ETERNET djó kʉ ná Watchtower LIBRARY
Dzamu dhi Munara
ETERNET DJÓ KɄ NÁ LIBRARY
Baledha
  • BIBLIA
  • VICHAPO
  • NJUDHA
  • es24 paje 37-47
  • Bi 4

I sehema nǎ, tayari kʉ ná video ro nga

Dzodzo dhé, video ni telesharje ro ddikpa kosa banga.

  • Bi 4
  • Ddo ró le zø ná Andiko—2024
  • Rere lo djǒ
  • Wanzia dyi, Bi 4 ddo 1
  • Ronji dyi, Bi 4 ddo 2
  • Gbonji dyi, Bi 4 ddo 3
  • Thonji dyi, Bi 4 ddo 4
  • Mbʉnji dyi, Bi 4 ddo 5
  • Zanji dyi, Bi 4 ddo 6
  • Yenga dyi, Bi 4 ddo 7
  • Wanzia dyi, Bi 4 ddo 8
  • Ronji dyi, Bi 4 ddo 9
  • Gbonji dyi, Bi 4 ddo 10
  • Thonji dyi, Bi 4 ddo 11
  • Mbʉnji dyi, Bi 4 ddo 12
  • Zanji dyi, Bi 4 ddo 13
  • Yenga dyi, Bi 4 ddo 14
  • Wanzia dyi, Bi 4 ddo 15
  • Ronji dyi, Bi 4 ddo 16
  • Gbonji dyi, Bi 4 ddo 17
  • Thonji dyi, Bi 4 ddo 18
  • Mbʉnji dyi, Bi 4 ddo 19
  • Zanji dyi, Bi 4 ddo 20
  • Yenga dyi, Bi 4 ddo 21
  • Wanzia dyi, Bi 4 ddo 22
  • Ronji dyi, Bi 4 ddo 23
  • Gbonji dyi, Bi 4 ddo 24
  • Thonji dyi, Bi 4 ddo 25
  • Mbʉnji dyi, Bi 4 ddo 26
  • Zanji dyi, Bi 4 ddo 27
  • Yenga dyi, Bi 4 ddo 28
  • Wanzia dyi, Bi 4 ddo 29
  • Ronji dyi, Bi 4 ddo 30
Ddo ró le zø ná Andiko—2024
es24 paje 37-47

Bi 4

Wanzia dyi, Bi 4 ddo 1

[Njati] nidhi udha tøni mbudha tso ró ró, føri ngatsovedha bbʉ ni dho.​—Yak. 1:3.

Adhuri ni tsó: ‘Shauri le bbʉ ma dho nari ká ma adi nja ngbǎ? Ma ká adi madhó kosa tso u nì inga ma ká adi riji ma soni so madhó kosa djó? Ma ká adi lod’i nja ndrŭ djo? Biblia nǎ ro ni chi tøngʉeni ná kpetsi kpa ma, isɨ ndrŭ ma na dhó loroji zø ná saa na, anja ngbaribbai ma fø kpa hwingʉeni fø di ná lo na nari. Fø lo krʉ kana adhuri ni tsó: ‘Ma ká ka ma njiri ngbǎ nja ma é Yova dzá fø chi tøngʉeni ná ndrŭ bbai d’e?’ Ko ka ko ba faida ko lai Wakristo dhó loroji nǎ ro maddi, kpa e ngó ma inga jadda ma ró. Loroji na, ni ká ka ni ddinga nidhó kutaniko nǎ chi tøni kpakpalo kana ná le djo ddi? Njaro le hwini chelo dho ndrŭ ndi cho nari tso ró, familia dhó upinzani tso ró, inga ledhó afya nga kʉ bblo ri nari tso ró. Ni ká fø le dhó ni ka ni dyø ná bblo sifa ro nja ddi? Fø ke inga fø le dhó loroji ni nja nari ka ndi kó ni tsotso ni chu ngbaribbai ma ni ka ni hwini ni bani na ná kpakpalo tso ró nari. Chi tøni ná fø le-djoi ma, le-vei ma na dhó loroji ko nja nari adi hwè bbʉ bbo ko dho!​—Ebr. 13:7. w22.04 13 §13-14

Ronji dyi, Bi 4 ddo 2

Bbʉ lé ritsi bbʉ nari dzá hwè dada ritsi le ba nari djolu.​—Mdo. 20:35.

Ko bani kpakpalo na kodhó maisha na ná saa na, ko nanga adi jini bbo njati ddikpa muzee ba saa ndi rr ko ndirigoti ndi li ko kpakpa ró. Kodhó lo jiri le kó ko tsotso Biblia nǎ lo nga ko ddi ndrŭ dho nari kana ró, ko nanga adi jini bbo uzoefu na kʉ ná painia kó ko tsotso ndirigoti ke d’ra ko ka ko nji ná lo ná saa na. Fø le-djoi ma, le-vei ma na krʉ e hwè na bbo nja ndima kó ko tsotso d’e. Ko maddi ko ka ko ba hwè njati ko di ko bbʉ ko djoi tsotsokodha dho ró. Njati ni jiri ni ndri nidhó njí nanga fø chu nǎ inga nja chu nǎ ró, ká addu ka ndi kó ni tsotso ndiro ni njiri fø d’e? Nzɨ li nzá ka ndi njini ni dho ná muradi ni nji. Loroji na, ni ka ni ddiri, ‘Ma ka ma jieri ma njinjí bbo kutaniko nǎ.’ Ro, njaro fø muradi ni nji nari ka ndi rá si ni dho kpakpa. Føri dho avʉ nì kʉ wazi ná muradi ndirigoti ngbà ni ka ni njí nari. Ni ka ni ndi fø muradi ndi maddi ndirigoti ni kpe ngbaribbai ma ni tso ka ni si ri djo nari. w22.04 25 §12-13

Gbonji dyi, Bi 4 ddo 3

Nidho ringani ni ji ni lai ndrŭ ni nganga bbai.​—Yak. 2:8.

Njʉ Yova “birobiro kʉ ná ndrŭ” tso gbá ndirigoti ke longaddi fø ndrŭ dho nja ndima si di fø Pidhinga tsena d’e. (Ufu. 7:9, 10) Ngbà mai i dz’ djó bí kʉ ná ndrŭ nanga ndoni ndó li ma, ndro ma na djotsina ro, Mungu nju tso ná fø ndrŭ adi kpakpanga nji, nja ndima pʉ ndro ndima kana ro d’e. Kpa nji ná lo chulu kpa adi ridho ndima ndima dhó sà ngʉ djø (jembe). (Mik. 4:3) Vita na ndima tsue ndima nari rɨngana kpa adi ndrŭ tsotso kó ndima ba “bbʉbbʉ shinga,” bbʉbbʉ Mungu ma, kedhó kusudi ma na djo ndima loddi ndrŭ dho nari na. (1 Ti. 6:19) Kpadhó familia nǎ ndrŭ ka ndima leni kpa ro inga kpa ka ndima vi ndima dhó mbø, Mungu dhó Pidhinga tsotso ndima kó nari djotsina, ro Yova adi rili kpa ba ndima dhó lo u na ritsi i ba. (Mt. 6:25, 30-33; Lu. 18:29, 30) Fø lo adi rili ko uri nari kʉ, Mungu dhó Pidhinga kʉ nì kʉ ná ritsi ndirigoti ri si kʉ ra anzi Mungu dhó kusudi ndi nji nari na. w22.12 5 §13

Thonji dyi, Bi 4 ddo 4

Amina! Asi, Bboke Yesu.​—Ufu. 22:20.

Cho 1 000 tso dyani nari goti, dz’ djó ndrŭ krʉ si ngʉ kaka ná ndrŭ. Ddikpa le ro ma nga ddi sie Adamu ró ro ko bangʉe ná chenga dhi matokeo na ri. (Ro. 5:12) Adamu dhó chenga nǎ ro ko ba ná wá (laana) krʉ tso si d’ød’ø. Føri dzá lo dho, dz’ djó ndrŭ si “ngʉ shi” føri na mana kʉ, kpa krʉ si ngʉ kaka ná ndrŭ cho 1 000 goti. (Ufu. 20:5) Ko chu nari kʉ, Yesu tøngʉeni chi Mungu dho Shetani ngʉ ndi mbu ná saa na. Ro, ya mwisho Shetani si bbʉ ná mbudha tso ró ká kaka ná ndrŭ krʉ si tøni chi nì Yova dho Yesu bbai? Nja le ddiro si ndi ká tøni chi nì Yova dho Shetani le klo abiso nǎ ro cho 1 000 goti ná saa na ná ridho ndi ndiro. (Ufu. 20:7) Chi si tøni ya mwisho mbudha tso ró, ná ndrŭ si nŭnŭ di ná shinga ba ndirigoti kpa si kloni klo no tsena ro. (Ro. 8:21) Shetani ma, ndi una gó ma ndirigoti tsatsa ná ndrŭ ma na krʉ si sadha ba theinga dho.​—Ufu. 20:8-10. w22.05 19 §18-19

Mbʉnji dyi, Bi 4 ddo 5

Ni si ke kó “djuti” bbɨ.​—Mwa. 3:15.

Fø unabi njingʉeni Shetani chongʉe Wayaudi ma, Waroma ma na kpa hwi Mungu Ddù ná saa na. (Lu. 23:13, 20-24) Ddiddi ddikpa ke kó djuti ronga vóvo ró, ri nzá ka ndi ka ke dho ke bbí ddikpa saa na ri nari bbai, Yesu dhó dhe lingʉeri nzɨ ke njinjí kabbuli nǎ ke ngʉe ná saa na. (Mt. 16:21) Mwanzo 3:15 nǎ kʉ ná unabi ridho nari kʉ, Yesu nzá ka ndi mae kabbuli na ri. Ká nzá addudho? Dhonalo unabi dhongʉeri, isɨle nǎ gø ka ndi sie su djǒ nanga d’rid’ri. Fø lo ridho, Yesu ka ndi gae ga. Ndirigoti bbʉbbʉ dhé ri njingʉeni fø! Yesu dhe nari goti ddo gbo djó, ke gangʉe nzá ki ka ndi dhedhe ná shinga na. Mungu vʉ ná saa na, Yesu si Shetani sasa. (Ebr. 2:14) Yesu ma, ke ma si pinyo na ná kpa ma na si Mungu dhó mbubai sasa, føri i kʉ su nǎ gø.​—Ufu. 17:14; 20:4, 10 w22.07 16 §11-12

Zanji dyi, Bi 4 ddo 6

Nyodyu dhi ke na bbi ná ke si ngʉ nyodyu.​—Mez. 13:20.

Gø dhi ndrŭ, aniko nidhi nzø tsotso kpa ba bblo bbakau d’e. Mungu dzá lo ripo nari kʉ kodhó bbakau ka ndima liri kodhó nyi é che inga bblo. Gø dhi ndrŭ, ni ká chu nidhi nzø dhó bbakau ngbà? Ni ká ka ni njiri ngbǎ ndiro nidhi nzø ba kau ngbà ji Yova ná ndrŭ kana d’e? (1 Ko. 15:33) Ni ka ni kó nidhi nzø tsotso nzø ba bblo kʉ ná bbakau, bblo dhó kiroho kʉ ná ndrŭ ni nzǐ ndiro ni njinjí ddinga kpa ma na d’e nari chulu. (Zb. 119:63) Tony ró dho kʉ ná ddikpa dza ba pori: “Cho bí kana, mabbá le ma na, ko ngʉ adi njonjo dhó cho kʉ ná le-djoi ma, le-vei ma na nzǐ ko bba. Ko ngʉ adi nganyo ndirigoti ko ngʉ adi ibada ya familia nji kpa ma na ddinga. Føri kʉ bblo kʉ ná chu ndiro ko chu ngbà ji Yova ndirigoti ni njínji ke dho hwè na ná ndrŭ d’e. . . Kpa chu ná lo ma, kpadhó bidii ma, kpa bbʉ ndima Yova dzá njí dho nari ma na kongʉe kodhi nzø tsotso kpa kana nga ngʉ chøchø Yova na d’e.” w22.05 29-30 §14-15

Yenga dyi, Bi 4 ddo 7

B’lo tso ni chi dz’ djó ná lo sie b’lo ndi tso chini ra nǎ ro.​—Mt. 18:18.

Wazee dho chenga nji ná ke ndi nji ná lo d’ra ná saa djo, kpadhó muradi e ndima nanga vʉ i dz’ djó nari é b’lo nanga vʉni ra nǎ ná lo. Fø lo nǎ ro ká kutaniko adi faida ba ngbaribbai? Chenga nji ná nzá leni ná ke le pʉ kutaniko nǎ ro, ná føri adi kutaniko ronga b’o ndiro nzɨ ke sa chi tøni Yova dho ná ndrŭ dhó nyi ró. (1 Ko. 5:6, 7, 11-13; Tit. 3:10, 11) Ri adi chenga nji ná ke tsotso ma kó ddi, ndi leni le ndirigoti ndi ba faida Yova dhó le zø njidha nǎ ro d’e. (Lu. 5:32) Wazee adi sala nji le leni ná chenga nji ná ke dho ndiro ke ma kana kau ngʉ Yova na d’e. (Yak. 5:15) Addinga i lo djo, ddikpa ke nzá u ndidhó kosa tso wazee na ndima loti ná saa djo ri. Rie fø ró ke le ka le pʉpʉ kutaniko nǎ ro. Nì mai ri kʉ føro, njati luti fø ke ra ri famu nari kʉ, ndi njie chelo ndirigoti ke leni le ndi njie ná chenga nǎ ro ndi thí nǎ ro krʉ ró, Yova kʉ tayari ndi njí ke zø. (Lu. 15:17-24) Føri kʉ bbʉbbʉlo njati ke nji ná rie bbo chenga ma ró.​—2 Ny. 33:9, 12, 13; 1 Ti. 1:15. w22.06 9 §5-6

Wanzia dyi, Bi 4 ddo 8

Anib’o nidhó ngaddidha ronga, anidi kere! Nidhó mbuba Ibilisi bbi ddʉddʉ ná simba bbai ndi a ná le ndi ne ro.​—1 Pe. 5:8.

Yova dhó le tsotsokodha chulu, dz’ djolu gble kʉ ná Wakristo adi sisi njonjo kʉ ná kpakpalo djolu ndirigoti Shetani dhó ro si ná upinzani djolu. (1 Pe. 5:9) Ni dho ma føri ka ndi ka ddi. Karrnga goti Yova si rusha bbʉ Yesu ma dho, pi ke ma si nyo na ná kpa ma na ndiro kpa “sa Ibilisi dhó njí d’e.” (1 Yo. 3:8) Føri goti Mungu dho njínji dz’ djó ná ndrŭ nzɨ si “do ro nji ri ndirigoti do ta kpa na ná ritsi ro ma nga ddi sie ri.” (Isa. 54:14; Mik. 4:4) Føri dho, kpadjo nga djó ro ringani ko njí kpakpanga ndiro ko si do djolu d’e. Ringani ko li kodhó udha kpakpa Yova ji ndidzá njí dhi kpa ji ndirigoti ke adi kpa ronga b’ob’o nari djo. Ndiro ko njiri fø d’e, si ko tsotso ko nari kʉ, ngbaribbai ma Yova b’ongʉe ndidzá ndrŭ ronga anziro nari djo ko ngaddi ndirigoti ko loti ri djo nari. Ndirigoti ko ka ko ddinga ke koe ko tsotso anziro ko hwini ko baeni na ná kpakpalo na nari djo maddi. Yova dhó le tsotsokodha chulu ko ka ko sisi do djolu!​—Zb. 34:4. w22.06 19 §19-20

Ronji dyi, Bi 4 ddo 9

Ri ti sanamu kó chuma ma, nzz ma na na le thɨ ná ri.​—Da. 2:34.

Dz’ djolu gble pinyo ná pidhinga le dhongʉe “chuma ndirigoti nzz na teni ná le kó” na, ná fø lo kʉ b’lo ndi njini ro. Fø pidhinga njangʉeni ya kwanza dangʉe Dz’ djolu gble ná lɨ nǎ, Britanique ma, Amérique ma na gbangʉe ndima tso ddi ná saa na. Nebukadneza nyo nyongʉe djo ná sanamu dhongʉe dz’ djolu gble pinyo ná pidhinga djo ná lo d’ra anziro ngʉe ná pidhinga ma kana njonjonga. Maono nǎ le dhoe anziro ná dz’ djolu gble pinyo ná pidhinga ngʉe kpakpa kʉ ná chuma bbai inga kuivre bbai. Ro, Anglo-Américaine nga kʉ kpakpa ri, dhonalo ri le ddie teteni nzz na ná chuma na. Nzz dhǒ nari kʉ, “ndrŭ nǎ gø” inga ndrŭ. (Da. 2:43, maelezo ya chini) Njʉ ko ka ko njari pʉlʉpʉlʉ nari kʉ, ndrŭ ndima tso tsú vote dhi lo na ma, ndrŭ dhó haki ne ná kikundi na ma, birobiro kʉ ná ndrŭ ndima nanga kani nari dhǒ na ná kikundi na ma ndirigoti njí djonga nja ná kpa nji ná lo na ma, nari adi rili dz’ djolu gble pinyo ná pidhinga dho chutso ddá ná kpa dho rié kpakpa ndima njí ndima ji ná lo. w22.07 4-5 §9-10

Gbonji dyi, Bi 4 ddo 10

Madhó nyo kʉ ma njí cho chongʉe ma ná ke ji ná lo.​—Yoh. 4:34.

Ni nanga ká adi rɨni rɨ batiso ni ba nari dho? Adhu i lo ni tso nja ni chu ni tsotso ka ndi kó ná lo d’e, ‘Ma ronga tso ká addu adi cho?’ (Mdo. 8:36) Yesu ddingʉe ndidzá Baba ji ná lo le nji nari nyo na. Ká addudho? Dhonalo nyo e bblo ko krʉ dho. Yesu chungʉeri nari kʉ, Yova adi nzǐ ko tso ná lo krʉ e kodhi bblonga dho. Yova nzɨ adi rinzi ko njí che ka ndi njí ko ná lo ro ri. Yova ká jiri ni ba batiso maddi? Ddio. (Mdo. 2:38) Ni ka ni uri u nari kʉ, batiso badha dhi yadha dho ni ngarr nari nǎ ro ni si faida ba. Njati rie nzɨ ni nanga adi rɨni bblo pli kʉ ná nyo ni nyo nari dho ri ró, batiso ni ba nari dho ká ni nanga adi rɨni addudho? Nja ndrŭ ronga tso ká addu adi cho batiso ndima ba nari ró? Bí kʉ ná ndrŭ ka ndima ngʉ fø logoti, “ma nga kʉ tayari ri.” Bbʉbbʉ dhé, Yova dho ni ni bbʉ ndirigoti batiso ni vʉ ni ba ná føri kʉ ddikpa bbo na mana kʉ ná longavʉdha. Føri dzá lo dho ni dho ringani ni ddinga fø lo djo li ni li ni dyu ro ndirigoti ri ka ndi dzi saa ma, kpakpanga ma na ndiro ni é tayari d’e. w23.03 7 §18-20

Thonji dyi, Bi 4 ddo 11

Ri pori, “ndirigoti ni nǎ gø dho,” føri na le ddikpa ke po, føri i kʉ Kristo.​—Gal. 3:16.

Yesu le d’ringʉe ché na ná saa na, ke ngʉngʉe isɨle nǎ gø dzá sehemu ya kwanza. Yesu dhe ndirigoti ke ga nari goti, Mungu thongʉe “kadha ma, madha ma na dhi taji” ke djǒ ro, ndirigoti ke bbʉngʉe ke dho “krʉ kʉ ná bbonga . . . ra nǎ ndirigoti dz’ djo,” føri dho ke sí “Ibilisi dhó njí sasa.” (Ebr. 2:7; Mt. 28:18; 1 Yo. 3:8) Ro, Yesu kina, nja kʉ ná kpa ka ndima sie di isɨle nǎ gø dzá sehemu ya pili. Mutume Paulo tingʉe lo fø gø djo, ché na le d’ri ná Wayaudi ma, nga kʉ Wayaudi ná ndrŭ ma na dho ndi pongʉeri ɨ ná saa na: “Njati rie Yesu dzá ke ni kʉ ri ró, ni kʉ Abrahamu nǎ gø nganga, ni si Mungu tsoni djo ná wɨ ba.” (Gal. 3:28, 29) Njati Yova d’ri ddikpa ke ché na roho takatifu chulu ró, ke adi ngʉ isɨle nǎ gø dzá sehemu ya pili. Føri dho isɨle nǎ gø kʉ Yesu Kristo ma, ke ma si pinyo na ná 144 000 kʉ ná kpa ma na. (Ufu. 14:1) Fø kpa krʉ adi kpakpanga nji ndima dyø ndima dhi Baba Yova Mungu. w22.07 16 §8-9

Mbʉnji dyi, Bi 4 ddo 12

Ma ndro madzá shinga ndro ndirigoti ma nzá jiri ma ki di shi ri.​—Yob. 7:16.

Ko ka ko ba kpakpalo ngbà nga tso d’ø ná i saa na. (2 Ti. 3:1) Fø saa na, ko thí ka ndi ba njedha bbo ndirigoti ko thí ka ndi bʉni bʉ, bbori rie i kpakpalo goti ko chá kpakpalo ba inga ko bí kʉ ná kpakpalo kpari ba ddikpa saa na ri ró. Rie føri bbai ma ri kʉ ri ró, anonga nari kʉ, Yova adi ko ronga b’o nì ndirigoti ko ka ko uri u nari kʉ, kedhó le tsotsokodha chulu ko ka ko ve krʉ kʉ ná kpakpalo tso ve. Akonja ngbaribbai ma Yova kongʉe chi ngʉ tøni ná kpetsi ke Yobu tsotso nari. Sese kʉ ná wakati kana ke bangʉe vodha ka ndi bbʉ ndi dho ná bí kʉ ná kpakpalo. Yobu dho ndrŭ singʉe rid’ra nari kʉ, kedhó zǎ (miya) ndrŭ d’u krʉ ndirigoti nja ri cheni che ndirigoti kedzá njí dhi kpa ma, kedzá nzø ma na krʉ cheni che. Fø lo krʉ njingʉeni ddikpa cha. (Yob. 1:13-19) Føri goti tsé, go ke hwini fø bbo pli kʉ ná vodha na ná saa na, Yobu che bbo kʉ ná dhe løngʉe ndirigoti nzá dho le ka le chue ke nyi maddi ná dhe. (Yob. 2:7) Yova ngʉ Yobu ronga b’o nì dhé. Yova jingʉe Yobu ji nari dho, ke kongʉe ke tsotso ke si fø kpakpalo djolu ndirigoti ke tøni chi d’e. w22.08 11 §8-10

Zanji dyi, Bi 4 ddo 13

Yova adi malipizi bbʉ ji ndi ji ná ndrŭ dho.​—Ebr. 12:6.

Nizamu ko ba ná saa na ri ka ndi bbʉ njedha ko thí dho. Ro, njati ko di ko thí li njedha ri bbʉ ko thí dho nari djo dhé ró, ko ka ko di riddi nari kʉ, ko dho nzá le bbʉ nizamu bblo kʉ ná chu nǎ ri ndirigoti ko nzá ka ko njinjí ri na ri. Føri ka ndi cho ko tso nzɨ ko famu bbo na mana kʉ ná lo, nari kʉ Yova nizamu bbʉ ko dho ndi ji ko ji nari dho nari. (Ebr. 12:5, 11) Føri dzá au nizamu ndirigoti ale nidhó lo thika. Ddikpa saa na, Yesu ongʉe Petro na nja mitume nyǒ njí. (Mk. 8:33; Lu. 22:31-34) Føri dho ke ka ndi mbue ndi che! Ro, Petro tøngʉeni chi dhé Yesu dho. Ke ungʉe Yesu bbʉngʉe ná nizamu u ndirigoti ke bangʉe somo ndidhó kosa nǎ ro. Føri dho Yova lengʉe Petro tøngʉeni chi nari ronga le ndirigoti Yova bbʉngʉe bbo na mana kʉ ná njí ke dhona kutaniko nǎ. (Yoh. 21:15-17; Mdo. 10:24-33; 1 Pe. 1:1) Njati ko di ko thí li ko na le o nari dho ko ko mbu che nari djo nzá, ro ko u ko na le o nari ndirigoti ko le kodhó lo thika ró ko adi faida ba. Njati ko njiri fø ró, Yova ma, ko djoi ma na ka ndima nja ko mana na. w22.11 21-22 §6-7

Yenga dyi, Bi 4 ddo 14

Ara [Isaka] bbʉ fø lu bɨ le bɨ ná bbʉdha.​—Mwa. 22:2.

Abrahamu chungʉeri chu nari kʉ, Yova nzá ka ndi njí nga kʉ chø inga nga nǎ jidha kʉ ná lo ro ri. Mutume Paulo pongʉeri nari bbai, Abrahamu ddingʉeri nari kʉ, Yova kaka ndi gá ndidzá bbo ndi jingʉe ná ngba Isaka. (Ebr. 11:17-19) Føri goti, Yova tsongʉeni nari kʉ, Isaka si ngʉ ndrŭ tsɨ dzá baba, ro fø saa na, Isaka dzá nga ngʉe nzø ro ri. Abrahamu jingʉe Yova ji nari dho ke ungʉeri nari kʉ, ndidzá Baba ka ndi njí chølo dhé. Nì mai fø lo ngʉe kpakpa ro, udha chongʉe ke ndi rrnga. (Mwa. 22:1-12) Abrahamu ká ko ka ko dyø ngbaribbai? Ke bbai, ringani ko rá anzi Yova djo ko lochu nari na. Ko njiri fø ró, ko kana nga si ngʉ chøchø ke na ndirigoti ko si ke ji bbo. (Zb. 73:28) Føri ka ndi liri kodhó zamiri vʉ longa Yova jiri nari bbai. (Ebr. 5:14) Føri si liri njati ddikpa ke di ko cho chelo njidha dho ró, ko gʉ fø lo gʉ. Ko si njedha ka ndi bbʉ kodhi ji dhi Baba dho ná lo krʉ ndrondro ndirigoti sa ka ndi sa ko kana kau ke ma na ná ngaddidha ma na. w22.08 28-29 §11-12

Wanzia dyi, Bi 4 ddo 15

Ddikpa ke thí nǎ é ná d’od’o adi rili lo si ke djolu si, ro bblo lo adi rili ke thí ba hwè.​—Mez. 12:25.

Listra ma, Ikoniamu ma, Antiokia ma na nǎ lú ndima ngʉ ro, mutume Paulo ma, Barnaba ma na “lingʉe wazee fø kutaniko krʉ lu.” (Mdo. 14:21-23) Bbʉbbʉ dhé, fø wazee ka ndima ée le isopɨdha kutaniko dho, ddiddi rie njʉ nari bbai. Paulo nongʉe nga ndi lai Wakristo dho nari kʉ, Yova dhó le tsotsokodha chulu “ndundu bbai kʉ ná bbadimu” vengʉe kpakpalo tso ve. (Ebr. 12:1) Paulo chungʉeri chu nari kʉ, kpakpalo krʉ tso vengʉe ná ndrŭ dhó loroji ka ndi bbʉe kpakpanga ndi djoi ma, ndi vei ma na dho ndiro kpa li ndima thí “shi di ná Mungu bbá bbo bba djo” d’e. (Ebr. 12:22) Njʉ maddi ri kʉ føri bbai. Ko krʉ adi kpakpanga ba Yova kongʉe Gideoni ma, Baraka ma, Daudi ma, Samweli ma, ndirigoti nja bí kʉ ná ndrŭ ma na tsotso nari ko zø ná saa djo.​—Ebr. 11:32-35. w22.08 21-22 §5-6

Ronji dyi, Bi 4 ddo 16

Kpa kana nja ke ddiro djo le d’ingʉe lo ndi njingʉe ná lo ró ro.​—Ufu. 20:13.

Ga si ga ná ndrŭ djo ká le si lod’i ngbá “lo” ró ro? Ri ká sie ndima dhó dhe njí kpa njingʉe ná lo ró ro? Nga! Anonga nari kʉ, kpadhó dhe njí kpa njingʉe ná chenga sangʉeni sa. Føri ridho nari kʉ, kpa djo le si lod’i ró ro nari nga kʉ kpadhó dhe njí “kpa” njingʉe ná “lo” ri. Føri rɨngana le si lod’i kpa djo, ø dz’ djó le ddie kpa dho ná lo na ká kpa njie njí ngbà ma inga nzá ma nari ró ro. Chi tøngʉeni ná kpetsi kpa Noa ma, Samweli ma, Daudi ma, Danieli ma na dho maddi ri si ngani le ddi longa vi Yesu djo ndirigoti kpa dhǒ udha le ødha dhi be djo. Njati rie fø kpetsi kpa dho ri si ngani ndima chu lo bbo ri ró, nga kʉ chølo dhi ri ná ndrŭ dho ri si ngani ndima chu lo bbo pli! Nde, fø lo krʉ si be pa ná kpa ká ngbá lo si ba? Ufunuo 20:15 ripo ko dho: “Nzɨ ró dho si bani shinga dhi buku na ná ndrŭ le si bu jʉdda dhi kazz na.” Bbʉbbʉ dhé, kpa krʉ si sadha ba theinga dho. Ri kʉ bbo na mana kʉ ná lo ko njí kpakpanga ko ró dho ndini shinga dhi buku na ndirigoti ri má ma ri na! w22.09 19 §17-19

Gbonji dyi, Bi 4 ddo 17

Anib’o nidhó zamiri ronga tse ndi tse ro Mungu njí ndirigoti ndrŭ njí.​—Mdo. 24:16.

Kodhó afya ma, kodhó matunzo ma na djo ko nanga vʉ ná lo dho ringani ndi dyʉ ndi Biblia nǎ ro ko jifunza ná lo ro. (1 Ti. 3:9) Lonanga ko vʉ ndirigoti ri djo ko loti nja ndrŭ na ná saa na, ringani ko nó Wafilipi 4:5 nǎ kʉ ná i kanuni nga: “Abba nidhó usawaziko chuni krʉ kʉ ná ndrŭ dho.” Njati ko é usawaziko na ró, ko nanga nzá kodhó afya dhi lo ka ndi di d’o nga djolu ri. Ko jirie ko djoi ma, ko vei ma na ji ndirigoti ko adi heshima bbʉ kpadhó lonangavʉdha dho njati rie njonjo ma kodhó ri ró ro ró. (Ro. 14:10-12) Ko adi mbai po Yova dho shinga tø nanga ndi kʉ ro, kodhó shinga ronga ko b’o ndirigoti ko thí nǎ ro krʉ ko njínji ke dho nari chulu. (Ufu. 4:11) Nì mai dhe ko nji ndirigoti ko bani kpakpalo na ro, føri nga ngʉe ko no ná Ke jingʉe ko di nǎ ná maisha ri. Ro, karrnga goti ke si nŭnŭ di ná shinga bbʉ ko dho, fø saa na nga le ronga ndí nari ma, dhe ma na ro sieri. (Ufu. 21:4) Fø ddo ko b’o nari kana, akonji kpakpanga ko di shi ndirigoti ko njinjí kodhi ra nǎ ji dhi Baba Yova dho! w23.02 25 §17-18

Thonji dyi, Bi 4 ddo 18

Nidhó pidhinga nanga le ndondó ndirigoti ri le bbʉ umedi ma, uajemi ma na dho.​—Da. 5:28.

Yova dhori pʉlʉpʉlʉ nari kʉ, ndi kʉ bbo pli kʉ ná bbonga na “bbobbonga na kʉ ná kpa krʉ djo.” (Ro. 13:1) Akonja gbo kʉ ná loroji. Misri nǎ Farao lingʉe Yova dzá ndrŭ no tsena ndirigoti bí ina ke gʉngʉe fø ndrŭ ndi bba nari gʉ. Ro Mungu klongʉe kpa klo ndirigoti ke tingʉe Farao ma tso ndidzá ndrŭ ma na Kaka Jʉdda na. (Kut. 14:26-28; Zb. 136:15) Babiloni nǎ Pi Belshaza njingʉe ddikpa fete ndirigoti ke “mangʉe ndi [ndi ndiro] ra nǎ Bboke njí ndirigoti ke bbʉngʉe madha feza ndirigoti or dhi miungu dho” Yova dho ndi bbʉe madha nari rɨngana. (Da. 5:22, 23) Mungu pangʉe do fø nodha dhi ke djo. “Fø dyi kuna,” Belshaza le hwingʉe hwi ndirigoti kedhó pidhinga le bbʉngʉe Umedi ma, Uajemi nǎ kpa ma na dho. (Da. 5:30, 31) Palestine nǎ Pi Herode Agripa I hwingʉe mutume Yakobo ndirigoti ke sʉngʉe mutume Petro prizo na ndiro ndi hwi ke ma hwi ddi d’e. Ro Yova chongʉe Herode pɨngʉe ná fø lo tso cho. “Mungu dhó malaika b’ingʉe ke b’i,” ndirigoti ke dhengʉe dhe.​—Mdo. 12:1-5, 21-23. w22.10 15 §12

Mbʉnji dyi, Bi 4 ddo 19

Ma si ni rrrr.​—Yer. 29:12.

Ko di lo zø ngbaribbai ma Yova b’ongʉe ndidzá chi ngʉ tøni ná njí dhi kpa ronga anziro nari djo ró, kodhó ngab’odha ka ndi ngʉ kpakpa. Krʉ ndini Biblia nǎ ná lo “ndingʉeni ndi ddi longa ko dho ndiro kodhó ngatsovedha ma, maandiko nǎ ro si ná le isopɨdha ma na chulu ko é ngab’odha na d’e.” (Ro. 15:4) Addinga ngbaribbai ma Yova njingʉe ndi tsoni djo ná lo nari djo. Akonja Abrahamu ma, Sara ma na dho Mungu njingʉe ná lo. Kpa ngʉngʉe ngó nzá ka ndima ba nzø ro ná ngatsi. Nì mai ri kʉ føro, Mungu tsongʉeni kpa dho nari kʉ kpa si ddikpa ngba ba. (Mwa. 18:10) Abrahamu ká njingʉeri ngbǎ? Biblia pori: “Ke ungʉeri u nari kʉ ndi si ngʉ bí kʉ ná ndrŭ tsɨ dhi baba.” (Ro. 4:18) Ngbà mai ndrŭ ka ndima njae fø lo nzá ka ndi njini nari bbai ro Abrahamu ungʉeri u Yova ka ndi njí ndi tsoni djo ná lo njí. Chi tøngʉeni ná fø ke thí ro nzá bʉngʉeni ri. (Ro. 4:19-21) Biblia nǎ fø di ná lo ko zø nari ngaddi ko dho nari kʉ, krʉ ddo ró Yova ka ndi njí ndi tsoni djo ná lo njí. w22.10 27 §13-14

Zanji dyi, Bi 4 ddo 20

Ni si nidhó Bbò mwalimu nja ni nyǒ nganga na.​—Isa. 30:20.

Fø lo njingʉeni nji Wayaudi tungʉeni no tsena ro nari goti. Yova dhongʉe ndi Bbò Mwalimu kpa dho ndirigoti kedhó chutsoddadha chulu ri kangʉe ka kedzá ndrŭ ngʉ tsetse ná ibada ki vi. Ko ronga leni le Yova ra bani kodhó Bbo Mwalimu nari dho. Fø verse nǎ, Isaya dho ko Yova longaddi dho ná wanafunzi bbai. Ri pori: “Ni si kʉ nidhó Bbò Mwalimu nja ni nyǒ nganga na.” Fø loroji nǎ, Isaya pori mwalimu tøni ndidhó wanafunzi njí. Ko dho Yova longaddi ná føri kʉ bbo pli kʉ ná pendeleo ko ba ri. Yova ká adi longaddi ko dho ngbaribbai? Ke adi føri nji ndidhó tengenezo chulu. Ko adi mbai po bbo Yova dhó tengenezo chulu ko ba ná chutsoddadha dho! Kodhó njudha ma, vichapo ma, video ma, ndirigoti bí kʉ ná nja ndrŭ ma na chulu ko ba ná longaddidha adi ko tsotso kó kpakpalo na ko bani ná saa na ndiro ko ve ngatso hwè na d’e. w22.11 10 §8-9

Yenga dyi, Bi 4 ddo 21

Ngasini nari . . . ká ngbá alama si dho?​—Mt. 24:3.

Yesu tingʉe lo Yerusalemu ma, ri nǎ Hekalu ma na ka ndi sie sani nari djo, ro njʉ ko di nǎ ná “ngasini ná i saa ka ndi sie ndidzá mwisho na” nari djo maddi. Siku za mwisho djo ndi loti ro Yesu pongʉeri: “Fø ddo ma, saa ma na ro nzá ie ma chu ddiri ri, ra nǎ malaiká ma, le Ddù ma nzá ddi chu ri ro ri, ro Baba dhé.” Føri goti Yesu jangʉeri ndidhó wanafunzi krʉ dho “anidi kere” ndirigoti “anib’o ni ronga.” (Mk. 13:32-37) Karne ya kwanza nǎ Wayaudi ngʉe ná Wakristo dho ringangʉeni ndima di kere dhonalo fø kpa rinji nari na kpa ka ndima b’oe ndima dhó shinga ronga. Yesu jangʉeri ndi unakpa dho: “Njati ni njari nari kʉ, Yerusalemu ronga tso bbasødda d’ed’e ró anichuri nari kʉ, ri dhó sadha si chøchø.” Fø saa na ringʉ ngani kpa rrnga Yesu jangʉe ná lo dho ndirigoti “ndima nyinga ngøtsɨ djo.” (Lu. 21:20, 21) Ngbà rrngʉe nga kedhó fø lo dho ná ndrŭ gøngʉe gø Waroma singʉe Yerusalemu sa ná saa djo. Njʉ maddi ko ishi che kʉ ná i dz’ dzá mwisho na. Føri dzá lo dho kodho maddi ringani ko di kere ndirigoti ko b’o ko ronga b’o. w23.02 14 §1-2; 16 §3

Wanzia dyi, Bi 4 ddo 22

Yova, bbʉbbʉlo dhi Mungu.​—Zb. 31:5.

Yova adi bbʉbbʉlo ngaddi hwè na ngbà ji ndi ná ndrŭ dho. Fø ndi rinji nari na, ke adi kpa kloklo Shetani dhó kali nǎ ro. Føri kina Yova adi riddi ndidzá njí dhi ndrŭ dho kpa di bbʉbbʉlo po ndirigoti kpa é chø. Føri adi rili ndrŭ bbʉ heshima kpa dho ndirigoti kpa é ngoi na. (Mez. 13:5, 6) Ke ká njingʉeri ni dho fø ddi Biblia ni ngʉ jifunza ná saa djo? Ni jifunza nari kʉ, Yova dhó chu i kʉ bblo kʉ ná ri ndrŭ krʉ dho ndirigoti ni dho maddi. (Zb. 77:13) Føri dzá lo dho, ni jirieri ni njí chø kʉ Yova nyǒ djó ná lo. (Mt. 6:33) Ni jieri ni d’ra bbʉbbʉlo ndirigoti ni dhori nari kʉ, Shetani adi po kodhi Mungu Yova djo nari e kali. Nde, ni ká ka ni njiri fø ngbaribbai? Ni nji ná lo chulu ni ka ni dhori nari kʉ ni nzá gba ni tso Shetani dhó kali na ri, ro ni gba ni tso bbʉbbʉlo na. Ni ka ni dhori nari kʉ ni ji Yova é nidhó Pi ndirigoti ni ji ni njí chø kʉ ná lo ke nyǒ djó. Ni ká ka ni njí føri ngbaribbai? Sala chulu ni tsoni Yova dho ni njinjí ke dho theinga dho ndirigoti batiso ni ba nari chulu. Bbʉbbʉlo ma, chølo ma na le ji ná føri i kʉ le ronga adi cho ná lo ndiro le vʉri le ba batiso d’e. w23.03 3 §4-5

Ronji dyi, Bi 4 ddo 23

Nzɨ ni bba ri d’o ni thí nanga, nzɨ ni ngʉ aluti do dho.​—Yoh. 14:27.

Nzá djo i dz’ dzá ndrŭ chu lo ro ddikpa maddi ná ngoi ro kʉ thé. Føri kʉ “Mungu dhó ngoi,” kodhi ra nǎ Baba ma na le ma kana kʉ bblo kʉ ná kau nari nǎ ro adi si ná le thí jotso ko nari. Njati ko é Mungu dhó ngoi na ró ko e b’odidha na. (Flp. 4:6, 7) Ko kana kau e jiji ke ná ndrŭ na. Ndirigoti ko kana kau e chøchø “ngoi dhi Mungu” na. (1 Te. 5:23) Njati ko chu kodhi ra nǎ baba, ko li ko thí ke djo ndirigoti ko rrnga ke dho ró, Mungu dhó ngoi ka ndi liri ko thí jotso koko rie ko nanga rid’o ko bani kpakpalo na nari dho ri ró. Ri ká ka ndi kaka ko ba Mungu dhó ngoi kpakpalo na ko bani ná saa na, loroji na, rie ko hwini nya ndi nanga nyá ná dhe tso ró, chʉ adi ngaba ná lo tso ró, ngbʉngbʉ ndrŭ nji nari tso ró inga ndrŭ ko nzá nari tso ró ná saa na? Fø kpakpalo krʉ ka ndi liri ko nji do. Hwè dhi lo kʉ le-djoi ma, le-vei ma na adi ngarr nì Yesu dhó shauri dho njʉnga dhi andiko ridho nari bbai. Yova dhó le tsotsokodha chulu ri kaka kpa dho kpa ba ngoi che pli kʉ ná kpakpalo tso ró ndima hwini ná saa na. w22.12 16 §1-2

Gbonji dyi, Bi 4 ddo 24

Roho chulu ani o kpakpa. Aninjinjí nokpa bbai Yova dho.​—Ro. 12:11.

Ko nzá ka ko chu kodhó maisha nǎ ko ka ko bani na ná lo krʉ ri. Føri dho, ri kʉ bbo na mana kʉ ná lo nzɨ ko di riddi Yova adi ko nja mana na bbo ko kʉ na ná pendeleo dzá lo dho ndirigoti ri nzá ngani ko di ko nji ná lo ddi nja ndrŭ nji ná lo na ri. (Gal. 6:4) Ri kʉ bblo, ko ne Yova dho ko ka ko njinjí ná chu ndirigoti nja ndrŭ tsotso ko ka ko kó ná chu. Ri ka ndi kaka ni njinjí bbo Yova dho njati ni ngʉ nidhó maisha dhʉdhʉ ndirigoti ni pʉ nga kʉ lazima ná ddeni ni ró ro ró. Rere muradi ni li ni nji, nari ka ndi kó ni tsotso ni si bbobbo muradi djo. Loroji na, rie nidhó muradi kʉ ni ngʉ painia wa kawaida ri ró, ni ká ka ni nga painia wa musaidizi ni nji nari tso kpadjo nga djó ro théi ngbà? Rie nidhó muradi kʉ ni ngʉ mutumishi wa huduma ri ró, ni ká ka ni ba saa bbo ngbà lod’radha dho? Kpadjo nga djó ro ni ba ná mazoezi, ka ndi si rili ni ba nja kʉ ná pendeleo Yova dzá njí kana gosi ná saa na. Avʉri ni njí nidhó le bbʉ ná njí ni thí nǎ ro krʉ. w22.04 26 §16-17

Thonji dyi, Bi 4 ddo 25

Ma ji Yova ke adi ma chu ma, ma ddóni ke ró ke kó ma tsotso d’e nari ma na rrrr nari dho.​—Zb. 116:1.

Yova ka ndi kó ko tsotso ko hwini kodhó maisha nă kpakpalo tso ró ndirigoti ko njínji ndi dho hwè na d’e. Ko di nganzi Yova tsó ko bani na ná lo djo ná saa na, ke ka ndi bbʉ kpakpanga ko dho nja ko ve fø lo tso d’e. Ndirigoti njati kodhó mbudha tso d’ø tse nzá ma ko e riddi nari bbai ró, ringani ko di nga dhé nzǐ Yova tsó ndiro ke bbʉ kpakpanga ko ve ri tso d’e. Ke rinzi ko di rinji fø. Isaya d’ra ná i lo dho fø lo pʉlʉpʉlʉ: “Nzɨ bba le ronga chʉdha dhi saa ro [Yova] dho sese maddi.” (Isa. 62:7) Fø lo na mana ká kʉ addu? Ko nganzi Yova tsó nzá ko d’i ji ro ná føri kʉ ddiddi nzɨ ko ribba ke chʉ ndi ronga nari bbai. Isaya no Yesu bbʉngʉe Luka 11:8-10, 13 nǎ sala djo ná longa ko dho. Føga Yesu ko li kpakpa ko di ra anzi” roho takatifu ko kó nari na. Ko ka ko nziri Yova ddá chutso ko dho ndiro ko vʉ lonanga bblo d’e. w22.11 8 §1; 9 §6-7

Mbʉnji dyi, Bi 4 ddo 26

Kodho ringani ko tsu Mungu dhó Pidhinga na bí kʉ ná nzadha kalu.​—Mdo. 14:22.

Ni ma, nidhó familia ma na ni ka ni tayarisha ni kpakpalo dho kpadjo nga djó ro. Nzɨ ni mburi ni di ngaddi njí ka ndi njini ná chelo krʉ djo. Føri rɨngana ali ni kana kau kpakpa Yova na, ndirigoti ako nidzá nzø tsotso ndiro kpa ma njiri føi d’e. Ni nanga ridi d’od’o ná saa na, adi ni thí nǎ lo d’ra Mungu dho. (Zb. 62:7, 8) Familia nǎ, anitilo ke djo ni ka ni li nidhó ngab’odha dho ná sababu krʉ djo. Matayarisho ka ndi kó nidhó nzø tsotso chʉ adi ngaba ná lo dhi saa na nari bbai, ri ka ndi tayarisha kpa kpakpalo dho maddi. Kpa sie nga nǎ do ro ndirigoti ko ndima jotso ko ro dhonalo ni ddi longa b’lo kpa dho Yova djo le le thí li nari djo. Mungu dhó ngoi adi liri ko mbu ko b’o ronga b’oni nari bbai. (Flp. 4: 6, 7) Ri chulu Yova adi liri ko jotso koko, rie dhe ma, chʉ adi ngaba ná lo ma, kpakpalo na ma ko bani njʉ ri ró. Ke adi njínji kpakpanga na njínji na wazee na nja ndima b’o ko ronga d’e. Ndirigoti ke bbʉ pendeleo ko krʉ dho ndiro ko kó ko tsotso ko kana d’e. Njʉ ko kʉ na ná ngoi adi ko tayarisha gosi ná saa na ko si bani na ná kpakpalo dho ndirigoti “bbo mbudha” dho maddi.”​—Mt. 24:21. w22.12 27 §17-18

Zanji dyi, Bi 4 ddo 27

Ma nzá singʉe chølo dhi ndrŭ nzi ri, ro chenga dhi ndrŭ.​—Mt. 9:13.

Ringani ko bbá kosa dhi ri ko ko mbu drrdrr ko njingʉe ná chenga djó nari tso maddi. Bbʉbbʉ dhé, ri nza ngani ko di “chenga nji ndana” le ødha dhi be dzá lo dho ko zø si njini nì nari dho maddi ri. (Ebr. 10:26-31) Ko ka ko uri u nari kʉ, njati rie bbʉbbʉ ko leeni kodhó bbo chenga nǎ ro ri ró, ndirigoti rie ngbà ko nzienga Yova tso ndirigoti ngbà wazee koe ko tsotso ri ró, Yova njie ko zø nji bbo chu na. (Isa. 55:7; Mdo. 3:19) Le ødha dhi be kʉ kpakpanga na nja ndi sa kodhi krʉ kʉ ná chenga sa d’e ndirigoti ri si rili ri kaka ko di Paradiso nǎ. Fø saa na ko sie na ná maisha nzɨ si ko ro nje ri. Ko kuso lú kʉ ná ndrŭ krŭ sie bblo kʉ ná ndrŭ ndirigoti ko krʉ sie bblo kʉ ná njí na. Fø lo krʉ djolu da nari kʉ ko krʉ si kodhi ra nǎ Baba chu bblo ndirigoti ko si hwè ba ke bbʉ ko dho ná ritsi nǎ ro. Krʉ ddo ró ko ka ko chu lo ke djo chulu ná ritsi sie bí dhonalo nononi ná ritsi djo ko si chu ná lo ma sie bí ddi. w22.12 13 §17, 19

Yenga dyi, Bi 4 ddo 28

Ma si mbu li ni kana isɨle na.​—Mwa. 3:15.

“Isɨle” nga ngʉe Eva ri. Ká addudho? Akonja ddikpa sababu. Unabi pori nari kʉ, isɨle nǎ gø ka ndi sie su djǒ nanga “d’rid’ri.” Su kʉ che kʉ ná malaika Shetani ndirigoti Eva nǎ nzá kaka ná gø nga ka ndi é kpakpanga na ndi d’ri ri djǒ nanga ri. Nde, føro ká Shetani ka ndi sie sadha ba ngbaribbai? Biblia nǎ ya mwisho buku d’ra isɨle ká kʉ ie ma nari ko dho. (Ufu. 12:1, 2, 5, 10) Føri nga kʉ isɨle nganga ri! Dhonalo le kó tsena kʉ bi (mwezi) ndirigoti le djǒ ró kʉ 12 kʉ ná dyødyø dhi taji. Le gø bbo dhó kpakpanga kʉ ná ngba, føri kʉ Mungu dhó Pidhinga. Fø Pidhinga kʉ ra nǎ, føri dho fø isɨle dho maddi ringani ndi é ra nǎ. Fø isɨle kʉ Yova dhó ra nǎ tengenezo ró sehemu, chi tøni ná malaiká kʉ ndi nǎ ro. (Gal. 4:26) Mungu dzá Lo ko tsotso kó ko chu isɨle nǎ gø ya kwanza ká kʉ ie ma nari. Ringangʉeni føri é Abrahamu nǎ gø.​—Mwa. 22:15-18. w22.07 15-16 §6-8

Wanzia dyi, Bi 4 ddo 29

Ni ue ri nga ndrŭ dhó ro si ná lo bbai ri, ro Mungu dzá lo, nì ri kʉ nari bbai.​—1 Te. 2:13.

Yova dhó ro si ná kado Biblia nanga tso kaka kedhó nyodyu na. Biblia nǎ kʉ ná shauri e bblo matokeo na ndrŭ djo ndirigoti ri adi ndrŭ dhó maisha thika lele. Biblia nǎ ya kwanza buku Musa ndingʉe ro ke pongʉeri ɨ Mungu dzá ndrŭ Waizraeli dho: “I ri nga kʉ nga na mana kʉ ni dho ná lo ri, ro ri si shinga bbʉ ni dho.” (Kum. 32:47) Fø lo dho rr e nga ná kpa ka ndima ée bblo kʉ ná maisha na ndirigoti hwè na. (Zb. 1:2, 3) Ngbà mai Mungu dzá lo ndingʉeni drrdrr ro, ri e kpakpanga na ndi ø ndrŭ dhó maisha thika. Biblia nǎ nyodyu dhi kanuni adi njínji krʉ ddo ró ndirigoti ridhoni nari kʉ, ri ndrŭ tsotso kó drrdrrnga djó ro kpø njʉnga djo. Takatifu kʉ ná fø kitabu ko di zø ndirigoti ko di ngaddi ri nǎ lo djo ná saa na, ri si dhó ro ná ke adi ko tsotso kó ndidhó roho takatifu na ndiro ko njinjí ri nǎ kʉ ná shauri na kodhó maisha nǎ d’e. (Zb. 119:27; Mal. 3:16; Ebr. 4:12) Biblia si dhó ro ná ke jirieri ji ndi kó ni tsotso. Fø lo ka ndi kó ko tsotso ko di Biblia zø krʉ saa ró! w23.02 3 §5-6

Ronji dyi, Bi 4 ddo 30

Ke si sadha bbʉ ké dho le nanga keni nari bbai.​—Da. 8:24.

Ufunuo sura 13 ripo ko dho nari kʉ, ri djǒ ya sabba ri Anglo-Américaine Dz’ djolu Gble pinyo ná Pidhinga njini ddikpa tso nǎ zǎ bbai “aro ndi d’yø kʉ chembø dzá ngba bbai ro, ro ri ngangʉe lotidha tso dragoni” bbai. Fø zǎ “bbobbo kʉ ná alama ma nji, ri rili kazz nganga thʉ ra nǎ ro dz’ djo nì ndrŭ njanja ro.” (Ufu. 13:11-15) Ufunuo 16 ndirigoti 19 nzi fø tso nǎ zǎ “kali dhi nabi.” (Ufu. 16:13; 19:20) Danieli tilo fø di ná lo djo ɨ ndi pori ro, Uingereza ma, Amerika na, Dz’ djolu Gble pinyo ná Pidhinga ka ndi “bbʉe bbo kʉ ná sadha.” (Da. 8:19, 23, 24, maelezo ya chini) Føri kʉ Dz’ djolu gble dangʉe ná Vita ya pili nǎ njingʉeni ná lo nganga. Aro le bungʉe ná bombe atomike lingʉeri fø vita tso dyani dya. Fø bombe thɨngʉe nari ngʉe Grande-Bretagne ndirigoti Amérique nǎ bbo zønga ná kpa. Bbʉbbʉ dhé, Dz’ djolu gble pinyo ná Pidhinga Uingereza ma, Amerika na lingʉeri “kazz thʉ ra nǎ ro dz’ djo.” w22.05 10 §9

    Bbaledha nǎ Vichapo (2015-2025)
    Avʉvʉ
    Atsu
    • Baledha
    • Ando ri
    • Ji le ji nari
    • Copyright © 2025 Watch Tower Bible and Tract Society of Pennsylvania
    • Njí le nji na nalo
    • Ruruni nalo ronga le b'o nari
    • Paramètres de confidentialité
    • JW.ORG
    • Atsu
    Ando ri