Bi 2

Njʉnga dhi andiko na mana ká kʉ addu? Yesu tungʉeri nanga nari bbai føri kʉ, nja ndrŭ ni ji ni djolu nari inga fø di ná jidha ka ndi liri ddikpa Mukristo bbʉ ndidzá shinga ndi lai Mukristo djotsina ri uri le njiri fø ró. Biblia rid’ra ko dho nari kʉ jidha na mana kʉ bbo. Loroji na, i ri kʉ bbo bí kʉ ná ndrŭ jirie ná maandiko: “Mungu kʉ jidha.” (1 Yo. 4:8) “Ringani ni ji ni lai ni nganga bbai.” (Mt. 22:39) “Jidha adi bí kʉ ná chenga djonga tso tsitsi.” (1 Pe. 4:8) “Jidha ro nzɨ adi sini ri.” (1 Ko. 13:8) Fø maandiko ma, nja maandiko ma na adi ridho nari kʉ, ri kʉ bbo na mana kʉ ná lo le dhǒ fø sifa. Yova dhó roho ndirigoti kedhó ledha kʉ djó ná ndrŭ dhé ka ndima é bbʉbbʉ jidha na ndima kana. (1 Yo. 4:7) Ri kʉ føri dho i Yesu pongʉeri nari kʉ, ndi unakpa kana sie bbʉbbʉ kʉ ná jidha ri. Yesu pongʉeri nari bbai, bí kʉ ná ndrŭ adi ke unakpa utso d’i kpa dhǒ ndima kana ná bbʉbbʉ kʉ ná jidha ró. w23.03 27-28 §5-8

Nidhó lo ká jiri ni njí nja ndrŭ zø bbo? Ni ka ni njiri fø ná chu kʉ, Biblia nǎ zølo dhongʉe ndirigoti nzá dhongʉe zølo ná ndrŭ dhó lo ni zø ndirigoti ni ngaddi bbo kpadhó lo djo nari chulu. Addinga Yesu dhó loroji djo. Ke ngʉe tayari ndrŭ zø njidha dho. (Lu. 7:47) Ke nzɨ ngʉ adi ndi thí li kpadhó kosa djo dhé ri, ro ngbà kpa ka ndima njí ná lo djo maddi. Føri ró ro njonjo, Wafarisayo ngʉ adi “nja ndrŭ nja nga na mana kʉ nari bbai.” (Lu. 18:9) B’lo ni ddinga fø loroji djo nari goti, adhuri ni tso: ‘Ma ká e ngbá nganjadha na nja ndrŭ djo? Ma ká adi ma thí li kpadhó ngbá sifa djo?’ Njati rie kpakpa ni dho ni njí ddikpa ke zø ri ró, amburi ni ndí fø kedhó bblo sifa krʉ. Ndirigoti adhuri ni tso ɨ: ‘Yesu ká fø ke nja ngbaribbai? Ke ká ka ndi njie fø ke zø nji?’ Njati ko njiri føro, ko ka ko ø kodhó ngaddidha thika ø. Ya kwanza, ringani ko njí kpakpanga ndiro ko njí ko dho tani ná ke zø d’e. Ro njati ko di kodhó lo thika thɨ føri bbai ró, luti ko ka ko é tayari ndrŭ zø njidha dho. w22.04 23 §6

Ufunuo dzá buku nǎ le dho Mungu dhó mbubai loroji chulu. Loroji na, “ddikpa tsó nǎ zǎ dji dda nǎ ro.” “Kumi ndi d’yø kʉ ro ndirigoti sabba ndi djǒ kʉ ro.” (Ufu. 13:1) Fø zǎ una kʉ “nja zǎ dz’ nǎ ro ndi dji ro.” Ná fø zǎ loti dragoni bbai ndirigoti ri liri “kazz si ra nǎ ro dz’ djo.” (Ufu. 13:11-13) Føri goti ko nja ddikpa d’i di ná zǎ, “bbo pli ndidzá kakanga kʉ ro,” ndirigoti ndumba d’a ndi djó ro. Fø gbo kʉ ná zǎ Mungu dhó mbubai dhǒ. Ndirigoti kpa ddani b’lo Yova Mungu ma, ndidhó Pidhinga ma na tso ró cho bí. Føri dho, ri kʉ bbo na mana kʉ ná lo ko chu kpa ká kʉ ie ma nari. (Ufu. 17:1, 3) Ko famu ri d’e, akobba Biblia tu ringa ko dho. Ufunuo nǎ bani ná bí kʉ ná loroji e b’lo nanga le tu Biblia nǎ nja buku nǎ nari. w22.05 8-9 §3-4

Ko kana nja ndrŭ nzá ka ndima njinjí bbo Yova dzá njí kana ndima jieri ndima nji ri ná ngatsi ngó dzá lo dho inga dhe dzá lo dho ri, ná føri ka ndi liri ko thí di bʉni bʉ. Rie nja saa na, ni thí adi bʉni ni njínji sese Yova dho nari dho ri ró, adhuri ni tso, ‘Yova ká addu nzǐ ma tso?’ Yova rinzi ni njinjí ndi dho ni thí nǎ ro krʉ nidhó hali ka ndi u ritso ná ngatsi. Addinga i lo djo. Ddikpa 80 dhó cho kʉ ná le-ve thí bʉni, ndi nzá ka ndi njinjí ki lod’radha dhi njí kana 40 ndidhó cho ngʉe ro ndi ngʉ njínji ná ngatsi ri nari dho. Le riddi nì mai ndi njínji Yova dho ndi thí nǎ ro krʉ ro, føri nzɨ hwè ro bbʉ Yova dho ri. Ro føri ká kʉ bbʉbbʉ? Addinga di. Njati rie fø le-ve ngʉ njínji ndi thí nǎ ro krʉ 40 ndidhó cho ngʉe ná saa na ndirigoti le njínji ndi thí nǎ ro krʉ 80 ndidhó cho kʉ ro ri ró føri na mana kʉ, le nzá bba ndi thí nǎ ro krʉ ndi njínji Yova dho nari tso ro ri. Njati ko di njínji Yova dho ko thí nǎ ro krʉ ró, ke si ripo: “Ko njiri bblo pli!” (Anja Matayo 25:20-23.) Njati ko di ko thí li ngbà ko ka ko njí ná lo djo, nga nzá ko ka ko njí ná lo djo ri ró, ko si riba ri kʉ sʉsʉ ko b’o kodhó hwè ronga. w22.04 10 §2; 11 §4-6

Ufunuo sura 21 ddi 144 000 kʉ ná kpa bbo d’ani ná bba na, føri kʉ “Ø Yerusalemu.” Fø bba dherr le lie 12 kʉ ná dju djó ndirigoti ri djó le ndie “Chembø dzá ngba dhó mitume 12” ró 12 kʉ ná dho. (Ufu. 21:10-14; Efe. 2:20) Fø loroji dhi bba ngae ddiddi nja kʉ ná bba na ri. Fø bba gʉ chu le thie tsetse ná or na, ndirigoti ri ró 12 kʉ ná dzaitso le thɨe bbo dhó valer kʉ ná ritsi na, ri dhi ukuta ma, ri dherr ma, le røe bbo d’ani ná dju na ndirigoti ndi dhi ngbà thonga ná kipimo na le ddi ndi ro. (Ufu. 21:15-21) Nì mai ri kʉ føro, Yohana ra riba nari kʉ vʉ tso vʉni ná ritsi ro kʉ thé! Ke pori: “Fø bba nǎ nzá ma njae hekalu ro ri, dhonalo Yova Mungu Ritsi ddi na ka ná ke ma, Chembø dzá ngba ma na i kʉ ri nǎ hekalu. Ndirigoti fø bba dhó lo nzá ueri dyi ma, bi ma na bbʉ mwangaza ndi na ri dhonalo Mungu dhó kadha e nga í ri nǎ ndirigoti ri nǎ tala kʉ Chembø dzá ngba.” (Ufu. 21:22, 23) Fø Ø Yerusalemu nǎ kʉ ná kpa sie ddinga Yova ma na.​—Ebr. 7:27; Ufu. 22:3, 4. w22.05 17-18 §14-15

Nì mai Yova kʉ ko no ná ke, Sheria bbʉ ná ke ndirigoti Lod’i ná ke ro, ke kʉ kodhi ji dhi ra nǎ Baba maddi. (Zb. 100:3; Isa. 33:22) Chenga ko njí ná saa na ko leni le ko thí nǎ ro krʉ ró, ke nzɨ adi ko zø dhé nji ri, ro ke jieri ji ndi njí ko zø. (Zb. 86:5) Nabi Isaya chulu, Yova d’rangʉe kpakpa ka ndi li kodhó ngab’odha ná i lo: “Njati nidhi chenga é ddiddi bbo pli dzá kakanga kʉ ná ritsi bbai ma ró, ri si ngʉ sawø thokpa bbai.” (Isa. 1:18) Ko e nzá kaka ná ndrŭ nari dho, ko adi nji ndirigoti ko adi po nja saa djo ná lo adi nja ndrŭ thí ronga vovo. (Yak. 3:2) Nì mai ri kʉ føro, føri na mana nga kʉ ko ka ko njí kau nzá kpa na ri. Ko ka njí kau kpa mana njati ko chulo zølo djo ró. (Mez. 17:9; 19:11; Mt. 18:21, 22) Njati ddikpa ke po inga ke nji ná lo é sese ma ro ri kani ka ko lú ró, Yova adi riji ko njí fø ke zø njí. (Kol. 3:13) Ko kʉ bblo kʉ sababu na nja ko njiri fø d’e, dhonalo Yova adi ko zø nji “bbo chu nǎ.”​—Isa. 55:7. w22.06 8 §1-2

Ngbà mai ko ka ko bbá nja ndrŭ na ko ko ddi nari tso ro, ko ka ko ba somo Yova dzá njí dhi nja ndrŭ dhó loroji nǎ ro. Nja ko famu fø lo d’e, akonja Yesu dhó loroji. Ko nzá kaka Yesu bbai ri, ro ko ka ko chu lo bbo kedhó bblo ngʉe ná sifa nǎ ro ndirigoti ke ngʉ adi nji ná lo nǎ ro. (1 Pe. 2:21) Njati ko di kedhó loroji dyø chøchø ngana ro ró, ko sie bblo njínji Yova dho ná ndrŭ. Biblia nǎ kʉ, ko ka ko dyø dhó loroji ná chi tøngʉeni ná kpetsi kpa ma, isɨ ndrŭ ma na bí nzá mai ndima kangʉe ka ro. Addinga Pi Daudi djo, Yova nzingʉe ke “ma thí ji ná lo nji ná ke.” (Mdo. 13:22) Ro, Daudi njingʉe nja bbobbo kʉ ná chenga ro maddi. Nì mai ri kʉ føro, ke kʉ bblo kʉ ná loroji ko dho. Ká addudho? Dhonalo ke nzá nengʉeri ndi soni so ndi djó ri. Føri rɨngana ke ungʉe ndi dho le bbʉngʉe ná shauri u ndirigoti ke kongʉe zø ndi thí nǎ ro krʉ. Føri lingʉeri Yova njí ke zø nji.​—Zb. 51:3, 4, 10-12. w22.04 13 §11-12

Biblia rid’ra nari kʉ dhe kʉ mbuba. (1 Ko. 15:25, 26) Ko ró ji ko ji ná le é dhe na bbo inga ko é dhe na bbo ró, dhe djo ko ngaddi nari ka ndi tá do ko na bbo. Dhe do ká ko adi nji addudho? Dhonalo Yova no ko nǎ ná tamaa kʉ ko njí maisha hwè theinga dho. (Muh. 3:11) Ro, ko di dhe do nji nari ka ndi kó ko tsotso ko b’o kodhó shinga ronga b’o. Ri ka ndi cho ko ronga ko vʉ lo nanga bblo nyo djo ma, mazoezi djo ma ndirigoti ri ka ndi kó ko tsotso ko rá munganga dhi ngana kodhó lo ú matunzo ró, ndirigoti ri ka ndi kó ko tsotso ko pʉ hatari na ka ndi tsu kodhó shinga ná lo ko ró ro. Ko jirie kodhó shinga ji nari Shetani chu ngbà. Ke rine ko uri nari kʉ, ko ka ko bbʉ krʉ kʉ ná ritsi ndiro kodhó njʉ kʉ ná shinga ronga b’oni d’e njati rie sa ma ndi dhiri ka ndi sa ko kana kau Yova ma na ri ró. (Yob. 2:5) Ro, Shetani kʉ kali sha na ke! Shetani kʉ “dhe si dhó ro ná ke” nari dho ke adi rine ndi njinjí dhe do ko nji ná fø chu na ndiro ko bbá Yova dho ko njínji nari tso d’e.​—Ebr. 2:14, 15. w22.06 18 §15-16

Gʉ kodhó njí gʉni ná saa na, ko ka ko di ko tso njú sese kikundi na. Føri dzá lo dho bbo na mana kʉ nari kʉ, ko é ngoi na ko kana. Ako hwini Shetani tso ró, nga ko kana ri. Nzɨ ni di ni thí li ni djoi nji ná kosa djo, ro anidi rine ni thɨ ni kana lo thika lele. (Mez. 19:11) Anidi tayari nja ndrŭ tsotsokodha dho. (Tit. 3:14) Mahubiri dhi kikundi nǎ ddikpa le kongʉe ddikpa le-ve tsotso nari ngʉe bblo matokeo na le ma dhó mahubiri dhi kikundi nǎ ndrŭ krʉ djo. Kpa kana nga ngʉngʉe chøchø ddikpa familia bbai. (Zb. 133:1) Maelfu kʉ ná ko djoi ma, ko vei ma na njínji Yova dho ngbà mai guvernema gʉ kodhó njí gʉ ndima dhó ngø nǎ ro. Kpa kana nja kʉ ná kpa kʉ prizo nǎ ndima dhó udha djó. Ko ka ko njí sala kpa dho, kpadhó familia dho, ndirigoti hatari nǎ li ndima dhó uhuru nja ndima kó kpa tsotso kiroho nǎ, kimwili nǎ, ndirigoti sheria dhi lo na ná le-djoi ma, levei ma na dhi lo dho. (Kol. 4:3, 18) Nzɨ vi nga nari kʉ, nidhó sala ka ndi kó fø kpa tsotso ko.​—2 Te. 3: 1, 2; 1 Ti. 2:1, 2. w22.12 26-27 §15-16

Bí ina nzø adi ndima dhó gø dhi ndrŭ nji ná lo dyø. Bbʉbbʉ dhé, kaka ná gø dhi le ro nga kʉ ri. (Ro. 3:23) Nì mai ri kʉ føro, nyodyu na kʉ ná gø dhi ndrŭ adi kpakpanga nji ndiro ndima é bblo kʉ ná loroji ndima dhi nzø dho d’e. Ddikpa dza ba pori ɨ: “Nzø kʉ ddiddi dda tso njú ndi na ná eponje bbai.” Ke pori ki: “Ko di njínji nzá ko ddi kpa dho ná lo na ró, kpa ka ndima pori ko nga kʉ bblo loroji ri.” Følo dho njati ko jiri kodhi nzø ji Yova ró, ringani ko ji ke bbo pli ndirigoti ko ji ke ngbà nari njani nja. Gø dhi ndrŭ ka ndima ddi longa ndima dhi nzø dho, nja ndima ji Yova d’e ná chu kʉ bí. 17 dhó cho kʉ ná le-djo Andrew pori ɨ: “Bí ina madzá gø dhi ndrŭ ngʉ adi ripo ma dho sala kʉ bbo na mana kʉ ná lo. Krʉ ngasdjo, rie b’lo ma ma njie sala ri ró, madzá baba ngʉ adi sala nji ma na ngodhé. . . . Kpadjo ri e sʉsʉ ma nji sala ndirigoti ma nja Yova jidha dhi Baba bbai.” Gø dhi ndrŭ aninonga nari kʉ, Yova ni ji nari ka ndi liri nidhi nzø ma ji ke ddi. w22.05 28 §7-8

Ndiro ko é tayari batiso badha dho d’e, ya kwanza ringani ko njí nari kʉ ko leni kodhó chenga nǎ ro ko thí nǎ ro krʉ. (Mdo. 2:37, 38) Bbʉbbʉ le leni nari adi rili le ø ledhó nyi thika ø. Ni ká bba nzɨ adi Yova nyǒ tho ná lo tso ngbà, føri i kʉ, uasherati ma, mbazz le ddá nari ma, che kʉ ná lo le ti nari ma na? (1 Ko. 6:9, 10; 2 Ko. 7:1; Efe. 4:29) Anji kpakpanga ni bbá fø nyi tso d’e. Anziri Biblia ni zø na ná ke inga kutaniko nǎ wazee kó ni tsotso ndirigoti kpa bbʉ chutsoddadha ni dho. Njati rie jadda ni kʉ inga ni é ni abbá ni di ro ró, anziri nidhó gø dhi ndrŭ kó ni tsotso ndiro ni bbá ni ronga tso ka ndi cho batiso ni ba nari ró ná nyi tso d’e. Føri kina ri kʉ bbo na mana kʉ ná lo ni di kiroho nǎ lo nji krʉ ddo ró. Føri tsu ndi nǎ njudha dhi ngana le si krʉ ddo ró ndirigoti jibu le ngʉ nari maddi. (Ebr. 10:24, 25) Ndirigoti rie b’lo ni tso uni lod’radha dho ri ró, adi rinji fø krʉ ddo ró. w23.03 10-11 §14-16

Mwanzo 3:14, 15 nǎ le tilo “su” djo ndirigoti su nǎ “gø” djo. Biblia ko tsotso kó ndiro ko chu fø kpa krʉ nyi d’e. Akonga lotidha tso su djó ro. Bbʉbbʉ dhé, su nzá ka ndi famungʉe Yova pongʉe Edeni dhi i nǎ ná fø lo ri. Yova d’ingʉe lo djo nari ngʉe nì kʉ akili na ná nononi ná ritsi. Nde, Yova ká ngʉ loti ie djo? Ufunuo 12:9 tu su ká kʉ ie ma nari nanga wazi. Fø andiko pori “kpawa nǎ su” kʉ Shetani Ibilisi. Nja saa na, Biblia di loti “gø” djo ró føri na mana e chøchø ngana ro ddikpa ke dyø ná kpa, føri dho le ka le nzi kpa kedzá nzø. Føri dho su nǎ gø le nzǐ nari kʉ, Shetani bbai nzá tøni chi Yova Mungu dho ná malaiká ma, ndrŭ ma na. Ndirigoti kpa ddani dda Yova Mungu ma, ndidzá ndrŭ ma na tso ró. Føri kʉ Noa cho na bbangʉe ra nǎ nga ná malaiká ndirigoti chelo nji ná ndrŭ ndima dhi baba Ibilisi bbai.​—Mwa. 6:1, 2; Yoh. 8:44; 1 Yo. 5:19; Yud. 6. w22.07 14-15 §4-5

Mutume Paulo jingʉe ndi djoi bbo. Ke mbungʉe kpakpalo ndi nganga ró, føri dzá lo dho ke ka ndi dhoe zølo ndirigoti ndi lie ndi ndi lai Wakristo rɨngana kpakpalo lu kpa da ná saa na. Ddikpa saa djo, Paulo dhó nga ngʉe mbø ro ri ndirigoti kedhó nga ngʉe njí ro ndi kó na ndi tsotso ndirigoti ndi lai kpa tsotso d’e ri. (Mdo. 20:34) Ke ngʉ adi bbadza (hema) dya ndi dzí nanga d’e. Korinto na ke singʉe ná saa djo, ya kwanza ke ngangʉe njínjidha tso ndi lai bbadza ngʉ dya ná Akila ma, Prisila ma na. Ro “krʉ sabato dyi” ke ngʉ adi ra lod’ra Wayahudi ma, Wagiriki ma na dho. Føri goti Sila ma, Timoteo ma na singʉe ná saa djo “Paulo ngangʉe lod’radha dhi njí tso bbo.” (Mdo. 18:2-5) Paulo nzá vingʉe bbo na mana ngʉe ndidhó maisha nǎ ná ritsi nga ri, ná føri ngʉe Yova dho ke njínji nari. Paulo ngʉ adi njínji bidii na nari dho ri ka ndi kae ka ke li ndi djoi ma, ndi vei ma na kpakpa. Ke ngʉ adi ringano kpa dho nzɨ kpa bba ndima dhó maisha nǎ kpakpalo inga ndima dhó familia dhó loji ná ritsi ndima ne nari liri ndima bé “bbo na mana kʉ ná ritsi” pá, ná føri kʉ Yova dho le madha bbʉ ná chu krʉ. w22.08 20 §3

Njʉ Mungu jiri Pidhinga dzá hwè lo-i d’rani dz’ djolu gble. (1 Ti. 2:3, 4) Føri kʉ, Yova dzá njí ndirigoti ri na mana kʉ bbo ke dho nari dho, ke li ndi dhi Dduna bbo ndi jingʉe ná ke nja ndi nja fø njí djó nga d’e. Ko ka ko churi chu nari kʉ, Yesu chutso ddá ko dho bblo nari dho, lod’radha dhi njí si njini Yova jiri ri é nari nganga bbai i dz’ dzá mwisho si nari njí. (Mt. 24:14) Nde, føri ká ko chu ngbaribbai? Ra na Yesu ngʉ nari njí, ke ma njungʉeni ndi una chi tøni ná kpa ma na Galilaya nǎ ddikpa ngøtsɨ djo. Ndirigoti ke pongʉeri kpa dho: “Krʉ kʉ ná bbonga bbʉni madhó ra nǎ ndirigoti dz’ djó.” Anja føri goti ke jangʉe kpa dho ná i lo: “Nde, anira ndirigoti aninji ndrŭ wanafunzi krʉ ndrŭ tsɨ kana ro.” (Mt. 28:18, 19) Føri dzá lo dho, Yesu dho le bbʉngʉe ná bbonga kana ddiri ngʉe ke ddá chutso lod’radha dhi njí dho. Ndirigoti lod’radha dhi fø njí ka ndi rae anzi Yesu dhó bbonga tsena kpø njʉnga djo. w22.07 8 §1, 3; 9 §4

Chølo njingʉe ndima dhó dhe njí ná ndrŭ si kʉ “shinga dhi gadha” ba, dhonalo kpa ró dho ndieni b’lo shinga dhi buku nǎ. Føri na mana kʉ, Yohana 5:29 nǎ le tilo djo ná “bblo lo njingʉe ná ndrŭ” kʉ Matendo 24:15 nǎ “chølo dhi ri” le nzǐ ná ndrŭ. Fø lo nanga le tu nari ma tso gbani gba Waroma 6:7 nǎ kʉ ná lo na, ɨ ndi ripo ro: “Dhedhe ná ke dhó chenga sani sa.” Føri dzá lo dho, chi tøni ná fø kpa cheeni ná saa na, Yova vie kpadhó chenga nga vi, ro ke si go kpa ngʉe shi ro kpa tøngʉeni chi ndi dho nari nga nono. (Ebr. 6:10) Bbʉbbʉ dhé, chølo dhi fø ndrŭ dho ri si ngani ndima tøni chi nja ndima ró dho má ma shinga dhi buku na d’e. w22.09 18 §13, 15

Nabi Danieli kʉ bblo pli kʉ ná loroji, ngbà djo le ka le li le thí ná ndrŭ kana. Nì mai ndima ngʉe Babiloni nǎ no tsena ro, karrnga goti ke singʉe nji ná lo chulu ke dhongʉeri ndi djo le ka le li le thí ngbà. Ndrŭ lingʉe ndima thí ke djo bbo, Yova dhó ngatsotsokodha chulu ke tungʉe Babiloni nǎ pi Nebukadneza dhó nyo nanga ná saa na. (Da. 4:20-22, 25) Bí cho da nari goti Danieli dhongʉe ndi djo le ka le li le thí ki ngbà nari d’ʉ ndi tungʉe Babiloni nǎ dzaikpa ro ndingʉeni ddù chulu ná lo nanga nari na. (Da. 5:5, 25-29) Luti, Umedi nǎ Darius ma, ndi unakpa ma na d’ingʉe riutso nari kʉ, Danieli djó kʉ “kpakpa bbo kʉ ná roho.” Kpa chungʉeri chu nari kʉ, Danieli kʉ “li djo le ka le li le thí ná ke ndirigoti nzɨ lo bé pá inga nga nǎ shasha kʉ ná ke.” (Da. 6:3, 4) Ko ka ko dhuri ko tsó: ‘Ma ká churieni ngbà djo ndrŭ ka ndima li ndima thí li ná ke i ngbà?’ Ko adi madha bbʉ Yova dho rie ko kʉ ngbà djo ndrŭ ka ndima li ndima thí ná ndrŭ ró. w22.09 8-9 §2-4

Ko adi faida ba njati ko gba ko tso Yova bbʉ bblo lo ma, chelo ma na djo ná sheria na ró. Ká addudho? Addinga dza chidha dhi kila sosiete di ritsi ddidha djo kʉ ná yadha li ndima dho ndima ro ró ka ndi banga ná lo djo. Føri ka ndi ngbʉnga bbo. Ndirigoti bbanganga ma, bbadoktere ma na di ngarr nzá dawa bbʉdha dho le li ná wazi kʉ ná shauri dho ró, føri ka ndi liri dhe dhi ndrŭ cheni che. Bbʉbbʉ dhé, ngbà thonga ná sheria adi ndrŭ ronga b’ob’o. Føri bbai Mungu dhó bblo lo ma, chelo ma na djo kʉ ná sheria adi ko ronga b’ob’o. Yova adi nì kpakpanga nji nja ndima njínji ndidhó sheria na d’e ná ndrŭ ronga lele. Ke tsoni ɨ: “Chølo dhi ndrŭ dho dz’ si che ndirigoti kpa si di ri djó theinga dho.” (Zb. 37:29) Ni ká ngaddi nì, Mungu dhó sheria na ndrŭ krʉ si njínji ná saa na, ndrŭ tso si gbani ddi, ndrŭ sie ngoi na ndirigoti hwè na nari djo? Yova jiri ni ba fø di ná maisha. Bbʉbbʉ dhé, ko krʉ kʉ bblo kʉ ná sababu na ko ji chølo! w22.08 27-28 §6-8

Ko di hwini kpakpalo tso ró ná saa na, chi ko tøni Yova dho ndirigoti kedhó tengenezo dho nari ka ndi tsu mbudha na. Nde ko ká ka ko si fø kpakpalo djolu ngbaribbai? Ringani ko b’o kodhó akili ronga ndirigoti ko é krr, ko tøni kpakpa kodhó udha kana. Ko adi kodhó akili ronga b’o ngbà ko thí jotso ko ro, bblo ko lonanga ddi ro, ndirigoti nì ko kpakpanga nji ko di lo nja Yova adi lo nja nari bbai ro. Njati ko njiri fø ró, ko nzá ka ko bbari ko bani na ná lo sa kodhó akili ri. Njaro ko ko mbu ta dho ko lai Mukristo tani nari bbai, ná føri ka ndi é ddi kʉ daraka na ma ná ke. Njaro nidhi djona inga nidhi vena nzɨ ngʉ rine ndi njiri che ni ró ri. (Ro. 3:23; Yak. 3:2) Ro, ke njie ná lo ka ndi vo ni thí ronga vo. Ni ka ni dhueri ni tsó, ‘njati rie le-djo i njini afø ri ró, i ri ká kʉ Mungu dhó tengenezo i nì?’ Shetani adi riji ko ddinga aføri bbai. (2 Ko. 2:11) Fø di ná che kʉ ná ngaddidha ka ndi ndó ko kana nga ndó Yova na ndirigoti kedhó tengenezo na. Føri dho, ko dho ringani ko é krr ndiro nzɨ ko li lo ko thí na ro. w22.11 20 §1, 3; 21 §4

Yova bbʉ ko dho ná bblo kʉ ná ngab’odha kʉ, ko si di theinga dho. Nja kpa kʉ ngab’odha na ndima ka si di theinga dho ra nǎ nzɨ nyi njani ná le ndí na. (1 Ko. 15:50, 53) Ro bí kʉ ná ndrŭ kʉ ngab’odha na ndima ka si di dz’ djó theinga dho, kaka ná le ndí na ndirigoti hwè na. (Ufu. 21:3, 4) Njati ko é ngab’odha na ko si di ra nǎ ma, inga dz’ djó ma ró, ko krʉ kʉ na ná fø ngab’odha kʉ mana na bbo. Gosi ná ddo djo ko kʉ na ná ngab’odha si njini nji dhonalo ri si Yova dhó ro. (Ro. 15:13) Ko chu b’lo ke nji ná tsodha, ndirigoti ko churi krʉ ddo ró ke adi b’lo ndi tsoni djo ná lo njinji. (Hes. 23:19) Ko uri u Yova kʉ bbo ù na ndirigoti kpakpanga na ndi njí b’lo djo ndi tsoni ná lo njí. Kodhi ra nǎ Baba jirie ko ji ndirigoti ke jirieri ko li ko thí ndi djo. Njati kodhó ngab’odha é kpakpa Yova djo ró, ri ka ndi kaka ko ve kpakpalo tso ndirigoti ko ka ko é nga nǎ do ro ndirigoti hwè na njati rie ngbǎ di ná lo na ma ko bani ri ró. w22.10 24 §1-3

Ndrŭ nzɨ ngʉ ngarr Yova dho ri nari dho, Isaya d’rangʉeri nari kʉ Yova si ribba kpa nzani nza. (Isa. 30:5, 17; Yer. 25:8-11) Bbʉbbʉ dhé, fø lo njingʉeni nji Babiloni nǎ kpa løngʉe kpa ndima rá kpa na no na ná saa na. Nì mai ringʉe føro, Wayaudi kana chi tøngʉeni ná kpa ro ngʉe nì ndirigoti Isaya pongʉeri kpa dho nari kʉ, ddikpa cha Yova si ribba kpa ki ngʉ vi ndima bba Yerusalemu na. (Isa. 30:18, 19) Ndirigoti fø lo njingʉeni nji føri nganga bbai. Yova tungʉe kpa tu no tsena ro. Nì mai ri ngʉe føro, cho dangʉe bí Yova klo kpa nari njí. Le ripo “Yova ngab’o ngatso ndi ve ro ndiro ndi dhǒ bblonga ni dho” ná fø lo ridho nari kʉ ddikpa saa ro ka ndi dá vi chi tøni Yova dho ná ndrŭ Yova gø nari njí. Bbʉbbʉ dhé, Waizraeli njingʉe cho 70 Babiloni nǎ no tsena Yerusalemu na le ribba ndima ngʉ nari njí. (Isa. 10:21; Yer. 29:10) Waizraeli rangʉe Babiloni na ná saa na, kpa ngʉ dzz dzz ndima nzani nari dho, ro Yerusalemu na kpa ngʉngʉe ná saa na kpa ngʉ dzz dzz hwè dho. w22.11 9 §4

Njʉ bí kʉ ná ko djoi ma, ko vei ma na tso ve nari kʉ, ngbà tso mitume ma vengʉe ddi karne ya kwanza nǎ ná lo, kpa ngʉ lod’ra Yesu ró dho djo ná saa na. Bí ina, Wayaudi bbá tribinali nǎ ngʉ adi lod’i ná bbajuji ngʉ adi “ripo nzɨ kpa d’ralo Yesu ró dho djo.” (Mdo. 4:18-20; 5:27, 28, 40) Ro, kpa chungʉeri nari kʉ, ndima dho ‘bbʉ rusha ndima d’ralo ndrŭ dho ndirigoti Kristo djo’ nari kʉ bbo pli kʉ bbonga na ná ke. (Mdo. 10:42) Føri dho mitume djó lo ngʉ ti ná kpa, Petro ma, Yohana ma na pongʉeri nga nǎ do ro nari kʉ, ringani ndima rrnga Mungu dho i pli bbajuji dho ndima ngarr nari djolu, ndirigoti kpa pongʉeri ndima nzɨ bba Yesu djo ndima loti nari tso ro ri. (Mdo. 5:29) B’lo le nji ndima ndima tøni chi dhé nari djotsina ro, mitume rangʉe Wayaudi dhó tribinali nǎ ro, “hwè na dhonalo kpa zøngʉeni kaka nzá dho le ka le bbʉ heshima ná kpa [Yesu] ró dho djotsina,” ndirigoti kpa rangʉe anzi Yesu ró dho djo ndima lod’ra nari na!​—Mdo. 5:41, 42. w22.10 12-13 §2-4

Bbʉbbʉ dhé, Yova djo ko bbʉbbʉlo chu nari tso adi ngani Biblia nǎ bbʉbbʉlo dherr ko chu nari na. Waebrania dho ndi ndingʉe ná barua nǎ mutume Paulo nzingʉe fø lo ya “kwanza le ddingʉe ni dho ná lo.” Ke nzɨ ngʉ ripo ya “kwanza kpa chungʉe ná lo” na mana kʉ nga ri, ro ke ngʉ ripo ri kʉ ddiddi kalʉ ngba adi jø ná ba bbai. (Ebr. 5:12; 6:1) Ro, ke d’rangʉeri Wakristo krʉ dho kpa rá anzi Mungu dzá lo nǎ lɨ tso o ná lo ndima ne ndima chu nari na. Ni ká Biblia nǎ lo dherr ni chué nari dyu adi hwi nì? Ni ká adi riji ni rá anzi Yova ma, kedhó kusudi ma na djo ni lochu nari na nì? Ro, ko kana bí kʉ ná ndrŭ dho ngazødha e kpakpa. Nde, ni ká adi ngazødha nja ngbaribbai? Darasa nǎ ni ngʉe ro ká ni chungʉe ngazødha bblo i ngbà? Ni ká ngʉ adi hwè ba nga ni zø nari nǎ ro nì ndirigoti ni ká ngʉ adi rinja bbo nǎ ro ni lochu ri i nì? Inga ni ká adi rinja ni dho nzá kitabu zødha ro ka ndi ka ri? Njati rie fø ró, ni nga kʉ ddiro ri. Nì mai ri kʉ føro, Yova ka ndi kó ni tsotso ko. Ke kʉ kaka ná ke ndirigoti bblo pli kʉ ná Mwalimu. w23.03 9-10 §8-10

Njati ko é nyenyenga na ró, ko si ribba Mungu dzá lo ø ko thika ø. Njati ko pʉ ndrŭ djo le lod’i nari ma, nodha ma na pʉ ko ró ro ró dhé, Biblia nǎ zølo ma, jidha ma na djo tilo ná lo si ko thika ø. Nja ndrŭ na ko njini ná chu ka ndi dhori ko ká ribba Mungu dzá lo lé ko thi nì ma nari. Wafarisayo nzɨ ngʉ adi ribba Mungu dzá lo lø ndima thí ronga ri, ná føri djotsina kpa ngʉ adi “lod’i nga nǎ kosa kʉ ná ndrŭ djo.” (Mt. 12:7) Ngbaribbai ma ko njini nja ndrŭ na, nari adi ko ká ribba Mungu dzá lo lø ko thí ronga nì inga nzɨ ma nari dhǒ. Loroji na, ko ká adi loti bí ina nja ndrŭ dhó chelo djo inga kpadhó bblo lo djo? Ko ká é zølo na ndirigoti tayari ndrŭ zø njidha dho i nì inga ko adi lod’i ndrŭ djo ndirigoti ko di rine ko ø ko be? Fø di ná ngadhudha na ko di ko nanga ne nari ka ndi kó ko tsotso ko nja kodhó ngazødha ká ke kodhó ngaddidha ma, ko ko mbu nari ma, ko nji ná lo ma na thika ø nì nari.​—1 Ti. 4:12, 15; Ebr. 4:12. w23.02 12 §13-14

Addinga Arimatea nǎ Yosefu dhó loroji djo di. Ke dho Wayaudi ngʉ adi heshima bbʉ bbo. Ke ngʉ adi njínji Sanhedrini nǎ, Wayaudi bbá bbò tribinale nǎ. Nì mai ri kʉ føro, Yesu ngʉ lod’ra ná saa na Yosefu nanga lingʉe li ndrŭ do na. Yohana pori nari kʉ, ke ngʉe “Yesu unake, ro ngatselu Wayaudi do ndi nji nari djotsina.” (Yoh. 19:38) Nì mai ri kʉ føro Yosefu ngʉ adi ndi dyu lili Pidhinga dzá imba ro, ro ndi kʉ udha na Yesu nǎ ná føri ke ngʉ adi ruru nja ndrŭ ró. Ke ngʉ adi do nji nari kʉ, njati ndrŭ rá ri utso d’i ndi kʉ Yesu unake ró, ndrŭ nzɨ si heshima bbʉ ndi dho ri. Rie ngbǎ ma ri gʉ dingʉeri ró, Biblia rid’ra ko dho Yesu dhó dhe goti Yosefu vengʉe “do sisi ndi nǎ ro ndirigoti ke rangʉe Yesu ndí ko Pilato tso.” (Mk. 15:42, 43) Yosefu nzá mbungʉeri ki ro ndi ru ndi kʉ Yesu unake nari ru ri. Ni ro ma ká ndrŭ do adi nji Yosefu bbai ddi? w23.01 30 §13-14

Sheba nǎ ngʉe ná isɨ pi rrngʉe lo Sulemani ngʉe pi ná saa na ngʉe Izraeli nǎ ná ngoi ma, ndrŭ ngʉ di bblo nari ma na djo. Fø pi tungʉeni ndi ngʉe ná nga nǎ ro, ndi rá kpø Yerusalemu na ndiro ndi nja fø lo ndi ndiro d’e. (1 Fa. 10:1) B’lo ndi nja Sulemani dhó pidhinga tsena kʉ ná lo krʉ nari goti le pongʉe ná lo kʉ kodhó njʉnga dhi andiko ró ndi dyʉ ndi ro. Ro, Sulemani dhó pidhinga tsena ngʉe ná fø ngoi ngʉe gosi ná saa na Yova si bbʉ ndrŭ kpari dho ndidhi Ddùna Yesu dhó pidhinga tsena ná ngoi ró ji. Yesu dada Sulemani djolu krʉ chu nǎ. Sulemani ngʉe nzá kaka ná ke nari dho, luti ke njingʉe bbo chenga nari bbʉngʉe kpakpalo Mungu dzá ndrŭ dho. Ro, Yesu kʉ kaka ná Pi nzɨ ndi adi kosa ro nji ro. (Lu. 1:32; Ebr. 4:14, 15) Kristo dhongʉeri nari kʉ, ndi nzɨ si chenga ro nji ri inga che kʉ ná lo ka ndi njí ndidhó Pidhinga tsena ndrŭ ró ná lo nji ri. Bbʉbbʉ dhé, ke kʉ bblo pli kʉ ná Pi. w22.12 11 §9-10

Ko ká ka ko njiri ngbǎ njati nya ndi nanga nyá ná dhe nga ndi tso ko di ná ngana na ró? Ringani ko rrnga bbobbonga bbʉ ná chutsoddadha dho. Loroji na, ringani ko di ko thó gbo bí ina, ko kana nga di di dada, ko di kash ne thó ndirigoti ko di da nja ndrŭ ró ro. Ko di rinji fø ró, ko ridho nari kʉ ko nja Mungu bbʉ ko dho ná shinga dhi kado mana na bbo. Nya ndi nanga nyá ná dhe si ná saa na, ko ka ko rr njonjo kʉ ná lo kodhó bbakau dhó ro ma, ko di ná nga nǎ ma, ndirigoti eternete djó ma. “Krʉ ko rr ná lo” ko ué nari rɨngana ringani ko ne bbʉbbʉ kʉ ná lo guvernema ma, wanganga ma na dhó ro. (Mez. 14:15) Lo dho chutso ddá ná Baraza ma, Tawi nǎ komite ma na adi kpakpanga nji ndiro ndima ba d’ʉ kʉ ná eformasio njudha ma, lod’radha dhi njí ma na djo ndima chutsoddadha bbʉ nari njí. Njati ko di ko tso gba kpa vʉ nanga ná lo na ró, ko ka ko b’o ko ronga ndirigoti nja ndrŭ ronga maddi chelo ró. Ndirigoti ko ka ko liri nja ndrŭ é bblo kʉ ná nganjadha na Yova dzá Dimu djo.​—1 Pe. 2:12. w23.02 23 §11-12

Waizraeli tsungʉe ko ddo koni ná ngø na ná saa na kpa rangʉe di njonjo ngalu. Nja ngana di ná Waizraeli ka ndima bbae nja nga laidjó di ná kpa ro ndima ndima dyu li nari tso bbá. Ro, Yova kpengʉe Waizraeli ka ndima njue ná njonjo chu ndiro kpa rr ndidzá ndi ndingʉeni ná njonjo lo ma, ri nanga le tu nari ma na d’e. (Kum. 31:10-12; Ne. 8:2, 8, 18) Addinga ngbaribbai ma, chi tøni ná Waizraeli ka ndima mbue ndima Yerusalemu na ndima njuni ndima lai mamilioni kʉ ná njonjo ngalu ro si ná Waizraeli na ná saa na nari djo di! Yova ngʉ adi ndidzá ndrŭ tsotso kó ndiro ndima tso gbani ddi d’e. Luti Wakristo dhó kutaniko tso ngangʉeni ro, ri nǎ ngʉe isɨ ndrŭ ma, kpetsi kpa ma, njonjo kʉ ná luga ndima ti ro, njonjo ndima dhó hali kʉ ro ndirigoti njonjo kʉ ná ngalu ro ndima si ro. Ro, kpa tso gbangʉeni ddi bbʉbbʉ Mungu ndima má nari kana. Fø Wakristo ka ndima famungʉe Mungu dzá lo ndima lai Wakristso dhó ngatsotsokodha ma, ddinga ndima njuni kpa na nari ma na chulu.​—Mdo. 2:42; 8:30, 31. w23.02 3 §7

Yova tsoni nari kʉ, nì ngarr ndi dho ná ndrŭ si “choro nŭnŭ di ná shinga” ba. (Ro. 6:23) Ko di ngaddi Yova adi nji ko dho ná ritsi djo ró, kodhó jidha adi ngʉ ke laidjo kpakpa. Anzi ngaddi di, kodhi ra nǎ Baba jirie ko bbo nari dho ddikpa cha ma nzá ddi ko kana nga ro ka ndi ndoni ke na ri. Mungu tsoni ndi si kʉ choro nŭnŭ di ná shinga bbʉ ko dho ná føri adi ko tsotso kó ndiro ko ve ko bani na ná kpakpalo tso d’e. Njati kodhó mbubai di rine ndima che ko ché ma ró, ko nzɨ adi Mungu dho ko njínji nari tso ro bba ri. Ká addudho? Ddikpa sababu kʉ, ko churi chu nari kʉ, njati ko dhe chi ko tøni Yova dho ro ró, ke si ko gaga ndirigoti ko ki ro nzɨ si dhe ri. (Yoh. 5:28, 29; 1 Ko. 15:55-58; Ebr. 2:15) Ko churi chu nari kʉ, Yova ka ndi liri ko di theinga dho dhonalo ke ma adi theinga dho i ndirigoti ke i kʉ shinga tso ngani ná nga. (Zb. 36:9) Biblia pori, Yova kʉ nì dhé ndirigoti ke sie nì dhé.​—Zb. 90:2; 102:12, 24, 27. w22.12 2 §1-3

Yova dzá ndrŭ ko kʉ ro ko nanga nzɨ adi keni kpakpalo na ko bani nari dho ri. Ko churi chu Biblia pori nari kʉ, “ringani ko tsu Mungu dhó Pidhinga na bí kʉ ná nzadha kalu.” (Mdo. 14:22) Føri goti ko churi chu nari kʉ, kodhó nja kʉ ná kpakpalo nzá ka ndi sini krʉ kpø Mungu dhó ø dz’ si ná nga djo ri. Fø dz’ djó “dhe ma, dzz le dzz nari ma, hø le høni nari ma, ndi le ronga ndi nari ma na ki ro nga sie ri.” (Ufu. 21:4) Yova nzɨ adi ko ronga b’o krʉ kʉ ná kpakpalo ró ri. Ro, ke adi ko tsotso kó nja ko ve ri tso d’e. Anja mutume Paulo pongʉe Roma nǎ Wakristo dho ná lo di. Ya kwanza ke zøngʉe ndi ma, ndi djoi ma na bani ná na kpakpalo i vi. Føri goti ke ndingʉeri ki: “Fø lo krʉ kana ko si lo djolu si ji jingʉe ko ná ke chulu.” (Ro. 8:36-37) Fø lo na mana kʉ, Yova ka ndi liri nidhó lo bbi bblo nì mai ni hwini kpakpalo tso ró ro. w23.01 14 §1-2