nu bango bekusomaga Biblia mwigolo lwabusio lwa kuzombama. Nugwe unatunda kusoma Biblia mu nkungu nkizi?
TUMENYININE
Lola bikizi binakukasya kubogelabogela kusoma Biblia. Nu buni b’uneikungika busoga buno umone mutali nunse kutingila igisyo lyobe lya Biblia.
Anga bubo bunabasila muntu kutunda idia lyetelyaga na g’abutilwe, unu butunabasila kutunda kusoma Biblia
4. Ijigisye kutunda kusoma Biblia
Mu kulinga, bunaba bubibu kusoma Biblia. Tondo unabasila ‘kutunda . . . nunse’ kusoma Biblia, anga b’unabasila kutunda idia liutelyaga na gawabutilwe. Soma 1 Petro 2:2, nu kusila ibuzye luno lubuzya:
Ukukengela buno ndi wasoma Biblia busi na busi, unabasila kutunda kukita bubo, nu ndi kunakukasya kutunda kumenya byeingi?
Lola VIDEO kwa kumenya buni bwakitile bantu bamozi buno babogelebogele kusoma Biblia. Kusila ibuzye zeno mbuzya zalemba.
Mu zeno video, babo basikila nu bakinga bakindile mankunku makizi?
Kikizi kyabakasizye kubogelabogela nunse busomi bwabo bwa Biblia?
Buni bubakitile kwa kubogelabogela nunse busomi bwabo bwa Biblia?
Makengelo menakukasya:
Sombola bwisuzi bwa bulili bwa Biblia nu buteli na mutendezi mubibu. Soma Biblia Tafsiri ya Ulimwengu Mupya ndi buseli mu mutendezi wobe.
Kitangi, soma musagu wa Biblia u ukutundaga nunse. Kwa kumona misagu zimozi, lola lusamba “Linga Kusoma Biblia.”
Sanza mu ibuku lyobe bibyo biukusoma. Kambya lusamba “Busomi Bwane bwa Biblia” luli kuzinda kwa kino kitabu.
Kambya aplikasio JW Library®. Kutingila zeno aplikasio, unasoma Biblia aba kungwilila odio za busomi bwa Biblia kunsania ku unenda, kwa kukambya telefone za androide aba kingo kintu kya kieletronike.
Kambya apandise za Biblia Tafsiri ya Ulimwengu Mupya. Kwa kulola karte zili mo, bwisulilwa bwa bitondo, u byakukasye kutunda kusoma Biblia.
5. Ikungike ku kabamba k’igisyo lyobe lya Biblia
Soma Nimbo 119:34, nu kusila ibuzye luno lubuzya:
Kabamba kakizi buli busoga kusega Kalaga lwabusio lwa kusoma Biblia nu lwabusio lwa kwikungika ku kabamba k’igisyo lya Biblia?
Buni b’unamona mutali nunse ku n’igisyo? Gawabe use wikungika ku n’isomo lya kino kitabu, lemba tangi zeno nzila:
Soma bibombo bitangi by’isomo.
Londa masanzo nu umasome, nu lengemania masanzo mongo na musagu ukutendelwa.
Bika idangi ku bitondo binene bili mu bibombo kwa kwakula ku na lubuzya; bubo bwakukasye kwezezya gamozi na mwigisya wobe makengelo meli mu isomo.
Ndi wamenyile?
Balongeki ba Yehowa bekukambyaga bwisuzi bwatingana-tingana bwa Biblia. Tondo, tukubogelabogela nunse kukambya Tafsiri ya Ulimwengu Mupya kubuno buli bwisuzi bwa bulili, buteli na mutendezi mubibu nu bukukambya izina lya Kalaga.—Lola Musagu wa ku Enternete “Ndi Balongeki ba Yehowa Bekubezaga na Zabo Biblia?”
NDI MUNTU AKUSOLELA BUNEE: “Kwijigisya Biblia uli mulimo mubibu. Nsili na nkungu nu magala makukita bubo.”
Ukukengela buni?
MAKENGELO MANENE
Buno umone mutali nunse kwa kusoma Biblia, ibikile nkungu za kusoma Biblia, sega lwabusio lwa kusoma buno umenyinine bibyo biukusoma, nu ikungike ku kabamba ka kwijigisya masomo mansania ma kino kitabu.
Mbuzya za kwikengelesya
Kikizi kyakukasye kumona mutali nunse kwa kusoma Biblia?
Unatunda kusoma nu kwijigisya Biblia mu nkungu nkizi?
Kabamba kakizi buli busoga kwikungika lwabusio lwa kwijigisya Biblia?
LONDA LINGO
Makengelo menakukasya kumona mutali nunse ku busomi bwobe bwa Biblia.
“Buni B’unamona Mutali Nunse kwa Kusoma Biblia” (Munara wa Mulinzi, Na. 1 2017)
Lola nzila isatu zinakukasya kusoma Biblia.
“Buni Bunankasya Biblia?—Kibe 1: Menya Busoga Biblia Byobe” (Musagu wa ku Enternete)
Buni b’unabogelabogela kusoma Biblia?
Ijigisye nzila za kusoma Biblia kutingila bantu bekusomaga Biblia kutukila bindi byeingi.