Bi 6
Thonji dyi, Bi 6 ddo 1
Njedha kʉ ná mujane singʉe ro, le djongʉe sese dhó valer kʉ ná kichele dhi aro kʉ ná mbøkpa ri na.—Mk. 12:42.
Mujane ngʉe ná ddikpa le ngʉ adi kpakpanga nji bbo “ndiro ndi ba lazima dhi ritsi ndidhó maisha nǎ d’e. Ro le rangʉe ndidhó aro kʉ ná chuma dhi mbøkpa li sanduku na, njaro ri nzá njingʉe makelele ro maddi ri. Yesu njangʉe ri na le ra li ná mbø, ringʉe chuma dhi aro kʉ ná mbøkpa dhé, fø saa na ri ro ngangʉe mana na bbo ri. Fø mbø na nzá le ka le dzie nga na mana ngʉe bbo ná shomoro dhi re ro maddi ri. Yesu nanga kengʉeni bbo fø njedha dhi isɨle njingʉe ná lo dho. Ke nzingʉe ndi unakpa ndirigoti ke d’rangʉe fø mujane nji ná lo kpa dho. Ke pongʉeri: “Njedha dhi i mujane bbʉ bbʉdha krʉ kʉ ná ndrŭ djolu.” Føri goti ke pongʉeri kpa dho: “Nja fø ndrŭ krʉ [mali dhi kpa] si ndima dhó ni kʉ bbo ná ri ro bbʉ, ro jidha dzá lo dho fø le bbʉ ndi e na nari krʉ, le tsotso ka ndi koe na ri.” (Mk. 12:43, 44) Fø chi ngʉe ná mujane tsotso ka ndi koe ná mbø le lingʉe sanduku na krʉ ná saa na, le bbangʉe ndidhó maisha Yova dho na.—Zb. 26:3. w21.04 6 §17-18
Mbʉnji dyi, Bi 6 ddo 2
Aninjari! ni liri Yerusalemu nanga lili nidhó mafundisho na.—Mdo. 5:28.
Yesu dhó nganjadha ngʉe bblo lod’radha dhi njí djo dz’ djó ke ngʉe ná saa na, ndirigoti ke riji ndi unakpa dhó nganjadha ma é føi lod’radha dhi njí djo. (Yoh. 4:35, 36) Yesu ngʉe ndi unakpa na ná saa na, kpa ngʉe bidii na lod’radha dhi njí dho. (Lu. 10:1, 5-11, 17) Yesu le sʉngʉe ndirigoti ke dhengʉe nari goti, ddikpa saa na ke unakpa vingʉe ndima dhó hwè vi lod’radha dhi njí kana. (Yoh. 16:32) Yesu gangʉe nari goti, ke lingʉe kpa kpakpa ndiro kpa li lod’radha dhi njí anziro d’e. Ra na ke dji nari goti, ke unakpa d’rangʉe lo bidii na, føri lingʉeri kpadhó mbubai po njʉnga dhi andiko nǎ kʉ ná lo. Yesu ddangʉe chutso anziro ngʉe ná Wakristo dho lod’radha dhi njí kana ndirigoti Yova lengʉe kpadhó njí ronga le. Føri lingʉeri bí kʉ ná ndrŭ u bbʉbbʉlo u. Loroji na, Patekote 33 na Y.G.G., 3 000 kʉ ná ndrŭ bangʉe batiso. (Mdo. 2:41) Ndirigoti wanafunzi dhó hesabu ngʉ ra anzi. (Mdo. 6:7) Føri dho Yesu d’rangʉeri, nga sini ná saa na bí kʉ ná ndrŭ ka ndima ue hwè dhi lo-i u.—Yoh. 14:12; Mdo. 1:8. w21.05 14 §1-2
Zanji dyi, Bi 6 ddo 3
Hwè na kʉ ná le kʉ nzá ba ndi thí ka ndi bʉ ná lo ro ma nǎ ná le.—Mt. 11:6.
Ni ká no ya kwanza ni chungʉe bbʉbbʉlo ná saa nga ngbà? Ni ngʉ adi riddi nari kʉ, ndrŭ krʉ ka ndima u Biblia nǎ ro ni chu ná fø bbʉbbʉlo u. Ni ungʉeri nari kʉ Biblia nǎ kʉ ná lo ka ndi liri ni é bblo kʉ ná maisha na njʉ ndirigoti ni é ngab’odha na gosi ná saa djo. (Zb. 119:105) Føri dho ni ngʉe hwè na ni d’ra ni chu ná lo nidhó familia nǎ ndrŭ dho ndirigoti nidhó kau dho. Nde føri goti ká ngbá lo bangʉe nga? Ni nanga kengʉeni dho ná lo kʉ, bí kʉ ná ndrŭ nzá ungʉe ni d’ra ná lo ro ri. Kodho nzá ringani ko nanga di keni ndrŭ kodhó lo gʉ nari dho ri. Yesu dhó saa na ma ndrŭ ngʉ ke ngʉ po ná lo gʉ ddi, ngbà mai ke njingʉe ná ddù ngʉ ridho Yova u ke tso u ro. Loroji na, Yesu gangʉe Lazaro, fø lo ro nzá kedhó mbubai ma ka ndima gʉe ddiri. Nì mai ri kʉ føro, Wayaudi djó bbobbonga nzá ungʉe Yesu kʉ Masiya nari ro ri. Kpa ngʉ rine ndima hwi Yesu ma Lazaro ma na hwi!—Yoh. 11:47, 48, 53; 12:9-11. w21.05 2 §1-2
Yenga dyi, Bi 6 ddo 4
[Nzɨ] ko [bba] ddingana ko njuni nari tso, . . . ro [akoli ko] kpakpa ko kana.—Ebr. 10:25.
Anji kpakpanga ndiro ni di si njudha dhi ngani krʉ ddo ró d’e. Fø lu ni si rr ná lo si ni li kpakpa ndirigoti ni si ni djoi ma, ni vei ma na chu bblo. Ane lo ni ka ni chu dhó ro ná kau kutaniko nǎ, kpadhó cho é bbo ma, sese ma ni dho inga rie d’inga na ma kpa dhi ró. Biblia ripo ko dho nyodyu “adi bani ngókpa kana.” (Yob. 12:12) Bbobbokpa ma ka ndima chulo bbo ddi chi kʉ ná jadda kpa dhó ro kutaniko nǎ. Daudi ngʉe jadda Yonatani dho, ro føri nzá chongʉe kpa ronga tso ro kau kpa nji nari ró ri. (1 Sa. 18:1) Daudi ma kongʉe ndima tsotso Yonatani ma na ndima njínji Yova dho d’e, nì mai kpa ngʉe kpakpalo kana bbo ro. (1 Sa. 23:16-18) Irina, pori ɨ ddiro ndi kʉ ndima bbá familia kana Yova dzá Dimu ro: “Ko djoi ma, ko vei ma na ka ndima é kodhi gø dhi ndrŭ bbai inga ddinga na ko dhi na ná ndrŭ bbai. Yova ka ndi kó ko tsotso kodhó loji nari bbai kpa chulu.” Nidhó kau adi riji ndima li ni kpakpa ndirigoti ndima kó ni tsotso ko, ro ndiro kpa kó ni tsotso bblo d’e, nidho ringani ni d’ra ngbaribbai ma ni ni mbu nari kpa dho. w21.06 10-11 §9-11
Wanzia dyi, Bi 6 ddo 5
Ri kʉ føri bbai i madzá ra nǎ Baba si rinji ni ró ri, njati ni kana nja ke ddiro njí adjo ndi zø ndi thí nǎ ro nzá ró.—Mt. 18:35.
Yesu bbʉngʉe ddikpa loroji ddikpa pi ma djo, ndidhó nokpa ma na. Ke bbangʉe ndidhó nokpa nǎ ngʉe ná bbo ddeni pá dhonalo ri nzá ka ndi kae ke dho ke lipa ri ro ri. Ro luti ke nzá ungʉeri ndi bbá ndi lai ke nǎ sese ngʉe ná ddeni pá ri. Pi lingʉe nga nǎ zø kʉ ná fø noke prizo na. Noke njingʉe ná fø lo nzá bbʉngʉe chelo ke dho ddiro dhé ri, ro nja ndrŭ thí ma bangʉe njedha ddi. Ya kwanza, ke nzá njingʉe ndi lai ke zø ro ri, ke lingʉe ke prizo na kpø ke bbʉ ndidhó ddeni krʉ ná ngadjo.” Ya pili, ke lai nja kʉ ná nokpa bangʉe njedha, kpa njangʉe ke nji ná fø lo ná saa na. Ke lai nja kʉ ná nokpa njangʉe “fø lo ro kpa thí bangʉe njedha bbo.” (Mt. 18:30, 31) Føri bbai ko nji ná lo adi nja ndrŭ ronga ma lø ddi. Njati ddikpa ke njí chelo ma ko ró ró, ndirigoti ko njí ke zø nzá ró ká ngbá lo ka ndi banga? Ya kwanza, føri na ko chelo nji ke ró ndirigoti ko ridho ko nzá ji ke ri. Ya pili, føri na ko chelo nji kutaniko nǎ nja ndrŭ ró dhonalo kpa thí ka ndi bʉni bʉ njati ko njí ngoi fø ke na nzá ró. w21.06 22 §11-12
Ronji dyi, Bi 6 ddo 6
[Ke sí] dz’ adi sa ná ndrŭ sasa.—Ufu. 11:18.
Mungu nongʉe ndrŭ ndi ró ji na, ro Shetani adi riji ndrŭ njí chelo dhé. Mungu njangʉe “ndrŭ dhó chelo nanga nyani” Noa dhó saa na nari ro, “Yova nanga ndrŭ ndi no dz’ djo nari d’ongʉe d’o ndirigoti ri bbʉngʉe njedha ke thí dho.” (Mwa. 6:5, 6, maelezo ya chini, 11) Nde, fø nga djó ro ká dz’ djó lo thika leni le? Nzá! Ngono dhi lo kana ndrŭ dhó nyi ra anzi nari adi hwè bbʉ bbo Shetani dho! (Efe. 4:18, 19) Shetani adi hwè ba bbo Yova dzá ndrŭ njí chenga ró. Shetani dhó pidhinga tse nǎ ndrŭ adi ‘pinyo ndrŭ djo nja ndima vú na vu ndrŭ ró d’e,’ ro kpa nzɨ dz’ ronga ro b’o ndirigoti zǎ ronga ro b’o anziro Yova jingʉeri nari bbai ri. (Muh. 8:9; Mwa. 1:28) Føri ká si ngbá matokeo bbʉ? Bbo chulo ná kpa adi ripo nari kʉ, ndrŭ nji ná lo dzá lo dho gosi ná cho na milioni ddi kʉ ná ritsi tsɨ ka ndi sini si, føri kʉ zǎ tsɨ ma, njonjo kʉ ná tsú ma na. w21.07 12 §13-14
Gbonji dyi, Bi 6 ddo 7
[Yova] si ndrŭ zø ndi nji nari dho bbo pli kʉ ná chu nǎ.—Isa. 55:7.
Mungu dzá nja njí dhi kpa thí adi nzani bbo ndima njingʉe anziro ná chenga dho. Kpa adi riddi nari kʉ Yova nzá nji ndima zø ro ri, ngbà mai kpa ko zø ndirigoti kpa bba cheri ndima ngʉ nji nari tso ro. Njati rie ni ma adi ni rr føi ri ró, aneri ni chulo Yova ji ná lo djo. Føri ka ndi kó ni tsotso ndiro nzɨ ni mbu ni fø, njati rie ngbà ni famu Yova dzá chi kʉ ná jidha ni lai djo ri ró, føri ka ndi kó ni tsotso ni njinjí ke dho hwè na ndirigoti bblo kʉ ná zamiri na. Føri kaka dhonalo “kedzá Ngba Yesu dzá ju ʉ ko ʉ krʉ kʉ ná chenga nǎ ro.” (1 Yo. 1:7) Njati rie bʉ ni thí bʉni ni kaka nzá nari dho ri ró, anonga nari kʉ Yova jiri ndi njí ni zø njí rie ngbà ni leni ri ró. Anja ngbaribbai ma Mutunga Zaburi Daudi dhongʉe chi kʉ ná jidha ma tso nju ndrŭ zø le nji nari na nari. Ke ndingʉeri: “Ddiddi ra kʉ da dz’ ró ro nari bbai, kedzá zølo kʉ bbo nì ke do nji ná ndrŭ dho. Ddiddi dyi si nanga kʉ da dyi tsu nanga ró ro nari bbai, ke adi kodhi chenga tu da ko ró ro.”—Zb. 103:11, 12. w21.11 5-6 §12-13
Thonji dyi, Bi 6 ddo 8
Ledzá nzø dani ro nzø pori le kʉ hwè na kʉ ná le; le bbá ke dani ro ke bbʉ madha le dho.—Mez. 31:28.
Mukristo kʉ ná kpetsi ke dho ringani ndi di madha bbʉ ndi bbá le dho. (1 Pe. 3:7) Madha na mana kʉ, bbo le ngaddi ndirigoti bbo le heshima bbʉ nja ndrŭ dho nari. Loroji na, kpetsi ke ka ndi má ndi bbá le heshima ndi bbʉ le dho nari chulu. Ke dho nzá ringani ndi po ndi bbá le njí nzá ka ndi ka le dho ná lo ri. Ndirigoti ke dho nzá ringani ndi di le ddí nja isɨle na ri. Njati ke di rinji fø ró, føri ká ka ndi bbʉ ngbá chelo? Le-ve Rosa bbá ke nga ngʉe Yova dzá Dimu ri ndirigoti bí ina ke ngʉ adi le ddi nja isɨ ndrŭ na. Ke ngʉ adi po ná chelo lingʉeri Rosa nja ndi nga na mana kʉ nari bbai. Le pori, “Madhó lo jingʉeri ma uri nari kʉ, ma kʉ mana na bbo Yova dho.” Fø nga rɨngana Mukristo kʉ ná kpetsi ke adi madha bbʉ ndi bbá le dho. Ke churi nari kʉ, ndi nji ná lo ka ndi lø ndima kana kau ronga ndi bbá le na ndirigoti Yova na. Madha bbʉ ndi bbá le dho ná ke adi bblo loti le djo, ke adi jidha dhǒ ndirigoti mbai po le dho. w21.07 22 §7-8
Mbʉnji dyi, Bi 6 ddo 9
“Ma si di nì ma nga b’o ro.”—Mik. 7:7.
Ni thí ká ka ndi bʉni bʉ rie nidhó loji ná ddikpa no ni b’o, ro ri si nzá ri ni e b’o ná saa na ro? Nde njati fø no si nzá dhonalo ni chu bblo ró, ni ká nzá ka ni di ngatsovedha na ndirigoti tayari ni nga b’o ro rí? Mezali 13:11 addudho ma ringani ko é ngatsovedha na nari ddi ko dho. Ri ripo: “lele tso le nju ná mali nanga si ngʉngʉ, ro dzodzo mali tso nju ná ke dhó ri si dhi bbo.” Fø andiko nǎ ro ká ko ba ngbá somo? Nyodyu dhi ke adi ritsi nji bblo ndirigoti ngatsovedha na. Føri ka ndi liri ke ba faida. Mezali 4:18 ripo ko dho, “chølo dhi kedhó chu kʉ bbʉtso kadha bbai anzi ndidhó kadha ra kpø dyi kpa lili djo ro.” Fø andiko ridho nari kʉ Yova adi ndidzá ndrŭ tsotso kó ndiro ndima famu ndi pɨ ná lo d’e. Ro fø andiko ka ndi njínji Mungu dzá lo kana dhi ná Mukristo djo maddi. Ndiro ddikpa le ma kana nga ngʉ chøchø Yova na d’e, føri adi ddo dzi bí. Mungu dzá lo ko di zø ndirigoti ko di njínji ri nǎ shauri na ndirigoti kedhó tengenezo bbʉ ná shauri na ró, ko ka ko dhǒ Kristo dhó sifa, ndirigoti kodhó lochudha ka ndi dhidhi Mungu djo. Akonja ngbaribbai ma Yesu dhongʉe fø lo nari. w21.08 8 §1, 3-4
Zanji dyi, Bi 6 ddo 10
Ma kʉ ena ró! Acho ma!—Isa. 6:8.
Nga sini ná i saa na, ko ka ko njí ná njí kʉ bí. (Mt. 24:14; Lu. 10:2; 1 Pe 5:2) Ko krʉ jiri ko njinjí Yova dho kothí nǎ ro krʉ. Bí kʉ ná kpa ndima dhó njí nanga ndrindri Mungu dzá lo kana. Nja kpa ripɨ ndima é painia ma, ndima njinjí Beteli na ma, inga ndima kó Mungu dzá dza chidha dhi njí tsotso. Ndirigoti bí kʉ ná le-djoi djó tso ko nari kʉ ndima é watumishi wa huduma inga ndimae wazee. (1 Ti. 3:1, 8) Yova nanga adi jini bbo ndidzá ndrŭ njínji ndi dho nari dho! (Zb. 110:3) Ro, ni thí ká kiroho nǎ lo ni lie ni njí nari d’e njini nzá nari bʉ? Rie fø ró ad’ra ni nanga d’o ná lo Yova dho. (Zb. 37:5-7) Ndirigoti adhunga Mungu dzá lo kana dhidhi ná le-djoi tso nidhó njí kana ni ka ni thɨ thika na lo djo, ndirigoti anji kpakpanga ni njinjí kpa bbʉ ná shauri na. Ngbà ni njiri fø ró, fø pendeleo tso ka ndi kóko ni djo. w21.08 20 §1; 21 §4
Yenga dyi, Bi 6 ddo 11
Yova . . . nzá ka ndi bbá chi tøni ndi dho ná ndrŭ ro ri.—Zb. 37:28.
Mujane ngʉe ná nabi Anna dhó cho ngʉe 84 ro, le ro “nzɨ ngʉ adi má hekalu nǎ ro ri.” Le ngʉ adi “si njudha dhi ngana krʉ saa ró,” føri dho le bangʉe ndi kobe nari kʉ le njangʉe Yesu dzá kalʉ. (Lu. 2:36-38) I ddo ró, chi tøni ná bí kʉ ná ngó ndrŭ adi e bblo kʉ ná loroji jadda kpa dho. Njati ko di nga ro ma dhu kpa tso inga kpa di loti ndima ba Yova dzá tengenezo nǎ ro ná hwè djo ró, føri ka ndi li ko kpakpa. Ngó ngʉ ná ko djoi ma, ko vei ma na kʉ mana na bbo Yova dho ndirigoti ke dzá tengenezo dho. Kpadhó maisha nǎ, kpa nja ngbaribbai ma Yova le ndidzá tengenezo ronga nari ndirigoti kpa ronga nari maddi. Kpa ba e somo ndima njingʉe ná kosa nǎ ro. Anidi kpa nja “nyodyu tø ná nga” bbai ndirigoti aniba somo kpa dhó ro. (Mez. 18:4) Njati ni ba saa ni chú kpa ró, nidhó udha ka ndi ngʉ kpakpa. w21.09 3 §4; 4 §7-8; 5 §11, 13
Wanzia dyi, Bi 6 ddo 12
Sese pli kʉ nari si ngʉ elfu ndirigoti bbo pli tso vʉni ná le si ngʉ kpakpa kʉ ná ndrŭ tsɨ.—Isa. 60:22.
Isaya pongʉeri, Yova dzá ndrŭ si “ndrŭ tsɨ kpari bà njʉ”. (Isa. 60:5, 16) Njonjo dhó ufundi na ndirigoti kpakpanga na kʉ ná kpetsi kpa ma, isɨ ndrŭ ma na nyani bbʉbbʉ lo kana, kpa Pidhinga dzá hwè lo-i d’ra 240 kʉ ná ngø lu 1 000 djolu da ná luga na. Nga sini ná i saa na, ndrŭ tsɨ rine ndima vʉ lonanga. Kpa ká ka ndima vʉri ndima kó Mungu dhó Pidhinga tsotso inga ndima li ndima thí i dz’ djó pidhinga djo? Føri kʉ ndrŭ krʉ ka ndima vʉ nanga ná bbo na mana kʉ ná lo. Nì mai ri kʉ føro, Yova dzá ndrŭ adi rine ndima rrnga ndima di ná ngana kʉ ná pikpa dho, ndirigoti kpa nzɨ adi ndima tso tsu politiki nǎ lo nari. (Ro. 13:1-7) Kpa churi nari kʉ, Mungu dhó Pidhinga dhé ka si ndrŭ dhó kpakpalo tso d’ø d’ø. Fø Pidhinga nga kʉ i dz’ dzá sehemu ri.—Yoh. 18:36, 37. w21.09 17-18 §13-14
Ronji dyi, Bi 6 ddo 13
Aniklo ni thí tso ke nji.—Zb. 62:8.
Ji ni ji ná ddikpa le bbá Yova ná saa na, ri kʉ bbo thonga ná lo ni li nidhó udha kpakpa ndirigoti familia nǎ nja ndrŭ dhó ri maddi. Ni ká ka ni njiri fø ngbaribbai? Aliri ni kana nga é chøchø Yova na Biblia ni zø nari ma, ri nǎ longa ni ne nari ma ndirigoti Wakristo dhó njudha dhi ngana ni si nari chulu. Joanna pori ɨ bba ndidzá baba ma, ndi dhi vena ma na bbangʉe Yova ná saa na: “Ma tsotso kongʉe nari kʉ Abigaili ma, Esta ma, Yobu ma, Yosefu ma, ndirigoti Yesu ma na dhó lo djo ma ngʉ adi zø Biblia nǎ ro ná lo. Fø loroji kongʉe ma tsotso ma é kpakpa ndirigoti ma é bblo kʉ ná nganjadha na.” Njati ni thí é njedha na ró, nzɨ bba nga ni nzǐ Yova tsó nari tso. Adi rinzi kodhi ji dhi Mungu kó ni tsotso nidhó nganjadha e kedhó ri bbai ndirigoti “ke bbʉ nyodyu ni dho ndirigoti ke ddi ni si bbi lú ná chu nga ni dho.” (Zb. 32:6-8) Ri ka ndi é kpakpa nja saa na ni d’ra ngbaribbai ma ni ni mbu nari Yova dho. Ro Yova chu ni thí nzá ná lo ngbà. Ke riji ni d’ra ni thí nǎ lo krʉ ndi dho.—Kut. 34:6; Zb. 62:7. w21.09 28 §9-10
Gbonji dyi, Bi 6 ddo 14
I ri kʉ madzá bbo ma ji ná Ngba, u ma u ndi tso ro. Anirrnga ke dho.—Mt. 17:5.
Cho 32 na Y.G.G., Pasaka da nari goti Petro ma, Yakobo ma, Yohana ma na njangʉe ké dho le nanga ka ndi keni ná lo. Ddikpa bbo ngbeni ná Hermoni dhi ngøtsɨ djó kpa ngʉe ná saa na, Yesu lengʉe ndi nyi thika le kpa nyǒ njí. “Ke nyǒ djonga ngangʉe cha ndi chá nari tso dyi bbai ndirigoti ke ró arugu ru ngʉ dyødyø kadha bbai.” (Mt. 17:1-4) Mitume rrngʉe Mungu chu ɨ ndi ripo ro: “I ri kʉ madzá bbo ma ji ná Ngba, u ma u ndi tso ro. Anirrnga ke dho.” Gbo kʉ ná fø mitume dhongʉeri ndima njínji nì fø shauri na Yesu dho kpa rrngʉe nga ndima dhó maisha na nari chulu. Ko adi riji ko dyø kpadhó loroji. Ko adi mbai po bbo Yova dho, ke bbʉ jidha na chutso ddá “kutaniko dho ná bbonga” Yesu Kristo nari dho! (Efe. 5:23) “Akorrnga ke dho,” mutume petro ma, Yakobo ma, Yohana ma na njingʉeri nari bbai. Njati ko njiri fø ró, ko ka ko ba ledha bbo njʉ ndirigoti ko si nzá tso ka ndi d’ø ná hwè ba gosi ná saa na. w21.12 22 §1; 27 §19
Thonji dyi, Bi 6 ddo 15
Ma si malipizi bbʉ ni dho ngbà kaka ná ngatsi.—Yer. 30:11.
Korintho nǎ ddikpa ke ngʉ adi nzá thonga ná nyi nji ndidzá baba bbá le na. Føri dho Mutume Paulo pongʉeri Korintho nǎ Wakristo dho kpa tenga ke tenga. Fø ke dhó che kʉ ná nyi ngʉe che kʉ ná matokea na kutaniko nǎ nja ndrŭ djo, ndirigoti nja ndrŭ ngʉ riddi nari kʉ føri nga kʉ che kʉ ná nyi ri! (1 Ko. 5:1, 2, 13) Luti Paulo rrngʉeri nari kʉ, fø ke leni le bbʉbbʉ ndidhó chenga nǎ ro! Paulo pongʉeri wazee dho ɨ: “Aninji fø ke zø ndirigoti anipi ke iso.” Anja fø ká Paulo pongʉeri addudho ma nari: “Føri dho, kedho nzá ringangʉeni ndi thí ba njedha nga djolu ri.” Paulo dhongʉe zølo le lengʉeni ná fø ke dho. Paulo nzá jingʉeri fø ke thí é njedha na ndi njingʉe ná fø lo dzá lo dho ri dhonalo ke bbangʉe fø nyi tso bba. (2 Ko. 2:5-8, 11) Yova bbai wazee adi riji ndima dhǒ zølo. Kpa adi kaka ná nizamu bbʉ chenga nji ná ke dho rie ngbà ri uri le njiri fø ró, ro kpa adi zølo ma dhǒ bbo ddi ri uri le njiri fø ná saa djo. Njati wazee bbʉ nizamu nzá chenga nji ná ke dho ró, føri ka ndi dhori kpa ro nga kʉ zølo nari. w21.10 11-12 §12-15
Mbʉnji dyi, Bi 6 ddo 16
Nidho nzá ringani ni ngʉ chelo kobe chelo ró ri inga ni li lo ni thí na ri.—Law. 19:18.
Akonja ddikpa loroji. Le thí ronga vo ná lo le ka le ddi le ndí ronga vo nari na. Nja kʉ ná kilonda ka ndi é sese, ro nja kʉ nari ka ndi é bbo. Loroji na, ddikpa avelope tso ko pʉ ná saa na ko thó ronga ka ndi vóvo. Føri ka ndi ndíndɨ, ro ddo ddi inga ddo aro goti, ko nzá ka ka ko no fø ri nga ro ri. Føri bbai ndrŭ nji ko ró ná nja chelo ka ndi é sese. Loroji na, nzá nga ndi ddi ro, ddikpa kau ka ndi po inga ndi njí vo ka ndi vo ko thí ronga ná lo, ro ri ka ndi kaka ko njí ke zø. Ro njati rie ko ró kilonda kʉ bbo ri ró, munganga ka ndi ʉ ri djó nga ʉ ndirigoti ke ka ndi chi ri djó nga tso bandi na. Njati ko di ri ronga lø bí ina ró, ri ka ndi njani nzá ka ndi sini nari bbai ndirigoti ri ka ndi nyani bbo. Njedha dhi lo kʉ, ddikpa le ka ndi njí fø di ná lo ndrŭ nji chelo ndi ró ná saa na. Le ka ndi di ngaddi ndi thí ronga ndrŭ vo nari djo ndirigoti addudho ma ndrŭ njiri ndi ró fø nari djo. Lo li ndima thí na ná ndrŭ rinji che ndima nganga ró. Ri kʉ bblo ko rrnga njʉnga dhi andiko nǎ bani ná shauri dho! w21.12 12 §15
Zanji dyi, Bi 6 ddo 17
Ni ká lod’i adjoni djo addudho?—Ro. 14:10.
Akoddinga ddikpa loroji djo. Ddikpa muzee ngaddi ddikpa Mukristo vʉ ndi thó ná ru djo ndirigoti ke vʉ ndi ronga thɨdha dho ná ritsi djo. Fø muzee ka ndi dhuri ndi tso, ‘Biblia ká tilo ro fø lo djo ddi?’ Ndiro nzɨ ndi njinjí ndidhó ngaddidha na ró, ke ka ndi dhunga d’i muzee tso inga ngbà dhidhi kiroho nǎ ná le-djo inga le-ve tso fø lo djo. Føri goti kpa ka ndima nja Paulo bbʉ ru thodha djo ndirigoti le ronga thɨdha djo ná shauri ddinga. (1 Ti. 2:9, 10) Paulo d’ra krʉ ndrŭ dho ringani ndima dyø ná yadha, føri dzá lo dho Wakristo dho ringani ndima ddinga bbo ndima thó ná ru djo ndiro nzɨ ri sa Yova ró dho nanga ró. Ro Paulo nzá kpengʉe le ka le thó ná ru inga nzá le ka le thó ná ru dhi liste ro ri. Ro ke chungʉeri chu Wakristo ka ndima thó ndima ji ná ru, njati rie nzá ri ra njonjo Biblia po ná lo ró ro ri ró. Føri dho wazee dho ringani ndima ddinga ke ká kʉ kiasi na nì inga nga ma nari djo. Aro kʉ ná le-djoi ka ndima vʉ longa njonjo, ro kpa krʉ dhó longavʉdha ka ndi rá bani d’ʉ dhé. Ri nzá ngani ko cho ko djoi ndiro kpa di lo nji ko jiri nari bbai dhé ri. w22.02 16 §9-10
Yenga dyi, Bi 6 ddo 18
Anidi chi kʉ ná jidha ma, zølo ma na dhǒ ni kana.—Zek. 7:9.
Ko kʉ bblo kʉ ná sababu na ndiro ko dhǒ chi kʉ ná jidha ko kana d’e. Fø jidha ká ko ka ko dhǒ addu dzá lo dho? Anja ngbaribbai ma Mezali nǎ ndini ná lo ngʉ fø logoti nari: “Nzɨ bbari chi kʉ ná jidha ma, chø kʉ ná lo ni nji nari ma na bbá ni. . . . Føro ni tso si uni u ndirigoti ni sie ufahamu na Mungu ma, ndrŭ ma na nyǒ njí.” “Chi kʉ ná jidha dhǒ ná ke adi faida ba fø ndi rinji nari nǎ ro.” “Føri dho, chølo ma, chi kʉ ná jidha ma na dhǒ ná ke si shinga ba.” (Mez. 3:3, 4; 11:17, maelezo ya chini; 21:21) Fø mezali dho chi kʉ ná jidha ringani ko dhǒ dho ná lo ro gbo. Ya kwanza, chi kʉ ná jidha ko dhǒ nari rili Yova nja ko mana na. Ya pili, chi kʉ ná jidha ko dhǒ nari nǎ ro, ko nganga adi faida ba. Loroji na, føri na ko rili ko kana kau di theinga dho nja ndrŭ na. Ya tatu, chi kʉ ná jidha ko dhǒ nari rili, ko si ledha ba gosi ná saa na, føri kʉ ko si cho ró nŭnŭ di ná shinga ba nari. Bbʉbbʉ dhé, ri kʉ bblo ko rrnga Yova dzá ɨ yadha dho: “Anidi chi kʉ ná jidha ma, zølo ma na dhǒ ni kana.” w21.11 8 §1-2
Wanzia dyi, Bi 6 ddo 19
Abbʉ udha bbo ko dho.—Lu. 17:5.
Njati rie drrdrr ma inga i ddo ró ma ni hwini na ná kpakpalo ridho nidhó udha nga kʉ kpakpa ri ró, nzɨ bbari ni thí bʉni. Anja fø lo kpakpa ni ka ni li nidhó udha ná chu. Adi nganzi bbo Yova tsó kpakpalo tso ró ni hwini ná saa na. Auri nari kʉ Yova ka ndi kó ni tsotso nidhó familia chulu ndirigoti nidhó kau chulu maddi. Njati ni bbari Yova kó ni tsotso ni ve i ddo ró ni hwini na ná kpakpalo tso ró, ni ka ni uri nari kʉ, ke si ni tsotso ko ni ve gosi ná saa na ni si bani na ná mbudha tso maddi. Yesu kongʉe ndi unakpa tsotso ndiro kpa chú ngbá lo kana ma ringani ndima é udha na nari d’e, ke chungʉeri chu nari kʉ Yova ka ndi kó kpa tsotso ko gosi ná saa na kpa si bani na ná mbudha kana. (Yoh. 14:1; 16:33) Ke chungʉeri nari kʉ, birobiro kʉ ná ndrŭ ka ndima ka si gøgø bbo mbudha nǎ ro dhonalo kpadhó udha kʉ bbo. (Ufu. 7:9, 14) Ni sie kpa kana nì, njati ni nji kpakpanga ni li nidhó udha kpakpa ngbà kpadjo nga djó ro ró!— Ebr. 10:39. w21.11 25 §18-19
Ronji dyi, Bi 6 ddo 20
Yova dzá malaika adi nì ke do nji ná ndrŭ krʉ ronga tso d’e.—Zb. 34:7.
Ko nzá ka ko b’ori ko ronga b’oni ddù dhi ri bbai njʉ ri. Ro ko churi nari kʉ ngbà li ndima thí Yova djó njʉ ná ndrŭ krʉ si cho ró nŭnŭ di ná shinga ba, njati kpa cheni che ma ró. Ko li ko thí Yova ka ndi b’o ko ronga ngbà nari djó ná føri dho, ko si mbudha ba karrnga goti. Gogu dhi Magogu, ddi gba ndima tso ná fø ndrŭ tsɨ si lɨta Mungu dzá ndrŭ tso ro ná saa na, kodhó shinga si njani hatari nǎ kʉ nari bbai. Fø saa na, ri si ngani ko uri nari kʉ Yova ka ndi gø ko ngbà. Ndrŭ tsɨ si ko nja ddiro kʉ ná chembø bbai, nga ndi ronga b’o ná ke kʉ ro. (Eze. 38:10-12) Kodhó nga sie lɨ dhi ritsi ro ri, ndirigoti ko nzɨ si formasio ro ma ba ddi lɨ njidha dho ri. Føri dho ndrŭ tsɨ si ko nja dhʉdhʉ djó le ka le si nari bbai. Udha dhi le nyǒ na ko si ko ronga tso d’e nja ndima b’o ko ronga ná malaiká nja, ro ndrŭ nzɨ si fø malaiká ro nja ri. Bbʉbbʉ dhe, ndrŭ tsɨ nzɨ si fø lo ro famu ri. Kpa nzɨ si lo ro nja udha dhi le nyǒ na ri. Kpa nanga si keni bbo ra nǎ bbasødda ko djó lɨ nji nari ndima nja nari dho!—Ufu. 19:11, 14, 15. w22.01 6 §12-13
Gbonji dyi, Bi 6 ddo 21
Anidho jidha nju tso njuni ná le-djoi krʉ dho.—1 Pe. 2:17.
Ko djoi ma, ko vei ma na Yova adi nja mana na bbo, føri dho kodho maddi ringani ko di kpa nja mana na bbo. Kodho ringani ko njí kpakpanga ndiro ko b’o kpa ronga ndirigoti akodi ngaddi kpa djo. Njati ko d’i ri utso nari kʉ ko nji chelo ddikpa ke ró ró, kodho nzá ringani ko di riddi nari kʉ, ko nji ná lo nzá ka ndi kani ke lu ri inga ke dho ringani ndi njí ko zø inga ndi bbá fø lo pa ko dho ri. Nja kʉ ná ndrŭ nanga ká adi kani addudho? Njaro nja kʉ ná le-djoi ma, le-vei ma na dhi nari bbai, kpa ka ndima ddiri nari kʉ ndima nga kʉ mana na ri. Nja kʉ ná ndrŭ chu bbʉbbʉlo ø nari dho, ndrŭ nzá churie nja ndrŭ zø le ka le njí nari ri, rie ndrŭ nji chelo kpa ró ri ró. Ro rie ngbǎ ma ko ko mbu ndrŭ nji ko ró ná che lo dho ri ró, kodho ringani ko njí kpakpanga ndiro ko é ngoi na d’e. Njati ddikpa ke nanga di kani lele nja ndrŭ djo ró, kedho ringani ndi chu nari kʉ føri kʉ che kʉ ná nyi, ndirigoti kedho ringani ndi le ndidhó nyi thika le. Ke njiri fø ró, ke ka ndi é hwè na ndirigoti kpa kana nga ka ndi é chøchø nja Wakristo na. w21.06 21 §7
Thonji dyi, Bi 6 ddo 22
Yova kʉ chøchø nì ndi nzǐ ná ndrŭ krʉ kuso, bbʉbbʉ lo kana ndi nzǐ ná ndrŭ krʉ kuso.—Zb. 145:18.
Yesu chu ngbaribbai ma ni ni mbu nari ngbà. Ko djolu lo di sisi ró, ko ka ko è hwè na dhonalo ko iso pɨ nari kʉ ngbà ro bangʉeni fø di ná lo na ná ke. Fø kau kʉ Yesu. Ke chu ngbaribbai ma le adi le mbu le thí bʉni ró nari ngbà ndirigoti ke chu le tsotso ka ndi kó ná lo maddi. Ke chu kodhó uzaifu chu ndirigoti ke ndi kó ko tsotso “ngbà thonga ná saa na.” (Ebr. 4:15, 16) Ddiddi Yesu ungʉeri malaika kó ndi tsotso Getsemane dhi í nǎ nari bbai, kodho maddi ringani ko uri Yova kó ko tsotso vichapo chulu ma, video chulu, hotuba chulu ma, wazee ko ronga be nari chulu ma ndirigoti dhídhi kiroho nǎ ná Wakristo chulu ma. (Lu. 22:39-44) Yova si ni dho “Mungu dzá ngoi” ndirigoti kpakpanga bbʉ. Sala ko nji ná saa na, ko adi “Mungu dzá dada krʉ kʉ ná lo le famu nari djolu ná ngoi” ba.—Flp. 4:6, 7. w22.01 18-19 §17-19
Mbʉnji dyi, Bi 6 ddo 23
Kpa ngʉ loja . . . mitume vʉe nanga ná lo djo.—Mdo. 16:4.
Ko uri u ko thí nǎ ro krʉ Yova adi krʉ ddo ró chø kʉ ná lo dhé nji. Nì mai ri kʉ føro, nja saa na ri ka ndi é kpakpa ko li ko thí Yova li chutso ddadha dho ná kpa djo. Njaro ko ka ko dhuri ko tso, Yova dhó Tengenezo nǎ daraka ro bbʉni dhó ná kpa ká chutso ddá Yova ji nari bbai bbʉbbʉ inga ndima ji nari bbai. Njati ko li ko thí nzá i dz’ djó Yova chutso ddá chulu ná kpa djo ró, ri ka ndi é kpakpa ko li ko thí Yova djo dhonalo Yova maddi li ndi thí kpa djo. Njʉ Yova adi chutso ddá ndidhó dz’ djó Tengenezo dho “Nyodyu dhi chi njí dhi noke chulu.” (Mt. 24:45) Karne ya kwanza nǎ ngʉ chutso ddá ná kpa bbai, fø noke Mungu dzá ndrŭ djo nganja dz’ djolu gble ndirigoti ke chutso ddá kutaniko nǎ wazee dho. Ndirigoti wazee adi fø chutso ddadha bbʉ kutaniko nǎ ndrŭ dho. Ko adi ko li ko thí Yova dhó chutso ddadha djó nari dhǒ kedhó tengenezo ndirigoti wazee dhó ro ko ba ná chutso ddadha dho ko ngarr nari chulu. w22.02 4 §7-8
Zanji dyi, Bi 6 ddo 24
Nzɨ ko njeni bblo lo njidha dho.—Gal. 6:9.
Ko e hwè na ndirigoti ko nanga adi jini bbo ko kʉ Yova dzá Dimu nari dho! Ko adi hwè ba njati ko kó “ni thí kʉ bblo choro nŭnŭ di ná shinga badha dho ná ke” tsotso ndi chu bbʉbbʉlo ná saa na. (Mdo. 13:48) Ko adi ko mbu Yesu bbai. Ke “bangʉe hwè bbo” ke unakpa d’rangʉe ndima ba ná bblo lo lod’radha dhi njí kana ná saa na. (Lu. 10:1, 17, 21) Mutume Paulo d’rangʉeri Timoteo dho: “Arø ni ró, ni ddi ndrŭ dho ná lo na.” Paulo pongʉeri ri ki: “Ni njiri fø ró, ni si ni nganga gø, nidhó lo rr ná ndrŭ ma na.” (1 Ti. 4:16) Lod’radha dhi njí adi ndrŭ gøgø. Ko adi rø ko ró bblo dhonalo ko kʉ Mungu dhó Pidhinga tsena raia. Ko adi riji ko nji ná lo bbʉ madha Yova dho ndirigoti ri tso nju ndrŭ dho ko d’ra ná lo na maddi. (Flp. 1:27) Ko adi ‘rø ko ró longaddidha dhi njí kana’ matayarisho ko nji lod’radha dho ndirigoti ledha ko nzǐ Yova tsó nari chulu. w21.10 24 §1-2
Yenga dyi, Bi 6 ddo 25
Anitho ø le dha ni ro.—Kol. 3:10.
“Ø le dha” kʉ le ddi ná lo ma, le nji ná lo ma krʉ kana le Yova dhó sifa dyø nari. Ddikpa ke ka ndi thó ø le dha ndi ro Mungu dzá roho dhó tunda ndi dhǒ nari chulu, ke ribba roho takatifu lé ndidhó ngaddidha ma, ndi nji ná lo ma na thika. Loroji na, fø ke ka ndi ji Yova ma, ndidzá ndrŭ ma na. (Mt. 22:36-39) Ke ka ndi b’o ndidhó hwè ronga, rie kpakpalo na ma ndi hwini ri ró. (Yak. 1:2-4) Ke ka ndi é ngoi nji ná ke. (Mt. 5:9) Ke ka ndi é ngatsovedha na, ndirigoti zølo na nja ndrŭ lai djo. (Kol. 3:13) Ke jirie bblo kʉ ná lo, ndirigoti ke adi fø lo njinji. (Lu. 6:35) Ke adi ridho ndi nji ná lo chulu ndi kʉ kpakpa kʉ ná udha na ndidzá ra nǎ Baba djo. (Yak. 2:18) Ke e hwè na dhé, chø ma nja ndrŭ di ndi chø ná saa djo, ndirigoti ke adi ndi ronga tso chocho mbudha kana.(1 Ko. 9:25, 27; Tit. 3:2) Ndiro ko thó ø le dha d’e, ringani ko rá anzi Wagalatia 5:22, 23 nǎ le zø ná sifa krʉ ko dhǒ nari na, ndirigoti nja maandiko nǎ kʉ ná sifa ma na. w22.03 8-9 §3-4
Wanzia dyi, Bi 6 ddo 26
Aningʉ ma dyø ná ndrŭ.—1 Ko. 11:1.
Wazee nzá ka ndima dyø mutume Paulo dhó loroji nyumba kwa nyumba ndima lod’ra nari chulu dhé ri, ro kpa ka ndima njí ri fø krʉ chulu ndima lod’ra nari na maddi. (Efe. 6:14, 15) Paulo bbai, wazee ka ndima bbʉ formasio lod’radha dhi njí kana watumishi wa huduma dho inga nja ndrŭ dho. (1 Pe. 5:1, 2) Ro ri nzá ngani wazee dho bbʉni ná njí cho kpa ronga tso lo kpa d’ra nari ró ri. (Mt. 28:19, 20) Ndiro ndima njí ndima dho ringani ndima njí ná njí krʉ d’e, nja saa na wazee adi nja kʉ ná njí gʉgʉ. B’lo ndima ddinga ndirigoti ndima nji sala nari goti, kpa ka ndima vʉri ndima njí nzá ka ndi cho ndima ronga tso bbo na mana kʉ ná lo ndima nji nari ró ná njí. Føri kʉ kpa di ibada ya familia nji krʉ yenga ddo ró nari ma, kpakpanga na kpa lod’ra nari ma, kpa ndima dhi nzø zoeza lod’radha dhi njí dho nari ma na. Kpa ka ndima uri u nari kʉ, ndima jiri ndima njí bbo nǎ mana kʉ ná njí nari Yova famu nì. w22.03 27 §4, 7; 28 §8
Ronji dyi, Bi 6 ddo 27
Nzɨ ni nji le ndí ró le hwi ná ndrŭ do, nzá ndima ka ndima hwi ledhó nafsi ro.—Mt. 10:28.
Ni ká no Yova dzá Dimu ni ngʉ nari njí ni do ngʉ nji nari nga ngbà? Njaro ni ngʉ adi ni mbu nzá ka ndi d’ralo ndrŭ dho nyumba kwa nyumba nari bbai. Njaro ni do ngʉ adi nji nidhó kau ma, nidhó familia nǎ ndrŭ ma na ngʉ adi nidhó lo gʉgʉ nari dho. Njati rie fø ró, ni ka ni famu ngbaribbai ma nidhó mwanafunzi dhó lo kʉ nari ngbà rie fø ke adi ndi mbu ri ró. Yesu chungʉeri nari kʉ, fø di ná do ka ndi njí nja ndrŭ ngbà. Ke lingʉe ndi unakpa kpakpa ndiro nzɨ do cho kpa ronga tso Yova dho ndima njínji nari ró d’e. (Mt. 10:16, 17, 27) Ako nidhó mwanafunzi tsotso ndiro ndi d’ra ndi chu ná lo nja ndrŭ dho d’e. Njaro Yesu unakpa na do tangʉe ke chongʉe kpa lod’radha dho ná saa na. Ro Yesu kongʉe kpa tsotso ndiro kpa chú lo kpa d’ra ná nga, ndirigoti ngbá lo ma kpa ka ndima d’ra nari d’e. (Mt. 10:5-7) Yesu ká ni ka ni dyø ngbaribbai? Ako nidhó mwanafunzi tsotso ndiro ke chu ngbaga ma, ndi ka ndi d’ralo nari d’e. Loroji na, ni ka ni dhuri ke tso, ke ká chu Biblia nǎ lo ji ndima chu ná ndrŭ ro ngbà. Rie fø ró ako ke tsotso Biblia nǎ dhʉdhʉ kʉ ná lo na ndiro ke chu ngbaribbai ma ndi ka ndi d’ralo nja ndrŭ dho nari d’e. w21.06 6 §15-16
Gbonji dyi, Bi 6 ddo 28
Ma si ndrŭ tsɨ krʉ nanga jaja, ndirigoti krʉndrŭ tsɨ dhó ji le ji ná ritsi si tsu fø dza na.—Hag. 2:7.
“Sese saa kana dhé, d’uka ma, drrdrr ndrŭ chingʉe ná bbobbo dza ma na glungʉeni krʉ. Krʉ kʉ ná ndrŭ thí bangʉe njedha bbo fø lo dho . . . Bi kʉ ná ndrŭ ngʉ ripo fø lo njingʉeni chøchø miniti aro kana dhé. Ro, ma dho fø lo ngʉ njani bicha njini nari bbai.” Fø lo pongʉe nari kʉ 2015 na gøngʉe ná ndrŭ Nepal na dangʉe ná rɨ (matetemeko ya inchi) goti. Ro, i ddo ró ja ndrŭ tsɨ nanga ja ná lo ro kʉ thé, ná fø lo njini krʉ ngalu. Nabi Hagai tingʉe lo fø lo djo. Ke ndingʉeri: “I ri kʉ bbasøda dhi Mungu Yova po ná lo, ‘Ddi ina ki, sese nga goti ma si ra ma, dz’ ma na nanga jaja.’” (Hag. 2:6) Nabi Hagai d’rangʉe nari nga kʉ rɨ nganga da ndi sanga nari ri. Fø nga rɨngana Hagai tilo djo ná lo bblo lo si njini nari dhǒ. Yova nganga ripo ko dho: “Ma si krʉ kʉ ná ndrŭ tsɨ nanga jaja, ndirigoti ndrŭ tsɨ krʉ dhó ji le ji ná ritsi si tsu fø dza na, ma si i dza nanga lɨlɨ kadha na.” w21.09 14 §1-3
Thonji dyi, Bi 6 ddo 29
Ni chieni ma na krʉ ddo ró madzá kpakpalo kana.—Lu. 22:28.
Njati ni ji ni njí kau ddikpa ke na ró, ni adi loti ke na ndirigoti ni adi ngbaribbai ma ni ni mbu nari d’ra ke dho. Yova na ko kau nji nari ma kʉ føi. Njati ko di kodhó ngaddidha d’ra ndirigoti ko ko mbu nari d’ra ke dho sala nǎ ró, føri ridho ko u ke u ndirigoti ko chu nari kʉ ke ji ko ji. (Zb. 94:17-19; 1 Yo. 5:14, 15) Adi ni tso gba bblo kʉ ná kau na; kpa kʉ Yova bbʉ ni dho ná kado. (Yak. 1:17) Kodhi ra nǎ Baba dhori ndi ngaddi nì ko djo ke bbʉ kiroho nǎ familia ko dho nari chulu, føri kʉ ko djoi ma, ko vei ma na kpa adi jidha dhǒ ko dho “krʉ saa ró.” (Mez. 17:17) Kolosai nǎ Wakristo dho, mutume Paulo ndingʉe ná barua nǎ ke tingʉe ndi tsotso koe ná le-djoi ró dho, ke pongʉeri “føri ngʉe bbo pɨ ma iso ná kpa.” (Kol. 4:10, 11) Yesu ma bangʉe hwè bbo ddi le tsotsokodha ndi bangʉe ndidhó kau dhó ro nari dho, føri ngʉe malaika ma ndirigoti ndrŭ maddi. (Lu. 22:43) Ko di ko nanga d’o ná lo d’ra dhidhi kiroho nǎ ná Mukristo dho ró, føri na mana nga kʉ ko kʉ zaifu ri, ro føri ka ndi kó ko tsotso ko. w21.04 24-25 §14-16
Mbʉnji dyi, Bi 6 ddo 30
[Jidha] adi krʉ kʉ ná lo djonga tso tsitsi, krʉ kʉ ná lo u u, krʉ kʉ ná lo b’ob’o, krʉ kʉ ná lo tso veve.—1 Ko. 13:7.
Ni ká ka njiri ngbǎ njati ni lai Mukristo nji che kʉ ná lo ni ró ró? Ringani ni njí kpakpanga nja ni njí ngoi d’e. Ad’ra ngbaribbai ma, ni ni mbu nari Yova dho. Anziri Yova lé chelo nji ni ró ná le ronga le, anziri ke kó ni tsotso ni nja fø le dhó bblo kʉ ná sifa dhonalo Yova jirie fø le, ledhó fø sifa dzá lo dho. (Lu. 6:28) Njati ni njari nari kʉ, ni nzá ka ni vi adjoni nji ni ró ná lo nga ri ró, aneri ni tilo fø ke na fø lo djo. Achuri nari kʉ, nidhi djona nzá ka ndi neri ndi njí chelo ni ró ndana ri. (Mt. 5:23, 24) Lo ni ti ke na ná saa na, aneri ni famu kedhó bblo kʉ ná ngaddidha. Njati ke jiri ndi njí ngoi nzá ni na ró ká ni ka ni njí addu? “Adi ke zø njinji.” Adi adjoni tso veve. (Kol. 3:13) Bbo na mana kʉ ná lo kʉ, nzɨ ni bbari ni nanga kani ke djo, dhonalo ri ka ndi sa ni kana kau sa Yova na. Nzɨ bba ddikpa lo ro ma bʉ ni thí ro ddi. Njati ni njiri fø ró ni ka ni dhori ni ji Yova bbo pli nja ritsi krʉ djolu.—Zb. 119:165. w21.06 23 §15