Bi 3

Mutume Petro pongʉeri ndidhó ya kwanza barua nǎ ndi djoi dho, njati rie ngbǎ di ná zawadi na ma kpa kʉ ri ró, kpa njinjí ri na ndiro ndima li ndima djoi kpakpa d’e. Petro ndingʉeri: “Nja ke ddiro ba zawadi nari bbai, aninji njí ri na nja ndrŭ tsotso ni kó nari chulu, ddiddi bblo Mungu dzá nzá tso ka ndi koe le djo ná zølo ronga b’o ná kpa bbai.” (1 Pe. 4:10) Ri nzá ngani ko njí kodhó zawadi na ko njínji nari do, nja ndrŭ si dda nji inga ndrŭ thí si bʉni bʉ nari dho ri. Ro ringani ko é krr ndiro nzɨ ko di ko ngbéngbe ndrŭ djo ró. (1 Ko. 4:6) Akononga nari kʉ, ko kʉ na ná kpakpanga krʉ kʉ Mungu dhó ro ko ba ná zawadi. Ringani ko njinjí fø zawadi na nja ko li kutaniko kpakpa d’e, ro nga nodha njidha dho ri. (Flp. 2:3) Njati ko di njínji ko kʉ na ná kpakpanga na ko njí Yova ji ná lo ró, ko si hwè ba fø lo nǎ ro, nga ko njínji nja ndrŭ djolu inga ko ridho ko dada nja ndrŭ djolu nari dho ri. Ro ko njínji ko kʉ na ná zawadi na nja ko njí Yova nyǒ tho ná lo d’e nari dho. w22.04 11-12 §7-9

Yesu jingʉe Maandiko Takatifu ji ndirigoti ngbaribbai ma ke ngʉ adi ndi mbu ri djo nari d’rangʉeni unabi chulu Zaburi 40:8 nǎ, ri d’rari: “Ee madzá Mungu ni ji ná lo njidha kʉ madzá hwè ndirigoti nidzá sheria kʉ ma nǎ.” Føri lingʉeri ke é hwè na ndirigoti ke njinjí Yova dho bblo pli. Ko maddi ko ka ko é hwè na ndirigoti kodhó lo ka ndi bbi bblo pli njati ko njí kpakpanga Mungu dzá lo é ko thí nǎ ró. (Zb. 1:1-3) Yesu dhó lo ma, kedhó loroji ma na ró ro akothɨ Biblia ko zø ná chu thika. Ko ka ko famu Biblia bblo pli njati ko di sala nji, ko di ri zø dzodzo, ko di ngadhu ko tso ndirigoti ko di bbo nǎ mana kʉ ná lo ndindi ró. Ko ka ko njínji lo utsod’idha na njati ko di Biblia ró dyʉ ndi ná vichapo nǎ ro ko zø ná lo nanga ne li ko li ko dyu ro ró. Ndirigoti ko ka ko bbari Mungu dzá lo lé ko thi njati ko é bblo kʉ ná nganjadha na ko zø ná lo djo ró. Njati ko di kpakpanga nji ko njínji fø lo na ró, ko si faida ba Biblia zødha nǎ ro ndirigoti ko kana nga si ngʉ chøchø bbo Yova na.​—Zb. 119:17; Yak. 4:8. w23.02 13 §15-16

Avʉ ni ka ni njí maendeleo nǎ ná ufundi. Ndirigoti anji kpakpanga bbo ndiro ni tso si nidhó muradi djo d’e. Nde fø ká ni ka ni njiri ngbaribbai? Njaro ni jiri ni é bblo kʉ ná mwalimu. Ni ka ni zø broshua Fanya Bidii Katika Kusoma na Kufundisha. Yenga ddo kana le adi nji ná njudha nǎ le bbʉ kipindi ni djo ró, ni ka ni nziri dhidhi kiroho nǎ ná le-djo rr nidhó kipindi ndirigoti ke d’ra ni ka ni thɨ thika ná lo ri ni ra nji nari njí. Ri nzá ngani ndrŭ chu ni, ufundi na e ná ke dhé ri ro bblo adi ritsi nji ná ke ndirigoti ngbà djo le ka le li le thí ná ke maddi. (2 Ko. 8:22) Ni ká ka ni njiri ngbǎ njati maendeleo ni e ji ni njí nǎ ná ufundi njidha é kpakpa ni dho ró? Nzɨ d’i ji! Timoteo ká ngʉngʉe bblo chu lotidha ná ke ndirigoti bblo chu longaddidha ná ke bbʉbbʉ? Biblia nzá d’ra fø lo ro ri. Ro bbʉbbʉ dhé, ke ngʉngʉe bblo njínji ná ke, ke rrngʉe nga Paulo dhó shauri dho nari dho.​—2 Ti. 3:10. w22.04 24-25 §8-11

Saba djǒ kʉ ná tsó nǎ zǎ ká kʉ addu? Ringani ko chu nari kʉ, fø zǎ di gódha bbai ndirigoti ri kó di dubu le nzǐ ná zǎ kó bbai, ri tso di simba tso bbai ndirigoti ri d’yø kʉ kumi. Danieli Sura 7 nǎ djo le tilo ná tho kʉ ná zǎ ma di fø i. Ro, Ufunuo dzá buku nǎ le dho ró ji nari kʉ ddikpa tsó nǎ zǎ, ro nga njonjo kʉ ná tho kʉ ná tso nǎ zǎ ri. Fø tso nǎ zǎ nzɨ ddikpa pidhinga dhǒ inga dz’ djolu gble kʉ ná pidhinga dhǒ ri. Yohana pori ki, ri ngʉ pinyo “krʉ kʉ ná bbu ma, krʉ kʉ ná ndrŭ ma, krʉ kʉ ná luga ma ndirigoti krʉ kʉ ná ndrŭ tsɨ ma na djo.” Føri dho, ri nga kʉ ddikpa ngø nǎ kʉ ná guvernema dhé ri. (Ufu. 13:7) Ro, fø tso nǎ zǎ ndrŭ dhó historia tso ngani ná nga djó ro nyopi ndrŭ tsɨ kpari djo ná guvernema dhǒ. (Muh. 8:9) Nja lo kʉ, Biblia nǎ bí ina le adi njínji kumi na le dhǒ na ka tso ka ná ritsi d’e. w22.05 9 §6

Fø lo nǎ ro ká ie ma ka si faida ba? Ya kwanza, si faida ba nari kʉ Armagedoni nǎ ro gø ná birobiro kʉ ná ndrŭ ndirigoti ø dz’ djó si gøni ná nzø. Godhé, Ufunuo sura 20 nǎ kʉ ná lo ridho nari kʉ, Mungu tsoni ndi si checheni ná ndrŭ gaga. (Ufu. 20:11-13) Che chengʉeni ná chi tøni ná “chølo” dhi ndrŭ ndirigoti “nga kʉ chølo” dhi ri ná nzá chungʉe lo Yova djo ná ndrŭ ma na si gaga ndiro ndima di i dz’ djó d’e. (Mdo. 24:15; Yoh. 5:28, 29) Føri na mana ká kʉ che chengʉeni ná ndrŭ krʉ si gaga nja ndima di i dz’ djó cho 1 000 kana d’e? Ri nga kʉ føri. Yova dho ndima njínji nari gʉngʉe ndana ná ndrŭ nzɨ si ga ri. Kpa ka ndima die ngbà paradiso nǎ i dz’ djó, ro kpa dhoeri ndima nzá kaka ndima di ri djó ri.​—Mt. 25:46; 2 Te. 1:9; Ufu. 17:8; 20:15. w22.05 18 §16-17

“Nyodyu dhi chi njí dhi noke,” chulu Yesu li dz’ djó bblo pli kʉ ná tengenezo nja ndi kó ndrŭ tsotso ndima bbʉ tsetse ná madha d’e. (Mt. 24:45) Ni ká adi ni mbu ngbaribbai fø tengenezo dho? Njaro ni adi ni mbu mutume Petro pongʉe Yesu ni njʉnga dhi andiko nǎ ná lo ridho nari bbai. Nzá ko tsue Yova dhó tengenezo na ró, ká njʉ ko ddiddiro krʉ ka ko ée ngbaga? Fø tengenezo chulu Kristo adi rili nari kʉ ko é kodhó lo u ná ritsi krʉ na ndiro ko tøni chi Mungu dho d’e. Ndirigoti ke adi mazoezi bbʉ ko dho nja ko njí kodhó lod’radha dhi njí bblo d’e. Føri kina, ke ko tsotso kó ko “thó ø le ndí” nja ko bbʉ hwè Yova dho d’e. (Efe. 4:24) Yesu adi nyodyu dhi chutsoddadha bbʉ ko dho kpakpalo dhi saa djo. Fø chutsoddadha nǎ faida ko njae Coronavirus tso ngangʉeni ná saa djo nja. Nzá mai, dz’ djó bí kʉ ná ndrŭ chue ndima ká ka ndima njiri ngbǎ ma nari ro, Yesu lieri ko ba wazi kʉ ná chutsoddadha nja ndi b’o ko ronga d’e. w22.07 12 §13-14

Yova jangʉeri Waizraeli dho kpa di longaddi bí ina ndima dhi nzø dho ndi djo. (Kum. 6:6, 7) Fø gø dhi ndrŭ ngʉ adi lo ndima ka ndima ti ndima dhi nzø na ndirigoti ndima kó kpa tsotso kpa ji Yova ndima thí nǎ ro krʉ ná chu ba krʉ ddo ró. Loroji na, Waizraeli bbá kpetsi ngba ka ndi koe ndidzá baba tsotso nyo zʉdha na ndirigoti nyo tso njudha na. Føri goti singba ngba ka ndi koe ndidzá mama tsotso ru nanga rodha na ma, ru dyadha na ma ndirigoti abba njí na ma. Gø dhi ndrŭ ma ngʉ adi njínji ddinga nzø ma na nari dho, kpa ka ndima tielo bbo na mana kʉ ná bí kʉ ná lo djo. Loroji na, kpa ka ndima tielo Yova njie ndima dho ná bblonga djo ndirigoti ngbaribbai ma ke ndima dhó familia tsotso kó nari djo. Njʉ bí kʉ ná ngø nǎ, gø dhi ndrŭ nzɨ adi saa ba dyína ndima di nzø na ri, dhonalo kpa adi ra njí dhi ngana ndirigoti nzø adi ra darasa na. Føri dho gø dhi ndrŭ dho ri adi ngani ndima né ndima dhi nzø na ndima ka ndima tilo ná saa.​—Efe. 5:15, 16. w22.05 28 §10-11

Bbò chenga le nji nari kʉ Mungu dhó sheria gʉ ná lo le nji nari. Njati ddikpa Mukristo njí fø di ná chenga ró, kedho ringani ndi nzinga Yova Mungu tso ndiro ke njí ndi zø ndirigoti kedho ringani ndi rá rid’ra kutaniko nǎ wazee dho. (Zb. 32:5; Yak. 5:14) Wazee dhó njí ká kʉ addu? Yova ddiro dhé kʉ bbonga na nja ndi njí ndrŭ zø krʉ d’e, ná føri ke adi nji le ødha dhi be chulu. Nì mai ri kʉ føro, Yova bbʉ wazee dhó ná njí kʉ, kpa nja chenga nji ná le ká ka ndi má ma kutaniko na inga nzá ma nari Maandiko chulu. (1 Ko. 5:12) Ndiro kpa chu chenga nji ná ke ká ka ndi má ma kutaniko na nari d’e, kpadho ringani ndima ba i logoti: Chenga ká ke njie ndana? Ke ká rue ndi njie ná chenga rú nja ndrŭ ró? Ke ká nji fø chenga bí ina ndirigoti bicha? Føri djolu pli, ke ká leni ndi thí nǎ ro krʉ ndidhó chenga nǎ ro ngbà? Yova nji ke zø nji nari dhǒ ná lo ro ma ká kʉ ddi?​—Mdo. 3:19. w22.06 9 §4

Yesu jangʉeri ndi unakpa dho kpa ne chølo. (Mt. 5:6) Føri na mana kʉ, kpa dho ringani ndima njí chølo, bblo lo ndirigoti tsetse Mungu nyǒ djó ná lo. Nde, ni ká jirie bbʉbbʉlo ndirigoti chølo ngbà? Ko uri u nari kʉ, ni jirie chølo ma, bbʉbbʉlo ma na ngbà. Ni ndrorie kali ma, krʉ kʉ ná chelo ma na ndro. (Zb. 119:128, 163) Kali sha ná ke adi Shetani dyø i dz’ djó pi ndi kʉ ro. (Yoh. 8:44; 12:31) Shetani dhó muradi kana ddikpa ri e ndi sa Mungu ró takatifu kʉ ná dho nanga sa. Shetani adi kali nanga pli kodhi Mungu djo Edeni na ndi tsangʉe nanga djó ro. Ke lingʉeri ndrŭ ddiri nari kʉ Yova kʉ dya, kali dhi ke ndirigoti ke adi bblo ritsi ruru ndrŭ ró. (Mwa. 3:1, 4, 5) Shetani adi rili ndrŭ é che kʉ ná ngaddidha na Yova djo. Njati ndrŭ vʉri nzɨ ndima “ji bbʉbbʉlo” ró, Shetani ka ndi cho kpa kpa njí nga kʉ chø ná lo ma, che kʉ ná lo ma na.​—Ro. 1:25-31. w23.03 2 §3

Kpakpanga ni nji ni bbá nja nyi tso nari kana, nja ri ka ndi di njini nji dhé nidhó ro. Njaro ni ka ni mbu ni nzɨ dho føri tso veni ri inga ni ka ni di fø muradi nja nzá djo ni tso ka ndi si nari bbai. Nde, addui ká ka ndi kó ni tsotso nja ni ve ngatso d’e? Ni tsotso ka ndi kó ná bbo na mana kʉ ná sifa kʉ, Yova ni ji nari. Yova ni ji ná føri kʉ bblo kʉ ná sifa, bblo pli kʉ nari nganga. (Mez. 3:3-6) Yova ni ji bbo nari si rili ni hwini maisha nǎ ni bani na ná kpakpalo tso ró. Bí ina Biblia adi ripo Yova kʉ chi kʉ ná jidha na ndi dho njínji ná ndrŭ dho. Chi kʉ ná jidha na mana kʉ, ke nzɨ bba ndidzá ndrŭ ndi ji nari tso ro ri inga ndi bbá kpa ro bba ri. Ni Mungu nongʉe ndi ró ji na. (Mwa. 1:26) Fø di ná jidha ká ni ka ni dhǒ ngbaribbai? Anga ritso mbai ni po nari na. (1 Te. 5:18) Krʉ ddo ró adi ridhu ni tso, ‘Yova ká dhoe jidha ma dho ngbaribbai?’ Ndirigoti adi mbai po Yova dho sala nǎ ke njie ni dho ná ritsi dho. Afamu nari kʉ Yova nji ni dho ná bblo ritsi ke nji ni dho ndi ji ni ji nari dho. w23.03 12 §17-19

Ro, Yesu dhongʉe jidha ma, bblonga ma na kumi na mbili ngʉe ná fø mitume krʉ dho. Ko ká ba ngbá somo? Bbo na mana kʉ ná lo nga kʉ nja ndrŭ nji ná lo dhé ri, ro ko ká ka ko njini ngbaribbai kpa njí kosa ná saa djo nari maddi. Njati ko lai Mukristo nji ná lo kani ká ko lu ró, ko ka ko dhuri ko tso ɨ: ‘Fø lo ká kani ma lu bbo addudho? Fø lo ká dho ma ka ma thɨ thika ná uzaifu ro maddi? Ro, ma thí ronga vo ná fø le ro ká bani ddikpa kpakpalo ro na maddi? Njati rie nì ma ma kʉ haki na ri ró, ma ká ka ma dhǒ jidha ngbà ndirigoti ma njí fø le zø njí?’ Ko di jidha dhǒ ko kana ró, ko ridho ko kʉ bbʉbbʉ Yesu unakpa. Yesu dhó loroji ngaddi ko dho ná nja lo kʉ ko di kpakpanga nji ko famu ko lai Wakristo. (Mez. 20:5) Bbʉbbʉ dhé, Yesu chungʉe ndrŭ thí nǎ kʉ ná lo chu. Ro, ko nzá ka ko chu fø lo ro ri. Ro, ko djoi ma, ko vei ma na njí thø ka ndi bbʉ ko dho ná lo ró, ringani ko é ngatsovedha na. (Efe. 4:1, 2; 1 Pe. 3:8) Ri ka ndi é sʉsʉ ko dho ko njiri fø njati ko chu lo kpa djo bblo ró. w23.03 30 §14-16

Kodhó lo u lelé kʉ ná matunzo ró, Shetani adi njínji fø chu na ndiro ko bbá chi ko tøni nari tso d’e. Kodhó munganga inga kodhó familia nǎ nga kʉ Yova dzá Dimu ná ndrŭ ka ndima cho ko, ko uri le tsu ju ko ndí na ndiri na ko tani Mungu dhó yadha dho d’e. Inga nja saa na, nja ndrŭ ka ndima cho ko, ndiro ko u nzá tso gbani Biblia nǎ kanuni na ná matunzo d’e. Nzá mai ko ji ko dhedhe ro, ko churi nari kʉ, njati ko dhedhe ma ró Yova nzɨ dhé bba ko dho ndi jidha dhǒ nari tso ro ri. (Ro. 8:37-39) Yova adi ndidzá bbakau ngano nì njati kpa dhedhe inga kpa é shi ma ró. (Lu. 20:37) Ke jiri ndi si b’lo dhedhe ná kpa ki ngʉ shi. (Yob. 14:15) Yova dzingʉe ko bbo kʉ na dzi na ndiro ko “ba . . . nŭnŭ di ná shinga d’e.” (Yoh. 3:16) Ko chu ngbá ngatsi ma Yova ji ko ndirigoti ke ngaddi ko djo nari ngbà. Føri dzá lo dho dhe ko nji ná saa na, ko njínji Yova dho nari tso ko bbae nari rɨngana, ringani ko li ko thí kedhó le isopɨdha ma, nyodyu ma, kpakpanga ma na djo.​—Zb. 41:3. w22.06 18 §16-17

Biblia ripo ɨ: “Yova do le nji nari kʉ nyodyu tso ngani ná nga ndirigoti Bbo pli kʉ takatifu ná ke le chu nari kʉ lo le famu nari.” (Mez. 9:10) Føri dho ko di bbo na mana kʉ ná lonanga vʉ ná saa na, ringani ko “chu Bbo pli kʉ takatifu ná ke dhó” ngaddidha ká kʉ ngbaribbai ma fø lo djo nari. Ko ka ko njiri fø Biblia ma, ri ró dyʉ ndi ná vichapo ma na ko zø nari chulu. Njati ko njiri fø ró, ko si bbʉbbʉ kʉ ná nyodyu ba. (Mez. 2:5-7) Yova ddiro dhé kʉ, bbʉbbʉ kʉ ná nyodyu ka ndi bbʉ ko dho ná ke. (Ro. 16:27) Ká addudho ko ripo bbʉbbʉ kʉ ná nyodyu si Yova dhó ro? Ya kwanza, Yova kʉ ngano ná ke ndirigoti ke chu krʉ kʉ ná lo ndi no ná ritsi djo. (Zb. 104:24) Ya pili, Yova nji ná krʉ kʉ ná ritsi ridho ke kʉ nyodyu dhi ke. (Ro. 11:33) Ya tatu, Yova dhó nyodyu dhi shauri adi faida bbʉ nì njínji ri na ná ndrŭ dho. (Mez. 2:10-12) Njati ko jiri ko é nyodyu na ró, ringani ko u kedzá bbʉbbʉlo ndirigoti ko bbari ri ddá chutso ko dho lonanga ko vʉ nari kana ndirigoti ko nji ná lo kana. w22.10 19 §3-4

Ufunuo sura 12 ridho nari bbai, Shetani ma, ndidhó gó ma na djolu fø lɨ singʉe si, nari dho le bungʉe kpa dz’ djo. Føri lingʉeri “nzadha tso ngani dz’ djo” dhonalo Shetani ngʉe thø na bbo ndirigoti ke ngangʉe ndrŭ nzadha tso. (Ufu. 12:7-12) Fø unabi ká ka ndi kó ko tsotso ngbaribbai? Ndrŭ dhó nyi thika øni nari ka ndi kó ko tsotso ko churi nari kʉ, Yesu ngʉ Pi. Føri dzá, ko nanga kaeni ndrŭ kʉ dya ndirigoti ndrŭ ndro ndima ndro ndima kana ná føri dho nari rɨngana, ringani ko nonga nari kʉ, kpa Biblia nǎ unabi pongʉe ná lo nji. Mungu dhó pidhinga nga pinyodha tso b’lo. (Zb. 37:1) Ddiddi Armagedoni kʉ chøchø nari bbai, dz’ djó lo ra che bbo anzi. (Mk. 13:8; 2 Ti. 3:13) Ko adi mbai po bbo kodhi ra nǎ ji dhi Baba dho, dhonalo ke ko tsotso kó ko famu addudho ma dz’ djó kpakpalo kʉ bbo nari. w22.07 3-4 §7-8

Ko ka ko nziri Yova kó ko lai Wakristo tsotso ndiro kpa ve dhe ndima nji nari ma, chʉ ngaba ná lo ma, vita dhi lo ma, upinzani ma inga nja kpakpalo ma na tso d’e. Ko ka ko nzinga kpakpalo na bani ná ndrŭ tsotsokodha dho bbʉ ndima ná le-djoi ma, le-vei ma na dhi lo dho maddi. Njaro ni chu fø di ná kpakpalo na hwini ná ndrŭ ro chu. Ká addudho ni ka ni ti fø kpa ró dho ro nzá ni nji ná sala nǎ? Ko adi le-djoi dho ringani le dhǒ ná jidha dhǒ ko di rinzi Yova kó kpa tsotso kpa ve mbudha tso ná saa na. Kutaniko dho chutso ddá ná kpa nanga adi jini bbo ko nganzi ndima dhi lo dho ndirigoti fø sala ndima tsotso kó ko nari dho. Mutume Paulo ma chungʉeri ddi nari kʉ, ndidhó lo jiri nja ndrŭ nzinga ndi dho. Ke ndingʉeri: “Aninzinga ma dho maddi ndiro ma si ma tso nanga we ná saa na, po ma ka ma po ná lo si bbʉni ma tso na d’e ndiro ma ti lo ngana do ro hwè dhi lo-i dhi takatifu kʉ ná siri ma d’ra ná saa na d’e.” (Efe. 6:19) Njʉ maddi, ko kana chutso adi ddá ná le-djoi adi njínji kpakpanga na. Ko adi ko ji kpa ngbà nari dhǒ, ko rinzi Yova lé kpadhó njí ronga nari chulu. w22.07 23-24 §14-16

Lɨ dhi ngana ra ná bbasødda adi kaske thó ndima djǒ ronga b’odha dho. Kiroho nǎ maddi ringani kodhó ngaddidha ronga b’oni Shetani tá ko tso ro ná vita ró. Ke njonjo kʉ ná mbudha bbʉ ko djo ndiri sa kodhó ngaddidha d’e. Ddiddi kaske adi sødda djǒ ronga b’o nari bbai, kodhó ngab’odha ka ndi b’o kodhó ngaddidha ronga ndiro ko tøni chi Yova dho d’e. Njati kodhó ngab’odha é zaifu ndirigoti ko di che kʉ ná ngaddidha li ko djǒ na ró, ko ka ko vi theinga dho ko si di nari vi. Akonja Korinto nǎ ngʉe drrdrr ná Wakristo dhó loroji. Kpa vingʉe gadha dhi ngab’odha djo Mungu tsoni nari djo ndima eé udha na nari vi. (1 Ko. 15:12) Paulo ndingʉeri nzá u gadha dhi ngab’odha ná ndrŭ adi ndima ji ná lo dhé ne. (1 Ko. 15:32) Njʉ maddi bí kʉ ná ndrŭ nga e ngab’odha na Mungu tsoni djo ná lo djo ri, ro kpa adi hwè dhé ne. Nì mai ri kʉ føro, ko adi ko thí li Mungu tsoni djo ná lo djo. w22.10 25-26 §8-9

Yova rinzi ni di nganzi ndi tsó. Ni hwini tso ró ná lo ke adi njanja ndirigoti ke pori nari kʉ ndi kʉ tayari nidhó sala rrdha dho. Ke adi hwè ba ndidzá njí dhi ndrŭ di nganzi ndi tsó ró. (Mez. 15:8) Ddiro kʉ nari bbai ni ni mbu ná saa djo ká ni ka ni nzinga ngbá lo djo? Ad’ra ni thí nǎ kʉ ná lo krʉ Yova dho, Eliya njingʉeri nari bbai. (Zb. 62:8) Ad’ra ni nanga d’o ná lo ke dho ndirigoti ngbaribbai ma fø lo rili ni mbu ni nari. Anziri Yova kó ni tsotso ni hwini ni dho njedha bbʉ ná lo tso ró, ndirigoti Yova bbʉ kpakpanga ni dho lotidha dho. Ni ka ni nziri ke bbʉ nyodyu ni dho nja ni tú ni u ná lo nanga nyodyu na d’e. (Lu. 21:14, 15) Njati rie ddikpa lo bʉ ni thí bʉ ri ró, anziri Yova kó ni tsotso ni d’ra fø lo dhidhi kiroho nǎ ná Mukristo dho. Ni ka ni nziri Yova kó fø lo ni ra d’ra dho ná le tsotso ndiro le famu ngbaribbai ma ni ni mbu nari d’e. Anja ngbaribbai ma ke nidhó sala goti ngʉ nari ndirigoti au nja ndrŭ ni tsotso kó nari tso u. Njati ni njiri fø ró ni nzɨ mbu ni ro ddiro kʉ nari bbai ri. w22.08 10 §6

Tesalonike nǎ kutaniko nǎ ø ngʉ Wakristo ná kpa hwingʉeni kpakpa tso o ná upinzani na. Thø na ngʉe ná wapinzani bangʉe Paulo ma, Sila ma na nzá nari djó, kpa mbangʉe “nja le-djoi fø bba ngʉe ná pi bba.” (Mdo. 17:6) Addinga ngbá ngatsi ma fø ø Wakristo ka ndima njie do ndima ra ri utso d’i fø bbagʉ kpetsi kpa leni le ndima ró ná saa na nari djo. Kpa ka ndima bbáe kpakpanga na ndima njínji Yova dho ná ritso bbá, ro Paulo nzá jingʉeri fø lo njini ri. Ke lingʉeri fø ø kutaniko é bblo ndi djonga njani ro. Paulo pongʉeri Tesalonike nǎ Wakristo dho: “Ko cho kodhi djona Timoteo . . . , nja ndi li ni kpakpa ndirigoti ndi pɨ ni iso nidhi udha dzá lo dho d’e, ndiro nzɨ ni kana ddikpa le ma nji kpakpalo do ro ró.” (1 Te. 3:2, 3) Timoteo njangʉe Paulo lingʉe le-djoi kpakpa Listra nǎ nari nja. Yova kongʉe kpa tsotso nari ndi njae ná føri ka ndi lieri Timoteo d’rari kpa dho kpa tsotso ma Yova si ko ddi.​—Mdo. 14:8, 19-22; Ebr. 12:2. w22.08 21 §4

Karne 19 na, Charles Taze Russell ngʉ adi chutso ddá dho ná wanafunzi wa Biblia ngangʉe bbo ndima Biblia nǎ longane nari tso. Kpa ngʉ rine ndima chu bbʉbbʉlo Yesu bbʉngʉe ná fø bbʉdha djo, ndirigoti ngbaribbai ma ringani le nó kedzá dhe nga nari djo. Njʉ ko adi faida ba fø kpa famungʉe ná fø lo nǎ ro. Ká ngbaribbai? Ko famu Yesu dhó bbʉdha na mana ndirigoti ri si nji ko ma, krʉ kʉ ná ndrŭ tsɨ ma na dho ná lo. (1 Yo. 2:1, 2) Føri kina ko ra ri famu nari kʉ, Biblia bbʉ aro kʉ ná ngab’odha nì ngarr Mungu dho ná ndrŭ dho, nja kpa si choro nŭnŭ di ná shinga ba ra na ndirigoti nja bí kʉ ná ndrŭ si ri ba i dz’ djó. Ngbá ngatsi ma Yova jirie ko ndirigoti ngbá ngatsi ma Yesu dhó bbʉdha nǎ ro ko ka ko ba faida nari djo ko di ngaddi ró, ko kana nga adi ngʉ chøchø Yova na. (1 Pe. 3:18) Føri dho chi ngʉ tøni drrdrr ná le-djoi bbai, ko adi nja ndrŭ nzǐ nja ndima si ko njí Ukumbusho Yesu ddingʉeri le di ri nji nari bbai d’e. w23.01 21 §6-7

Yesu ddingʉe lo ndrŭ dho Mungu dhó Pidhinga si bbʉ ndrŭ dho ná ledha djo. Ko adi mbai po le ødha dhi be dho, dhonalo ri adi rili ko kana nga é chøchø Yova ma, Yesu ma na. Nì e udha na Yesu nǎ ná kpa e na ná ngab’odha kʉ ndima si di theinga dho ndirigoti ndima si ndima ró ji ndima jie ná checheni ná ndrŭ ki nja vi. (Yoh. 5:28, 29; Ro. 6:23) Ko nzá njie addu ro maddi ndiro ko ba fø ledha d’e ri, ndirigoti Mungu ma nji Kristo ma na ko dho ná fø lo be ro ma nzá ddi ko ka ko bbʉ ri. (Ro. 5:8, 20, 21) Ro, ko ka ko dhŏ ko po mbai kpa dho fø lo dho nari i ngbà. Ká ngbaribbai? Kodhó ritsi na ko njínji ko kó na Pidhinga dzá njí tsotso nari chulu. Loroji na, ko ka ko di tayari ko kó ngatsotso Yova dho ko madha bbʉ ná nga ko chi ndirigoti ri ronga ko b’o tse ndi tse ro nari chulu. w23.01 26 §3; 28 §5

Mungu dhó Pidhinga nǎ si pinyo ná kpa si bilioni djolu da ná ndrŭ ronga b’o dz’ djolu gble. Yesu bbai, 144 000 kʉ ná fø kpa si kʉ e pikpa ndirigoti bbakuhani. (Ufu. 5:10) Musa dhó sheria tsena bbakuhani dhó bbo na mana ngʉe ná njí ngʉe ndima b’o ndrŭ ronga kimwili nǎ ndirigoti kiroho nǎ ndiro ndrŭ kana nga é chøchø Yova na d’e. Sheria ngʉe “gosi ná saa na si njini ná bblo loroji,” føri dzá lo dho ko ka ko pori gosi ná saa na, Yesu ma, pi ndima si nyo na ná kpa ma na si ndrŭ ronga b’o kimwili nǎ ndirigoti kiroho nǎ ndiro ndima kana nga é chøchø Yova na d’e. (Ebr. 10:1) Ko rib’o ko nja ngbaribbai ma fø pikpa ma, bbakuhani ma na si kʉ loti ndima dhó pidhinga tsena dz’ djó kʉ ná ndrŭ na nari. Ko ka ko uri u nari kʉ gosi ná saa na sie i dz’ djó ná Paradiso nǎ ndrŭ si kʉ ndima dhó lo u ná chutso ddadha ba krʉ.​—Ufu. 21:3, 4. w22.12 11 §11-13

Ko adi nja ndrŭ nzǐ nja ndima si ko ma na Ukumbusho dhi ngana d’e, dho ná ddikpa lo kʉ, ko adi riji Ukumbusho dhi ngana si ná ndrŭ chu bbʉbbʉlo Yova ma, Yesu ma na njingʉe ko krʉ dho ná lo djo. (Yoh. 3:16) Ko e na ná ngab’odha kʉ, Ukumbusho dhi ngana ndrŭ si nja ndirigoti ndrŭ si rr ná lo si ndrŭ ronga cho ndima chulo bbo ndiro ndima ngʉ Yova dzá njí dhi ndrŭ d’e. Ko adi djø dhó udha djø ná ndrŭ ma nzǐ ddi. Ko adi riji fø ndrŭ nonga nari kʉ, Mungu ji ndima godhé. Bí kʉ ná ndrŭ adi sisi ko nzi ndima ró ná føri adi hwè bbʉ ko dho bbo. Ukumbusho dhi ngana ndima si nari na kpa adi Yova dho ndima ngʉ njínji ro ndima ngʉ ba ná hwè ngano. (Zb. 103:1-4) Njati ndrŭ u kodhó evitasio gʉ u inga nzá ma ró, ko adi kpakpanga nji ko nzi nja ndrŭ Ukumbusho dho dhonalo ko churi chu nari kʉ, Yova adi ndi dyu li ndrŭ ro ddiddiro.​—Lu. 15:7; 1 Ti. 2:3, 4. w23.01 20 §1; 22-23 §9-11

Yesu dhe nari njí kuna, ke nzingʉe nga bbo na mana kʉ ná lo djo ndidzá ra nǎ Baba tsó. Ke nzingʉeri Yova b’o ndi unakpa ronga. (Yoh. 17:15, 20) Krʉ ddo ró Yova adi ngaddi ndidzá ndrŭ djo ndirigoti ke adi kpa ronga b’ob’o. Nì mai ri kʉ føro, Yesu chungʉeri chu nari kʉ, ndi unakpa djo shetani ka ndi sie bbo pli kʉ ná kpakpalo bbʉ. Føri goti Yesu chungʉeri nari kʉ, kpadhó lo ka ndi uri Yova kó kpa tsotso ndiro kpa tøni Ibilisi dhó che pli kʉ ná là tso ró d’e. Njʉ Shetani pinyo djo ná i dz’ djó Wakristo adi bani kpakpalo na bí. Ko adi hwini tso ró ná njonjo kʉ ná kpakpalo adi ko thí bʉbʉ ndirigoti ri adi rili ri é kpakpa ko dho ko tøni chi Yova dho. Ro, do ko ka ko njí dho ná lo ro nga kʉ ri, Yova ko ronga b’o nì, ke ko hwini tso ró ná kpakpalo njanja ndirigoti ke kʉ tayari ndi kó ko tsotso. Bbʉbbʉ dhé, Yova adi “nì ndi do nji ná ndrŭ ronga b’ob’o . . . ndiro ndi gø kpa gø d’e.”​—Zb. 33:18-20. w22.08 8 §1-2

Krʉ cho ró Ukumbusho ddo kana, ko adi ko nanga jini ngbà Yesu njingʉe ná fø lo dho nari dhǒ, ko saa ba ko di ngaddi kedhó dhe djo nari chulu. Føri kina ko adi bí kʉ ná ndrŭ li kpakpa ndiro ndima si pekee kʉ ná fø njudha dhi ngana ko ma na d’e. Ndirigoti ko nzɨ adi ribba ddikpa ritsi ma cho ko ronga tso ro ddi Ukumbusho dhi ngana ko si nari ró ri. Ukumbusho nǎ ko adi addudho ma ndrŭ tsɨ dho lo ungʉe le ødha dhi be nari ma, ddikpa ke dhó dhe ká ka ndi lieri krʉ ndrŭ dhó chenga zø njini njí ngbaribbai nari ma na chu. Ko dho le adi divai ma, mukati ma na nǎ mana ká kʉ addu ndirigoti ie ma ká ka ndima nyó ri nari nanga tú. (Lu. 22:19, 20) Ndirigoti ko adi ngaddi dz’ djó si di cho ró nŭnŭ na ndrŭ dhó bblo pli kʉ ná gosi ná saa djo. (Isa. 35:5, 6; 65:17, 21-23) Ri nzá ngani ko di fø bbʉbbʉlo be pá ri. w23.01 20 §2; 21 §4

Ndidhi Ddùna ndi bbʉ le ødha dhi be ndi sa na kodhó chenga d’e nari na, Mungu lingʉeri ko ba choro nŭnŭ di ná shinga. (Mt. 20:28) Mutume Paulo ndingʉeri: “Dhè singʉe ddikpa ke chulu, nari bbai gadha ma si ddikpa ke chulu i. Adamu chulu ndrŭ krʉ adi cheni che, nari bbai Kristo chulu ndrŭ krʉ si ngʉ shi.” (1 Ko. 15:21, 22) Yesu ddingʉeri ndi unakpa dho kpa nziri Mungu dhó Pidhinga si ndirigoti ke ji nari njini i dz’ djo. (Mt. 6:9, 10) Mungu dhó nja kusudi kʉ, ndrŭ di i dz’ djó theinga dho. Ndiro fø lo njini d’e Mungu li ndidhi Ddùna ndi é ndidhó Pidhinga nǎ Pi. Mungu nju 144 000 kʉ ná ndrŭ tso i dz’ djó ro, ndi kpa ma na Yesu ma si ndi ji ná lo nji d’e.​—Ufu. 5:9, 10. w22.12 5 §11-12

Njati kodhi ji ko ji ná le dhe ró ko e njedha na bbo! Ya kwanza ko di ngaddi dhedhe ná fø le dhe nari njí dae ná ddo djo ró, ko nanga gʉ ri adi d’o bbo, njati rie bbo le nzaeni ndi dhe nari njí ri ró. Ro, luti ko adi hwè ki ba njati ko di ngaddi fø le ddie ko dho ná lo ma, le e nji ná lo ma, le e ko li kpakpa ná chu ma, le e nji ndi tá gbo ko na d’e ná lo ma na djo ró. Føri bbai, Yesu dhó dhe ma, kedhó nzadha ma na djo ko di lo zø nari adi njedha bbʉ ko dho. Ukumusho dhi ddo kana ko adi saa ba ndiro ko ddinga ke bbʉngʉe ná le ødha dhi be dhi bbʉdha djo d’e. (1 Ko. 11:24, 25) Nì mai ri kʉ føro, ko adi hwè ba bbo njati ko di ngaddi go ke ngʉe dz’ djó ro ke pongʉe ndirigoti ke njingʉe ná lo ma na djo ró. Føri kina njʉ ke adi nji ná lo ma gosi ná saa na ke si nji ná lo ma na djo ko di ngaddi nari adi ko li kpakpa. w23.01 26 §1-2

Yesu dhe nari goti wanafunzi ngʉe njedha na bbo. Kpa nzá vingʉe ndima dhó bbo ndima ji ná kau dhé ri, ro føri kina kpa ngʉ ndima mbu vivi ndima dhó ngab’odha nari bbai. (Lu. 24:17-21) Nì mai ri kʉ føro, b’lo ke ga nari goti ke kongʉe kpa tsotso kpa famu ngbaribbai ma Biblia nǎ unabi ka ndi njieni ndi chulu nari d’e. Føri kina, ke bbʉngʉe bbo na mana kʉ ná njí kpa dhona. (Lu. 24:26, 27, 45-48) Ra na Yesu ngʉ dji ná saa djo, wanafunzi ngʉe na ná njedha ngʉe b’lo ndi ngʉ bbò hwè ro. Kpa chungʉeri ndima dhi Bboke kʉ shi ndirigoti ke kʉ tayari ndi kó ndima tsotso ndima dhó ke bbʉ ná njí kana nari dho kpa na hwè lingʉe li. Fø hwè lingʉeri kpa bbʉ madha Yova dho nzá ndima d’i ndi nanga ro. (Lu. 24:52, 53; Mdo. 5:42) Ndiro ko dyø Yesu unakpa d’e ringani ko li Mungu dhó Pidhinga anziro kodhó maisha nǎ. Nì mai ri kʉ føro, kodhó lo ngatsovedha u ndiro ko rá anzi Yova dho ko njínji nari na dhonalo ke tsoni nari kʉ ndi si ko kobe bbʉ bbo njati ko njiri fø ró.​—Mez.10:22. w23.01 30-31 §15-16

Bbʉbbʉ dhé, ko nzá jiri ko njí Adamu ma, Eve ma na njingʉe ná fø kosa ri. Ko ka ko nyi fø chelo tso njati ko rá anzi Yova djo ko lochu nari na, ko nanga di jini kedhó sifa dho ndirigoti ko di kpakpanga nji ko famu kedhó ngaddidha ró. Njati ko njiri fø ró, ko si Yova ji bbo. Addinga Abrahamu djo. Ke jingʉe Yova bbo. Abrahamu ro nzá tsangʉe Yova ro ri, nzá mai ke famungʉe Yova vʉ nanga ná lo ro. Føri rɨngana ke njingʉe kpakpanga ndi chú Yova bblo. Loroji na, Abrahamu rrngʉeri Yova vʉri ndi sa Sodoma ma, Gomora ma na ná saa na, ya kwanza ke ngʉe do na, “dz’ lu djo adi lod’i ná ke” ká ka ndi sa chølo dhi ndrŭ ma, chelo dhi ndrŭ ma na ddinga nari djo. Abrahamu njangʉe fø lo nzá ka ndi njini ri, føri dho nyenyenga na ke dhungʉe njonjo kʉ ná ngadhudha Yova tsó. Yova ngʉngʉe kedhó logoti nì ndi ngatsove ro. Mwisho djó Abrahamu rangʉe ri utso d’i nari kʉ, Yova adi krʉ kʉ ná ndrŭ thí nǎ kʉ ná lo nja ndirigoti ke nzá ka ndi bbʉ malipizi ro kosa nji ná ndrŭ ma, nzá nji kosa ná ndrŭ ma na dho ddinga ri.​—Mwa. 18:20-32. w22.08 28 §9-10

Cho 455 na Y.G.N., Guvernere Nehemia chingʉe Yerusalemu ró ukuta nari goti, ke nengʉe ngbà djo le ka le li le thí ná kpetsi kpa nja ndima b’o fø bba ronga d’e. Fø bba ronga ka ndi b’o ná fø kpa djó bbonga Nehemia vʉngʉe Hanania. Biblia pori Hanania ngʉe nì ngʉ “adi Mungu do nji ndirigoti ngbà djo le ka le lie le thí ná ke nja bí kʉ ná ndrŭ djolu.” (Neh. 7:2) Yova ndi ji ndirigoti ke dho ndi njedha bbʉ nari do dho Hanania ngʉ adi ndi dhona le bbʉ ná njí nji krʉ kpakpanga na. Fø sifa ka ndi kó ko tsotso maddi nja ndrŭ li ndima thí li ko djo Mungu dzá njí kana d’e. Anja mutume Paulo lai li djo le ka le li le thí ná ke Tikiko dhó loroji, Paulo ngʉ adi ndi thí lili ke djo ndirigoti ke pongʉeri Tikiko kʉ, “chi tøni ná njí dhi ke.” (Efe. 6:21, 22) Paulo nzɨ ngʉ adi ndi thí li ke djo nja ke rá barua dhé mba Efeso nǎ ndirigoti Kolosai nǎ kʉ ná le-djoi dho ri, ro ke ngʉ adi ndi thí li ke djo dhonalo ke ngʉ adi fø le-djoi li kpakpa ndirigoti ke ngʉ adi kpa iso pɨpɨ. Tikiko dhó loroji adi njʉ ko ronga b’o kiroho nǎ chi ndima tøni ro ná kpetsi kpa dhó longa no ko dho.​—Kol. 4:7-9. w22.09 9-10 §5-6

Yosefu bangʉeni kpakpalo na cho 13 kana. Yosefu ka ndi ddieri Yova nzá ji ndi ro ri. Ndirigoti ke ka ndi ddieri Yova bba ndi bba ndi tsotsokodha ndidhó lo ungʉe ná saa na. Ro, Yosefu nzá lingʉe lo ro ndi thí na ri. Fø nga rɨngana, ke b’ongʉe ndidhó akili ronga ko ndi jotso ko ro. Luti ke njungʉe ndi djoi na ná saa na, ke nzá njingʉe chelo ro kpa ró ri, ke dhongʉe jidha kpa dho ndirigoti ke njingʉe kpa zø nji. (Mwa. 45:4, 5) Yosefu njingʉeri fø dhonalo ke ngʉ lonanga ddi bblo. Ke nzá lingʉe ndi thí ndi bani na ná kpakpalo djo ri, ro ke lingʉe ndi thí Yova ji ná lo djo. (Mwa. 50:19-21) Nde, ko ká ba ngbá somo? Njati ndrŭ njí chelo ni ró ro, nzɨ bbari ni nanga kani Yova djo inga nzɨ ddiri nari kʉ Yova bba ni bba. Fønga rɨngana addinga ngbaribbai ma ke ni tsotso kó ni ve fø lo tso nari djo. Føri kina, nja ndrŭ njí chelo ni ró ná saa na, amburi ni tsi kpadhó chelo djó nga tso jidha na. w22.11 21 §4

Nabi Danieli njangʉe ná maono nǎ, ke njangʉe Yova bbo pli kʉ bbonga na ná ke, krʉ kʉ bbobbonga na ná kpa djolu. Ya kwanza Danieli njangʉe bbobbo tho kʉ ná zǎ, føri ngʉ drrdrr nyongʉe pi dz’ djolu gble ná pidhinga dhǒ i ddo ró pinyo ná pidhinga ma na, føri kʉ Babiloni ma, Umedi na Uajemi ma, Ugiriki ma, Roma ma na ndirigoti i ddo ró pinyo ná Anglo-Américaine ma na. (Da. 7:1-3, 17) Ndirigoti Danieli njangʉe Yova Mungu ndidhó ra nǎ Pi dhi kiti djó ndi di ro. (Da. 7:9, 10) Mungu dzi pidhinga krʉ ndrŭ dhó ro ndirigoti ke bbʉ ri, ri ndi ka ndi bbʉ dho ná kpa dho ndirigoti bbo kʉ kpakpanga na ná kpa dho. Føri ká kʉ ie ma? Føri “kʉ ndrŭ ddù bbai di ná ke,” Yesu Kristo ndirigoti “Bbo pli kʉ bbonga na ná kedzá watakatifu kʉ ná kpa,” 144 000 Yesu ma na ndima si pinyo “theinga dho ro.” (Da. 7:13, 14, 18) Bbʉbbʉ dhé, Yova kʉ “Bbo pli kʉ bbonga na ná ke.” Danieli njangʉe maono nǎ ná lo ma tso njunju anziro ke pongʉe ná ddikpa lo na. Danieli pongʉeri “Ra nǎ Mungu tu pikpa, ndirigoti ke li pikpa.”​—Da. 2:19-21. w22.10 14-15 §9-11