ISOMO 44
Ndi Bisagulo Binsania Bitabizibwa na Kalaga?
Yehowa ekutunda tubogelebogele kalamo nu tube na nkungu za kwibogyabogya. Tondo ndi ekwitabizya bisagulo binsania? Buni butunalosya buno twatunda Yehowa mu nkungu za bisagulo?
1. Kabamba kakizi bisagulo byeingi tabikwitabizibwa na Yehowa?
Unangama kumenya buno bisagulo byeingi byengukana na meigisya ma Biblia nu bili na bulingilo bwa kipakani. Bisagulo bibyo bili na mungwano na meigisya ma madini ma buza. Bili tondi na mungwano na basumbu aba makengelo ma buno kuli kintu kikusigalaga mu kalamo ndi muntu akua. Bisagulo bimozi bikukita bantu bakatizie bumba butatunganana aba bunene. (Isaya 65:11) Ukinsa Yehowa akakizia bakumbamizi bage bunee: “Tukazi munkatini mwabo . . . tamwitubye ku kinsania kili nsese.”—2 Bakorinto 6:17.a
2. Buni buli makengelo ma Yehowa ku kabamba ka bisagulo bikuganuna banakantu?
Yehowa atutonda buno tatukatwe n’itega lya “kulemanina muntu.” (Soma Yeremia 17:5.) Bisagulo bimozi bikuganuna bakota aba basola. Bingo bisagulo bikuganuna nsi aba kindi kya endepandanse. (1 Yoana 5:21) Bingo bisagulo bikubezaga bya kuganuna bintu bya politike aba kuganuna bantu ba lukita kishembe. Yehowa enajungwa buni ndi twaganuna muntu aba iketelo, nunse ndi wozo muntu aba iketelo lilyo lili na makengelo mengukana na mpango zage?
3. Misako mikizi zinakita bisagulo tabitabizibwe?
Biblia byazugila “kunua maku nunse, bisagulo byatinga myaga, kukindana mu kunua.” (1 Petro 4:3, NWT.) Ku bisagulo bimozi bantu bekulya nu kunua nunse nu kukita misako neingi za nsese. Kwa kwendelela kusigala beida ba Yehowa, twatunganana kwibembukya na zezo misako insania za nsese.
TUMENYININE
Lola buni b’unabogyabogya Yehowa kwa kukata bulamuzi busoga ku kabamba ka bisagulo.
4. Ntukite bisagulo bitekuganuna Yehowa
Soma Baefeso 5:10, nu kusila ibuzye zeno mbuzya:
Watunganana kukengela kikizi lwabusio lwa kwitabizya ndi wakite kisagulo aba ntwakite?
Bisagulo bikizi bikukitaga nunse bantu kuko k’ukulama?
Ku makengelo mobe, ndi bibyo bisagulo bikwitabizibwa na Yehowa?
Anga, ndi use wamenya makengelo ma Kalaga ku kabamba ka kisagulo kya busi bwa kubutwa? Mu Biblia tamuli musagu walosya buno mukambi umozi wa Yehowa akitile kisagulo kya kukengela busi bwage bwa kubutwa. Tondo, Biblia byatendela bisagulo bibili bya kukengela busi bwa kubutwa byakitilwe na bantu betakumbaminaga Yehowa. Soma Kulinga 40:20-22 nu Matayo 14:6-10. Kusila ibuzye zeno mbuzya:
Bibyo bisagulo bibili bya kukengela busi bwa kubutwa byabende na mbaselo nkizi zasusana?
Bulingilingi na misagu zili mu mamo masanzo, buni bukwijungwaga Yehowa ku kabamba ka kukita kisagulo kya kukengela busi bwa kubutwa?
Mango uneibuzya bunee: ‘Ndi lebelebe buli bubi ku Yehowa ndi nenda aba nakasya ku kisagulo kya kukengela busi bwa kubutwa aba kingo kisagulo kyengukana na meigisya ma Biblia?’ Soma Kutuka 32:1-8. Kusila, lola VIDEO nu ibuzye zeno mbuzya zalemba.
Kabamba kakizi buli busoga kumenya ndi kisagulo kishembe kikutananizya Yehowa?
Buni butunakita bubo?
Buni butunamenya buno kisagulo kishembe takikutananizya Kalaga
Ndi kisagulo kyongo kyengukana na meigisya ma Biblia? Kwa kumona ijakulo ku lulo lubuzya, menya tangi buni bwalingile kisagulo kyongo.
Ndi kisagulo kyongo kikuganuna banakantu, iketelo, aba nsi? Kya mutali nunse kweitu u kuganuna Yehowa nu twalemanina buno we winyene tugu u ukasila tunkunku tuli mu kisi.
Ndi kisagulo kyongo kili na bumba nu misako zengukana na kanuni za Biblia? Twatunganana kuba na makengelo masoga bindi binsania.
5. Kasya bango bakutye bukatizio bwobe
Bunaba bubibu kukinda makengelo ma bango ndi bekukusindika kukita kisagulo kitekutananizya Yehowa. Mu lukita lulo, losya nkiki nu menge gaukutendela bulamuzi bwobe. Kwa kumona musumo wa bubo b’unakita, lola VIDEO.
Soma Matayo 7:12, nu kusila ibuzye zeno mbuzya:
Bulingilingi na lilyo isanzo, ndi watunganana kusolela bantu ba kikanga kyobe beteli Balongeki buno tabatunganana kukita kisagulo kishembe?
Unakita kikizi kwa kukasya bantu ba kikanga kyobe bamenye buno wabatunda nu ukubamona kuba ba mutali aba buno ntukukita lingo bisagulo gamozi nabo?
6. Yehowa ekutunda tube na mbogimbogi
Yehowa ekutunda tube na nkungu nsoga za kwibogyabogya gamozi na kikanga nu beida beitu. Soma Musambazi 8:15, nu kusila ibuzye luno lubuzya:
Buni bwalosya lino isanzo buno Yehowa ekutunda tube na mbogimbogi?
Yehowa ekutunda bakambi bage bibogyebogye nu kutingya nkungu nsoga gamozi. Lola VIDEO zikulosya bubo bukukitwa ku misanganano zeitu za kisi kinsania.
Soma Bagalatia 6:10, nu kusila ibuzye zeno mbuzya:
Ndi twatunganana kukita kisagulo kikukitwa na bantu beingi kubuno kukita bubo kuli “busoga” kubo?
Kukasana kukizi kunakulisizya mbogimbogi gesamba—kusindikwa kukasana ku kabamba ka kisagulo nu kukasana kwa kwitundila?
Mambizi meingi Balongeki ba Yehowa bekulongekaga nkungu za kwibogyabogya gamozi na bana babo nu kubakasa nkaso zibatalemaninaga. Ndi uli na bana, nkaso nkizi ziunatunda nunse kubakasa?
NDI MUNTU AKUSOLELA BUNEE: “Kumenya buni bwalingile bisagulo takuli na mutali, kubuno bisagulo bikutukasa nkungu nsoga za kuba gamozi na bikanga nu bilemba byeitu.”
Unatenda buni?
MAKENGELO MANENE
Yehowa ekutunda tube na nkungu za kwibogyabogya gamozi na kikanga nu bilemba byeitu. Tondo ntekutunda tukite bisagulo bitekumutananizya.
Mbuzya za kwikengelesya
Mbuzya nkizi zituneibuzya kwa kumenya buno kisagulo kishembe takikutananizya Yehowa?
Buni butunakasya bikanga nu bilemba byeitu kumenya bulamuzi bweitu ku kabamba ka bisagulo?
Buni butwamenya buno Yehowa ekutunda tube na nkungu za kwibogyabogya?
LONDA LINGO
Lola bisagulo bitenakita Bakristo.
“Kabamba Kakizi Balongeki ba Yehowa Tabekukitaga Bisagulo Bimozi?” (Musagu wa ku Enternete)
Lola tubamba tunazi tukulosya kabamba kakizi twakatizia buno kisagulo kya kukengela busi bwa kubutwa takikutananizya Kalaga.
Lola buni bwakitile musikila umozi gabezaga ekwenegwa na banyage ku likolo kubuno ntakitaga kisagulo kya Noeli.
Ma milioni ma Bakristo basombola kutakita kisagulo kya Noeli. Bekwijungwa buni ku kabamba ka bulamuzi bwabo?
“Bamonile Kintu kya Mutali Nunse Kutinga Noeli” (Munara wa Mulinzi, 1 Mwezi wa12, 2012)