Bi 1

Addui ká lingʉeri Timoteo é bblo njínji Yova dho ná ke? Ri kʉ ke ngʉe Wakristo dhó bblo kʉ ná sifa na nari. (Flp. 2:19-22) Mutume Paulo d’ra Timoteo djo ná lo ridho, ke ngʉe djødjøni ná ke, chí tøni ná ke, kpakpanga na njínji ná ke ndirigoti ngbà djo le ka le li le thí ná ke. Ke ngʉ adi jidha dhǒ ndirigoti ngaddi bbo ndi djoi djo. Føri dho, Paulo jingʉe Timoteo ji ndirigoti ke nanga nzɨ ngʉ adi rɨni ke dhona ndi bbʉ kpakpa kʉ ná njí nari dho ri. Føri bbai, Yova maddi ka ndi ji ko ji ndirigoti ko ka ko njinjí bbo kutaniko nǎ njati ko di kpakpanga nji kodhó sifa é bblo ngbà Yova jirieri nari bbai ró. (Zb. 25:9; 138:6) Føri dho anji sala ndirigoti addinga bbo ndiro ni chu ni dho ká ringani ni thɨ ngbá sifa thika ma nari d’e. Avʉ ngbà thika ni ka ni thɨ ná nyi ro ddikpa. Njaro ni ka ni vʉri ni di ni li nja ndrŭ rɨngana. Nidhó lo ká uri ni njí ngoi bbo nja ndrŭ na ndirigoti ni é ndrŭ zø nji ná ke? Njaro ni ka ni ne ni tsotsokodha nidhó kau dhó ro, ndiro ke d’ra ni dho ringani ni thɨ thika ná lo d’e.​—Mez. 27:6. w22.04 23 §4-5

Yova jirie ri ko é hwè na. Ko chu føri ró nari kʉ, hwè kʉ kedhó roho takatifu dzá tunda kana ddi ri. (Gal. 5:22) Ritsi le bbʉ nari nǎ hwè e bbo ritsi le ba nari djolu, føri dzá lodho ko adi hwè ba bbo ko di lod’radha dhi njínji kpakpanga na ndirigoti ko di ko djoi tsotso kó njonjo chulu ró. (Mdo. 20:35) Kodhó njʉnga dhi andiko ridho nari bbai, mutume Paulo ndingʉe ko tsotso ka ndi kó nja ko b’o kodhó hwè ronga d’e ná aro kʉ ná lo. Ya kwanza, ringani ko njinjí Yova dho ko thí nǎ ro krʉ. Njati rie nì ko adi njínji ke dho ko thí nǎ ro krʉ ri ró, ko ka ko é hwè na. (Mt. 22:36-38) Ya pili, ringani ko bbá nja ndrŭ na ko ko ddi nari tso. Njati rie kodhó afya ma, ko ba ná formasio ma, ko kʉ na ná nja uwezo ma na dzá lo dho ko adi ritsi nji ngbá ngatsi ma ri ró, ko krʉ dho ringani ko di mbai po Yova dho. Ro njati rie nja ndrŭ churie lod’radha pli ma ko djolu ri ró, ringani ko ba hwè fø lo dho dhonalo kpa adi njínji ndima dhó kpakpanga na ndima bbʉ na madha Yova dho. w22.04 10 §1-2

Kali dhi dini dhó sadha si si chʉ, nari dho dz’ djó krʉ kʉ ná ndrŭ nanga si keni ke. (Ufu. 18:8-10) Bbò Babiloni si sadha ba nari si kʉ dz’ lu djó ndrŭ ronga lø bbo, ndirigoti ri ka ndi si njedha bbʉ kpa thí dho. Ro, Mungu dzá ndrŭ si hwè ba aro kʉ ná lo dho. Kali dhi dini kʉ Yova Mungu dhó mbuba drrdrr nga djó ro nari ki ro nga sie ri, ndirigoti ko si gødha ba che kʉ ná i dz’ djó ro! Danieli pongʉeri nari kʉ, “bbʉbbʉ lochudha” na dz’ djonga si “lɨlɨ.” Bbʉbbʉ dhé, ri lɨlɨ! Ko kodhó saa djo njini ná unabi famu nì. (Da. 12:4, 9, 10) Fø unabi krʉ njini d’ʉd’ʉ ná føri rili ko bbʉ heshima bbo Yova dho ndirigoti kedzá Lo dho. (Isa. 46:10; 55:11) Føri dzá lo dho ara anzi kpakpa ni nidhó udha li, Biblia ni zø li ni li ni dyu ro nari na, ndirigoti nja ndrŭ tsotso ni kó ndiro ndima kana nga ngʉ chøchø Yova na d’e nari na. Ke si ndi djó li ndima thí ná ndrŭ ronga b’ob’o, ndirigoti ke si “choro nŭnŭ ngoi” bbʉ kpa dho.​—Isa. 26:3. w22.07 6-7 §16-17

Ufunuo dzá buku rid’ra Mungu dhó Pidhinga le lingʉe ra na ndirigoti Shetani le dingʉe ra nǎ ro di. (Ufu. 12:1-9) Shetani le dingʉe nari lingʉeri ra nǎ nga má ngoi na ndirigoti dz’ djó é nzadha. Ká addudho? Dhonalo Shetani kʉ thø na ndirigoti Yova dho njínji i dz’ djó chi ndima tøni ro ná ndrŭ ke adi nzanza. (Ufu. 12:12, 15, 17) Ko ká ka ko tøni chi Yova dho ngbaribbai nì mai Shetani adi ko nzanza ro? (Ufu. 13:10) Gosi ná saa na si njini ná lo ko chu nari ka ndi kó ko tsotso ko. Loroji na, Ufunuo dzá buku nǎ mutume Yohana tilo karrnga goti ko si ba ná ledha ro djo. Fø ledha kana sie Mungu dzá mbubai le si sasa nari ro mai. Ufunuo nǎ ya kwanza verse rid’ra nari kʉ, ko ji ko zø ná lo le dho “alama” chulu, ná føri kʉ loroji chulu le loti nari.​—Ufu. 1:1. w22.05 8 §1-3

Yova dhó wapinzani si thø ba bbo Yova dzá ndrŭ tøni chi nari dho. Ddi gba ndima tso ná ndrŭ tsɨ si li ta dz’ djolu gble Mungu dzá ndrŭ tso ro. Føri Biblia nzi Gogu dhi Magogu dhó li. (Eze. 38:14, 15) Yova ká si rinji ngbaribbai ndrŭ tsɨ fø lo nji ná saa na? Ke pori ko dho: “Ma na bbo thø si choni.” (Eze. 38:18, 21-23) Ufunuo sura 19 dho føri goti si njini ná lo. Yova si ndidzá Ngba cho ndiro ke b’o ndidzá ndrŭ ronga ndirigoti ke sa ndidhó mbubai d’e. Yesu ma si ndima tso gba fø vita njidha dho “ra nǎ bbasødda” ma na, føri kʉ chi tøni ná malaiká ma, 144 000 kʉ ná kpa ma na. (Ufu. 17:14; 19:11-15) Fø vita dhi matokeo ká sie ngbaribbai? Yova dhó wapinzani krʉ si sadha ba!​—Ufu. 19:19-21. w22.05 17 §9-10

Adamu ma, Eva ma na nji chenga nari goti tsé Yova bbʉngʉe ngab’odha kpa nǎ gø dho, bbo na mana kʉ ná ddikpa unabi chulu. Ke pongʉe ná lo kʉ Mwanzo 3:15 nǎ: “Ma si mbu li ni kana isɨle na ndirigoti ni nă gø ma kana le nă gø na. Ke si ni djǒ nanga tsi, ndirigoti ni si ke kó djuti bbi.” Fø unabi kʉ, Biblia nǎ ya kwanza buku nǎ. Ro, Biblia nǎ nja kʉ ná buku krʉ ma tso ro nju ngbà fø unabi nǎ kʉ ná lo na. Ddiddi buku chuti d’ø adi bí kʉ ná papie tso gba ddi nari bbai, Mwanzo 3:15 nǎ kʉ ná lo gba Biblia nǎ krʉ kʉ ná buku nǎ kʉ ná lo tso ddi. Mungu ka ndi choe ndrŭ si gø ná ke, nja ke sa Ibilisi ma, ndi na gba ndima tso ná kpa ma na krʉ d’e. Føri sie bbo thonga ná lo ngbà jirie Yova ná ndrŭ dho! Biblia zødha si ko tsotso ko ko nja ngbaribbai ma fø unabii njini ndirigoti ngbaribbai ma ko ka ko ba faida ri nǎ ro nari d’e. w22.07 14 §1-3

Aninziri Yova bbʉ nidhó loji ná nyodyu ndiro ni kó nidhi nzø tsotso nzø ji ke d’e. (Yak. 1:5) Ke kʉ bblo pli chu shauri bbʉdha ná ke. Ko ripo fø dho ná sababu kʉ bí. Akonja ri ro aro. Ya kwanza, Yova kʉ bbo pli chu lo ná muzazi. (Zb. 36:9) Ya pili, kedhó nyodyu dhi shauri nǎ ro le adi faida dhé ba krʉ ddo ró. (Isa. 48:17) Biblia ma, Yova dhó tengenezo ma na chulu Yova adi bí kʉ ná lo ja gø dhi ndrŭ dho ndiro kpa kó ndima dhi nzø tsotso ndiro nzø ji ndi d’e. (Mt. 24:45) Loroji na, ni ka ni ba bblo kʉ ná shauri bí kʉ ná cho na vʉrie ná Amuka! nǎ, ɨ djǒ ripo ná lo nǎ “Musaada kwa ajili ya Familia,” ndirigoti njʉ ni ka ni ba fø lo jw.org djó. Godhé, jw.org djó kʉ ná video ka ndi kó gø dhi ndrŭ tsotso nja ndima njinjí ri nǎ Yova bbʉ ná shauri na ndima dhi nzø ndima ngu nari kana.​—Mez. 2:4, 5. w22.05 27 §4-5

Bbʉbbʉ dhé, Yova adi ndrŭ zø nji ndi no ná ritsi krʉ djolu. Ya kwanza, ke e krʉ ddo ró tayari ndrŭ zø njidha dho. Ya pili, ke chu krʉ lo ko djo. Ndirigoti ke ddiro dhé chu ko ká leni bbʉbbʉ ngbà ma nari bblo pli. Ya tatu, Yova njí ko zø ró, ke adi ko zø nji ndi thí nǎ ro krʉ ndirigoti ke adi ko nja nzá d’erie chenga ro nji nari bbai. Føri adi rili ko é tsetse ná zamiri na ndirigoti ke u ko tso u. Bbʉbbʉ dhé, ko kʉ nzá kaka ná ndrŭ nari bbai, ko ka ko njí chenga ki ro ngbà dhé. Nì mai ri kʉ føro, ko ka ko ba le isopɨdha Étude perspicace des Écritures, Volume 2, paje 765 djó kʉ ná i lo nǎ ro: “Yova e zølo na ndirigoti ke chu ndidzá njí dhi ndrŭ kʉ nzá kaka ná ndrŭ nari ngbà. Kpadho nzá ringani ndima nanga b’lo ndima njie ná kosa di d’o ri. (Zb. 103:8-14; 130:3) Njati kpa di ndima dho ka ná lo nji nja ndima ishi Mungu ji nari bbai ró, kpa ka ndima é hwè na. (Flp. 4:4-6; 1 Yo. 3:19-22).” w22.06 7 §18-19

Guvernema do tá ko na ná føri dhé nga kʉ Shetani la nji ko na ná chu ri. Nja kʉ ná ndrŭ ndima dhó familia ká si ndima nja ngbaribbai ma, ndima ngʉ Yova dzá Dimu ró nari do adi nji. Kpa jirie ndima dhó familia bbo ndirigoti kpa adi riji ndima dhó familia chu Yova ndirigoti kpa ji ke. Ro, kpa thí adi njedha ba njati kpa rá ri utso d’i ndima dhó familia nzɨ heshima bbʉ bbʉbbʉ Mungu dho ndirigoti ke má ná ndrŭ dho ri ró. Nì mai ri kʉ føro, nja saa na familia nǎ gʉe lo gʉ anziro ná ndrŭ adi ra bbʉbbʉlo uu luti. Ro, njati kodhó familia nǎ ndrŭ si ko kana e ndima na ná kau si ko ngʉ Yova dzá Dimu nari dho ró ká ko ka ko njiri ngbǎ? Ko iso ka ndi pɨ ná bblo kʉ ná lo bani Zaburi 27:10 nǎ. Ko ka ko é ngoi na nza ndrŭ ko nzá ná saa na, ko di ngaddi ngbá ngatsi ma Yova ji ko nari djo ró. Ndirigoti ko uri u nari kʉ, ke si ko kobe bbʉ ko ngatsove nari dho. Yova si maisha nǎ kodhó lo ji krʉ ná ritsi bbʉ ko dho, ke si ko tsotso ko ko é ngoi na ndirigoti hwè na. Ko kana nga sie chøchø ke na krʉ kʉ ná ndrŭ djolu! w22.06 16-17 §11-13

Yesu ngʉ lod’ra ná saa na, ke ndrŭ bbøngʉe kali dhi lo na, loroji na ndrŭ ngʉ adi ripo ke kʉ wa rɨ ná ke, ʉna dhi ke, Shetani dhó njí dhi ke, nzɨ madha bbʉ sabato dho ná ke ndirigoti nzɨ heshima bbʉ Mungu dho ná ke. (Mt. 11:19; 26:65; Lu. 11:15; Yoh. 9:16) Ro, Yesu nzá ngʉngʉe fø ndrŭ dhó logoti ro thø na ri. Føri dho, Yesu bbai ndrŭ tilo kodhi ngana nga nǎ zølo ro ró, ri nzá ngani ko ngʉ ndrŭ dhó logoti thø na ri. (1 Pe. 2:22, 23) Bbʉbbʉ dhé, ri ngae sʉsʉ ko tilo hwè na njati nja ndrŭ di loti ko na nzá ndima nanga jini ro ri ró. (Yak. 3:2) Nde, ko tsotso ká addu ka ndi kó? Njati ni lod’ra dho ná ke tilo ni na thø na ró, nzɨ bbari ni nanga kani. Sam ró dho kʉ ná le-djo pori ɨ: “Ma adi ngaddi djo nari kʉ ndrŭ dhó lo jiri ndima rr bbʉbbʉlo ndirigoti ma adi ngano nari kʉ ndrŭ ka ndima le ndima dhó lo thika ngbà.” Nja saa na ndrŭ ka ndima e thø na, ko si kpa ronga be che kʉ ná saa na nari dho. Njati rie thø na kʉ ná ke na ko loti ri ró, ko ka ko njí dʉ kʉ ná sala, Yova kó ko tsotso ndiro ko jotso koko ndirigoti nzɨ ko tilo nga na hwè ro inga nga dhi heshima ro d’e. w22.04 6 §8-9

Ni ka ni kó nidhi nzø tsotso ndima kana nga é chøchø Yova na d’e lu ná bbo na mana kʉ ná chu kʉ Biblia ni zø kpa na nari. (2 Ti. 3:14-17) Nì mai ri kʉ føro, Biblia dhori nari kʉ nzø ka ndima chu lo Yova djo lu ná nja chu ma kʉ ddi. Mezali nǎ ddikpa nzø ba rid’ra ndidhi dduna dho, nzɨ ke vi Yova dhó sifa nga, no ke no ná ritsi chulu ndi adi njani ro. (Mez. 3:19-21) Gø dhi ndrŭ, ni maddi adi hwè ba nidhi nzø na ni ra bbi nari dho. Aninjinjí fø saa na nja ni ddi Yova “no ná ritsi ma” ronga ká nju ngbaribbai kedhó bblo pli e ná sifa na nari nidhi nzø dho d’e. (Ro. 1:20) Anja ngbaribbai ma Yesu njingʉe njí nononi ná ritsi na nja ndi ddi na longa d’e nari. Ddikpa cha, ke pongʉeri ndi unakpa dho kpa nja krø ma, maua ma na. (Lu. 12:24, 27-30) Yesu ddingʉe bblo pli kʉ ná somo kpadhi ra nǎ Baba dhó bblonga ma, ke adi ritsi bbʉ ndrŭ dho ná chu ma na djo. Føri kʉ Yova si nyo ma, ru ma na bbʉ ndidzá njí dhi chi tøni ná ndrŭ dho, krø ma, nza gʉ maua ma na dho ndi adi ri bbʉ nari bbai nari. w23.03 20-21 §1-4

Yova dho ko adi mbai po, ko nganzi kedhi Ddù na chulu nari dho. Yova adi rinzi ko nzinga Yesu chulu, føri dho ngʉ goti ke adi ngʉ ndirigoti rr ke adi rr nari e Yesu ró dho chulu le nji ná sala dhé ndirigoti Yova adi kodhi chenga zø nji Yesu bbʉngʉe ná le ødha dhi be dzá lo dho. (Ro. 5:1) Biblia nzi Yesu kodhó “bbò kuhani ra nǎ pi dhi kiti dzá thá djó nga laidjó ndi [di] ro.” (Ebr. 8:1) Yesu kʉ ko “tsotso kó ná ke Baba kuso.” (1 Yo. 2:1) Ko adi mbai po bbo Yova dho ke bbʉ nì kodhó uzaifu famu ná Bbò Kuhani ko dho nari dho ndirigoti nì ndi “adi soni ko djó ro”! (Ro. 8:34; Ebr. 4:15) Ko kʉ nzá kaka ná ndrŭ nari dho, Yesu bbʉe ndi nzá ró, ri ro nzá ka ndi kae ko ndri ko ro Mungu ro sala chulu ri. Bbʉbbʉ dhé, ri ro nzá ka ndi ka ko po mbai Yova dho ke bbʉ ko dho ná kado dhi ngatsi ri, føri kʉ le Ddù bbo ke jingʉe ná ke bbʉngʉe ndi nari! w22.07 23 §10-12

Ngbà djo le ka le li le thí ná ke adi ndi tsoni djo ná lo njinji ndirigoti ke adi bbʉbbʉlo d’ra. (Zb. 15:4) Ndrŭ chueri chu nari kʉ, ndima ka ndima li ndima thí ke djo ngbà. Ko jirieri ko djoi ma, ko vei ma na di ndima mbu føri bbai ko djo. Ko nzá ka ko cho ndrŭ kpakpanga na nja ndima di ndima thí li ko djo d’e ri. Ringani ko dhǒ ko djo nja ndrŭ ka ndima li ndima thí ngbà nari ko nji ná lo chulu. Le ka le pori le thí le li ndrŭ djo nari kʉ ddiddi mbø bbai. Ri badha e kpakpa, ro ri le vi nari e sʉsʉ. Bbʉbbʉ dhé, Yova adi nji ná lo adi rili ko li ko thí ke djo. Krʉ ddo ró ko ka ko li ko thí li ke djo dhonalo “ke nji ná ritsi krʉ e li djo le ka le li le thí ná ritsi.” (Zb. 33:4) Ndirigoti ke adi riji ko dyø ndi. (Efe. 5:1) Ko adi mbai po bbo Yova dho, ke gba ko tso jiji ko ná li djo ko ka ko li ko thí ná ko djoi na nari dho! Ko krʉ dho ringani ko é li djo ko djoi ma, ko vei ma na ka ndima li ndima thí ná ndrŭ. Njati ko di jidha ma, nyenyenga ma, chølo ma, lo utsod’idha ma na dhǒ ndirigoti ko di ko ronga tso chocho ró, fø ko rinji nari na ko rili kutaniko nǎ ndrŭ di ndima thí lili ndima djo. Akodyø kodhi Mungu Yova, ndirigoti akoliri ndrŭ li ndima thí ko djo. w22.09 8 §1-2; 13 §17

Nì mai ko djoi ma, ko vei ma na kʉ bí kutaniko nǎ ro, nja saa na ko ka ko mbu ko ddiro kʉ nari bbai maddi. Ndirigoti ko kana nja ndrŭ ka ndima ba vodha inga ndima thí bʉni bʉ, ndima riddi ndima kpakpalo tsove ndima ro dhé nari dho. Yova nzá jiri ko di ko mbu føri bbai ri. Anja ngbaribbai ma, Yova njingʉeni nabi Eliya na nari. Ke lingʉe Eliya kpakpa lotidha dho. Aro ina ke dhungʉeri Eliya tso ɨ: “Ni ká addu nji iga?” (1 Fa. 19:9, 13) Fø saa krʉ na, Yova rrngʉe Eliya ngbaribbai ma ndi ndi mbu nari d’ra nari rr. Yova ngʉngʉe Eliya dhó sala goti ndi kʉ nì føga ndirigoti ndi kʉ kpakpanga na bbo nari ndi dho ke dho nari chulu. Føri goti ke dhongʉeri Eliya dho nari kʉ, ndi dho madha bbʉ ná ndrŭ kpari kʉ bí go. (1 Fa. 19:11, 12, 18) Bbʉbbʉ dhé, Eliya iso pɨngʉeni pɨ Yova dho ndi d’ra ndi thí nǎ kʉ ná lo ndirigoti ke ngʉ ndidhó logoti nari goti. Yova bbʉngʉe bbo na mana kʉ ná bí kʉ ná njí Eliya dhona. Ke pongʉeri ke li Hazaeli Siria nǎ pi, Yehu Izraeli nǎ pi ndirigoti ke li Elisha nabi. (1 Fa. 19:15, 16) Fø njí Yova bbʉngʉe Eliya dhona nari chulu, ke ngʉ Eliya tsotso kó ndiro ke li ndidhó ngaddidha bblo kʉ ná lo djo d’e. Mungu bbʉngʉe bblo kʉ ná kau Elisha, ke dho. w22.08 8 §3; 9 §5

Ni bbá ká le chi njudha dhi dza b’lo inga ni bbá Pidhinga dzá dza ronga ká le thɨthɨ? Njati rie fø ró, ni ya kwanza ni njingʉe njudha fø dza nǎ nari ngano nì. Ni pongʉe mbai Yova dho bbo. Njaro ni nanga jingʉeni ji nari dho, ni dzzngʉe dzz nganga ndirigoti ni ngongʉe njudha tso ngadha dhi dyi bbobbo ni chu na. Kodhó bblo le chi ná Pidhinga dzá dza adi madha bbʉ Yova dho. Ro, ko adi madha bbʉ ke dho bbo njati rie nja chu nǎ ko ngachidha dhi njí nji ri ró, ná føri tsu ndi nǎ ná lo dada ngachidha dhi njí nganga djolu. Føri kʉ kpakpa le fø madha dhi ngana si ná ndrŭ li nari. Kodhó njʉnga dhi andiko nǎ kʉ ná lo mutume Paulo ngʉ ndí ná saa na, ke ngʉ ngaddi fø ngachidha dzá aina djo. Le lai ndrŭ ká le ka le li kpakpa ngbaribbai nari chungʉe ná ndrŭ kana Paulo ngʉe bblo pli kʉ ná loroji. Ke ngʉ adi ndi li ndrŭ rɨngana. Ko ka ko dyø ke, kpakpa ko ko djoi ma, ko vei ma na li njʉ nari chulu.​—1 Ko. 11:1. w22.08 20 §1-2

Ddikpa Mukristo jiri ndi njí chølo Mungu nyǒ njí ró, kedho ringani ndi é chi, krʉ ndi nji turusa dhi lo kana ná lo nǎ. Chølo ji ndi njí ná ke ndrorie nzá thonga nari bbai le njini nja ndrŭ na nari ndro. Ndirigoti “ndiro ndi njí [Yova] nyǒ tho ná lo krʉ kʉ ná lo kana d’e,” bbʉbbʉ chølo nji ná ke ka ndi neri ndi chú Yova dhó nganjadha ndi nanga vʉ ná lo djo. Biblia pori Yova kʉ chølo tso ngani ná nga. Ri kʉ føri dho i le adi ke nzǐ, “chølo di nǎ ná ke.” (Yer. 50:7) Yova kʉ ngano ná Ke nari dho, ke dhé kaka ndi li chølo ma, nga kʉ chø ná lo ma na djo kʉ ná sheria. Kedhó nganjadha e njonjo, chølo ma, nga kʉ chø ná lo ma na djo kodhó nganjadha ró ro. (Mez. 14:12; Isa. 55:8, 9) Nì mai ri kʉ føro, ko le norie Mungu ró ji na nari dho, ri ka ndi kaka ko njí chølo ke nja ná lo. (Mwa. 1:27) Ndirigoti ko jirieri ko njiri fø. Kodhí jidha dhi Baba ko ji nari adi ko cho ko njí kpakpanga nja ko dyø ke ko thí nǎ ro krʉ d’e.​—Efe. 5:1. w22.08 27 §5-6

Ko thí é bʉ ndi bʉni ro ná saa na, ko adi rine ko njí ddikpa lo ndiri kó tsotso ko si ko nanga rid’o dho ná kpakpalo djolu d’e. Føri kʉ ngbà le ka le famu ná lo, ro ringani ko é krr ndiro nzɨ ko nji ndro Yova ndro ná lo ró. (Efe. 5:10-12, 15, 16) Filipi nǎ Wakristo dho Paulo ndingʉe ná barua nǎ ke jangʉeri kpa di ngaddi “chø kʉ ná lo ma, . . . tsetse ná lo ma, . . . ji le ka le ji ná lo ma, [ndirigoti] bbʉbbʉ kʉ ná lo ma na djo.” ( Flp. 4:8) Nzá mai Paulo ndingʉe lo le nyodjedha djo ro, ke ndingʉe ná lo ka ndi kó ko tsotso ko nyodjedha dhi lo kana maddi. Amburi: Ni li fø verse nǎ “lo” le ndi ná nga krʉ lu, “dyi ma, filme ma, zø le zø ná ritsi ma, inga video dhi kpa (muchezo) ma na.” Fø ni njiri nari ka ndi kó ni tsotso ni chú u tso Mungu u ná lo ndirigoti nzá tso Mungu u ná lo. Ko jirieri kodhó maisha nǎ ko nji ná lo tso njunju Yova dhó kanuni po ná lo na.​—Zb. 119:1-3. w22.10 9 §11-12

Go ndima ngʉe shi ro, nga kʉ chølo dhi ri ná ndrŭ kana nja kpa ngʉ adi che bbo kʉ ná lo nji. Føri dzá lo dho, ri si ngani le ddi ngbaribbai ma, le ka le njinjí Yova dhó chølo dhi sheria na nari nga kpa dho. Ndiro le ddi lo nga kpa dho d’e, Mungu dhó Pidhinga si chutso dda longaddidha dhi ddikpa bbo kʉ ná programu dho, nzá ri ro d’erie njini i dz’ djó nari bbai. Nga kʉ chølo dhi ri ná ndrŭ dho ká ie ma si longaddi? Ri sie Armagedoni lu da ná ndrŭ ma, ga si ga ná chølo dhi ndrŭ ma na. Ndiro ndima ró dho ndini shinga dhi buku na d’e, nga kʉ chølo dhi ri ná fø ndrŭ dho ri si ngani kpa liri ndima kana nga ngʉ chøchø Yova na ndirigoti kpa bbʉ ndima ke dho. Yesu ma, ché na le d’ri ná kpa ma na si kʉ nga kʉ chølo dhi ri ná fø ndrŭ ká njínji nì ma ndima dho le ddi ná lo na nari nja nì ndima kʉ krr ro. (Ufu. 20:4) Nzá njinjí ndi dho le ddi ná lo na ná ke le si sasa, kedhó cho é 100 ma ró. (Isa. 65:20) Yova ma, Yesu ma na adi ndrŭ thí nanga njanja, føri dzá lo dho kpa si kpa thí nanga njanja ndirigoti kpa nzɨ si ribba ddikpa le ma rá chelo ro nji ø dz’ djo ddi ri.​—Isa. 11:9; 60:18; 65:25. w22.09 17 §11-12

I verse nǎ, “bbobbonga na kʉ ná kpa” le nzǐ nari kʉ dz’ djó pikpa, nja ndrŭ djo ndima kʉ bbonga na ro. Wakristo dho ringani ndima rrnga dz’ djó fø pikpa dho. Kpa adi ngoi li, kpa adi ndrŭ dho ringani ndima rrnga dho ná yadha li ndirigoti nja saa na kpa adi Yova dzá ndrŭ ronga ma b’o ddi. (Ufu. 12:16) Føri dho, kodho ringani ko dzí kitase ma, ko ø palata ma, ko njí kpa do ndirigoti ko bbʉ heshima kpa ja ná lo dho. (Ro. 13:7) Nì mai ri kʉ føro, guvernema kʉ bbonga na, kpa dho Yova bbanga nari dho dhé. Yesu dhongʉe fø lo pʉlʉpʉlʉ Roma nǎ guvernere Pontio Pilato ngʉ ngadhu ndi tsó ná saa na. Pilato pongʉeri ndi kʉ bbonga na ndi b’o Yesu dhó shinga ronga inga ndi hwi ke hwi ná saa na, Yesu pongʉeri ke dho: “Ni ro nga ka ni ée bbonga na ma djo ri, rie nga røna ro dhé ri bbʉni ni dho ri ró.” (Yoh. 19:11) Pilato dhó lo ridho nari bbai, ndrŭ djo kʉ bbonga na ná pikpa ma, politiki nǎ kpa ma na kʉ ndima dhó mupaka na. w22.10 14 §6

Pi Daudi dho roho ddangʉe chutso nja ndi ndí ngbaribbai ma, maisha sie nyodyu dhi chi tøni ná pi si di pi dhi kiti djo ná saa na nari djo. (Zb. 37:10, 11, 29) Bí ina ko adi Zaburi 37:11 zø, nja ko tilo nja ndrŭ dho gosi ná saa na sie ná Paradiso djo d’e. Ko kʉ bblo kʉ ná sababu na ko tilo fø andiko djo dhonalo Yesu dhó Ngøtsi djó Mahubiri nǎ ma ke tingʉe lo ddi fø andiko djo, ke dhongʉeri fø andiko si njini gosi ná saa djo. (Mt. 5:5) Ro, Daudi dhó lo ngʉ ngbaribbai ma, maisha sie Pi Sulemani dhó pidhinga tsena nari ma dhǒ ddi. Sulemani ngʉ pinyo Izraeli djo ná saa na, Mungu dzá ndrŭ ngʉe pekee kʉ ná ngoi na ndirigoti ndrŭ ngʉe hwè na “tsiba ma, tiidda ma na ngʉ d’a” nǎ ná ngø nǎ. Mungu pongʉeri: “Njati ni rá anzi madhó sheria chulu ni bbi nari na ró . . . , ma si rili ngoi é ngø nǎ, ni si ddo nzá ddikpa ie ma ta do ni na ddi ro. (Law. 20:24; 26:3, 6) Fø tsodha njingʉeni nji Sulemani dhó pidhinga tsena. (1 Ny. 22:9; 29:26-28) Zaburi 37:10, 11, 29 nǎ kʉ ná lo njingʉeni nji drrdrr ndirigoti ri ki si njini gosi ná saa djo. w22.12 10 §8

Bbʉbbʉ Wakristo ko kʉ ro, ko dho ringani ko di tengenezo bbʉ ná chutsoddadha dyø. Biblia ko tsotso ka ndi kó ná nyodyu dhi i shauri bbʉ ko dho: “Nyodyu dhi chutsoddadha chulu ni si nidhó vita nji ndirigoti bí kʉ ná washauri chulu lo adi njini nji.” (Mez. 24:6, maelezo ya chini.) Akonja ngbaribbai ma, fø kanuni na ko njínji nari adi chutso ddá ko dho ndiro ko ba bblo kʉ ná matokeo lod’radha dhi njí kana ndirigoti longaddidha dhi njí kana d’e nari. Ko d’rae lo inga ko ddie lo ko chu nari bbai nari rɨngana ko adi njínji ko dho le bbʉ ná chutsoddadha na. Ko adi nyodyu dhi chutsoddadha ba Wakristo dhó njudha dhi ngana, Biblia ró dyʉ ndi ná hotuba le bbʉ ko dho nari chulu, ndirigoti formasio ko ba Biblia nǎ ro longaddidha dho nari chulu. Godhé, Yova dzá tengenezo adi bí kʉ ná lod’radha dhi njí dhi no bbʉ ko dho føri kʉ, vichapo ma, video ma na. Føri adi bí kʉ ná ndrŭ tsotso kó nja ndima famu Biblia nǎ lo d’e. Ko adi mbai po bbo Mungu dzá lo nǎ bani ná bblo kʉ ná shauri dho! Njati ri ée nga ró, ká ko ka ko njieri ngbǎ? Føri dzá lo dho krʉ ddo ró akovʉri ko njinjí Yova bbʉ ko dho ná nyodyu dhi shauri na.​—Mez. 3:13-17. w22.10 23 §18-19

Ko nyǒ ná nyo adi kpakpanga bbʉ ko dho nari bbai, ko di Mungu dzá lo zø ndirigoti ko di ngaddi ri djo ró, ko adi ngʉ kpakpa kiroho nǎ. Yova jiri ko neri ko famu ndidzá lo bblo pli. Føri ko ka ko njí sala ko nji nari chulu, Biblia ko zø ndirigoti nga ko ddi ri nǎ lo djo nari chulu. Ya kwanza, ko adi ko thí tayarisha sala chulu ndiro ko chú Mungu dhó ngaddidha d’e. Føri goti ko adi Biblia zø. Ya mwisho, ko ro adi tøni vi nja ko ddinga bbo ko zø ná lo djo d’e. Føri ká ka ndi bbʉ ngbá matokeo? Njati ko di ngaddi bbo Mungu dzá lo djo ró, ko ka ko famu Mungu dzá lo bblo pli ndirigoti ri ka ndi liri kodhó udha ngʉ kpakpa. Ri ká thonga bbo addudho ko di Biblia zø ndirigoti ko di ngaddi ri nǎ lo djo? Fø ko rinji nari ka ndi bbʉ kpakpanga ko dho ndiro ko di hwè dhi lo-i d’ra njʉ ndirigoti ko si njedha si bbʉ ndrŭ thí dho ná lod’idha dhi imba d’ra ndrŭ dho karrnga goti d’e. Godhé, ko di ngaddi Mungu dhó bblo kʉ ná sifa djo ró, ko kana kau si ngʉ kpakpa ke na. Føri si rili ko ba mbø o ná ritsi inga bblo kʉ ná ritsi, føri kʉ ko sie ngoi na ndirigoti ko nanga si jini ko kʉ na ná ritsi dho. w22.11 6-7 §16-17

Yesu nzá pongʉe ndi unakpa dhé ri, ro nga kʉ kutaniko nǎ ná ndrŭ maddi ka ndima sie bbʉbbʉ Wakristo utso d’i kpa dhǒ ndima kana ná jidha ró. Yova dzá ndrŭ kana kʉ ná jidha e pekee ndi kʉ ro. Bbʉbbʉ dhé, Yova dzá Dimu nga kʉ kaka ná ndrŭ ri. (1 Yo. 1:8) Føri dho, ko di lochu bbo kutaniko nǎ kʉ ná ndrŭ djo ná saa na, ko adi kpadhó nja kʉ ná uzaifu utso d’i. (Ro. 3:23) Njedha dhi lo kʉ, nja ndrŭ bbari nja ndrŭ dhó uzaifu liri ndima bbá Yova dho ndima njínji nari tso bbá. Yesu ká dhongʉe jidha ngbaribbai ndi unakpa dho? Njʉ ká le ka le dyø Yesu dhó loroji ngbaribbai?’ Ri kʉ bblo, Yova dzá Dimu maddi ddinga fø ngadhudha dhi jibu djo. Fø ko rinji nari ka ndi liri ko dhǒ jidha bbo pli, ro pli siri nja ndrŭ dhó uzaifu tso ró ko hwini ná saa na.​—Efe. 5:2. w23.03 26-27 §2-4

Ddiddi ko ra i dz’ dzá mwisho na nari bbai, ringani ko churi nari kʉ, ko ka ko bani kpakpalo na ngbà kutaniko nǎ. Fø kpakpalo ka ndi tsu ko tøni chi Yova dho nari mbudha kana. Fø lo dho, ringani ko b’o kodhó akili ronga b’o. Njati ni lai Mukristo njiri che ni ró ró, nzɨ bbari ni nanga kani bbo. Njati ni ba nizamu ró, nzɨ mbu ni che, au shauri ndirigoti ngbà ri ka ró aø nidhó lo thika ø. Ndirigoti Yova dhó tengenezo nǎ lo thika øni nari lø ni ronga ró, ni thí nǎ ro krʉ agba ni tso ri na ndirigoti arrnga ri dho. Ni ka ni li ni thí Yova djo ndirigoti kedhó tengenezo djo chi ni tøni ke dho nari tsu mbudha kana ná saa na. Adi ko ni jotso ko ro, bblo ni lonanga ddi ro ndirigoti Yova adi lo nja nari bbai ni lo nja ro. Anzinga ndiro Yova kó ni tsotso d’e. Ndirigoti nzɨ tu ni ro da kutaniko nǎ nja ndrŭ ró ro. Føri dho ngbá lo ma banga ró, Shetani dho nzá ri ro ka ndi ka ndi ndó ko kana nga ro Yova na inga kedhó tengenezo na ri.​—Yak. 4:7. w22.11 24-25 §14-16

Wazee, aniko ni djoi tsotso ndiro kpa tayarisha ndima nzá go chʉ adi ngaba ná lo d’e ngaba go ro. Aninjiri ni chu nari kʉ, kutaniko nǎ ndrŭ krʉ ká chu ndima si nji ná lo ngbà ndiro ndima ronga si b’oni b’o ndirigoti ngbaribbai ma ndima si nju Wazee ma na fø lo si ngaba ró nari. Ni nganga ká ka ni njiri ngbǎ? Njati chʉ adi ngaba ná lo banga chøchø ni kʉ ná nga nǎ ro ró, adhunga wazee tso ndiro ni chu ngbaribbai ma ni ka ni kó ngatsotso nari d’e. Njaro ni ka ni bbʉ didha dhi nga fø kpakpalo na bani ná ndrŭ dho inga ngatsotso si kó ná bbavolotere dho. Ni ka ni kó kpa tsotso nyo na ma, njí dhi no na ma. Njati chʉ adi ngaba ná lo banga da ngana ma ró, ni ka ni kó ngatsotso ngbà dhé. Ká ngbaribbai? Sala ni nji fø lo na bani ná ndrŭ dho nari na. (2 Ko. 1:8-11) Ni ka ni kó ngatsotso dz’ djolu gble kʉ ná njí dho le adi bbʉ ná bbʉdha ni bbʉ nari chulu maddi. (2 Ko. 8:2-5) Njati rie ngbà ri ka ndi ka ni dho ni rá ngatsotso ko fø lo njini nanga na ró, adhu fø lu ni rá ngatsotso ko d’e ni ka ni njí ná lo wazee tso. Njati ni le nzi ngbà ró, ni si kʉ formasio ba nja ni njinjí bblo kʉ ná chu na d’e. w22.12 24 §8; 25 §11-12

Nja kʉ ná tafsiri tu njʉnga dhi i andiko nanga ɨ: “Ni djo si ná mbudha kana nga kʉ, nga kʉ kawaida kʉ ndrŭ dho nari ro ri.” Fø lo le d’rangʉe Korinto nǎ ngʉe na isɨ ndrŭ ma, kpetsi Wakristo ma na krʉ dho. Nja kpa ngʉe anziro uzinifu nji ná kpa, isɨ ro ddó isɨ ro inga kpetsi ro ddó kpetsi ro ná ndrŭ ndirigoti wa rɨ ná kpa. (1 Ko. 6:9-11) Ni ká ddiri batiso kpa ba nari goti, nzá che kʉ ná tamaa ki ro singʉe kpa na ri? Ri nga ka ndi é fø ri. Kpa krʉ ngʉe ché na le d’ri ná Wakristo, ro kpa i ngʉe nzá kaka ná ndrŭ dhé. Bbʉbbʉ dhé, nja saa na kpa ka ndima die hwini che kʉ ná tamaa tso ró. Føri kʉ kpakpa ka ndi li ko ná lo. Ká addudho? Dhonalo fø lo ridho nari kʉ, njati rie che kʉ ná ngbá tamaa tso ró ma ni hwini ri ró, ri djolu singʉe ná ndrŭ kʉ thé. Bbʉbbʉ dhé, ri ka ndi kaka ni tøni “kprɨ udha nǎ chu ni chu ri nari kʉ, dz’ djolu gble kʉ ná ni djoi maddi bani fø di ná nzadha na ro.”​—1 Pe. 5:9. w23.01 12 §15

Yesu nzingʉeri Yova tso ke nja ndi unakpa djó nga. (Yoh. 17:11) Fø lo ká liri ko é nga nǎ do ro addudho? Dhonalo Yova e kpakpanga na kodhó mbubai krʉ djolu. (1 Yo. 4:4) Ke adi krʉ lo njanja. Ko churieri chu njati ko li ko thí ke djo ró, ko ka ko sisi ndrŭ do ko nji nari krʉ djolu ndirigoti ko tøni kpakpa. Nja saa na ká do adi pa ni djo ni ni dho Yova dzá Dimu nari dho? Ni ká adi muhubiri ni ngʉ inga batiso ni ba nari ngʉ aluti nja ndrŭ ka ndima ddi ni djo ná lo do ni nji nari dho? Nzɨ bbari fø di ná ngaddidha cho ni tso ngbà ni chu ná bblo lo njidha ró. Adi nganzi krʉ saa ró Yova tsó. Anziri ke liri ni é nga nǎ do ro ndiro ni njí ke ji ná lo d’e. Ngbaribbai ma Yova nidhó sala goti ngʉ nari ni nja nari si rili ni ngʉ kpakpa ndirigoti ni é nga nǎ do ro.​—Isa. 41:10, 13. w23.01 29 §12; 30 §14

Yesu dhungʉe i ngadhudha “Ni ká d’erie ri zø nzá?” nja ndi dhǒ na Wafarisayo ngʉe che kʉ ná nganjadha na Maandiko djo nari d’e. (Mt. 12:1-7) Fø saa na Wafarisayo pongʉeri Yesu dhó wanafunzi ta Sabato dhi sheria. Nja ndi ngʉ kpadhó logoti d’e Yesu tingʉe lo Maandiko nǎ aro kʉ ná loroji djo ndirigoti ke pongʉe Hosea nǎ ddikpa verse ndiro ndi dhǒ Wafarisayo nzá famungʉe Sabato dhi sheria ká le lingʉe addudho ma nari d’e ndirigoti ndi dhǒ kpa nǎ nga ngʉe zø ro ri nari d’e. Fø kpadhó maisha thika ká Mungu dzá lo ndima zø nari lengʉe nzá addudho? Dhonalo kpa ngʉ ri zø ndima d’i na lo nja ndrŭ djo ndirigoti nodha na. Kpadhó fø nganjadha ngʉ rili nzɨ kpa famu ndima zø ná lo. (Mt. 23:23; Yoh. 5:39, 40) Anja Matayo 19:4-6 nǎ i ngadhudha Yesu dhu Wafarisayo tsó ná nga: “Ni ká d’erie ri zø nzá?” Nì mai kpa ngʉ adi nganodha djo tilo ná lo zø ro, kpa ngʉ adi Mungu dhó nganjadha be pá ndoa djo. Yesu dhó lo nǎ ro ko ba ná somo kʉ, ringani ko di Biblia zø bblo kʉ ná nganjadha na. Njonjo Wafarisayo ró ro ringani ko é nyenyenga na ndirigoti ngbà ko jiri ko chu lo ro. w23.02 12 §12-13

Yova bbʉngʉe Waizraeli dho ná sheria nǎ ngʉe kpa ronga ka ndi b’oe aksida ró adzá inga njí dhi ngana ná chutsoddadha maddi. (Kut. 21:28, 29; Kum. 22:8) Njati ddikpa ke hwie ndi lai ke nzá ndi ji ro ró, fø lo nǎ ro fø ke ka ndi bae che bbo kʉ ná matokeo. (Kum. 19:4, 5) Føri kina, sheria pongʉeri ddikpa ke vó nzá d’e gøni ná ngba ronga nzá ndi ji ro ró, fø ke dho ri ngʉ ngani le bbʉ malipizi. (Kut. 21:22, 23) Maandiko ridho wazi nari kʉ Yova adi riji ko njí ko dho ka ná lo krʉ ndiro ko nyi aksida tso d’e. Ko adi ko nja Mungu bbʉ ko dho ná shinga dhi kado mana na ngbà nari dhǒ, hatari na ka ndi tsu ko ná ritsi tso ko nyi abba inga njí dhi ngana nari na. Njati ko ji ko bu vó ka ndi vo ndrŭ ronga ná ritsi ma, sumu dhi ritsi ma, inga dawa ma ró, ko adi ri bu da ndiro nzɨ ri vo nja ndrŭ ronga ró. Ndirigoti ko adi rili nzá nzø ka ndima ba ri ná ngana. Ko e krr kazz ma, líli ka ná ritsi ma, elektronike dhi ritsi ma na na ko njínji ná saa na ndirigoti ko nzɨ adi ri bba nga ko kʉ ná ngana ri. Ko nzɨ adi moto inga motokari dya njati ko ba ná dawa é nzá ndi ka ndi liri ko njiri fø ro ri ró ndirigoti rie wa ko jø inga bbo ko njeni ri ró. Føri kina ko nzɨ adi njínji telefone na moto inga motokari ko dya ná saa na ri. w23.02 21-22 §7-9

Yova e ngatsovedha na, bblo ndirigoti nì ndrŭ famu ná Mwalimu. Ke adi bblo lo ne ndidhó wanafunzi nǎ ro. (Zb. 130:3) Ndirigoti ke nzɨ adi riji ko njí nzá ka ko dho ná lo ri. Anonga nari kʉ ke li servo ni djǒ nǎ, ná føri kʉ ddikpa bblo pli kʉ ná kado. (Zb. 139:14) Ko no ná ke jingʉeri ko rá anzi lo ko chu nari na choro nŭnŭ ndirigoti ko di hwè ba ri dho. Føri dzá lo dho ri kʉ nyodyu dhi lo “ko dhi” Biblia nǎ bbʉbbʉlo chudha dhi ù ko na. (1 Pe. 2:2) Ali ngbà ni ka ni weza ná muradi ni nji ndirigoti akperi ni di Biblia zø krʉ ddo ró. (Yos. 1:8) Yova dhó ngatsotsokodha chulu, ni si hwè ba ngazødha nǎ ro ndirigoti ni di ngaddi ke djo krʉ saa ró. Fø lo dhé ni chu nari nzá kaka ri. Ringani ni chu lo bbo Yova djo ndirigoti ni é jidha ma, udha ma na na ke djo. (1 Ko. 8:1-3) Anziri Yova kó ni tsotso ni é udha na bbo lo ni chu ke djo nari kana. (Lu. 17:5) Ke adi fø di ná sala goti ngʉngʉ. w23.03 10 §11, 13

Yesu dhó wanafunzi dho nzá ringangʉeni ndima b’o i dz’ dzá mwisho si nari pa ndima di ro ri. Ro, Yesu bbʉngʉe ddikpa njí kpa dhona. Ke pongʉeri kpa d’ra hwè dhi lo-i “Yerusalemu lu, Yudea ma, Samaria ma na nǎ krʉ kʉ ná ngalu ndirigoti dz’ djó dada kʉ ná ngalu ma.” (Mdo. 1:6-8) Føri ngʉe bbo pli kʉ ná njí bbʉngʉeni Yesu unakpa dhó ri! Bbʉ ndima bbʉ ndima fø njí dho nari chulu kpa njingʉe njí bblo pli ndima dhó saa na. Nja ko b’o ko ronga d’e ringani ko nja ngbaribbai ma ko njínji kodhó saa na nari. “Nzá djo le ddinga ná lo” ka ndi ba ko krʉ ba. (Muh. 9:11) Ko ka ko dhe nzá djo ko ddinga ná saa na. Ko ka ko njinjí bblo kodhó saa na Yova ji ná lo ko nji ndirigoti kpakpa ko ko kana kau li ke na nari chulu. (Yoh. 14:21) Kodhó lo riu ko “tøni kprɨ nzá ko ronga jaja ro ndirigoti krʉ ddo ró ko é nji ko nji ná ritsi na bí Bboke dzá njí kana.” (1 Ko. 15:58) Føro ko dhedhe ma, inga i dz’ dzá mwisho ma si ró, ko nanga si d’o ná lo ro nga sie ri.​—Mt. 24:13; Ro. 14:8. w23.02 18 §12-14