Bi 2

Yova adi riji nari kʉ ndidzá njí dhi kpa krʉ é hwè na. Yova kʉ chøchø ko kuso ndirigoti ke chu che ko ko mbu ná saa ma, ke chu njedha na ko thí kʉ ná saa maddi. (Zb. 145:18, 19) Anja ngbaribbai ma, Yova lingʉe ndi thí Eliya ndi mbu nari djo ndirigoti ngbaribbai ma ke kongʉe ke tsotso nari. Chi ngʉe ná fø ke dingʉe Izraeli bbá kpakpa lo tso ngʉ o ná saa na. Waizraeli dhó saa na, nzá ungʉe Yova ná ndrŭ nzangʉe Mungu dzá ndrŭ bbo ndirigoti kpa ngʉ riji ndima hwí Eliya hwi. (1 Fa. 19:1, 2) Eliya ngʉ riddi nari kʉ ndi gʉ ma ddiro Mungu dzá nabi bbai, føri bbʉngʉe njedha bbo ke dho. (1 Fa. 19:10) Mungu kongʉe ke tsotso lele. Yova chongʉe malaika ke dhi ngana ndiro ke churi nari kʉ, ndi nga kʉ ddiro ri ndirigoti malaika pongʉeri nja kʉ ná Waizraeli ma kʉ ddi Mungu dho ndima njínji ro! (1 Fa. 19:5, 18) Yesu pongʉeri ndi unakpa dho kpa si kiroho nǎ familia ba. (Mk. 10:29, 30) Kodhi ra nǎ Baba Yova rid’ra ko dho, ndi si nì njínji ndi dho ná ndrŭ tsotso koko.​—Zb. 9:10. w21.06 8-9 §3-4

Njʉ bí kʉ ná ndrŭ adi kodhó lo gʉgʉ dhonalo ko adi kpadhó kali dhi mafundisho djonga nyá Biblia nǎ bbʉbbʉlo na. Dini djó bbobbonga adi riddi Mungu adi malipizi bbʉ chenga dhi ndrŭ dho kazz na ndi kpa bɨ nari na. Kali dhi mafundisho chulu kpa adi rine ndrŭ é ndima dhó bbonga tsena. Yova dzá njí dhi kpa adi riddi ndrŭ dho Mungu kʉ jidha dhi ke, ndirigoti kpa adi kali dhi mafundisho djonga nyanya. Dini djó bbobbonga adi riddi nari kʉ nafsi ro nzɨ adi dhe ri. Njati kpa ddi ná føri é bbʉbbʉ mafundisho ró, gadha ro nga ka ndi é ri. Ro ko adi ridho ndrŭ dho nari kʉ føri nga kʉ Biblia nǎ ná mafundisho ri. Nì mai dini nǎ bbobbokpa adi riddi ko bani na nari kʉ Mungu ji ná lo ro, ko adi riddi nari kʉ Yova bbʉ le le ro le longavʉ nari (uhuru wa kuchagua) ndrŭ dho ndiro ndrŭ vʉri ndima ká ka ndima njinjí Mungu dho ma nari d’e. Kali dhi dini nǎ bbobbokpa ká adi rinji ngbǎ ko di ridho kpa kʉ kali dhi walimu ná saa na? Bí ina føri adi kani ka kpa lu! Njati ko ji bbʉbbʉlo ró, ko ka ko u Mungu po ná lo. (Yoh. 8:45, 46) Njonjo Shetani ró ro, ko adi tøni chí bbʉbbʉlo kana. Ko nzɨ adi kodhó udha ro gʉ ri. (Yoh. 8:44) Mungu adi rinzi ndidzá ndrŭ “ndro che kʉ ná lo ndro” ndirigoti ndima “chini bblo kʉ ná lo na,” Yesu ngʉ adi rinji nari bbai.​—Ro. 12:9; Ebr. 1:9. w21.05 10 §10-11

Njati ko d’i ri utso ko kʉ nodha na inga tamaa na ró, ká ringani ko njí addu? Kodho ringani ko le kodhó lo thika le! Mutume Paulo pongʉeri “shi ro Diabolo lø” ná kpa ka ndima plani pla kedhó mutego nǎ ro. (2 Ti. 2:26) Achuri nari kʉ, Yova kʉ kpakpanga na bbo Shetani djolu. Njati ko u Yova ko tsotso kó nari u ró, ko ka ko plani pla Diabolo dhó mutego nǎ ro. Bbʉbbʉ dhé, ri kʉ bblo nzɨ ko bbari ko tsu nodha na inga tamaa na. Yova ka ndi kó ko tsotso ko ndiro ko pʉ fø che kʉ ná nyí ko ró ro d’e. Føri dho adi nganzi Yova tso krʉ ddo ró ndiro ni chu nidhó ngaddidha ndirigoti ni nji ná lo d’e. (Zb. 139:23, 24) Anji krʉ ni ka ni njí ná lo ndiro nzɨ nodha ma, tamaa ma na tsu ni na ró! Shetani kʉ ndrŭ adi pɨ ná ke, føri ke njirie cho bí b’lo, ro karr nga goti ke le si sʉsʉ ndirigoti ke le si sasa. (Ufu. 20:1-3, 10) Ko fø ddo b’o bbo ù na. Fø ddo ko b’o ná saa, kodho ringani ko njí kpakpanga ndiro nzɨ ko tsu Shetani dhó mutego na ró. Anji kpakpanga ndiro nzɨ ni tsu nodha na ndirigoti tamaa na ró. Aninji kpakpanga ni “tøni kprɨ Diabolo tso ró ndirigoti ke si nganyi da ni ró ro.” w21.06 19 §15-17

Yova adi hwè ba bbo njati ddikpa le chu bbʉbbʉlo ndirigoti le di rid’ra nja ndrŭ dho ró. (Mez. 23:15, 16) Yova nanga adi jini bbo ndidzá ndrŭ lod’ra ndirigoti longaddi bidii na nari dho! Loroji na, ngbà mai Coronavirus lønga dz’ djolu gble ro, 2020 nǎ le ddie Biblia nă longa 7 705 765 kʉ ná ndrŭ dho ndirigoti 241 994 kʉ ná ndrŭ bbʉe ndima batiso chulu Yova dho. Fø ø wanafunzi maddi si Biblia nǎ longaddi bí kʉ ná ndrŭ dho ndiro ndrŭ ngʉ Yesu unakpa d’e. (Lu. 6:40) Bbʉbbʉ dhé, nja ndrŭ dho ko Biblia nǎ longaddi ná saa na, ko adi hwè bbʉ Yova thí dho. Ndrŭ le nji wanafunzi ná føri kʉ kpakpa kʉ ná njí, ro Yova dhó ngatsotsokodha chulu ko ka ko ddi longa ndrŭ dho ndirigoti ko nji ndrŭ wanafunzi. Ko ká ka ko li muradi ro nzá ko nji ndiro ko nga funzo tso ndirigoti ko ddi Biblia nă longa ro ddikpa le dho d’e? Krʉ na ko njú ná ndrŭ tsó akodi rinzi ko nga funzo tso kpa na. Nzá ko ddiri ndrŭ ká ka ndima u funzo tso u inga nzá ma nari ro. w21.07 6-7 §14-16

Pi Daudi bbʉngʉe bbʉdha bbo ndirigoti ke bbʉngʉe ndidhó bbo na mana kʉ ná ritsi le chi na hekalu d’e. (1 Ny. 22:11-16) Njati le di dza chi Yova dzá tengenezo nǎ ro ko é kpakpanga na nga ró, ko ka ko kó fø njí tsotso kodhó bbʉdha chulu. Ko ka ko kó jadda kpa tsotso ndiro kpa ba faida ko chu ná lo nǎ ro d’e. Addinga fø lo kana mutume Paulo bbangʉe ná loroji djo. Ke pongʉeri Timoteo mba ndi goti misionere dhí njí kana ndirigoti Paulo ngʉ adi lod’radha ma, longaddidha ma na dhi ufundi d’ra ke dho hwè na. (Mdo. 16:1-3) Paulo ngʉ adi mazoezi bbʉ Timoteo dho nari kongʉe ke tsotso ke d’ra hwè dhi lo-i bblo d’e. (1 Ko. 4:17) Timoteo maddi ngʉ adi ndi chu ná lo d’ra nja ndrŭ dho. w21.09 12 §14-15

Apolo ma, mutume Paulo ma na dhó lo nǎ ro ká ko ka ko ba ngbá somo? Fø kpa chungʉe maandiko bblo. Kpa ngʉe bblo chu longaddidha ná walimu. Ndirigoti kpa kongʉe ndrŭ tsotso bbo ndima ngʉ wanafunzi d’e. Ro kpa nzɨ ngʉ ndima nja mbubai bbai ndima kana ri. (Mdo. 18:24) Ro Korintho nǎ ro Apolo ra nari goti Paulo pongʉeri ke ngʉngʉ. (1 Ko. 16:12) Apolo njingʉe njí bblo ndidhó uwezo na nja ndi d’ra hwè lo-i ndirigoti ndi li le-djoi kpakpa d’e. Ko ka ko u nari kʉ Apolo ngʉe nyenyenga dhi ke. Loroji na, Biblia nzá po ke nanga kangʉeni nari ro ri, Akila ma, Prisila ma na “tungʉe Mungu dzá lo nanga ri kʉ nari bbai nganga” ke dho ná saa na.” (Mdo. 18:24-28) Paulo chungʉe Apolo ngʉ nji ná bblo njí maddi. Ro Paulo nzɨ ngʉ riddi ndrŭ si ndi nja pá Apolo dzá lo dho ri. Ko di Korintho nǎ ndrŭ dho ke ndingʉe ná lo zø ná saa na, ko ka ko njari nari kʉ ke ngʉe nyenyenga na ndirigoti kiasi na.​—1 Ko. 3:4-6. w21.07 18-19 §15-17

Adamu ma, Eva ma na njingʉe nda Yova dho ndima rrnga nzá nari na, føri dho Yova nzá ungʉe kpa ndidzá familia kana ri. Nde kedzá nzø ká ngbá lo ka ndi bae? Yova ji ndrŭ bbo, føri dho ke liri ndidzá nì ngarr ndi dho ná nzø tso uni ndidzá familia kana. Føri ke njingʉe ndidzá sidjo Ngba ndi bbʉ ko ødha dho nari chulu. (Yoh. 3:16) Yesu ø ndrŭ nari dzá lodho, chi tøni ná 144000 kʉ ná kpa si ngʉ Mungu dzá nzø. (Ro. 8:15-17; Ufu. 14:1) Ndirigoti chi tøni ná mamilioni kʉ ná ndrŭ kʉ nì ndima ngarr Yova dho ro. Kpa rib’o ndima ka si ngʉ Yova dzá familia kana, b’lo mbudha ya mwisho da cho 1000 goti ro. (Zb. 25:14; Ro. 8:20, 21) Kpa adi ndima no ná ke Yova nzǐ, “Baba.” (Mt. 6:9) Ndirigoti ga si ga ná ndrŭ si lo chu ke ji ná lo djo. Ndirigoti nì ngarr ke dho ná ndrŭ krʉ si ngʉ kedzá familia kana. w21.08 5 §10-11

Mutume Paulo ngʉe lod’ra ná ke, ndirigoti ke njangʉe lod’radha dhi njí bbo na mana kʉ ri ndidhó maisha nǎ. Ke ngʉ adi lod’ra “bí ndrŭ kʉ ná ngalu ndirigoti nyumba kwa nyumba.” Krʉ kʉ ná lo kana, ke ngʉ adi rine ndi d’ralo ngodhé! Loroji na, ke ngʉ ndi lai kpa b’o Atene nǎ ná saa na, ke d’rangʉe hwè lo-i njonjo kʉ ná ndrŭ dho, ná føri bbʉngʉe bblo kʉ ná matokeo. (Mdo. 17:16, 17, 34) Føri djolu pli “prizo nǎ” Paulo ngʉe ná saa na, ke d’rangʉe lo ndi kuso ngʉe ná ndrŭ dho. (Flp. 1:13, 14; Mdo. 28:16-24) Paulo ngʉ adi njínji bblo ndidhó saa na. Bí ina ke ngʉ adi nja ndrŭ nzǐ ndima d’ra na lo d’e. Loroji na, kedhó misionere dzá njí ya kwanza dho ke vʉngʉe Yohana, Marko le ngʉ ndi nzǐ ro ndirigoti ya pili safari dho ke vʉngʉe Timoteo. (Mdo. 12:25; 16:1-4) Bbʉbbʉ dhé, Paulo ddingʉe ngbaribbai ma kpa ka ndima kpe kutaniko nǎ lo, kpa ka ndima é bblo kʉ ná wazee ndirigoti bblo kʉ ná walimu nari nga kpa dho.​—1 Ko. 4:17. w22.03 27 §5-6

Nja kpa nzɨ adi ndima dhó udha li Ngano ná ke djo ri dhonalo kpa adi ripo ndima ka ndima u nja ndima nja ná ritsi dhé. Ro nì mai ri kʉ fø ro, kpa adi nzɨ ndima nja ná ritsi ma u ddi, loroji na, dz’ djo adi ritsi drr ná kpakpanga (pésanteur). Biblia tilo djo ná udha dyʉ ndi nzá ko ka ko nja ná ritsi ró maddi. (Ebr. 11:1) Ri ka ndi dzi saa bbo ndirigoti kpakpanga ma bbo ddi ndiro le u Ngano ná ke kʉ nì nari dho ná lo d’e, ro bí kʉ ná ndrŭ nzɨ adi fø di ná kpakpanga ro nji ri. Njati ddikpa ke di rine ndi chulo nzá Ngano ná ke kʉ nì nari djo ró, ke nzá ka ndi u Mungu kʉ nì nari ro ri. B’lo sayasi dhi kpa ve lo chu Ngano ná ke kʉ nì nari dho ná lo djo nari goti, kpa kana bí kʉ ná ndrŭ ra ri utso d’i nari kʉ ngø Mungu no. Anziro nja kpa ka ndima gʉ Ngano ná ke kʉ nì nari gʉ dhonalo univesite nǎ nzá le ddingʉe fø lo kpa dho ri. Nì mai ri kʉ fø ro, kpa ve ra Yova chu ndirigoti kpa ve ra ke jiji. Ringani ko li kodhó udha kpakpa Mungu djo rie ngbaga ma ko dhi ri ró. w21.08 14 §1; 15-16 §6-7

Yesu tingʉe lo vivi ná ngba dhó loroji djo ndiro ndi dhǒ ngbaribbai ma Yova adi zølo dho nari d’e. Jadda ngba rangʉe ra ndima bbá ro ndirigoti “ke sangʉe ndidhó kʉ ná ritsi krʉ uasherati dhi maisha na.” (Lu. 15:13) Luti ke lengʉeni le, ke djøngʉe ndi djø ndirigoti ke ngʉngʉe ndi abba. Kedzá baba ká njingʉeri ngbǎ? Yesu pongʉeri: “Go ngba kʉ bbai djó ro, da nga nǎ ro, ngba dzá baba njangʉe ngba, ngba dzá ri zø njingʉe ke, ndirigoti ke d’angʉe ngba dhi ngana, ke mongʉe ke, ndirigoti ke mbʉngʉe ke drè ke ronga ndi zʉ ro.” Fø dza ba nzá pangʉe do ndidzá ngba djo ri. Fønga rɨngana, ke dhongʉe zølo ngba dho, ke njingʉe ngba zø nji ndirigoti ke kongʉe ngba hwè na familia na. Vivi ná ngba njingʉe bbo chenga, ro ngba dzá baba njingʉe ngba zø nji dhonalo ngba lengʉeni le. Fø historia nǎ zølo dhi baba kʉ Yova. Fø lo nǎ Yesu dhongʉeri nari kʉ Yova adi bbʉbbʉ leni ndima dhó chenga nǎ ro ná ndrŭ zø njinji.​—Lu. 15:17-24. w21.10 8 §4; 9 §6

I ddo ró bí kʉ ná dini djó bbobbonga adi kpakpanga nji ndiro ndima ru Mungu ró dho ru d’e. Kpa tungʉe fø dho tu ndima dhó Biblia nǎ ro, ndirigoti nja kpa nzá uri tso le njinjí fø dho na ndima dhó dini nǎ ri. Bbʉbbʉ dhé ri kʉ Yova dzá Dimu dhé adi heshima bbʉ Mungu ró dho dho ri. Ko adi riji Mungu ró dho chuni chu krʉ kʉ ná nja dini adi riji nari djolu! Føri dho ko adi kpakpanga nji ndiro ko nji ná lo gbani ko ró dho na d’e! (Isa. 43:10-12) Kodhó Biblia​—Takatifu Tafsiri ya Ulimwengu Mupya nanga le ndi milioni 240 djolu, fø Biblia nǎ le li Mungu ró dho nga ri kʉ nja Biblia nǎ ná nga lu. Ndirigoti kodhó Biblia nǎ lo djo tilo ná vichapo nǎ ko adi njínji fø dho na 1000 djolu da ná luga nǎ! w21.10 20-21 §9-10

Ko adi Yova má uhitaji na kʉ ná ko lai Wakristo tsotso ko kó ná saa na. Yova tsongʉeni ndi si nì bblo lo nji njedha dhi ndrŭ dho ná Waizraeli kobe bbʉbbʉ. (Kum. 15:10) Bbbbʉ dhé, ko di uhitaji na kʉ ná le-djoi ma, le-vei ma na tsotso kó ró, Yova adi rinja ndi dho ko bbʉ ná kado bbai. (Mez. 19:17) Loroji na, Filipi nǎ Wakristo chongʉe kado mutume Paulo dho prizo na ná saa na, ke nzingʉe føri “tho adi Mungu nyǒ tho ná utso uni ná bbʉdha.” (Flp. 4:18) Addinga ni kʉ nǎ ná kutaniko nǎ ndrŭ djo ndirigoti adhuri ni tsó, ma ka ma kó tsotso ná ndrŭ ro ká kʉ ddi?’ Yova nanga adi jini bbo ke di rinja ko kodhó saa ma, kodhó kpakpanga ma, ko kʉ na ná ufundi ma, kodhó kimwili nǎ ritsi ma na ko bbʉ uhitaji na kʉ ná ndrŭ dho na saa na. Ke adi føri nja ndi dho ko madha bbʉ ná nja chu. (Yak. 1:27) Ndiro ko bbʉ madha Mungu dho d’e, ringani ko ba saa ndirigoti ko njí kpakpanga. Ro fø lo njidha nga kʉ kpakpa ri. (1 Yo. 5:3) Ká addudho? Dhonalo føri ko nji ndiri na ko dhǒ jidha Yova ndirigoti ko djoi ma, ko vei ma na dho d’e. w22.03 24 §14-15

Njati ko di ngaddi ko djoi ma, ko vei ma na bani na ná kpakpalo djo ró, ri ka ndi kaka ko dhǒ zølo kpa dho. Loroji na, ddikpa le-ve dhó afya ka ndi é che. Le nzá ka ndi d’ra ndidhó lo nja ndrŭ dho ri, ro le nanga ka ndi jini bbo njati ddikpa le kó ndi tsotso ró. Ko ká ka ko kó le tsotso nzá nyo ridha na inga le bbá dza nǎ nga ʉdha na? Ddikpa le-djo ka ndi vi ndidhó njí vi. Ko ka ko bbʉ sese mbø ke dho nzá mai ko pori ko i bbʉ ri ro ndirigoti fø mbø ka ndi kó ke tsotso kpø ke ba d’i njí nanga djo. Zølo ko dhǒ nari njí, ko nzá ka ko b’ori ko djoi ma, ko vei ma na pori ndima dhó loji le tsotsokodha ri. Yova bbai ko ka ko neri ko kó kpa tsotso nzá kpa d’e ripo go ko dho ro! Yova adi rili dyi ká ko djo krʉ ddo ró nzá mai ko nziri ke tsó ro. Ko krʉ adi faida ba dyi nǎ ro njati nja ndrŭ po mbai ridho nzá ma ró. Kodhó loji ná ritsi Yova bbʉ ko dho nari na, ke ridho ndi ji ko ngbà. Ko ji Yova bbo dhonalo, ke kʉ bblo kʉ ná ke ndirigoti ke kʉ ritsi adi bbʉ ná ke! w21.09 22-23 §12-13

Mungu dzá chi kʉ ná jidha adi ke ronga cho ke nji ndrŭ zø. Njati Yova nja chenga nji ná ddikpa ke leni nari ndirigoti ke bba che kʉ ná nyi tso nari ná saa na, Yova dzá chi kʉ ná jidha adi Yova ronga cho, ndiro ndi nji fø ke zø d’e. Daudi pongʉeri ɨ ndi ndingʉe ná Zaburi nǎ Yova djo: “Ke nzɨ adi lod’i ko djo kodhó chenga dho ri ka nari bbai ri, inga ko nji ná kosa nganga tsi ri.” (Zb. 103:8-11) Daudi chungʉe ngbaribbai ma chenga le nji ná saa na, le thí adi njedha ba ndirigoti ledhó zamiri adi le nzá nari chu. Ndirigoti ke chungʉeri nari kʉ Yova kʉ “tayari le zø njidha dho.” Yova ronga ká addu adi cho ndiro ndi njí ndrŭ zø d’e? Fø logoti le ngʉ njʉnga dhi andiko nǎ. Bbʉbbʉ dhé, Daudi pongʉeri sala nǎ nari bbai, Yova adi ndrŭ zø nji dhonalo kʉ, ke adi ndidzá chi kʉ ná jidha dhǒ krʉ nganzi ndi tso ná ndrŭ dho. Chenga ko nji ná saa na, ri ka ndi é bblo ko thí ba njedha ko nji ná lo dho. Føri ka ndi cho ko ronga ko leni le ndirigoti nzɨ ko nji fø chenga ki. w21.11 5 §11-12

Yova jirie ndi ró dho ji ndirigoti ke adi riji ndrŭ krʉ bbʉ heshima ri dho. (Isa. 42:8) Ro Mungu ró dho djo ndrŭ nga chelo tidha tso nari goti cho da 6 000 b’lo. (Zb. 74:10, 18, 23) Fø lo tso ngangʉeni Diabolo (fø dho na mana kʉ “ndrŭ djotso gbá ná ke”) bbøngʉe Mungu nga Adamu ma dho Eva ma na ná saa na. Ke pongʉeri Mungu jʉ kpa tso kpa dhó lo ji ná ritsi ró. (Mwa. 3:1-5) Fø nga djó ro ndrŭ adi ripo Yova jʉ ndrŭ tso bblo kʉ ná ritsi ró. Yesu thí bangʉe njedha bbo dhonalo kedzá Baba ró dho dho nzá ndrŭ bbʉngʉe heshima ro ri. Yova kaka ndi nyó pi ra nǎ ndirigoti dz’ djo, ke kʉ bblo pinyo ná ke. (Ufu. 4:11) Ro Shetani shangʉe malaiká ma, ndrŭ ma na ndiro kpa ddiri nari kʉ Mungu nzá ka ndi nyo pi ri. Karrnga goti ndrŭ krʉ si ri chu nari kʉ, Mungu kʉ bblo kʉ ná bbonga na ra nǎ ndirigoti dz’ lu djo. Ndrŭ krʉ si ri chu nari kʉ, Yova dhó Pidhinga kʉ bblo ndirigoti ri si bbʉbbʉ kʉ ná ngoi ma bbʉ b’oddidha ma na i dz’ djo. w21.07 9 §5-6

Dza ba adi riji nari kʉ ndi ba nyo ma, ru ma, ndirigoti didha dhi nga ma ndi bbá familia dho. Ni ká adi bani mbø le kosa ná kpakpalo na? Njati rie fø ró, føri kʉ kpakpa kʉ bbo ni dho ná saa. Nì mai ri kʉ føro, føri kʉ kpakpa ni ka ni li nidhó udha ná saa. Anzinga Yova tsó ndirigoti azø Yesu pongʉe Matayo 6:25-34 nǎ ná lo ndirigoti addinga bbo fø lo djo. Yova adi ndi dho njínji bbo ná ndrŭ dhó lo tso gba i ddo ró maddi ná loroji djo addinga. (1 Ko. 15:58) Njati ni njiri fø ró, ri ka ndi li nidhó udha kpakpa ni churi nari kʉ, Yova si ni tsotso koko nja ndrŭ tsotso ndi kongʉe nari bbai, kpakpalo na kpa ngʉe ná saa na. Ke chu nidhó loji ná ritsi ngbà ndirigoti ke chu ngbaribbai ma ndi ka ndi gba nidhó lo tso nari maddi. Yova ni tsotso kó nari ni di nja ró, nidhó udha ka ndi ngʉ kpakpa ndirigoti føri ka ndi liri ni si gosi ná saa na ni si bani na ná mbudha tso veve. w21.11 20 §3; 21 §6

Bí kʉ ná Wakristo dhó udha ngʉngʉe kpakpa le ødha dhi be dhi mafundisho chulu. Mbudha kana ma kpa rangʉe anzi dhé lod’radha dhi njí na ndirigoti kpa vengʉe njonjo kʉ ná mbudha tso ndima dhó maisha na. Akonja mutume Yohana dhó loroji. Ke ngʉ adi bbʉbbʉlo d’ra Kristo djo ndirigoti le ø dhi be djo, føri ke njingʉe cho 60 djolu. B’lo kedhó cho da 90 djolu ro, Waroma bbá pikpa njangʉeri ke kʉ hatari ndima dho nari dho kpa lingʉe ke prizo nǎ Patmos na. Ke ká njingʉe ngbá che lo? “Ke ngʉ lo d’ra Mungu ma Yesu ma na djo.” (Ufu. 1:9) Yohana bba bblo kʉ ná loroji udha na ndingʉe ndirigoti ngatso ndi ngʉ ve nari na! Yohana ndingʉe ná buku nǎ ke ndi lo Yesu ndi jingʉe nari djo ndirigoti le ødha dhi be ndi njangʉe mana na bbo nari djo. Ke ndi ná lo nǎ, ke tilo le ødha dhi be djo 100 ina djolu ndirigoti ri bbʉ ná faida djo. (1 Yo. 2:2) Bbʉbbʉ dhé, Yohana njangʉe le ødha dhi be mana na bbo. w21.04 17 §9-10

Yova adi riji ndidzá ndrŭ dhori nari kʉ ndima nja tsutsu ná ndrŭ mana na ngbà. Loroji na, ke pongʉeri Waizraeli dho kpadho nzá ringani ndima wa nzɨ bɨ ngarr ná ke ri. Føri ngʉe d’idhé le njini ke na nari inga chelo le ti ke djo nari. Føri ngʉe che bbo kʉ ná lo le nji nzɨ bɨ ngarr ná ke ró ri! Ke nzá ka ndi rr e ndi djo le po ná lo ri, føri ka ndi lieri rie kpakpa ke ngʉ logoti. Godhé Mambo ya Walawi 19:14 nǎ Mungu pongʉeri ndidzá njí dhi kpa dho, nzɨ kpa “li cho ka ndi cho le ronga tso ná ritsi nzɨ nyǒ nganja ná ke nji.” Ddikpa buku pori i tsutsu ná ndrŭ djo: “Drrdrr Proche-Orient dhi bbagʉ, ndrŭ ngʉ adi nga kʉ chø ná lo njí kpa ró ndirigoti ndrŭ ngʉ adi vúvu kpa ró.” Njaro che kʉ ná ke ka ndi li ritsi nzɨ nyǒ nga nja ná ke nji ndiri na ndi vó ke ronga inga ndi jiri ndrŭ gbo ke gbo nari dho. Føri ngʉe che bbo kʉ ná lo! Yova bbʉngʉe ná yadha chulu, ke kongʉe ndidzá njí dhi kpa tsotso ndiro kpa dhǒ zølo tsutsu ná ndrŭ dho d’e. w21.12 8-9 §3-4

Yakobo do ngʉ nji dhonalo ke ngʉ riddi ndidhi djona li lo ndi thí nǎ ndi dho. Føri dho, ke ngʉ nganzi krʉ saa ró Yova tso fø lo djo. Føri goti ke bbʉngʉe bblo kʉ ná kado Esau dho. (Mwa. 32:9-15) Ya Mwisho, Yakobo ma njungʉe Esau na ná saa na, ke bbʉngʉe heshima ke dho. Ke nzá kongʉeni Esau ko tsena ddikpa, inga aro ina dhé ri, ro saba ina! Yakobo ngʉe nyenyenga na, ke dhongʉe heshima Esau dho ndirigoti ke njingʉe ngoi ndidhi djona na. (Mwa. 33:3, 4) Ko ba somo Yaboko njingʉe kpakpanga ndiro ndi nju ndidhi djona na ndirigoti ndi tilo ke na nari nǎ ro. Yakobo nzingʉeri nyenyenga na Yova kó ndi tsotso. B’lo ke nji sala nari goti ke njingʉeri ndi nzingʉeri nari bbai, ndirigoti ke rangʉe ngoi nji ndidhi djona na. Kpa njungʉe ná saa na, Yakobo nzá pongʉeri ie ká njingʉe kosa nari ro ri. Yakobo dhó kusudi ngʉe ndi nji ngoi ndidhi djona na. Ni ká ka ni dyø Yakobo dhó loroji ngbà?​—Mt. 5:23, 24. w21.12 25 §11-12

Ni di ngaddi Yesu dhengʉe ni djotsina nari sa nidzá chenga nari djo ró, ni ka ni ddiri ‘Ma djo nzá fø kado tso ka ndi koeri.’ Ni ká ka ni mbu ni fø addudho? Ko kaka nzá nari dho, ko thí adi bʉni bʉ, fø di ná ngaddidha adi rili ko di riddi nari kʉ ko na mana ro nga. (1 Yo. 3:19) Fø saa na ringani ko nonga nari kʉ “Mungu kʉ bbo pli ko thí djolu.” Kodhi ra nǎ Baba jirie ko ji ndirigoti ke adi ko zø njinji, fø ridho kodho nzá ringani ko é che kʉ ná ngaddidha na ri. Kodho ringani ko uri nari kʉ Yova ji ko ngbà. Fø ko uri ró, ko ka ko di kedzá lo zø krʉ ddo ró, ko ka ko di sala nji krʉ saa ro, ndirigoti ko ka ko di saa ba ko di ddinga kedzá ndrŭ ma na. Fø lo na mana ká kʉ bbo addudho? Ni si Yova dhó bblo kʉ ná sifa nja pʉlʉpʉlʉ. Ni si ri famu nari kʉ ke ji ni bbo. Mungu dzá lo djo ni ngaddi krʉ ddo ró nari ka ndi kó ni tsotso “ni thɨ” nidhó akili thika ndirigoti ni thí nǎ kʉ ná lo thika.​—2 Ti. 3:16. w21.04 23-24 §12-13

Ndiro kodhó udha ngʉ kpakpa d’e, ri nzá ngani ko é lochudha na dhé ri. Ringani ko ddinga bbo ko zø ná lo djo. Akonja Zaburi 77 ndingʉe ná ke dhó loroji. Ke nanga ngʉ d’o ná lo ngʉe, ke ngʉ riddi nari kʉ ndi ma, ndi lai waizraeli ma na tso ki ro nzá Yova ungʉe ri. Fø d’od’o ngʉ rili nzɨ ke ddo kuna. (Verse 2-8) Føro ká ke njingʉe ri ngbǎ? Ke pongʉeri Yova dho: “Ma si ngaddi nidzá njí krʉ djo ndirigoti ma si ngaddi ni nji ná bbobbo lo kpari djo.” (Verse 12) Bbʉbbʉ dhé, fø Zaburi ndingʉe ná ke chungʉe Yova njingʉe ndidzá ndrŭ dho anziro ná lo bblo pli. Ro ke ngʉ ridhu godhé: “Mungu ká vie bblonga ndi adi dhǒ ndrŭ dho nari nga vi inga kedhó thø ká liri ke bbá ndrŭ zø ndi adi nji nari tso bbá?” (Verse 9) Fø Zaburi ndingʉe ná ke ngʉ ngaddi Yova dhó njí djo, ke adi ndrŭ zø nji nari djo ndirigoti kedhó zølo djo. (Verse 11) Nde fø lo ká bbʉngʉe ngbá bblonga? Zaburi ndingʉe ná ke ve ngʉe ri uu nari kʉ, Yova nzá ka ndi bbá ndidzá ndrŭ ro ri. (Verse 15) w22.01 30-31 §17-18

Yova ká adi ndi mbu ngbaribbai checheni ná chi ngʉe ná ndrŭ djo? Ke kʉ ù na bbo ndi nja kpa ki vi! (Yob. 14:15) Addinga ngbabø ma Yova riji ndi nja ndidzá kau Abrahamu ki nari djo! (Yak. 2:23) Inga addinga ngbaribbai ma, Yova ka ndi jiri ndima tilo ki Musa na “njǎ ndima ndima nyǒdjonga nja ro nari djo” anziro kpa ngʉ adi loti ndima kana nari bbai! (Kut. 33:11) Ndirigoti ke kʉ ù na bbo, ndi rr Daudi ma, zaburi ndingʉe ná nja kpa ma, madha dhi dyi ndima ngo ro! (Zb. 104:33) Ngbà mai Mungu dzá fø kau cheni che ro, ke nzá d’e kpa nga ro vi ri. (Isa. 49:15) Ke kpadhó krʉ kʉ ná lo nga no nì. Ddikpa cha ke si kpa ngʉ shi vi, ke si kpadhó sala rr rr ndirigoti ke nanga si jini ji kpa madha bbʉ ndi dho nari dho. Njati rie vi ni vi ji ni ji ná le dhe chulu ri ró, fø lo ka ndi pɨ ni isopɨ. Adamu tsangʉe Edeni na ná saa na, Yova chungʉeri lo ka ndi sani sa ri thika si thɨni nari njí. Yova ndrorie che kʉ ná lo ma, nga kʉ chø ná lo ma, i dz’ djó ndrŭ nji ná fudjo ma na ndro. w21.07 10 §11; 12 §12

Njati ko di fø di ná jidha dho ró, ko ridho ko nja le ødha dhi be mana na ngbà. Ká addudho? Dhonalo Yesu nzá bbʉngʉe ndidzá shinga ko kpali dho ri, ro ko djoi ma, ko vei ma na dho maddi. Yesu ungʉe ritso ndi dhe kpa djotsina. Føri ridho ke nja kpa mana na bbo. (1 Yo. 3:16-18) Ko adi jidha dho ko djoi ma, ko vei ma na dho kpa dho ko nji ná lo chulu. (Efe. 4:29, 31–5:2) Loroji na, ko adi kpa tsotso kó dhe na kpa kʉ ná saa na ma, nzadha tso kpa ve ná saa na ma inga kpa bani chʉ ngaba ná lo na ná saa na ma. Nde kodho ká ringani ko njiri ngbǎ njati kutaniko nǎ ddikpa le-djo inga le-ve nji che lo ko ró ná saa na? Ni dho ká rie kpakpa ni nji ndrŭ zø? (Law. 19:18) Njati rie kpakpa ni dho ró, anjinji i shauri na: “Anive nitso ni kalu ndirigoti anidi ni zø njinji njati ni kana ddikpa ke e bbø dho ndi ka ndi bbø ndi lai ke djó ná lo na ma ró. Yova nji ni zø pá nari bbai, nidho maddi ringani ni njiri fø.” (Kol. 3:13) Ko adi ko djoi ma, ko vei ma na zø nji krʉ saa ro nari na, ko adi ridho kodhi ra nǎ Baba dho ko nja le ødha dhi be mana na ngbà. w21.04 18 §12-13

Ko ka ko njinjí bbo Yova dho ndirigoti ko ka ko kó bí kʉ ná ndrŭ tsotso ndima njí maendeleo kpø batiso djo d’e. Ro ko churi nari kʉ, krʉ ko nji ná lo ko nji Yova dzá le tsotsokodha chulu. Apolo ma, mutume Paulo ma na dhó lo nă ro ko ba ná nja somo kʉ, njati kodhó pendeleo é bbo kutaniko nǎ ró, kodho ringani ko njí kpakpanga ma bbo ddi ndiro kutaniko é ngoi na d’e. Ko nanga adi jini bbo njati daraka na kʉ kutaniko na ná kpa di ngoi nji ndirigoti kpa di rili ko tso gbani ddi ró. Kpa adi rinji fø Biblia nǎ ro si ná shauri ndima bbʉ ko dho nari chulu ndirigoti Yesu dhó loroji ndima dyø nari chulu madha ndima ka ndima né ndima dho nari rɨngana (1 Ko. 4:6, 7) Mungu bbʉ njonjo kʉ ná uwezo ko dho. Ko ka ko ddiri njaro ko nji ná lo na mana nga kʉ ri. Ro anonga nari kʉ, ru tso djo ka ndi liri tha nanga thani ná ru tso gbani ddi. Føri bbai ni nji ná lo ka ndi liri kutaniko nă ndrŭ tso gbani ddi. Ko krʉ dho ringani ko njí kpakpanga ndiro nzɨ ko di ko nja pli nja ndrŭ djolu ró. Akonji kpakpanga ndiro ko njí ngoi kutaniko nǎ ndirigoti ko tso gbani ddi d’e.​—Efe. 4:3. w21.07 19 §18-19

Ni ka ni uri nari kʉ nidzá ji ni ji ná ndrŭ si gaga. Yesu dzzngʉe ná føri lingʉeri kedzá njedha na ngʉe ná bbakau iso pɨni pɨ, ndirigoti føri ridho gadha ke nja mana na bbo! (Yoh. 11:35) Ni ka ni kó bʉ thí bʉni ná ndrŭ tsotso ko. Yesu nzá dzzngʉe dzz dhé Marta ma Maria ma na ri, ro ke rrngʉe ndrŭ dhó lo nari goti, ke pɨngʉe ndrŭ iso pɨ. (Yoh. 11:25-27) Ko ma ka ko njiri føi bʉ thi bʉni ná ndrŭ dho. Australie nǎ di ná ddikpa muzee Dan pori ɨ: “Ma bbá le dhengʉe ná saa na, madhó lo jingʉeri ndrŭ kó ma tsotso ko. Bí kʉ ná dza dhi ndrŭ ngʉ adi saa ba ndiro ko di ndima ma na dyina ma, kuna ma, nja ndima rr madhó lo d’e. Kpa ngʉ adi ribba ma d’ra ngbaribbai ma, má ma mbu nari ndima dho. Ndirigoti kpa nzɨ ngʉ adi ma dzz nari ro nja che ri. Kpa ngʉ adi ma tsotso kó nja njí na maddi. Loroji na, nja saa na kpa ngʉ adi madhó motokari ronga ma ʉ, kpa ngʉ adi ra ritsi ro ma dzi ma dho, ndirigoti kpa ngʉ adi nyo ma ri ma dho, ma di ma mbu nzá dho fø lo ka ndi njini nari bbai ná saa na. Kpa ngʉ adi sala nji bí ina ma na. Kpa ngʉ adi ndima dhǒ bbʉbbʉ kau bbai ndirigoti ‘kpakpalo dhi saa dho gøni’ ná le-djoi bbai.”​—Mez. 17:17. w22.01 16 §8-9

Yova ji bblo pli kʉ ná lo ko dho. (Mez. 4:20-22) Ke shauri bbʉ ko dho ndidzá lo chulu ma, Biblia ro dyʉ ndi ná vichapo chulu ma, inga dhidhi kiroho nǎ na ko lai Wakristo chulu ma. Føri na ke jidha dhǒ ko dho. (Ebr. 12:9, 10) Ali ni thí shauri djo, nga ngbaribbai ma le bbʉ ri nari djo ri. Nja saa na, ko ka ko ddiri shauri nzá le bbʉ ko dho bblo kʉ ná chulu ri. Bbʉbbʉ dhé, shauri bbʉ ná le dho ringani ndi bbʉ ri ngbà ri ka ndi rrni sʉsʉ ná chulu. (Gal. 6:1) Ro njati le bbʉ shauri ko dho ró, ringani ko ddinga ri nǎ ro ko ka ko ba ná somo djo nzá mai le bbʉ ri nga kʉ bblo ná chulu ro. Ko ka ko dhuri ko tso: ‘Nzá mai shauri bbʉni nǎ ná chu tho ma nyǒ ro, ri nǎ ro ma ka ma ba ná somo ro ká kʉ ddi? Ma ká ka ma li ma thí shauri djo ri bbʉ ná ke dhó chelo djo ma ma thí li nari rɨngana?’ Ri ka ndi é nyodyu dhi lo ko neri ko ba faida ko dho le bbʉ ná shauri nǎ ro. w22.02 12 §13-14

Yova churi chu nari kʉ ri ka ndi u saa ndirigoti kpakpanga ndiro ko pʉ che kʉ ná nyi ma, che kʉ ná ngaddidha ma na ko ró ro d’e. (Zb. 103:13, 14) Nì mai ri kʉ fø ro, Yova adi nyodyu ma, kpakpanga ma, ko tsotso ka ndi kó ko ø kodhó nyi thika ná lo ma na bbʉ kodho ndidzá lo ma, ndidzá roho takatifu ma, ndidhó tengenezo ma na chulu. Adi Biblia zø ndiro ni né ni nanga bblo d’e. Mungu dzá lo kʉ tazama bbai, ri ka ndi kó ni tsotso ni ne nidhó ngaddidha ma, ni nji ná lo ma, ndirigoti ni adi ti ná lo ma na nanga d’e. (Yak. 1:22-25) Ndirigoti Yova maddi kʉ krʉ ddo ró tayari ndi kó ni tsotso d’e. Ke chu ngbaribbai ma ndi ka ndi kó ni tsotso nari bblo ndirigoti ke chu ni thí nǎ kʉ ná lo maddi. (Mez. 14:10; 15:11) Føri dzá lo dho adi ra anzi krʉ ddo ró ni ke dzá lo zø ndirigoti ni nganzi ke tso nari na. Auri u nari kʉ, Yova dhó yadha krʉ e bblo. Yova nzǐ ko tso ná lo krʉ nǎ ro ko ka ko ba faida. Kedhó yadha na njínji ná kpa adi heshima bbʉ ndima dho, kpadhó maisha e ndi dhi kusudi na, ndirigoti kpa e bbʉbbʉ kʉ ná hwè na.​—Zb. 19:8-11. w22.03 4 §8-10

Ko adi Yova má ke le adi má nǎ ná dza ko chi ndirigoti ri ronga ko thɨ ná saa na. Biblia pori tabenakulo chidha dhi njí ma, ri nǎ ritsi le kpe nari ma na ngʉe “takatifu njí.” (Kut. 36:1, 4) Njʉ maddi, Yova adi Pidhinga dzá dza chidha dhi njí ma, Tengenezo nǎ nja njí ma na krʉ nja takatifu kʉ ná njí. Nja kʉ ná le-djoi ma, le-vei ma na adi ndima dhó saa bbʉ bbo fø njí njidha dho. Ko ká ka ko po mbai kpa ndima bbʉ fø njí njidha dho nari dho nzá? Bbʉbbʉ dhé, lod’radha dhi njí ma kpa adi nji ddi. Kpa kana nja kpa ka ndima jiri ndima é painia maddi. Kutaniko nǎ wazee ka ndima dhori ndima ngachidha dhi njí tsotso kó nì nari fø le-djoi ma, le-vei ma na tso ndima u kpa é painia ngbà kpa ka ndima njiri ná saa na nari chulu. Njati ko é dza chidha dhi ufundi na nì ma, inga nga ma ró, ko krʉ ka ko liri fø dza di tse ndi tse ro ndirigoti bblo hali nǎ. w22.03 22 §11-12