Bi 1

Yesu nyangʉe ndidhó saa na ngʉe ná kpa dhó kali djonga pʉlʉpʉlʉ dhonalo kpa nzɨ ngʉ bbʉbbʉlo ro ddi Yova djo ri. Loroji na, Yesu pongʉeri Wafarisayo kʉ wanafiki, kpa ngʉ le thó le gbo nari nja mana na bbo ledzá gø dhi ndrŭ ronga le ka le b’o nari djolu. (Mt. 15:1-11) Ngbà mai dini djó bbobbonga nanga kangʉeni ka ke ngʉ ddi ná lo dho ro, ke nzá bbangʉe bbʉbbʉlo ndi ddi nari tso ro ri. Yesu dhongʉeri nari kʉ dini nǎ mafundisho kʉ kali. Ke nzá pongʉeri krʉ kʉ ná dini nǎ mafundisho tso Yova adi uu ri. Fønga rɨngana, ke pongʉeri bí kʉ ná ndrŭ kʉ bbo chu nǎ, fø chu ndrŭ mba sadha dhi ngana, nga bí kʉ ná ndrŭ kʉ sese nǎ nga kʉ ná chu nǎ ndirigoti fø chu ndrŭ mba shinga dhi ngana. (Mt. 7:13, 14) Ke pongʉeri nja ndrŭ ka ndima njí ndima Mungu dho njínji nari bbai, ro ri kʉ nzɨ njínji Mungu dho ndima thí nǎ ro krʉ ná ndrŭ. Ke jangʉeri: “Anib’o ni ronga nidhi ngana si ná kali dhi nabi ró, nidhi ngana kpa si ná saa na, kpa ndima nji chembø bbai, ro atsiro kpa kʉ lʉ bbai. Ni si kpa nyi chu kpadhó njí ró.”​—Mt. 7:15-20. w21.05 9 §7-8

Hana bbá ke ngʉe Mulawi, ke ró dho ngʉe Elkana ndirigoti ke jingʉe le bbo. Ro Elkana bbá nja isɨle ró dho ngʉe Penina. Elkana jingʉe Hana bbo Penina djolu, nì mai ringʉe fø ro “Penina dzá ngʉe nzø, ro Hana dzá nga ngʉe nzø ro ri.” Føri dzá lo dho, Penina ngʉ adi Hana chø “bí ina ndiro le nanga kani d’e.” Hana nanga kangʉeni bbo! “Le ngʉ adi dzzdzz ndirigoti le nzɨ ngʉ adi nga ma nyo ddi ri.” Ro Biblia nzá pori Hana ngʉ riji ndi njí chelo Penina ró ri. Fø nga rɨngana le d’rangʉe ngbaribbai ma ndi ndi mbu nari Yova dho ndirigoti le chungʉeri Yova si ndi tsotso ko ko. (1 Sa. 1:2, 6, 7, 10) Hana dhó loroji nǎ ro ká ko ka ko ba ngbá somo? Njati ddikpa le di rine ndi gʉni gʉ ni na ró, ni ka ni vʉ ni ka ni njí ná lo. Nidho nzá ringani ni ddi ni nja ndrŭ na ri. Chelo goti ni ngʉe chelo na nari rɨngana, aneri ni njí ngoi ndrŭ na. (Ro. 12:17-21) Njati ke lé ndidhó lo thika nzá ma ró, ni iso ka ndi pɨni pɨ ndirigoti ni ka ni é hwè na. w21.07 17 §13-14

Yuda Iskariote ngʉe tamaa na nari dho, ke njingʉe che kʉ ná lo ndirigoti ke lengʉeni le Yesu ro. Ro anziro Yuda ngangʉe che kʉ ná ke ri. (Lu. 6:13, 16) Yesu lingʉe ndi thí li Yuda djo dhonalo ke ngʉ adi mbø dhi sanduku ronga ma b’o ddi. Ro luti Yuda ngangʉe fø mbø ndi d’u nari tso ngbà mai ndi rrngʉe Yesu ja ndrŭ dho ná lo bí ina tamaa djo ro. (Mk. 7:22, 23; Lu. 11:39) Yuda ngʉe na ná tamaa njangʉeni pʉlʉpʉlʉ Yesu dhe nari njí. Yesu ma, ndi unakpa ma na singʉe lʉ korøkorø dhi ke Simoni bba, fø kpa kana ngʉe Maria ma, le-ve Marta ma na. Kpa ngʉ nganyo ná saa na, Maria ddongʉe bblo ngʉ ngø ná ché Yesu djǒ djo ndirigoti ri le dzingʉe bí mbø na. Yuda ma, Yesu una nja kʉ ná kpa ma na nanga kangʉeni bbo fø lo dho. Yesu una nja kʉ ná kpa ngʉ riddi nari kʉ, fø mbø ka ndi ko é lod’radha dhi njí tsotso bbo. Ro Yuda nanga kangʉeni nja lo dho maddi. Ke “ngʉe bandi,” ndirigoti ke ngʉ riji ndi d’u mbø sanduku nǎ ro.​—Yoh. 12:2-6; Mt. 26:6-16; Lu. 22:3-6. w21.06 18 §12-13

Nja saa na ká ni adi ni mbu bbo djǒ ró lo kʉ nari bbai ndirigoti nzá ka ndi hwini ri na nari bbai? Njati rie nja saa na ni adi ni mbu fø ri ró ni ka ni famu Paulo ngbà. Ke thí nzɨ ngʉ adi njedha ba ddikpa kutaniko dzá lo dho dhé ri “ro krʉ kʉ ná kutaniko dhi lo dho.” (2 Ko. 11:23-28) Nidhó afya kʉ bblo nga nari ká adi rili ni vi nidhó hwè vi? Paulo ngʉ adi hwini “ndi ndí nǎ kpele na,” njaro ringʉe afya dhi lo ndirigoti ke ngʉ ri ji ri sini ni si ndi ró ro. (2 Ko. 12:7-10) Nzá ni kaka nari ma ká adi ni thi bʉ ddi? Paulo ma ngʉ adi ndi mbu føi nja saa na. Ke nzingʉe ndi “njedha dhi ke” dhonalo ke ngʉ adi hwini nza ndi kaka nari tso ró. (Ro. 7:21-24) Ni mai Paulo ngʉ bani njonjo ku ná pkapkalo na ro, ke ngʉ ra anzi dhe Yova dzá njí ndi nji nari nari na. Nde, addui ká bbʉngʉe kpakpanga ke dho? Nì mai ke thí ngʉ njedha ba nzá ndi kaka nari dho ro kedhó udha ngue kpakpa leødha dhi be djo. w21.04 22 §7-8

Kaka ná ke Adamu njingʉe chenga ná saa na, ke vingʉe ndima, ndidzá nzø ma na ndima ka ndima die choro nŭnŭ nari. Adamu zø nzá le ka le njie ke njie ná chenga djotsina ri. Ke njingʉe chenga ndana. Nde ke nǎ gø dhó lo ká ka ndi die ngbaribbai? Adamu na gø nzá njingʉe chenga ro ri. (Ro. 5:12, 14) Kpa dho ká le ka le dhoe zølo nzá ndiro le gø kpa Adamu ró ro kpa bangʉe ná dhe nǎ ro d’e? Kpa le ka le gøegø! Adamu njingʉe chenga nari goti, Yova dhongʉe ngbaribbai ma ndi si Adamu nǎ mamilioni kʉ ná gø ø chenga nǎ ro ndirigoti dhe nǎ ro nari. (Mwa. 3:15) Le ødha dhi be dzá lodho, ko kana nga ka ndie chøchø Yova na, nzá mai ko kaka ro. Le ødha dhi be chulu Diabolo dzá njí le si sasa. (1 Yo. 3:8) Ndirigoti le ødha dhi be si rili Yova pɨngʉe anziro dz’ djo ná lo njini nji. Dz’ lu si ngʉ paradiso. w21.04 14 §1; 19 §17

Bí kʉ ná kpetsi kpa ma, isɨ ndrŭ ma na njingʉe safari Yerusalemu na, kpa singʉe njonjo kʉ ná bbu nǎ ro ndirigoti kpa ngʉ njonjo kʉ ná luga ti. Ké dho le nanga ka ndi keni ná lo njingʉeni fø dyi. Wayaudi kana nja kpa tingʉe lo njonjo ndrŭ tsɨ dhó luga nǎ, fø lo kengʉe ndrŭ nanga bbo! Ro bbo pli kengʉe ndrŭ nanga ná lo kʉ, fø Wayaudi pongʉe ná lo ndirigoti mutume Petro pongʉe ndrŭ krʉ dho ná lo. Fø ndrŭ chungʉeri nari kʉ ndima ka ndima ba gødha njati ndima li ndima dhó udha Yesu djo dhé ró. Fø lo løngʉe bí kʉ ná ndrŭ thí ronga bbo. Ndirigoti fø ndrŭ dhungʉeri ɨ: “Kodho ká ringani ko njí addu?” Petro ngʉngʉe kpadhó logoti: “Anibbari ni kana nja le ddiro ba batiso.” (Mdo. 2:37, 38) Føri goti njingʉeni nari ngʉe ké dho le nanga ka ndi keni ná lo. Fø dyi 3 000 kʉ ná ndrŭ bangʉe batiso, ndirigoti kpa ngʉngʉe Yesu unakpa. Føri kʉ Yesu d’rangʉe ndi unakpa dho ndima nji ná njí tso ngangʉeni nanga. Fø njí ra anzi kpø njʉnga djo. w21.06 2 §1-2

Njaro ko di ná ngana rie kpakpa le ngá funzo tso ndrŭ na. Nja ndrŭ nzɨ adi ndima dyu li kodhó lo ro ri ndirigoti nja kpa adi ri gʉgʉ. Addui ká ka ndi kó ko tsotso ko churi nari kʉ fø di ná ndrŭ ka ndima le ndima dhó ngaddidha thika ngbà? Achuri nari kʉ, nzadha dhi i dz’ djó ndrŭ dhó maisha thika adi leni chʉ, føri dzá lo dho njaro anziro ngʉ kodhó lo gʉ ná ndrŭ ka ndima le ndima dhó nganjadha thika le ndirigoti kpa ka ndima jiri ndima chulo Mungu djo (Mt. 5:3) Anziro ngʉ kodhó vichapo gʉ ná kpa ka ndima jiri ngbà ndima ne Biblia nǎ longa luti. Ko churi nari kʉ Yova kʉ nyo tso njudha dhi Bboke. (Mt. 9:38) Ke adi riji ko zʉ ri zʉ ndirigoti ko ddo dda ri djo, ro ke ddiro dhé adi rili ri dhidhi. Ndirigoti kodho ringani ko nonga nari kʉ njati ko Biblia nǎ longaddi dho ná ndrŭ é nga ma njʉ ró, Yova adi krʉ ko nji ná kpakpanga ronga lele njati ndrŭ u kodhó lo u ma inga nzá ma ró! w21.07 6 §14

Yova bbʉ uwezo ndrŭ dho ndiro ndrŭ ba nzø ndirigoti ke bbʉ njí kpa dho ndiro kpa ddi longa nzø dho ndiro kpa ji ndi ndirigoti kpa njinjí ndi dho d’e. Ngbà mai Yova bbʉ bí kʉ ná uwezo malaiká dho, ro ke nzá bbʉ fø pendeleo ro kpa dho ri. Føri dho gø dhi ndrŭ dho ringani ndima nja fø pendeleo mana na bbo. Gø dhi ndrŭ dhó bbʉni ná njí kʉ “ndima ngu nzø ndirigoti ndima ddi Yova dzá longa kpa dho.” (Efe. 6:4; Kum. 6:5-7) Ndiro gø dhi ndrŭ ba ndima tsotso kodha d’e, Yova dzá tengenezo bí kʉ ná njí dhi no bbʉ kpa dho, føri kʉ vichapo ma, video ma, miziki ma ndirigoti nja ritsi ma na. Bbʉbbʉ dhe, kodhi ra nǎ Baba ma, Yesu ma na ji jadda nzø bbo. (Lu. 18:15-17) Njati gø dhi ndrŭ di ndima thí li Yova djo ndirigoti kpa di kpakpanga nji ndima b’o Yova bbʉ ndima dho ná kado ronga ró, føri adi hwè bbʉ bbo Yova dho. Fø rinji ná gø dhi ndrŭ ndima dhi nzø tsotso kó ndiro kpa ngʉ Yova dzá familia kana d’e! w21.08 5 §9

Nja kpa adi riddi nari kʉ udha na le kʉ nari na mana kʉ le u ddikpa ritsi rie nga ma ri kʉ bbʉbbʉ nari dho ná lo kʉ ri ró. Ro Biblia ripo nari bbai, føri nga kʉ bbʉbbʉ udha ri. Biblia rid’ra udha adi ndi dyʉ bbʉbbʉ kʉ ná lo djo. Føri dho rie nzá ma ko ka ko nja Yova ma, Yesu ma ndirigoti Pidhinga ma na ró, ko churi føri kʉ bbʉbbʉ kʉ ná lo. (Ebr. 11:3) Yova dzá Dimu ngʉngʉe ná ddikpa sayasi dhi ke pori i: “Yova dzá Dimu u ná lo dhó musingi kʉ nì. Ro kpa nzɨ adi sayasi dhi lo gʉ krʉ ri.” Ko ka ko dhuri ko tso, ‘Njati Ngano ná ke kʉ nì nari dho ná lo é nì ró, ká addudho nja ndrŭ nzɨ adi Ngano ná ke kʉ nì nari u ri?’ Bí kʉ ná ndrŭ nzɨ adi rine ndima ne lonanga bblo fø lo djo ndima ndima ro ri. Robert pori i, Yova dzá Dimu ndi kʉ kpadjo ro: “Darasa nǎ kpa nzɨ ngʉ adi loti nononi ná ritsi djo ri nari dho, ma ngʉ adi riddi fø lo kʉ kali. Ma nzá ungʉe fø lo ro ri kpø madhó cho dangʉe 20 djolu ná nga djo ndirigoti luti ma rangʉe ri chu Biblia nǎ ro Mungu no shi di ná ritsi krʉ.” w21.08 15 §4-5

Ko ka ko chu Yova dhó bblonga njati ko di Biblia zø ndirigoti ko di hwè lo-i d’ra nja ndrŭ dho ró. Ko ka ko famu Yova dhó bblonga njati ko di kedhó bblo lo “dzi mbu” ko ko ro ró. Loroji na, njaro ko riji ko njinjí krʉ saa ró Mungu dho, ndiro ko timiza fø muradi d’e kodho ringani ko ngʉ kodhó maisha tso dhʉdhʉ. Ko churi nari kʉ Yesu tsoni djo ná lo kʉ njati ko li Mungu dhó Pidhinga anziro ró, Yova si kodhó lo ji ná ritsi tso gba nì, ro njaro ko nganga nzá d’erie fø lo njini nari ro nja kodhó maisha nǎ ri. (Mt. 6:33) Ko kʉ udha na Yesu tsoni djo ná lo djo nari dho, ko adi riji ko ishi sese mbø na, ko adi kodhó njí dhi programu thɨ ndirigoti ko njí lod’radha dhi njí bblo. Njati ko di rinji fø ró, ko ka ko njari nari kʉ, Yova ngaddi kodhó lo djo nì. Ko nganga ka ko mbu Yova dzá bblonga “dzi mbu.” w21.08 26 §2

Ko ká adi fø di ná kpakpalo nja njʉ maddi? Ddio. Dini nǎ bí kʉ ná kpa nanga adi jini dhonalo kʉ, ndima dhó dini nǎ tsu nari kʉ mali dhi kpa ma, chuchuni ná kpa ma, dz’ djó nyodyu na kʉ ná kpa ma na. Kpa adi riji fø ndrŭ é ndima dhó dini nǎ rie nzɨ ma kpa Mungu dhó yadha dyø ri ró. Dini djó bbobbokpa adi Yova dzá Dimu nja nga na mana kʉ ri, nì mai kpadhó nyi e bblo ro. Paulo pongʉeri, Mungu vʉ “rr” kʉ dz’ dzá ndrŭ nyǒ njí ná ndrŭ. (1 Ko. 1:26-29) Nì mai ri kʉ føro, Yova adi ndidzá njí dhi ndrŭ krʉ nja mana na. Ko ká ka ko njí addu ndiro nzɨ ko shani dz’ dzá ngaddidha na ró? (Mt. 11:25, 26) Nzɨ di Mungu dzá ndrŭ nja dz’ dzá kpa adi kpa nja nari bbai. Achuri nari kʉ Yova adi njínji nyenyenga dhi ndrŭ na ndiro kpa njí ndi ji ná lo d’e. (Zb. 138:6) Ndirigoti addinga Mungu adi nji ná bbo kʉ ná njí djo, fø lo ke adi nji chulu ná kpa dz’ dzá ndrŭ adi nja nga dhó akili kʉ nari bbai inga nzá zønga nari bbai. w21.05 8 §1; 9 §5-6

Mutume Paulo ngʉ adi mbai po nja ndrŭ ndi tsotso kó nari dho. Ke ngʉe nyenyenga na ndirigoti ke ngʉ adi le-djoi ma, le-vei ma na ndi tsotso kó nari uu. (Flp. 2:19-22) Ngó ndrŭ, ni ka ni po mbai kutaniko nǎ jadda kpa dho njonjo kʉ ná chulu. Njati kpa jiri ndima kó ni tsotso traspor dhi lo na ma, soko nǎ lo na ma, inga kimwili nǎ lo na ma ró, anidi ritso uu. Anichu ri nari kʉ, Yova adi ndidzá jidha dho ni dho kpa ni tsotso kó nari chulu. Ni kana nga ka ndi ngʉ chøchø ni tsotso kó ná ndrŭ ma na. Aniko nidhó jadda kau tsotso ndima kana ngae chøchø Yova na ndirigoti anidho ni nanga jini nari jadda kpa nji kutaniko nǎ ná kpakpa njí dho. Ndirigoti aniba saa ndiro ni tilo maisha nǎ ni chu ná lo djo kpa ma na d’e. Njati ni di rinji fø ró, føri na ni ridho “ni po mbai” Yova dho kutaniko nǎ kʉ ná jadda kpa dhi lo dho.​—Kol. 3:15; Yoh. 6:44; 1 Te. 5:18. w21.09 11-12 §12-13

Yova jirie ko djoi ma, ko vei ma na. Ro ri nga e dhʉdhʉ ko ji kpa ndirigoti ko dhǒ jidha kpa dho ri. Nja saa na, føri ka ndi é kpakpa dhonalo kodhó desturi kʉ njonjo ndirigoti ko dhi njonjo kʉ ná hali nǎ. Ko krʉ adi nja ndrŭ thí dho ka ndi bbʉ njedha ná kosa nji. Ro ko krʉ ka ko nji kpakpanga ndiro ko dhǒ jidha kodhó kiroho nǎ familia dho d’e. Ká ngbaribbai? Føri ko ka ko njí njati ko di kodhi Baba dyø ndirigoti ko di jidha dhǒ ko djoi ma, ko vei ma na dho ró. (Efe. 5:1, 2; 1 Yo. 4:19) Zølo na kʉ ná le adi rine ndi kó ndrŭ tsotso ndirigoti ndi pi ndrŭ iso pi. Yesu ngʉ adi nji ndrŭ dho ná lo ngʉ ridho ke Yova dhó loroji dyø. (Yoh. 5:19) Ddikpa saa na Yesu njangʉe birobiro kʉ ná ndrŭ ro, ke “ndrŭ dhi ri zø njingʉe bbo dhonalo ndrŭ ngʉe tu ró kødha le tu ná chembø bbai, pli ndima nanga plini ro nga ndi ró rø ná ke kʉ ro.” (Mt. 9:36) Yesu nzá dhongʉe jidha dhé kpa dho ri, ro ke kongʉe kpa tsotso nja lo na maddi. Ke gøngʉe dhe ngʉ nji ná ndrŭ ndirigoti ke kongʉe “nza ngʉ nzani ná ndrŭ tsotso ndirigoti li ndima djó no ngʉ o ro.”​—Mt. 11:28-30; 14:14. w21.09 22 §10-11

Yova adi riji ndi dho zølo ko dho. Mutume Paulo ndingʉeri Mungu kʉ “bbo adi zølo” dhǒ ná ke. Iga mutume Paulo ripo nari kʉ, Mungu kʉ zølo dhi ke dhonalo ke bbʉ ra na le si shinga ba nari dhi ngab’odha ndidzá nzá kaka ná ché na le d’ri ná kpa dho. (Efe. 2:4-7) Ro Yova nzɨ adi zølo dhé dhǒ ndidzá ché na le d’ri ná kpa dho ri. Daudi ndingʉeri: “Yova kʉ bblo krʉ kʉ ná ndrŭ dho, kedzá zølo dada kedzá njí djolu.” (Zb. 145:9) Yova ji ndidzá ndrŭ ji nari dho, ke adi zølo dhǒ kpa dho rie ngbà ri ka ró. Yesu churi nari kʉ Yova adi riji ndi dhǒ zølo krʉ kʉ ná ndrŭ djolu. Dz’ djo Yesu si nari nji, ke ma njingʉe cho bí Yova ma na ra nǎ. (Mez. 8:30, 31) Bí kʉ ná lo kana Yesu ngʉ adi ndidzá Baba dhó zølo nja chenga nji ná ndrŭ laidjo. (Zb. 78:37-42) Yesu ngʉ adi loddi ná saa na, ke ngʉ adi loti ndidzá Baba dhó bblo kʉ ná sifa djo bí ina. w21.10 8-9 §4-5

Ddikpa saa na Yesu njingʉe sala ɨ: “Baba, aliri ni ró dho mani.” Yova ngʉngʉe fø sala goti ra nǎ ro bbobbo ndi chu na. Yesu dhó lod’radha dhi njí kana, ke bbʉngʉe madha ndidzá Baba ró dho dho. (Yoh. 17:26) Mungu ró dho dho le madha bbʉ ndirigoti le rid’ra nja ndrŭ dho ná føri bbʉbbʉ kʉ ná Wakristo adi nja bbo pendeleo. Karne ya kwanza na Y.G.G., Wakristo dhó kutaniko tso ngangʉeni nari goti, Yova “lingʉe ndi nyǒ ndrŭ tsɨ djo ndiro ndi vʉ ndrŭ ndi ró dho dho d’e.” (Mdo. 15:14) Fø Wakristo nanga ngʉ adi jini bbo Mungu ró dho na ndima njínji ndirigoti nja ndrŭ dho ndima ri d’ra nari dho. Mitume ma, Yesu unakpa ma na ngʉ adi njínji Yova ró dho na lod’radha dhi njí kana ma, Biblia ndima ngʉ ndi ná saa na ma. Føri chulu kpa dhongʉeri nari kʉ, ndima dhé rili Mungu ró dho chuni. (Mdo. 2:14, 21) Njʉ, Yova dzá ndrŭ ma adi rinji føi, kpa adi njínji Yova ró dho na. w21.10 20-21 §8-10

Yova dhó chi kʉ ná jidha adi ngatsove. Yova dhó chi kʉ jidha le ndi 26 ina Zaburi 136 nǎ. Fø sura nǎ, verse ya kwanza nǎ le pori: “Anipo mbai Yova dho, dhonalo ke kʉ bblo; kedzá chi kʉ ná jidha ngatsove theinga dho.” (Zb. 136:1) Verse 2 djó ro kpø verse 26 djo ripo “føri dho kedzá chi kʉ ná jidha ngatsove theinga dho.” I Zaburi dzá buku nǎ ko zøri nari bbai, ko nanga adi keni bbo Yova ndidzá nzá tso d’ø ná chi kʉ ná jidha dhǒ nari ko di nja ná saa na. “Føri dho kedzá chi kʉ ná jidha ngatsove theinga dho,” fø lo djolu le ngʉ bí ina nari ko li kpakpa ndiro ko churi nari kʉ, Yova dzá chi kʉ ná jidha thika ro nzá ka ndi leni kedzá njí dhi kpa djó ro ri. Yova nzá ka ndi bbá jidha ndi dhǒ ko dho nari tso ro ri, føri ko chu nari ko li kpakpa bbo! Fønga ringana, ke di jidha dhǒ ndidzá njí dhi kpa dho ró, ke nzá ka ndi bbá kpa ro ri, rie kpakpalo kana ma kpa kʉ ri ro. Ngbaribbai ma ko faida ba nari: Yova nzá ka ndi bbá ko ro ri ná føri ko chu nari adi hwè bbʉ ko dho, ndirigoti føri adi ko li kpakpa ndiro ko hwini kpakpalo tso ró, ndirigoti ko ra anzi Yova dho ko njínji nari na d’e.​—Zb. 31:7. w21.11 4 §9-10

Ni ká do adi nji nja saa na karrnga goti si ngaba ná lo dho? Føri kʉ kali dhi dini si sadha ba nari ma, Gogu dhi Magogu si lɨ ta nari ma, Harmagedoni dhi vita si ngaba nari ma na. Ni ká d’erie ri ro dhu ni tsó ɨ ngbà, ‘Ma dho ká ri si ka nì ma tøni chi fø lo si ngaba ná saa na?’ Njati rie fø lo djo ni adi ngaddi ri ró, Yesu pongʉe njʉnga dhi andiko nǎ ná lo ka ndi kó ni tsotso ko. Yesu pongʉeri ndi unakpa dho: “Nzɨ ni bbari ni thí nanga d’uni. Anidi udha na.” Kpakpa kʉ ná udha ka ndi kó ko tsotso nzɨ ko nji do gosi ná saa na si ngaba ná lo dho. Rie nì ko mbudha tso ve njʉ ri ró, føri ka ndi li kodhó udha kpakpa ndiro ko ve gosi ná saa na si njini ná lo tso d’e. Føri goti kodho ringani ko nja ngbá lo kana ma ko ka ko li kodhó udha kpakpa nari. Mbudha tso ko ve ná saa na, kodhó udha adi ngʉ kpakpa. Føri ka ndi kó ko tsotso ko ve gosi ná saa na sie ná mbudha tso. w21.11 20 §1-2

Mutume Paulo lingʉe Timoteo kpakpa ndiro ke njí lod’radha dhi njí bblo d’e. Føri tsu ndi nǎ nja kʉ ná Wakristo maddi. (2 Ti. 4:5) Ro nja saa na føri e kpakpa maddi. Loroji na, addinga gʉ kodhó lo gʉni ná ngana di ná le-djoi djo. Yova dzá Dimu adi bani bʉ ka ndi bʉ ndima thí ná lo na. Loroji na, nja kpa adi njínji bbo nja ndima gba ndima dhó familia nǎ ndrŭ dhó lo tso d’e. Nja kʉ ná ndrŭ adi riji ndima d’ralo bbo maddi, ro yenga ddo dzá mwisho adi si b’lo kpa njeni ro. Nja kʉ ná ndrŭ nzɨ adi lod’ra bbo ri dhonalo kpa ró kʉ nzɨ sini ná dhe, kpa ngʉ ngó ndirigoti nja kʉ ná ndrŭ nzá ka ndima vʉ ndima bbá ro ri. Nja kʉ ná ndrŭ adi riddi nari kʉ Yova nzá nja ndima mana na ri. Rie ngbadi ná kpakpalo na ma ko bani ri ró, Yova ka ndi bbʉ kpakpanga ko dho ndiro ko njínji ndi dho ngbà ka ná ngatsi d’e. w21.05 20 §1-3

Nja saa na, nja ndrŭ ka ndima cho ko ronga tso ndiro nzɨ ko bbʉ madha Mungu dho ke ji nari bbai ró. Fø kpa di rinji ná saa na, ko adi bani bbo na mana kʉ ná longavʉdha nji. Akonja bbo thonga ná ddikpa nzɨ thika leni ná yadha Mambo ya Walawi 19:19 nǎ, nari ripo: “Nidho nzá ringani ni njø aro dhó aina kʉ ná uzi tso le gba ddi nari na le dya ná ru ri.” Fø yadha ngʉ adi rili le nja Waizraeli ma kana njonjonga kpa kuso lu ngʉe ná nja ndrŭ tsɨ na. Ko nga kʉ fø yadha tsena ri nari dho, ri nga kʉ che ko njø njonjo aina dhi uzi na le thɨ ná ru ri, loroji na føri ka ndi é koto ma poliestere ma tso le gba ddi ná ri na le thɨ ná ru. Ro ko nzɨ adi riji ko é nzá u Biblia nǎ lo ndirigoti nzɨ njínji ri nǎ lo na ná ndrŭ bbai ri. Bbʉbbʉ dhé, ko jirie kodhó familia nǎ ndrŭ ji, ndirigoti ko adi jidha dho ko lai nja ndrŭ dho maddi. Ro, maisha nǎ ko nanga vʉ ná lo adi ko ká ngarr Yova dho nì ma nari ridho, njati rie njonjo ma ko ka ko njani nja ndrŭ ró ro ri ró. Føri na mana kʉ bbo dhonalo kʉ njati ko jiri ko é takatifu ró, kodho ringani ko tøni Mungu lai djo.​—2 Ko. 6:14-16; 1 Pe. 4:3, 4. w21.12 5 §14; 6 §16

Shinga dhi ngana le mba ná chu ka ndi bani ngbà. Yesu pongʉeri: “Njati ni di madzá lo kana ró, ni kʉ bbʉbbʉ ma unakpa, ndirigoti ni si bbʉbbʉlo chu ndirigoti bbʉbbʉlo si ni kloklo.” (Yoh. 8:31, 32) Ri kʉ bblo nzɨ ni dyø nja ndrŭ nji ná lo; fø nga rɨngana, anine bbʉbbʉlo. Anga Mungu dzá lo ni zø nari tso ndiro ni chu ke nzǐ ko tsó ná lo, ndirigoti ni rr Yesu ddi ná lo d’e. Ni churi nari kʉ Yova rinzi ko bbani bbá kali dhi dini nǎ mafundisho na ndirigoti nzɨ ko gba ko tso ro ddikpa maddi kali dhi dini ngatso ná bbobbo ddo na. Ndirigoti ni churi nari kʉ, njati ni di kpakpanga nji ndiro ni ø nidhó lo thika maisha nǎ, nja ni njí Yova nyǒ tho ná lo d’e ná føri nga ka ndi é sʉsʉ ri. (Mt. 10:34-36) Ri nga ka ndi é sʉsʉ ni dho ni le fø lo thika ri. Ro, nì mai ri e fø ro, ni lee nidhó lo thika ngodhé, dhonalo ni jie nidzá ra nǎ Baba ji. Ke nanga jingʉeni bbo nidzá lo dho!​—Mez. 27:11. w21.12 22 §3; 23 §5

Musa kʉ bblo kʉ ná loroji, dhonalo chelo ke nji nari goti le bbʉngʉe ke dho ná shauri ke rrngʉe rr. Ddikpa saa na, ke nanga kangʉeni ka ndirigoti ke nzá bbʉngʉe heshima Yova dho ri. Føri dzá lodho, Musa nzá tsungʉe koddo koni ná ngø na ri (Inchi ya Ahadi). (Hes. 20:1-13) Musa nzingʉeri Yova tso ke lé ndidhó nganjadha thika fø lo djo ná saa na, Yova d’rangʉeri ke dho: “Nzɨ tilo ki ma dho fø lo djo.” (Kum. 3:23-27) Musa nanga nzá kangʉeni ri. Føri rɨngana, ke vʉngʉeri ndi njinjí Yova dhó longavʉdha na ndirigoti Yova ungʉe ritso ke ddá chutso Waizraeli dho. (Kum. 4:1) Musa ungʉe shauri u nari dho ke kʉ bblo kʉ ná loroji ko dho. Musa ungʉe ndi dho Yova bbʉ ná shauri u nzá mai ke ka ndi tsue koddo koni ná ngø na ro. Ko ka ko ba faida, njati ko di Musa ma, chi tøngʉeni ná nja kpetsi kpa ma na dhó loroji dyø ró. (Mez. 4:11-13) Bí kʉ ná le-djoi ma, le-vei ma na njirieri fø i. w22.02 11 §9-10

Cho 32 na Y.G.G., bbo grɨ ngʉ o ná saa na Yesu dzá kau Lazaro dhe kongʉe ndirigoti ke dhengʉe dhe. (Yoh. 11:3, 14) Ke vei ngʉe aro, Marta ma, Maria ma na ndirigoti Yesu jingʉe fø familia bbo. Yesu si nari Marta rrngʉe ná saa na le rangʉe lele ndiro ndima nju ke na d’e. Addinga ngbaribbai ma le ngʉ ndi mbu i lo ndi po ná saa na ro nari djo: “Bboke njati ni e iga ró ma dhi djona ro nzá ka ndi dhee ri.” (Yoh. 11:21, 32, 33) Marta ma, Maria ma na thi ronga vongʉe bbo ndima dhi djona dhedhe nari dho, ná føri Yesu njangʉe nari lingʉeri ke dzz dzz. Njati ni vi ndidzá ji ni ji ná le ró Yova ni ká ni mbu ngbaribbai ma nari fami nì. Yesu kʉ ndidzá Baba “ró ji nganga.” (Ebr. 1:3) Yesu dzzngʉe nari na ke dhongʉe ngbaribbai ma ndidzá Baba adi ndi mbu nari. (Yoh. 14:9) Njati rie ji ni ji ná le dhedhe ri ró, ni ka ni uri nari kʉ Yova ma ndi mbu che ddi ni dzá lo dho. Ke jiri ndi gø ni thi ró kʉ ná kilonda gø.​—Zb. 34:18; 147:3. w22.01 15 §5-7

Njati ni di saa ba ni tilo Yova na, ni rr ke ndirigoti ni ddinga ke djo ró, ni si faida ba bbo. Ya kwanza, ni si longa vʉ bblo. Biblia ripo ko dho ɨ: “Nyodyu dhi ke na bbi ná ke si ngʉ nyodyu.” (Mez. 13:20) Ya pili, ni si ngʉ bblo pli kʉ ná mwalimu. Biblia nǎ lo ko ddi kodhó mwanafunzi dho ná saa na, kodhó bbo muradi e ko kó ke tsotso ndiro ke ma kana nga ngʉ chøchø Yova na d’e. Ko di loti bbo kodhi ra nǎ Baba na ndirigoti ko di lo jifunza ke djo ró, ko si ke ji bbo ndirigoti føri si rili ko ngʉ bblo kʉ ná walimu. Addinga Yesu dhó loroji djo. Ke tingʉe lo ndidzá Baba djo shauku na ndirigoti jidha na ná føri ko ngʉe kedhó wanafunzi tsotso nja kpa ma ji Yova ddi d’e. (Yoh. 17:25, 26) Ya tatu, nidhó udha si ngʉ kpakpa. Addinga njati ni di nganzi Yova tso ke ddá chutso ni dho, ke li ni kpakpa inga ke kó ni tsotso ná saa na ka ndi njini ná lo djo. Ni di nidhó sala goti ke ngʉ nari nja ró, nidhó udha ka ndi ngʉ ke djo kpakpa.​—1 Yo. 5:15. w22.01 30 §15-17

Yova jirie ko bbo ndirigoti ke jirie ko é hwè dhi maisha na nari dho, ke rid’ra ko dho ko ndro che kʉ ná ngaddidha ma, che kʉ ná nyi ma na. (Isa. 48:17, 18) Ke churi chu nari kʉ, chelo nji ndima dhó maisha nǎ ná fø ndrŭ ndima nzá ndima ro ndirigoti kpa ndima lai ndrŭ nzá. Fø ko rinji nari adi njedha bbʉ bbo Yova dho. Njaro kodhó bbakau inga kodhó familia nǎ ndrŭ ma na ka ndima be ko pá ko nga kodhó nyi thika ødha tso ná saa na. (1 Pe. 4:3, 4) Kpa ka ndima pori, ko ka ko njí ko ji ná lo ndirigoti ko nzá ka ko bbari nja ndrŭ di ko ka ko njí ná lo po ko dho ri. Ro nzɨ njínji Yova dhó kanuni na ná ndrŭ ro nga e ndima djo ri. Ro bbʉbbʉ dhé, kpa ribba Shetani pinyo djo ná dz’ ddá chutso ndima dho. (Ro. 12:1, 2) Ro ko krʉ ka ko vʉ nanga ná lo kʉ: Ko ká ka ko b’o ko dha drrdrr ri ronga ma, chenga ma, Shetani dhó dz’ ma na chutso ddá ndi dho ro inga ko bbari Yova lé kodhó nyi thika ko ngʉ bblo kʉ ná ndrŭ d’e nari.​—Isa. 64:8. w22.03 3 §6-7

Ko di ngaddi Mungu dzá lo djo ró, føri adi ko tsotso kó ko é bblo kʉ ná nganjadha na kodhó kpakpalo djo. Akonja ngbaribbai ma Biblia kongʉe ddikpa nza ngʉ nzani ná mujane tsotso nari. Ddikpa mzee lingʉe le kpakpa ndiro le zø Yobu dzá buku d’e. Fø kitabu zødha tso le ngangʉe ná saa na, le ngʉ rinja Yobu ngʉe na ná fø ngaddidha kʉ che. Ledhó ngaddidha nǎ le ngʉ ripo: “Yobu! Nzɨ li ni thí ni bani na ná kpakpalo djo dhé!” Ro le rangʉe ri utso d’i nari kʉ ndidhó ngaddidha e ddiddi Yobu dhó ngaddidha bbai. Føri kongʉe le tsotso ndiro ledhó nganjadha é bblo ndirigoti le ba kpakpanga ndiro ndi ve ndi bbá ke dhengʉe ná ritso d’e. Yova adi kpakpanga bbʉ ko dho, ko lai nja Wakristo chulu maddi. Mutume Paulo ndingʉeri nari kʉ ndi jingʉeri bbo ndima “li ndima kpakpa” kiroho nǎ le-djoi ma, le-vei ma na.​—Ro. 1:11, 12. w21.05 22 §10-11; 24 §12

Waizraeli dho le d’rangʉeri ɨ: “Cho ddi kana gbo ina, ni kana kpetsi kpa krʉ dho ringani ndima si nidhi Mungu Yova nji, ke vʉ ná ngana.” (Kum. 16:16) Ringangʉeni kpa bbá ndima dhó dza ma, ndima dhó nza ma na ddiro. Ro Yova tsongʉeni kpadho ɨ: “Ddikpa le ma nzɨ ddi si nidzá ngø ro tamani nidzá Mungu Yova nji ni dji ni rá ke nyǒ djó nga nja ná saa na ri.” (Kut. 34:24) Waizraeli ngʉe kpakpa kʉ ná udha na ndima dhi Mungu Yova djo nari dho, kpa ngʉ adi ra cho kana ngʉe ná fete dho ra. Ndirigoti kpa ngʉ adi faida ba bí ku ná chu na, loroji na kpa ngʉ adi lochu bbo Mungu dzá Yadha djo, kpa ngʉ adi ngaddi ke nji ndima dho ná bblo lo djo, ndirigoti kpa ngʉ adi hwè ba ndima nju ndima tso ddi ngana ndima bbai ji Yova ná ndrŭ na nari dho. Ko ma adi fø di ná ledha ba ddi njudha dhi ngana ko si ná saa na. Ndirigoti Yova nanga adi jini bbo njati ko tayarisha d’ʉ ndirigoti nì na mana kʉ ná komatere ró. w22.03 22 §9

Yova bbangʉeri Yesu nzani dhonalo føri ngʉ ke zoeza Bbò Kuhani ke si ngʉ nari dho. Yesu chungʉe ngbaribbai ma Mungu dho le ngarr nari ka ndi lieri le nzani nari ngbà. Ke nzangʉeni bbo ndirigoti ke nzingʉe ndi tsotsokodha “hø ndi hø ro ndirigoti ndi nyǒ dda na.” Bbʉbbʉ dhé, ke bangʉeni kpakpalo na nari dho, ke ka ndi famu “ko tsotsokodha” ko ne nari ngbà ndirigoti ke ka ndi kó ko tsotso ko “mbudha kana ko kʉ ná saa na.” Ko mbai po bbo Yova dho dhonalo ke bbʉ Bbò Kuhani ko dho “ngbà ka ndi ddinga kodhó uzaifu djo ná ke”! (Ebr. 2:17; 4:14-16; 5:7-10) Yova bbangʉeri Yesu nzani ndiro bbo nǎ mana kʉ ná ddikpa logoti ngʉ d’e: Ri ká ka ndi kaka ndrŭ tøni chi Mungu dho mbudha kana? Shetani pongʉeri føri ro nzá ka ndi njini ri! Ke adi ripo ndrŭ adi njínji Mungu dho dhonalo ke ritsi bbʉ ndrŭ dho ndirigoti ndrŭ nzá ka ndima njinjí ro Mungu dho ri. (Yob. 1:9-11; 2:4, 5) Yesu tøngʉeni chi ndirigoti ke dhongʉe nari kʉ Shetani kʉ kali ba. w21.04 16-17 §7-8

Batiso ndi ba nari njí, mwanafunzi dho ringani ndi njinjí Biblia nǎ ro ndi chu ná lo na. Kodhó mwanafunzi di njínji ndi chu ná lo na ró, ke kʉ ddiddi “nyodyu dhi ke bbai” Yesu tingʉe lo ndi djo ndidhó loroji nǎ ro, fø ke lingʉe ndidhó dza dherr kpakpa dju djo. (Mt. 7:24, 25; Lu. 6:47, 48) Ako nidhó mwanafunzi tsotso ndiro ndi ø ndidhó maisha nǎ nja kʉ ná lo thika d’e. (Mk. 10:17-22) Yesu chungʉeri nari kʉ mali dhi ke dho ri ka ndi é kpakpa ndi dzí ndidhó ritsi nanga. (Mk. 10:23) Ro Yesu pongʉeri fø mali dhi ke dho, ke ø ndidhó lo thika ø maisha nǎ. Ká addudho? Dhonalo Yesu jingʉe ke ji. Nja saa na, nzɨ ko adi kodhó mwanafunzi li kpakpa ndi njinjí ndi chu ná lo na ri dhonalo ko adi riddi ke nzá d’e ka maendeleo njidha dho ri. (Kol. 3:9, 10) Ro ni di loti nidhó mwanafunzi na ke ka ndi lé ndidhó lo thika nari djo ró, njaro ke ka ndi lé ndidhó lo thika le maddi. Fø ni rinji nari na, ni ridho ni ngaddi nì ke djo.​—Zb. 141:5; Mez. 27:17. w21.06 3 §3,5

Mutume Petro pori Yesu bbá bblo kʉ ná loroji ko dho ngatso ndi ngʉ ve nari na; ro Yesu dhó loroji ko ka ko dyø ná chu kʉ bí. (1 Pe. 2:18-25) Bbʉbbʉ dhé, Yesu dhó maisha nǎ krʉ ke pongʉe ná lo ma, krʉ ke njingʉe ná lo ma na kʉ dyø ko ka ko dyø ná loroji. Nzá mai ko kaka ro, ko ká ka ko dyø Yesu dhó loroji bbʉbbʉ? Bbʉbbʉ o. Anonga nari kʉ Petro nzá pori ko “dyø [Yesu] kowu kaka ná ngatsi ri, ro ko dyø ri chøchø ngana ro.” Njati ko di Yesu dhó loroji dyø ko thí nǎ ro krʉ nzá mai ko kaka ro ró, ko ka ko njinjí mutume Yohana po na i lo na: “Anibbi fø ke [Yesu] bbingʉe nari bbai.” (1 Yo. 2:6) Yesu kowu ko dyø nari ka ndi liri ko kana nga é chøchø Yova na. Fø ká ko ripo addudho? Ko ripo fø dhonalo kʉ Yesu bbangʉe bblo kʉ ná loroji Yova dho ndi ngarr nari na. (Yoh. 8:29) Føri dho Yesu kowu ko dyø nari ka ndi bbʉ hwè bbo Yova dho. Ndirigoti ko uri nari kʉ kodhi ra nǎ Baba ka ndi ndrini chøchø ni kpakpanga nji ndima ngʉ ndidzá kau ná ndrŭ ro.​—Yak. 4:8. w21.04 3 §4-6

Yova adi kodhó bblo kʉ ná sifa nja; ko ndrini ndi ro nari nja, ndirigoti ke ma adi ndrini ko ro ddi. Njati ko tøni ke dho chi ró, ke si ndrini ko ro theinga dho! (Yoh. 6:44) Njati ko uri Yova ji ko ji ró, ko ka ko njinjí ke dho bblo rie kpakpalo kana ma ró. Ko di riddi Yova nzɨ adi ngaddi ko djo ri ró, kodhó “kpakpanga tso ka ndi vʉni vʉ.” (Mez. 24:10) Njati ko thí bʉni bʉ ndirigoti ko uri nari kʉ Yova ji ko nzá ró, ko ro nzá ka ko si Shetani dhó lɨ djó ri. (Efe. 6:16) I ddo ró ko kana bí kʉ ná Wakristo dhó udha tso adi vʉni vʉ kiroho nǎ lo djo ndima nanga rɨnirɨ nari dho. Ko di riddi Yova ji ko nzá ró, ká ko ka ko njiri ngbǎ? Fø di ná lo akotu ko djǒ nǎ ro théi! Anziri Yova kó ni tsotso ndiro ni tu fø “che kʉ ná ngaddidha” ni djǒ nǎ ro ndirigoti ke bbʉ ‘Mungu dzá ngoi ni dho nja ri b’o ni thí ronga ndirigoti nidhó ngaddidha ronga d’e.’ (Zb. 139: 23; maelezo ya chini. Flp. 4:6, 7) Ndirigoti anonga nari kʉ, ni nga kʉ ddiro ri. w21.04 20 §1; 21 § 4-6

Ni ká ngʉngʉe Yova dzá Dimu ngbaribbai? Njaro ya kwanza ni rrngʉe “hwè dhi lo-i” nidzá gødhi ndrŭ dhó ro, ni lai njí dhi ke dhó ro inga ni lai darasa nǎ ke dhó ro inga nyumba kwa nyumba ndrŭ lod’ra nari chulu. (Mk. 13:10) Føri goti ddikpa ke njingʉe kpakpanga bbo ndiro ndi ddi Biblia nǎ longa ni dho d’e. Fø funzo chulu ni jingʉe Yova ndirigoti ni chungʉeri nari kʉ ke ma ji ni ddi. Yova lingʉeri ni chu bbʉbbʉlo ndirigoti ni ngʉ Yesu Kristo unake, føri dho ni kʉ choro nŭnŭ di ná shinga dhi ngab’odha na. (Yoh. 6:44) Bbʉbbʉ dhé, ni po mbai bbo Yova chongʉe ddikpa ke ronga ndi ddi bbʉbbʉlo ni dho ndirigoti ke bbangʉeri ni ngʉ ndidzá njí dhi ke nari dho. Ko chu bbʉbbʉlo nari dho, kodho ringani ko kó nja ndrŭ tsotso ndima gba ndima tso ko ma na ndiro ndima bbí shinga dhi chulu d’e. Ri ka ndi é dhʉdhʉ ko d’ralo ndrŭ dho. Ro ri ka ndi é kpakpa ko nga Biblia nǎ funzo tso ndrŭ na inga ko ddi Biblia na longa ndrŭ dho. w21.07 2 §1-2