Bi 6

Yobu ngʉe hwè na ndima kana nga kʉ chøchø Yova na nari dho. Kedhó familia nǎ ndrŭ ngʉe bbo ndirigoti kpa ngʉe hwè na ndirigoti kedhó ngʉe mali bbo. (Yob. 1:1-5) Ro, ddikpa cha Yobu vingʉe ndidhó fø ritsi krʉ. Ya kwanza, ke vingʉe ndidhó mali. (Yob. 1:13-17) Føri goti kedzá bbo ke jingʉe ná nzø chengʉeni krʉ. Addinga Yobu ma, ndibbá le ma na bangʉe ná njedha djo, kpa rrngʉeri ndima dhi kumi kʉ ná nzø cheni krʉ ná saa na. Yobu thangʉe ndi ró ru nanga ndirigoti ke bungʉe ndi dz’ djo dzz ndi dzz ro. (Yob. 1:18-20) Shetani lingʉeri che bbo kʉ ná dhe tá Yobu ro ndirigoti ringʉe dopadha dhi dhe. (Yob. 2:6-8) Fø nga njí, ndrŭ ngʉ adi heshima bbʉ bbo Yobu dho ke ngʉ di ná ngana. Ndrŭ ngʉ adi si shauri ma ko ke tso ddi. (Yob. 31:18) B’lo ke bani fø lo na nari goti ndrŭ ngʉ adi ke nyínyi. Ke djoi ma, kedhó bbakau ma, kedhó njí dhi kpa ma na krʉ bbangʉe ke bba!​—Yob. 19:13, 14, 16. w22.06 21 §5-6

Batiso goti, ko krʉ dho ringani ko njinjí mutume Paulo bbʉngʉe Waefeso nǎ Wakristo dho ná shauri na. Ke lingʉe kpa kpakpa kpa é “dhidhi” kiroho nǎ ná Wakristo d’e. (Efe. 4:13) Føri kʉ nja chu nǎ le ripo ‘Anira anzi maendeleo ni nji kiroho nǎ nari na’ ri. Ni kʉ b’lo ni ji Yova bbo ro. Ro, nidhó jidha ki ka ndi dhidhi fø nga djolu maddi. Ká ngbaribbai? Ddikpa chu mutume Paulo d’rangʉe Wafilipi 1:9 nǎ. Ke nzingʉeri Filipi nǎ ndrŭ tso kpadhó jidha “dhidhi bbo pli.” Føri dzá lo dho kodhó jidha maddi ka ndi dhidhi Yova djo. Ko ká ka ko njiri fø ngbaribbai? Ko ka ko njiri fø “bbʉbbʉ kʉ ná lo ko chu ndirigoti ri nanga ko ne” nari chulu. Bbo ko di lo chu Yova djo ró, kodhó jidha maddi adi dhidhi ke djo ndirigoti kedhó sifa ma, ke lo nji ná chu ma na adi hwè bbʉ ko dho. Ko adi riji ko bbʉ hwè ke thí dho, ná føri adi ngʉ kpakpa ndirigoti ko nzɨ adi riji ko bbʉ njedha ro ke dho ri. Ko adi kpakpanga nji ko famu ke ji ná lo ndirigoti ngbaribbai ma ko ka ko njiri fø nari d’e. w22.08 2-3 §3-4

Ufunuo dzá buku nǎ ndini ná lo nga kʉ ndrŭ krʉ dho ri, ro ri kʉ ko kpali dho Mungu dzá njí dhi ndrŭ ko kʉ ro. Ko kʉ Mungu dzá ndrŭ nari dho, ko nanga nzɨ adi keni ko rá riba nari kʉ, ko ma njínji ddi ndiro fø buku nǎ kʉ ná unabi njini d’e nari dho ri. Mutume Yohana dhongʉe ngbá saa na ma fø unabi kpari si njini nari dhǒ. Ke pongʉeri ɨ: “Roho chulu, ma bangʉe ma Bboke dzá ddo dyina.” (Ufu. 1:10) Yohana ndingʉe fø lo cho 96 na Y.G.G., ná saa na “Bboke dzá ddo” ngʉe nzá ndi d’e si go ro. (Mt. 25:14, 19; Lu. 19:12) Ro, Biblia nǎ unabi ridho nari bbai, fø ddo tso ngangʉeni 1914 na Yesu ngangʉe pinyodha tso ra na ná nga djó ro. Fø cho djó ro Ufunuo nǎ Mungu dzá ndrŭ ronga lø ná unabi ngangʉe nji ndi njini nari tso. Bbʉbbʉ dhé, njʉ ko di “Bboke dzá ddo” dhi saa nǎ”!​—Ufu. 1:3. w22.05 2 §2-3

Tso nǎ zǎ ma, kali dhi nabi ma na le bungʉe kiberiti dhi kazz dhi jʉdda na go ndima kʉ shi ro. Føri dho, Mungu si ndidhó mbubai sa theinga dho godhé kpa pinyo ro. Fø lo na mana ká kʉ addu ko dho? Ko kʉ Wakristo nari dho, ringani ko tøni chi Mungu dho ndirigoti kedhó Pidhinga dho. (Yoh. 18:36) Ringani nzɨ ko tsu ko ro i dz’ djó politike dhi lo na. Ro, føri ka ndi é kpakpa bbo dhonalo kʉ, i dz’ djó guvernema riji nari kʉ ko ti ná lo ma, ko nji ná lo ma na chulu ko gba ko tso ndima na. Kpakpanga na le cho ndima nari dho ndima tso gba fø guvernema na ná ndrŭ i adi tsó nǎ zǎ dhó alama ba. (Ufu. 13:16, 17) Ndirigoti fø alama tso u ná ndrŭ tso nzɨ Yova adi uri ndirigoti kpa nzɨ si choro nŭnŭ di ná shinga ro ba ri. (Ufu. 14:9, 10; 20:4) Njati rie ngbaribbai ma guvernema ke ko cho ri ró, bbo na mana kʉ ná lo kʉ nzɨ ko tsu ko ro politiki dhi lo na! w22.05 10-11 §12-13

Ni ka ni li ni nji ná ddikpa muradi kʉ, ni chu ni ka ni njí na njí ná ufundi nga. Njati ko di rine ko é ufundi na bbo ró, ko dhona madaraka si bbʉni bbo. Anzi ngaddi ngbá ngatsi ma Beteli chidha ma, Asamble dhi nga chidha ma, Pidhinga dzá dza chidha ma na u njí dhi ndrŭ nari djo. Fø njí dhi kpa kana bí kʉ ná kpa ufundi ba bblo chu njínjidha ná le-djoi ma, le-vei ma na dhó ro. Njʉ, le-djoi ma, le-vei ma na ufundi ba ndiro ndima kó Asamble dhi nga ma, Pidhinga dzá dza ma na ró ngathɨdha dhi njí tsotso d’e. Fø chulu, “theinga dho di ná Pi” Yova Mungu ma, Yesu Kristo, “pikpa dhi . . . Pi” ma na ufundi na kʉ ná kpa tsotso kó nja ndima njí ké dho le nanga keni ná njí d’e. (1 Ti. 1:17; 6:15) Ko jiri ko njí kpakpanga bbo ndiro ko njinjí kodhó ufundi na Yova madha dho, ro nga ko madha dho ri.​—Yoh. 8:54. w22.04 24 §7; 25 §11

Sulemani dhó ngʉe mali ké ka ndi ke le nanga ná ngatsi, ndirigoti ke ngʉ di bblo kʉ ná maisha nǎ ndirigoti ke ngʉ di bblo kʉ ná dza nǎ. (1 Fa. 10:7, 14, 5) Ro, Yesu dhó nga ritsi dja ngʉeri ndirigoti ke bbá nga ro ma nga ddi ngʉeri. (Mt. 8:20) Nì mai ri kʉ fø ro, aro kʉ ná fø kpetsi kpa ngʉe bblo kʉ ná nganjadha na kimwili nǎ ritsi djo, dhonalo kpadhó nyodyu ngʉ si ddikpa ke dhó ro, føri ngʉe Yova Mungu. Sulemani pongʉeri nari kʉ, njati kodhó é mbø ró, ko ka ko dzi kodhó lo u ná ritsi ndirigoti ko ji ná ritsi. Nì mai Sulemani dhó mali ngʉe bbo ro, ke chungʉeri chu nari kʉ bbo na mana kʉ mbø djolu ná ddikpa ritsi ro kʉ thé. Loroji na, ke ndingʉeri: “Bblo dho [inga “bblo nyi” maelezo ya chini] kʉ bblo pli bbo kʉ ná mali djolu.” (Mez. 22:1) Sulemani pongʉeri mbø ji ná ndrŭ nanga ro nzɨ adi jini ndima kʉ na ná ritsi dho ri. (Muh. 5:10, 12) Ndirigoti ke pongʉeri, ri nzá ngani ko nja mbø bbo na mana kʉ ná ritsi ri, dhonalo njati kodhó mbø é ngbá ngatsi ma ró ri ka ndi sini tse.​—Mez. 23:4, 5. w22.05 21 §4-5

Ko di ngaddi Yova nji ko dho ná ritsi djo ró, føri adi rili ko kana kau é ke na kpakpa. Ndirigoti ko di ngaddi Yova tsoni ndi si nji ko dho gosi ná saa na ná bblo kʉ ná lo djo ró, ko adi rivʉ ko njínji ke dho theinga dho. Fø lo krʉ adi ko tsotso kó ndiro ko njinjí Yova dho hwè na njʉ d’e. Yova “si tøni” kodhi lo dho che kʉ ná i dz’ tso ndi si d’ø ná saa na. Ko uri u nari kʉ Yova kʉ “chølo dhi Mungu” nari dho ke nzɨ si ribba Shetani dhó i dz’ di bicha ri. (Isa. 25:9) Ko kʉ ngatsovedha na Yova si ko gøgø ná fø ddo ko b’o ro. Fø lo krʉ kana ko vʉri vʉ ko rá anzi sala ko nji nari na, Mungu dzá Lo nanga ko ne ndirigoti ri na ko njínji nari na ndirigoti Yova bbʉ ko dho ná ledha djo ko ngaddi nari na. Fø ko rinji ná saa na Yova ko tsotso kó, ko ve ngatso hwè na ndi dho ko madha bbʉ nari kana. w22.11 13 §18-19

Nzá mai Biblia tilo bbo Timoteo dhó batiso djo ro, akoddinga ngbá ngatsi ma kedzá mama Eunike ka ndi bae hwè fø dyi nari djo. (Mez. 23:25) Eunike ngʉ bani kpakpalo na ndi ngʉ longaddi ndidzá ngba dho nja ngba ji Yova ma, le Ddù Yesu Kristo ma na d’e nari kana. Timoteo dzá gø dhi ndrŭ nga ngʉe ddikpa dini nǎ ri. Kedzá baba ngʉe Mugiriki ndirigoti kedzá mama ma, kedzá mamai ma na ngʉe Wayaudi. (Mdo. 16:1) Timoteo dzá mama ma, kedzá mamai ma na ngʉngʉe Wakristo nari ngʉe go ke kʉ jadda ri. Ro, kedzá baba i nzá dhé ngʉngʉe Mukristo ri. Timoteo ká ka ndi vʉe ngbá dini? Føri bbai, njʉ kʉ Wakristo ná isɨ ndrŭ maddi jirie ndima dhó familia ji. Føri djolu pli, kpa adi riji ndima kó ndima dhi nzø tsotso ndiro kpa ngʉ Yova dzá kau d’e. Ndirigoti kodhi Mungu adi fø ndrŭ nji na kpakpanga nja mana na bbo. (Mez. 1:8, 9) Yova ko bí kʉ ná isɨ ndrŭ tsotso b’lo ndiro kpa ddi longa ndima dhi nzø dho nzø ji ndi ndirigoti nzø njinjí ndi dho d’e. w22.04 16 §1-3

Karrnga goti Yova si rili politiki nǎ bbobbokpa thí na, “kpa njí ndi ji ná lo.” Føri ká si ngbá matokeo bbʉ? Politiki nǎ bbobbokpa, fø “kumi kʉ ná pikpa” si kʉ leni kali dhi dini ro ndirigoti kpa si ri sasa. (Ufu. 17:1, 2, 12, 16) Bbò Babiloni dzá mwisho kʉ chøchø nari ká ko chu ngbaribbai? Nja ko ngʉ fø ngadhudha goti d’e, ri kʉ bbo na mana kʉ ná lo ko chu nari kʉ drrdrr Babiloni dhi bba ronga Efrata le ngʉ nzǐ ná Bbò Dda ngʉ adi b’o ddikpa nga laidjó ro. Ufunuo dzá buku ddi Bbò Babiloni tsotso adi kó ná mamilioni kʉ ná ndrŭ, ri ronga b’o ná “dda” na. (Ufu. 17:15) Ro, ri dhori ki nari kʉ, dda ka ndi sie ‘ngøngø’ ná føri na mana kʉ kali dhi dini si kʉ ndima tsotso kó ná fø ndrŭ vivi. (Ufu. 16:12) Fø unabi njini nji njʉ, dhonalo bí kʉ ná ndrŭ tuni tu kali dhi dini nǎ ro, ndirigoti ndrŭ ndima dhó kpakpalo ká ndima si ngbaribbai ma nari ne d’i chulu. w22.07 5-6 §14-15

Ndrŭ zø ko nji nari na ko adi ridho, ko mbai po Yova dhó zølo dho. Ddikpa loroji nǎ, Yesu ddingʉe Yova ddikpa patro na. Fø patro njingʉe ndidhó nokpá kana ddikpa ke zø, nì mai ke nǎ deni ngʉe bbo nzá ke ka ndi bbʉe ná ngatsi ro. Nì mai ri kʉ føro, fø noke nzá njingʉe sese nǎ ndidhó mbø ngʉe ná noke zø ri. (Mt. 18:23-35) Yesu ká ngʉ riji ndi ddi ngbá lo ko dho? Njati rie nì ko adi mbai po Yova dho ke dho ko laidjo ná bbo zølo dho ri ró, føri ka ndi cho ko ronga ko njí nja ndrŭ zø maddi. (Zb. 103:9) B’lo da ná cho nǎ Dzamu dhi Munara pongʉeri: “Rie ngbá ngatsi ma ko adi ko lai ndrŭ zø nji ri ró, ri nzá si Mungu adi krʉ ndrŭ zø nji Kristo chulu ná ngatsi ri.” Ndrŭ zø nji ná ndrŭ zø maddi si kʉ njini nji. Yova adi ndidzá zølo dhǒ nì nja ndrŭ zø nji ná ndrŭ dho. (Mt. 5:7) Yesu dhongʉe fø lo pʉlʉpʉlʉ ndi unakpa dho ndi ngʉ ngbaribbai ma, le ka le njí sala nari ddi ná saa na.​—Mt. 6:14, 15. w22.06 10 §8-9

Yesu gøngʉeni dz’ djo ndrŭ bbai. Ke dyøngʉe ndidzá Baba dhó sifa kaka nari bbai. (Yoh. 14:9) Føri dho ko di lochu Yesu djo ró, ko ka ko chu Yova Mungu bblo ndirigoti ko ka ko ji ke ji. Ko adi faida ba Yesu dhó mafundisho nǎ ro ndirigoti ngbaribbai ma, ke adi chutso ddá Wakristo dhó kutaniko dho njʉ nari nǎ ro maddi. Ke ddingʉe addu ma ko ka ko njí nari ko dho ndiro ko tso uni Yova na d’e. Ndirigoti Yesu dhe nari nǎ ro ko krʉ ka ko ba faida. Yesu gangʉe nari goti, Yova ungʉe ndi Ddù bbʉ ndi kaka ná bbʉdha nari tso u, nari “sa kodhi krʉ kʉ ná chenga” d’e. (1 Yo. 1:7) Kpadjo ke kʉ kpakpanga na kʉ ná nzɨ ro dhedhe ná Pi. Karrnga goti, Yesu si su djo nanga d’rid’ri. (Mwa. 3:15) Mungu dzá ndrŭ sie hwè na bbo Shetani le si sa ná saa na! Nzɨ bbari ni njeni kpø fø ddo si ná nga djo. Kodhi Mungu kaka le li le thí ndi djo. Isɨle nǎ gø chulu, ke si bí kʉ ná ledha bbʉ dz’ djó “krʉ kʉ ná ndrŭ tsɨ dho. w22.07 18 §13; 19 §19

Muradi ko li ko nji ná saa na, ringani ko e dhʉdhʉ. Ká addudho? Dhonalo, ko nzá ka ko chu ngbaribbai ma kodhó lo sie nari ro krʉ ri. Loroji na: Mutume Paulo kongʉe ngatsotso ndiro ndi kló ø kutaniko tso Tesalonike nǎ ddikpa bbagʉ d’e. Ro wapinzani njingʉe kpakpanga ndiro Paulo rára fø bbagʉ ro d’e. (Mdo. 17:1-5, 10) Njati Paulo mae ma ró, ke ka ndi tsue le djoi hatari na. Ro, Paulo nzá bbangʉe kpa tsotso ndi kó nari tso ro ri. Fø nga rɨngana ke gbangʉe ndi tso lo thika øni nari na. Ke chongʉe Timoteo ndi kó Tesalonike nǎ ø ngʉngʉe Wakristo ná ndrŭ tsotso ndiro kpa é kpakpa kʉ ná udha na d’e. (1 Te. 3:1, 2) Bbʉbbʉ dhé, Tesalonike nǎ Wakristo nanga jingʉeni bbo. Ko ka ko ba somo Paulo bangʉeni na Tesalonike nǎ ná lo nǎ ro. Njaro ko ka ko li muradi ko nji, ro kodhó kʉ ná hali thika ka ndi léni le, ná føri ka ndi cho ko tso kodhó muradi djo ko tso si nari ró. (Muh. 9:11) Njati nidhó hali bbʉ ndi fø ró, adi tayari ni li ngbà djo ni ka ni si ná muradi ni nji. w22.04 25-26 §14-15

Yova adi ko iso pɨ gosi ná saa djo ndi bbʉ ko dho ná ngab’odha chulu. Akonja Biblia nǎ ko iso ka ndi pɨ ná lo ro sese njati rie kpakpalo na ko bani ri ró. Biblia nǎ Yova pori ko dho nari kʉ, ddikpa ritsi ro ma nzá ddi “ka ndi ndó ko kana nga ro [kedzá] jidha na ri.” Fø lo kana kʉ bbo pli kʉ ná kpapalo ro mai. (Ro. 8:38, 39) Føri goti ke pori ko dho nari kʉ, ndi “kʉ chøchø krʉ ndi nzǐ” sala chulu ná ndrŭ ró. (Zb. 145:18) Yova rid’ra ko dho njati ko li ko thí ndi djo ró, ko ka ko ve krʉ kʉ ná kpakpalo tso ve ndirigoti ko ka ko é hwè na nì mai ko nzani nza ro. (1 Ko. 10:13; Yak. 1:2) Godhé, Mungu dzá Lo ripo nari kʉ, ko ba ná kpakpalo kʉ sese kʉ ná saa dho ndirigoti sese pli le ddi ndi ke si bbʉ ko dho ná choro nŭnŭ di ná shinga na ró. (2 Ko. 4:16-18) Yova bbʉ ko dho ná bbʉbbʉ kʉ ná ngab’odha kʉ, ndi si krʉ kʉ ná kpakpalo adi bbʉ ná ke Shetani Ibilisi sasa ndirigoti ke bbai chelo nji ná ndrŭ ma na. (Zb. 37:10) Ni ká lirie ni tsotso ka ndi kó ná verse ro ngbà ni djǒ nǎ ndiri si ni tsotso ko gosi ná saa na ni si bani na ná kpakpalo na d’e? w22.08 11 §10-11

Ni ká d’e rie ri ro dhu ni tso b’lo, ni dho ká ri ka ndi kaka ni rá anzi krʉ ddo ró ndirigoti krʉ cho ró Yova dhó chølo dhi sheria na ni njínji nari na? Yova tsoni djo nari kʉ, kodhó chølo sie “dda gru bbai.” (Isa. 48:18) Addinga ni tøni ddikpa bbo jʉdda tso ró, ni dda gru ndi bú nga dhi mwisho ro nari nja. Føga ni tøni ná saa na, ká ni ka ni ddiri ddikpa cha fø dda gru ka si tøni tø maddi? Nzá! Ni churi chu nari kʉ, føri si ndi bú fø dhé. Nidzá chølo ka ndi é ddiddi jʉdda djó dda gru bbai! Ká ngbaribbai? Ddikpa lo nanga ni vʉ nari njí, addinga Yova ká ka ndi jieri ni njí addu nari djo. Føri goti anji fø lo. Longavʉdha é kpakpa ngbá ngatsi ma ró, nidzá ji dhi Baba ka ndi é krʉ ddo ró ni kuso ndiro ndi bbʉ kpakpanga ni dho ndirigoti ndi kó ni tsotso ni rá anzi chølo ni nji krʉ ddo ró nari na d’e.​—Isa. 40:29-31. w22.08 30 §15-17

Cho 1 000 tso dyani nari goti tse, le si kʉ Shetani kloklo. Fø ro ke si kʉ rimbu ndi sha kaka ná ndrŭ. Fø mbudha dhi saa na, dz’ djó di ná kaka ná ndrŭ krʉ si chu ba ndima dhori pʉlʉpʉlʉ ndima madha bbʉ Mungu ró dho dho ndirigoti ndima ndima tso gba nì Mungu dhó Pidhinga na. (Ufu. 20:8-10) Fø saa na kila mutu si nji ná lo i si ridho ndi ró dho ká ka ndi má ma shinga dhi buku na nari. Nzá dhó hesabu chuni ná ndrŭ si kʉ ridho ndima kʉ Adamu ma, Eva ma na bbai, Yova dhó Pidhinga ndima si gʉ nari chulu. Nde, fø ndrŭ ká ngbá lo si ba? Ufunuo 20:15 pori ko dho: “Nzá ró dho le bangʉe shinga dhi buku nǎ ná ndrŭ krʉ le bungʉe jʉdda dhi kazz na.” Bbʉbbʉ dhé, fø tsatsa ná ndrŭ le si sasa theinga dho. Ro, kaka ná ndrŭ ró binga si dada ya mwisho bbo mbudha lu. Føro le si kpa ró dho ndi shinga dhi buku na theinga dho. w22.09 23-24 §15-16

Karne ya kwanza nǎ kutaniko nǎ nja kpa ngʉ adi ripo, nga ngʉe Wayahudi ná Wakristo dho ringani ndima njí tohara, njaro føro nzá nja Wayaudi ka ndima die kpa nja che ri. (Gal. 6:12) Mutume Paulo nzá ungʉe kpadhó fø nganjadha tso ro ri, fø nga rɨngana ke pongʉeri le ne fø lo nanga vi, nyenyenga na ke kongʉe shauri mitume tsó ndirigoti Yerusalemu nǎ ngʉe ná wazee tsó. (Mdo. 15:2) Fø lo bbʉngʉe ná matokeo ngʉe, ri kongʉe nja kʉ ná Wakristo tsotso ndima b’o kutaniko nǎ hwè ma, ngoi ma na ronga. (Mdo. 15:30, 31) Njati ddikpa nzɨ dho le rrni ná lo banga ró, ko ka ko b’o kutaniko nǎ ngoi ronga Yova li kutaniko ronga b’odha dho ná kpa dhó ro ko chutsoddadha ne nari chulu. Bí ina Biblia ró dyʉ ndi ná chutsoddadha ka ndi bani kodhó vichapo na inga tengenezo bbʉ ná chutsoddadha na. Njati ko di fø lojadha dyø ko nganga dhó nganjadha ko dyøé nari rɨngana ró, ko si rili ngoi é kutaniko nǎ. w22.08 22 §8-9

Nja saa na, kodhó lo jirie kodhó lo ko ka ko d’ra dho ná kau. Ro, nja saa djo føri ka ndi é kpakpa. Njaro ri nga e sʉsʉ ko dho ko d’ra ko thí nǎ ko ddi ná lo kau dho ri. Ro, ko d’rari ke dho ndirigoti ko rá ri utso d’i ke d’ra fø lo nja ndrŭ dho ró, føri adi ko thí bʉbʉ. Føri rɨngana, njati ko d’ra ngbaribbai ma ko ko mbu nari kodhó ddikpa kau dho ndirigoti ke rá føri ro d’ra nja ndrŭ dho nzá ró, ko nanga adi jini bbo. Chuchuni siri ronga b’odha dho ná wazee kʉ “ru le ka le runi vʉvʉ ró nanga ndirigoti ngatso le ka le nyi nanga” le-djoi dho. (Isa. 32:2) Ko churi chu nari kʉ, ko ka ko d’ra krʉ kʉ ná lo fø kpetsi kpa dho, ro kpa nzɨ ra kʉ ri ro d’ra d’i ndrŭ dho ri. Ko nzɨ adi kpa cho kpa d’ra siri dhi lo ko dho ri. Føri kina, ko nanga adi jini bbo wazee bbá isɨ ndrŭ dho, dhonalo ndrŭ nzɨ adi rine wazee d’ra siri kʉ ná lo ndima dho ri. Bbʉbbʉ dhé, ri kʉ ledha njati muzee bbá le di ndi djoi ma, ndi vei ma na dhó siri dhi lo djo loti nzá ró. w22.09 11 §10-11

Ko ka ko uri u nari kʉ, Yova si ndidzá chi tøni ná njí dhi kpa gøgø “bbo mbudha” dhi saa na. (Mt. 24:21; Da. 12:1) Ke si fø lo nji Gogu dhi Magogu føri kʉ, ndrŭ tsɨ gba ndima tso ná ri si lɨ ta chi tøni Yova dho ná ndrŭ tso ro ná saa na. Ngbà mai ndrŭ tsɨ gba ndima tso nari inga ONU tsu ndi nǎ 193 kʉ ná bba ro, kpa dho nzɨ ri ro si ka ndima hwini Bbo pli kʉ bbonga na ná ke ma, kedhó ra nǎ bbasødda ma na tso ró ri! Yova tsoni ɨ: “Ma si rili ma máni ma ndirigoti ma tsetse ndirigoti ma si rili ma nyi chuni chu bí kʉ ná ndrŭ tsɨ kpari nyǒ njí; ndirigoti kpa dho ri si ngani ndima churi nari kʉ, ma kʉ Yova.” (Eze. 38:14-16, 23) Mungu dhó vita tso si ngani b’lo ró, ri tso si d’ø kpø Armagedoni djo, fø saa na ke “si dz’ lú djó kʉ ná pikpa tso d’ød’ø.” (Ufu. 16:14, 16; 19:19-21) Ro, “chølo dhi ndrŭ dhé si ma dz’ djo ndirigoti nì kʉ chi Yova dho ná ndrŭ dhé si di ri djó.”​—Mez. 2:21, maelezo ya chini. w22.10 16-17 §16-17

Ko nzá ka ko chu ndrŭ thí nǎ lo ro ri, ri kʉ “Yova dhé adi ndrŭ ronga choe ná lo chu ri.” (Mez. 16:2) Ke jirie krʉ namna dhi ndrŭ ma, krʉ ngø nǎ ro si ná ndrŭ ma ndirigoti krʉ desturi dhi ndrŭ ma na. Ndirigoti Yova rija ko dho ko “wé [ko] thí tso pʉlʉ.” (2 Ko. 6:13) Ko adi rine ko ji ko djoi ma, ko vei ma na ji ro nga ko di lod’i kpa djo ri. Ndirigoti fø lo na mana kʉ, ri nzá ngani ko di lod’i nga kʉ kutaniko nǎ ná ndrŭ djo maddi ri. Ni ká d’e rie lo ro d’i nidhó familia nǎ nga kʉ Yova dzá Dimu ná ddikpa le djo nzá, ɨ ni ripo nari na, “Fø ke nzɨ Yova dzá lo ro rr ngbá dyi maddi ri”? Bbʉbbʉ dhé, føri kʉ lo nji le da ri ndirigoti pli le le nja, chølo dhi ke nja ndrŭ djolu ri. Yova bba saa godhé “krʉ ngalu kʉ ná ndrŭ krʉ dho” nja kpa leni le d’e. (Mdo. 17:30) Krʉ ddo ró adi ngano nari kʉ, pli ndima nja chølo dhi ndrŭ nja ndrŭ djolu ná føri nga kʉ chølo dhi ndrŭ ri. Akobbari Yova dhó chølo dhi sheria ko ji nari bbʉ hwè ko dho ndirigoti ri kó ko tsotso ko é bblo kʉ ná loroji nja ndrŭ dho, ndiro kpa ji ko ndirigoti kpa ji Mungu bbo d’e. w22.08 31 §20-22

Ko ka ko churi chu nari kʉ nja ndrŭ ka ndima gʉ kodhó lo gʉ. Njaro føri si njini bbo pli gosi ná saa na. (Da. 11:44; 2 Ti. 3:12; Ufu. 16:21) Godhé ko ka ko uri u nari kʉ Yova si ko tsotso ko nì. Ká addudho? Yova adi ndi dho njínji ná ndrŭ tsotso kó krʉ ddo ró ndiro kpa njí ndima dhó bbʉni ná njí rie ngbǎ di ná kpakpalo na ma kpa bani ri ró. Akonja Babiloni nǎ ngʉe no tsena ná Wayaudi dho ngʉ lod’ra ná nabi Ezekieli bangʉeni na ná lo. Nabi Ezekieli ká ngʉ lod’ra ngbǎ di ná ndrŭ dho? Yova nzingʉe kpa “kpakpa djǒ dyu ná ndrŭ,” “kpakpa thí kʉ ná ndrŭ” ndirigoti “tsatsa ná ndrŭ” Kpa kʉ che bbo pli kpelé bbai ndirigoti hatari ranga (scorpions) bbai. Føri dzá lo dho Yova ngʉ ripo bí ina Ezekieli dho: “Nzɨ nji do”! (Eze. 2:3-6.) Ri kangʉe ka Ezekieli d’ra ndi ngʉ d’ra ná lo dhonalo (1) ke Yova chongʉe, (2) ke dho Mungu dhó roho ngʉ kpakpanga bbʉ, ndirigoti (3) ke ngʉ ndi ngu Mungu dzá lo na. w22.11 2 §1-2

Dz’ djó shi di ná ritsi krʉ Yova nongʉe ndima ka si cheni che ddikpa cha, ro nga ndrŭ ri. Ke nongʉe ndrŭ nzɨ ndima ro cheni ché. Føri kina Yova nongʉe ko ko é shi ko ka ko di nari dhi ù na. Biblia pori ndrŭ djo nari kʉ, Mungu “lingʉe choro nŭnŭ di ná shinga ndrŭ thí na.” (Muh. 3:11) Føri kʉ dhe ko adi nzǐ mbuba dho ná ddikpa lo. (1 Ko. 15:26) Njati dhe lø ko ró ká ko adi di nzá ko nji ddikpa lo ro ndirigoti ko b’o ko si dhe ná saa dhé? Nzɨ. Bí ina ko adi ra dawa djo inga ko adi dawa kpa cho ndiro ko ró dhe sini d’e. Bbʉbbʉ dhé, ko adi ko dho ka ná lo nji krʉ ndiro nzɨ ko dhe ró. Ndirigoti njati ji ko ji ná ddikpa le dhe, ro le é ngó inga jadda ma ró ko thí ronga adi vo bbo ndirigoti ddo bí kana. (Yoh. 11:32, 33) Bbʉbbʉ dhé, ko ka ko chu lo choro nŭnŭ ndirigoti ko é ù na ko di theinga dho ko no ná ke nongʉe ko fø. Fø lo ridho nari kʉ, ke si rili ko di shi theinga dho. w22.12 3 §5; 4 §7

Ko lai bí kʉ ná Wakristo ka ndima é dhe na, do na, ndirigoti ddiro kʉ nari bbai ndima ndima mbu kpakpalo dhi saa na ro. Adi loti ni djoi ma, ni vei ma na na. Nya ndi nanga nyá ná dhe ka ndi liri ko di da ko lai Wakristo ró ro. Fø di ná saa na ni ka ni mbu ni mutume Yohana bbai. Ke jingʉeri ndi nja ndidhi djona Gayo ndi ronga na. (3 Yo. 13, 14) Ro, Yohana chungʉeri chu nari kʉ ddikpa saa ro dho nzá ndi ka ndi njae ke ro ri. Yohana njingʉe ngbà ndi ka ndi njie ná lo, ke ndingʉe barua Gayo dho. Njati rie nzá ri ka ndi ka ni dho ni rá ni djoi ma, ni vei ma na ronga bé ri ró, aneri ni tilo kpa na nja d’i chu nǎ. Ni di loti ni lai Wakristo na ró, ni si ni mbu nga kʉ ddiro nari bbai ndirigoti ngoi na. Njati ni rá ri utso d’i ni nanga ri d’o bbo ró, anzi wazee ndirigoti au kpadhó jidha dhi le tsotsokodha tso.​—Isa. 32:1, 2. w22.12 17-18 §6-7

Biblia ripo, ddikpa saa na le tangʉe Yosefu kó tso shene na ndirigoti le tsungʉe ke chu chuma kana. (Zb. 105:17, 18) Yosefu dhó lo tso ngʉ ra che bbo. Ke ngʉe lɨ djó le li le thí ná noke, ro kpadjo ke ngʉ gʉna dhó hali kʉ prizo nǎ ná ke. Ni ro ká barieni b’lo che bbo pli kʉ ná hali na, nì mai ni sala nji bbo ro? Fø lo ka ndi njini ngbà. Yova nzá ká ndi cho chelo ko ba Shetani pinyo djó ná i dz’ djó nari tso ro ri. (1 Yo. 5:19) Ro, achuri nari kʉ, Yova chu ni da lú ná lo ngbà ndirigoti ke ngaddi ni djo nì. (Mt. 10:29-31; 1 Pe. 5:6, 7) Føri djolu pli ke tsoni: “Ma ka ni bba nzɨ, ma ká ni bu pɨpɨnanga nzɨ.” (Ebr. 13:5) Yova ka ndi kó ni tsotso ko dhé ri di njani ngadhi ngab’odha ro ni kʉ nari bbai ma ró. w23.01 16 §7-8

Biblia adi Yova dhó jidha dhǒ ko dho nja chulu maddi. Biblia rid’ra ko dho nari kʉ, kodhi Mungu nzɨ bba ko ro kosa ko nji ná saa djo maddi ri. Waizraeli ngʉ adi chenga nji bí ina, ro njati kpa leni le ró Mungu ngʉ adi kpa zø njinji. Karne ya kwanza nǎ Wakristo chungʉe nari kʉ Mungu ji ndima bbo. Roho ddangʉe chutso mutume Paulo dho ro ke pongʉeri ndi lai Wakristo dho kpa di bbo chenga nji na le leni ná ke “zø njinji ndirigoti kpa di ke iso pɨpɨ.” (2 Ko. 2:6, 7; 1 Ko. 5:1-5) Yova nzá bbangʉe ndidzá ndrŭ ro kpa ngʉ chenga nji nari djotsina maddi ri! Føri rɨngana jidha na ke ngʉ adi malipizi bbʉ kpa dho ndirigoti ke ngʉ adi kpa ki nzǐ ndiro kpa ki ngʉ ndidzá bbakau vi d’e. Ke tsoni ndi si rinji fø chenga nji ná le leni ná ndrŭ krʉ dho. (Yak. 4:8-10) Biblia adi Mungu dhó nyodyu ma, chølo ma, jidha ma na dhǒ. Fø buku ridho nari kʉ, Yova jirie ko chu ndi chu ndirigoti ke adi riji ko ngʉ ndidzá bbakau. w23.02 7 §16-17

Ko kʉ bblo kʉ ná sababu na ko nja dz’ djó njini ná lo dhonalo ri rili Biblia nǎ unabi njini njí. Loroji na, Yesu bbʉngʉe ko tsotso ka ndi kó ná njonjo alama nja ko nja Shetani dhó i dz’ si ndidzá mwisho nǎ nari d’e. (Mt. 24:3-14) Mutume Petro ko li kpapka ko di ko dyu li unabi njini nari ro ndiro kodhó udha é kpakpa d’e. (2 Pe. 1:20, 21) Ke jiri ko é bblo kʉ ná nganjadha na Biblia nǎ unabi ko zø ná saa djo. Ke pori ko “b’o Yova dhó ddo ronga ko djǒ nǎ.” (2 Pe. 3:11-13) Ká addudho? Ri nga kʉ Yova ká si Armagedoni bbʉ ngbá saa djo inga ngbá dyi ma nari ko ji ko chu nari dho ri, ro ko jiri ko njínji ma gʉ ma ná fø saa na nja ko é “tse kodhó nyi tse ro ndirigoti nì ko kʉ Mungu dho le le bbʉ ná nyi na ro.” (Mt. 24:36; Lu. 12:40) Ko adi riji kodhó nyi é bblo ndirigoti ko dhǒ Yova laidjo ko kʉ na ná jidha kedzá njí ko nji kpakpanga na nari chulu. Ndiro ko li ko thí fø lo djo d’e, ringani ko b’o ko ronga b’o. w23.02 16 §4, 6

Njʉ, “nja chembø” ka ndima njí ndiro ri kaka ndima si di Paradiso nǎ d’e ná lo ro kʉ thé. Ringani ko po mbai Yesu dho. Loroji na, ko adi mbai po ke dho ke djoi ché na le d’ri ná kpa tsotso ko kó nari chulu. Yesu pongʉeri ndi si lod’i chembø djo ndi djoi ró kpa njingʉe ná lo ró ro. (Mt. 25:31-40) Ko ka ko kó kpa tsotso ko lod’ra ndirigoti wanafunzi le ndrŭ nji ná njí ko nji nari chulu. (Mt. 28:18-20) Ri nzá ngani ko b’ori Paradiso i si vi ndirigoti ko ve kodhó nyi thika le Yova ji nari bbai ri. Ringani ko njí kpakpanga ko é chi ko tso nǎ lo na, ko nji ná lo na ndirigoti ko é kiasi na kodhó maisha nǎ. Ndirigoti ringani ko di tøni chi Yova dho, ko lai ndoa dhi le dho ndirigoti ko lai Wakristo dho. Njati njʉ ko di Mungu dzá yadha dyø bblo, go ko kʉ che kʉ ná i dz’ djó ro ró, Paradiso nǎ ri dyødha sie sʉsʉ ko dho. Ringani ko njí kpakpanga ndiro ko é ko ko tayarisha Paradiso nǎ nga dho nari dhǒ ná nyi na d’e. w22.12 11-12 §14-16

Ko jirie kodhi Pi Yesu ji dhonalo ke kʉ bblo pli kʉ ná Pi. Yova bbʉngʉe mazoezi ndidhi Ddùna dho ndiro ke nyó pi d’e. (Isa. 50:4, 5) Anzi ngaddi, bbʉdha Yesu bbʉngʉe ndi nari chulu ke dhongʉe ko dho ná jidha djo. (Yoh. 13:1) Yesu kʉ nidhó Pi nari dho ri kaka ni ji ke. Ke pongʉeri ndi adi bbʉbbʉ ji ndi ná ndrŭ nzǐ ndidzá bbakau ndirigoti kpa adi fø jidha dhǒ kedhó yadha dho ndima ngarr nari chulu. (Yoh. 14:15; 15:14, 15) Yova dhi Ddùna dzá kau le kʉ nari kʉ bblo pli kʉ ná lo! Ni churie ri chu Yesu kʉ nyenyenga na ndirigoti ke adi ndidzá Baba dyø kaka nari bbai. Ni jifunzangʉe ri nari kʉ, ke bbʉngʉe nyo ù hwi ná ndrŭ dho, ke pɨngʉe bʉ thí bʉni ná ndrŭ iso ndirigoti ke gøngʉe dhe nji ná ndrŭ. (Mt. 14:14-21) Ni nja ngbaribbai ma ke chutso ddá kutaniko dho njʉ nari nja. (Mt. 23:10) Ndirigoti ni churi nari kʉ, ke si ri ki nji bblo pli Mungu dhó Pidhinga nǎ ndi sie Pi ná saa djo. Ni ká ka ni dhǒ ni ji ke ngbà nari ngbaribbai? Kedhó loroji ni dyø nari chulu. Ni ka ni njiri fø ná ddikpa chu kʉ, Yova dho ni ni bbʉ ndirigoti batiso ni ba nari chulu. w23.03 4 §8, 10

Yova no krʉ kʉ ná ritsi ra nǎ ma, dz’ djó ma, dda nǎ ma, ndirigoti fø ritsi krʉ adi longaddi ko dho ke djo. (Zb. 104:24, 25) Anzi ngaddi ko Mungu nongʉe ná chu djo di. Ke nongʉe ko ko di hwè ba nononi ná bblo pli kʉ ná ritsi nǎ ro. Ke bbʉngʉe ko nyǒ ma, ko thó ma, ko bɨ ma, ko da ma, ko ndʉtʉ (pua) ma na ko dho ndiro ko di hwè ba nononi ná ritsi nǎ ro d’e. Biblia d’ra nononi ná ritsi ringani ko di nja dho ná ddikpa bbo na mana kʉ ná sababu maddi. Ri adi longaddi ko dho Yova dhó sifa djo. (Ro. 1:20) Loroji na, anja Yova no ná ritsi ndirigoti anja ngbaribbai ma ri kʉ bblo pli nari. Ri ngaddi ko dho nari kʉ, Mungu kʉ nyodyu na bbo. Ndirigoti addinga ko adi hwè ba dho ná nyo djo di. Føri adi ke jirie ndrŭ ji nari dhǒ. Njati ko di Yova dhó sifa nja ke nongʉe ná ritsi chulu ró, ko si ke chu bblo pli ndirigoti føri si ko ronga cho ko kana nga ngʉ chøchø ke na. w23.03 16 §4-5

I dz’ tso ra che bbo pli nari bbai ko ko thí li bbʉbbʉlo djo nari si tsu mbudha kana. Ndrŭ ka ndima liri ko nanga di rɨni rɨ Biblia kʉ bbʉbbʉlo inga Yova li Chi njí dhi noke nja ndi ddá chutso ndidzá ndrŭ dho d’e nari djo. Ro, njati ko uri u nari kʉ krʉ ddo ró Yova dzá lo e bbʉbbʉ ró, ri si kaka ko tøni mbudha na si kodhó udha tsu ná lo tso ró. Ko si “rivʉ ko rrnga [Yova] dhó yadha dho krʉ saa ró, kpø mwisho djo.” (Zb. 119:112) Ko ro “nzɨ do si nji” ko d’ra bbʉbbʉlo nja ndrŭ dho ndirigoti ko li kpa kpakpa nja ndima njinjí ri na d’e nari dho ri. (Zb. 119:46) Ndirigoti ri si kaka ko ve bbo pli kʉ ná kpakpalo tso, loroji na, ndrŭ le nzá nari tso “nì ko ngatsove ro ndirigoti hwè na.” (Kol. 1:11; Zb. 119:143, 157) Bbʉbbʉlo adi rili ko tøni kpakpa, ri adi bblo kʉ ná kusudi ma, wazi kʉ ná chutsoddadha ma na bbʉ ko dho. Ri adi Mungu dhó pidhinga tsena sie ná bblo pli kʉ ná ngab’odha bbʉ kodho. w23.01 7 §16-17.

Yesu dhe nari njí kuna, ke njingʉe sala bbo ndi unakpa dhi lo dho ndirigoti ke nzingʉeri ndidzá Baba “b’o kpa ronga che kʉ ná ke ró.” (Yoh. 17:15) Fø lo ngbá ngatsi ma Yesu jingʉe kpa nari dhǒ! Ngbà mai ke chungʉeri ndi si nzani bbo ro, ke nanga ndidhó mitume dhó lo ngʉ d’od’o dhé. Yesu bbai, ri nzá ngani ko di ngaddi kodhó lo djo dhé ri. Ro ringani ko di nganzi ko djoi ma, ko vei ma na dhó lo djo maddi. Njati ko di rinji fø ró, ko ridho ko ngarr Yesu jangʉe ná yadha dho, føri kʉ ko jini ji ko kana ndirigoti føri na ko ngbá ngatsi ma ko ji ko lai Wakristo nari dhǒ Yova dho. Sala ko nji ko djoi ma, ko vei ma na dho ná føri nga kʉ pá ko kodhó saa vi ri. Biblia ripo “chø lo dhi ke dhó ddo nǎ le ddoni ná sala dhi kpakpanga kʉ bbo.” (Yak. 5:16) Ko lai Wakristo dhó lo ji kodhó sala mbudha kana ndima kʉ ná saa na. w22.07 23-24 §13-15