ETERNET djó kʉ ná Watchtower LIBRARY
Dzamu dhi Munara
ETERNET DJÓ KɄ NÁ LIBRARY
Baledha
  • BIBLIA
  • VICHAPO
  • NJUDHA
  • es23 paje 67-77
  • Bi 7

I sehema nǎ, tayari kʉ ná video ro nga

Dzodzo dhé, video ni telesharje ro ddikpa kosa banga.

  • Bi 7
  • Ddo ró le zø ná Andiko—2023
  • Rere lo djǒ
  • Zanji dyi, Bi 7 ddo 1
  • Yenga dyi, Bi 7 ddo 2
  • Wanzia dyi, Bi 7 ddo 3
  • Ronji dyi, Bi 7 ddo 4
  • Gbonji dyi, Bi 7 ddo 5
  • Thonji dyi, Bi 7 ddo 6
  • Mbʉnji dyi, Bi 7 ddo 7
  • Zanji dyi, Bi 7 ddo 8
  • Yenga dyi, Bi 7 ddo 9
  • Wanzia dyi, Bi 7 ddo 10
  • Ronji dyi, Bi 7 ddo 11
  • Gbonji dyi, Bi 7 ddo 12
  • Thonji dyi, Bi 7 ddo 13
  • Mbʉnji dyi, Bi 7 ddo 14
  • Zanji dyi, Bi 7 ddo 15
  • Yenga dyi, Bi 7 ddo 16
  • Wanzia dyi, Bi 7 ddo 17
  • Ronji dyi, Bi 7 ddo 18
  • Gbonji dyi, Bi 7 ddo 19
  • Thonji dyi, Bi 7 ddo 20
  • Mbʉnji dyi, Bi 7 ddo 21
  • Zanji dyi, Bi 7 ddo 22
  • Yenga dyi, Bi 7 ddo 23
  • Wanzia dyi, Bi 7 ddo 24
  • Ronji dyi, Bi 7 ddo 25
  • Gbonji dyi, Bi 7 ddo 26
  • Thonji dyi, Bi 7 ddo 27
  • Mbʉnji dyi, Bi 7 ddo 28
  • Zanji dyi, Bi 7 ddo 29
  • Yenga dyi, Bi 7 ddo 30
  • Wanzia dyi, Bi 7 ddo 31
Ddo ró le zø ná Andiko—2023
es23 paje 67-77

Bi 7

Zanji dyi, Bi 7 ddo 1

Luti, [malipizi] adi ngoi dhi chølo dhi tunda bbʉ ri na vu ndima ná ndrŭ dho.​—Ebr. 12:11.

Mutegwa le ndrŭ nji ná føri kʉ Yova lø ná chu. Ndirigoti føri ka ndi kó krʉ kʉ ná ndrŭ tsotso ndirigoti chenga nji ná ke tsotso maddi. Kutaniko nǎ nja ndrŭ ka ndima pori wazee njiri che ndima tenga ddikpa ke nari na. Bí i na fø ndrŭ nzɨ adi mutengwa nji ná chelo ro d’ra ri. Ko nzá ka ko chulo krʉ fø lo djo ri. Achuri nari kʉ, baraza la wazee adi njínji Biblia nǎ yadha na ndirigoti kpa adi lod’i “Yova dho.” (2 Ny. 19:6) Ji ni ji ná le le tenga ná saa na, ni rrnga wazee lø ná mupango dho ró, føri ka ndi kó le tsotso le ngʉ Yova ro. Elizabeth pori: “Kodhi kpetsi ngba na ko ngʉ adi ko tso gba nzɨ ná føri ngʉe kpakpa kʉ ná lo ko dho.” Ro Yova ro ke ngʉngʉe nari goti ke njangʉeri nari kʉ, føri e bblo kʉ ná mupango. Luti ke pongʉeri fø lo nǎ ro ndi ba bblo kʉ ná somo bí. w21.09 28-29 §11-12

Yenga dyi, Bi 7 ddo 2

Ke njangʉe njedha kʉ ná mujane, sese dhó valer kʉ ná kichele dhi aro kʉ ná mbøkpa ndi djo ri na ro.​—Lu. 21:2.

Addinga fø mujane djo. Bbʉbbʉ dhé, fø le ngʉ rine ndi bbʉ ritsi bbo Yova dho. Føri dzá lodho le bbʉngʉe bblo pli kʉ ná ritsi Yova dho. Ndirigoti Yesu chungʉeri nari kʉ, fø le bbʉ ná bbʉdha na mana ngʉe bbo Yova dho. Fø lo nǎ ro ko ka ko ba ná somo kʉ: Yova adi hwè ba bbo njati ko bbʉ ritsi ko thí nǎ ro krʉ ndirigoti ko njinjí ke dho kodhó kpakpanga na krʉ ró. (Mt. 22:37; Kol. 3:23) Yova adi hwè ba bbo njati ko di ritsi nji ko dho ri ka ná ngatsi ró! Føri ko ka ko njí ná chu kʉ ko bbʉ kodhó saa ndirigoti kodhó kpakpanga nja ko má Yova d’e, føri kʉ ko d’ralo ndirigoti ko di si njudha dhi ngana. Fø njedha dhi mujane dhó lo nǎ ro ko ba ná somo na ká ko ka ko njinjí ngbaribbai? Addinga kpakpa ni ka ni li ná ndrŭ djo, ndiro kpa churi nari kʉ ndima nji ná lo hwè bbʉ Yova dho d’e. Ni ka ni ddinga ro ddikpa ngó ngʉ ná le-ve djo mai. Njaro le nzani dhe dzá lodho ma ndirigoti ndi lod’ra anziro ndi e rinji nari bbai nzɨ nari dzá lodho ma. w21.04 6 §17, 19-20

Wanzia dyi, Bi 7 ddo 3

Hwè kʉ mbudha tso ve ná ke dho, dhonalo b’lo ke tso uni nari goti, ke si shinga dhi taji ba.​—Yak. 1:12.

Yova chu che kʉ ná i dz’ tso ndi si d’ø ná ddo ngbà. Ke ngatsove ná lo dho bí, kʉ ná ndrŭ chulo ke djo ndirigoti mamilioni kʉ ná ndrŭ njínji ke dho i ddo ró. Fø ndrŭ krʉ nanga adi jini ji dhonalo kʉ Yova dhó ngatsovedha dzá lo dho kpa gøni, kpa chulo ke djo ndirigoti kpa bbʉ ndima ke dho. Njati fø ndrŭ ve ngatso kpø mwisho djo ró, føri si ridho nari kʉ Yova njiri bblo ngatso ndi ve nari na! Nì mai Shetani chelo nji ndirigoti nzadha bbʉ ro, Yova kʉ “hwè dhi Mungu” dhé. (1 Ti. 1:11) Ko maddi ko ka ko ve ngatso hwè na Yova si nji ná lo ko b’o ro. Ke si rili ndi ró dho mani ma, ndidzá bbonga nyi chuni, ke si dz’ djó chelo ma ndirigoti krʉ na ko bani njʉ ná kpakpalo tso d’ød’ø. Akora anzi ngatsovedha na ndirigoti akotøni chi ɨ ko churi ro, kodhi ra nǎ Baba ma ngatsove ddi. w21.07 13 §18-19

Ronji dyi, Bi 7 ddo 4

Nazareti nǎ ro ká bblo kʉ ná ritsi ro ka ndi si ddi? ​—Yoh. 1:46.

Bí kʉ ná ndrŭ nzá ungʉe Yesu karne ya kwanza na ri. Kpa ngʉ ke nja njedha dhi museremala dzá ngba bbai. Yesu ngʉe Nazareti nǎ ke ndirigoti fø bba ndrŭ ngʉ ke nja ngana mana kʉ nari bbai. Nathanaeli ngʉ Yesu unake nari nji, ke pongʉeri i: “Nazareti nǎ ro ká bblo kʉ ná ritsi ro ka ndi si ddi?” Njaro ke ngʉ ngaddi Mika 5:2 nǎ kʉ ná unabi djo, fø unabi ngʉ ripo Masiya ka ndi gøeni Bethelehemu na, nga Nazareti nari. Nabi Isaya d’rangʉeri nari kʉ Yesu dhó mbubai nzá ka ndima lie ndima dyu “kedzá [Masiya] kizazi djo ri.” (Isa. 53:8) Njati kpa bae saa ndima ne lo nanga fø unabi djo ró, kpa ka ndima chueri nari kʉ Yesu ka ndi gøeni Bethelehemu na ndirigoti ke ka ndie Pi Daudi nǎ gø. (Lu. 2:4-7) Føri dzá lo dho Yesu gøngʉeni ná nga djo le d’rangʉe lo Mika 5:2 nǎ. Nde kpakpalo ká ngʉe addu? Ndrŭ vʉngʉe lo nanga lele. Kpa nzá nengʉe lo nanga krʉ Masiya djo tingʉe lo ná unabi djo ri. Føri dzá lo dho kpa nzá ungʉe Yesu ro ri. w21.05 2-3 §4-6

Gbonji dyi, Bi 7 ddo 5

Njati chølo dhi ke . . . ó ma na ro, føri kʉ ddiddi che bbai ma djǒ djó.​—Zb. 141:5.

Biblia tilo le ronga lengʉeni shauri ndima rrngʉe nari djotsina ná ndrŭ dhó bblo kʉ ná loroji djo. Akonja Yobu dhó loroji. Nì mai ke ngʉe Mungu do nji ná ke ro, ke ngangʉe kaka ná ke ri. Ke ngʉ nzani bbo nari dho ke ngʉ loti nzá ndi ne lonanga ro. Fø lo dho ke bangʉe wazi kʉ ná shauri Elihu ma, Yova ma na dhó ro. Yobu ká njingʉeri ngbǎ? Ke pongʉeri ɨ: “Ma ngʉ loti, nzá ma ne lonanga ro . . . ma ngʉ ti ná lo tso ma bbabba ndirigoti ma leni le dz’ hø nǎ ndirigoti hu nǎ.” (Yob. 42:3-6, 12-17) Ke dhongʉe ndi kʉ nyenyenga na nari Elihu bbʉngue ná shauri ndi rrngʉe nari chulu, nì mai Elihu dhó cho ngʉe sese ro. (Yob. 32:6, 7) Nyenyenga ka ndi kó ko tsotso ko njinjí shauri na nì mai ko ko mbu nzá ka ri dho nari bbai ro, inga ri bbʉ ko dho ná le é sese ma ró. Ko krʉ dhó lo uri ko njinjí bbo tunda la roho na ndiro ko ngʉ bblo pli kʉ ná wahubiri ndirigoti bblo pli longaddi ná walimu d’e. w22.02 11 §8; 12 §12

Thonji dyi, Bi 7 ddo 6

Føri ró krʉ kʉ ná ndrŭ si ri utsi d’i nari kʉ, ni kʉ ma unakpa​—njati ni é jidha na nì ni kana ró.​—Yoh. 13:35.

Kutaniko nǎ ndrŭ krʉ dhó bbʉni ná njí kʉ ndima liri ndrŭ krʉ é ngoi na ndirigoti ndima dhǒ jidha ndrŭ krʉ dho. Ko nji ná lo ma, ko po ná lo ma na ka ndi li ndrŭ kpakpa! Ni ká ka ni njiri ngbǎ ndiro ddiro kʉ ndima dhó familia nǎ Yova dzá Dimu ná ndrŭ mbu ndima ngbà kutaniko nǎ ndrŭ ji nari bbai d’e? Adi kau nji kutaniko nǎ ná ndrŭ na. Fø lo ko ka ko njí ø si kutaniko nǎ ná ndrŭ ko kó hwè na nari chulu. (Ro. 15:7) Ri kʉ bblo ko tilo kpa na, ro kodho ringani ko njí nja lo ki maddi. Kodho ringani ko njiri ko kana nga é chøchø kpa na. Føri dzá lo dho adi ridho ni ngaddi ni kpa djo. Nzɨ di che dho kpa ka ndima mbu ndima ná lo dhú kpa tso, ro adi rimbu ni famu kpa bani na ná lo. Nja ndrŭ dho rie kpakpa ndima d’ra ngbaribbai ma ndima ndima mbu nari, ro nzɨ di kpa cho kpakpanga na nja kpa ngʉ nidhó logoti d’e. Fønga rɨngana adi ngadhu kpa tsó akili na ndirigoti amburi ni rr kpa po ná lo. Loroji na, ni ka ni dhú ngbaribbai ma kpa chungʉe bbʉbbʉlo nari kpa tso. w21.06 11 §13-14

Mbʉnji dyi, Bi 7 ddo 7

Ri si ma chu rr, ri sie ddikpa kala nǎ, ndirigoti ri ró rø ná ke sie ddikpa.​—Yoh. 10:16.

Ko adi mbai po bbo Yova dho dhonalo ko adi njínji ddinga ko djoi ma, ko vei ma na “ddikpa kundi bbai” ndirigoti “miya ró rø na ddikpa ke” dhó bbonga tsena! Kitabu Tengenezo Yenye Kufanya Mapenzi ya Yehova (Swahili Congo) nǎ paje 165, ripo: “Nja ko tso gbani ddi d’e kodho ringani ko njí kpakpanga.” Kodho ringani ko “di ko djoi ma, ko vei ma na nja Yova adi kpa nja nari bbai.” Yova nyǒ njí ko krʉ kʉ mana na bbo “rere nzø” ko kʉ ro. Ni ká adi ni djoi ma, ni vei ma na nja Yova adi kpa nja nari bbai nì? Ni nji ná kpakpanga Yova adi nja mana na bbo nja ni ko kpa tsotso ndirigoti ni b’o kpa ronga d’e. (Mt. 10:42) Ko jirie ko lai nja Wakristo ji. Føri dho kodho ringani ko “njí kpakpanga ndiro nzɨ ko nji ko djoi ma, ko vei ma na thí ka ndi bʉ ná lo ró.” (Ro. 14:13) Ko adi ko djoi ma, ko vei ma na nja ko djolu pli ndirigoti ko adi riji ko njí kpa zø ko thí nǎ ro krʉ. Ko nzá ka ko bbari nja ndrŭ nji ná lo bʉ ko thí ri. Fønga rɨngana “akone ngoi dhi lo ndirigoti ddi ka ndi gba ko tso ná lo.”​—Ro. 14:19. w21.06 24 §16-17

Zanji dyi, Bi 7 ddo 8

Mungu . . . adi rili ri dhidhi. ​—1 Ko. 3:7.

Mungu dzá lo ko di zø ndirigoti ko di njínji ri nǎ shauri na ndirigoti kedhó tengenezo bbʉ ná shauri na ró, ko ka ko dho Kristo dhó sifa, ndirigoti kodhó lochudha ka ndi dhidhi Mungu djo. Yesu bbʉngʉe ná loroji nǎ ke d’rangʉe ngbaribbai ma ko d’ra ná Pidhinga dzá hwè lo-i kʉ nyokpa bbai nari, ri ka ndi dhi dzodzo ngbà ji Mungu dzá lo ná ndrŭ thí na. Ke pongʉeri: “Nyokpa nga nari ma, ngbaribbai ri dhi nari ma nzɨ ke (inga zʉzʉri ná ke) adi chu ri. Ya kwanza ri tsukpa adi si, føri goti ri adi pʉpʉ, ndirigoti nyokpa adi si ri nǎ ro.” (Mk. 4:27, 28) Yesu tungʉe ri nanga nari bbai, zʉ le zʉ ná tsu adi dhi dzodzo nari bbai Pidhinga dzá lo u ná ke ka ndi dhi dzodzo Mungu dzá lo kana. Loroji na, Biblia nǎ longa ko ne na ná kpa kana nga di ngʉ chøchø Yova na ró, ko adi bí kʉ ná lo thika kpa ø nari nja. (Efe. 4:22-24) Ro ringani ko nonga nari kʉ Yova i adi rili fø nyokpa dhidhi. w21.08 8-9 §4-5

Yenga dyi, Bi 7 ddo 9

Ri kʉ bblo pli le nanga jini nja le nja ná ritsi dho, le ji ná ritsi le ne nari djolu.​—Muh. 6:9.

Hwè ko ka ko ba rie bblo chulu ko rine ró. Ddikpa le nanga di jini “nja ndi nja ná ritsi dho ró” le ka ndi é hwè na ndidhó kʉ ná ritsi dho, føri ka ndi é ke bani na ná hali maddi. Føri rɨngana, ddikpa le di nzá ka ndi bani ndidho na ná ritsi ne ró le tsotso ro nzá ka ndi koni ri. Ro fø lo nǎ ro ká ko ka ko ba ngbá somo? Ndiro ko ba hwè d‘e, ringani ko li ko thí nì kʉ kodhó ná ritsi djo ndirigoti ngbà ko ka ko ba ná ritsi djo. Ri ká ka ndi ka bbʉbbʉ ko nanga jini kodhó kʉ ná ritsi dho? Bbʉbbʉo, ri ka ndi kaka. Ro ri ka ndi kaka njati ko nanga di jini ji ko “nja” ná ritsi dho ró. Føri ká ko ka ko njí ngbaribbai? Nja ko chu fø lo d’e, akonja Matayo 25:14-30 nǎ Yesu tingʉe lo djo ná talanta dhi loroji ndirigoti akonja ngbaribbai ma ko ka ko ba hwè ndirigoti ko nanga ka ndi jini kodhó njʉ kʉ ná hali dho nari. w21.08 21 §5-6

Wanzia dyi, Bi 7 ddo 10

Ma di bbo ngbeni ná ngana ndirigoti takatifu kʉ ná ngana, ro bʉ thí bʉni ná ndrŭ ma, nyenyenga dhi ndrŭ na maddi.​—Isa. 57:15.

Yova adi ngaddi bbo “njedha na thí kʉ ná ndrŭ ndirigoti bʉ thí bʉni ná ndrŭ djo.” Wazee ma na, ko krʉ ka ko li bʉ thí bʉni ná le-djoi ma, le-vei ma na kpakpa. Ko ka ko li kpa kpakpa ná ddi chu kʉ, ko li ko dyu li kpa ro. Yova adi riji ko d’rari ndidzá chembø dho nari kʉ ndi ji kpa bbo. (Mez. 19:17) Ko ka ko kó ko djoi ma, ko vei ma na tsotso nyenyenga na ndirigoti kiasi na ko kʉ nari chulu. Ko nzɨ adi rine ko nja ko pli nja ndrŭ djolu ri ndiro nzɨ kpa tsu tamaa na ró. Fø nga rɨngana ko adi ko li kpakpa ko kana kodhó uwezo chulu ndirigoti kodhó lochudha chulu. (1 Pe. 4:10, 11) Ngbaribbai ma Yesu ngʉ adi njini ndi unakpa na nari ka ndi kó ko tsotso ko chu ngbaribbai ma ko ka ko njini nja ndrŭ na nari. Ke ngʉe Bboke, ro ke ngʉe “bblo kʉ ná nyi na ndirigoti nyenyenga na.” (Mt. 11:28-30) Ke ngʉ dhʉdhʉ tso o ná lo ddi ndrŭ dho ndirigoti ke ngʉ bbʉ ná loroji ngʉ nyenyenga dhi ndrŭ thí ronga lølø.​—Lu. 10:21. w21.07 23 §11-12

Ronji dyi, Bi 7 ddo 11

Adhunga . . . nidhó ngó ngʉ ná ndrŭ tso ndirigoti kpa si longa tutu ni dho.​—Kum. 32:7.

Adi saa ba ndiro ni tilo ngó ndrŭ na d’e. Bbʉbbʉ dhé, kpa nzá ka ndima njanga bblo ri, kpa nzá ka ndi bbi lele ri, kpa ka ndima tilo dzodzo. Ro kpa adi riji ndima é kpakpa dhé ndirigoti ndima “ró dho é bblo” Yova nyǒ njí. (Muh. 7:1) Ano addudho ma Yova adi kpa nja mana na nari nga. Adi heshima bbʉ kpa dho. Adi Elisha bbai. Ke ungʉeri ndima kana nga di chøchø Eliya na ndima kana nga ndoni Eliya na nari njí. Gbo ina ke pongʉeri Eliya ni: “Ma nzɨ ni ro bba ri.” (2 Fa. 2:2, 4, 6) Ni ngaddi ngó ndrŭ djo nari adi dhǒ nga ro ma ni dhu kpa tso nari chulu. (Mez. 1:5; 20:5; 1 Ti. 5:1, 2) Adi ri ro dhu ɨ mai: “Jadda ni ngʉe ná saa na, addui ká lingʉeri ni uri nari kʉ ni ba bbʉbbʉlo?” “Addui ká kongʉe ni tsotso ndiro ni kana nga ngʉ chøchø Yova ma na d’e?” “Addui ká ngʉ adi ni tsotso kó ndiro ni di hwè na Yova dzá njí kana d’e?” (1 Ti. 6:6-8) Arr kpa ndima dhó lod’ra ni dho nari. w21.09 5 §14; 7 §15

Gbonji dyi, Bi 7 ddo 12

Ri kʉ Mungu ji ná lo dho i ke ni cho ndi bbʉ ritsi njidha dhi tamaa ma, kpakpanga ma na ni dho ri.​—Flp. 2:13.

Ko ká adi lod’ra ndirigoti longaddi ndiro ndrŭ ngʉ Yesu unakpa d’e addudho? Ko ji Yova nari dho. Njati ni di kpakpanga nji ni d’ralo ndirigoti ni ddi longa nrdŭ dho ró, føri na ni ridho ni ji Yova. (1 Yo. 5:3) Addinga i lo djo: Ni adi lod’ra ndrŭ dho ni ji Yova nari dho. Nde fø yadha dho ni ngarr nari ká kʉ sʉsʉ? Føri nga kʉ sʉsʉ ri. Ya kwanza, ni ngangʉe lod’radha tso ná saa na, ni ká do ngʉ nji? Ni do ngʉ nji o! Ro ni chungʉeri nari kʉ føri kʉ Yesu ja ni njí ná lo ndirigoti ni rrngʉe nga rr fø yadha dho. Ndirigoti b’lo ni d’ralo bicha nari goti ringʉe dhʉdhʉ ni dho ni nga lod’radha tso. Nde, ni ká adi ni mbu ngbaribbai Biblia nǎ longa ddidha djo? Ni di ngaddi fø lo djo ró, føri ká adi ni nanga keke? Njaro keo. Ro njati ni di sala nji ndirigoti ni di rinzi Yova kó ni tsotso ró, ke ka ndi bbʉ kpakpanga ni dho nja ni njí ndrŭ wanafunzi d’e. w21.07 3 §7

Thonji dyi, Bi 7 ddo 13

Ringani le li alama kpa thó thá djó ri djo inga kpa nyi tso.​—Ufu. 13:16.

Drrdrr nokpa ro le ngʉ adi alama li theinga dho ndiro le chu ke ká kʉ ie dhó nokpa ma nari d’e. Føri bbai i ddo ró maddi ndrŭ krʉ rib’o ndima ka si alama ba ndima thó thá djó ri djo inga ndima nyitso. Kpadhó ngaddidha ma, kpa nji ná lo ma na ridho kpa kʉ politiki nǎ ndrŭ. Ko ká si ri u ko ba fø alama inga ko kó i dz’ djó pidhinga tsotso? Nzá u fø alama ná ndrŭ si bani kpakpalo na ndirigoti kpa si tsu hatari na. Ufunuo dzá buku ripo ɨ: “Ddikpa le ma nzá ddi ka ndi dzi ritsi inga ndi dzi ritsi nanga ro ri, rie nga alama kʉ ró ná le dhé ri ró.” (Ufu. 13:17) Ro Mungu dzá ndrŭ chu Mungu si nji ná lo ngbà alama kʉ ro ná ndrŭ ró Ufunuo 14:9, 10 ripo nari bbai. Fø alama le ka le u nari rɨngana, kpa si ri ndi ndima thó thina nari kʉ, “ndima kʉ Yova dzá ndrŭ.” (Isa. 44:5) Iri kʉ ko ka ko dhori Yova dho ko tøni chi ná saa. Yova sie hwè na ndi pori nari kʉ ko kʉ ndidzá ndrŭ! w21.09 18 §15-16

Mbʉnji dyi, Bi 7 ddo 14

Chuma adi ndi kudjo té chuma na nari bbai, ddikpa ke adi ndidhó kau kudjo té.​—Mez. 27:17.

Ndiro ko d’ralo bblo d’e, nja ndrŭ ma ka ndima kó ko tsotso ddi. Mutume Paulo kongʉe Timoteo tsotso ndi chú lod’radha dhi njí bblo ndirigoti ke lingʉe ke kpakpa ndiro ke kó nja ndrŭ tsotso maddi lod’radha dhi njí kana d’e. (1 Ko. 4:17) Timoteo bbai, ko ma ka ko chulo ddi kutaniko nǎ ngbà chulo ná ndrŭ dhó ro. Ndirigoti ko ka ko njí sala ndiro Yova kó ko tsotso d’e. Anziri Yova kó ni tsotso krʉ saa ró lod’radha dhi njí kana. Kodho loji roho takatifu ndiro ri kó ko tsotso krʉ ko nji ná lo kana d’e. (Zb. 127:1; Lu. 11:13) Ni rinzi Yova kó ni tsotso ná saa na, ad’ra nidhó loji ná lo nganga ke dho. Loroji na, anziri Yova ddá chutso ni dho ngbà ka ndi u lo ná le dhi ngana. Ringani ko di saa ba nja ko ne Biblia nǎ longa d’e. Mungu dzá lo ripo: “Anineri ni chu bblo kʉ ná lo, bblo kʉ ke nyo djó ná lo ndirigoti Mungu dzá kaka ná lo.” (Ro. 12:2) Biblia nǎ longa ko ne ná saa na ko ka ko chú Mungu bblo. Føri dho ko chu ná lo ko d’ra ndrŭ dho ná saa na, kpa ka ndima d’i ri utso nari kʉ ko u fø lo u. w21.05 18 §14-16

Zanji dyi, Bi 7 ddo 15

Nidzá njí nga kʉ pá Bboke nǎ ri.​—1 Ko. 15:58.

Njaro ni Biblia nǎ longaddi ddikpa le dho. Ni nji kpakpanga ni é bblo kʉ ná mwalimu ndirigoti ni nji sala bbo mwanafunzi dzá lo dho. Ro ke nzɨ njí ro nji ndi chu ná lo na ri. Føri dho njaro ni riji ni bbá ke dho ni longaddi nari tso bbá. Njaro ni longaddi dho ná ndrŭ tso ro nzá d’erie si batiso djo ri. Føri ká kʉ nidhó kosa inga føri na mana ká kʉ ni nji ná njí nzɨ Yova nyǒ tho ri? Anja ngbaribbai ma Yova adi ni nji ná lo nja nari. Kpakpanga na ko nji ná njí ma, kodhó ngatsovedha ma na Yova njanja. Yova nanga adi jini bbo ko lod’ra bidii na nari dho, njati ndrŭ rr kodhó lo nzá ma ró, ko ridho ko ji ke ji. Paulo ndingʉeri: “Mungu nga kʉ nzɨ adi chø lo nji ná ke ri, ndiro ndi vi nidhó njí nga ndirigoti ndi ró dho dho ni dhò ná jidha nga watakatifu dho ni njinjí ndirigoti anzi ni ra ri njidha na nari chulu nari nga ri.” (Ebr. 6:10) Yova adi ko nji ná kpakpanga ma, kodhó jidha ma na nja nì, njati rie nzá ma ko d’e longaddi ndrŭ dho ndima tso si kpø batiso djo ri ró. Ni ka ni njínji Paulo bbʉngʉe ná shauri na njʉnga dhi andiko nǎ ndi kʉ ro. w21.10 25 §4-6

Yenga dyi, Bi 7 ddo 16

Baba bbʉ madho ná ndrŭ krʉ si si ma dhi ngana ndirigoti ma nzɨ si madhi ngana si ná le ro di ri.​—Yoh. 6:37.

Yesu dzá bblonga ma, kedzá jidha ma na ngʉ njani ke unakpa ma na ke ngʉ di nari chulu. Ke chungʉeri nari kʉ, ndi unakpa dhó uwezo ma, kpadhó hali ma na kʉ njonjo. Fø ri ka ndi lieri kpae njonjo kʉ ná daraka na ndirigoti nzɨ kpa d’ralo ddiddi. Ro ke ngʉ kpa krʉ ngʉ nji lod’radha dhi njí kana ná kpakpanga nja mana na bbo. Fø lo ke famu nari ke dhongʉe talanta dhi loroji ndi bbʉ nari ró. Fø loroji nǎ, bbonga bbʉ njí ndidhó nokpa krʉ dho “kpadhó uwezo kʉ nari bbai.” Akili dhi aro kʉ ná nokpa kana ddike bangʉeri pli ndi lai ke djolu. Ro bboke pongʉe ddikpa lo fø kpa krʉ dho: “Ni njiri bblo, bblo ndirigoti chí kʉ ná nokpa!” (Mt. 25:14-23) Krʉ ddoro Yesu dhó nyi e bblo ndirigoti ke adi jidha dho ko dho. Ke churi nari kʉ kodhó uwezo ma, kodhó hali ma na kʉ njonjo ndirigoti ke kʉ hwè na kodhó uwezo kʉ ná ngatsi ko nji ná njí dho. Kodho ringani ko dyø Yesu dhó loroji. w21.07 23 §12-14

Wanzia dyi, Bi 7 ddo 17

Ma nzɨ dda ma thó madzá bboke djo ri.​—1 Sa. 24:10.

Pi Daudi nzá dhongʉe zølo krʉ kʉ ná lo kana ri. Loroji na, Nabali kpakpa dhó lo ronga dyungʉe ná ke tingʉe lo nga dhi heshima ro, ndirigoti ke pongʉeri ndi nzɨ bbʉ nyo Daudi ma dho, ndidhó bbasødda ma na ri ná saa na, Daudi ngʉe thø na bbo nari dho ke pɨngʉeri ndi ché ke ma, ndi bbá dza nǎ ndrŭ ma na. Ro, Nabali bbá le Abigaili ngʉe bblo kʉ ná le, ngatsove ná le, nari dho le njingʉeri lele ndi rá nyo mba Daudi ma dho, ndidhó bbasødda ma na, føri dho Daudi nzá chengue Nabali ma, ndi bbá dzá nǎ ndrŭ ma na ri. (1 Sa. 25:9-22, 32-35) Daudi nanga kangʉeni bbo ná saa na ke vʉngʉeri ndi ché Nabali ma, ndi bbá dza nǎ ndrŭ ma na. Ndirigoti luti Daudi pongʉeri nari kʉ Natani tilo djo ná fø mali ba dho ringani le hwi ndi hwi ndi nji ná che lo djó. Nì mai Daudi ngʉe bblo kʉ ná ke ro, ká addudho ke dyungʉe lo ronga chembø d’u ná fø mali dhi ke dho? Addinga ngbaribbai ma Daudi ngʉ ndi mbu fø saa na nari djo. Daudi dhó zamiri ngangʉe bblo ri. Njati ddikpa le di lo ronga dyu nja ndrŭ dho ró, føri adi ridho fø le ma kana kau nga kʉ bblo Yova nari. w21.10 12 §17-18; 13 §20

Ronji dyi, Bi 7 ddo 18

Nidho ringani ni é watakatifu dhonalo, ma kʉ mutakatifu. ​—1 Pe. 1:16.

Njʉnga dhi andiko nǎ ko churi nari kʉ, ko ka ko dyø Yova, bbo pli kʉ ná loroji ndi ra bani takatifu le kʉ nari kana ro. Kodho ringani ko é tse ko tse ro kodhó nyi kana. Føri ka ndi njani nzá ka ndi ka ná lo bbai dhonalo ko kʉ nzá kaka ná ndrŭ. Petro ma njingʉe nja kʉ ná kosa ro ddi, ro kedhó loroji ridho ri ka ndi kaka ko ngʉ watakatifu. Bí ina bí kʉ ná ndrŭ adi riddi nari kʉ, mutakatifu kʉ nari kʉ nzɨ ngagbo ná ke, dini dhi ru tho ná ke ndirigoti nzá ji waya waya ná ke. Ro føri nga kʉ bbʉbbʉlo ri. Biblia ripo Yova kʉ mutakatifu ndirigoti “hwè dhi Mungu.” (1 Ti. 1:11) Ke dho madha bbʉ ná ndrŭ le nzǐ “hwè dhi ndrŭ.” (Zb. 144:15) Yesu ongʉe o njonjo rine ndima njani nja ndrŭ ró ro ndima tho ná ru chulu ndirigoti chi rine ndima njani ndrŭ nyodjó ná kpa na. (Mt. 6:1; Mk. 12:38) Ddiddi ko kʉ bbʉbbʉ Wakristo nari bbai, ko chu takatifu le kʉ nari na mana ká kʉ addu ma nari Biblia chulu. Ko churi nari kʉ Mungu nzá ka ndi pori ko nji nzá ka ndi njini ko dho ná lo ro ri. w21.12 2 §1, 3

Gbonji dyi, Bi 7 ddo 19

Ringani ni ji Yova nidzá Mungu ni thí nǎ ro krʉ.​—Mk. 12:30.

Hwè na Mungu bbʉ bí kʉ ná ritsi ko dho, føri kana ro ke bbʉ ko dho ná ddikpa uwezo kʉ ko bbʉ madha ndi dho. Ko adi ridho Yova dho ko ji ke ji ‘kedzá yadha ko nji nari chulu.’ (1 Yo. 5:3) Yova jiri ko rrnga ndi dho ná ddikpa chu kʉ, Yesu jangʉe ná lo ko nji nari chulu. Føri kʉ ko nji ndrŭ wanafunzi ndirigoti ko bbʉ batiso kpa dho. (Mt. 28:19) Ndirigoti ke jangʉeri ko jini ji ko kana. (Yoh. 13:35) Yova adi riji ngbà jiri ndima rrnga ndi dho ná ndrŭ si ndidzá familia kana ndi madha dho. (Zb. 15:1, 2) Adho jidha nja ndrŭ dho. Jidha kʉ Yova dhó bbo sifa. (1 Yo. 4:8) Yova dhongʉe jidha ko dho nzá ko d’e ndi chu go ro. (1 Yo. 4:9, 10) Ko adi ke dyø nja ndrŭ dho ko jidha dho nari chulu. (Efe. 5:1) Ko ka ko dhǒ jidha ndrŭ dho ná chu kʉ ko kó ndrŭ tsotso ndima chulo Yova djo go saa kʉ ro. (Mt. 9:36-38) Fø ko rinji nari na ko rili kpa ngʉ Mungu dzá familia kana. w21.08 5-6 §13-14

Thonji dyi, Bi 7 ddo 20

Ddikpa le ro ma nga ddi kʉ i di ná bbo jidha na ri.​—Yoh. 15:13.

Yesu jingʉe ndidzá Baba bbo nari dho ke bbʉngʉe ndi bbʉdha Yova dho ndirigoti ndrŭ djotsina. (Yoh. 14:31) Yesu dhongʉe ndi ji ndrŭ bbo nari i dz’ djó ndi ngʉe ná saa na ndi ngʉ nji ná lo chulu. Krʉ ddo ró, Yesu ngʉ adi ndi kʉ jidha na ndirigoti zølo na nari dhǒ, rie gʉ ma ndrŭ ndidhó lo gʉ ri ró. Bbo pli ke dhongʉe ndidhó jidha ndrŭ dho Mungu dhó Pidhinga djo ndi loddi ndrŭ dho nari chulu. (Lu. 4:43, 44) Føri goti, Yesu dhongʉe bbʉ na lé le bbʉ ná jidha Mungu dho ndirigoti ndrŭ dho, ndi ungʉe ritso ndi nzani nza ndirigoti ndi dhedhe chenga dhi kpa thó thi na nari chulu. Fø ke njiri nari chulu, ke klo choro nŭnŭ di ná shinga dhi chutso ko krʉ dho. Ko adi ko bbʉ Yova dho ndirigoti ko ba batiso ko ji kodhi ra nǎ Baba ji nari dho. Føri dho Yesu bbai, ko ka ko dhǒ ko ji Yova nari ngbaribbai ma ko njini nja ndrŭ na nari chulu. Mutume Yohana ndingʉeri ɨ: “Ddikpa ke ji nja ndi nja ná ndidhi djona nza ró, ke nzá ka ndi ji nzɨ ndi nja ná Mungu ro ri.”​—1 Yo. 4:20. w22.03 10 §8-9

Mbʉnji dyi, Bi 7 ddo 21

Aninja ni ká bbi ngbaribbai ma nari bblo, nzɨ ni njini ngadhó nyodyu kʉ ná ndrŭ bbai, ro nyodyu dhi ndrŭ bbai bblo ni njínji nidhó saa na ro.​—Efe. 5:15, 16.

Nì mai sala ko nji nari ma, Biblia ko zø nari ma na adi hwè bbʉ ko dho ro, fø ko rinji nari ngae krʉ ddo ró sʉsʉ ri. Kodhó maisha tso o kpakpa nari rili rie kpakpa ko ba saa ko njí kiroho nǎ lo. Kimwili nǎ njí ma, familia nǎ madaraka ma, nja kʉ ná njí ma na adi kodhó saa dzi bbo, nari adi rili rie kpakpa ko ba saa ko njí sala ma, ko zø Biblia ma ndirigoti ko ne ko zø ná lo nanga ma na. Kodhó saa ka ndi dzɨ bbo ná nja lo ma kʉ ddi. Njati ko é krr nga ró, nga kʉ mana na bbo ná lo ka ndi dzɨ kodhó saa, ná føri ka ndi liri nzɨ ko ba saa ndiro ko kana nga ngʉ chøchø Yova na d’e. Loroji na, akotilo le nyǒ lé djé nari djo. Le nyǒ lé djé nari e bbo thonga ná lo. Ro njati ko é krr nga ró, ko nyǒ ko dje nari ka ndi dzɨ kodhó saa bbo ndirigoti ko nzá ka ko ba saa ro kiroho nǎ lo dho ri. Kodho ringani ko nonga nari kʉ le nyǒ lé djé nari nga kʉ bbo pli na mana kʉ ná lo ri.​—Mez. 25:27; 1 Ti. 4:8. w22.01 26 §2-3

Zanji dyi, Bi 7 ddo 22

Nidho ringani ni ji ni kana lʉ si ná ke ni abbá ke nganga bbai ndirigoti nidho ringani ni ji ke ni nganga bbai.​—Law. 19:34.

Yova bbʉngʉe yadha Waizraeli dho kpa ji ndima lai ndrŭ ná saa na, ke nzá pongʉeri nari kʉ kpadho ringani kpa dhǒ jidha ndima dhó bbu nǎ ndrŭ dho inga ndima dhó ndrŭ tsɨ dho dhé ri. Kpa dho le pongʉeri kpa ji ndima kana lʉ si ná ndrŭ maddi. Fø lo dhoni pʉlʉpʉlʉ Mambo ya Walawi 19:33, 34 nǎ. Ringangʉeni le njini lʉ si ná ke na “abba ke” bbai nganga, ndirigoti Waizraeli dho ringangʉeni ndima “ji ke” ndima nganga bbai. Loroji na, sheria pongʉeri, nyo tso Waizraeli njú nzagʉ ro ná saa na, kpa dho ringʉngani kpa bbá ri ro lʉ si ná ndrŭ dho ma, ndirigoti njedha dhi ndrŭ dho ma. (Law. 19:9, 10) Lʉ ndrŭ dho le jidha dhǒ ná føri kʉ nzɨ thika leni ná yadha, Wakristo dho maddi ringani ndima njinjí fø yadha na njʉ. (Lu. 10:30-37) Ká ngbaribbai? Njʉ mamilioni kʉ ná ndrŭ tsɨtsɨ ndima dhi ngø nǎ ro, ndirigoti njaro kpa kana nja kpa dí chøchø ni kʉ ná ngana. Ri kʉ bbo na mana kʉ ná lo ko di heshima bbʉ fø kpetsi kpa ma, isɨ ndrŭ ma, nzø ma na dho. w21.12 12 §16

Yenga dyi, Bi 7 ddo 23

Nì Yova ne ná ndrŭ nzɨ si ddikpa bblo ritsi ro ma kosa ddi ri. ​—Zb. 34:10.

Njati ko li ko thí Yova dhó chutso ddadha djo njʉ ngbà ró, ko ka ko uri u nari kʉ, gosi ná saa na ke si ko gøgø. Ringani ko é udha na ndirigoti ko li ko thí Yova djo ndiro ko nziri kodhó patro tsó ke bbá saa ko dho ko rá asamble na, inga ko nziri ke tsó ke thɨ kodhó programu thika ndiro ko di krʉ kʉ ná njudha nji ndirigoti ko di saa ba bbo lod’radha dho d’e. Njaro nidhó patro gʉ ni po ná lo gʉ, ndirigoti ni vi nidhó nji vi. Yova nzɨ bba ko ro ri, ke nzɨ bu ko ro ri, ndirigoti ke si kodhó kimwili nǎ lazima dhi ritsi tso gba nì, ná føri ká ko ka ko u ngbà? (Ebr. 13:5) Krʉ saa ró njínji Yova dho ná ndrŭ kana bí kʉ ná ndrŭ ka ndima d’ra ngbaribbai ma Yova gbangʉe ndima dhó lo tso bbo pli ndima ngʉe mahitaji na ná saa na nari bblo. Yova kʉ chi kʉ ná ke. Yova kʉ ko lai djó nari dho, gosi ná ddo nǎ si njini ná lo do ko ka ko njí dho ná lo ro nga kʉ ri. Kodhi Mungu nzɨ bba ko ro ri, njati ko li kedhó Pidhinga anziro ngbà ró. w22.01 7 §16-17

Wanzia dyi, Bi 7 ddo 24

Ni nzɨ lod’i ndrŭ dho ri, ro Yova dho.​—2 Ny. 19:6.

Wazee dho ko ngarr nari ká ka ndi é kpakpa ko dho ngbaribbai? Akoddinga kutaniko nǎ ro le pʉ kodhó bbo ko ji ná kau ró ná lo djo, kodhó nganjadha ka ndi é njonjo. Ko ka ko di riddi njaro nzá wazee vʉ longa bblo ri, inga ko di ridhu ko tsó wazee ka d’ilo Yova ji nari bbai ngbà? Ko tsotso ká addu ka ndi kó ndiro ko é bblo kʉ na nganjadha na fø lonangavʉdha djo d’e? Ri kʉ bblo ko nonga nari kʉ kutaniko nǎ ro le chenga nji ná ke pʉ ná føri kʉ Yova dhó mupango ndirigoti ri adi bblonga bbʉ kutaniko dho ndirigoti chenga nji ná ke dho. Ro nzá leni ndidhó chenga nǎ ro ná ke le bbábbá kutaniko nǎ ró, ke ka ndi sa kutaniko nǎ nja ndrŭ dhó nyi sa. (Gal. 5:9) Føri djolu pli, ke nzá ka ndi nja ndi nji ná chenga dzá bbonga ri ndirigoti ke dho ri ka ndi é kpakpa ndi lé ndidhó ngaddidha thika ndirigoti ndidhó nyi thika ndiro ndi tso uni Yova na d’e. (Muh. 8:11) Ko ka ko churi nari kʉ ddikpa ke le pʉ kutaniko nǎ ro nari njí wazee adi longavʉ bblo. w22.02 5-6 §13-14

Ronji dyi, Bi 7 ddo 25

Ke nzɨ si ko nanga koni ná wɨ nanga d’rɨd’rɨ ri ndirigoti ke nzɨ si nzɨ rø bblo ná tala dhedhe ri.​—Mt. 12:20.

Bbo pli ringani ko é ngatsovedha na ndirigoti zølo na ddikpa ke di Biblia nǎ shauri na ndi njínji nari gʉgʉ ná saa na. Muzee dho ringani ndi b’o ndi ronga ndi bbʉ ná shauri na ndrŭ njinjí théi nzá nari kani ndi lu nari ró. Føri dzá ddiro ndi nji ná sala nǎ, muzee dho ringani ndi nzinga Yova tso ndiro shauri dhó lo u ná ke njinjí ri na ndirigoti ke famu ndidhó lo ká u shauri addudho ma nari d’e. Shauri le bbʉ dho ná le-djo dhó lo uri ndi ba saa ndiro ndi ddinga ndi dho le d’ra ná lo djo d’e. Njati muzee é ngatsovedha na ndirigoti zølo na ró, ri ka ndi é sʉsʉ le-djo inga le-ve rr ndi dho le bbʉ ná shauri. Bbʉbbʉ dhé, shauri dho ringani ndi si Mungu dzá lo nǎ ro dhé. Ko jiri kodhó shauri é bblo ndirigoti “ri bbʉ hwè ndrŭ thí dho.”​—Mez. 27:9. w22.02 18 §17; 19 §19

Gbonji dyi, Bi 7 ddo 26

B’o le b’o ná lo di si lele nzá ró, føri adi rili le thí é dhe na.​—Mez. 13:12.

Ko di nganzi ko ba kpakpanga ko ve na nzadha tso inga ddikpa uzaifu tso ná saa na, ko ka ko ddiri Yova nzɨ kodhó sala goti ngʉ lele ri. Yova ká adi kodhó sala krʉ goti ngʉ théi nzɨ addudho? Ko thí nǎ ro si ná sala adi ridho Yova dho ko kʉ udha na. (Ebr. 11:6) Ko di rinzi Yova kó ko tsotso ko nji ke nyo tho ná lo ná saa na, ke adi riji ko nji kpakpanga ndiro ko nji ndi ji ná lo d’e. (1 Yo. 3:22) Fø lo dho njati ko di rinzi Yova kó ko tsotso ko si che kʉ ná nyi djolu ró, ringani ko é ngatsovedha na ndirigoti ko njí kpakpanga ndiro ko si fø che kʉ ná nyi djolu d’e. Yesu pongʉeri kodhó nja sala goti nzá ka ndi ngʉ lele ri. Ke ka rija: “Anikonga, le si ribbʉ ni nidho, anineri ne, ni si ri ba, anid’o dzaitso, le si ritso pʉ ni dho; dhonalo ko ri kó ná ke si ri baba, ne rine ná ke dho le si ri bbʉbbʉ ndirigoti dzaitso d’o ná ke dho le si ritso pʉpʉ.” ​—Mt. 7:7, 8. w21.08 8 §1; 10 §9-10

Thonji dyi, Bi 7 ddo 27

Ma ji nidzá yadha bbo! Ma ngaddi bbo ri djo dyí ná krʉ saa ró.​—Zb. 119:97.

Ndiro nidhó udha ngʉ kpakpa Ngano ná ke djo d’e, nidho ringani ni ra anzi kedzá longa ni ne nari na. (Yos. 1:8) Anja ngbaribbai ma krʉ Biblia d’rangʉe ná lo njingʉeni nari ndirigoti ngbaribbai ma ri ndingʉe ná kpa dhó lo tso njungʉe nari. Føri ka ndi liri nidhó udha é kpakpa jidha na kʉ ná Ngano ná ke djo ndirigoti ni u nari kʉ ke ddangʉe chutso Biblia ndidha dho. (2 Ti. 3:14; 2 Pe. 1:21) Biblia ni zø ná saa na, addinga ngbaribbai ma ri nǎ shauri ka ndi kó ndrŭ tsotso nari djo. Loroji na, Biblia d’rangʉeri mbø le ji bbo nari kʉ che ndirigoti ri adi “kpakpalo bbʉ bbo.” (1 Ti. 6:9, 10; Mez. 28:20; Mt. 6:24) Biblia ripo nzɨ le ji mbø bbo ná føri kʉ bblo kʉ ná shauri! Ni ká riddi fø shauri ka ndi kó ni tsotso maddi? Njati ko di njínji Biblia nǎ shauri na ró, ko ka ko njinjí kodhi jidha dhi Ngano ná ke bbʉ ko dho ná nyodyu na. (Yak. 1:5) Føri ka ndi liri kodhó maisha é hwè na.​—Isa. 48:17, 18. w21.08 17-18 §12-13

Mbʉnji dyi, Bi 7 ddo 28

Mungu nga kʉ nzɨ adi chølo nji ná ke ri ndiro ndi vi nidhó njí nga ndirigoti ndi ró dho dho ni dhoe ná jidha nga d’e ri​—Ebr. 6:10.

Njati ri é ngó ni ngʉ ri ró, achuri nari kʉ Yova ni njingʉe ndi dho anziro ná njí ngano nì. Ni ngʉ adi lod’ra kpakpanga na, ni ngʉ adi kpakpalo tso ma ve, ni ngʉ adi ngarr Biblia na shauri dho ndirigori ni ngʉ adi ri d’’ra nja ndrŭ dho dhonalo føri kʉ bbo na ma na kʉ ná lo Yova dzá tengeneza nǎ. Ni ko nja kpa tsotso ndirigoti ni li kpa kpakpa ndiro kpa ra Mungu dzá njí na anzi d’e. Yova ji ni bbo dhonalo ni tøni chi ke dho. Ke pori nari kʉ “ndi nzɨ bba ndidzá chi tøni ná ndrŭ ro ri”! (Zb. 37:28) Ke pori ɨ: “kpø ni djoka na pʉ ta nanga djo ma sie ni ma na dhé.” (Isa. 46:4) Føri dho, achuri nari kʉ, ni na mana kʉ bbo Yova dzá tengenezo nǎ. Ni na mana kʉ bbo! w21.09 3 §4

Zanji dyi, Bi 7 ddo 29

Yova adi zølo dhǒ nì ndi do nji ná ndrŭ dho.​—Zb. 103:13.

Yova adi zølo dhǒ dhonalo kedzá nyodyu kʉ bbo. Yova adi bblo kʉ ná lo nanga vʉ ndidzá nononi ná ritsi dho. Biblia ripo “arø ro si ná nyodyu” kʉ “zølo na bbo ndirigoti bblo kʉ ná tunda na.” (Yak. 3:17) Jidha na kʉ ná gø dhi le bbai, Yova churi ndidzá zølo kʉ nì faida na ndidzá njí dhi kpa dho. (Isa. 49:15) Yova adi zølo dhǒ ndidzá ndrŭ dho nari dho, kpa kʉ ngab’odha na gosi ná ddo djo nzá mai kpa kaka ro. Yova kʉ nyodyu na bbo nari dho, ke adi zølo dhǒ njati rie ngbà ri ka ri ró. Yova chu nzá ndi ka ndi dhǒ zølo ná saa maddi. Nì mai Yova adi zølo dhǒ ro, ke nzɨ adi nga kʉ bblo ná lo tso uri. Loroji na, Yova dzá ddikpa njí dhi ke ka ndi vʉri ndi di che kʉ ná lo nji ndidhó maisha nǎ. Nde, føro Kodho ká ringani ko njí addu? Mutume Paulo ndingʉeri kutaniko nǎ ndrŭ dho “Anibba ke na ni ni tso gba nari tso.” (1 Ko. 5:11) Nzá leni ná ndrŭ le adi tenga tenga kutaniko nǎ ro. Føri kʉ bblo le rinji ri dhonalo føri na le chi tøni ná le-djoi ma, le-vei ma na ronga b’o ndirigoti føri na le mutakatifu kʉ ná Mungu dyø. w21.10 9-10 §7-8

Yenga dyi, Bi 7 ddo 30

Mungu jirie hwè na ritsi bbʉ ná le ji.​—2 Ko. 9:7.

Ko adi Yova má Pidhinga dzá njí dho ko bbʉdha bbʉ ná saa na. Waizraeli tso ri nzingʉeni nzɨ kpa si nga thó thi ritsi ro Yova nji. (Kum. 16:16) Kpa ngʉ adi bbʉdha bbʉ ndima dhó hali uri tso nari bbai. Fø kpa rinji nari chulu kpa ngʉ adi ridho ndima mbai po Yova nji ndima dho ná lo dho nì. Ko ká ka ko dhǒ jidha ndirigoti ko po mbai krʉ Yova bbʉ ko dho kiroho nǎ ná ritsi dho ngbaribbai? Fø ko ka ko njiri ná ddikpa chu kʉ, mbø ko bbʉ kodhó kutaniko tsotsokodha dho ndirigoti dz’ djolu gble kʉ ná njí dho kodhó hali u ritso nari bbai nari chulu. Mutume Paulo pongʉeri fø lo djo ɨ: Njati rie ndi nǎ ji na, ddikpa ke bbʉ nì kʉ ndidhó ná ritsi, ro nga nga kʉ ndidhó na ritsi ri ró, føri tso adi uni bblo pli kʉ ná chu na. (2 Ko. 8:4, 12) Yova thí adi hwè ba bbo ko bbʉ ná ritsi krʉ dho njati rie sese ma ró.​—Mk. 12:42-44. w22.03 24 §13

Wanzia dyi, Bi 7 ddo 31

Aniti le iso ka ndi pɨ ná lo bʉ thí bʉni ná ndrŭ dho, aniko nga ró klø kʉ ná ndrŭ tsotso, anive krʉ kʉ ná ndrŭ tso.​—1 Te. 5:14.

Wazee nzá ka ndima si Yova dzá ndrŭ hwini na ná kpakpalo ro krʉ ri. Nì mai ri kʉ føro, Yova jiri wazee li ndidzá chembø kpakpa ndirigoti kpa b’o ri ronga b’o. Bí ró njí kʉ ná wazee ká ka ndima ba saa nja ndima kó le-djoi ma, le-vei ma na tsotso ngbaribbai? Adyø mutume Paulo dhó loroji. Bí ina, Paulo ngʉ adi nja ndrŭ má ma ndirigoti kpa li kpakpa. Wazee adi Paulo dhó loroji dyø le-djoi ma, le-vei ma na dho ndima chi kʉ ná jidha dhǒ nari chulu. (1 Te. 2:7) Paulo ngʉ adi ripo kiroho nǎ ndi djoi ma, ndi vei ma na dho, ndi ji kpa ji ndirigoti Yova ma ji kpa ddi. (2 Ko. 2:4; Efe. 2:4, 5) Ke ngʉ adi kutaniko nǎ ndrŭ nja ndidzá bbakau bbai ndirigoti ke ngʉ adi saa ba nja ndima di kpa ma na ddinga d’e. Ke li ndi thí kpa djó ngbà nari ke ngʉ adi dhǒ ndidhó uzaifu ma, ndi do nji dho ná lo ma na ndi d’ra pʉlʉpʉlʉ kpa dho nari chulu. (2 Ko. 7:5; 1 Ti. 1:15) Nì mai ri kʉ føro, Paulo nzɨ ngʉ ndi thí li ndidhó kpakpalo djo ri. Føri rɨngana, ke ngʉ adi riji ndi kó ndi djoi tsotso. w22.03 28 §9-10

    Bbaledha nǎ Vichapo (2015-2025)
    Avʉvʉ
    Atsu
    • Baledha
    • Ando ri
    • Ji le ji nari
    • Copyright © 2025 Watch Tower Bible and Tract Society of Pennsylvania
    • Njí le nji na nalo
    • Ruruni nalo ronga le b'o nari
    • Paramètres de confidentialité
    • JW.ORG
    • Atsu
    Ando ri