Bi 9

Yesu ngʉ ddi ná lo nzá thongʉe bí kʉ ná ndrŭ nyǒ ro ri. Ndrŭ ngʉ rine ke njí nja lo maddi. Ro Yesu gʉngʉe alama ndi dho kpa dho nari gʉ, fø ridho kpa nzá ungʉe ke ri. (Mt. 16:4) Maandiko ká pori ngbà? Masiya djo nabi Isaya ndingʉeri i: “Ke nzɨ si hø ri, ke nzɨ si ndi chu ro ngbe ri, ndirigoti ke nzá ka ndi liri ndi chu rrni chu lu ri.” (Isa. 42:1, 2) Yesu ngʉ lod’ra ná saa na, ke nzɨ ngʉ riji ndi chuni chu ri. Ke nzá chingʉe bbo hekalu ro ri, ndirigoti ke nzá njøngʉe dini djó bbobbokpa ngʉ adi ji ndima njø ná ru ro ri, ke nzɨ ngʉ rine le nzi ndi dini djó bbobbokpa ngʉ adi riji le nzi ndima nari bbai ri. Nzadha kana ke ngʉe ná saa na, ke nzá jingʉeri ndi bbʉ hwè Pi Herode thí dho ddù ndi nji nari chulu ri. (Lu. 23:8-11) Nì mai Yesu ngʉ ddù nji ro, ke lingʉe ndi thí bbo lod’radha dhi njí djo. Ke pongʉeri ndi unakpa dho ɨ: “Ri kʉ føri dzá lo dho i ma singʉe dz’ djo ri.”​—Mk. 1:38. w21.05 4 §9-10

Ko adi “ni thí kʉ bblo cho ro nŭnŭ di ná shinga badha dho ná ndrŭ” ne. (Mdo. 13:48) Nja ko kó fø kpa tsotso ndima ngʉ Yesu unakpa d’e, kodho ringani ko kó kpa tsotso ndiro (1) kpa famu Biblia nǎ lo, (2) kpa uri ndirigoti (3) kpa njínji Biblia nǎ ro ndima chu ná lo na d’e. (Kol. 2:6, 7; 1 Te. 2:13) Kutaniko nǎ krʉ kʉ ná ndrŭ ka ndima kó ø si ná wanafunzi tsotso jidha ndima dho kpadho nari na ndirigoti bblo ndima kpa kó nari na maddi. (Yoh. 13:35) Mwalimu dho ringani ndi ba saa bbo, ndi di ndidhó mwanafunzi na ndirigoti ndi njí kpakpanga bbo ndiro ndi kó mwanafunzi tsotso ndiro ke tu “che kʉ ná udha” ndi nǎ ro ndirigoti ke le ndidhó che kʉ ná nyi thika d’e. (2 Ko. 10:4, 5) Ddikpa ke tsotso le kó ndi le ndidhó nyi thika ndirigoti ndi tso si kpø batiso djo, ná føri ka ndi dzi ddo bí. Ro fø le rinji nari na mana kʉ bbo. w21.07 3 §6

Ko ká uri u ngbà nari kʉ, Yova dzá Dimu adi bbʉbbʉlo ddi ndirigoti kpa dhé adi madha bbʉ Yova dho ngbà tho ke nyǒ ná chulu? Mutume Paulo nanga ro nzɨ ngʉ adi rɨni ndi chu ná bbʉbbʉlo djo ri. (1 Te. 1:5) Ke nzá ungʉe fø lo ri hwè bbʉ ndi dho nari dho dhé ri. Paulo ngʉe li ngʉ adi ndi dyu li Mungu dzá lo zødha ro ná ke. Ke ungʉeri nari kʉ “krʉ kʉ ná maandiko ndini Mungu dzá roho takatifu” chulu. (2 Ti. 3:16) Ke ká chungʉe ngbá lo ndi ngʉ adi zø ná lo nǎ ro? Maandiko nǎ Paulo ngʉ ba ná lo ngʉ ridho Yesu kʉ Masiya nzá mai Wayaudi bbá dini djó bbobbokpa chungʉe fø lo ro. Fø kali dhi dini nǎ kpa ngʉ ndima nzǐ Mungu dzá lo ddi ri, ro kpa ngʉ adi nzá tho Mungu nyǒ ná lo nji. (Tit. 1:16) Ro Paulo nga ngʉe fø kpa bbai ri, ke nzɨ ngʉ adi ndi ka ndi u ná lo vʉ ndi jiri nari bbai ri. Ke ngʉ adi lonangaddi bbo ndirigoti ke ngʉ adi njínji “Mungu dhó shauri krʉ na.”​—Mdo. 20:27. w21.10 18 §1-2

Nì mai ko adi lod’ra ndirigoti ko adi longaddi ndrŭ dho ro, kodho ringani ko nonga nari kʉ Mungu i adi rili ri dhidhi. (1 Ko. 3:6, 7) Krʉ kʉ ná ndrŭ dhó shinga kʉ mana na bbo Yova nyǒ nji. Ke bbʉ pendeleo ko dho ko njinjí ddinga ndidzá Ngba ma na ndiro ko nju ndrŭ tso njonjo ndrŭ tsɨ kana ro nja kpa chu bbʉbbʉlo dz’ dzá mwisho si si nari nji d’e. (Hag. 2:7) Kodhó lod’radha dhi njí kʉ ndrŭ dhó shinga le gø na ná njí bbai. Ko kʉ ddiddi or dhi bbu koni ná ngana le cho ndima rá ndrŭ gø ná kpa bbai. Rie cho le cho ná kpa kana ro sese kʉ ná kpa mai gø shi kʉ ná ndrŭ ró, kpa krʉ nji ná njí kʉ mana na bbo. Kodhó lod’radha dhi njí ma kʉ føi. Ko nzá chu Shetani dhó i dz’ djo ro ká thi kʉ ná ndrŭ si gø nari ro ri. Ro Yova ka ndi liri ko kana ie ma kó ndrŭ tsotso ngba dhé ndiro ndima si gø d’e. Bolivia nǎ di ná le-djo Andreas pori i, “Ma adi rinja nari kʉ njati ddikpa ke ne Biblia nǎ lonanga ndirigoti le tso si kpø batiso djo ró, føri nga kʉ ddikpa ke nji ná njí ri.” Føri dho akobbari kodhó nganjadha e bblo lod’radha dhi njí djo. Njati ko njiri fø ngbà ró, Yova si ko ronga lele ndirigoti ko sie hwè na bbo lod’radha dhi njí kana. w21.05 19 §19-20

Zǎ pɨ ná ke adi rine ndi lø zǎ ndirigoti ndi hwi ri hwi. Ke ka ndi njinjí njonjo kʉ ná mutego na Yobu iso singʉe pɨ ná kpa kana ddike pongʉeri nari bbai. (Yob. 18:8-10) Zǎ pɨ ná ke ká adi rinji ngbà ndiro zǎ tsu ndidhó mutego na d’e? Ke adi rine ndi chulo zǎ djo. Ke ka ndi dhuri ndi tso: Føri ká e ngbadi ná zǎ? Ri nyǒ ká addu adi tho? Ndirigoti chʉ ká le ka le lø ri ngbaribbai? Shetani kʉ zǎ pɨ ná ke bbai. Ke adi rine ndi chulo ko djo. Ke adi ngbaribbai ma kodhó lo kʉ nari nja ndirigoti addu ma adi ko nyǒ tho nari nja. Føri dho ke adi ngbà na ko ka ko tsu ná mutego li ko dho. Føri dho, Biblia ripo njati ko tsu kedhó mutego na ró, ri ka ndi kaka ko vʉ ri nǎ ro. Ndirigoti Biblia ko ka ko njí ná lo dho ndiro nzɨ ko tsu kedhó mutego na ró. Shetani adi rine ko tsu aro kʉ ná mutego na, føri kʉ nodha ndirigoti tamaa. Shetani pɨrie ndrŭ cho bí b’lo fø che kʉ ná nyí chulu. Ke kʉ re pɨ ná ke bbai. Re pɨ ná ke adi nyǒ li mutego na ndiro re tsu ri na d’e. (Zb. 91:3) Ro kodho nzá ringani ko tsu Shetani dhó mutego na ri. Ká addudho? Dhonalo Yova d’ra Shetani adi ko pɨ ná njonjo kʉ ná chu ko dho.​—2 Ko. 2:11. w21.06 14 §1-2

Chi kʉ ná ngó ngʉ ná ndrŭ kʉ mana na bbo. Mungu dzá Lo ripo, kpa djǒ ró pʉ kʉ taji bbai. (Mez. 20:29) Nì mai ri kʉ føro, ri ka ndi é dhʉdhʉ le be fø kpa pa. Njati jadda kpa di ngó ndrŭ nja mana na ngbà ró, kpa ka ndima ba bbo na mana kʉ ná lo kpa dhó ro. Yova adi ngó ngʉ ná ndrŭ nja mana na bbo. Ke chu kpadhó lo ma, kpa dhó bblo kʉ ná sifa ma na. Yova nanga adi jini bbo ngó ngʉ ná ndrŭ ndima chu ná lo d’ra jadda kpa dho ná saa na. (Yob. 12:12; Mez. 1:1-4) Ndirigoti Yova adi ngatso kpa ve nari ma nja ddi. (Mal. 3:16) Kpa adi bani kpakpalo na bí, ro kpa e kpakpa kʉ ná udha na dhé Yova djo. Kpadjo kpa kʉ na ná ngab’odha kʉ bbo bbʉbbʉlo kpa chungʉe ná saa na kpa ngʉe ri na nari djolu. Yova ji kpa bbo dhonalo kpa ke ró dho d’ra “ngbà mai kpa ngʉ ngó ro.”​—Zb. 92:12-15. w21.09 2 §2-3

Krʉ saa ró, ri kʉ bblo ko di ko nanga ne. Ko ka ko dhuri ko tso: ‘Ma ká adi ma mbu bblo njati ma di riddi ma dada nja ke djolu ró? Ma ká adi njínji bbo kutaniko nă ndiro ma chuni nja ndrŭ djolu pli d’e? Inga ma ká adi njínji bbo ma riji ma bbʉ hwè Yova dho nari dho?’ Biblia ripo nzɨ ko di ko ddi nja ndrŭ na. Ká addudho? Dhonalo njati ko di riddi ko njínji pli ko djoi djolu ró, føri ka ndi liri ko é nodha na. Ndirigoti ko di riddi ko djoi njínji pli ko djolu ró, ko thí ka ndi bʉni bʉ. (Ro. 12:3) Kodho ringani ko nonga nari kʉ, Yova liri ko kana nga é chøchø ndi na, føri nga kʉ ko d’anid’a, inga ko chu lotidha bblo, inga bí kʉ ná ndrŭ ji ko ji nari dho ri, ro ri kʉ ko ji ke ji ndirigoti ko ngarr kedzá Ngba dho nari dho.​—Yoh. 6:44; 1 Ko. 1:26-31. w21.07 14-15 §3-4

Ndiro kodhó ngaddidha ngʉ ø d’e, kodho ringani ko nji sala, ko zø Biblia ndirigoti ko ddinga bbo ko zø ná lo djo. Anjinjí fø lo na ndirigoti ali ni thí Yova djo ndiro ni é kpakpa d’e. Kedzá roho takatifu ka ndi kó ni tsotso ndiro nzɨ ni di ni ddi nja ndrŭ na ró. Yova ka ndi liri, ni chu nidhó lo ndirigoti ke ka ndi kó ni tsotso ndiro nzɨ ni bani tamaa na inga nodha na, njati rie che kʉ ná ngaddidha adi si ni thí na ri ró. (2 Ny. 6:29, 30) Yova chu ko thí na kʉ ná lo chu. Ke chu kodhó kpakpalo ma, Shetani dzá i dz’ djó ko bani na ná lo ma ndirigoti ko kʉ nzá kaka ná ndrŭ nari maddi. Yova di ngbaribbai ma ko hwini kpakpalo tso ró nari nja ná saa na, kedzá jidha adi dhidhi ko laidjo. Ndiro ko chu ngbaribbai ma Yova adi ndi mbu ko djo nari d’e, Yova bbʉ kalʉ ngba (bébé) ma kana ngae ndidzá mama na ná loroji ko dho. (Isa. 49:15) Ko nanga adi jini bbo dhonalo kʉ, ko churi Yova ji ko bbo, ko njínji ndi dho ko thí nǎ ro krʉ nari dho! w21.07 24-25 §17-19

Ko ka ko é hwè na Yova dzá njí kana njati ko di rinji ko thí nǎ ro krʉ ró. “Anjinjí bbo” lod’radha dhi njí kana ndirigoti anjiri ni di njínji ddinga kutaniko nǎ ndrŭ na. (Mdo. 18:5; Ebr. 10:24, 25) Adi matayarisho nji bblo njudha dho ndiro ni li nja ndrŭ kpakpa njudha dhi ngana d’e. Ni dho le bbʉ ni si nji njudha dhi ngana na kipindi dho anji matayarisho bblo. Njati ni dho le bbʉ ddikpa njí kutaniko nǎ ró, nzɨ di si retar ndirigoti anjiri ni dho le pori nari bbai. Nzɨ di ni dho le bbʉ ná njí be pa, adi rinji bblo. Anji ri ni é ufundi na bbo ni dho le bbʉ ná njí kana. (Mez. 22:29) Ni di njínji bbo Yova dho ró, ni kana kau ka ndi ngʉ kpakpa ke ma na ndirigoti ni ka ni é hwè na. (Gal. 6:4) Ndirigoti ri ka ndi liri ni nanga jini ji njati nja ndrŭ ba ni jie ná fø pendeleo ma ró.​—Gal. 5:26. w21.08 22 §11

Kodho ringani nzɨ ko nji nodha, ndirigoti ko bbári Yova di longaddi ko dho. Ddiddi dhè ka ndi liri nzɨ ddikpa ke thí njínji bblo nari bbai, nodha ka ndi liri nzɨ ko rrnga Yova chutso ddá ko dho nari dho. Wafarisayo ngʉe nodha na nari lingʉeri nzɨ kpa u Yesu dho Mungu dhó roho takatifu chutso ddá ndirigoti ke kʉ Mungu dzá Ngba nari dhǒ ná lo. (Yoh. 12:37-40) Kpa ngʉe nodha na ná føri ngʉe che dhonalo ri ka ndi choe kpa tso nzɨ kpa si choro nŭnŭ di ná shinga ba ró. (Mt. 23:13, 33) Ri kʉ bbo na mana kʉ ná lo ko bbari Mungu dzá lo ndirigoti kedhó roho takatifu lé kodhó nyi thika, kodhó ngaddidha thika, ndirigoti kodhó longavʉdha thika! Yakobo ngʉe nyenyenga na nari dho, ke bbangʉeri Yova ddi longa ndi dho. Ndirigoti kedhó nyenyenga dzá lo dho ke ngʉngʉe bblo kʉ ná mwalimu. w22.01 10 §7

“Ko di nganzi krʉ saa ro” ró, ko ka ko uri kodhi ra nǎ Baba ka ndi rr ko ngbà. (Kol. 4:2) Nzá ma kodhó sala goti ngʉ lele ró, Yova tsoni ndi si kodhó sala goti ngʉ “ngbà thonga ná saa na.” (Ebr. 4:16) Fø lo dho, ri nzá ngani ko ti chelo Yova djo rie nja lo njini lele nzá ma ko e riddi ná saa na ró ri. Loroji na, cho kpari kana bí kʉ ná ndrŭ ngʉ rinzi ndima nja i dz’ djó lo tso Mungu dhó Pidhinga si d’ø nari. Yesu ma ka ripo ddi ringani ko nzinga fø lo djo. (Mt. 6:10) Ro, njati ddikpa ke di ri bba ndidhó udha djødjø, mwisho si ndrŭ e ri b’o ná saa na nzá ná lo dho ró, føri nga kʉ nyodyu dhi lo ri. (Hab. 2:3; Mt. 24:44) Ko di Yova b’o ndirigoti ko di nganzi ke bbʉ udha kodhó ró, ko ridho ko kʉ nyodyu na. Mwisho si si ngbà thonga ná saa nganga na dhonalo kʉ Yova lɨ “ri dhi ddo ma, ri si si ná saa ma” b’lo. Ndirigoti føri sie bblo kʉ ná saa ndrŭ krʉ dho.​—Mt. 24:36; 2 Pe. 3:15. w21.08 10 §10-11

Nyenyenga dhi ngó ndrŭ churi nari kʉ, ndima nzá ka ndima njí ritsi anziro nga bbai ri. Loroji na, addinga kodhó wangalizi wa muzunguko djo. Kpadhó cho sí 70 ná saa na, kpa adi fø njí bbabba ndirigoti le adi d’i njí bbʉ kpa dho. Føri ka ndi é kpakpa kʉ ná lo. Kpa nanga adi jini ji nja le-djoi tsotso ndima kó nari dho. Ro kpa churi nari kʉ, ri kʉ bblo jadda kpa njí fø njí. Føri dho kpadhó nganjadha e ddiddi Walawi dhó nganjadha ngʉe nari bbai. Walawi dhó cho si 50 ná saa na, kpa nzɨ ngʉ adi njí ki nji vi hekalu na ri. Ngó ngʉ ná Walawi ngʉe hwè na ndima dho le bbʉ ngbadi ná njí ma ró. Kpa ngʉ adi ndima dho le bbʉ ná njínji bidii na ndirigoti kpa ngʉ adi jadda kpa tsotso ma kó ddi. (Hes. 8:25, 26) Njʉ maddi wangalizi wa muzunguko dhó cho si 70 ná saa na, kpa nzɨ adi bí kʉ ná kutaniko ronga be ri, ro kpa adi ndima dhó kutaniko nǎ madaraka na kʉ ná ndrŭ tsotso kó ndirigoti kpa adi fø ndrŭ li kpakpa. w21.09 8-9 §3-4

Yesu d’rangʉe kpakpa ka ndi li le ná lo vivingʉe ná ngba djo Luka 15:11-32 nǎ. Ddikpa jadda ke tsangʉe tsa ndi dzá baba ro, ke rangʉe ra abba ro ndirigoti ke rangʉe “da ngø na.” Ke rangʉe tsu uasherati dhi maisha na. Kpakpa kedhó maisha ngʉngʉe ná saa na, ke ngangʉe ngaddidha tso ndi njingʉe ná chelo djo. Ke rangʉe riutso nari kʉ, ndidhó maisha ngʉe bblo ndidzá baba bbá. Yesu pongʉeri fø jadda ke “rangʉe ndidhó lo utso d’id’i.” Ke njangʉeri ri kʉ bblo ndi ngʉ abba ndirigoti ndi kó zø ndidzá baba tso. Fø jadda ke rangʉe riutso d’i nari kʉ, ndi nzá vʉ lonanga bblo ri, ri vʉ fø ngaddidha ngʉe bblo. Kedho ringangʉeni ndi le ndidhó nyi thika le! Vivi ná ngba dhongʉe ndi leni le nari ndi nji ná lo ró. Yesu d’rangʉe ná føri nga kʉ kpakpa ka ndi li le ná historia dhé ri. Fø lo nǎ ro vʉ ná nz ɨ thika leni ná yadha ka ndi kó kutaniko nǎ wazee tsotso ndiro ndima chu bbo chenga nji ná ke ká leni bbʉbbʉ ndidhó chenga nǎ ro nari d’e. w21.10 5 §14-15

Nzɨ nanga le si ja nari ká kʉ addu? Mutume Paulo pongʉeri “Ko si nzɨ ronga jaja ná Pidhinga ba nari dho, ako ko . . . Mungu dzá takatifu kʉ ná njí tsotso, nì ko ke do nji ndirigoti nì ko heshima bbʉ ke dho ro.” (Ebr. 12:28) B’lo le ja dz’ nanga ya mwisho nari goti Mungu dhó Pidhinga si ma ddiro dhé. (Zb. 110:5, 6; Da. 2:44) Vi le ka le vi ná saa ro nga kʉ ri! Ndrŭ dho ringani ndima vʉri: Ndima ká ka ndima kó dz’ djó lo tsotso ndiro ndima ka si sadha ba d’e. Inga ndima njí Mungu ji ná lo ndiro ndima ka si choro nŭnŭ di ná shinga ba d’e. (Ebr. 12:25) Lod’radha dhi njí chulu ko ka ko kó ndrŭ tsotso ndiro ndrŭ vʉ bbo na mana kʉ ná fø lo nanga d’e. Bí ina ringani kodi kodhi Bboke Yesu pongʉe ná i lo ngano: “Pidhinga dzá hwè lo-i dho ringani ndi d’rani dz’ djolu gble ndi é ushuhuda dz’ djó ndrŭ krʉ dho ndirigoti mwisho si d’e.”​—Mt. 24:14. w21.09 19 §18-20

Wazee, ni ba ná bbo na mana kʉ ná daraka kʉ ni pɨ mutengwa kʉ nǎ ná familia iso. (1 Te. 5:14) Anidi kpa li kpakpa njudha njí inga njudha goti. Anidi ra kpa ronga be abba ma, anidi sala ro ma nji kpa ma na. Anidi lo ro ma d’ra kpa na inga nja saa na aninzi kpa ro ibada ya familia dho ma. Wazee dho ringani ndima nja njedha na thí kʉ ná ndrŭ dhó lo bblo, ndima pi kpa iso ndirigoti ndima dhǒ jidha kpa dho. (1 Te. 2:7, 8) Yova “nzá jiri ddikpa le ma ba sadha ro ddiri, ke jiri kpa leni le.” (2 Pe. 3:9) Ngbà mai ddikpa le ka ndi njí chenga ro kedhó shinga kʉ mana na bbo Yova nji. Anonga nari kʉ Yova bbʉngʉe ndidzá Ngba dzá shinga ndrŭ krʉ djotsina. Yova adi bbabba ndi ná ndrŭ tsotso kó jidha na ndiro kpa ngʉ ndi ro d’e. Ke churi nari kʉ kpa ka ndima ngʉ ngbà ndi ro ddiddi Yesu d’rangʉeri vivi ná ngba dhó loroji nǎ nari bbai.​—Lu. 15:11-32. w21.09 30-31 §17-19

Njaro ni nzá ka ni d’ra lo bblo ndirigoti ni ddi longa anziro ni ngʉ rinji nari bbai ri, dhonalo nidhó afya nga kʉ bblo ri inga nidhó kpakpanga nga kʉ bbo ri. Ni ka ni é hwè na dhonalo kʉ, ni dz’ djolu gble njini na njí tsotso kó. Akonja Pi Daudi dhó loroji, ke ma, ndi unakpa ma na rangʉe ndima bbá familia ma, ndima dhó ritsi ma na tso le Waamaleki dhó ro ná saa na. Fø kpa kana ro 200 kʉ ná kpa njengʉeni nje vita ndima nji nari dho, føri dho kpa mangʉe aluti ndiro ndima b’o no ronga d’e. B’lo kpa si vita djó nari goti, Daudi pongʉeri vita dhi nga nǎ ro ndima ba ná no nanga le ndó ddiddi fø kpa krʉ dho. (1 Sa. 30:21-25) Dz’ djolu gble ko longaddi ndrŭ dho ná njí ma di føi. Njaro ni nzɨ adi lod’ra inga longaddi ni jieri nari bbai ri. Føri dho kutaniko nǎ ndrŭ krʉ ka ndima é hwè na dhonalo kpa nji kpakpanga ndiro ddikpa ke chu Yova ndirigoti ke ba batiso d’e. Yova adi ko nji ná kpakpanga nja nì ndirigoti ko ji ndi nari ma nja ddi. Ndirigoti ke ngbaribbai ma ko ka ko é hwè na lod’radha dhi njí kana nari d’ra ko dho. (Yoh. 14:12) Ko ka ko uri u nari kʉ, Yova ka ndi ba hwè kodhi lo dho njati ko njeni nzá ró! w21.10 28 §15-17

Ngó ko di ngʉ ná saa na, ko ka ko di riddi nari kʉ ko nzá ka ko njinjí ro Yova dho jadda ro ko ngʉ rinji nari bbai ri. Føri ka ndi é bbʉbbʉ dhonalo ko nga kʉ kpakpanga na anziro ringʉe nari bbai ri, føri dho ko ka ko kó jadda kpa tsotso kodhó nyodyu na ndirigoti ko chu ná lo na ndiro kpa é mana na Yova dzá tengenezo nǎ d’e. Ngó ndrŭ dho ringani ndima é nyenyenga na njati kpa jiri ndima kó jadda kpa tsotso ró. Nyenyenga na kʉ ná ke adi nja ndrŭ nja mana pli ndi djolu. (Flp. 2:3, 4) Fø sifa na kʉ ná ngó ndrŭ churi nari kʉ ni ka ni njí ritsi njonjo kʉ ná chulu Biblia ripo nari bbai ndirigoti fø ritsi ka ndi njini bblo ngbà. Føri dho kpa nzɨ adi riji jadda kpa njí ritsi ndima ngʉ adi rinji nari bbai dhé ri. (Muh. 7:10) Nì mai ri kʉ føro, kpa ka ndima d’ra jadda kpa dho ná bblo lo kʉ bí, ndirigoti kpa churi nari kʉ “i ngø djó lo thika leni le” føri dho jadda kpa ka ndima njinjí ø ufundi na.​—1 Ko. 7:31. w21.09 8 §1, 3

Yova nzá ka ndi pori ndidzá njí dhi kpa njí nzá tsetse ná nyi ro ri. Ke kʉ bbʉbbʉ dhé mutakatifu kʉ ná ke. Ndiro Waizraeli nó fø lo nga d’e, bbo kuhani djǒ ró ngʉe ná tirbani djó ngʉe ná dju djó le ndingʉe fø lo ndi. Ri djó le ndingʉeri “Utakatifu chè Yova dho.” (Kut. 28:36-38) Fø dju djó kʉ ná lo ka ndi dhoeri ri nja ná ndrŭ krʉ dho nari kʉ Yova kʉ bbʉbbʉ mutakatifu kʉ ná ke. Ro njaro ddikpa mwizraeli dho nzá ri ka ndi kae ndi nja fø dju djó le ndingʉe ná lo ri dhonalo ke nzá ka ndi ndrieni chøchø bbo Kuhani kuso ri. Nde fø ke ká ka ndi chue Yova kʉ mutakatifu nari bbʉbbʉ? Bbʉbbʉo! Waizraeli krʉ ngʉ adi Biblia nǎ sheria le zø kpetsi kpa dho ma, isɨ ndrŭ dho ma, nzø dho ma nari rr nì. (Kum. 31:9-12) Njati rie fø ga ni ngʉe ri ró, ri ka ndi kae ka ni rr i lo: “Ma kʉ Yova nidhi Mungu, ndirigoti nidho ringani . . . ni é watakatifu, dhonalo ma kʉ mutakatifu.” “Nidho ringani ni é watakatifu ma dho, dhonalo ma Yova kʉ mutakatifu.”​—Law. 11:44, 45; 20:7, 26. w21.12 3 §6-7

Nja ndrŭ nanga ri adi d’o bbo ndima dhó kimwili nǎ ritsi djo. Njaro kpa di nǎ ná ngø nǎ bí kʉ ná ndrŭ kʉ njedha ndirigoti ri kʉ kpakpa le ba njí. Njaro ri ka ndie kpakpa kpa dho kpa ba ndima dhó familia ronga ndima b’o na ná mbø. Inga kpa tsotso ngʉ kó familia nǎ ná ke dhedhe, føri dho kpa ka ndima má nga dhó mbø ro. Do ka ndi tá ko na ko bani na ná kpakpalo djo tsina nanga rɨngana, kodho ringani ko li ko thí Yova djo. Anonga nari kʉ, Yova pori ndi si ko tsotso ko kimwili nǎ ritsi na njati ko li kiroho nǎ lo anziro ngbà ró. (Mt. 6:32, 33) Ke adi ndi tsoni djo ná fø lo njinji. (Kum. 8:4, 15, 16; Zb. 37:25) Njati rie Yova adi re ma, maua ma na dhó lo tso ma gba ddi ri ró, bbʉbbʉ dhé ko nanga ro nzá lo ka ndi d’o ko ká si addu ma nyo inga ko ká si addu ma njø nari djo ri! (Mt. 6:26-30; Flp. 4:6, 7) Ddiddi jidha adi gødhi ndrŭ ronga cho ndima bbʉ kimwili nǎ ritsi ndima dhi nzø dho nari bbai, jidha adi kodhi ra nǎ Baba ronga cho ndi bbʉ kimwili nǎ ritsi ndidzá njí dhi kpa dho. w21.12 17 §4-5; 18 §8

Ddikpa ke inga ni lai Mukristo ká njirie che pli kʉ ná lo ro b’lo ni ró? Loroji na, ngbà mai Yosefu ró ke djoi njingʉe nga kʉ chø ná lo ro, ke lingʉe ndi thí Yova dho ndi ngʉ nji ná njí djo ndirigoti Yova lengʉe ke ronga le ngatsovedha djotsina. Fø saa krʉ kana, Yosefu njingʉe chelo ngʉ nji ndi ró ná ndrŭ zø ndirigoti ke ngʉ ngbaribbai ma Yova ndi ronga lé nari njanja. (Mwa. 45:5) Yosefu bbai, ko iso ka ndi pini pi ko di ndrini chøchø Yova ro ndirigoti ko di rib’o ke thɨ nga kʉ chø ná lo thika ndi ji ná saa na ró. (Zb. 7:17; 73:28) Njati rie ni ró ndrŭ nji nga kʉ chø ná lo inga nja ndrŭ bʉ ni thí ná lotso ni ve ró, addinga djo nari kʉ Yova kʉ chøchø “bʉ thí bʉni ná ndrŭ ró.” (Zb. 34:18) Ke ji ni ji ni ngatsove ndirigoti ni djó li o ná no ni bu ndi djo nari dho. (Zb. 55:22) Ke kʉ dz’ lú djo lod’i ná ke. Ke ró ka ndi runi ná ddikpa ritsi ro ma ngaddi kʉ ri. (1 Pe. 3: 12) Nzá tso ni ka ni d’ø ná kpakpalo tso ró ni hwini ná saa na, ni ká adi Yova b’o nì? w21.08 11 §14; 12 §16

Ri ka ndi é nyodyu dhi ko neri ko njí ngbà ka ndi li ko kana nga chøchø Yova na ná lo. Kodho ringani ko li bbo na mana kʉ ná lo ko njí. Nja saa na bblo le njínji le dhó saa na nari na mana kʉ le vʉ aro le ka le njí ná lonanga, nga mai ri ka ndi é chelo ro. Fø loroji ko ka ko nja Yesu rangʉe Maria ma, Marta ma na ronga be ná saa na njingʉeni ná lo ró. Marta nanga jingʉeni bbo Yesu si ndima bba nari dho, føri dho Marta ngʉ bblo kʉ ná nyo ri ke dho. Ro le dhi vena Maria dingʉe Yesu kuso ndirigoti le ngʉ Yesu ddi ná lo rr. Marta nzá njingʉe ri ro che maddi ri, ro Yesu pongʉeri Maria “vʉ bblo kʉ ná sehemu.” (Lu. 10:38-42, maelezo ya chini) B’lo ddo da bí nari goti, Maria ka ndi vie fø saa na ndi nyongʉe ná nyo nga vi, ro ko churi nari kʉ le nzá ka ndi vie Yesu dhó ró ndi rrngʉe na longa ro ri. Maria bangʉe hwè bbo fø saa na ndima dingʉe ddinga Yesu ma na nari dho, ko maddi ko ka ko di hwè ba Yova na ko di nari dho. w22.01 27 §5-6

Ngbà mai Ahabu djøngʉe ndi djø Yova nyǒ njí ro, luti ke njingʉe ná lo dhongʉeri nari kʉ, ke ro nzá lengʉeni ndi thí nǎ ro krʉ ri. Ndirigoti ke nzá chongʉe nja ndrŭ ronga ro ndiro ndima bbʉ madha Yova dho d’e ri. Ahabu dhe nari goti, Yova d’rangʉe ngbaribbai ma ndidhó ngaddidha ngʉe fø ke djo nari. Mungu dzá nabi Yehu pongʉeri, ke ngʉe “che kʉ ná ke.” (2 Ny. 19:1, 2) Kpadjo addinga i lo djo: Njati Ahabu leeni bbʉbbʉ ró, Yova dhó nabi nzá ka ndi nzie ke ndrondro Yova ná che kʉ ná ke ri. Bbʉbbʉ dhé, ngbà mai Ahabu nanga lo d’ongʉe ro, ke ro nzá lengʉeni ndi thí nǎ ro krʉ ri. Ahabu dhó loroji nǎ ro ká ko ka ko ba ngbá somo? Ahabu ma ka ndima bae malipizi ndibbá familia ma na nari Eliya d’rangʉe ná saa na, ke djøngʉe ndi djø. Føri ngʉe bblo ke njiri ri. Ro luti ke njingʉe ná lo ka ridho nari kʉ, ke nzá lengʉeni ndi thí nǎ ro krʉ ri. Føri dho le ko leni kodhó chelo nǎ ro nari na mana nga kʉ ko thí ba njedha dhé ko nji ná chenga dho ri. w21.10 3 §4-5, 7-8

Nabi Isaya ma, ndi bbá le ma na lingʉe Yova dzá njí anziro ndima dhó maisha nǎ. Isaya ngʉe nabi, ndirigoti ri njani nari kʉ ke bbá le ma ngʉ fø njí ro nji ddi nari bbai, dhonalo le ngʉ nzini “nabi.” (Isa. 8:1-4) Isaya ma ndi bbá le ma na lingʉe Yova dho le madha bbʉ nari anziro ndima dhó maisha nǎ. I ddo ró kʉ ná dza dhi ndrŭ maddi ka ndima dyø Isaya ma, ndi bbá le ma na dhó loroji kpakpanga na ndima njínji Yova dho nari chulu. Kpa ka ndima li ndima thí Yova djo, Biblia nǎ unabi ndima zø ddinga ndirigoti ri njini nari ndima nja nari chulu. (Tit. 1:2) Kpa ka ndima ddinga ndima ka ndima nji ná lo djo ndiri na ndima kó Biblia nǎ unabi njini nari tsotso d’e. Loroji na, kpa ka ndima kó Yesu dhó unabi tsotso ndiro ri njini d’e, føri kʉ le d’ra pidhinga dzá hwè lo-i dz’ djó ndrŭ krʉ dho mwisho si nari nji. Dza dhi ndrŭ di Biblia nǎ unabi njini nari nja ró, kpa ka ndima vʉri ndima njinjí bbo Yova dho. w21.11 16 §9-10

Yesu ngʉ adi ngaddi ndidzá mama djo, mujane ndi ngʉe ro. Yesu ngʉe jidha na ndirigoti ke ngʉ ngaddi Maria dhó lo djo nari dho, ke chungʉeri nari kʉ Yohana ka ndi b’o le ronga ngbà kiroho nǎ lo na. Fønga djó ro, Yohana ngʉe Maria dzá ngba bbai ndirigoti ke b’ongʉe le ronga ndidzá mama bbai. Yesu dhongʉe jidha bbo ndidzá mama dho ndirigoti le ngʉe nì ke kpa ngʉ hwi ná ngana! Yesu dhó lo nǎ ro ká ko ka ko ba ngbá somo? Kutaniko nǎ ko djoi ma, ko vei ma na dho ko ka ko dhǒ jidha bbo pli, familia nǎ ndrŭ djolu. Kodhó familia nǎ ndrŭ gʉ kodhó lo gʉ ma inga kpa bba ko bbá ma ró, Yesu pongʉeri Yova ma, Kedhó tengenezo ma na nzɨ bba ko ro ri, ndirigoti ko si vi ko vi nari ba “100 ina djolu”. Njʉ bí kʉ ná ndrŭ ka ndima é kodhi kpetsi ngba bbai, singba ngba bbai, mama bbai, inga baba bbai. (Mk. 10:29, 30) Kiroho nǎ familia nǎ ko tso gbani ddi udha kana ndirigoti jidha kana Yova ko ji ro. Føri dho ká ni adi ni rr ngbaribbai?​—Kol. 3:14; 1 Pe. 2:17. w21.04 9-11 §7-8

Chi kʉ ná jidha ko ji ko dhǒ ná saa na, ko adi riji ko kó nja ndrŭ tsotso. Njʉ maddi drrdrr nga bbai, bí kʉ ná le-djoi ma, le-vei ma na adi rivʉ ndima dhǒ chi kʉ ná jidha ndima lai Wakristo dho, rie nzá ma ndima chu kpa bblo ri ró. Loroji na, njati kpa rr ri chʉ ngaba ná lo banga ddikpa ngana ró, kpa adi rine théi ndima chu ngbaribbai ma, ndima ka ndima kó ngatsotso nari. Njati kutaniko nǎ ddikpa le bani kpakpalo na ná saa na, kpa nanga nzɨ adi rɨni fø le tsotso ndima ko nari dho ri. Karne ya kwanza na ngʉe Makedonia nǎ ná Wakristo bbai, kpa adi kpakpanga nji bbo ndiro ndima kó nja ndrŭ tsotso d’e. Fø Wakristo bbʉngʉe bbʉdha, “ndima dhó ringʉe nanga djolu” ndiro ndima kó vʉ tso vʉni ná le-djoi tsotso d’e. (2 Ko. 8:3) Njʉ, jidha na kʉ ná le-djoi ma, le-vei ma na ngatsotso kó nari dho wazee adi mbai po bbo. Wazee di fø le-djoi ma, le-vei ma na li kpakpa nari ka ndi cho kpa ronga ndiro kpa rá anzi nja ndrŭ tsotso ndima kó nari na d’e.​—Isa. 32:1, 2. w21.11 11 §14; 12 §21

Krʉ saa ró, ko krʉ e shauri dzá lazima na. Nja saa na, ko ka ko dhunga nì adi shauri na njínji ná le tso. Ro nja saa na jiji ko ná le-djo ka ndi pori, ko ji ko njí nari kʉ “che kʉ ná lo” ná fø lo si rili ko nanga ri d’od’o. (Gal. 6:1) Inga ko ka ko ba shauri b’lo ko nji chelo nari goti. Rie ngbǎ di ná shauri ma le bbʉ ko dho ri ró, ringani ko rr ri rr. Fø ko rinji nari kʉ bblo ndirigoti ri si kodhó shinga gøgø! (Mez. 6:23) Kodhó njʉ nga dhi andiko ko li kpakpa ko “rr nyodyu na kʉ ná ndrŭ dhó lo.” Ddikpa le ma nzá ddi chulo krʉ ri; ro ko djolu chulo ná ddikpa le ro ka ndi é nì. (Mez. 12:15) Ko di shauri rr ró, ko ridho ko kʉ nyenyenga na. Ri ridho nari kʉ, ko churi ko tso vʉni vʉ ndirigoti kodhó lo jiri ko tsotso koni ko ndiro ko ra anzi d’e. Nyodyu dhi Pi Sulemani ndingʉeri ɨ: “Lo adi njini shauri bbʉ ná ndrŭ é bí ró [inga “washauri wengi”, maelezo ya chini].”​—Mez. 15:22. w22.02 8 §1-2

Bbʉbbʉ leni ná ke dho nzá ringani ndi thí ba njedha dhé ndi nji ná chenga dho ri. Chenga dhi ke dho ringani ndi dhǒ ndi leni bbʉbbʉ nari ndidhó ngaddidha chulu. Kedho ringani ndi bbá che kʉ ná nyí tso ndirigoti ndi neri ndi rrnga Yova dhó yadha dho. (Eze. 33:14-16) Chenga nji ná ke dho ringani ndi thɨ ndidhó lo thika ndiro ndima kana nga ngʉ chøchø Yova na d’e. Nde, ri ká ngani ko njiri ngbǎ ko rá ri utso d’i nari kʉ kodhó ddikpa kau nji bbo chenga ró? Njati ko d’ra ke nji ná chenga wazee dho nzá ró, føri na ko rinji che ke ró. Ko nzá ka ko ru kedhó chenga ri dhonalo Yova ri nja nì. (Mez. 5:21, 22) Ni ka ni kó nidhó kau tsotso ndiro ke rá ndi tsotso kodha ne wazee dhó ro d’e. Njati nidhó kau gʉ wazee dhi ngana ndi ra nari gʉ ró, nidho ringani ni rá rid’ra wazee dho, fø chulu ni ke tsotso kó ko. Føri na mana kʉ bbo dhonalo njati wazee kó ke tsotso nzá ndirigoti ke leni nzá ró, ke nga ka ndi é Yova dzá kau ri! w21.10 7 §19-21

Ko krʉ ka ko dyø Yesu dhó loroji nja ndrŭ dhó mahitaji ko li anziro nari na. Biblia ripo nari kʉ, ke “ngʉngʉe ndi noke bbai.” (Flp. 2:7) Noke inga njí dhi ke ka ndi neri ni njí ndidhó bboke nyǒ tho ná lo. Ko kʉ Yova dzá nokpá ndirigoti ko adi njínji ko djoi dhi lo dho nari dho ko adi riji ko njinjí bbo Yova dho ndirigoti ko djoi dho. Adhuri ni tso ɨ: ‘Ma ká ka ma bbʉ madhó saa ma, madhó kpakpanga ma na ji ma nanga jini ro ngbaribbai ndiro ma ko nja ndrŭ tsotso d’e? Ma nanga ká adi jini ni ma kó ngatsotso uhitaji dhi saa na loroji na asamble dhi nga le thɨ inga Pidhinga dzá dza ronga le thɨ nari dho?’ Njaro ni rinja nari kʉ ni ka ni kó nja ndrŭ tsotso ro maddi, ro ni nanga nzɨ jini ri njidha dho ri. Fø saa na anzinga Yova tso ni thí nǎ ro krʉ. Apo bbʉbbʉlo. Ad’ra ngbaribbai ma ni ni mbu nari Yova dho ndirigoti anziri ke bbʉ “njinjidha dhi ù ndirigoti kpakpanga nidho.”​—Flp. 2:13. w22.02 22-23 §9-11

Yesu ngʉ adi zølo na ndi kʉ nari dhǒ hwè na ndi di ndirigoti kiasi na ndi kʉ kpakpalo dhi saa na nari chulu. (Mt. 11:29-30) Loroji na, ddikpa Foenike nǎ isɨle nzingʉeri ke gø ndidzá singba ngba ná saa na, ya kwanza djó nzá ke njingʉe le nzingʉe ndi tsó ná lo thei ri, ro bbo kʉ ná udha le dhongʉe ná saa na, ke gøngʉe ledzá singba ngba bbo hwè na. (Mt. 15:22-28) Ro nì mai Yesu ngʉe zølo na ro, shauri ke ngʉ adi bbʉ ngodhé. Nja saa djo, ke ngʉ adi fø zølo dhǒ nzɨ ndi ndidhó lo thika ø, ji ndi ji ná ndrŭ lai djo nari chulu. Loroji na, Petro ngʉ rine ndi cho Yesu tso Yova ji ná lo ke nji nari ró ná saa na, Yesu ongʉe ke na nì ndi una nja kpa kʉ ná ngana. (Mk. 8:32, 33) Yesu nzá njingʉeri fø ndiro ndi pa do Petro djo d’e ri. Ro ke njingʉe ri fø ndiro ndi bbʉ mazoezi ke dho ndirigoti ndi ddi ringa nja mitume dho nari kʉ, ri nzá ngani kpa é kimbelembele nari. Bbʉbbʉ dhé, føri ka ndi pae do maddi Petro djo, ro ri bbʉngʉe faida maddi ke dho. Ndiro ni dhǒ zølo ji ni ji ná ndrŭ dho d’e, nja saa na, ri ka ndi uri ni bbʉ shauri kpa dho pʉlʉpʉlʉ. Ro fø ni rinji ná saa na, adyø Yesu Biblia nǎ ro si ná shauri ni bbʉ kpa dho nari chulu. w22.03 11 §12-13

Ko adi Yova má ke dho ko madha bbʉ ná saa na. (Zb. 34:1) Ko adi madha bbʉ Yova dho kedhó bblo kʉ ná sifa ma, kedzá njí ma na djo ko loti nja ndrŭ dho nari chulu. Madha ko bbʉ nari adi ridho ko kʉ mbai po ná ndrŭ. Njati ko di ngaddi Yova nji ko dho ná bblo lo djo ró, ko ka ko ba Yova dho ko madha bbʉ dho na lo bí. Lod’radha dhi njí adi bblo pli ko ka ko “bbʉ madha Yova dho ná chu bbʉ ko dho, føri kʉ ko tso ddʉdjó tunda” (tunda la midomo). Ko ka ko ddinga bblo sala nǎ ko po Yova dho ná lo djo nari bbai, ri kʉ bblo ko ddinga lod’radha dhi njí kana ko si nju na ná ndrŭ dho ko si po ná lo djo. Ko jiri ko bbʉ bblo pli kʉ ná “madha dhi bbʉdha.” Føri dho lo ko d’ra nja ndrŭ dho ná saa na, ko ti ná lo adi si ko thí nǎ ro. w22.03 21 §8