Bi 4

Ko chu ri nari kʉ Yesu dhongʉe bbo kʉ ná jidha dhonalo ke ungʉe ndi tso ndiro ndi dhe ko djotsina d’e. (Yoh. 15:13) Yova ma, Yesu ma na dhongʉe ko dho ná jidha kobe ro nzá ká ndi bbʉni ko dho ri. Ko ka ko po mbai krʉ ddo ro ko nji kodhó maisha nǎ ná lo chulu. (Kol. 3:15) Ché na le d’ri ná kpa adi le ødha dhi be nja mana na bbo, dhonalo føri liri kpa é bblo kʉ ná ngab’odha na. (Mt. 20:28) Yesu bbʉngʉe ndi nari djo kpa kʉ udha na nari dzá lo dho Yova nzi kpa chølo dhi kpa ndirigoti ndidzá nzø. (Ro. 5:1; 8:15-17, 23) Nja kʉ ná chembø ma adi le ødha dhi be nja mana na ddi. Kpa kʉ udha na Yesu bbʉ ndi nari djo nari dzá lo dho, kpa tøni Mungu njí, tse ndima tse ro ndirigoti kpa kʉ na ná ngab’odha kʉ ndima si dada “bbo kʉ ná mbudha lú.” (Ufu. 7:13-15) Ché na le d’ri ná kpa ma, nja kʉ ná chembø ma na adi ridho ndima mbai po le ødha dhi be dho krʉ cho ró ndima si Ukumbusho dhi ngana nari chulu. w22.01 23 §14-15

Ngbaribbai ma le ka le hwie Yesu nari nzá d’ongʉe ke nanga bbo ri. Ro ke le hwi djó ná lo i bbʉngʉe njedha ke thí dho. Ke ni ndrŭ pongʉeri nari kʉ, ke dhu Mungu ndirigoti ke nzɨ madha bbʉ Mungu ró dho dho ri. (Mt. 26:64-66) Ndrŭ pongʉeri Yesu nzɨ heshima ro bbʉ Mungu dho ri, føri dho Yesu thí bangʉe njedha bbo ndirigoti ke chungʉeri nari kʉ, ndidzá Baba nzá ka ndi bbari ndi dhe fø di ná lo dho ri. (Mt. 26:38, 39, 42) Yesu dho ringangʉeni le ti ndi tsu ba djo ndiro ndi klø Wayaudi wá (laana) nǎ ro d’e. (Gal. 3:10) Kpa wangʉeni wa dhonalo kpa ungʉeri tso ndima rrnga Mungu dzá yadha dho, ro kpa nzá rrngʉe nga ri. Ndirigoti kpa ngʉe Adamu nǎ gø nari dho kpa wangʉeni wa. (Ro. 5:12) Mungu bbʉngʉe Waizraeli dho ná yadha pongʉeri nari kʉ, njati ddikpa ke nji hwi djó le ka le hwi ndi ná chenga ró, ringangʉeni le hwi ke hwi. B’lo ke dhe nari goti ringangʉeni le ti ke tsu ba djo. (Kum. 21:22, 23; 27:26) Yesu le tingʉe tsuba djo nari dho, Wayaudi ka ndima tueni wa le wangʉe ndima nari nǎ ro nzá mai kpa ungʉe ke ro. w21.04 16 §5-6

Addinga Yesu bangʉe ná kpakpalo djo ndi dhe nari njí. Ke bbangʉe Roma nǎ bbasødda lø ndi ndirigoti kpa njingʉe ke nga na zø ro. (Mt. 26:52-54; Yoh. 18:3; 19:1) Kpa dhingʉe ke na ná fimbo vongʉe ke ronga bbo. Føri goti kpa lingʉeri ke d’ú ddikpa li o ná tsu. Yesu mbungʉeri ndi d’uri kpø ndi kpa ngʉ ra hwi ná nga na. Ro luti Roma nǎ bbasødda lingʉeri ddikpa ke kó ke tsotso. (Mt. 27:32) Yesu singʉe ndi le ngʉ ra hwi ná ngana ná saa na, bbasødda tingʉe ke kó ma, ke thó ma na tsu ba djo. Yesu nzangʉeni bbo tsu ba djó. Kedhó bbakau ma, kedzá mama ma na ngʉe zø na, ro bbayaudi djó bbobbokpa bengʉe ke pa. (Lu. 23:32-38; Yoh. 19:25) Yesu nzangʉeni bbo. Tsu ba djo ke ngʉe ná saa na ringʉe kpakpa ke ndí nǎ ju bbí bblo ndirigoti ke pʉ ndi hè. Yesu chungʉeri nari kʉ ndi ka ndi tøni chi mbudha kana, ndirigoti dhe ke dhe nari njí ke njingʉe sala ya mwisho Yova dho. Ke chu langʉeni nari goti ke dhengʉe dhe. (Mk. 15:37; Lu. 23:46; Yoh. 10:18; 19:30) Ke dhengʉe bbo ndi nzani ro ndirigoti do ka ndi pa le djo ná chulu! w21.04 16 §4

Yesu tingʉe lo ndi una chi ngʉe ná 11 kʉ ná mitume dho aro kʉ na koddo djo inga rrdha djo, føri ngʉe ø koddo ndirigoti Pidhinga dhi koddo (Lu. 22:19, 20, 28-30) Fø koddo klongʉe chu tso fø mitume dho ndirigoti sese dhó hesabu kʉ ná nja ndrŭ dho ndima ngʉ pikpa ndirigoti kuhani ra nǎ d’e. (Ufu. 5:10; 14:1) Ri kʉ aro (2) kʉ ná fø koddo le nji dho ná ché na le d’ri ná kpa kana ro ma go dz’ djó ná kpa dhé ka ndima nyo mukati ndirigoti ndima jø divai ukumbusho dhi ngana ri. Yova bbʉ bblo pli kʉ ná ngab’odha kpa dho, “kpa é nzɨ dhedhe ndirigoti nzɨ sani sa ná shinga na ra nǎ. Kpa si pinyo ddinga Yesu ma, 144 000 kʉ ná kpa kana go gʉ ma dz’ djó ná kpa ma na ndirigoti føri djolu pli, kpa si tøni Yova Mungu njí! (1 Ko. 15:51-53; 1 Yo. 3:2) Ché na le d’ri ná kpa churi chu nari kʉ ndima nzini ndiro ndima njí nja kʉ ná pendeleo hwè ra nǎ d’e. Ro, kpadho ringani ndima tøni chi kpø dhe djo. (2 Ti. 4:7, 8) w22.01 21 §4-5

Yesu ma le tingʉe tsu ba djo aro kʉ ná che kʉ ná kpa ma na. (Lu. 23:40, 41) Kpa kana ddikpa ke lengʉe ndi thika Yesu dhi ngana ndirigoti ke pongʉeri ke dho: “Ano ma nga, nidhó Pidhinga na ni sie ná saa na.” (Lu. 23:42) Yesu chungʉeri ndidzá Baba kʉ zølo dhi ke nari dho, ke pongʉe ná lo bbʉngʉe ngab’odha fø che kʉ ná ke dho. (Zb. 103:8) Yesu kʉ ndidzá Baba bbai nganga. (Ebr. 1:3) Ke adi ko zø njinji ndirigoti ke adi zølo dhǒ ko dho njati ko leni anziro ko njingʉe ná chelo nǎ ro ndirigoti ko é udha na Yesu djo ró. (1 Yo. 1:7) Njaro nja ndrŭ ka ndima ddiri nari kʉ, Yova nzá ka ndi njí anziro ndima njingʉe ná kosa zø ro ri. Njati rie føri bbai ko adi ko mbu ri ró akoddinga i lo djo: Yesu dhe nari njí, ke dhongʉe zølo ddikpa ke dho ngbà mai fø ke dhongʉe udha Yesu djo fø saa na ro. Nde rie fø ró, Yova ka ndi dhǒ zølo ndi dho adi madha bbʉ ná ndrŭ dho ngbà!​—Zb. 51:1; 1 Yo. 2:1, 2. w21.04 9 §5-6

Yesu dhe nari goti, Yova pongʉe ke njí ná lo njingʉeni krʉ. Yesu tøngʉeni chi kpø dhe djo nari na, ke njingʉe bbo na mana kʉ ná lo. Ya kwanza, ke dhongʉeri nari kʉ Shetani kʉ kali ba. Yesu dhongʉeri nari kʉ kaka ná ke ka ndi tøni chi nzadha kana Shetani njí addu ma ró. Ya pili, Yesu bbʉngʉe ndidhó shinga le ødha dhi be. Ke bbʉngʉe ndidzá shinga nari dho, nzá kaka ná ndrŭ kana nga ka ndi é chøchø Mungu na ndirigoti ndima ka si choro nŭnŭ di ná shinga ba. Ya tatu, Yesu dhongʉeri nari kʉ, Yova kʉ bblo kʉ ná Pi ndirigoti ke lingʉeri ndidzá Baba ró dho tsetse. Krʉ ddo ró ni nji ná lo na adi ridho nari kʉ ni kaka ni si di choro nŭnŭ. Føri dho krʉ ddo ró ko nji ná lo na akodhori nari kʉ ko kʉ chi tøni Yova dho ná ndrŭ! Ro njati kodhó lo uri ko dhedhe ma ró, ko ka ko pori nari kʉ, “Yova, ma kpakpanga nji ma tøni chi ni dho ndiro ma dhori nari kʉ Shetani kʉ kali ba, ma liri ni ró dho tsetse ndirigoti ma d’ra nidzá bbonga d’e!” w21.04 12 §13-14

B’lo le bbø Yesu nzá ke njingʉe ná kosa djotsina ndirigoti le d’ingʉe lo ke djo nzá ke nji ná lo djotsina nari goti, ndrŭ bengʉe ke pa, ndrŭ nzangʉe ke nza ndirigoti ndrŭ tingʉe ke tsu ba djo. Ke thó ma, ke kó ma nanga le tøngʉe misumari na. Hè ke dda nari ma, lo ke ti nari ma na ngʉe kpakpa bbo. Ro ringʉngani ke tilo ngo dhonalo ke ka ndi poe ná bbo na mana kʉ ná lo ro ngʉe thé. Yesu pongʉe ya mwisho ná lo nǎ ro ko ka ko ba bblo kʉ ná somo! Kodho le nonga nari kʉ, ko di nja ndrŭ zø njinji ndirigoti Yova ma si ko zø nji ddi. Kutaniko nǎ ko djoi ma, ko vei ma na kʉ bí ndirigoti kpa kʉ tayari ko tsotso kodha dho. Ro njati kodhó loji le tsotsokodha ró, kodho ringani ko d’rari kpa dho ndiro kpa kó ko tsotso d’e. Ko churi nari kʉ Yova ka ndi kó ko tsotso krʉ kʉ ná mbudha kana ndiro ko ve ritso d’e. Ndirigoti krʉ ddo ró ko tøni chi Yova dho kodhó maisha nǎ ná føri ko adi nja mana na bbo, dhonalo ko u nari kʉ Yova si ko gaga njati ko dhedhe ma ró. w21.04 8 §1; 13 §17-18

Yesu kowu ko dyø nari ka ndi kó ko tsotso ko si chó ro nŭnŭ di ná shinga ba. Mali dhi ddikpa jadda ke dhungʉe ndi ka ndi njí ná lo ndiro ndi ba cho ró nŭnŭ di ná shinga d’e, ro Yesu pongʉeri ɨ: “Asi ni rá ma ulu.” (Mt. 19:16-21) Nzá ungʉeri Yesu kʉ Masiya ná Wayaudi dho ke pongʉeri: “Madhó chembø adi ra . . . ma ulu. Má nŭnŭ di ná shinga bbʉ kpa dho.” (Yoh. 10:24-29) Ko adi ko kʉ udha na Yesu djo nari dhǒ, ke ddingʉe ná lo na ko njínji nari na ndirigoti ke ngʉ nji ná lo ko dyø nari na maddi. Ko di rinji fø ró, ko ka ko ba cho ró nŭnŭ di ná shinga dhi chu. (Mt. 7:14) Nja ko dyø Yesu kowu bblo d’e, ringani ko chú ke bblo. Yesu “le chú bblo” nari na mana kʉ le ra anzi lo le chu ke djo nari na. Ko ka ko chu Yesu bblo njati ko chulo bblo kedhó sifa djo ma, kedhó ngaddidha djo ma ndirigoti kedzá yadha ma na djo ró. Njati rie bí ma ko nji ddo bbʉbbʉlo kana ri ró, kodho ringani “ko rá anzi lo ko chu” Yova djo ndirigoti kedzá Ngba djo nari na. w21.04 4 §9-10

Njaro mtume Paulo ngʉ adi ngaddi nzá ndi d’engʉe ngʉ Mukristo ro ndi ngʉ adi nji ná lo djo maddi. Ke nzingʉe ndi “bbo” chenga dhi ke, føri djo nzá le nanga ro ka ndi rɨni ri! (1 Ti. 1:15) Bbʉbbʉlo Paulo rr nari njí ke nzangʉe Wakristo njonjo kʉ ná bbagʉ lú, ke lingʉe nja kpa prizo nǎ ma ndirigoti ke ungʉe ri tso le che nja Wakristo che. (Mdo. 26:10, 11) Njati Paulo njue hwi dzá gødhi ndrŭ ndi ungʉe le hwi ná jadda Mukristo na ró, føri ka ndi bbʉe njedha bbo ke dho. Nja saa na Paulo thí ngʉ adi njedha ba bbo ndi njingʉe ná kosa djotsina, ke chungʉeri nari kʉ ndi nzá ka ndi ø anziro ndi njingʉe ná lo thika ro ri. Ke ungʉeri nari kʉ, Kristo dhe ndidzá kosa djotsina, ndirigoti ke ndingʉeri: “Mungu dzá zølo djotsina ma kʉ kpadjo ddiddi ma kʉ nari bbai.” (1 Ko. 15:3, 10) Følo nǎ ro ká ko ba ngbá somo? Auri nari kʉ Kristo dhengʉe ni djotsina ná føri ka ndi liri ni kana kau é chøchø Yova na. (Mdo. 3:19) Bbo na mana kʉ Mungu dho nari kʉ njʉ ni nji ná lo ndirigoti gosi ná saa na ni si nji ná lo, ro ri nga kʉ anziro ni njingʉe na kosa ri.​—Isa. 1:18. w21.04 23 §11

Nzɨ mai Wayaudi kana bí kʉ ná kpa ngʉ riji Yesu dhedhe ro, anja Biblia pongʉe Masiya djo ná lo: “Ke bbʉngʉe ndi ndindiro dhe dho, ke ndrŭ zøngʉe chenga dhi ndrŭ kana, ke d’ungʉe bí kʉ ná ndrŭ dhi chenga ndirigoti ke bbʉngʉe ndi chenga dhi ndrŭ djotsina.” (Isa. 53:12) Yesu djo ndrŭ tingʉe chelo ndirigoti ndrŭ hwingʉe ke hwi, føri nga kʉ Wayaudi ka ndima gʉe ke djó ná lo ri. Føri dho ri é Yesu djo ndrŭ d’ie che kʉ ná lo ma inga kpa hwingʉe ke hwi ma ró, Wayaudi dho nzá ringangʉeni ndima gʉ ke gʉ ri. Njʉ maddi njati ko di rine ko chú lo dzá bbʉbbʉnga ró, føri ka ndi liri nzɨ ko thí bʉni. Ngøtsɨ djó Yesu ngʉ nji ná mahubiri nǎ, ke pongʉeri lo rr ná ndrŭ dho, ndrŭ ka ndima si “njonjo kʉ ná kali dhi loti” kpa djo. (Mt. 5:11) Fø kali dhi lo si Shetani dhó ro. Ke rili lo gʉ ná kpa ti kali dhi lo bbʉbbʉlo ji ná ndrŭ djo. (Ufu. 12:9, 10) Kodho nzá ringani ko u kali dhi loti ko djo ná kpa dhó lo ro ri. Ndirigoti nzɨ ko bbari fø lo ta do ko na inga ri bʉ kodhó udha bʉ. w21.05 11 §14; 12 §16

Ako nidhó mwanafunzi tsotso ndi li ndi thí Yova djo. Yesu d’rangʉeri ndi unakpa dho, Yova ka ndi kó kpa tsotso ko dhonalo Ke ji kpa ji. (Mt. 10:19, 20, 29-30) Aliri nidhó mwanafunzi churi nari kʉ, Yova ka ndi kó ke tsotso ngbà. Ni ka ni kó ke tsotso ke li ndi thí Yova djo sala ni nji ke na kedhó muradi djo nari chulu. Franciszek pori ɨ Pologne na ndi kʉ ro. “Madhó mwalimu ngʉ adi nganzi madhó muradi djo maddi sala ndi nji ná saa na. Ma njangʉeri Yova madhó mwalimu dhó sala goti ngʉ ná saa na, ma ma ngangʉe sala njidha tso ddi. Ma njangʉe Yova ma tsotso kó nari, njí dhi ngana ma ngʉ rusha kó asamble dho ndirigoti njudha dho ná saa na.” Yova adi ngaddi bbo kodhó wanafunzi djo. Ke nanga adi jini bbo ngbaribbai ma Wakristo adi kpakpanga nji nja ndima kó ndrŭ tsotso ndiro ndrŭ ngʉ ndidzá kau nari dho ndirigoti ke jirie kpa bbo fø lo dho. (Isa. 52:7) Njati rie nga ma funzo kʉ nidhó ri ró, ni ma ka ni kó Biblia nǎ lo jifunza ná wanafunzi tsotso ddi ndima tso si kpø batiso djo, nja kʉ ná wahubiri goti ni mba lod’radha dhi njí kana nari chulu. w21.06 7 §17-18

Ko ka ko dhori ko nja fø kado mana na njati ko di saa ba ko zø ri krʉ ddoro ró. Kodho ringani ko li programu ndiro ko zø Biblia ndirigoti ko ne ri nanga d’e, ro ri nzá ngani ko di ri zø chʉ dhé ri. Njati ko di Mungu dzá lonanga ne krʉ ddoro ró, kodhó udha ka ndi ngʉ kpakpa. Njonjo “nyodyu na ndirigoti akili na” kʉ ná kpa ró ro, ko adi kodhó udha li Mungu dzá lo djo. (Mt. 11:25, 26) Biblia ko zø ndirigoti ko ri nǎ longa ne nari liri ko famu addudho ma dz’ djó lo ra che ndirigoti ngbaribbai ma Mungu si ri tso dya nari. Føri dho akoliri kodhó udha e kpakpa ndirigoti akoko bí kʉ ná ndrŭ tsotso ndima é udha na Ngano ná ke djo. (1 Ti. 2:3, 4) Føri dho akob’o dz’ djó di shi ná ndrŭ krʉ si Ufunuo 4:11 nǎ i lo po ná saa: “Ni kaka, kodhi Mungu Yova, ni ba madha . . . dhonalo ni no krʉ kʉ ná ritsi.” w21.08 19 §18-20

Wazee kʉ ndrŭ ronga b’o ná kpa nari bbai, kpadhó njí kʉ ndima bbʉ shauri ri uri ná saa na. Kpa ka ndima bbʉ shauri ngbà na ndrŭ ka ndima njinjí ndirigoti ngbà ka ndi cho ndrŭ ronga cho nari bbai, ndirigoti “føri si hwè bbʉ ndrŭ thí dho.” (Mez. 27:9) Wazee jirie ndima djoi ma, ndima vei ma na ji. Nja saa na, kpa adi fø jidha dhǒ chenga na ji ndi tsu ná ke dho ndima shauri bbʉ nari chulu. (Gal. 6:1) Ro lo ndi ti ddikpa ke dho nari nji, muzee dho ringani ndi ddinga mutume Paulo pongʉe jidha djo ná lo djo. “Jidha e lotsovedha na ndirigoti zølo na. . . . Ri adi krʉ lo djó nga tso tsitsi, ri adi krʉ lo u, ri e ngab’odha na krʉ lo djo, ri adi krʉ lo tso ve.” (1 Ko. 13:4, 7) Fø maandiko djo muzee ngaddi nari ka ndi kó ke tsotso ndiro ndi chu ndi ká addu cho shauri bbʉdha dho nari d’e ndirigoti ndi bbʉ shauri adjo ndi dho bblo chulu d’e. Njati shauri le bbʉ dho ná ke mbu ndi li ró muzee li ndi dyu nari bbai ró, ri ka ndi é sʉsʉ ke u fø shauri. w22.02 14 §3; 15 §5

Yova nongʉe malaiká ma, ndrŭ ma na kaka ná kpa. Ro tsatsangʉe ná malaika Shetani (fø dho na mana kʉ “gʉ lo gʉ ná ke”) lingʉeri Adamu ma, Eva ma na tsatsa Yova ro. Nja malaiká ma, nja ndrŭ ma na tsangʉe tsa ddi Yova ro. (Yud. 6) Yova thí bangʉe njedha bbo. Yova ngatsove godhé ndirigoti ke ra anzi ngatsovedha na kpø ndi si tsatsangʉe ná kpa sa ná ngadjo. Føri si ledha bbʉ chi tøni ná kpa dho nì ndima ngatsove che kʉ ná i dz’ djó Yova bbai ro. Shetani bbøngʉe Yova dzá njí dhi ke Yobu, ndirigoti ke adi Yova dho njínji ná ndrŭ krʉ bbø ɨ ndi ripo ro, kpa njínji ke dho ke bbʉ kpadho ná ritsi dzá lo dho. (Yob. 1:8-11; 2:3-5) Diabolo ndrŭ bbø godhé kpø njʉnga djo. (Ufu. 12:10) Ko ka ko dhori Shetani kʉ kali ba nzadha tso kove nari chulu ndirigoti chi ko tøni Yova dho kodhi ji na nari chulu. w21.07 9 §7-8

Mutume Paulo bbʉngʉe ná loroji ngbaribbai ma ri kʉ bbo na mana kʉ ná lo, ko ø kodhó lo thika nari ngaddi ko dho. Ke ndingʉeri ringani ko ti ko “dha drrdrr ri” “tsu ba djo.” (Ro. 6:6) Føri na mana kʉ ko jiri ko dyø Kristo dhó loroji ró, ringani ko pʉ ko ró ro ndro Yova ndrorie ná nganjadha ma ndi dhi nyi ma na. Njati ko njiri fø ró dhé ko ka ko é tsetse ná zamiri na ndirigoti ko si cho ró nŭnŭ di ná shinga ba. (Yoh. 17:3; 1 Pe. 3:21) Yova nzá ka ndi ø ndidhó yadha thika ro nja ndi bbʉ hwè ko dho d’e ri. Føri rɨngana, ko dho ringani ko ø kodhó nyi thika ndiro ko tso uni ke na d’e. (Isa. 1:17, 18; 55:9) Bl’o ma ni ba batiso nari goti, ni dho ri si ngani ni rá anzi dhé che kʉ ná tamaa tso ró ni hwini nari na. Anzi Yova dhó le tsotsokodha, ndirigoti ali ni thí kedhó roho takatifu djo, nga nidhó kpakpanga djo ri. (Gal. 5:22; Flp. 4:6) Ringani ko njí kpakpanga bbo ndiro ko kló ko dha drrdrr ri ko ró ro d’e. w22.03 6 §15-17

Yova tsoni ko dho ndi si nyo ma, ru ma, dza ma na bbʉ njati ko li ndidhó Pidhinga ndirigoti ri nǎ chølo ma na anziro ró. (Mt. 6:33) Njati ko li ko thí Yova tsoni djo ná fø lo djo ró, ko nzá ka ko ddiri kimwili nǎ ritsi si ko ronga b’o inga ri si rili ko é hwè na ri. Ko churi nari kʉ bbʉbbʉ kʉ ná ngoi ko ka ko ba njati ko njí Yova ji ná lo dhé ró. (Flp. 4:6, 7) Ngbà mai ko ka ko dzi ritsi bí ro, kodho ringani ko ddinga, rie ngbà ma ko ka ko ba saa ri na njínjídha dho ndirigoti ri ronga b’odha dho nari djo. Kodho ká ringani ko li ko thí bbo ko dho kʉ ná ritsi djo? Anonga nari kʉ, Yova jiri ko é njínji ná kpa ndidhó familia kana. Føri na mana kʉ, kodho nzá ringani ko li kodhó ngaddidha bbo kodhó ritsi djo ri. Kodho nzá ringani ko é bbo dhó ritsi ngʉe ná ddikpa ke bbai ri. Ke jingʉe ndidhó ritsi bbo ndirigoti ke nzá ungʉeri ndi ra Yesu ulu ri. Føri dho ke vingʉe Yova dho ndi ka ndi njie njí nari, ndirigoti Mungu dzá ngba ndi ka ndi ngʉe nari!​—Mk. 10:17-22. w21.08 6 §17

Yova djo ni longa ne nari ka ndi kó ni tsotso ni chu kedhó sifa, ndirigoti nja sifa utso ni ka ni d’i nononi ná ritsi djo ni lo jifunza ná saa na. Ni di lo chu Yova dhó sifa djo ró, føri ka ndi liri ni uri Mungu kʉ nì kʉ ná ke. (Kut. 34:6, 7; Zb. 145:8, 9) Njati ni chu Yova bblo ró, nidhó udha ka ndi dhidhi ke djo, ni ka ni ji ke bbo ndirigoti ni kana kau ka ndi ngʉ kpakpa ke ma na. Adi ni u Mungu djo ná lo ro d’ra nja ndrŭ dho. Nde, ri ká ka ndi é ngbǎ njati lo ni d’ra dho ná ke nanga di rɨni rɨ Mungu kʉ nì nari djo ndirigoti ni chú ke dho ni ngʉ ná logoti nzá ró? Amburi ni ba fø logoti ka ndi ngʉ na andiko kodhó vichapo nǎ ro ndirigoti ni d’ra ri ke dho. Ni ka ni ne chuchu lo ná Yova dzá Dimu kó ni tsotso. Ndrŭ u Biblia ngʉ ná logoti u ma, inga nzá ma ró, ni ka ni ba faida ni nji ná utafiti nǎ ro. Nidhó udha ka ndi ngʉ kpakpa. w21.08 18 §14-15

Ri nzá ngani ko bbá krʉ ko jirie ná ritsi ndiro ko njí Yova nyǒ tho ná lo ri. (Muh. 5:19, 20) Nì mai ri kʉ føro, njati ko vʉri nzɨ ko njinjí bbo Yova dho ko ji nja ritsi bbo nari dho ró, ko ka ko é Yesu tingʉe lo djo ná ke bbai, dhonalo ke ngʉ njínji ndi ba ritsi bbo d’e, ro ke nzá ddingʉe nga ro Mungu djo ri. (Lu. 12:16-21) Ko di bani kpakpalo na ná saa na, ko adi sala nji ndirigoti ko adi ngaddi ko ka ko njí ná lo djo. (Mez. 3:21) Yova adi ko ronga le njonjo kʉ ná chulu. Ko ka ko dho ko nja Yova bbʉ ko dho ná ritsi mana na ngbà, ke ko má nari chulu. (Ebr. 13:15) Føri kʉ anzi ko ra lod’radha dhi njí na nari mai, nari ka ndi bbʉ ledha bbo. Krʉ ddo ró “ako mbu Yova mbu ndirigoti ko njari ke kʉ bblo.” (Zb. 34:8) Fø ko njiri ró, ko ka ko é Yesu bbai i ndi pongʉeri ro: “Madzá nyo kʉ ma njí ma cho ná ke ji ná lo ndirigoti ma dyá kedhó njí tso.”​—Yoh. 4:34. w21.08 30-31 §16-19

Shetani adi riji ko é nodha na. Ke churi nari kʉ njati ko é nodha na ró, ko ka ko ngʉ ndi bbai ndirigoti ko nzɨ si choro nŭnŭ di ná shinga ro ba ri. Føri dho, mutume Paulo jangʉeri “Nodha ka ndi tsu ndrŭ na ndirigoti fø ndrŭ djo lo ka ndi d’ini Diabolo djo le d’ingʉe lo nari bbai.” (1 Ti. 3:6, 7) Rie ø ma ko si kutaniko nǎ inga rie bicha ma ko njinjí Yova dho ri ró, ko ma ka ko bani fø di ná lo ddi. Nodha na kʉ ná ndrŭ jirie ndima bbo. Shetani adi riji ko di ngaddi kodhó lo djo bbo kpakpalo na ko bani ná saa na, Yova djo ko ka ko ddinga nanga rɨngana. Loroji na, ni djo ká ddikpa le sharie kali ro b’lo? Inga ni ró ká ddikpa le d’erie nga kʉ chø ná lo ro nji b’lo? Shetani adi riji ni nanga kani Yova djo inga ni djoi nja kpa djo. Fø di ná lo njini ró, Shetani adi riji ni njí ni ji ná lo Mungu ji ná lo ni ka ni njí nanga rɨngana.​—Muh. 7:16, 20. w21.06 15 §4-5

Nabi Hagai dho Yova bbʉngʉe bbo na mana kʉ ná njí. Hagai ngʉe Babiloni nǎ ro ngʉ Yerusalemu nǎ ná ndrŭ kana, cho 537 Y.G.N. Yerusalemu na kpa singʉe nari goti, chi ngʉ tøni Yova dho ná kpa ngangʉe hekalu ndima chi nari tso. (Ezr. 3:8, 10) Ro karrnga goti kpakpalo bangʉe nga. Kpa thí bangʉe njedha ndirigoti kpa bbangʉe njí njidha tso dhonalo kpa bangʉe upinzani bbo. (Ezr. 4:4; Hag. 1:1, 2) Ro cho 520 na Y.G.N., Yova pongʉeri Hagai cho kpa ronga ndiro kpa nga hekalu chidha tso ki d’e. (Ezr. 6:14, 15) Hagai d’rangʉe ná lo lingʉe Wayaudi dhó udha kpakpa Yova djo. Le ripo “bbasødda dhi Yova” nari na mana kʉ, ngbà djo le ka le li le thí ná ke. Yova adi chutso ddá ndidhó bbasødda dhi malaiká dho, føri dho njati Wayaudi jieri ndima dhó lo bbi bblo ró, kpa dho ri ngʉ ngani ndima li ndima thí Yova djo. w21.09 15 §4-5

I ddoro Yova dzá Dimu adi jidha dhǒ ndima kana dz’ djolu gble ndirigoti kpa e ddi ndima tso gbani ro. Ko kʉ njonjo nja kʉ ná dini krʉ ró ro dhonalo ko e ddikpa familia bbai, nì mai kodhó bbu (kabila) ma, kodhó ngø ma, kodhó desturi ma, na kʉ njonjo ro. Ko adi fø jidha nja pʉlʉpʉlʉ kodhó njudha dhi ngana ma, kodhó asamble dhi ngana ma, fø lo adi rili ko uri u nari kʉ ko madha bbʉ Yova dho ke jiri nari bbai. (Yoh. 13:34) Maandiko ripo ko dho “ko jini bbo ko kana.” (1 Pe. 4:8) Fø jidha ko adi dhǒ ná ddikpa chu kʉ ko zø ko nji ko kana nari, ndirigoti kodho nzá ringani ko di nja ndrŭ dhó uzaifu dhé nja ri. Ndirigoti ko adi riji ko é ritsi bbʉ ná ndrŭ kutaniko nǎ ndrŭ krʉ dho, ndirigoti ko di kpa kó bblo njati rie njedha bbʉ ko thí dho ná lo kpa nji ko ró ri ró. (Kol. 3:12-14) Njati ko di jidha dhǒ ró fø ri na ko ridho ko ku bbʉbbʉ Wakristo. w21.10 22 §13-14

Nde fø lo ká ka ndi kó nzá leni ndidhó chenga nǎ ro ná ke tsotso ndirigoti ndi le ndidhó lo thika bbʉbbʉ? Ri ka ndi kó ke tsotso ko. Mutengwa ngʉe ná bí kʉ ná le-djoi ma, le-vei ma na ra ri utso d’i nari kʉ, tenga le tenga ngʉe ndima ná føri kongʉe ndima tsotso ndiro ndima nja ndima njingʉe ná kosa dzá bbonga, ndima leni le, ndima lé ndima dhó nyi thika ndirigoti ndima ngʉ Yova ro d’e. (Ebr. 12:5, 6) Akonja ddikpa loroji. Miya ró rø ná ddikpa ke d’i ri utso nari kʉ ndidhó miya kana ddikpa chembø kʉ dhe na. Ke churi nari kʉ ndiro ndi tunza fø chembø d’e, ringani ndi tu ri tu njari kana ro. Chembø kʉ ddinga adi riji ndima di ná zǎ. Ri adi riji ndima di ndima lai chembø na ddinga, føri dho ri nzɨ adi ndima mbu bblo ri njati ri le tutu nja ri kana ro ró. Miya ró rø ná ke tu dhe dhi ri nja ri kana ro ró, føri na mana ká kʉ ke njini d’idhé ri na? Ri nga kʉ føri. Ke churi nari kʉ ndi bbá dhe dhi chembø nja ri kana ró, ri ka ndi liri dhe tá nja ri ro. Njati ke tu dhe dhi ri tu nja ri kana ro ró, føri ka ndi b’o nja ri krʉ ronga b’o. w21.10 10 §9-10

Dz’ djolu gble kʉ ná familia kana ko kʉ nari kʉ bbo kʉ ná pendeleo. Ko jiri bí kʉ ná ndrŭ si ndiro ko má Mungu d’e. Føri dho, ko nji ná lo dho nzá ringani ndrŭ mbu ndima che Yova djo inga kedzá ndrŭ djo ri. Krʉ ddo ró ko adi kpakpanga nji kodhó nyi é bblo ndiro nja ndrŭ chu Yova ndirigoti kpa njínji ke dho d’e. Nja saa na, nja ndrŭ ka ndima ti chelo ko djo inga ndima nzá ko nza dhonalo ko ngarr kodhi ra nǎ Baba dho. Ko ká ka ko njiri ngbǎ njati ko di do nji nja ndrŭ dho ko ko u ná lo d’ra nari dho ró? Ko ka ko li ko thí Yova ma djo ndidzá Ngba ma na ndiro kpa kó ko tsotso d’e. Yesu pongʉeri ndi unakpa dho nzɨ kpa nji do ngbaribbai ma ndima si loti nari dho. Ká addudho? Yesu pongʉeri, “Ni ka si ni ka ni ti ná lo ba fø saa na, føri nga sie ni ti ná lo ri, ro ri sie ni dhi Baba dzá roho takatifu chulu ni ti ná lo.”​—Mt. 10:19, 20. w21.09 24 §17-18

Musa tingʉe lo ngatso le nyi nari djo ndi ndingʉe ná lo nǎ. (Zb. 90:1, maelezo ya chini.) Musa dhe nari njí, ke tingʉe lo kpakpa ka ndi li le ná ddikpa lo djo. Ke ndingʉeri: “Drrdrr nga djó ro Yova kʉ ngatso le nyi ná nga, ke thó nŭnŭ di nari kʉ ni tse nǎ.” (Kum. 33:27) Le ripo “ke thó nŭnŭ di nari kʉ ni tse nǎ” ná føri ká ngbá lo ngaddi ko dho Yova djo? Njati ko uri Yova ka ndi b’o ko ronga b’o ró, ko ka ko mbu ko ngoi na. Ro nja saa na, ko thí ka ndi bʉni bʉ ndirigoti ko nzá ka ko mbu ko ngoi na ri. Fø saa na ká Yova adi rinji ngbǎ ko dho? (Zb 136:23) Ke si ndi thó li ko tse na, ke si ko da dzodzo, ndirigoti ke si kpakpanga bbʉ ko dho ndiro ko tøni ko kó djo d’e. (Zb. 28:9; 94:18) Ko churi nari kʉ kodho ringani ko li ko thí Yova djo dhé. Føri ka ndi kó ko tsotso aro kʉ ná chu nǎ. Ya kwanza, ko churi nari kʉ ko é ngbaga ma ró, Yova ko ronga b’ob’o dhé. Ya pili, kodhi ra nǎ jidha dhi Baba adi ngaddi nì ko djo. w21.11 6 §15-16

Yesu chungʉeri nari kʉ, nga kʉ chø ná lo njini nari si rili ndi unakpa dhó udha tsu mbudha na. Ndiro kpa ve fø lo tso d’e, ke bbʉngʉe Luka dzá buku nǎ kʉ ná loroji. Yesu tingʉe lo bblo ngʉ riji le ndó ndima kana lo nanga ná mujane djo. Fø mujane ngʉ ddoni ddo juji ró ke ndo ndima kana lo nanga bblo, nga mai juji ngʉe chø lo nji ná ke ro. Le chungʉeri nari kʉ fø ke ka ndi kó ndi tsotso ko njati ndi rá anzi dhé fø lo ndi nzǐ nari na ró. Føri dho juji ungʉe le ngʉ po ná lo u. Fø lo nǎ ro ká ko ba ngbá somo? Yova nga kʉ nzɨ chølo nji ná ke ri. Føri dho Yesu pongʉeri: “Bbʉbbʉ dhé, Mungu ká ka ndi liri chølo njini nzá ndidzá vʉ ndi vʉ ná ndrŭ dho, kuna ma, dyína ma ndima hø ndi ró ro?” (Lu. 18:1-8) Yesu pongʉeri ki: “Ndrŭ ddù si si ná saa na ká ke ka si fø di ná udha ro ba dz’ djó nia?” Njati ko di nzani nga kʉ chø ná lo njini ko ró nari dho ró, kodho ringani ko é ngatsovedha na ndirigoti nzɨ ko njeni ndiro kodhó udha ngʉ kpakpa fø mujane bbai d’e. Njati ko é fø di ná udha na ró, ko ka ko uri u nari kʉ Yova si ko tsotso ko ko rie kpadjo ma inga gosi ná saa na ma ró. w21.11 23 §12; 24 §14

Jadda kpa, nja saa na ká ni adi riddi nari kʉ Yova dzá yadha kʉ kpakpa bbo? Shetani adi riji ni ddiri fø. Ke ka ndi jiri ni di ni thí li pʉlʉ nanga kʉ ná chu lú bbí ná kpa nji ná lo djo, dhonalo ri ka ndi njani nari kʉ kpadhó maisha kʉ hwè na. Ke ka ndi jiri ni ddiri nari kʉ, ni ro nga kʉ hwè na maisha nǎ bbo ni lai darasa nǎ nzø bbai ri inga Eternete djó ni nja ná ndrŭ bbai ri. Shetani riji ni ddiri nari kʉ, Yova dzá yadha ni ronga tso cho maisha nǎ ni ka ni ba hwè bbo nari ró. Ro ano i lo nga: Shetani nzá jiri ndidhó chu lú bbí ná kpa nja ngbaga ma ri kpa mba nari ro ri. (Mt. 7:13, 14) Yova jiri ni chu ngbaribbai ma nidhó maisha sie nari, njati ni má shinga dhi ngana le mba ná chu na ngbà ró.​—Zb. 37:29; Isa. 35:5, 6; 65:21-23. w21.12 23 §6-7

Ko churi nari kʉ, ndrŭ zø le nji ná føri kʉ bblo kʉ ná lo. Ro nja saa na rie kpakpa ko njiri fø. Ri njani nari kʉ ddikpa saa na, mutume Petro ma ngʉ ndi mbu føi nari bbai. (Mt. 18:21, 22) Ko tsotso ká ngbá lo ka ndi kó? Ya kwanza, akodi ngaddi Yova adi ko zø nji nari djo. (Mt. 18:32, 33) Ko ro nzá karie zølo dho ri, ro Yova adi ko zø nji jidha na. (Zb. 103:8-10) “Rie fø ró kodho ringani ko di zølo dho ko kana.” Le zø le nji ná føri kʉ ngangani ko dho ná lo. Kodho ringani ko di ko djoi ma, ko vei ma na zø njinji. (1 Yo. 4:11) Ya pili, akoddinga njati rie ndrŭ zø ko nji ró ka ndi njini ná lo djo. Føri na ko ka ko kó ko ró nji chelo ná ke tsotso, ri ka ndi liri kutaniko tso gbani ddi, ko kana nga é chøchø Yova na ndirigoti ko ka ko rr ko bblo. (2 Ko. 2:7; Kol. 3:14) Ya mwisho, akodi sala nji zø kó ko tso ná ndrŭ dho. Nzɨ bbari Shetani sa ni kana kau ni djoi ma, ni vei ma na. (Efe. 4:26, 27) Kodho ringani Yova kó ko tsotso nja ko é ngoi na kutaniko nǎ d’e. w21.06 22 §11; 23 §14

Daudi ngʉ adi nganyí nyi dhonalo ddikpa ke ngʉ adi rine ndi hwi ke hwi. Sauli, Waizraeli bbá kpakpa kʉ ná pi ngʉ adi rine ndi hwi ke hwi. Daudi dhó lo jingʉe nyo ná saa na, ke tøngʉeni Nobi dhi bbagʉ ndiro ndi kó mukati 5 ndi nyó d’e. (1 Sa. 21:1, 3) Luti ke ma ndi unakpa ma na rungʉeni dju na. (1 Sa. 22:1) Daudi ká bangʉeni fø lo na addudho? Sauli ngʉ adi dda nji Daudi na dhonalo Daudi una ndrŭ ngʉe bi ndirigoti ke singʉe bí kʉ ná vita djó. Sauli chungʉeri nari kʉ, Yova vʉ Daudi ndi sie pi gosi ná saa na. (1 Sa. 23:16, 17) Go Sauli ngʉe Waizraeli bbá pi ro, ke una bbasødda ngʉe bí ndirigoti ke tsotso kó ná kpa ma ngʉe bí ddi, føri dho Daudi ngʉ adi nganyí nyi ndiro nzɨ ndi dhe ró. Mungu pɨngʉeri Daudi é pi ná føri tso ká ka ndi choeni cho Sauli dho? (Isa. 55:11) Biblia nzá tu fø lo nanga ro ri, ro ko ka ko u ddikpa ɨ lo i ngbà: Sauli ngʉ ndi li ndindiro kpakpalo na. Mungu tso ró lɨ nji ná ndrŭ dhó lo tso adi ra dyani che dhé! w22.01 2 §1-2

Yesu njingʉe lod’radha dhi njí kpakpanga na. Ke ngʉ adi ndi ji ndrŭ ji nari dhǒ krʉ saa ró ndi longaddi kpa dho nari chulu. (Lu. 19:47, 48) Nde addui ká ngʉ adi ke ronga cho ndi njiri fø? Ke ndrŭ dhi ri zø ngʉ nji nari dho. Nja saa na bí kʉ ná ndrŭ ngʉ riji ndima rr Yesu dhó lo, fø lo dho ke ma, ndi unakpa ma na “nzɨ ngʉ adi saa ro ba nja ndima nyo nga ma ddi ri.” (Mk. 3:20) Ddikpa cha ddikpa ke ngʉ rine ndi tilo Yesu na kuna ná saa na, Yesu ungʉeri u ndi tilo ke na. Yesu dhó lo rrngʉe ná bí kʉ ná ndrŭ nzá ngʉngʉe ke unakpa ri. Ro ke d’rangʉe lo dho ná bí kʉ ná ndrŭ bangʉe ushuuda i ngbà. I ddo ró maddi ko adi riji ko d’ra hwè dhi lo-i krʉ kʉ ná ndrŭ dho. (Mdo. 10:42) Ko di é lod’ra ko ji ná saa na dhé nari rɨngana, akodi kodhó programu thika le ndiro ko d’ralo ngbà ndrŭ ka ndima bani bbo abba ná saa na. Njati ko njiri fø ngbà ró, ko ka ko uri nari kʉ Yova nanga si jini ji. w22.01 17 §13-14

Njʉ bí kʉ ná ndrŭ adi rinja, ri kʉ kpakpa le lɨ le thí bbobbonga na kʉ ná kpa djo. Ndrŭ rinja nari kʉ, sheria nǎ ma, politiki nǎ ma, ndrŭ bblo lo nji mali dhi kpa ma, kpakpanga na kʉ ná kpa ma na lai djo dhé, ro njedha dhi ndrŭ dho nzɨ ndrŭ chølo ro nji ri. Føri kina, nja dini nǎ bbobbonga nji ná lo njedha bbʉ ndrŭ dho, føri rili nzɨ nja ndrŭ lɨ ndima thí Mungu djo. Føri dho, ddikpa ke u Biblia ndi jifunza ko na nari tso ró, ko adi kpakpanga nji ndiro ke li ndi thí Yova djo, ndirigoti ɨ dz’ djó ke chutso ddá ko dho chulu ná kpa djo. Bbʉbbʉ dhé, ri nga kʉ Biblia jifunza ná ndrŭ dho dhé ringani ndima li ndima thí Yova djo ndirigoti kedzá tengenezo djo ri. Ro ko kana bícha nji cho b’lo bbʉbbʉlo kana ná ndrŭ dho ma nzá ddi ringani ndima vi Yova adi lo nji ná chu kʉ krʉ ddo ró bblo pli nari nga ri. Nja saa na, ko bani na ná lo ka ndi liri Yova djó ko lirie ko thí ná føri tsu kpakpalo na. w22.02 2 §1-2