Bi 10

Kodhó mafundisho ma, ko u ná lo ma krʉ adi si Biblia nǎ ro. Føri dho njʉ bí kʉ ná ndrŭ nzɨ adi kodhó lo u ri dhonalo ko nzɨ adi madha bbʉ Mungu dho nja dini nǎ ndrŭ adi rinji nari bbai ri. Ko ddi ná lo ma nzɨ ddi adi nju kpa adi ji ndima rr ná lo na ri. Ko ká ka ko njí addu ndiro nzɨ ko vi kodhó udha ro? Mutume Paulo pongʉeri Roma nǎ ngʉ di ná Wakristo dho ɨ: “Udha adi si rr le rr ná lo nǎ ro. Ndirigoti rr le rr ná fø lo kʉ Kristo djo le d’ra ná lo.” (Ro. 10:17) Kodhó udha ka ndi ngʉ kpakpa ko di Biblia nǎ lo nga ne ró. Dini nǎ ndrŭ adi nji ná bí kʉ ná desturi kʉ gʉ Biblia gʉ nari. Nì mai ri adi ndrŭ nyǒ tho ro, njati ko gba ko tso ri na ró, ri nzá ka ndi li kodhó udha kpakpa ri. Ko ka ko li kodhó udha kpakpa ko di d’ʉ kʉ ná lochudha ne ró, dhonalo “ngadhi udha ro ko nzá ka ko njí Mungu nyǒ tho ná lo ro ri.” (Ebr. 11:1, 6) Ndiro ko u ko kʉ bbʉbbʉlo kana nari d’e, kodho nzá ringani ko di rine ddù njini ri. Njati ko ne Biblia nǎ lo nanga bblo ró, ri ka ndi kó ko tsotso ko chu nari kʉ ko ba bbʉbbʉlo ndirigoti ko nanga ro nzá ka ndi rɨni ri. w21.05 4-5 §11-12

Mutume Paulo bangʉeni kpakpalo na bí. Ke ndrŭ ngʉ njinji ma, ke ndrŭ ngʉ bu dju na ma, ke ndrŭ ngʉ li prizo na ma ná saa na, ringangʉeni Yova bbʉ kpakpanga ke dho. (2 Ko. 11:23-25) Paulo ngʉ bani ndi thí ka ndi bʉ ná lo na bí, føri ke d’ra nja ndrŭ dho nari nzɨ ngʉ do ro pa ke djo ri. (Ro. 7:18, 19, 24) Ke ngʉ bani afya dhi lo na maddi, føri ke nzingʉe “kpele kʉ ndi ndí nǎ” ri ndirigoti ke ngʉ riji Mungu tu ri tu ndi ndí nǎ ro. (2 Ko. 12:7, 8) Yova bbʉngʉe kpakpanga Paulo dho ndiro ke njí lod’radha dhi njí d’e nì mai ke ngʉ bani kpakpalo na ro. Akonja Paulo njingʉe na njí. Loroji na, prizo nǎ Paulo ngʉe Roma nǎ ddikpa dza nǎ ná saa na, ke d’rangʉe hwè dhi lo-i bidii na bí kʉ ná ndrŭ dho, føri ke d’rangʉe Wayaudi djó bbobbonga dho, njaro Roma nǎ bbobbokpa dho maddi. (Mdo. 28:17; Flp. 4:21, 22) Ke d’rangʉe lo ndi ronga ngʉ b’o ná bbasødda dho ndirigoti ndi ronga ngʉ si be ná ndrŭ dho maddi. (Mdo. 28:30, 31; Flp. 1:13) Fø saa na Paulo ndingʉe ná barua adi Wakristo tsotso kó njʉ maddi. w21.05 21 §4-5

Yuda nǎ Pi Uzia ngʉe nodha na nari dho ke gʉngʉe ndi dho le bbʉngʉe ná shauri gʉ. Uzia njingʉe nzá tso uni ndi njí ná lo. Ke njingʉe bblo lo bí, ke chingʉe njonjo kʉ ná bba ndirigoti ke dhó nza mangʉe bí ddi. “Bbʉbbʉ dhé, Mungu lengʉe ke ronga le.” (2 Ny. 26:3-7, 10) Biblia ripo “Føri dho kpakpa ke ngʉngʉe nari goti ke thí bangʉe nodha, føri mbangʉe ke sadha na.” Drdr Yova pongʉeri kuhani dho dhé ringani ndima bɨ uvumba hekalu na. Pi Uzia njingʉe nzá tso uni ndi dho ná lo, ke rangʉe hekalu na nja ndi ra uvumba bɨ d’e. Yova nanga kangʉeni bbo ndirigoti ke lingʉeri korøkorø ta ke ro. (2 Ny. 26:16-21) Nde, ko ká ka ko ko é nodha na Uzia bbai ddi? Ddio, njati ko di ko nja mana na pli ró. Kodho ringani ko churi, krʉ na ko kʉ ná uwezo ma, kutaniko nǎ ko kʉ na ná pendeleo ma na si Yova dhó ro. (1 Ko. 4:7) Njati ko é nodha na ró Yova nzá ka ndi uri ko njinjí ndi dho ri. w21.06 16 §7-8

Yesu chungʉeri nari kʉ ndi unakpa nzá ka ndima bani bblo matokeo na dhé lod’radha dhi njí kana ri. Yesu unakpa ngʉ lod’ra dho ná ndrŭ kana ro ká thɨ kʉ ná ndrŭ ma ngʉngʉe Wakristo nari nzá ko churi. Yesu unakpa nzá ka ndima bae hwè ndrŭ rr ndima dhó lo nari dho dhé ri, ro kpa ka ndima bae hwè ndima nji ná njí hwè bbʉ Yova dho nari dho. Njati ko di ngatsove kodhó lod’radha dhi njí kana ró, ko si choro nŭnŭ di ná shinga ba. Njati ko di kpakpanga nji ko d’ra hwè dhi lo-i ndirigoti ko ddi longa ndrŭ dho ró, føri na ko ribba “kiroho na nganjadha dhidhi ko na,” ko ribba Mungu dhó roho takatifu njinjí kodhó maisha nǎ nari chulu. Nzɨ ko “njeni” dhonalo Yova tsoni ndi si choro nŭnŭ di ná shinga bbʉ ko dho njati ko ko tsotso ná ndrŭ tso si kpø batiso djo nzá ma ró.​—Gal. 6:7-9. w21.10 26 §8-9

Ddikpa saa na, Yesu ma njengʉeni bbo ndi unakpa ma na lod’radha dhi njí kana. Kpa dho ringangʉeni ndima chʉ ndima ronga chʉ, ro birobiro kʉ ná ndrŭ singʉe kpa ro. Yesu ndrŭ dhi ri zø njingʉe ndirigoti ke ngangʉe “bí kʉ ná” loddidha tso ndrŭ dho. Yesu chungʉe ngbaribbai ma ndrŭ ngʉ ndima mbu nari ngbà. Ke jingʉeri ndi kó ndrŭ tsotso ko dhonalo ke njangʉeri ndrŭ nzani nza ndirigoti ndrŭ dho loji ngab’odha. Njʉ maddi ndrŭ dhó lo kʉ fø. Nì mai kpa njani hwè na kʉ nari bbai ndirigoti bblo dhó maisha kʉ nari bbai ro. Kpa kʉ ddiddi vivi ná miya bbai nga ndi ró rø ná ke kʉ ro. Paulo pongʉeri fø di ná ndrŭ nzá chu Mungu ri ndirigoti ndrŭ nga kʉ ngab’odha na ri. (Efe. 2:12) Ko di ngaddi kodhó eneo nǎ ndrŭ dhó loji ndima chulo Mungu djo nari djo ró, jidha ndirigoti zølo ka ndi cho ko ronga ko kó kpa tsotso ko. Bblo ko ka ko kó ndrŭ tsotso ná chu kʉ ko ddi Biblia nǎ longa ndrŭ dho. w21.07 5 §8

Dya dhi ke ka ndi é nodha na ndirigoti ke adi ngaddi ndidhó lo djo dhé. Tamaa dhi le nzɨ adi ndi lai dhó ritsi dhé ji ndi dho ri, ro le adi riji ndi dhʉri dhʉ ndi lai dhó ro. Føri dho ddikpa le é ndi lai dhó ritsi dzá tamaa na ró, fø le adi ndi lai ndrondro. Dya ma, tamaa ma na le ka le ddi avion nǎ esase nă tsu ná muchafu na. Avion ka ndi dani bblo, ro fø muchafu ka ndi liri nzɨ esase da bblo motere na ndirigoti gʉna avion thʉni ná saa na, avion ka ndi njí aksida. Føri bbai ddikpa le ka ndi njinjí Mungu dho ddikpa saa na bbo. Ro njati le é dya na ndirigoti tamaa na ró, le ka ndi bʉni bʉ. (Mez. 16:18) Le ka ndi bbá Yova dho ndi njínji nari tso bbá, ndirigoti le nji ná lo ka ndi bbʉ njedha ke dho ndirigoti nja ndrŭ dho maddi. Ko ka ko si dya djolu njati ko di njínji mutume Paulo bbʉngʉe ná i shauri na ró: “Nzɨ ni nji ddikpa ritsi ro maddi gʉ ni gʉni ni kana ro inga anziro ni ni li ro, ro anidi nja ndrŭ nja pli ni djolu.”​—Flp. 2:3. w21.07 15-16 §6-8

Nja ndrŭ adi rinja nari kʉ bbʉbbʉ dini dho ringani ndi ngʉ krʉ kʉ ná logoti, njati rie nga ma Biblia nǎ ró. Føri ká kʉ kaka ndi ka ná lo? Anja mutume Paulo dhó loroji. Ke pongʉeri ndi lai Wakristo dho, kpa né “krʉ kʉ ná lo nanga,” ro ke ungʉeri nari kʉ bí kʉ ná lo nzá ndi famu ngʉeri. (1 Te. 5:21) Ke ndingʉeri “Kodhó lochudha tso nzá ka ri,” ke pongʉeri ki “ko ritsi nja nzá nyǒ djonga si bblobblo ná tazama nǎ le ritsi nja nari bbai.” (1 Ko. 13:9, 12) Paulo nzá famu ngʉe krʉ kʉ ná lo ri; ko ma nzáddi ka ko famu krʉ kʉ ná lo ri. Ro Paulo chungʉe bbobbo mafundisho ngbà Yova djo. Ke chungʉeri chu nari kʉ ndi ba bbʉbbʉlo! Ndiro ko u ko kʉ bbʉbbʉlo kana nari d’e, kodho ringani ko nja Yova dzá Dimu dhó mafundisho tso ká nju ngbà ma Yesu ddingʉe bbʉbbʉ dini djo ná mafundisho na nari. w21.10 18-19 §2-4

Ngó ndrŭ, njati ni é krʉ saa ró le njínji Yova dho nari kana ma inga nga ma ró, ni ka ni njí ná lo kʉ bí ndiro ni kó nja ndrŭ tsotso d’e. Ká ngbaribbai? Adi hwè ba ni bani na ná hali dho, ali ø muradi ni nji, ndirigoti ali ni thí ni ka ni njí ná lo djo nzá ni kani njí ná lo djo ni ni thí li nari djolu. Pi Daudi jingʉeri bbo ndi chi dza Yova dho. Ro, Yova pongʉeri fø pendeleo ndi si bbʉ kedzá ngba Sulemani dho ná saa na, ke ungʉe Yova vʉ nanga ná fø lo u ndirigoti ke kongʉe fø njí tsotso hwè na. (1 Ny. 17:4; 22:5) Sulemani ngʉe “jadda ndirigoti nzá ndi chulo bbo” ro, ro føri dho ma nzá ddi Daudi njangʉeri ri kʉ ndi i ka ndi chi dza bblo pli ri. (1 Ny. 29:1) Daudi chungʉeri nari kʉ, fø dza ka ndi chini Yova dhó ngatsotsokodha dzá lodho, nga ri chidha dho si chutso dda ná ke dzá lodho ri. Daudi bbai, ngó ngʉ ná ndrŭ adi njínji kpakpanga na Yova dho njati ndima dhó njí thika leni le ma ró. Ndirigoti kpa churi nari kʉ, Yova ka ndi le jadda kpa ronga ndiro kpa njí ndima ngʉ adi nji anziro ná njí d’e. w21.09 9 §4; 10 §5, 8

Kiroho nǎ muradi ko li ko nji, nari adi chutso ddá ko dho ndiro ko é n na mana kʉ ná maisha na d’e. Nì mai ri kʉ føro, ringani ko li kodhó uwezo na ndirigoti kodhó hali na tso nju ná muradi ko nji, ro nga nja ndrŭ dhó ri na ri. Ko nzá jiri ko tsú ko bʉ ka ndi bʉ ko thí ndirigoti ji ko ka d’i dho ná lo na ri. (Lu. 14:28) Ni kʉ Yova dzá njí dhi ke nari dho, ke adi ni nja mana na bbo ndidzá familia kana. Ndirigoti ni kʉ njonjo nja ndrŭ ró ro. Yova nzá liri ni kana ngae chøchø ndi na ni kʉ nja ndrŭ djolu pli nari dho ri. Ke liri ndima kana ngae chøchø ni na dhonalo kʉ, ke njari ni thí kʉ bblo, ni kʉ nyenyenga na, ni uri le ddi longa ni dho ndirigoti ni uri ni leni le. Achuri nari kʉ, Yova adi hwè ba bbo njati ni di njínji ke dho ni dho ka ná ngatsi ró. Ni ngatsove ndirigoti ni tøni chi ná føri ridho “ni thí kʉ bblo.” (Lu. 8:15) Føri dho adi ra anzi Yova dho ni njínji nidho ka ná ngatsi nari na. Ndirigoti føri si rili ni é hwè na “ni nganga nji ná njí dho.”​—Gal. 6:4. w21.07 24 §15; 25 §20

Kodho ringani ko ve ngatso rie ko ri b’o chølo njini ri ró. Loroji na, njati wazee rr ri kutaniko nǎ ddikpa le nji bbo chenga ró, kpa adi “arø ro si ná nyodyu” nzi nja ndima chu Yova dhó ngaddidha fø lo djo d’e. (Yak. 3:17) Kpadhó muradi e ndima kó chenga nji ná ke tsotso ndiro “ke léni le ndidhó chu nǎ ro d’e.” (Yak. 5:19, 20) Kpa adi riji ndima nji krʉ kʉ ná lo nja ndima b’o kutaniko ronga ndirigoti ndima li chelo le nji ró ná ndrŭ kpakpa. (2 Ko. 1:3, 4) Ndirigoti bo chenga dhi lo nanga wazee ne ró, ringani kpa chu krʉ lo vi fø kosa djo, føri ka ndi nziri saa ro da vi. Føri goti kpa adi sala nji. Kpa adi Biblia nǎ ro si ná shauri ma, “chølo chulu” kʉ ná nizamu ma na bbʉ chenga nji ná ke dho. (Yer. 30:11) Kpa nzɨ adi lod’i ndrŭ djo lele ri. Longa wazee ne bblo ró, kutaniko nǎ ndrŭ krʉ adi bblonga ba. w21.08 11 §12-13

Izraeli bbá ù chingʉe bbo nari dho, Naomi ma, le bbá ke ma, le dzá aro kʉ ná kpetsi nzø ma na le ma rangʉe Wamoabu bba. Ro fø lu Naomi bbá ke rangʉe dhedhe. Le dzá aro kʉ ná kpetsi nzø chingʉe ndoa, ro njedha dhi lo kʉ, fø kpa ma chengʉeni che ddi. (Rut. 1:3-5) Fø lo bbʉngʉe njedha Naomi thí dho bbo pli. Le thí bʉngʉeni bbo ndirigoti le ngʉ riddi nari kʉ Yova nji che kʉ ná lo ndi ró. Ngbaribbai ma le ngʉ ndi mbu nari le d’ra nari anja di: “Yova thó leni ma djó. Ritsi ddi na ka ná ke liri maisha ngʉ ma dho dyádyá pli.” Le pongʉeri ki: “Ri kʉ Yova i leni ma ró ri ndirigoti ritsi ddi na ka ná ke nji che kʉ ná lo ma ró.” (Rut. 1:13, 20, 21) Yova churi nari kʉ “nza le nzani nari ka ndi liri nyodyu dhi ke njini ngbʉ djonga ngbʉni nari bbai.” (Muh. 7:7) Ke chongʉe Ruta ronga ndiro le dhǒ chi kʉ ná jidha Naomi dho d’e. Ruta jingʉeri ndi dhǒ jidha Naomi dho ndirigoti le ngʉ Naomi tsotso kó hwè na ndiro nzɨ Naomi thí bʉni bbo ró, ndirigoti le chú ri nari kʉ Yova kʉ ndi na nì dhé d’e. w21.11 9 §9; 10 §10, 13

Njati ko di njínji bbo Yova dzá njí kana njʉ ró, føri na mana ká kʉ ko ka ko li nja muradi ko nji nzá? Ri nga kʉ fø ri! Ko ka ko li ko nji ná muradi ka ndi kó ko tsotso ko d’ralo bblo, ko ddi longa bblo ndrŭ dho ndirigoti ko kó ko djoi ma, ko vei ma na tsotso. Fø lo ko ka ko njí njati ko di nja ndrŭ tsotso kó nyodyu na ndirigoti kiasi na ná saa na, kodhó lo ko ka ko nja pli nari djolu. (Mez. 11:2; Mdo. 20:35) Ni ká ka ni li ngbá muradi ni njí? Anzinga Yova tso ke kó ni tsotso ndiro ni chú ni dho ka ndi ka ná muradi d’e. (Mez. 16:3) Ni ká ka ni li muradi ni njí ni ro ngʉ painia musaidizi ma, inga painia wa kawaida ma, ni njiní ro Beteli na ma, inga ni njí ujenzi dhi njí ro ma ngbǎ? Inga ni ka ni neri ni chu ø luga ro ndiro ni rá lod’radha dhi njí na anzi inga ni rá lod’ra nja ngø na eneo na d’e. w21.08 23 §14-15

Yova nyǒ chi kʉ ná jidha le dhǒ nari adi tho bbo. (Ho. 6:6) Nabi Mika chulu, Mungu rija ko dho ko “ji chi kʉ ná jidha.” (Mik. 6:8, maelezo ya chini) Ro fø lo ko nji nari njí, kodho ringani ko chu chi kʉ ná jidha ká kʉ addu ma nari. Chi kʉ ná jidha ká kʉ addu? Le ripo “chi kʉ ná jidha” ná fø lo bani Biblia​—Tafsiri ya Ulimwengu Mupya nǎ 230 ina. Nde, ri ká kʉ addu? Njati ddikpa le é chi kʉ ná jidha na ró, le ka ndi ji ndi lai bbo, le ka ndi má chi fø ke dho ndirigoti kpa ka ndima má kau. Bí ina, føri ndrŭ adi nja Mungu ka ndi dhǒ ndrŭ dho ná sifa, ro fø sifa ndrŭ ma ka ndima dhǒ ndima kana ddi. Yova kʉ bbo pli kʉ ná loroji chi kʉ ná jidha le dhǒ nari kana. Føri dho Daudi nanga kengʉeni ro ke pongʉe ná lo nzá ka ndi ke le nanga ri, ke pongʉeri: “Ee Yova, nidzá chi kʉ ná jidha si kpø ra nǎ . . . Nidhó chi kʉ ná jidha kʉ mana na bbo, Ee Mungu!” (Zb. 36:5, 7) Daudi bbai, ko ká adi Yova dzá chi kʉ ná jidha nja mana na nì? w21.11 2 §1-2; 3 §4

Yova dzá njí dhi kpa kana kʉ Yesu, “nononi ná sidjó ngba,” ndirigoti mamilioni kʉ ná malaiká. (Kol. 1:15; Zb. 103:20) Yesu ngʉe dz’ djó ná saa na, ke ddingʉeri ndrŭ dho ndrŭ di Yova nzǐ ndima dhi Baba. Yesu ngʉ loti ndi unakpa na ná saa na, ke ngʉ ripo kpa dho Yova kʉ “madzá Baba ndirigoti nidhi Baba.” (Yoh. 20:17) Ko bbʉ ko Yova dho ndirigoti ko ba batiso ná saa na, ko adi ngʉ le-djoi ma, le-vei ma na dhó familia kana. (Mk. 10:29, 30) Yova kʉ jidha dhi Baba. Yesu jiri ko di Yova nja ndi adi ke nja nari bbai, ke kʉ bblo kʉ ná Baba bbai ndirigoti ko ka ko d’ra ko thí nǎ lo ke dho krʉ saa ró, ke ngaddi nì ko djo, ke nga kʉ sheria bbʉ ndrŭ dho ná Baba bbai dhé ri. Føri ko nja Yesu ddingʉeri ndi unakpa dho kpa di sala nji nari ró. Ke ngangʉe loroji dhi sala tso ɨ: “Kodhi Baba.” Yesu ka ndi poeri ko di Yova nzǐ “ritsi ddi na ka ná ke,” “Ngano ná ke,” inga “choro nŭnŭ nga dhi Pi,” føri nga ka ndi é e che ri dhonalo Biblia tilo ke ró heshima dhi fø dho djo bí ina. (Mwa. 49:25; Isa. 40:28; 1 Ti. 1:17) Fønga rɨngana Yesu pongʉeri ko di Yova nzǐ “Baba.” w21.09 20 §1, 3

Pi Manase nzá rrngʉe Mungu dhó nabi bbʉngʉe ndi dho ná shauri ri. Føri goti, “Yova chòngʉe Asiria nǎ pi dhó bbasødda djó bbobbonga Yuda ro, ndirigoti kpa løngʉe ke kraka na, kpa chingʉe ke aro kʉ ná sheni na ndirigoti kpa mbangʉe ke Babiloni na.” Babiloni nǎ ke ngʉe prizo nǎ ná saa na, ri ngʉ njani nari kʉ, Manase ngʉ adi ngaddi bbo ndi njingʉe ná lo djo nari bbai. Ke “djøngʉe ndi bbo ndi bbui dhi Mungu dho.” Ke njingʉe nja lo ki maddi. “Ke nzingʉeri ndidzá Mungu dhǒ zølo ndi dho.” Føri dzá, Manase “ngʉ ra anzi nga ndi nzǐ ke tsó nari na.” (2 Ny. 33:10-12) Fø saa na Yova ngʉngʉe Manase dhó sala goti ngʉ. Yova njangʉe Manase leni le bbʉbbʉ nari ke njingʉe ná sala ró. Føri dho, Manase nzingʉeri Yova njí ndi zø ná saa na, ke rrngʉe Manase dhó sala rr ndirigoti Yova bbangʉeri ke ki ngʉ pinyodha dho vi. Manase njingʉe krʉ kʉ ná kpakpanga ndiro ndi dhori nari kʉ ndi leni le bbʉbbʉ d’e. w21.10 4 §10-11

Akila ma, Prisila ma na bbangʉe ndima dhó familia ma, ndima dhó dza ma, ndirigoti kpa rangʉe di ø dza na. Korinto na, Akila ma Prisila ma na singʉe saa na, kpa ngangʉe ndima singʉe nǎ ná ø kutaniko nǎ ndrŭ tsotsokodha tso, ndirigoti kpa ngʉ njínji ddinga Paulo ma na ndiro ndima li Korinto nǎ le-djoi kpakpa d’e. Luti kpa rangʉe d’i ngana ndiro ndima rá lod’ra uhitaji dhi ngana d’e. (Mdo. 18:18-21; Ro. 16:3-5) Kpa ngʉ njínji bbo Yova dho nari dho kpa ngʉe hwè na. I ddo ró kʉ ná dza dhi ndrŭ ka ndima dyø Prisila ma, Akila ma na dhó loroji Pidhinga dzá njí ndima li anziro nari na. Bblo le ka le tilo miradi djo ná saa kʉ nzá le d’e ndoa chi ro. Ndoa chi ná ndrŭ di lo nanga vʉ ddinga ndirigoti kpa njí fø muradi ddinga ró, kpa ka ndima njari Yova ndima tsotso kó ko.​—Muh. 4:12. w21.11 17 §11-12)

Bbʉbbʉ dhé ringani ko rrnga Mungu ja ko dho ná lo dho, føri kʉ ko rrnga kodhi gø dhi ndrŭ dho. Anonga nari kʉ, Mambo ya Walawi 19:3 rija le bbʉ heshima ledzá baba ma dho ledzá mama ma na. Fø yadha nji kʉ thei ná yadha ripo: “Nidho ringani ni é watakatifu dhonalo ma, Yova nidhi Mungu, ma kʉ mutakatifu.” (Law. 19:2) Ko di ngaddi Yova rija ko rrnga kodhi gø dhi ndrŭ dho ná fø yadha djo ná saa na, ko ka ko dhuri ko tso, ‘Ma ká adi heshima bbʉ nì madzá gø dhi ndrŭ dho?’ Njati ni rá ri utso d’i nari kʉ, ringani ni njie njí bbo b’lo dae ná saa na ri ró, ni ka ni vʉri ni thɨ nidhó lo thika kpadjo. Ni nzá ka ni thɨ anziro dangʉe ná lo thika ro ri, ro ni ka ni njí kpakpanga ndiro ni ba saa bbo ni di nidzá gø dhi ndrŭ na ndirigoti ni kó kpa tsotso d’e. Njaro ni ka ni lø mupango ro ndiro ni di dí bbo ddinga kpa ma na d’e. Inga ni ka ni kó kpa tsotso kimwili nǎ ritsi na ma, kiroho nǎ lo na ma, inga ni ka ni li kpa kpakpa ndirigoti ni pɨ kpa iso. Njati ni njiri fø ró, føri na ni ngarr Mambo ya Walawi 19:3 nǎ kʉ ná lo dho. w21.12 4-5 §10-12

Pi Daudi njingʉe bbobbo chenga. Loroji na, ke njingʉe uzinifu Bath-sheba na ndirigoti ke hwingʉe le bbá ke hwi. (2 Sa. 11:2-4, 14, 15, 24) Pi Daudi njingʉe ná fø chenga dzá lo dho, ke ma, ke bbá familia nǎ ndrŭ ma na bangʉe nzadha. (2 Sa. 12:10, 11) Ddikpa saa na, Daudi dhongʉeri ndi nzá li ndi thí Yova djó ri ke ngʉ Waizraeli bbá bbasødda nanga zø ná saa na, føri kʉ nzá Yova pongʉe ke njí ná lo. Fø lo ká bbʉngʉe ngbá matokeo? Chøchø 70 000 kʉ ná Waizraeli chengʉeni peste dhi dhe dho! (2 Sa. 24:1-4, 10-15) Ni ká ka ni ddieri Yova ka ndi njie Daudi zø nzá? Ro Yova nzá ddingʉe ri fø ri. Yova lingʉe ndi thí Daudi e chí ngʉ tøni ndidhó maisha nǎ ná ke ndirigoti ke lengʉeni le nari djo. Føri dzá lo dho Yova njingʉe Daudi nji ná fø bbobbo chenga zø nji. Yova chungʉeri nari kʉ Daudi jingʉe ndi bbo ndirigoti ke jingʉeri ndi njí bblo kʉ ná lo dhé. Ko adi hwè ba bbo dhonalo, Yova adi kodhó bblo kʉ ná sifa nja ndirigoti kodhó bblo kʉ ná nyi nja nari dho.​—1 Fa. 9:4; 1 Ny. 29:10, 17. w21.12 19 §11-13

Yesu ngʉ adi zølo dho tsutsu ná ndrŭ dho. Ano Batiso ngʉ bbʉ ná Yohana dho ke chongʉe ná lo nga: “Nganyo kʉ ná ndrŭ nga nja kpadjo, tsu kó tsu ná ndrŭ bbibbi, korøkorø kʉ ró ná ndrŭ ndí tsetse, nga bɨ kʉ ná ndrŭ ngarr, [ndirigoti] checheni ná ndrŭ gaga.” B’lo ndrŭ nja Yesu njingʉe ná ddù nari goti, “ndrŭ kpari krʉ bbʉngʉe madha Mungu dho.” (Lu. 7:20-22) Wakristo adi riji ndima dyø Yesu ndirigoti ndima dho zølo tsutsu ná ndrŭ dho. Føri dho, ko nzɨ adi kpa be pá ri ndirigoti ko e ngatsovedha na kpa lai djo. Bbʉbbʉ dhe, Yova nzá bbʉ ddù le ka le nji na ná kpakpanga ro ko dho Yesu dho ndi bbʉngʉe ri nari bbai ri. Ko kʉ pendeleo na ko d’ra hwè dhi lo i tsutsu ná ndrŭ dho inga tsu nyo tsu kiroho nǎ ná ndrŭ dho paradiso djo, fø nga na ndrŭ krʉ sie kaka ná le ndí na ndirigoti ndrŭ kana nga sie chøchø Mungu na. (Lu. 4:18) Fø hwè dhi lo-i ko bí kʉ ná ndrŭ tsotso b’lo ndiro ndima bbʉ madha Mungu dho d’e. w21.12 9 §5

Yakobo ngʉ longaddi ndi djoi dho ná saa na, ke ngʉ adi njínji maandiko na. Ke ngʉ njínji maandiko na ndiro ndrŭ njari nari kʉ Yova adi nì tøni chi ndi dho Yobu bbai ná ndrŭ ronga lele. Yakobo ngʉ adi njínji dhʉdhʉ kʉ ná lo na ndirigoti d’ʉ kʉ ná lo na. Føri dho ke nzɨ ngʉ adi ndrŭ dhó ngaddidha drr ndi djo ri, ro Yova djo. Somo: Abbari nidhó lo é dhʉdhʉ ndirigoti ri vʉ Biblia nǎ ro. Nja ndrŭ dho ko longaddi ná saa na, kodhó kusudi nga kʉ ndrŭ nanga keni ké ko chu ná lo dho ri, ro ndrŭ nanga keni Yova chu ná lo dho ndirigoti ke adi ngaddi ndima djo nari dho. (Ro. 11:33) Fø lo ko ka ko njí krʉ saa ró ko d’ra ná lo di si Biblia nǎ ro nari chulu. Loroji na, kodhó wanafunzi dho ko ka ko vʉ longa nari rɨngana, ringani ko kó kpa tsotso kpa ddinga Biblia nǎ kʉ ná loroji djo ndirigoti kpa chú Yova dhó ngaddidha ndirigoti ngbaribbai ma ke adi ndi mbu nari. Føri ka ndi cho kpa ronga kpa njí Yova ji ná lo, nga ko ji ná lo ri. w22.01 11 §9-10

Mungu nzá jiri ko njí chelo nja ndrŭ ró ri, ro ke jiri ko njí nja lo ki maddi. Mukristo dho ringani ndi njiri fø njati rie ngbà ndi jiri ndi bbʉ hwè Mungu thí dho ri ró. Yesu dhongʉeri nari kʉ, Mambo ya Walawi 19:18 nǎ kʉ ná sheria kʉ mana na bbo. Ddikpa Mufarisayo dhungʉeri ɨ Yesu tso: “Sheria nǎ bbo pli kʉ nari ká kʉ ngbá yadha?” Yesu ngʉngʉe fø logoti ɨ, “bbo pli ndirigoti ya kwanza kʉ ná yadha” kʉ ko ji Yova ko thí nǎ ro krʉ, kodhó nafsi na krʉ ndirigoti kodhó ngaddidha ma na krʉ. Fø ro Yesu ngʉngʉe Mambo ya Walawi 19:18 nǎ kʉ ná lo djolu ɨ ndi ripo ro: “Ya pili føri bbai di nari kʉ: ‘Nidho ringani ni ji ni lai ni nganga bbai.’” (Mt. 22:35-40) Nja ndrŭ dho ko ka ko dhǒ jidha ná chu kʉ bí. Jidha ko ka ko dhǒ lú ná ddikpa chu kʉ, ko njinjí Mambo ya Walawi 19:18 nǎ kʉ ná shauri na. Ri pori: “Nidho nzá ringani ni ngʉ chelo kobe chelo ró ri inga ni li lo ni thí na ri.” w21.12 10-11 §11-13

Yesu ddangʉe ndi thó ndirigoti ke gøngʉe mutume Petro gø. Bbʉbbʉ dhé, ri ka ndi ka e ka Petro bbie dda djó njati ke lie ndi thí Yesu djo ró. Ro, Petro njangʉe bbo vʉvʉ ná saa na, ke na do tangʉe ndirigoti ke ngangʉe dda na ndi ko nari tso. (Mt. 14:24-31) Ko ka ko ba somo Petro dhó loroji nǎ ro. Bbú nǎ ro Petro vʉngʉe dda djo ná saa na, ke nzɨ ngʉ riddi nari kʉ ndi na do si ta ndirigoti ndi si ko dda na ri. Ke jingʉeri ndi rá dda djó kpø ndi si ndidhó Bboke dhi ngana ná nga djo. Ro, Yesu djo ke ka ndi lie ndi thí nanga rɨngana, ke na do tangʉe bbo vʉvʉ dzá lo dho. Njʉ ringani ko é udha na nja ko ve kpakpalo tso ddiddi Petro dho ringangʉeni ndi é udha na ndiro ndi bbí dda djó d’e nari bbai. Njati ko li ko thí Yova djo ndirigoti ke pi ná lo djo nzá ró, kodhó udha nga ka ndi é kpakpa ri ndirigoti føri ka ndi liri kodhó kiroho ngʉ aluti. Føri dho njati rie kpakpa kʉ ná lo tso ró ko hwini ri ró, kodho ringani ko nonga nari kʉ Yova ma, kedhó kpakpanga ma na ka ndi kó ko tsotso ngbà. w21.12 17-18 §6-7

Sala le nji nari ma, Biblia le zø nari ma, ndirigoti ri nǎ ro le zø ná lo djo le ngaddi nari ma na kʉ Yova dho ko madha bbʉ ná chu. Sala ko nji ná saa na ko loti kodhi ra nǎ Baba na bbo ndi ji ko ro. Biblia ko zø ná saa na ko “Mungu dho lochudha” ba nyodyu tso ngani ná nga ndi kʉ ro. (Mez. 2:1-5) Yova djo ko zø ná lo nanga ko di ddi bbo ná saa na, ko adi ngaddi kedhó sifa djo ndirigoti ke pɨ ndi si nji ndrŭ dho ná lo djo. Føri kʉ bblo pli ko ka ko njinjí kodhó saa na ná chu. Nde, addui ká ka ndi kó ko tsotso ko njiri fø? Njati rie ngbà ri ka ró avʉ nga makelele kʉ ná nga. Anja Yesu dhó loroji. Lod’radha dhi njí tso ke nga i dz’ djo nari njí, ke njingʉe ddo 40 ngødja nǎ. (Lu. 4:1, 2) Nga makelele ngʉe ná fø ngana, Yesu ka ndi njingʉe sala ndirigoti ndi ddinga ndidzá Baba ji ndi nji ná lo djo. Føri kongʉe Yesu tsotso ndi di tayari karr saa goti ndi si ba ná mbudha dho. w22.01 27-28 §7-8

Ddikpa muzee inga bblo dhó sifa kʉ ná le-djo ka ndi d’ra ko dho thɨ thika ko ka ko thɨ ná lo. Njati ddikpa le bbʉ Biblia nǎ ro si ná shauri ko dho ró, fø le ji ko ji. Fø lo dho ringani ko njinjí fø shauri na. Bbʉbbʉ dhé, ri ka ndi é kpakpa ko njinjí wazi kʉ ná chulu le bbʉ ná shauri na. Føri ka ndi liri ko nanga káni ká maddi. Ká addudho? Ngbà mai ko churi ko kʉ nzá kaka ná ndrŭ ro, ri ka ndi é kpakpa ko rr ko njiri che nari si d’ra ko dho ná le bbʉ ná shauri. (Muh. 7:9) Ko ka ko di sababu ne ko dho. Ko ka ko di shauri bbʉ ná ke nja che ndirigoti ko ka ko di chelo ti ri ke bbʉ nǎ ná chu djo. Loroji na, ko ka ko di ripo: ‘Ri nzá ngani ke bbʉ shauri ma dho ri! Ke ma adi chelo nji ddi!’ Ndirigoti njati ko nanga jini ko ba ná shauri dho nzá ró, ko ka ko be ri pa inga ko ka ko ne shauri ko ji ná ke dhó ro dhé. w22.02 8-9 §2-4

Yova dhó ø dz’ djó ko sie na ná maisha nǎ, ká ko si bani mbudha na maddi Yova djó ko li ko thí nari dho? Loroji na, akoddinga Waizraeli vʉngʉe Misri nǎ no tse nǎ ro nari goti bangʉe nga ná lo djo. Nja kpa nanga ngangʉe nudha tso Misri nǎ ndima ngʉ ba ná nyo bani tse nzɨ nari dho ndirigoti kpa ngʉ Yova bbʉ ndima nyó ná mána be pá. (Hes. 11:4-6; 21:5) Njaro ko ma ká ka ko si e fø di ná ngaddidha na ddi bbo mbudha goti? Ko nzá chu nga le si sa nari ká si njí bbʉ ngbá ngatsi ma nari ri ndiro dz’ ki vé ngʉ Paradiso d’e. Njaro njí sie bbo ndirigoti maisha nga sie sʉsʉ ya kwanza ri. Ko ká si Yova si bbʉ ko dho fø saa na ná ritsi be pá? Ko chu nari kʉ: Ko di mbai po Yova bbʉ ko dho njʉ ná ritsi dho ró, fø saa na ma ko si rinji fø ddi. w22.02 7 §18-19

ZeKaria 8:23, nǎ kʉ ná unabi nǎ le ripo “ddikpa Muyahudi” ndirigoti “ni ndrŭ,” ná føri na mana kʉ ddikpa kikundi. Føri kʉ ché ná le d’ri ná go gʉ ma shi dz’ djó ná kpa. (Ro. 2:28, 29) “Krʉ luga ti ná ndrŭ tsɨ kana ro dre (10) kʉ ná kpetsi kpa” na le dho nari kʉ nja chembø. Kpa “lø ke ró ru tso djǒ” nari na mana kʉ, kpa gba ndima tso chi ndima tøni ro ché na le d’ri ná kpa na, nja ndima bbʉ tsetse ná ibada ddinga d’e. Føri bbai Yova liri Ezekieli 37:15-19, 24, 25 nǎ kʉ ná unabi maddi njini njí, ke liri ché na le d’ri na kpa ma, nja kʉ ná chembø ma na njinjí ddinga. Fø unabi tilo aro kʉ ná tsú djo. Ngab’odha na kʉ ndima si di ra nǎ ná kpa le ddi “Yuda dhó” tsú na (Izraeli bbá pikpa le vʉngʉe nǎ ro ná bbu) ndirigoti ngab’odha na kʉ ndima si di dz’ djó ná ndrŭ le ddi “Efraimu dhó” tsú na. Yova ka ndi gbangʉe aro kʉ ná tsú tso ndiro ri ngʉ “ddikpa tsú” d’e. Føri na mana kʉ kpa njínji ddinga ndima dhó Pi Yesu Kristo dhó Pidhinga tsena.​—Yoh. 10:16. w22.01 22 §9-10

Yesu tingʉe lo njedha dhi ndrŭ dho ngʉ bbʉdha bbʉ ná kpa djo, nì mai kpa ngʉ ri bbʉ ndiro ndrŭ nja ndima ndirigoti ndrŭ bbʉ madha ndima dho d’e ro. Ro kpa ngʉ nji ná fø bblo njí nzɨ ngʉ hwè ro bbʉ Yova thí dho ri. (Mt. 6:2-4) Ko ka ko é bblo kʉ ná ndrŭ, njati ko di ritsi bbʉ ko nanga jini ji ko bbʉri nari dho dhé ró. Njaro ni ka ni dhuri ni tso: ‘Ma churie ná bblo lo njidha ká ma adi dhǒ njí ro i nì? Ma ká addu adi cho ndiro ma nji bblo lo d’e?’ Yova kʉ njí kana adi ndidhó lo li ná Mungu ndirigoti kedhó roho kʉ nì adi njínji ná kpakpanga. (Mwa. 1:2) Føri dho, roho dhó tunda krʉ ka ndi cho ko njí dho. Loroji na, Mutume Yakobo ndingʉeri ɨ: “Nga ró njí kʉ ná udha dhedhe.” (Yak. 2:26) Fø lo dho, Mungu dhó roho dzá tunda krʉ djo ko ka ko pori føri bbai. Krʉ saa ro, ko di njínji ri na ró, ko ridho Mungu dzá roho kʉ nì ndi njínji ko nǎ ro. w22.03 11-12 §14-16

Kodho ringani ko di Yova má krʉ saa ró ndirigoti ko di bblo lo nji nja ndrŭ dho. Nì mai ri kʉ føro, mutume Petro lingʉe Wakristo kpakpa ndiro kpa njí bbo na mana kʉ ná ddikpa lo d’e. Ko tsetse kodhó nyi krʉ kana nari Petro d’ra nari njí, ke pongʉeri: “Anithɨ nidhó akili thika njínjidha dho.” (1 Pe. 1:13) Føri ká kʉ ngbá njí? Petro pongʉeri ché na le d’ri ná le-djoi Wakristo dho, kpadho riengani “‘ndima d’ra ndima nzie ná ke dzá bblo kʉ ná sifa’ krʉ nga lu.” (1 Pe. 2:9) Føri dho, njʉ krʉ kʉ ná Wakristo kʉ hwè na bbo ndima njí bbo na mana kʉ ná fø njí dhonalo ri adi ndrŭ tsotso kó nja njí krʉ djolu. Ri kʉ bbo kʉ ná pendeleo Mungu dzá tsetse ná ndrŭ dho ndima d’ra lo ndirigoti ndima ddi longa bidii na krʉ saa ró! (Mk. 13:10) Ko di kpakpanga nji ko njiri fø ró, føri na ko ridho ko ji kodhi Mungu ndirigoti ko lai ndrŭ ji. Ndirigoti ko ridho ko jiri ko é “tsetse ná ndrŭ” kodhó nyi krʉ kana. w21.12 13 §18

Mutume Paulo ngʉe bblo nganjadha na ndi djoi ma, ndi vei ma na djo. Nì mai ri kʉ føro, Paulo chungʉeri chu nari kʉ, ddikpa ke nji kosa nari nǎ mana nga kʉ ke kʉ che ri. Ke jingʉe ndi djoi ji ndirigoti ke ngʉ adi ndi thí li kpadhó bblo sifa djo. Njati kpa njí nga kʉ chø ná lo ma ró, ke ngʉ adi ndi thí li kpa jieri ndima njí bblo lo ngbà nari djo ndirigoti kpadhó lo jiri le kó ndima tsotso ko nari djo. Anja ngbaribbai ma Paulo kongʉe Filipi nǎ kutaniko nǎ aro kʉ ná le-vei tsotso nari. (Flp 4:1-3) Rinjani nari kʉ, Euodia ma, Sintike ma na kana tangʉe ná lo ndongʉe kpa kana kau nanga ndo nari bbai. Paulo nzá tingʉe lo thø na inga ke nzá d’ingʉe lo kpa djo ri, ro ke lingʉe ndi thí kpadhó bblo sifa djo. Fø le-vei njingʉe njí bí cha Yova dho chi ndima tøni ro. Paulo chungʉeri chu nari kʉ Yova ji fø ndrŭ ji. Paulo ngʉe bblo kʉ ná nganjadha na fø le-vei djo, nari chongʉe ke ronga ndi li fø ndrŭ kpakpa ndiro kpa thɨ ndima kana e ná lo thɨka d’e. Paulo ngʉ adi ndi thí li ndrŭ dhó bblo sifa djo ná lo dho, ke ngʉe hwè na ndirigoti kpa kana kau ngʉe kpakpa kutaniko nǎ nja ndrŭ ma na. w22.03 30 §16-18

Yova bbʉ ná ngoi adi rili ko thí jotso koko ndirigoti ri adi ko tsotso kó ko é bblo kʉ ná ngaddidha na. Le-ve Luz njangʉe fø lo dzá bbʉbbʉnga, le pori ɨ: “Bí ina ma adi ma mbu ddiro kʉ nari bbai. Nja saa na fø lo adi rili ma mbu ma nzá Yova ji nari bbai. Fø di ná lo ba nga ró, ma adi ngbaribbai ma má ma mbu nari d’ra théi Yova dho. Fø ro sala adi rili ma mbu ma bblo.” Fø le-ve pori nari bbai, ko ka ko ba ngoi sala chulu. Ko churi nari kʉ, Yova ma Yesu ma na ka ndima kó ko tsotso ngbà njati rie kodhi ji ko ji ná le dhedhe ma ri ró. Ko le li kpakpa ko d’ralo, ko ddi longa zølo na dhonalo Yova ma, Yesu ma na adi fø sifa dhǒ. Ko iso ka ndi pɨni pɨ dhonalo ko churi Yova ma, ndidzá ngba Yesu ma na chu kodhó uzaifu chu ndirigoti kpa jiri ndima kó ko tsotso ko ndiro ko ve ngatso tso d’e. Kpadjo, ko Yova si “[ko] nyǒ dda krʉ njʉnjʉ” ná ddo b’o!​—Ufu. 21:4. w22.01 15 §7; 19 §19-20

Yesu tingʉe lo aro kʉ ná chu na le mba ná aro kʉ ná dzaitso djo, ddiri kʉ “pʉlʉ” nanga kʉ ná chu ndirigoti ddiri kʉ “sese” nanga kʉ ná chu. (Mt. 7:14) Chu rò nga kʉ gbo ri. Kodho ringani ko vʉ ko ka ko bbi lu ná chu ko koro. Fø ri kʉ bbo na mana kʉ ná longavʉdha dhonalo shinga dhi ngana le mba ná chu kʉ ddikpa dhé. “Pʉlʉ” nanga kʉ ná chu nǎ ndrŭ kʉ bí dhonalo ri lu le bbi nari kʉ sʉsʉ. Ro njedha dhi lo kʉ, bí kʉ ná ndrŭ vʉ ri nga ndima bbí fø chu lu ndirigoti ndima dyø ri lu bbí ná ndrŭ. Kpa nzá famu ri ro nari kʉ, ri kʉ Shetani i rili ndrŭ bbí fø chu lu ndirigoti kedhó fø chu ndrŭ mba dhe dho nari ro ri. (1 Ko. 6:9, 10; 1 Yoh. 5:19) “Pʉlʉ” nanga kʉ ná fø chu ró ro, nja kʉ ná chu ma kʉ ddi “sese” ndi nanga kʉ ro ndirigoti Yesu pongʉeri, ri ba ná ndrŭ kʉ nga bí. Ká addudho? Bbo thonga ná lo kʉ, aluti ro kʉ ná verse nǎ, Yesu ja lo ndi unakpa dho kali dhi bbanabi djo.​—Mt. 7:15. w21.12 22-23 §3-5