Bi 5

Nja ko chu Yova dzá Ngba bblo d’e, Yova li Biblia nǎ tho kʉ ná Enjili. Enjili tilo Yesu dhó maisha djo ndirigoti kedhó lod’radha dhi njí djo. Fø Enjili adi ke pongʉe ná lo d’ra, ri adi ke njingʉe ná lo po ko dho, ndirigoti ngbaribbai ma ke ngʉ adi ndi mbu nari. Fø Enjili ko tsotso kó ko dyø Yesu kowu chøchø ngana ro, fø Enjili nǎ ko ka ko ba Yesu bbangʉe ndi kowu nari. Føri dho ko di Enjili dhi buku zø ró, ko ka ko chu Yesu bblo pli. Føri ka ndi kó ko tsotso ko dyø ke kowu chøchø ngana ro. Nja ko ba faida Enjili nǎ ro d’e, kodho nzá ringani ko di ri zøzø dhé ri. Ringani ko di ri nǎ lonanga ne bbo ndirigoti ko di ngaddi ri djo. (Anja Yoshua 1:8, maelezo ya chini.) Anjinjí Enjili nǎ kʉ ná lo na nidhó maisha nǎ. Addinga ri nǎ kʉ ná lo djo ndirigoti ngbaribbai ma rinjingʉeni nari djo. Anji utafiti Yova dhó tengenezo bbʉ ko dho ná zødha dhi ritsi nǎ ro. w21.04 4-5 §11-13

Yesu gøni dz’ djo nari njí, Yova d’rangʉeri Masiya nanga ndrŭ ka ndima dzie mbøkpa 30 ró. (Zek. 11:12, 13) Ke nanga kedhó kau ka ndi dzie. (Zb. 41:9) Nabi Zekaria ndingʉeri: “Ahwi miya ró rø ná ke, ndirigoti abba chembø pli ndima nanga.” (Zek. 13:7) Njedha ndrŭ thí ka ndi bae nanga rɨngana, bblo thí kʉ ná ndrŭ dhó udha ka ndi ngʉe kpakpa fø unabi njini Yesu chulu nari ndima nja nari dho. Ko ká adi fø di ná kpakpalo nja njʉ maddi? Ddio. I ddo ró maddi Yova dho ngʉ adi njínji ná kpa bba bbʉbbʉlo bba, kpa ngʉ waasi ndirigoti kpa rili nja ndrŭ ma bbá bbʉbbʉlo bbá ddi. Kpa che kʉ ná loti, ndirigoti kpa kali dhi loti Yova dzá Dimu djo radio chulu ma, TV chulu ma ndirigoti Eternete chulu. Ro bblo thí kʉ ná ndrŭ nzɨ adi ribba le sha ndima ri. Fønga rɨngana kpa churi nari kʉ Biblia pongʉeri fø di lo si njini nji.​—Mt. 24:24; 2 Pe. 2:18-22. w21.05 11 §12; 12-13 §18-19

Maandiko ridho nari kʉ bbʉbbʉlo chudha adi ra anzi dzodzo ná føri nzá ka ndi ke ko nanga ri. (Kol. 1:9, 10) Yova adi bbʉbbʉlo dhǒ dzodzo, ndirigoti kodho ringani ko é ngab’odha na ndiro bbʉbbʉlo dhi kadha rá anzi d’e. Kodho chutso ddá ná kpa rá ri utso d’i nari kʉ, ringani le ø nzá ko famue anziro bblo ná bbʉbbʉlo thika ná saa na, kpa adi fø lo thika ø thei. Bí kʉ ná dini nǎ ndrŭ adi ndima dhó lo thika le ndiro ndima bbʉ hwè ndima dhó dini nǎ ndrŭ dho inga dz’ dzá ndrŭ dho d’e. Ro Yova dzá Dimu adi ndima dhó lo thika le kpa adi riji ndima kana nga é chøchø Mungu na ndirigoti kpa adi riji ndima bbʉ madha ke dho Yesu ngʉ adi rinji nari bbai nari dho. (Yak. 4:4) Ko nzɨ adi kodhó lo thika ø dz’ dzá ndrŭ ø ndima dhó lo thika nari dho ri, ro ko adi rinji fø ko riji ko famu Biblia nǎ lo bblo nari dho. Ko jirie bbʉbbʉlo ji!​—1 Te. 2:3, 4. w21.10 22 §12

Ni ká ka ni njiri ngbà rie ddiro kʉ nari bbai ni ni mbu ri ró? Addinga ngbaribbai ma Yova adi ni tsotso kó nari djo. (Zb. 55:22) Fø lo ka ndi liri nzɨ ni di ni mbu ddiro kʉ nari bbai. Addinga ngbaribbai ma Yova adi ni djoi ma, ni vei ma na tsotso kó nari djo, rie ddiro kʉ nari bbai kpa ndima mbu ri ró. (1 Pe. 5:9, 10) Hiroshi pori i ddiro ndi ngʉe ndima bbá ndrŭ kana Yova dzá Dimu cho bí kana ro: “Ko churi nari kʉ ko adi kpakpanga nji ndiro ko njinjí Yova dho d’e ndirigoti føri ka ndi li nga dhó familia kʉ bbʉbbʉlo kana ná ndrŭ kpakpa.” Godhé adi sala nji, adi Biblia zø ndirigoti adi si njudha dhi ngana. Ri kʉ bblo ni di ngbaribbai ma ni ni mbu nari d’ra Yova dho. Ri kʉ bbo na mana kʉ ná lo le di Biblia zø bí ina ndirigoti ri nǎ kʉ ná lo ridho Yova kʉ jidha na, nari djo adi ngaddi. Nja kʉ ná Wakristo adi kpakpa ka ndi li ndima ná maandiko li ndima djǒ na, loroji na Zaburi 27:10 ndirigoti Isaya 41:10. Nja kʉ ná ndrŭ adi ndima dhó Biblia ma zø inga ndima dhó matayarisho ma nji, ri chu le lø nari ndima rr nari chulu, føri adi rili kpa mbu ndima nga kʉ ddiro nari bbai. w21.06 9-10 §5-8

Ni ká kʉ njedha na ji ni ji ná le dhe nari dho? Aba saa ni li nidhó udha kpakpa ga gangʉe ná ndrŭ djó lo ni zø Biblia nǎ ro nari chulu. Ni thí ká kʉ njedha na nidhó familia nǎ ddikpa le kʉ mutengwa nari dho? Achuri nari kʉ, Yova adi bblo kʉ ná nizamu dhé bbʉ. Njati rie ngbǎ di ná lo tso ró ma ni hwini ri ró, føri chulu ni ka ni li nidhó udha kpakpa. Ad’ra ngbaribbai ma ni ni mbu nari Yova dho. Nzɨ tuni nja ndrŭ ró ro, fønga rɨngana aliri ni kana nga ngʉ chøchø ni djoi ma, ni vei ma na. (Mez. 18:1) Adi ni tsotso ka ndi kó ná lo nji ndiro ni é ngatsovedha na njati rie dzz ma ni dzz, ni ró njini ná lo dho ri ró. (Zb. 126:5, 6) Adira njudha dhi ngana krʉ ddo ró, adi lod’ra ndirigoti adi Biblia zø. Ndirigoti adi ngaddi Yova tsoni djo ni dho gosi ná saa dho ná bblo lo djo. Ni di ngbaribbai ma Yova ni tsotso kó njʉ nari nja ró, nidhó udha ka ndi ngʉ kpakpa bbo. w21.11 23 §11; 24 §17

Yesu unakpa ká kʉ “rere nzø” bbai ngbá chulu? Dz’ dzá ndrŭ ká adi ie mai nja mana na bbo? Mali dhi kpa ma, chuchuni ná kpa ma, ndirigoti kpakpanga na kʉ ná kpa ma na. Fø nga rɨngana Yesu unakpa nga kʉ fø kpa bbai ri, føri dzá lo dho dz’ dzá ndrŭ adi kpa nja ngana mana kʉ ná “rere nzø” bbai. (1 Ko. 1:26-29) Ro Yova nzɨ adi kpa nja fø ri. Yesu ká tingʉe lo fø “rere nzø djo” addudho? Ke unakpa dhungʉe ddikpa lo ke tso: “Ra nǎ Pidhinga nǎ ie i ká kʉ bboke?” (Mt. 18:1) Fø saa na ngʉe ná Wayaudi ngʉ adi bbonga (cheo) nja bbo na mana kʉ ri. Nga adi ndí ná ddikpa ke pori ɨ: “Fø saa na ndrŭ jingʉeri ndrŭ bbʉ madha ndima dho ndirigoti ndima chuni chu.” Yesu chungʉeri nari kʉ, bí kʉ ná Wayaudi ngʉ riji ndima chuni nja ndrŭ djolu pli. Føri dzá lo dho ke unakpa dho ringangʉeni ndima njí kpakpanga ndiro nzɨ kpa dyø fø ndrŭ dho nyi ró. w21.06 20 §2; 21 §6, 8; 22 §9

Mutume Paulo bbangʉe bblo kʉ ná loroji wazee dho. Loroji na, Tesalonike nǎ le-djoi dhó lo ungʉeri le bbʉ shauri ndima dho ná saa na, Paulo nanga nzá rɨngʉeni ri ndi bbʉ kpa dho nari dho ri. Nì mai ri kʉ føro, Paulo ndingʉe kpa dho ná barua nǎ, ke tingʉe lo kpadhó bblo njí djo, kpadhó jidha dhi njí djo, ndirigoti kpadhó ngatsovedha djo. Føri kina ke ddingʉe nga kpadhó maisha djo ndirigoti ke pongʉeri ndi chu kpadhó maisha chu ndirigoti kpa ngatsove nzadha kana nari ma na. (1 Te. 1:3; 2 Te. 1:4) Føri goti ke pongʉeri fø le-djoi dho, kpa kʉ bblo kʉ ná loroji nja Wakristo dho. (1 Te. 1:8, 9) Kpa nanga jingʉeni bbo Paulo lingʉe ndima kpakpa nari dho! Bbʉbbʉ dhé Paulo jingʉe ndi djoi bbo pli. Føri dho ri ka ndi kae ka Paulo bbʉ ngbà ka ndi kó kpa tsotso ná shauri ndi ndingʉe kpa dho ná barua nǎ.​—1 Te. 4:1, 3-5, 11; 2 Te. 3:11, 12. w22.02 15 §6

Kali dhi walimu chulu Shetani adi rili ndrŭ uri nari kʉ, Yova kʉ che kʉ ná ke ndirigoti nzadha bbʉ ndrŭ dho ná ke. Nja ndrŭ adi ripo nari kʉ, njati ddikpa ngba dhe ró, fø ngba Mungu dzi ndiro ndi rá di ra na malaika kana d’e. Fø lo nzɨ adi heshima bbʉ Mungu dho ri! Ro ko churi nari kʉ, Yova kʉ jidha dhi Baba. Njati rie dhe na ma ko kʉ ri, inga kodhi ji ko ji ná le dhedhe ma ró, ko nzɨ adi chelo ro ti Mungu djo ri. Fø nga rɨngana, ko uri nari kʉ ke si dhe tso d’ød’ø ndirigoti ke si checheni ná ndrŭ gaga. Ngbà ji ndima rr hwè dhi lo-i ná ndrŭ dho akod’rari nari kʉ Yova kʉ jidha dhi Mungu. Føri ka ndi liri Yova ngʉ chø ndi chø ná ke dhó logoti. (Mez. 27:11) Yova kʉ zølo dhi Mungu. Ke nzɨ adi riji ko nzani nza ri, rie ndrŭ ko nza nari dho ma, dhe dzá lo dho ma inga ko kaka nzá nari dho ma ri ró. (Zb. 22:23, 24) Yova chu kodhó kpakpalo ngbà, ke adi riji ndi d’ø ri tso d’ø ndirigoti ke si ri tso d’ød’ø.​—Anja Kutoka 3:7, 8; Isaya 63:9. w21.07 9-10 §9-10

Nì ngarr Yova dho ná ndrŭ si ba ná bbo pendeleo kʉ ndima ji ke ndirigoti ndima bbʉ madha ke dho theinga dho! Yesu ka si Adamu ma, Eva ma na njingʉe ná lo nǎ ro ndrŭ ba ná kpakpalo tso d’ø krʉ. Yova ka si mamilioni kʉ ná ndrŭ ga ndirigoti ke si rili kpa di kaka ná afya na paradiso si ngʉ ná dz’ djó theinga dho. (Lu. 23:42, 43) Yova dho njínji ná ndrŭ si ngʉ kaka ná ndrŭ ná saa na, kpa krʉ sie “madha na ndirigoti kadha na” Daudi ndingʉe nari bbai. Njati rie “birobiro,” ndrŭ kana ni kʉ ri ró, ni kʉ bblo kʉ ná ngab’odha na. (Ufu. 7:9) Mungu ji ni ji; ke jiri ni é ndidzá familia kana. Føri dho anji kpakpanga ndiro ni nji ke ji ná lo d’e. Krʉ ddoro adi ngaddi Yova tsoni djo ná lo djo. Anja kodhi ra nǎ jidha dhi Baba dho ni madha ngʉ nari mana na ndirigoti aba hwè ke dho ni madha bbʉ theinga dho nari dho! w21.08 7 §18-19

Cho bí kana nabi Yeremia ngʉ adi lod’ra nzɨ ngʉ ndidhó lo rr ná ndrŭ dho ndirigoti fø ndrŭ ngʉ adi ke bé pa. Ke thí bʉngʉeni bʉ dhonalo ke ndrŭ ngʉ adi “dhudhu ma, ndrŭ ngʉ adi chelo ma ti ke djo,” føri dho ke jingʉeri ndi bbá lo ndi d’ra nari tso bbá. (Yer. 20:8, 9) Ro Yeremia nzá bbangʉe lo ndi d’ra nari tso ri! Addui ká kongʉe ke tsotso ke ra anzi ndirigoti ke ba hwè lod’radha dhi njí kana? Ke lingʉe ndi thí aro bbo na mana kʉ ná lo djo. Ya kwanza, ke chungʉeri ndi d’ra ná imba ka ndi kó ndrŭ tsotso ndima é “gosi ná saa na ndirigoti ngab’odha na.” (Yer. 29:11) Ya pili, Yova vʉngʉe Yeremia ndiro ke d’ra fø imba ndrŭ tsɨ dho d’e. (Yer. 15:16) Yeremia bbai, ko adi ngab’odha bbʉ ndrŭ dho ná lo d’ra ndirigoti, ko le adi nzǐ Yova dzá Dimu. Njati ko li ko thí fø bbo na mana kʉ ná aro kʉ ná lo djo ró, ko ka ko é hwè na ndrŭ dho ko lod’ra nari kana. Føri dho nzɨ ko bbari ko thí bʉni njati kodhó mwanafunzi di maendeleo nji lele nzá ma ró. Lo nga ko ddi ndrŭ dho nari kana ringani ko é ngatsovedha na.​—Yak. 5:7, 8. w21.10 27 §12-13

Rie bicha ma ko njinjí Yova dho ri ró, kodho ringani ko ra anzi kpakpa ko kodhó udha li nari na ndirigoti ri ronga ko b’o nari na. Ká addudho? Dhonalo njati ko njiri fø nzá ró kodhó udha ka ndi djødjø. Achuri nari kʉ, udha kʉ bbʉbbʉ kʉ ná lo le u nari nzɨ le ndi njanja ro. Nzɨ ko nja ná ritsi nga ko ka ko vi tsé. Føri dho Paulo pori nga dhi udha ro le kʉ nari kʉ “dhʉdhʉ le ronga tso cho ná chenga.” Ko ká ka ko pʉ ko fø mutego nǎ ro ngbaribbai? (2 Te. 1:3) Ya kwanza, anzi Yova dhó roho takatifu ndirigoti adi rinzi bí ina. Ká addudho? Dhonalo udha kʉ roho takatifu dzá tunda kana ddiri ro. (Gal. 5:22, 23) Ko nzá ka ko li kodhó udha ro kpakpa rie nga Mungu dhó roho takatifu chulu dhé ri ró. Njati ko di Mungu dhó roho takatifu nzi ró, ke ka ndi bbʉ ri bbʉ ko dho. (Lu. 11:13) Ko ka ko nziri ɨ: “Abbʉ udha bbo ko dho.” (Lu. 17:5) Føri kina, ara anzi Mungu dzá lo nanga ni ne nari na.​—Zb. 1:2, 3. w21.08 18-19 §16-18

Ngó ndrŭ ka ndima njí ná lo kʉ bí. Kpa é anziro ndima e na ná kpakpanga na nga ma ró, kpa chulo bbo dhonalo kpadhó cho kʉ bí. Yova ka ndi njinjí kpa na njonjo kʉ ná chulu. Loroji na, Biblia tilo chi ngʉ tøni ná anzi dhé ngʉ ra Yova dho ndima njínji nari na, ngbà mai ndima ngʉngʉe ngó ro ná ndrŭ djo. Loroji na, Musa ngʉngʉe Yova dzá nabi ndirigoti chutso ddá Waizraeli dho ná ke 80 ndidhó cho ngʉe ro. Ngbà mai Danieli dhó cho dangʉe 90 djolu ro, ke ngʉe Yova dzá nabi dhé. Ndirigoti mutume Yohana dhó cho dangʉe 90 djolu Ufunuo dzá buku ndi ndingʉe ná saa na. “Chølo dhi” ke Simeoni djo le tilo sese Biblia nǎ, ro Yova chungʉe ke ngbà ndirigoti Yova bbʉngʉe ke dho ná pendeleo ngʉe ke nja Yesu dzá kalʉ ndirigoti ndi d’ralo fø ngba ma djo ndizá mama ma na.​—Lu. 2:22, 25-35. w21.09 3-4 §5-7

Gø dhi ndrŭ dho nzá ringani ndima di ndima dhi nzø ddi ndima kana ri inga ndima di ripo ngba njí nzá ka ndi ka ngba dho ná lo ri. Le di ngba ddi nja nzø na ndirigoti le di riji ngba nji nzá ka ndi ka ngba dho ná lo ró, ri ka ndi kani ka ngba lu. (Efe. 6:4) Sachiko ró dho kʉ ná le-ve pori ɨ: “Madzá mama ngʉ adi riji ma ba 100 % exame dhi saa na, ro fø lo ngʉe kpakpa ma dho. Ngbà mai darasa ma bba nari goti cho da bí ro, nja saa na ma adi Yova ká adi ma nji ndi dho ná njí tso u bbʉbbʉ nì nari dhu ma tso.” Pi Daudi pori ndi nzɨ ngʉ adi “bbo kʉ ná ritsi ne ri” inga dada ndidhó uwezo djolu ná ritsi ne ri. Ke ngʉe nyenyenga na ndirigoti kiasi na nari dho “ke jotso kongʉe ko ndirigoti ke ngʉe b’odidha na.” (Zb. 131:2) Gø dhi ndrŭ ká ka ndima ba ngbá somo Daudi po ná lo nǎ ro? Gø dhi ndrŭ ka ndima dhori ndima kʉ nyenyenga na ndirigoti kiasi na njati kpa di rine ndima njí ngbà ka ndi ka ndima dho ná lo ndirigoti kpa di rine ndima dhi nzø nji ngbà ka ndima dhó uwezo na ná lo ró. Gø dhi ndrŭ ka ndima dhori ndima ngaddi nì ndima dhi nzø djo njati kpa famu kpadhó uwezo ndirigoti kpa li ngbà ka ndi ka kpa dho ná muradi ngba nji ró. w21.07 21-22 §5-6

Kodho ringani ko chu nari kʉ Yova bbʉ le lé ro le longa vʉ nari ndrŭ dho. Føri na mana kʉ, ko ka ko vʉri ko rrnga ke dho inga nzá. Nja kʉ ná gø dhi ndrŭ nzá bba bblo kʉ ná loroji ro ndima dhi nzø dho ri, ro nzø vʉri ndima njinjí Yova dho ndirigoti ndima tøni chi ke dho. Nja kʉ ná gø dhi ndrŭ adi kpakpanga nji ndima ddi longa ndima dhi nzø dho, ro luti nzø adi Yova bbabba. Fø ridho ko krʉ dho ringani ko vʉri ko ká ka ko njinjí Yova dho inga nzá ma nari. (Yos. 24:15) Fø ridho njati ni thí é njedha na nidhi nzø bba Yova nari dho ró, nzɨ ni di riddi føri kʉ nidhó kosa! Nja saa na gø dhi le ka ndima bbá Yova inga familia ma bbá ddi. (Zb. 27:10) Føri ka ndi é bbo ka ndi bbʉ njedha nzø dho ná lo. Jadda kpa, njati nidhi gø dhi ndrŭ kana ro ddikpa le ngʉ mutengwa ró, ani uri u nari kʉ, Yova chu fø lo ni thí nzá nari chu. Ke ji ni bbo ni tøni chi ndi dho nari dho. Aninonga nari kʉ, ni nzá ka ni vʉ longa nidhi gø dhi ndru dho ri. w21.09 27 §5-7

Mutengwa kʉ ná ke ko ka ko ddi dhe nji ná chembø na, fø dhe ka ndi tá nja chembø ro maddi. Ke ma kana nga kʉ chøchø Yova na nga nari dho, ke kʉ dhe dhi ke bbai. (Yak. 5:14) Dhe dhi ke ka ndi liri dhe tá nja ndrŭ ro, føri bbai njati ddikpa ke ma kana nga é chøchø nga Yova na ró, føri ka ndi liri nja ndrŭ ma njí nga kʉ bblo ná lo ddi. Føri dho ri kʉ bblo le li dhe na kʉ kiroho nǎ ná ke da nja ndrŭ ró ro. Nizamu ridho Yova ji ndidzá chi tøni ná njí dhi kpa ji kutaniko nǎ ndirigoti føri ka ndi kó chenga nji ná ke tsotso ndi famu ndidhó kosa ndirigoti ndi leni le. Ddikpa le é mutengwa ró, le ka ndi si ngbà njudha dhi ngana ndiro ndi rr Biblia nǎ mafundisho ndirigoti ndi li ndidhó udha kpakpa d’e. Kedho le ka lebbʉ vichapo maddi ndirigoti ke ka ndi nja JW Télédiffusion maddi. Ndirigoti wazee njari ke maendeleo nji nì ró, kpa ka ndima di shauri ro ma bbʉ ddi ke dho, ndiri kó ke tsotso ndiro ke ma kana nga ngʉ chøchø Yova na d’e, føri ka ndi liri le ngʉ ke ki vi Yova dzá Dimu kana. w21.10 10 §9, 11

I ddo ró ko adi karne ya kwanza n;ǎ ngʉe ná Wakristo dhó loroji dyø. Loroji na, kodhó lo kpeni ddiddi anziro ngʉe ná Wakristo dhó lo bbai. Ko kʉ wangalizi na ma, wazee na ma, watumishi wa huduma na ma anziro Wakristo ngʉ adi lo kpe nari bbai. (Flp. 1:1; Tit. 1:5) Kpa bbai ko adi ngarr Yova dhó yadha dho uasherati djo ma, ndoa djo ma, jù na le njínji Mungu ji nari bbai nari djo ma. Ndirigoti ko adi kutaniko ronga b’o, nzá jiri ndima dyø Mungu dhó sheria ná ndrŭ ró. (Mdo. 15:28, 29; 1 Ko. 5:11-13; 6:9, 10; Ebr. 13:4) Biblia ripo ko dho, u tso Mungu u ná “udha kʉ ddikpa” dhé. (Efe. 4:4-6) Ko ra bani Yova dzá ndrŭ kana, ko chu bbʉbbʉlo Yova djo ndirigoti ke pɨ ná lo djo nari kʉ bbo pendeleo! Føri dho kodho ringani ko njí kpakpanga bbo ndiro ko li kodhó udha kpakpa ko chu ná bbʉbbʉlo djo d’e. w21.10 22-23 §15-17

Pi Yehoshafati bangʉeni bbo kpakpalo na. Waamoni ma, Wamoabu ma, Seiri dhi ngø tsɨ djó ndrŭ ma na singʉe lɨ ta ke ma, ke bbá ndrŭ ma, ndirigoti kedhó pidhinga tsena ngʉe ná ndrŭ ma na tso ro. (2 Ny. 20:1, 2) Pi Yehoshafati ká njingʉeri ngbǎ? Ke nzingʉeri Yova kó ndi tsotso ndirigoti Yova li ndi kpakpa. Yehoshafati dhó nyenyenga dhi sala bani 2 Mambo ya Nyakati 20:5-12 nǎ. Fø sala ridho ke lingʉe ndi thí bbo Yova djo. Yova tingʉe lo Yehoshafati dho Yahazieli ró dho kʉ ná Mulawi chulu. Ke pongʉe ná lo kʉ njʉnga dhi andiko nǎ. Yehoshafati lingʉe ndi thí Yova djo nari dho, ke rrngʉe nga rr Yahazieli pongʉe ná lo dho. Ke ma rangʉe nju ndima dhó mbubai na ná saa na, anziro nzá ke lingʉe kpakpa kʉ ná bbasødda ri, ro ke lingʉe nga dhó sø kʉ ná dyi ngo ná kpa. Yova nzá bbangʉe Yehoshafati ro ri; ro ke singʉe si ndima dhó mbubai djolu.​—2 Ny. 20:18-23. w21.11 15-16 §6-7

Ko di bani kpakpalo na ná saa na, ko ka ko uri nari kʉ Yova si ko tsotso ko ko ndiro ko kana kau é chøchø ndi na d’e. (2 Ko. 4:7-9) Ko ka ko uri u nari kʉ Yova ka ndi dhǒ ndidzá chi kʉ ná jidha ngbà ko dho dhonalo Biblia ripo, “Yova nyǒ kʉ nì ndi do nji ná ndrŭ djó, kedzá chi kʉ ná jidha kʉ nì ke b’o ná ndrŭ djó.” (Zb. 33:18-22) Yova dho ko njínji nari tso ko nga nari njí, ko njangʉe ndrŭ krʉ dho ke adi dhǒ ná jidha. Nì mai ri kʉ føro, ko kʉ Yova dzá njí dhi kpa nari dho ko adi faida ba kedzá chi kʉ ná jidha nǎ ro. Jidha dzá lo dho, Yova adi ko mbʉ ndi iso. Ke jiri ko kana nga é chøchø ndi na ndirigoti ndi njí ndi pɨ ná bblo lo ko dho. Ke jiri ko é ndidhó kau theinga dho! (Zb. 46:1, 2, 7) Føri dho, ko é ngbà di ná kpakpalo kana ma ró, Yova si kpakpanga bbʉ ko dho ndiro ko tøni chi ndi dho d’e. w21.11 7 §17-18

Ko kana bí kʉ ná ndrŭ chu lo adi li ndima thí na bicha ndima lai njí dhi kpa dho ma, darasa nǎ nzø dho ma, ndima dhó familia nǎ ndrŭ dho ma ná ndrŭ ngbà! Anonga nari kʉ Yosefu djoi kumi kʉ ná kpa lingʉe lo ndima thí na ke dho, føri lingʉeri kpa njí chelo ke ró dda dzá lo dho. (Mwa. 37:2-8, 25-28) Ro Yosefu nzá njingʉe chelo ro kpa ró ri! Bbonga na ke ngʉe ná saa na, ke ka ndi ngʉe chelo kobe chelo ró ndi djoi dho, ro ke dhongʉe zølo kpa dho. Yosefu nzá lingʉe lo ndi thí na ri. Ro ke njingʉe ná lo njungʉe nju Mambo ya Walawi 19:18 nǎ le ndingʉe luti ná lo na. (Mwa. 50:19-21) Mungu nyǒ tho ná lo ji ndima njí ná Wakristo dho ringani ndima dyø Yosefu dhó loroji, ke njingʉe ndi djoi zø chelo ndi ka ndi njie kpa ró nari rɨngana. Yesu pongʉeri ko dho, ko njí chelo nji ko ró ná ndrŭ zø nji. (Mt. 6:9, 12) Føri bbai, mutume Paulo bbʉngʉe i shauri ndi lai Wakristo dho: “Madzá ji dhi ndrŭ, nzɨ ni wø ni be niniro.”​—Ro. 12:19. w21.12 11 §13-14

Nisani 14, cho 33 na Y.G.G., Yesu rangʉe kuna Getsemane dhi í na. Fø ro ke d’rangʉe ndi thí nǎ kʉ ná lo krʉ Yova dho. (Lu. 22:39-44) Fø saa na, Yesu ngʉ “nganzi hø ndi hø ro . . . ndirigoti dzz ndi dzz ro.” (Ebr. 5:7) Nde, dhe ke dhe ná fø kuna ká ke nzingʉe nga ngbá lo djo? Ke nzingʉe kpakpanga Yova tso ndiro ndi tøni chi ke dho ndirigoti ndi nji ke ji ná lo d’e. Yova rrngʉe ndidzá ngba nganzi ndi thí nă ro krʉ nari rr ndirigoti ke chongʉe malaika ndiro ndi li ke kpakpa d’e. Yesu chungʉeri nari kʉ ndidho ringani ndi tøni chi Yova dho ndirigoti ndi bbʉ madha ke ró dho dho. Yova rrngʉe Yesu nzingʉe ná lo rr. Ká addudho? Dhonalo Yesu jingʉeri ndi tøni chi ndirigoti ndi bbʉ madha ndidzá Baba ró dho dho. Njati ko ma njiri føi ró, ke ka ndi ngʉ kodhó sala goti maddi.​—Zb. 145:18. w22.01 18 §15-17

Bí kʉ ná ndrŭ adi kodhó lo gʉ dhonalo kʉ, ko nzɨ adi ko tso tsu politiki nǎ lo na ri. Kpa adi riji ko vʉ ndrŭ vote dhi saa na. Ro njati ko vʉ ddikpa ke ndi nyo pi ko djo ró, føri na ko ridho ko gʉ Yova gʉ. (1 Sa. 8:4-7) Bí kʉ ná ndrŭ adi riddi nari kʉ kodho ringani ko chi darasa ma, hopitale ma, ndirigoti ko kó ndrŭ tsotso njonjo kʉ ná chu lu. Kpa nzɨ adi kodhó lo uri, dhonalo ko adi kpakpanga nji ko d’ralo ndirigoti ko nzɨ adi rine ko si dz’ djó kpakpalo ri. Ko ká ka ko njí addu ndiro nzɨ ko vi kodhó udha ro? (Mt. 7:21-23) Ko ka ko li ko nyǒ djo ná njí kʉ Yesu jangʉe ko nji ná njí. Kodho nzá ringani ko di rine ko si i dz’ djó kpakpalo ri. Ko jirie ndrŭ ji ndirigoti ko adi ngaddi nì kpa bani na ná kpakpalo djo ndirigoti ko churi nari kʉ bblo ko ka ko kó ndrŭ tsotso ná chu kʉ ko ddi longa ndrŭ dho Yova dhó Pidhinga djo ndirigoti ko kó ndrŭ tsotso kpa kana nga ngʉ chøchø Yova na. w21.05 7 §19-20

Nì mai ri kʉ føro, njʉ ndrŭ tsɨ djó bbobbonga adi ripo ndima madha bbʉ Mungu dho, ro kpa nzɨ adi riji ndima bbá ndima dhó bbonga ri. Yesu dhó saa na pikpa ngʉ rinji nari bbai, njʉ maddi pikpa adi Yova dzá Che na le d’ri ná ke gʉgʉ ke unakpa ndima nzanza nari chulu. (Mdo. 4:25-28) Yova ká adi fø lo nja ngbaribbai? Zaburi 2:10-12 ngʉ fø logoti: “Nde kpadjo, ni pikpa, anidho nyodyu na ni kʉ nari; aniu nizamu dz’ djó lod’i ná kpa. Aninji njí Yova dho do na ndirigoti aninji hwè ta ni ronga ta ro. Anibbʉ heshima Ngba dho, njati ni njiri fø nzá ró, ni si sadha ba, dhonalo ke nanga adi kani lele. Hwè na kʉ nari kʉ ke dhi ngana runi ná ndrŭ krʉ.” Yova kʉ bblo kʉ ná Mungu ndirigoti ke bba saa ndiro kpa vʉ lonanga njʉ d’e. Kpa ka ndima leni ngbà ndiro ndima u Yova dhó Pidhinga d’e. Saa ma sese. (Isa. 61:2) Kpadjo kʉ lele le ka le chu Mungu ná saa ndirigoti le ka le vʉri le njínji ke dho ná saa. w21.09 15-16 §8-9

Paulo ripo ringani ko é hwè na kodhó bani ná ritsi dho. (Flp. 4:12) Bbo na mana kʉ kodho nari kʉ ko kana nga kʉ chøchø Mungu na nari, ro ri nga kʉ kodhó kʉ ná ritsi ri. (Hab. 3:17, 18) Addinga Musa pongʉe Waizraeli dho ná lo djo, b’lo kpa nji cho 40 ngødja nǎ nari goti: “Yova nidhi Mungu lee ni ronga krʉ ni njie ná ritsi kana. Ke koe ni tsotso bbo ngødja lú ni e bbí ná saa na. Fø cho 40 kana, Yova nidhi Mungu e nì na nì, ndirigoti ni nzá kosa e ddikpa ritsi ro maddi ri.” (Kum. 2:7) Fø cho 40 kana, Yova ngungʉe Waizraeli mána na. Misri nǎ ro kpa rangʉe na ndima ró ná ru ro ma nzá ddi thangʉeni ri. (Kum. 8:3, 4) Yova ka ndi é hwè na njati ko nanga di jini kodhó kʉ ná ritsi dho ró. Yova riji ko nanga jini ji ndi bbʉ ko dho ná ritsi dho njati rie sese ma ró, ndirigoti ko di fø ritsi nja ndidhó ro si ná kado bbai. w22.01 5 §10-11

Dza bai, ni dhó bbʉni ná daraka kʉ ni gba ni bbá dza nǎ ndrŭ dhó lo tso, føri dho ni dho ringani ni njinjí kpakpanga na nja ni b’o ni bbá familia ronga d’e. Nja saa na kpakpalo na ni bani ró, ni ka ni di riddi ni ka ni hwini fø lo tso ró niniro. Ro nzɨ ni di ni thí li nidhó kpakpanga djo dhé. Fø nga rɨngana anidi rinzi Yova kó ni tsotso. Føri djolu pli, anidi sala nji ni thí nǎ ro krʉ ni bbá le ma na. Anidi Yova dhó chutso ddadha ne Biblia ni zø ndirigoti kedzá tengenezo bbʉ ná vichapo ni zø nari chulu, ndirigoti aninji njí ri nǎ ro ni ba ná shauri na. Nja ndrŭ nanga nzá ka ndi jini ri njati ni vʉ nanga ná lo tso nju Biblia nǎ lo na ró. Kpa ka ndima pori mbø ka ndi liri ni bbá familia ronga b’onib’o. Ro addinga Pi Yehoshafati dhó loroji djo. (2 Ny. 20:1-30) Ke lingʉe ndi thí Yova djo ndirigoti ke dhongʉeri ndidhó njí chulu. Yova nzá bbangʉe chi tøni ndi dho ná fø ke ro ri, ndirigoti ke nzɨ si ni ro ma bba ddi ri.​—Zb. 37:28; Ebr. 13:5. w21.11 15 §6; 16 §8

Mungu nongʉe ko ndi ró ji na, føri dho ndrŭ di nzani nza nari adi ko thí ronga lø bbo. (Mwa. 1:26) Ro ko karie nzá nari dho ko nzá ka ko d’ilo ro d’ʉ ri, njati ko di riddi ko chu njinjieni ná lo krʉ ma ró. Loroji na addinga, ngbaribbai ma Yova vʉngʉeri ndi nji Ninawi nǎ ndrŭ zø nari kangʉeni Yona lu nari djo. (Yon. 3:10–4:1) Anja fø lo bbʉngʉe ná bblonga. Ninawi nǎ 120 000 djolu da ná lelengʉeni ná ndrŭ gøngʉe gø! Følo dho, mwisho djó ringangʉeni Yona thɨ ndidhó lo thika, ro nga Yova ri. Ri nga kʉ lazima Yova tu ndi vʉ ddikpa longa dhonalo ndrŭ dho ri. Bbʉbbʉ dhé, Yova bbangʉe ndidhó anziro ngʉe ná njí dhi kpa d’ra ndima dhó ngaddidha ndi vʉ nanga ná lo djo inga ndi ji ndi vʉ nanga ná lo djo. (Mwa. 18:25; Yon. 4:2, 3) Ndirigoti nja saa na, ke adi ndi vʉ nanga ná longa tutu. (Yon. 4:10, 11) Nì mai ri kʉ føro, Yova dho nzá ringani ndi di ngadhu ko tso vi ndi ji ndi nji ddikpa lo nari njí inga nari goti ri.​—Isa. 40:13, 14; 55:9. w22.02 3-4 §5-6

Ko adi ridho ko kʉ “jadda kpa” bbai, ko di nja ndrŭ nja “pli ko djolu” ná saa na. (Flp. 2:3) Njati ko é fø di ná sifa na ró, ko nzá ka ko bʉ nja ndrŭ thí ro ri. Ko djoi ma, ko vei ma na krʉ darie ko djolu na ná lo ro kʉ ni. Ri ka ndi é dhʉdhʉ ko famu fø lo njati ko di kpa dhó bblo kʉ ná sifa nja ró. Kodho ringani ko njínji mutume Paulo bbʉngʉe Korintho nǎ Wakristo dho ná i shauri na: “Addui ká rili ni é nja ndrŭ djolu pli? Nde nzá ni ba nari ká kʉ addu? Njati rie ni kʉ na ná ritsi ni ba ri ró, addu dzá lodho ká ni ni nji pli nzá ba ri nari bbai?” (1 Ko. 4:7) Kodho nzá ringani ko di rine ndrŭ bbʉ madha ko dho inga ko di ko nja nja ndrŭ djolu pli ri. Loroji na, njati ddikpa le-djo é uwezo na ndi bbʉ hotuba inga ddikpa le-ve di Biblia nǎ funzo tso nga bí kʉ ná ndrŭ na ró, kpa dho ringani ndima bbʉ madha Yova dho. w21.06 22 §9-10

Bí kʉ ná Yova dzá Dimu dho ri kʉ kpakpa bbo ndima ba ndrŭ abba lo ndima d’ra ná saa na. Nja kʉ ná wahubiri kʉ nǎ ná eneo nǎ ndrŭ adi di lubba nǎ. Nja ngana Yova dzá Dimu ka ndima d’ralo nari kʉ kpakpa dhonalo nja kʉ ná lubba ronga dzamu adi b’o ndirigoti kpa nzɨ adi ri u ndrŭ tsu ri na ri, njati kpadhó bbonga u ri tso nzá ró. Nja kʉ ná wahubiri nzɨ adi ndrŭ ba bí abba ri inga kpa adi lod’ra nga ndrŭ kʉ bí ná ngalu. Nja saa na wahubiri adi kpakpanga nji ndima ra ddikpa ke dhé ne da ngana, ro njedha dhi lo kʉ kpa nzɨ adi fø ke ro ma ba ddiri! Njati ko di bani fø di ná kpakpalo na ma ró, kodho ringani ko ra anzi dhé lod’radha dhi njí na. Amburi ni ra ndrŭ nja njonjo saa na. Ko ka ko ba ndrŭ bí njati ko rá lod’ra ngbà ndrŭ ka ndima bani abba ná saa na ró. Nì mai ndrŭ adi ra njí dhi ngana ro, ndrŭ adi ngʉ ni dhé abba! Bí kʉ ná le-djoi ma, le-vei ma na adi rinja, ri kʉ bblo ndima d’ralo kukutso inga ngasnga dhonalo ndrŭ adi bani abba nì fø saa na. Ndirigoti fø rie bblo kʉ ná saa lod’radha dho, dhonalo fø rie ndrŭ ndima ronga chʉ ná saa ndirigoti bblo ndrŭ ka ndima rr lo ná saa. w21.05 15 § 5, 7

Ko ká adi fø di ná kpakpalo nja njʉ maddi? Ddio. Nzá gbani Biblia nǎ kʉ ná yadha na ná fete nzɨ Yova dzá Dimu adi nji ri, føri nzɨ adi hwè bbʉ bí kʉ ná ndrŭ dho ri. Føri kʉ le gøni ná ddo le má nari ma ndirigoti Noli ma na. Bí kʉ ná ndrŭ nzɨ adi hwè ba ri Yova dzá Dimu di drapo ndima má nari gʉ ndirigoti bʉ dhi ngana ndrŭ adi nji ná nja desturi ma na gʉ ró. Ka nanga adi kani Yova dzá Dimu djo ná kpa adi riddi nari kʉ Yova u krʉ kʉ ná dini tso u. Kpa nzá ka ndima bbʉ hwè Yova dho ri njati kpa di dz’ djó ndrŭ dhó mafundisho u Biblia nǎ mafundisho ndima ue nari rɨngana ró. (Mk. 7:8-9) Ko ká ka ko njí addu ndiro nzɨ ko vi kodhó udha ro? Kodho ringani kodhó udha é kpakpa Yova dzá yadha djo. (Zb. 119:97, 113, 163-165) Njati ko ji Yova ngbà ró, ko nzá ká ko gba ko tso ro nzá tho ke nyǒ ná desturi na ri. Ko nzá ka ko bbá ddikpa ritsi ro ma é mana na bbo ddi Yova ko ji nari djolu ri. w21.05 6 §15-16

Ko ká ka ko njinjí mutume Paulo dhó shauri na ngbaribbai? Kodho ringani ko li kodhó udha kpakpa, bí ina ko Biblia zø nari chulu, sala chulu, ndirigoti Yova bbʉ ko dho ná njí ko li anziro nari chulu. (2 Ti. 4:4) Njati ko é udha na ró, ko thí nzá ka ndi njí do ro che kʉ ná lo ko rr nari dho ri. (Isa. 28:16) Njati ko ji Yova, kedzá lo ndirigoti ko djoi ma, ko vei ma na ró, føri ka ndi kó ko tsotso nzɨ ko bba bbʉbbʉlo nja ndrŭ bba ri nari dho. Yesu dhó saa na, bí kʉ ná ndrŭ bbangʉe ke bba, ro nja ndrŭ nzá bbangʉe ke ri. Fø ndrŭ kana ngʉe Sanhedrini nǎ bí kʉ ná Wayaudi ndirigoti “bí kʉ ná kuhani maddi.” (Mdo. 6:7; Mt. 27:57-60; Mk. 15:43) Føri bbai, i ddo ró maddi, bí kʉ ná ndrŭ rine ndima dyø Yesu. Ká addudho? Dhonalo kpa chu Biblia nǎ bbʉbbʉlo ndirigoti kpa jiri ji. Mungu dzá lo ripo: “Nidzá yadha ji ná ndrŭ kʉ ngoi na ndirigoti ddikpa ritsi ma nzaddi ka ndi liri kpa thí bʉni ri.”​—Zb. 119:165. w21.05 13 §20-21

Mutume Paulo chungʉeri nari kʉ, krʉ ndi nji Yova dzá njí kana ná lo ndi nji Mungu dzá kpakpanga na, nga ndidzá kpakpanga na ri. Nzadha kana ma, prizo nǎ ma inga nja kʉ ná kpakpalo na ma Paulo ngʉ hwini ro, Yova dhó roho takatifu chulu ke bangʉe kpakpanga ndiro ndi njí lod’radha dhi njí kaka ná ngatsi d’e. Paulo lai ke Timoteo ma lingʉe ndi thí Mungu djo ddi ndiro ndi njí lod’radha dhi njí bblo d’e. Timoteo ngʉ adi Paulo goti mba da ngana ke ngʉ adi misionere dhi njínji ná ngana. Ndirigoti nja saa na, Paulo ngʉ adi ke chó ndi rá nja kutaniko ronga be ndirigoti ke li ri nǎ ndrŭ kpakpa d’e. (1 Ko. 4:17) Timoteo ka ndi njae ndi nga na mana kʉ nari bbai. Njaro ri kʉ føri dzá lo dho i Paulo pongʉeri ke ni: “Nzɨ ba ddikpa le ma be nidzá jadda nga ro pa.” (1 Ti. 4:12) Ndirigoti fø saa na Timoteo maddi ngʉ hwini kpele na ndi ndí nǎ, føri ngʉe “bí ina dhe ke nji nari.” (1 Ti. 5:23) Ro Timoteo chungʉeri Yova dzá roho takatifu ka ndi bbʉ kpakpanga ndi dho ndiro ndi d’ra hwè dhi lo-i ndirigoti ndi kó ndi djoi tsotso d’e.​—2 Ti. 1:7. w21.05 21 §6-7

Yakobo 1:19 nǎ kʉ ná nzɨ thika leni ná yadha tilo shauri ji ndi bbʉ ná ke djo. Yakobo ndingʉeri: “Ndrŭ krʉ dho ringani ndima é lelé ngarrdha dho, dzodzo lotidha dho ndirigoti ndima nanga kani dzodzo.” Muzee ka ndi ddiri ndi chu ddikpa ke dhó hali krʉ, nde føri ká kʉ bbʉbbʉ? Mezali 18:13 ripo ɨ: “Njati ddikpa ke di lo po ddikpa lo djo nzá ndi d’e ringa rr ro ró, føri kʉ rrdha ndirigoti dopadha.” Ri kʉ bblo le dhu lonanga lo dhi ke nganga tso. Føri dho muzee loti nari njí, ringani ke rr longa vi. Ke ka ndi dhuri: “Ni ká bani ngbá kpakpalo na? Ma ká ka ma kó ni tsotso ngbaribbai?” Njati wazee di saa ba ndima chulo ndrŭ bani na ná kpakpalo djo ró, kpa dho ri ka ndi é sʉsʉ ndima kó ndima vei ma, ndima djoi ma na tsotso ndirigoti ndima li kpa kpakpa. Ndrŭ tsotso ka ndi kó ná shauri le bbʉ nari nga kʉ le si andiko ro zø ndirigoti le si ndrŭ ka ndima njí ná lo ro po ddi inga aro dhé ri. Ko djoi ma, ko vei ma na jirieri ndima mbu ndima ngbà ró ko li ko dyu inga nì ko famu nari bbai ndirigoti ji tsotso ko ji ko kó nari bbai. w22.02 17 §14-15