Bi 5
Gbonji dyi, Bi 5 ddo 1
Føri goti ma njangʉe . . . birobiro kʉ ná ndrŭ, fø ndrŭ nanga ro nzá ka ndi zøeni ddikpa le dho maddi ri, krʉ kʉ ná ndrŭ tsɨ ma, krʉ kʉ ná ndrŭ bbu ma, krʉ ndrŭ ma, krʉ kʉ ná luga ti ná ndrŭ ma na kana ro ndima si ro.—Ufu. 7:9.
Ra nǎ kikundi Yohana nja nari goti, ke nja “birobiro kʉ ná ndrŭ.” 144 000 kʉ ná kpa ró ro njonjo, birobiro kʉ ná ndrŭ ná fø ndrŭ nanga ro nzá ka ndi zøni ri. Nde, fø kpa djo ká ko chu ngbá lo? Yohana pori: “Føri kʉ bbo mbudha nǎ ro si ná ndrŭ, fø ndrŭ ʉngʉe ndima ró kanzu ndirigoti kpa lingʉeri ri é sawø Chembø dzá ngba ró ju na.” (Ufu. 7:14) Bbò mbudha nǎ ro kpa vʉ nari goti, “birobiro” kʉ ná fø ndrŭ si di i dz’ djó ndirigoti kpa si ké dho le nanga keni ná ledha ba. (Zb. 37:9-11, 27-29; Mez. 2:21, 22; Ufu. 7:16, 17) Rie ra nǎ ma, inga i dz’ djó ma ko si di ri ró, ko ká nja ngbaribbai ma Ufunuo sura 7 nǎ kʉ ná lo ko ronga lø nari ngbà? Ko ka ko njari ngbà. Mungu dho njínji ná aro kʉ ná kikundi krʉ dho føri sie bbo hwè dhi saa! Ko si hwè ba bbo ko vʉngʉeri ko gba ko tso Mungu dhó Pidhinga na nari dho. w22.05 16 §6-7
Thonji dyi, Bi 5 ddo 2
Yehova i adi nyodyu bbʉ.—Mez. 2:6.
Njati rie b’lo ni vʉrie bbo na mana kʉ ná lo nanga ro ri ró, bbʉbbʉ dhé ni nzingʉe nga nja ni ba nyodyu dhonalo ni chungʉeri nidhó lo ji ri ji. (Yak. 1:5) Pi Sulemani ndingʉeri: “Nyodyu kʉ bbo pli na mana kʉ ná ritsi.” (Mez. 4:7) Bbʉbbʉ dhé, Sulemani nzɨ ngʉ loti nyodyu krʉ djo ri. Ro, ke ngʉ loti djo nari kʉ Yova Mungu dhó ro adi si ná nyodyu. Nde, Mungu dhó ro si ná nyodyu ká ka ndi kó ko tsotso ko hwini njʉ ko adi bani na ná kpakpalo na ddi? Ri ka ndi kó ko tsotso ngbà. Ko ka ko é bbʉbbʉ nyodyu na ná ddikpa chu kʉ, bbo ngʉe nyodyu na ná aro kʉ ná kpetsi kpa ddingʉe ná lo ko jifunza ndirigoti ri na ko njínji nari chulu. Ya kwanza, akotilo Sulemani djo. Biblia ripo “Mungu bbʉngʉe Sulemani dho nyodyu ndirigoti bbo pli kʉ ná lo utsod’idha.” (1 Fa. 4:29) Ya pili, akotilo Yesu djo, ke bbai ngʉe nyodyu na ná ndrǔ ro nga ngʉe ri. (Mt. 12:42) Yesu djo unabi pongʉeri: “Yova dzá roho sie ke djó, nyodyu dhi ndirigoti akili dhi roho.”—Isa. 11:2. w22.05 20 §1-2
Mbʉnji dyi, Bi 5 ddo 3
Abbari ma tilo nidzá kpakpanga djo gosi ná gø dho.—Zb. 71:18.
Ko ngʉ ngó ma ró ko ka ko li muradi ngbà dhé ko nji ndirigoti ko ka ko njí ri njí. Akonja le-ve Beverley dhó loroji 75 ndi dhó cho kʉ ro. Ledhó afya nga ngʉe bblo ri nari dho bbi le bbi nari ngʉe kpakpa le dho. Ro Ukumbusho dhi kapanye le nji ná saa na le jingʉeri ndi d’ra lo bbo. Føri dho le lingʉe ngbà ndi ka ndi njí ná muradi ndi nji. Beverley nanga jingʉeni bbo ndi tso si ndi lingʉe ndi njí na muradi djo kapanye dhi saa na nari dho. Le nji ná kpakpanga chongʉe nja ndrŭ ronga ndiro ndima ndri ndima dhó lod’radha dhi njí nanga d’e. Yova adi ngó ngʉ ná le-djoi ma, le-vei ma na nji ná kpakpanga nja mana na bbo, rie nzɨ ma kpa rinji ndima ka ndima njie ri ná ngatsi ndima dhó hali djotsina ri ró. (Zb. 71:17) Ali ngbà djo ni ka ni si ná muradi. Aliri nidhó nyi e ngbà ka ndi tho Yova nyǒ nari bbai. Achu ngbà Mungu ma, ndidhó tengenezo ma na ka ndima njinjí ni na bbo dho ná ufundi nga. Ane ni djoi ma, ni vei ma na tsotso ni ka ni kó bbo ná chu. Timoteo bbai, Yova dhó ledha chulu “nidhó maendeleo ka ndi njani pʉlʉpʉlʉ krʉ ndrŭ dho.”—1 Ti. 4:15. w22.04 27 §18-19
Zanji dyi, Bi 5 ddo 4
Ni chu takatifu kʉ ná ndi ndini ná lo nidzá renga nǎ ro.—2 Ti. 3:15.
Ni ká ka ni njiri ngbǎ njati rie ngbà ni nji krʉ ni ka ni njí ná kpakpanga, ro nidhó nzø kana ddikpa ngba gʉ Yova dho ndi njínji nari gʉ ró? Nzɨ ni pori nari kʉ ni nzani pá. Yova bbʉ lonangavʉdha dhi kado ko krʉ dho, føri tsu ndi nǎ nidhi nzø maddi, føri kʉ ko krʉ vʉri ko ká njínji Yova dho, inga nzɨ ma nari. Ddikpa cha fø ngba si ndidhó lo thika thɨ nì dhé nari djo ni kʉ na ná ngab’odha nzɨ vi. Ano vi vingʉe ná ngba dhó loroji nga. (Lu. 15:11-19, 22-24) Fø jadda ke njingʉe bí kʉ ná chelo, ro mwisho ke ngʉngʉe ngʉ dhé ndima bba. Gø dhi ndrŭ, nidhó bbʉni nari kʉ bblo pli kʉ ná pendeleo, føri kʉ ni ddi longa nidhi nzø dho ndiro kpa ngʉ Yova dho njínji ná ndrŭ d’e. (Zb. 78:4-6) Føri nga kʉ sʉsʉ kʉ ná njí ri, fø lo dho ko ni má bbo ni kpakpanga nji ni kó nidhi nzø tsotso ndima ji Yova ndirigoti ni longaddi kpa dho kpa rrnga ke dho nari dho. Ni ka ni uri u nari kʉ kodhi ra nǎ ji dhi Baba sie hwè na.—Efe. 6:4. w22.05 30-31 §16-18
Yenga dyi, Bi 5 ddo 5
Le ndí krʉ kʉ ddi ndi tso gbani ro.—Efe. 4:16.
Nja ko b’o ngoi ndirigoti ddi le tso gbani nari ronga kutaniko nǎ d’e, ko kana nja le ddiro dho ringani ndi njinjí ndi thí nǎ ro krʉ. Akonja karne ya kwanza nǎ Wakristo dhó loroji. Kpa ngʉe njonjo kʉ ná zawadi na ndirigoti njonjo kʉ ná njí na. (1 Ko. 12:4, 7-11) Ro, føri nzá lingʉeri kpa di ndima ddiddi ndima kana inga kpa kana nga ndoni ndo ri. Føri rɨngana Paulo pongʉeri nja ke ddiro dho ringani ndi njí ngbà ka ndi ka ndi dho ná kpakpanga “ndiro ndi chi Kristo ndí d’e.” Paulo ndingʉeri Waefeso nǎ ndrŭ dho ɨ: “Njati le ndí ró sehemu krʉ njinjí bblo ró, føri adi rili le ndí dhidhi jidha kana ndi ndi chi ro.” (Efe. 4:1-3, 11, 12) Fø rinji ná ndrŭ adi ddi le tso gbani nari ma, ngoi ma na ronga b’o kutaniko nǎ. Føri i kʉ njʉ ko adi nja kodhó kutaniko lú ná sifa. Anji kpakpanga ndiro nzɨ ni di ni ddi nja ndrŭ na ró. Føri rɨngana aba somo Yesu dhó loroji nǎ ro ndirigoti anji kpakpanga ni dyø kedhó sifa. Achuri nari kʉ “Yova nga kʉ nzɨ adi chølo nji ná ke ri, ndiro ndi vi nidhó njí nga d’e ri.” (Ebr. 6:10) Ke nanga adi jini bbo ni njínji ndi dho ni thí nǎ ro krʉ nari dho. w22.04 14 §15-16
Wanzia dyi, Bi 5 ddo 6
Yesu Kristo singʉe dz’ djo ndiro ndi gø chenga dhi ndrŭ d’e.—1 Ti. 1:15.
Ko adi mbai po chenga nji ná ddikpa ke zø ká Yova ka ndi njinjí ma inga nzá ma nari nanga nzá ko ka ko vʉri nari dho! Nì mai ri kʉ føro, ko ka ko vʉ ko njí ná nja lo ma kʉ ddi. Føri ká kʉ ngbá lo? Nja saa na ddikpa ke ka ndi njí chelo ko ró inga bbo pli ka ndi vo ko thí ronga ná lo, ro luti ke ka ndi si zø ko ko tso. Nja saa djo nzá ke ka ndi si zø ko ri. Nì mai ri kʉ føro, ko ka ko vʉri ko njí ke zø njí ndirigoti nzɨ ko ma thø na ke djo. Bbʉbbʉ dhé, føri ka ndi dzi saa ndirigoti kpakpanga njati rie bbo ke nji ná lo voe ko thí ronga ri ró. Bi 9 ddo 15, 1994 nǎ Dzamu dhi Munara (Swahili) pongʉeri ɨ: “Chenga nji ná ke zø ni nji ná føri na mana nga kʉ ni gba ni tso ke nji ná chenga na ri. Ndrŭ zø Mukristo nji nari na mana kʉ, ke bba lo Yova thó thi. Ke kʉ dz’ lu djó d’ʉ Lod’i ná ke ndirigoti ke si rili chølo njini bblo kʉ ná saa djo.” w22.06 9 §6-7
Ronji dyi, Bi 5 ddo 7
Ali nidhó ngab’odha Yova djo.—Zb. 27:14.
Yova tsongʉeni, kodhó saa na ndi si krʉ ndrŭ bbu ma, krʉ ndrŭ tsɨ ma, krʉ luga ti ná ndrŭ ma, krʉ ngø nǎ ro si ná ndrŭ ma na tso gba ddi, nja ndima bbʉ tsetse ná madha ndi dho d’e. Njʉ le adi fø ndrŭ nzǐ “birobiro kʉ ná ndrŭ.” (Ufu. 7:9, 10) Nì mai, fø kpa kana kʉ njonjo ndrŭ tsɨ kpari ma, kpetsi kpa ma, isɨ ndrŭ ma, nzø ma dz’ djolu gble ndima kʉ ro, kpa adi di ddikpa familia bbai ngoi na. (Zb. 133:1; Yoh. 10:16) Kpa e tayari krʉ ddo ró, ndima d’ra dz’ djo ndima kʉ na ná bblo pli kʉ ná ngab’odha ngbà jiri ndima rr ri ná ndrŭ krʉ dho. (Mt. 28:19, 20; Ufu. 14:6, 7; 22:17) Njati ni é birobiro kʉ ná ndrŭ kana ddike ró, gosi ná ddo djo ni kʉ na ná ngab’odha adi hwè bbʉ bbo ni dho. Ibilisi adi riji ndi vi ni kʉ na gosi ná ddo djo ná ngab’odha vi. Ke adi riji ni uri nari kʉ, Yova nzá ka ndi njí ndidhó tsodha ro ri. Njati Shetani ví kodhó ngab’odha vi ró, ko ró klø ka ndi sini si ndirigoti ko ka ko bbá Yova dho ko njínji nari tso bbá. w22.06 20-21 §2-3
Gbonji dyi, Bi 5 ddo 8
Ko kʉ fø ngab’odha na, Nanga bbai kodhó shinga dho, ri kʉ bbʉbbʉ ndirigoti kpakpa—Ebr. 6:19.
Kodhó ngab’odha adi ko tsotso kó ko é ko ko jotso ko ro dhonalo ko uri u lo sie bblo nì. Anonga nari kʉ, Yesu pongʉeri ko ndrŭ ka ndima si nzanza. (Yoh. 15:20) Føri dho njati ko di ngaddi gosi ná ddo djo Yova nji ko dho ná tsodha djo ró, ri ka ndi kó ko tsotso ko njinjí Yova dho. Akonja ngbaribbai ma ngab’odha kongʉe Yesu tsotso ndi tøni chi nari ngbà mai ke chungʉeri ndi ka ndi si nzani bbo, dhe ndi dhe nari njí ro. Pentekoste 33 na Y.G.G, mutume Petro tingʉe lo Zaburi dzá buku nǎ bbo d’ani ná unabi djo, nari ngbaribbai ma Yesu ngʉe ko ndi jotso ko ro ndirigoti udha na nari dhǒ: “Ma si di ngoi na dhonalo ni nzɨ si kʉ ma bba kabbuli na ri, ni nzɨ si ritso u chi tøni ni dho ná ke ba sadha ri . . . Ni si rili ma nanga lili bbo hwè na ni njí.” (Mdo. 2:25-28; Zb. 16:8-11) Yesu ngʉe na ná kpakpa kʉ ná ngab’odha ngʉe Mungu si ndi gaga ndirigoti ndi sie hwè na ndidzá Baba ma na ra nǎ.—Ebr. 12:2, 3. w22.10 25 §4-5
Thonji dyi, Bi 5 ddo 9
Ko krʉ adi chelo nji bí ina.—Yak. 3:2.
Ddikpa cha Yesu dhó aro kʉ ná wanafunzi, Yakobo ma, Yohana ma na pongʉeri ndima dzá mama rá ripo Yesu dho nari kʉ, Pidhinga nǎ le si ndima li anziro. (Mt. 20:20, 21) Yakobo ma, Yohana ma na njingʉe ná fø lo dhongʉeri kpa kʉ nodha na ndirigoti kpa jiri ndima é mana na pli nja ndrŭ djolu. (Mez. 16:18) Fø dyi dhongʉe che kʉ ná sifa nari nga ngʉe Yakobo ma, Yohana ma na dhé ri. Anja nja mitume njingʉe ná lo: “Kumi kʉ ná nja kpa rrngʉe fø lo ná saa na kpa lu aro kʉ ná fø le-djoi dzá lo kangʉeni ka.” (Mt. 20:24) Ko ka ko ddinga ngbaribbai ma Yakobo ma, Yohana ma, nja mitume ma na gʉngʉeni nari djo. Nde, Yesu ká njingʉeri ngbǎ? Ke lu nzá fø lo ro kangʉeni ri. Yesu nzá pongʉeri ndi bblo kʉ ná mitume ne, nì kʉ nyenyenga na inga nì di jidha dhǒ ndima kana ná kpa ri. Føri rɨngana Yesu tingʉe lo ndi unakpa na ngatsovedha na dhonalo ke chungʉeri chu nari kʉ, fø kpa adi riji ndima njí bblo lo. (Mt. 20:25-28) Ke ngʉ adi ra anzi jidha ndi dhǒ kpa dho nari na. w23.03 28-29 §10-13
Mbʉnji dyi, Bi 5 ddo 10
Adi nyodyu na madzá ngba ndirigoti abbʉ hwè ma thí dho, ndiro ma ngʉ ma chø ná ke dhó logoti d’e.—Mez. 27:11.
Ni nji bí kʉ ná lo b’lo. Loroji na, njaro ni zø Biblia li ni li ni dyu ro cho bí b’lo. Biblia ni zø nari liri ni uri nari kʉ, ri kʉ Mungu dzá lo. Føri kina, ni chu ndirigoti ni ji takatifu kʉ ná fø buku si dhó ro ná ke. Nidhó jidha dhi Yova djo kpø ni bbʉ ni ke dho ndirigoti ni ba batiso. Ni vʉe lonanga bblo! Njaro batiso ni ba nari njí ni baeni kpakpalo na nari lieri rie kpakpa ni tøni chi Yova dho. Ro ni dhidhi kiroho na nari bbai ni si bani ø mbudha na. Shetani si rimbu ndi liri ni bbá Yova ni ji nari ndirigoti ke dho ni njínji nari tso. (Efe. 4:14) Nidho nzá ringani ni bbá nga fø lo dho ri. Nde, addui ká ka ndi kó ni tsotso ni tøni chi Yova dho ndirigoti ni njí ni bbʉe nidhó maisha ke dho ro ni njie ná tsodha ró njí d’e? Nidho ringani ni njí kpakpanga ndiro ni ngʉ dhidhi kiroho nǎ ná Mukristo d’e.—Ebr. 6:1. w22.08 2 §1-2
Zanji dyi, Bi 5 ddo 11
Abbʉ heshima nidzá baba ma, nidzá mama ma na dho, ddiddi Yova Mungu jari ni dho nari bbai, ndiro ni ddo bicha ndirigoti nidhó lo bbí bblo d’e.—Kum. 5:16.
Familia nǎ ndrŭ krʉ dho ringani ndima b’o familia nǎ nzá le ka le po ndrŭ kana ná lo ronga b’o. Loroji na, njaro ddikpa le-ve ka ndi é gbo ka ndi tá le na nari ndibbá ke adi dyá ná ddikpa nyi na. Kedho ká ringani ndi d’ra fø lo nja ndrŭ dho ndirigoti ndi liri le mbu ndi che? Nzá! Dhonalo ke jirie ndibbá le ji ndirigoti ke nzá jirieri ndi njí le thí ronga ka ndi vo ná lo ri. (Efe. 5:33) B’lo dhi ná nzø jirieri le di heshima ro bbʉ ndima dho nja chu na. Ri kʉ bbo na mana kʉ ná lo gø dhi ndrŭ di fø lo ngano. Kpadho nzá ringani ndima di do pá ndima dhi nzø djo, kpadhó kosa ndima d’ra nja ndrŭ dho nari chulu ri. (Kol. 3:21) Nzø dho maddi ringani ndima di siri ronga b’o, nzɨ ndima d’ra nzá le ka le d’ra ná lo nja ndrŭ dho, ndiro nzɨ ndima pa do ndima dhó familia nǎ ndrŭ djo ró. Njati familia nǎ ndrŭ ddiddiro krʉ di siri ronga b’o ró, familia nǎ ndrŭ kana nga sie chøchø. w22.09 10 §9
Yenga dyi, Bi 5 ddo 12
Arr i lo, Yobu; atøni ndirigoti addinga.—Yob. 37:14.
Yova tingʉe lo Yobu dho ná saa na, Yova nongʉe Yobu dho ndidhó nzá tso d’ø ná nyodyu nga ndirigoti jidha na ndi adi nononi ná ritsi ronga b’o nari nga ke dho, ke tingʉe lo ké dho le nanga keni ná zǎ kpari djo. (Yob. 38:1, 2; 39:9, 13, 19, 27; 40:15; 41:1, 2) Føri goti chi ngʉ tøni ná jadda ke Elihu chulu Yova lingʉe Yobu kpakpa ndirigoti ke pɨngʉe ke iso pɨ. Elihu pongʉeri ke dho nari kʉ, krʉ ddo ró Yova adi kpakpalo tso ve ná ndi dho njínji ná ndrŭ kobe bbʉbbʉ. Ro Yova chongʉe Elihu ronga ndiro ke bbʉ shauri ro maddi Yobu dho d’e. Elihu kongʉe Yobu tsotso nja ke bbá bbo ndi ngaddi ndi djo nari tso ndirigoti ke nongʉe ringa Yobu dho nari kʉ, ko kʉ sese bbo le ddi ko ngano ná Ke Yova na ró. Føri goti Yova bbʉngʉe ddikpa njí Yobu dhona; ke pongʉeri Yobu njí sala ke lai gbo kʉ ná kpa njingʉe ná chenga djotsina. (Yob. 42:8-10) Yova ká adi ko tsotso kó ngbaribbai njʉ kpakpalo na ko bani ná saa na? Njʉ nzɨ Yova adi loti ko dho théi ndi tingʉe lo Yobu dho nari bbai ri, ro ke adi loti ko dho Biblia chulu.—Ro. 15:4. w22.08 11 §10-11
Wanzia dyi, Bi 5 ddo 13
Ri nga kʉ bblo ni á zǎ, ni jø wa inga ni njí bʉ ka ndi bʉ adjoni thí ná ritsi krʉ ri.—Ro. 14:21.
Roma nǎ kutaniko nǎ ngʉe Wayaudi ma, nga kʉ wayahudi ná ndrŭ ma na. Musa dhó sheria bbangʉe njí tso ná saa djo, ri nga ngʉe lazima nzɨ Yova dzá ndrŭ nyo gʉ Musa dhó sheria gʉngʉe ná nyo ri. (Mk. 7:19) Fø saa djó ro, Wayahudi kʉ ná nja Wakristo mbungʉe ndima huru ndima nyó krʉ kʉ ná nyo d’e. Ro, Wayahudi ngʉe ná nja Wakristo ngʉ rinja ri nga kʉ bblo le nyó fø nyo ri. Fø lo djó kutaniko nanga ndongʉeni ndó. Mutume Paulo tingʉe lo kpa dho ngoi ronga le b’o ná føri kʉ bbo na mana kʉ ná lo nari djo. Paulo kongʉe ndi lai Wakristo tsotso kpa nja ngbaribbai ma, fø di ná lo ka ndi é che kʉ ná matokeo na kpa kana kila mutu djo ndirigoti kutaniko krʉ djo nari. (Ro. 14:19, 20) Ke ngʉ adi riji ndi ø ndidhó nyi thika ø ndiro nzɨ ndi bʉ nja ndrŭ thí ró. (1 Ko. 9:19-22) Ko maddi ko ka ko li nja ndrŭ kpakpa ndirigoti ko liri kutaniko é ngoi na njati rie nzɨ ko gʉni kila mutu dho ringani ndi vʉ nanga ná lo djo ri ró. w22.08 22 §7
Ronji dyi, Bi 5 ddo 14
Yova . . . jirie chølo ne ná ke ji.—Mez. 15:9.
Njati ko li ddikpa muradi ko nji ró, ko adi kpakpanga nji nja ko si ri djo d’e. Rie chølo ko ji ko ne ri ró maddi ri ka ndi é fø. Ndirigoti ngatsovedha na Yova si ko tsotso ko nja ko njí maendeleo, ndirigoti ko di kodhó lothika thɨ krʉ ddo ró d’e (Zb. 84:5, 7) Jidha na Yova rid’ra ko dho nari kʉ, chølo le nji nari nga kʉ li o ná no ri. (1 Yo. 5:3) Føri dzá njonjonga kʉ ri kʉ lerongab’odha, føri kʉ krʉ ddo ró kodhó loji ná ritsi. Ano mutume Paulo tingʉe lo djo ná là dho le thó ná ritsi nga. (Efe. 6:14-18) Sødda thí ronga ká addu ngʉ adi b’o? Ringʉe “le badjo ronga b’o ná chølo dhi ritsi,” føri kʉ Yova dhó chølo dhi sheria. Ddiddi le badjo ronga b’o ná ritsi ka ndi b’o le thí nganga ronga nari bbai, Yova dhó chølo dhi sheria ka ndi b’o nidhó loroji dhi ni thí ronga. Føri dho ri kʉ bbo na mana kʉ ná lo, ni li nidhó là dhi ritsi kana le badjo ronga b’o ná chølo dhi ritsi maddi!—Mez. 4:23. w22.08 29 §13-14
Gbonji dyi, Bi 5 ddo 15
Kodhi Mungu dzá lo di theinga dho.—Isa. 40:8.
Cho bí kana Mungu dzá lo bbʉ nyodyu dhi chutsoddadha chi tøni ná kpetsi kpa ma, isɨ ndrŭ ma na dho. Nde, føri ká ka ndi njieni ngbaribbai? Yova lingʉeri ndrŭ ndi takatifu fø lo nanga ndi. Nì mai fø lo nanga ndingʉe nari ngʉe nzá kaka ná ndrŭ ro, kpa ngʉe krr. Maandiko ya Kiebrania djo ndi tilo ro ddikpa ke pori: “Ma uri u nari kʉ, nja buku nǎ lo nzá ndingʉeni Biblia nǎ lo bbai ri.” Føri dzá ko ka ko uri u nari kʉ, Biblia nǎ kʉ ná lo si Yova Mungu dhó ro dhé. “Krʉ bblo kʉ ná kado ndirigoti krʉ kaka ná ritsi adi” si Yova dhó ro. (Yak. 1:17) Biblia kʉ fø kado kana ddiri ro Yova bbʉ ndi ko dho ro. Njati ddikpa ke bbʉ kado ni dho ró føri adi ri dhǒ ke chu ni ma, nidhó lo u ná ritsi ma na bblo. Ná føri bbai Biblia bbʉ ko dho ná ke ma chu ko bblo pli ddi. Fø kado nǎ kʉ ná lo nanga ko di ne ná saa djo, ko adi lochu bí Yova djo. Ko adi ngbaribbai ma ke chu ko ma, kodhó mahitaji ma na bblo nari chu. w23.02 2-3 §3-4
Thonji dyi, Bi 5 ddo 16
Bbʉbbʉ dhé, dz’ djó nga si lili lochudha na Yova djo.—Isa. 11:9.
Ndrŭ ga ná ritso si ngani dz’ djo Yesu si pinyo cho elfu ddi (1 000) kana ná saa na, ná føri sie bblo pli kʉ ná ddo! Che ró ndrŭ cheni ná ndrŭ krʉ kʉ ù na bbo ndima nja ndima dhi ji ndima ji ná ndrŭ si ga nari. Yova maddi jiri fø. (Yob. 14:15) Ndrŭ dhi ji ndrŭ ji ná ndrŭ ve di ga ná saa na, ndrŭ ka si hwè nji bbo dz’ djolu gble. Shinga dhi buku nǎ le ndingʉe ró dho ná “chølo dhi ndrŭ,” si ga ndima ba “shinga dhi gadha” d’e. (Mdo. 24:15; Yoh. 5:29) Njaro ko ró ji ko ji ná bí kʉ ná ndrŭ le si ga Armagedoni da nari goti tse. Føri goti nzá bangʉe pendeleo ndima chu lo Yova djo inga ndima njinjí ke dho chi ndima tøni ro ndima dhó dhe njí ná “nga kʉ chølo dhi ri ná ndrŭ” le si ga “lod’idha dhi gadha dho.” Ga si ga ná ndrŭ krʉ dho ri si ngani le ddi longa ndima dho. (Isa. 26:9; 61:11) Føri dho, bbo pli kʉ ná longaddidha dhi programu si ngaba ndrŭ dhó historia nǎ.—Isa. 11:10. w22.09 20 §1-2
Mbʉnji dyi, Bi 5 ddo 17
Ke kʉ shi di ná Mungu.—Da. 6:26.
Yova dhongʉe ndidhó bbo pli kʉ ná bbonga dz’ djó pikpa krʉ dho. Ke njingʉe Waizraeli djó lɨ ndirigoti ke kongʉe kpa tsotso ndiro kpa tsu koddo ndi kongʉe ná ngø na d’e. (Yos. 11:4-6, 20; 12:1, 7, 24) Bí ina Yova dhongʉeri ndi kʉ bbo pli kʉ bbonga na ná ke! Babiloni nǎ Pi Nebukadneza ngʉ nodha nji ‘ndidhó kpakpanga djotsina ndirigoti ndidhó bbonga djotsina’ Yova ddiro dho dhé ndi ka ndi bbʉe madha nari nyi ndi chué nari rɨngana ná saa na, Yova lingʉeri ke ngʉ rǐ (mazimu). B’lo Nebukadneza ró rǐ sini nari goti, ke bbʉngʉe “madha Bbo pli ngbeni ná ngana kʉ ná ke dho” ndirigoti ke famungʉeri nari kʉ “[Yova] dhó pidhinga kʉ theinga dho.” Ke pongʉeri ki: “Ke ji ndi njí ná lo ró ka ndi cho ke tso ná le ro nga kʉ ri.” (Da. 4:30, 33-35) Zaburi ndi ná ke pongʉeri: “Hwè na kʉ nari kʉ, Yova kʉ dhi Mungu ná ndrŭ tsɨ, ke vʉ ndi dho mali ná ndrŭ.” (Zb. 33:12) Ri kʉ bbo thonga ná lo ko é chi Yova dho. w22.10 15-16 §13-15
Zanji dyi, Bi 5 ddo 18
Nidzá lo kʉ bbʉbbʉ.—Zb. 119:160.
Biblia nǎ b’lo njini ná unabi kodhó udha li kpakpa djo nari kʉ, Mungu tsoni ndi si nji ko dho gosi ná ddo dho ná lo si njini nji. Ko ko mbu mutunga zaburi bbai ɨ ndi pongʉeri ro: “Ma nanga jini bbo nidzá gødha dho, dhonalo nidzá lo kʉ madzá ngab’odha.” (Zb. 119:81) Jidha na Yova bbʉ ko dho Biblia chulu “gosi ná ddo ndirigoti ngab’odha.” (Yer. 29:11) Gosi ná ddo djo ko kʉ na ná ngab’odha nzá dyʉ ndi ndrŭ nji ná kpakpanga ró ri, ro Yova nji ná tsodha ró. Ko ka ko li kodhó ngab’odha kpakpa Mungu dzá lo djo Biblia nǎ unabi ko jifunza nari chulu. Ko ka ko li ko thí Biblia nǎ lo djo dho ná nja sababu kʉ, ri nǎ shauri na njinjí ná ndrŭ tsotso ri koko. (Zb. 119:66, 138) Loroji na, ddikpa dza dhi ndrŭ ngʉe chøchø ndima kló ndima dhó ndoa nanga klo, ro kpadjo kpa kʉ hwè na ddi ndima tso gbani ro. Kpadhi nzø dhǐ jidha kʉ kana ná Wakristo dhó dza nǎ, nì ndima ronga b’oni bblo ndirigoti ji le ji ndima ná ngana.—Efe. 5:22-29. w23.01 5 §12-13
Yenga dyi, Bi 5 ddo 19
Aba hwè nga ni b’o nari kana.—Ro. 12:12.
Addinga ngbaribbai ma ni ba faida Biblia nǎ b’lo ro njini ná tsodha nǎ ro nari djo. Loroji na, Yesu tsongʉeni nari kʉ ndidzá Baba si nidhó lo u ná ritsi tso gbagba. (Mt. 6:32, 33) Yesu ungʉeri u nari kʉ, Yova si ndidhó roho takatifu bbʉ ni dho, ri ni nzi ná saa na. (Lu. 11:13) Yova njingʉe ndi tsongʉe djo ná fø lo krʉ nji. Føri bbai ni ka ni ddinga b’lo ke nji ni dho ná nja tsodha djo maddi. Loroji na, ke tsoni ndi nji ni zø njí, ndi pɨ ni iso pɨ ndirigoti ndi gba nidhó kiroho nǎ lo tso gba. (Mt. 6:14; 24:45; 2 Ko. 1:3) Ni di ngaddi b’lo Mungu nji ni dho ná lo djo ró, nidhó ngab’odha si ngʉ kpakpa gosi ná saa na ke si nji ni dho ná lo djo. Ko uri u nari kʉ, Yova si ndi tsoni djo ná ritsi njinji dhé. Zaburi ndi ná ke ndingʉeri ɨ: “hwè na kʉ nari kʉ . . . ngbà li ndidhó ngab’odha ndidzá Mungu Yova djó ná ke, . . . Nì tøni krʉ ddo ró chi ná ke.”—Zb. 146:5, 6. w22.10 27 §15; 28 §17
Wanzia dyi, Bi 5 ddo 20
Yova si nga i ni dho.—Isa. 60:2.
Tsetse ná ibada ki ka ndi sie ngʉ vi ná fø unabi ká lø ko ronga maddi njʉ? Ddio! Ká ngbá chu nǎ? Cho 1919 djó ro Y.G.G., mamilioni kʉ ná ndrŭ adi tuni tu Bbò Babiloni, kali dhi dini nǎ no tsena ro. Kpa dho chutso ddani bblo pli kʉ ná ngana, da ndi da Waizraeli ngʉ di nǎ ná koddo koni ná ngø djolu ro. Føri rili kpa tsu kiroho nǎ paradiso na. (Isa. 51:3; 66:8) Cho 1919 djó ro Y.G.G., ché na le d’ri ná Wakristo adi kiroho nǎ paradiso nǎ ndima di nari hwè nji. Dz’ djó ngab’odha na kʉ ná Wakristo inga “nja chembø” maddi adi di fø paradiso dhi ngø nǎ ndirigoti kpa adi Yova dhó bbo pli kʉ ná ledha hwè nji. (Yoh. 10:16; Isa. 25:6; 65:13 ) Fø lo dho, kpa di nǎ ná kiroho nǎ paradiso kʉ dz’ djó. Føri dho, rie ngbaga ma ko di njʉ ri ró, ko ka ko é kiroho nǎ paradiso nǎ njati ri é nì ko ko tso gba bbʉbbʉ ibada na ri ró. w22.11 11-12 §12-15
Ronji dyi, Bi 5 ddo 21
Ee Yova ni ká kʉ nga choro nŭnŭ nga djó ro ri? Ee madzá Mungu, madzá takatifu e ná ke, ni ro nzɨ adi dhe ri.—Hab. 1:12.
Yova e “choro nŭnŭ nga djó ro” ni dhé nari ni famu nari ká adi si ni dho kpakpa? (Isa. 40:28) Bí kʉ ná ndrŭ dho rie kpakpa ndima famu fø lo. Elihu pongʉeri Mungu djo: “Kedhó cho ká kʉ thɨ ma nari ro nzá ko ka ko famu ri.” (Yob. 36:26) Ri nga kʉ ddikpa ritsi ko famu nzá nari dho i ri nga kʉ bbʉbbʉ ri. Loroji na, kadha inga nga ká ritsi adi i ngbaribbai ma nari ko famu nzá ná føri na mana ká kʉ kadha nga e ri? Nga, kadha e nì! Føri bbai ndrŭ ko kʉ ná ngadjó ko nzá ka ko famu Yova e nì dhé ndirigoti ke sie nì dhé ná fø lo ro d’ʉ ri. Ro, føri na mana nga kʉ Mungu nzɨ adi choro nŭnŭ ri. Ro, ngano ná Ke tso nzá ko famu ndi nzá nari ka ndi cho ri. (Ro. 11:33-36) Ke ngʉe nì dhé ngø ma, dyødyø ma, dyi ma na noni nari njí. Bbʉbbʉ dhé, ra “noni nari njí ma ke ngʉe nì dhé.”—Yer. 51:15. w22.12 2-3 §3-4
Gbonji dyi, Bi 5 ddo 22
Abbari madhó sala é ni njí le thɨ ná uvumba bbai.—Zb. 141:2.
Nja saa na, ri adi ngani ko njí sala nja ndrŭ dhi lo dho. Loroji na, funzo ra ongoza ná le-ve ka ndi nziri ndi lai le-ve njí sala. Ya kwanza, si go fø funzo na ná le-ve nzá ka ndi chú ndima ra longaddi dho ná fø mwanafunzi bblo ri. Føri dho le ka ndi jiri ndi si ya mwisho sala nji, føri ka ndi liri le chú ndi nji mwanafunzi dho ná sala nǎ ká ndi addu ma po nari bblo. Ri ka ndi nzini ddikpa le-djo njí sala lod’radha dhi njudha dhi ngana inga kutaniko nǎ njudha dhi ngana. Sala njidha dhi pendeleo le bbʉ djó ná fø le-djo dho ringani ndi nó fø njudha dhi kusudi nga. Sala nǎ nzɨ le adi shauri bbʉ inga longaddi kutaniko nǎ ndrŭ dho ri, inga matangazo nji ri. Bí kʉ ná njudha nǎ dyi ma, sala ma na dho le adi bbʉ ná miniti e mbʉ dhé, føri dho sala nji ná le-djo dho nzá ringani ndi “tilo bí ri,” pli siri njudha tso ngadha dhi saa na.—Mt. 6:7. w22.07 24 §17-18
Thonji dyi, Bi 5 ddo 23
Ni si lo rr vita djo ndirigoti vita dhi lo djo. Anidi krr ndiro nzɨ ni nji do ró dhonalo fø lo dho ringani ndi njini nji, ro mwisho nzá d’e si ri.—Mt. 24:6.
Yesu d’rangʉeri nari kʉ ngasini ná saa na, nya ndi nanga nyá ná dhe ka ndi sie ngaba “njanga nǎ ro nja ngana.” (Lu. 21:11) Nde, fø lo ko chu nari ká ka ndi bbʉ ngoi ko dho ngbaribbai? Ko nanga nzá ka ndi keni nya ndi nanga nyá ná dhe ngaba nari dho ri. Ko d’i ri utso nari kʉ lo njini Yesu d’rangʉeri ri ka ndi njieni nari bbai nganga. Føri dho ko adi Yesu d’rangʉe ngasini ná saa na di ná ndrŭ dho ná i shauri dyø: “Anidi krr ndiro nzɨ ni nji do ró.” Nya ndi nanga nyá ná dhe banga nari adi kodhó anziro e ná programu sasa, ro nzɨ bba ddiro ni ngazø nari ma, njudha dhi ngana ni si nari ma na tso. Kodhó vichapo ma, video ma ndirigoti ndrŭ dhó maisha djo tilo ná lo si ngano ni dho nari kʉ, ni djoi ma, ni vei ma na tøni chi nì mai ndima bani kpakpalo na ro. w22.12 17 §4, 6
Mbʉnji dyi, Bi 5 ddo 24
Che kʉ ná lo adi krʉ kʉ ná ndrŭ ba.—Muh. 9:11, “Holy Bible—Easy-to-Read Version.”
Yakobo dhongʉeri wazi nari kʉ, ndi ji ndi dhi ddùna Yosefu bbo. (Mwa. 37:3, 4) Føri lingʉeri Yosefu njikpa nga dda njidha tso ke na. Fø ro kpa bangʉe chu ná saa na kpa dzingʉe Yosefu nanga Wamidiani bbá turusa ngʉ adi nji ná kpa na. Kpa rangʉe Yosefu na kilometre mamia djolu Misri nǎ, ná fø kpa dzingʉe ke nanga ki Farao bbá nga ngʉ adi b’o ná kpa djó bbonga Potifa na. Yosefu dhó maisha thika lengʉeni chʉ, ke ngʉe bbo ledzá baba ji ná ke, ro kpadjo ke kʉ Misri nǎ gʉna dhó hali kʉ ná noke! (Mwa. 39:1) Nja saa na, ko adi bani na nari kʉ, nì dhé “krʉ kʉ ná ndrŭ adi bani” na ná kpakpalo føri kʉ krʉ kʉ ná ndrŭ adi da lú ná lo. (1 Ko. 10:13) Inga njaro ko ka ko nzani ko kʉ Yesu unakpa nari djó dhé. Loroji na, ndrŭ ka ndima be ko pá, ko ka ko ba upinzani, inga ndrŭ ka ndima nzá ko nza kodhó udha djotsina. (2 Ti. 3:12) Njati rie ngbà di ná kpakpalo na ma ni bani ri ró, Yova ka ndi liri nidhó lo bbi bblo. w23.01 14-15 §3-4
Zanji dyi, Bi 5 ddo 25
Nga kalí kʉ ná nga nǎ ro kazz adi dhédhe.—Mez. 26:20.
Nja saa djo ri ka ndi uri ko tilo ko dho tani ná ko lai Mukristo na ke nji ko ró ná lo djo. Nì mai ri kʉ føro, ringani ko dhu i lo ko tso: ‘Ma ká famu njinjini ná lo bblo i ngbà?’ (Mez. 18:13) ‘Njaro ká nzá ke taeni ma dho ndá ri?’ (Muh. 7:20) ‘Ma i ká d’erie fø di ná kosa ro nji nzá?’ (Muh. 7:21, 22) ‘Nde, ke na ma rá loti nari ká ka ndi liri lo gʉ ngʉ che pli?’ Njati ko ba saa ko ddinga fø di ná ngadhudha djo ró, ko djoi ma, ko vei ma na laidjo ko kʉ na ná jidha ka ndi liri ko bbá fø lo pá. Ko krʉ adi ko kʉ Yesu unakpa nari dhǒ bbʉbbʉ kʉ ná jidha ko dhǒ ko djoi ma, ko vei ma na dho nzá mai kpa kaka ro nari chulu. Ko di bbʉbbʉ kʉ ná jidha dhǒ ró, nja ndrŭ maddi ka ndima d’i bbʉbbʉ dini utso d’i ndirigoti kpa ka ndima gba ndima tso ko na. Akora anzi jidha ko dhǒ nari na dhonalo fø lo ró le adi bbʉbbʉ Wakristo utso d’i. w23.03 31 §18-19
Yenga dyi, Bi 5 ddo 26
Mungu kʉ jidha.—1 Yo. 4:8.
Biblia adi ko tsotso kó nja ko famu Yova dhó bbo kʉ ná sifa d’e ná føri kʉ, jidha. Yova jirie ko bbo nari dho ke nzá tu nzá ko ka ko famu ná longa bbo Biblia nǎ ri. (Yoh. 21:25) Føri kina Yova adi jidha dhǒ ko dho ngbà ka ndi bbʉ heshima ko dho ná chulu ndi loti ko dho nari na. Biblia nǎ nzá ke bbʉ ngbà ko ka ko njí inga nzá ko ka ko njí ná lo dhi sheria dhi liste ro ri. Føri rɨngana ke adi kodhó ngaddidha ronga cho bbʉbbʉ kʉ ná maisha djó lo ma, unabi ma, njí le ka le njí na ná shauri ma na chulu ndiro ko vʉ longa bblo d’e. Fø chu nǎ Mungu dzá lo adi ko ronga cho ko ji ke ndirigoti ko rrnga ke dho ko thí nǎ ro krʉ. Biblia rid’ra Yova adi ndi dyu li bbo ko ro. Ká ngbaribbai? Ke dzá lo nǎ ngbaribbai ma ndrŭ adi ndima mbu nari lili, ko ka ko famu Biblia tilo djo ná fø kpa famu dhonalo fø kpa maddi ngʉ adi “ndima mbu ko bbai.” (Yak. 5:17) Bbo pli na mana kʉ nari kʉ, ngbaribbai ma ke njingʉeni ndrŭ na nari ndirigoti ri ko zø ná saa djo ko adi ri famu nari kʉ “Yova kʉ bbo ji dhi ke ndirigoti zølo dhi ke.”—Yak. 5:11. w23.02 6 §13-15
Wanzia dyi, Bi 5 ddo 27
Anib’o nidhó akili ronga, anidi kere!—1 Pe. 5:8.
Biblia nǎ ya mwisho kitabu nǎ lo tso ngani i lo na: “Mungu dhongʉe karrnga goti ka ndi si njini Kristo chulu ná lo ndidzá nokpá dho.” (Ufu. 1:1) Føri dho, ko adi ko dyu li dz’ djó njini ná lo ro dhonalo ko churi, ri rili Biblia nǎ unabi njini njí. Ndirigoti ko nanga ka ndi jini ji ko tilo nja ndrŭ na fø lo djo. Biblia nǎ unabi djo ko loti ná saa djo, nzɨ ko di rine ko tilo gosi ná saa djo si njini ná nja lo djo. Ká addudho? Dhonalo ko nzá jiri ko po kutaniko nanga ka ndi ndó ná lo ri. Loroji na, njaro ko ka ko rr ri dz’ djó bbobbonga ripo ndima si dz’ djó ndrŭ rrni nzɨ nari sisi ndirigoti ndima si b’odidha ma, ngoi ma na bbʉ. Fø lo 1 Watesalonike 5:3 nǎ kʉ ná unabi njini nari dhǒ nari ko poé nari rɨngana, ringani ko neri ko chu ø si ná vichapo ká po addu ma fø lo djo nari. Njati ko ti ná lo di ndi dyʉ Yova dhó tengenezo pʉ ná vichapo ro ró, ko adi kutaniko tsotso kó ndi tso gbani ddi, “ddikpa ngaddidha na.”—1 Ko. 1:10; 4:6. w23.02 16 §4-5
Ronji dyi, Bi 5 ddo 28
Adji punda djo ni tilo bbʉbbʉlo ma, nyenyenga ma, chølo ma na djo ndirigoti ni thó thá djó ri si ké dho le nanga keni ná ritsi nji.—Zb. 45:4.
Yesu Kristo ká ni jirie addudho? Yesu jingʉe bbʉbbʉlo ma, nyenyenga ma, chølo ma na. Njati rie ji ni jirie bbʉbbʉlo ma, chølo ma na ri ró ni ka ni ji Yesu maddi. Addinga ngbaribbai ma Yesu ngʉ bbʉbbʉlo ma, chølo ma na ddi nga nǎ do ro nari djo di. (Yoh. 18:37) Yesu ká dhongʉe nyenyenga ngbaribbai? Yesu dhó loroji ridho ke ngʉe nyenyenga na. Loroji na, ke ngʉ nji ná ritsi krʉ dho ke ngʉ adi madha bbʉ ndidzá Baba dho, nga ndi dho ri. (Mk. 10:17, 18; Yoh. 5:19) Nde, Yesu dhó nyenyenga ká adi rili ni mbu ni ngbaribbai? Bbʉbbʉ dhé, føri adi ni cho ni ji Mungu dhi Ddùna ndirigoti ni dyø ke. Yesu ká ngʉe nyenyenga na addudho? Ke ngʉe nyenyenga na dhonalo kʉ, ke jingʉe ndidzá Baba ndirigoti ke ngʉ ke dyø. (Zb. 18:35; Ebr. 1:3) Ni ká ka ni ndri ni ro chøchø nzá Yesu ro kaka nari bbai ndi dyøngʉe Yova dhó sifa ro? w23.03 3-4 §6-7
Gbonji dyi, Bi 5 ddo 29
Gadha sie thé, chølo dhi ndrŭ ndirigoti nga kʉ chølo dhi ri ná ndrŭ dho.—Mdo. 24:15.
Biblia tilo ga si ga ndima di dz’ djó theinga dho ná ndrŭ dhó aro kʉ ná kikundi djo, føri kʉ “chølo dhi ndrŭ” ndirigoti “nga kʉ chølo dhi ri ná ndrŭ.” “Chølo dhi ndrŭ” kʉ shi ndima ngʉe ro njingʉe njí Yova dho chi ndima tøni ro ná ndrŭ. Ro, “nga kʉ chølo dhi ri ná ndrŭ” kʉ, nzá njingʉe njí ro Yova dho ná ndrŭ. Aro kʉ ná fø kikundi si gaga nari dho ká ringani ko pori nari kʉ, kpa ró dho ndini shinga dhi buku nǎ? “Chølo dhi ndrŭ” dhó dhe njí, kpa ró dho ndieni b’lo shinga dhi buku nǎ. Nde, dhe goti ká kpa ró dho saeni sa fø buku nǎ ro? Nzá, dhonalo kpa kʉ “shi” Yova djǒ nǎ. Yova “nga e b’lo cheni ná ndrŭ dhi Mungu ri, ro shi di ná ndrŭ dhi Mungu, føri dho krʉ kʉ ná ndrŭ kʉ shi ke dho.” (Lu. 20:38) Føri mana kʉ, chølo dhi ndrŭ si ga ndima di dz’ djó ná saa djo, kpa ró dho sie nì shinga dhi buku nǎ, ro “kreyo” na le ndi ro.—Lu. 14:14 w22.09 16 §9-10
Thonji dyi, Bi 5 ddo 30
Yova Mungu dzingʉe kpetsi ke ndirigoti ke lingʉe ke Edeni dhi í na ndiro ke bbɨ ri nanga ndirigoti ke thɨ ri nanga d’e.—Mwa. 2:15.
Yova jingʉeri ya kwanza ndi no ná ndrŭ ba hwè ndi no ná ritsi nǎ ro. Adamu Mungu nongʉe ro ke lingʉe ke bblo pli kʉ ná paradiso na, ke pongʉeri ke bbɨ ri nanga ndirigoti ke ndri ri ki ndri. (Mwa. 2:8, 9) Addinga ritsi kpa (mbegu) nga nari ma, maua dhi nari ma na ndi ngʉ nja ná saa djo Adamu ngʉ ba ná hwè djo di. Edeni ronga b’odha ngʉe bbo pendeleo Adamu dho! Føri kina Yova pongʉeri Adamu bbʉ dho njonjo kʉ ná zǎ ro. (Mwa. 2:19, 20) Yova ka ndi bbʉe zǎ ró dho ndi ndiro maddi, ro føri rɨngana ke bbʉngʉe fø njí Adamu dhona. Bbʉbbʉ dhé, dho Adamu bbʉ zǎ ro nari njí ke ngʉ adi ri nja li ndi li ndi dyu ro, ke ngʉ adi ri ká njini ngbaribbai ma nari nja bblo. Adamu ngʉ adi hwè ba fø njí nǎ ro. Føri kongʉe ke tsotso ke famu Yova kʉ na ná nyodyu ma, ke no ná bblo pli kʉ ná ritsi ma na. w23.03 15 §3
Mbʉnji dyi, Bi 5 ddo 31
Ri si ri nanga d’rid’ri ndirigoti ri si fø pidhinga krʉ tso dyadya, ndirigoti ri ddiro si di choro nŭnŭ.—Dan. 2:44.
Anglo-Américaine le ddi sanamu kó na, ná føri kʉ dz’ djolu gble pinyo ná ya mwisho kʉ ná pidhinga, b’lo Biblia d’rangʉe ndi ro. (Da. 2:31-33) Ri goti nga ndrŭ dhó pidhinga ki ro sie ri. Føri rɨngana Mungu dhó Pidhinga si krʉ kʉ ná ndrŭ dhó pidhinga tso d’ød’ø Armagedoni dhi vita na. (Ufu. 16:13, 14, 16; 19:19, 20) Fø unabi nǎ ro ká ko ka ko ba faida ngbaribbai? Danieli dhó unabi ki ridho ko dho nari kʉ, ko ishi ngasini ná saa nǎ. Cho da 2 500 djolu b’lo ɨ Danieli pongʉeri ná nga djó ro: Babiloni goti sie pidhinga ki 4, ná fø pidhinga si Mungu dzá ndrŭ ronga lø bbo. Føri kina ke dhongʉeri nari kʉ, Anglo-américaine dhó pidhinga ka ndi ée ri dzá ya mwisho ri. Føri ko iso pɨ ndirigoti ri ngab’odha bbʉ ko dho dhonalo karrnga goti, Mungu dhó Pidhinga si ndrŭ dhó guvernema sa krʉ i dz’ djó ro, ndirigoti ri si pinyo dz’ lu djo. w22.07 4 §9; 5 §11-12