Bi 7

Lotidha kʉ Yova bbʉ ko dho ná kado. Ro, fø kado na nzá ndrŭ njingʉe njí bblo ri. Shetani Ibilisi shangʉe Eva, ná føri lingʉeri ndrŭ njí chenga ndirigoti ndrŭ ngʉ nzá kaka ná ndrŭ. (Mwa. 3:1-4) Adamu nzá njingʉe njí bblo lotidha dhi kado na ri, Eva djo ndi dyangʉe ndi nji ná kosa tso ndirigoti Yova djo ná saa na. (Mwa. 3:12) Kaini shangʉe Yova ndidhi djona Abeli ndi hwingʉe nari goti. (Mwa. 4:9) Njʉ, ri kʉ kpakpa le ba nzá nǎ le ti che kʉ ná lo ná video. Darasa nji ná nzø che kʉ ná bbadha rr darasa nǎ, ndirigoti bbobbo ndrŭ che kʉ ná bbadha rr ndima dhó njí dhi ngana. Njati ko é krr nga ró, ko maddi ka ko nga ko rr ná che kʉ ná bbadha tidha tso. Bbʉbbʉ dhé, ko kʉ Wakristo nari dho, ko adi riji ko bbʉ hwè Yova thí dho, føri dho ri nzá ngani ko ti che kʉ ná bbadha ri. Ro, ringani ko njinjí bblo lotidha dhi kado na, føri nǎ mana kʉ ko bbʉ madha kodhi Mungu dho. w22.04 4 §1-3

Yesu ngʉe bblo kʉ ná nganjadha na kimwili nǎ ritsi djo. Ke ngʉ adi nganyo ndirigoti jødha dhi ritsi ma jø ddi. (Lu. 19:2, 6, 7) Ddikpa saa na, ke thɨngʉe bblo pli kʉ ná wa, ya kwanza ddù ndi njingʉe ro. (Yoh. 2:10, 11) Ndirigoti dhe ke dhe ná dyi ke thongʉe bbo ro dzi kʉ ná ru. (Yoh. 19:23, 24) Ro, Yesu nzá njangʉe kimwili nǎ ritsi bbo na mana kʉ ri ndidhó maisha nǎ ri. Yesu pongʉeri njati ko li pidhinga anziro ró, Yova si ngaddi nì ko kʉ dhi lazima na ná ritsi djo. (Mt. 6:31-33) Bí kʉ ná ndrŭ adi faida ba Mungu dhó ro si ná nyodyu na ndima njínji mbø dhi lo kana nari nǎ ro. Akonja nzá d’e dhɨ kø ná Danieli ró dho kʉ ná le-djo dhó loroji. Ke pori: “Go ma ngʉe jadda ro ma lingʉe kiroho nǎ ritsi bbo na mana kʉ madhó maisha nǎ na ritsi kana.” Ke ngʉngʉe ndidhó maisha tso dhʉdhʉ nari dho, ke dho ri kangʉe ka ndi njí bí kʉ ná njonjo kʉ ná njí Yova dzá njí kana. Ke pori ki: “Bbʉbbʉ dhé, Yova bbʉ ma dho ná ledha nzá ma ka ma ddi mbø ka ndi bbʉe ma dho ná ri na ri.” w22.05 21-22 §6-7

Ko ji bbʉbbʉlo ji nari ko ka ko dhǒ krʉ ddo ró ko Biblia ma, ri ró dyʉ ndi ná vichapo ma na zø nari chulu. Føri ko ka ko njí njati rie bicha ma inga sese ma ko nji ddo bbbʉbbʉlo kana ri ró, dhonalo krʉ ddo ró chu ko ka ko chú ná lo e bí. Biblia zødha kʉ kpakpa njí, ro ri uri le njí kpakpanga. Ri nga kʉ ko krʉ jirieri ko zø Biblia ndirigoti ko ne ri nǎ longa ri. Ro, Yova rinzi ko tsó ko “di rine” ndirigoti ko “di rine li ko li ko dyu ro” ndiro ko famu bbʉbbʉlo bbo d’e. (Mez. 2:4-6) Fø di ná kpakpanga ko nji bí ina nari nǎ ro ko adi faida ba. Corey pori ddiro ndi Biblia zø ná saa na ndi adi ndi dyu li ddikpa verse ro vi. Ke pori: “Ma ngʉ adi ri kó tso djó le tu nanga ná lo zø krʉ ndirigoti ma ngʉ adi ri na gba ndi tso ná verse zø ndirigoti nja utafiti ma nji ddi. . . . Fø ma ngazø nari kongʉe ma tsotso ma chu bí kʉ ná ritsi! Rie ngbaribbai ma ko adi ngazø ri ró, ko adi ko nanga jini ji bbʉbbʉlo dho nari dhǒ, saa ko ba ndirigoti kpakpanga ko nji ko zø Biblia nari chulu.​—Zb. 1:1-3. w22.08 17 §13; 18 §15-16

Dz’ djó Yesu ngʉe ná saa na, ke njingʉe njí nononi ná ritsi na ndi ddi na longa ndi unakpa dho ndidzá Baba djo d’e. Akotilo ro ke ddingʉe ná somo kana ddiri djo. Yova adi jidha dhǒ ndrŭ krʉ dho. Ngøtsɨ djó Mahubiri nǎ, Yesu pongʉeri ndi unakpa ddinga nononi ná nzɨ djo ndrŭ adi ngaddi bí ina ná aro kʉ ná ritsi djo, føri kʉ: dyi ma, dji ma na. Fø ritsi krʉ na mana e bbo kodhó shinga dho. Yova ka ndi bbʉe fø ritsi nzá maddi nzɨ njínji ndi dho ná ndrŭ dho. Føri rɨngana ke adi dyi ma, dji ma na bbʉ ndrŭ krʉ dho jidha na. (Mt. 5:43-45) Fø somo chulu Yesu ngʉ riji ndi ddiri ndi unakpa dho nari kʉ, Yova adi riji ko dhǒ jidha ndrŭ krʉ dho. Dyi tsu nari ma, nini dji dju kó nari ma na ko di nja ró, ko ka ko ddiri nari kʉ Yova adi jidha dhǒ ndrŭ krʉ dho. Kedhó loroji ka ndi cho ko ko dhǒ jidha lo ko d’ra ndrŭ krʉ dho nari chulu. w23.03 17 §9-10

Mutume Yohana nanga ká addu kengʉe? Bbo pli dzá kakanga kʉ ná fø tsó nǎ zǎ djó ddikpa isɨle djingʉe. (Ufu. 17:1, 2, 6) Le kʉ “bbo ndumba” ndirigoti le ró dho kʉ “Bbo Babiloni.” Le “uasherati nji” “dz’ djó pikpa na.” (Ufu. 17:1-5) “Bbò Babiloni” ká kʉ addu? Fø isɨle nga ka ndi é guvernema ri, dhonalo Ufunuo pori le uasherati nji dz’ djó pikpa na. (Ufu. 18:9) Ndirigoti le dji tso nǎ zǎ djó ná føri ridho nari kʉ, le riji ndi nyo pi fø pikpa djo. Føri goti le nga ka ndi é Shetani dhó dz’ djó komerse nji ná kpa ri, dhonalo fø kpa djo le tilo Ufunuo nǎ nja ngana ndirigoti le nzi kpa “turasa nji dz’ djó ná kpa.” (Ufu. 18:11, 15, 16) Drrdrr Babiloni ngʉe kali dhi dini tso ngani ná nga. Føri dzá lodho, Bbò Babiloni kʉ kali dhi dini krʉ. Dhonalo ri kʉ dz’ djó kali dhi dini krʉ gba ndima tso nari.​—Ufu. 17:5, 18. w22.05 11 §14-16

Nja saa na, isɨle ka ndi dhuri ndi tso nari kʉ ndidzá nzø ká ka ndima njinjí Yova dho ngbà. Føri djolu pli, gø dhi ndrŭ chu ngbaribbai ma Shetani dhó i dz’ ndima dhi nzø ronga lø nari maddi. Føri kina, nja kʉ ná isɨ ndrŭ dho ri si kpakpa ndima ngu ndima dhí nzø, ndima kʉ ddiro inga ndima bbá kpa nzɨ njínji Yova dho ri nari dho. Ri nga kʉ njonjo dhó dini kʉ ná gø dhi ndrŭ dho dhé rie kpakpa ndima ddi longa ndima dhi nzø dho ndiro kpa ji Yova d’e ri. Nì njínji Yova dho ná gø dhi ndrŭ dho maddi ri ka ndi é kpakpa ndima kó ndima dhi nzø tsotso nja kpa ji Yova d’e. Fø di ná lo krʉ kana, nzɨ nji do. Yova si ni tsotso ko ko. Ni ka ni dhunga ro ngbà chu lo ná gø dhi ndrŭ tso maddi, ndiro ni chu kpa ká adi njínji ngbǎ ma kodhó longaddidha dhi no na ibada ya familia kana nari d’e. (Mez. 11:14) Yova ka ndi kó ni tsotso ndiro ni tilo nidzá nzø na d’e. Anziri ke kó ni tsotso ndiro ni chu kpa thí nǎ kʉ ná lo ma, kpadhó ngaddidha ma na d’e.​—Mez. 20:5. w22.04 17 §4, 7; 18 §9

Yesu ngʉ adi Yova dhó sifa dyø kaka nari bbai. Føri dho njati ko chu Yesu bblo ró, ko si Yova ji bbo. (Ebr. 1:3) Ko ka ko chu Yesu bblo, tho kʉ ná Enjili nǎ kʉ ná lo ko zø nari chulu. Njati rie nzá ni d’e krʉ ddo ró le Biblia zø ná ritso nga ri ró, ni ka ni ngá ri tso njʉnga djó ro. Yesu djo ni lo zø ná saa na, anja kedhó pekee kʉ ná sifa. Ndrŭ jingʉe ke na ndima loti ndirigoti ke na ndima di nari ji. Ke ngʉ adi rere nzø tso njú ndi kuso. (Mk. 10:13-16) Ke ngʉ adi rili ndidhó wanafunzi mbu ndima bblo; ndirigoti ngbaribbai ma ndima ndima mbu nari kpa d’ra ke dho nari do ro nzɨ kpa ngʉ adi njiri. (Mt. 16:22) Fø chu nǎ, Yesu ngʉ adi ndidzá ra nǎ Baba dyø. Yova na ko loti nari do ma nzá ddi ka ndi njí ko ro ri. Ko ka ko tilo ke na sala chulu. Sala ko nji ná saa djo, ko ka ko po ko ddi ndirigoti ngbaribbai ma ko ko mbu nari krʉ ke dho. Ko churi chu nari kʉ, ke nzɨ adi lo ro d’i ko djo ri. Dhonalo ke jirie ko ji ndirigoti ke nanga kodhi lo adi d’o ni.​—1 Pe. 5:7 w22.08 3 §4-5

Yova kʉ ko no ná Ke nari dho, ke churie krʉ kʉ ná lo ko djo. Ke chu krʉ kʉ ná lo dz’ djó krʉ kʉ ná ndrŭ djo ná føri kʉ ké ka ndi ke le nanga ná lo. (Zb. 139:15-17) Føri dho, ke ka ndi nja kodhó gø dhi ndrŭ ró ro ko bangʉe nzá le kaka nari ná føri maddi. Ke chu njʉ ko kʉ nari bbai ko é d’e, ká ngbá lo bangʉe nga kodhó maisha nǎ nari ma krʉ. Yova chu ko bblo ná lo dho ká ke adi addu nji? Føri dho ke adi ndidzá zølo dhǒ ko laidjo. (Zb. 78:39; 103:13, 14) Yova dhongʉeri nari kʉ, ndi jiri ndi njí ndrŭ zø njí. Ke churi chu nari kʉ, ya kwanza kpetsi ke Adamu njingʉe ná lo djotsina, ko krʉ adi chenga nji ndirigoti ko krʉ adi cheni che. (Ro. 5:12) Ko ka ko njí ná ritsi ro nga kʉ ri, nja ko cho ko ronga tso ndirigoti nja ndrŭ ronga tso dhe ma, chenga ma na ró d’e. (Zb. 49:7-9) Nì mai ri kʉ føro, kodhi ji dhi Mungu dhongʉe zølo ndirigoti ke løngʉe mupango ndiro ndi tu ko fø lo nǎ ro d’e. Ddiddi Yohana 3:16 ridho nari bbai, Yova chongʉe ndi Ddù ddikpa dhé kʉ ná ngba ndiro ke dhe ko djotsina na d’e.​—Mt. 20:28; Ro. 5:19. w22.06 3 §5-6

Ndrŭ zø nji ná ndrŭ zø maddi si kʉ njini nji, ná fø lo Yova dhongʉe ndidzá chi njí dhi ke Yobu dho ndi pongʉe ná lo chulu. Gbo kʉ ná kpetsi kpa Elifazi ma, Bildadi ma, Sofari ma na tingʉe Yobu dhi ngana ná chelo vongʉe ke thí ronga bbo. Yova pongʉeri Yobu nzinga kpa dho. Ke njingʉeri fø nari dho Yova lengʉe ke ronga le. (Yob. 42:8-10) Lo ko li ko thí na, nari na ko ko ronga vo ko koro. Thø kʉ ddikpa li o ná no bbai, ndirigoti Yova adi riji ko ba nzɨ le lo li le thí na nari nǎ ro adi si ná ngoi. (Efe. 4:31, 32) Ke ripo ko “bbá thø tso ndirigoti bbo ko nanga kani nari tso.” (Zb. 37:8) Njati ko dyø fø shauri ró, ri si ko tsotso koko. Njati ko di lo li ko thí na chelo njie ko ró ná ke djo ró, føri na ko ko ndí ndirigoti kodhó akili nzá. (Mez. 14:30) Ro, njati ko di lo li ko thí na ko ró njiri che ná ke djo ró, føri nzɨ nji ke ro che ri, ddiddi ko jø sumu nari nzá ka ndi njí ke ro che ri nari bbai. Føri dho, nja ndrŭ zø ko nji ná saa djo ko kado bbʉ ko dho. Ko e ngoi na kodhó ngaddidha nǎ ndirigoti ko thí nǎ, ndirigoti ri ka ndi kaka ko rá anzi Yova dho ko njínji nari kana. w22.06 10 §9-10

Kodhó ngab’odha kʉ ddiddi kaske bbai, dhonalo ri adi kodhó ngaddidha ronga b’o ndirigoti ri adi ko tsotso kó nzɨ ko ddinga kodhó lo djo dhé, dhonalo njati ko njiri fø ró ri ka ndi sa ko kana kau Yova na. (1 Ko. 15:33, 34) Kodhó ngab’odha ka ndi kó ko tsotso ndiro ko b’o kodhó ngaddidha ronga nzɨ ko nji nzá tho Yova nyǒ ná lo ró. Anonga nari kʉ, Yobu iso ngʉ pɨ ná kali dhi ke, Elifazi njingʉe njí fø di ná lo nganga na. Elifazi pongʉeri: “Dhe ka ndi dhe ná ke ká kʉ ie ndiro ndi é tse ndi tse ro d’e?” Føri goti ke pongʉeri Mungu djo: “Anja! Ke ro nga kʉ udha na ndidzá watakatifu djo ri, ndirigoti ra ro ma nzá ddi tsetse ke nyǒ djó ri.” (Yob. 15:14, 15) Føri ngʉe kali dhi lo! Anonga nari kʉ, Shetani jirieri ni di ngaddi fø. Ke churi chu njati ni é fø di ná ngaddidha na ró, ni ka ni vi nidhó ngab’odha vi. Føri rɨngana agʉ fø di ná kali dhi lo gʉ. Auri u nari kʉ, Yova jiri ni di theinga dho ndirigoti ndi kó ni tsotso nja ni si ri ba d’e.​—1 Ti. 2:3, 4. w22.10 25-26 §8-10

Shetani jingʉeri Yobu ddiri nari kʉ, ndi nzani dho nari kʉ Yova nanga kani ka ndi djo. Loroji na, Shetani lingʉeri bbo kʉ ná vʉvʉ tá nari kongʉe Yobu dzá kumi kʉ ná nzø ngʉ nganyo nǎ ná dza. (Yob. 1:18, 19) Føri kina ke lingʉeri kazz si ra nǎ ro, nari nzá chengʉe kedhó miya kpali ri, ro ri chengʉe ri ronga ngʉ b’o ná kpa maddi. (Yob. 1:16) Kazz ma, vʉvʉ ma na krʉ singʉe ra nǎ ro, nari dzá lo dho Yobu ka ndi ddieri føri si Yova Mungu dhó ro. Føri lingʉeri Yobu ddiri nari kʉ, njaro ndi nji ddikpa chelo. Nì mai ri kʉ føro, Yobu nzá dhungʉe ndidzá ra nǎ Baba ro ri. Yobu chungʉeri nari kʉ, ndi bangʉe bblo ritsi bí Yova dhó ro. Føri dho ke ngʉ riddi njati rie ngbà ndi ba bblo ritsi Yova dhó ro ri ró, ringani ndi ú che kʉ ná ritsi tso maddi. Føri dzá lo dho ke pongʉeri: “Abbari Yova ró dho mani.”​—Yob. 1:20, 21. w22.06 21 §7

Yesu d’rangʉe fø di ná lo ndi unakpa dho, Yohana 17:14 nǎ maddi. Bbʉbbʉ dhé, ko nja fø unabi njini nari nja b’lo da ná cho 100 kana. Ká ngbaribbai? Yesu le lingʉe Pi 1914 na nari goti tse, le bungʉe Shetani ra nǎ ro. Kpadjo ke kʉ dz’ djó ndirigoti ke ndi le si sa nari b’o. (Ufu. 12:9, 12) Ro, ke nzɨ ngab’o di ndi di ro ri. Shetani kʉ thø na ndirigoti ke là nji Mungu dzá ndrŭ na. (Ufu. 12:13, 17) Ri kʉ føri dho i Shetani dzá dz’ ndro ko bbo ri. Ro Shetani ma, ndi unakpa ma na do ka ndi njí ko dho ná lo ro nga kʉ ri. Føri rɨngana ko ka ko u mutume Paulo ungʉe ná i lo: “Njati Mungu é ko na nì ró, ká ie ka ndi é ko dho che?” (Ro. 8:31) Ringani ko li kodhó ngab’odha lú Yova djo. w22.07 18 §14-15

Yesu nanga ro nzɨ i dz’ dzá mwisho na lod’ra ná ndrŭ sie sese nari ngʉ d’o ri. Ke chungʉeri chu nari kʉ, mutunga zaburi d’rangʉe unabi chulu ná lo si njini nji: “Nidzá ndrŭ si ndima bbʉ ndimaro, ji ndima nanga jini ro nidzá kpakpanga na kʉ ná bbasødda dhó ddo dyi nǎ.” (Zb. 110:3) Njati rie nì ni adi lod’radha dhi njí nji ri ró, ni Yesu ma, chi njí dhi noke ma na tsotso kó ndirigoti ni fø unabi tsotso kó ndi njini d’e. Nì mai njí ra anzi ro kpakpalo ma kʉ ddi. Ddikpa kpakpalo kʉ, Pidhinga dzá hwè lo-i d’ra ná ndrŭ adi bani upinzani na. Waasi imani ma, dini nǎ bbobbonga ma, politiki nǎ kpa ma na adi bí kʉ ná kali dhi lo ti kodhó njí djo. Njati kodhó familia ma, chu ko chu ná ndrŭ ma, ko lai njí dhi ndrŭ ma na rr kali dhi fø lo ró, kpa ka ndima cho ko ko bbá Yova dho ko njínji nari tso ndirigoti lod’radha dhi njí tso. Nja kʉ ná ngø nǎ kodhó wapinzani adi ko djoi ma, ko vei ma na sʉ prizo na, kpa adi do mai tá kpa na inga kpa njinji ma. w22.07 8 §1; 9 §5-6

Yova rinzi ko tsó ko di Biblia zø krʉ ddo ró ndirigoti ko di ngaddi bbo ko zø ná lo djo. Ko di njínji ko chu ná lo na ró, kodhó udha adi ngʉ kpakpa ndirigoti ko kana nga adi ngʉ chøchø kodhi ra nǎ Baba na. Fø ko rinji nari ka ndi li ko kpakpa nja ko ve kpakpalo tso d’e. Yova adi ndidzá roho takatifu bbʉ nì ndima thí li ndidzá lo djo ná ndrŭ dho. Ndirigoti fø roho ka ndi bbʉ “ni e ná kpakpanga djolu da ná kpakanga” nja ko ve krʉ mbudha tso d’e. (2 Ko. 4:7-10) Yova dhó le tsotsokodha chulu, “nyodyu dhi chi njí dhi noke” bí kʉ ná zødha dhi ritsi ma, video ma, miziki ma na bbʉ ko dho, nari rili kodhó udha ngʉ kpakpa ndirigoti ko kana nga ngʉ chøchø Yova na. (Mt. 24:45) Yova zoeza ndidzá ndrŭ nja kpa jini ji ndirigoti kpa di ndima iso pɨ ndima kana kpakpalo dhi saa na d’e. (2 Ko. 1:3, 4; 1 Te. 4:9) Ko kʉ hwè na bbo dhonalo ko kʉ jiji ko ná ko djoi ma, ko vei ma na kutaniko nǎ! w22.08 12 §12-14

Paulo nzingʉe bí kʉ ná ndrŭ ndima ró dho na, ndirigoti bí ndrŭ djo ke tingʉe bblo lo inga nini kʉ ná nja lo. Ko ka ko dyø Paulo ko djoi ma, ko vei ma na dhó bblo sifa djo ko loti nari chulu. Njati ko njiri fø ró, ko ka ko bbʉ nja sababu nja kpa kana nga é chøchø d’e, ná føri ka ndi liri kutaniko dhidhi jidha kana. Nja saa djo, dhidhi kiroho nǎ ná Wakristo ma ka ndima rrni nzá ddi ndima kana. Føri kʉ mutume Paulo ma, ndidzá kau Barnaba ma na kana tangʉe ná lo ro. Fø kpetsi kpa gʉngʉeni bbo ndima dhó luti safari dho ká Marko si rara ndima ulu inga nzɨ ma nari djó. Kpa “ddangʉeni bbo pli ndima kana” ndirigoti kpa bbangʉe ddinga ndima bbi nari tso bba. (Mdo. 15:37-39) Ro luti Paulo ma, Barnaba ma, Marko ma na njingʉe ngoi ndima kana. Luti Paulo tingʉe lo bblo Barnaba ma, Marko ma na djo. (1 Ko. 9:6; Kol. 4:10) Ringani ko maddi ko si ko kana kʉ kutaniko nǎ nja ndrŭ na ná lo ndirigoti ko rá anzi kpadhó bblo sifa djo ko ko thí li nari na. Fø ko rinji nari na ko ka ko b’o ngoi ronga ndirigoti ddi le tso ngbani nari ronga. w22.08 23 §10-11

Njati rie ko kpakpanga nji ko njinjí Yova dhó chølo dhi sheria na ri ró, ringani ko bbá nja ndrŭ djo ko lod’i nari tso ndirigoti nzɨ ko di ko nja chølo dhi ndrŭ nja ndrŭ djolu. Ringani ko nonga nari kʉ, “dz’ lu djo lod’i ná Ke” kʉ Yova. (Mwa. 18:25) Yova nzá bbʉ fø di ná lod’idha ro kodhó ri. Akoddinga chølo dhi kpetsi ke Yosefu djo. Ke ngʉ adi nja ndrŭ djo le lod’i nari pʉpʉ ndi ró ro, rie nzá thonga nari bbai njingʉeni ndi na ná ndrŭ ma ró. Ke djoi nganga løngʉe ke ndirigoti kpa dzingʉe ke nanga nja ke ngʉ noke d’e, ndirigoti kpa lingʉeri ndima dhi baba uri nari kʉ, ke dhedhe. Føro Yosefu ki vengʉe nju ndidhó familia nǎ ndrŭ na cho bí goti. Luti Yosefu ngʉngʉe bbonga na ná saa na, ke ka ndi d’ielo ndi djoi djo nga nǎ zø ro ndirigoti ndi wøe ndi be wø. Ngbà mai Yosefu djoi kongʉe zø ndima njingʉe ná fø lo dho ndima thí nǎ ro krʉ ro, kpa nganga ma do ngʉ nji ddi Yosefu ka ndi njieri fø nari dho. Ro, Yosefu pongʉeri kpa dho nari kʉ: “Nzɨ ni nji do. Ma ká kʉ Mungu rɨngana?” (Mwa. 37:18-20, 27, 28, 31-35; 50:15-21) Nyenyenga na Yosefu bbangʉe lod’idha dhi njí Yova dhona. w22.08 30 §18-19

Yova ka ndi ngʉ ddikpa le dhó sala goti ni chulu nari ká ni chu ngbà? Føri ka ndi njini ngbà njati ni é muzee ma, mutumishi wa huduma ma, painia ma inga muhubiri ma ró. Føri ki ka ndi njini ngbà njati ni é jadda ma inga ngó ma, ni é le-djo ma inga le-ve ma ró. Yova ji ná le di ndi tsotsokodha ne ná saa na, bí ina kodhi Mungu adi rili wazee ma, chi tøni ndi dho ná njí dhi kpa ma na ngʉ “bbo kʉ ná le isopidha tø ná nga” fø le dho. (Kol. 4:11) Ko njínji Yova dho ndirigoti ko djoi dho fø chu nǎ ná føri kʉ bbo pendeleo! Ko ka ko kó ko djoi tsotso nya ndi nanga nyá ná dhe ma, chʉ adi ngaba ná lo ma, kpakpalo na ma ko djoi bani ná saa na. Ko ka ko jiri ko kó nja ndrŭ tsotso maddi, ro ri ka ndi é kpakpa njati rie kodhó familia nǎ ndrŭ i dhe nji ri ró. Nì mai ri ku føro, ko adi riji ko kó ko djoi tsotso ndirigoti Yova nanga adi jini bbo njati ko di kpakpanga nji kpa tsotsokodha dho ró.​—Prov.19:17. w22.12 22 §1-2

Jidha kʉ le thí le li ndrŭ djo nari tso ngani ná nga. Yesu pongʉeri bbobbo aro kʉ ná yadha kʉ, ko ji Yova ndirigoti ko ji ko lai ndrŭ. (Mt. 22:37-39) Ko ji Yova nari adi ko ronga cho ko dyø kedhó kaka ná loroji, ndrŭ djo le le thí li nari kana. Loroji na, ko djoi ma, ko vei ma na ko ji nari adi rili ko b’o kpadhó siri dhi lo ronga b’o ndrŭ kana. Ko nzá jirie ko po njedha ka ndi bbʉ kpa dho ná lo inga che dho kpa ka ndima mbu ndima ná lo ri. Nyenyenga si ko tsotso ko nja ko é ngbà djo ndrŭ ka ndima li ndima thí ná ndrŭ d’e. Nyenyenga na kʉ ná Mukristo nzɨ adi riji ndi ké nja ndrŭ nanga ya kwanza ndi d’ra ddikpa lo nari na ri. (Flp. 2:3) Ke nzɨ adi rine ndrŭ nja ndi mana na nzá ringaeni ndi d’ra ndrŭ dho ná lo ndi d’ra nari chulu ri. Nyenyenga adi ko tsotso kó ndiro nzɨ ko d’ra kodhó nganjadha bbo ddikpa nzá djo Biblia polo inga kodhó vichapo tilo djo ná lo djo ró. w22.09 12 §12-13

Ddikpa malaika pongʉeri Danieli dho, kedhó buku nǎ unabi dhi lo Mungu dzá ndrŭ i ka ndima famue bblo pli, ro chelo dhi ndrŭ kana “ddikpa le ma nzɨ ddi [si] lo ro famu ri.” (Da. 12:10) Kpadjo i kʉ ringani ko dhori ko nga kʉ chelo dhi ndrŭ kana ri ná saa. (Mal. 3:16-18) Yova “bbo na mana kʉ ná mali” bbai ndi nja ná ndrŭ tso gbá. Bbʉbbʉ dhé, ko jiri ko é fø ndrŭ kana. Bbʉbbʉ dhé, ko di bbo na mana kʉ ná saa nǎ. Ro, karrnga goti bbo ka ndi ké le nanga ná lo si kʉ njini. Sese saa goti ko si chelo dhi ndrŭ le sa nari nja. Føri goti ko si Danieli dho Yova njingʉe ná i tsodha njini nari nja: “Ni si kʉ dani nja ni ba ni rɨnga d’e, ddo dzá mwisho na.” (Da. 12:13) Ni ká jiri ni si Danieli ma, nidzá ji ni ji ná ndrŭ ma na ki si “dani” ná dyinga nja ddi? Njati rie ddio ró, anji krʉ kʉ ná kpakpanga ndiro ni tøni chi d’e, føro ni ka ni uri u nari kʉ, ni ró dho si ma ma Yova dhó shinga dhi buku na. w22.09 24 §17; 25 §19-20

Fø lo ka ndi lie Ezekieli kpakpa. Ká addudho? Dhonalo Ezekieli nongʉe nga nari kʉ Yova pongʉe fø di ná lo ro ngbà Musa ma, Isaya ma na dho kpa ndi vʉngʉe ndima é bbanabi ná saa na. (Kut. 3:10; Isa. 6:8) Ezekieli chungʉe ngbaribbai ma Yova kongʉe fø aro kʉ ná bbanabi tsotso ndiro kpa si ndima bani na ná kpakpalo djolu nari ngbà. Føri dho aro ina Yova pongʉeri Ezekieli dho: “Ma ni chó” ná saa na, Ezekieli ka ndi ée bblo kʉ ná sababu na ndiro ndi li ndidhó ngab’odha Yova dhó le tsotsokodha djo d’e. Føri kina Ezekieli ndingʉe i lo bí ina: “Yova dzá lo singʉe ma dhi ngana.” (Eze. 3:16) Godhé ke ndingʉeri “Yova dzá lo ki singʉe ma dhi ngana.” (Eze. 6:1) Bbʉbbʉ dhé, Ezekieli ungʉeri u ndi Yova cho. Føri kina, Ezekieli dzá baba ngʉe kuhani, føri dho ke ka ndi ddieri Ezekieli dho nari kʉ krʉ ddo ró Yova adi ripo ndidhó bbanabi dho, ndi ka ndi kó kpa tsotso ko. Loroji na, Isaka ma, Yakobo ma, Yeremia ma na dho Yova pongʉeri: “Ma kʉ ni na nì.”​—Mwa. 26:24; 28:15; Yer. 1:8. w22.11 2 §3

Ngbà mai Adamu ma, Eva ma na njingʉe chenga ndirigoti kpa bbʉngʉe dhe ndima dhi nzø dho ro, Yova nzá øngʉe ndidhó ngaddidha thika ro ndidhó kusudi djo ri. (Isa. 55:11) Kpø njʉnga djo kedhó kusudi kʉ nì tøni chi ndi dho ná ndrŭ si di theinga dho. Akonja Yova pongʉe ndirigoti ke njingʉe nja ndi njí ndidhó kusudi d’e ná lo. Yova tsoni ndi si checheni ná ndrŭ gaga ndirigoti ndi si rili kpa di choro nŭnŭ. (Mdo. 24:15; Tit. 1:1, 2) Chi ngʉ tøni ná ke Yobu chungʉeri chu nari kʉ Yova jiri ji ndi si checheni ná ndrŭ gaga. (Yob. 14:14, 15) Nabi Danieli chungʉeri chu nari kʉ ndrŭ ka ndima sie gaga ndirigoti ndima di choro nŭnŭ. (Zb. 37:29; Da. 12:2, 13) Yesu cho nǎ ngʉe ná Wayaudi maddi chungʉeri nari kʉ, Yova si ndidzá chi tøngʉeni ná ndrŭ dho “choro nŭnŭ di ná shinga” bbʉ. (Lu. 10:25; 18:18) Yesu ngʉ adi loti fø tsodha djo bí ina ndirigoti ke nganga ma ndidzá Baba gangʉe ddi.​—Mt. 19:29; 22:31, 32; Lu. 18:30; Yoh. 11:25. w22.12 4-5 §8-9

Yova ko nzǐ ko kana nga ngʉ chøchø ndi na. (Yak. 4:8) Ke jieri ndi é kodhi Mungu, kodhi Baba, ndirigoti kodhó kau. Ke adi kodhó sala goti ngʉ ndirigoti ke adi ko tsotso kó kpakpalo dhi saa na. Ndirigoti ke adi njínji ndidhó tengenezo na ndiro ndi ddi longa ko dho ndirigoti ndi b’o ko ronga d’e. Ko ka ko ndrini chøchø Yova ro sala ko nji, kedzá lo ko zø ndirigoti nga ko ddi ri djo nari chulu. Fø ko rinji nari na ko ridho ko ji Yova bbo ndirigoti ko mbai po bbo ke dho. Ko ronga adi choni ko rrnga Yova dho ndirigoti ko bbʉ ngbà ka ke dho ná madha ke dho. (Ufu. 4:11) Njati ko di Yova chú bbo ró, ko si ko thí li bbo ke djo ndirigoti ko tsotso ke adi kó chulu ná tengenezo djo. Diabolo adi rimbu ndi ndó ko kana nga ndó Yova na. Dzodzo dhé ke adi rine nzɨ ko li ko thí Yova djo ndirigoti kedhó tengenezo djo. Ro, ko ka ko sisi kedhó là djó. Njati kodhó udha é kpakpa ndirigoti ko di ko thí li Yova djo ró, ko nzá ka ko bbá kodhi Mungu ndirigoti kedhó tengenezo ro ri.​—Zb. 31:13, 14. w22.11 14 §1-3

Cho bí kana, bbʉbbʉ Wakristo dhó uhuru ma, kpadhó shinga ma na e hatari nǎ Bbo pli kʉ bbonga na ná Pi Yova ndima ji nari djotsina. Fø bbʉbbʉ Wakristo vʉri vʉ ndima é chi Yova dho ndirigoti kpa kʉ ddiddi chi tøngʉeni Bbo pli kʉ bbonga na ná ke dho ná gbo kʉ ná Waebrania bbai, fø kpa ke gøngʉe bbo kazz nǎ ro. Mutunga zaburi Daudi ndingʉeri ɨ chi le kʉ Mungu dho nari dzá bblonga djo: “Yova si lod’i ndrŭ djo. Ee Yova, ad’ilo ma djo, madzá chø kʉ ná lo ró ro ndirigoti madzá chi kʉ ná lo ró ro.” (Zb. 7:8) Godhé Daudi ndingʉeri ki: “Abbari chi le kʉ nari ma, chølo ma na b’o ma ronga.” (Zb. 25:21) Bbo na mana kʉ maisha nǎ nari kʉ chi le tøni Yova dho nari, nzá le bba chi le tøni ke dho nari tso ro! Føro ko ka ko mbu ko mutunga zaburi bbai ɨ ndi ndingʉeri ro: “Hwè na kʉ nari kʉ chi kʉ . . . , Yova dzá yadha nǎ ndima bbí ro ná ndrŭ.”​—Zb. 119:1, maelezo ya chini. w22.10 17 §18-19

Yobu tingʉe lo bí kʉ ná ndrŭ na ndidhó maisha nǎ, ro bbo na mana kʉ nari kʉ Yova Mungu na kpa tingʉe ná lo. Nja ndi li Yobu dhó udha kpakpa ndidhó nyodyu ma, ndi adi ndidzá njí dhi ndrŭ ronga b’ob’o nari ma na djo d’e, Yova pongʉeri Yobu nja ndi no ná ké ka ndi ke le nanga ná ritsi. Loroji na, Mungu pongʉeri ndi adi zǎ dhó lo u ná ritsi bbʉbbʉ zǎ dho, føri dzá lo dho ndi ka ndi bbʉ kedhó lo u ná ritsi maddi ke dho. (Yob. 38:39-41; 39:1, 5, 13-16) Nononi ná ritsi djo ndi ngaddi nari chulu, Yobu chungʉe lo bbo ndidzá Mungu dhó sifa djo. Ko maddi ko ka ko chu lo bbo kodhi Mungu djo njati ko di nó ke no ná ritsi nja li ko li ko dyu ro ró. Ro, nja saa djo fø ko rinji nari e kpakpa. Njati rie vile nǎ ko di ri ró, ko nzá ka ko nja Yova no ná bí kʉ ná ritsi ro krʉ ddo ró ri. Ro, rie nga ma ko kʉ vile nǎ ri ró, njaro ko ka ko di riddi nari kʉ, fø ritsi djo ko lo chu ná saa nga kʉ ko dho ri. Ro, ri kʉ bblo ko di saa ba ndirigoti ko njí kpakpanga ko nja nononi ná ritsi. w23.03 15 §1-2

Yesu d’rangʉeri nari kʉ “bbobbo rɨ ma” ndirigoti chʉ ngaba ná nja lo ma na ka ndi njieni mwisho si nari njí. (Lu. 21:11) Ke d’rangʉeri ki nari kʉ “sheria nanga ndrŭ d’ri nari ka ndi ndrieni ndri.” Loroji na, ndrŭ le che nari ma, fudjo ma, che kʉ ná nja lo ma na adi ngaba. (Mt. 24:12) Yesu nzá pongʉeri ro nari kʉ fø lo ka ndi bae nzɨ njínji Yova dho ná ndrŭ dhé ri. Føri dho, chi tøni Yova dho ná bí kʉ ná ndrŭ maddi adi bani chʉ ngaba ná lo na. (Isa. 57:1; 2 Ko. 11:25) Yova nzá ka ndi b’o ko ronga chʉ adi ngaba ná lo ró ddù chulu ri, ro ke si krʉ kodhó lo u ná lo bbʉ ko dho ndiro ko di ko ko thí jotso ko ro ndirigoti ko é ngoi na d’e. Ko dho ri ka ndi é sʉsʉ njati ko tayarisha ko nzina ngbà kpakpalo dho ró. Nde, nzina ko tayarisha ko ná føri na mana ká kʉ ko nga kʉ udha na Yova djo ri? Ri nga kʉ føri. Ro, nzina ko ko tayarisha chʉ ngaba ná lo dho ná føri ridho ko kʉ udha na Yova kaka ndi b’o ko ronga nari djo. Ká addudho ko ripo fø? Mungu dzá lo rija ko dho ko tayarisha ko chʉ adi ngaba ná lo dho. w22.12 18 §9-10

Prizo nǎ Yosefu ngʉe ná saa na, Yova lingʉeri Misri nǎ pi bbo ka ndi ngbʉe ke djǒ nanga ná aro kʉ ná nyo nyó. Føro pi rrngʉeri Yosefu kʉ kpakpanga na nì ndi tú nyo nanga ná saa na, ke pongʉeri le rá ke nzi. Yova dhó le tsotsokodha chulu Yosefu tungʉe fø nyo nanga tu ndirigoti ke bbʉngʉe Farao dho ná nyodyu dhi shauri kengʉe ke nanga bbo. Farao njangʉe Yova kʉ Yosefu na nari ná saa na ke lingʉe Yosefu Misri lu nǎ nyo djó nga nja ná ke. (Mwa. 41:38, 41-44) Føri goti bbo pli kʉ na ù chingʉe nga Misri kpali na ri, ro Yosefu ma bbá familia ngʉ di nǎ ná ngø Kanaani na maddi. Kpadjo Yosefu kʉ na ná bbonga kʉ ke ka ndi gø ndima bbá familia gø ndirigoti ndi b’o masiya ka ndi sie si chulu ná gø ronga maddi. Bbʉbbʉ dhé, ringʉe Yova i ngʉ rili Yosefu ngʉ nji krʉ ná lo bbi bblo ri. Nì mai Yosefu djoi ngʉ rine ndima hwi ke hwi ro, Yova lengʉe fø lo thika le ndiro ndi ji ná lo njini d’e. w23.01 17 §11-12

Ndi ndiro ndi ronga b’o ná ke e krr ndima kana kau ka ndi sa Yova na ná ritsi krʉ djo ndirigoti ke adi ri tso nyinyi. Fø chu nǎ ke adi ndi ronga b’o Mungu dzá jidha nǎ. (Mez. 22:3; Yud. 20, 21) Mutume Paulo pongʉeri Wakristo dho kpa b’o ndima ronga ndima ro. Loroji na, ke pongʉeri ɨ Efeso nǎ Wakristo dho: “Anidi ngbaribbai ma ni bbi nari nja bblo nga nga dhó nyodyu kʉ ná ndrŭ bbai ri, ro nyodyu dhi ndrŭ bbai.” (Efe. 5:15, 16) Shetani adi rimbu krʉ ddo ró ndi sa ko kana kau Yova na. Biblia rid’ra ko dho “ko rá anzi Yova ji ná lo ko ji ko chu nari na,” ndiro ko b’o ko ronga Shetani nji ná là krʉ ró d’e. (Efe. 5:17) Nja ko vʉ lo nanga nyodyu na d’e ringani ko nja “Yova ji nari” ká kʉ addu ma nari. Ko ka ko njiri fø krʉ ddo ró ko Mungu dzá lo zø ndirigoti ri djo ko ngaddi nari na. Njati rie bblo ko Yova ji ná lo famu ndirigoti ko di rimbu ko “ddinga Kristo” bbai ró, ko si lo nji “nyodyu dhi ndrŭ bbai” nga mai ko ji ko njí ná lo djo tilo ná wazi kʉ ná sheria kʉ ro.​—1 Ko. 2:14-16. w23.02 16-17 §7-9

Ni bbá dza nanga ká ni adi thɨ thɨ ina? Njaro ri na ni ngʉ nari njí ni thɨngʉe ri nanga vi. Nde, ri nanga ká ka ndi die ngbǎ, ni thɨe ri nanga ki ro nzá ró? Ri nanga ka ndi ngʉe muchafu tse. Nja ni bbá dza nanga di bblo d’e, ringani ni di ri nanga thɨ bí ina. Kodhó ngaddidha ma, kodhó nyi ma na thika ringani ko di thɨ føri bbai. Bbʉbbʉ dhé, batiso ko ba nari njí, ko njingʉe kpakpanga bbo, ndiro ko le kodhó maisha thika nja “ko pʉ ko ndí ma, ko thí ma na ka ndi sa ná krʉ kʉ ná ritsi ko ró ro d’e.” (2 Ko. 7:1) Ro, kpadjo ringani ko dyø mutume Paulo pori ko rá “anzi ø ko ngʉ nari na” ná fø shauri. (Efe. 4:23) I dz’ dzá che kʉ ná lo ka ndi liri ko ngʉ tse muchafu Yova nyǒ njí. Nja ko pʉ fø lo d’e, ndirigoti ko di Yova nyǒ tho ná lo nji d’e, ringani ko di kodhó ngaddidha ma, kodhó nyi ma, kodhó tamaa ma na nanga ne bí ina. w23.01 8 §1-2

Anzi ngaddi Yesu longaddi nari le rr nari dho ká le ka le mbue le ngbaribbai ma nari djo di. Batiso Yesu ba ndirigoti roho takatifu na le d’ringʉe ke ché na ná saa djo, ke nongʉe nzá ndi d’e si dz’ djó ro ndi ngʉe na ná maisha nga. Bí ina ke ngʉ adi loti takatifu Maandiko djo ná fø Maandiko krʉ ke løngʉe ndi djǒ nǎ. Bbʉbbʉ dhé, kedhó batiso ma, kedhó dhe njí ya mwisho ke pongʉe ná nja lo ma na singʉe Maandiko nǎ ro. (Kum. 8:3; Zb. 31:5; Lu. 4:4; 23:46) Ndirigoti cho gbo na nusu ndi d’ra lo nari kana Yesu ngʉ adi Maandiko zø ndrŭ kpari njí, ke ngʉ adi Maandiko po ndirigoti ke ngʉ adi ri nanga tútu. (Mt. 5:17, 18, 21, 22, 27, 28; Lu. 4:16-20) Ndidhó lod’radha dhi njí tso ndi nga nari njí cho bí kana, Yesu rrngʉe ndirigoti ke zøngʉe Mungu dzá lo bí ina. Ke ma bbá familia nǎ, Maria ma, Yosefu ma na loti ná saa djo kpa ngʉ adi lo ro ti Maandiko djo nì dhé. (Kum. 6:6, 7) Yesu ma, ndima bbá familia ma na ngʉ adi ra krʉ sabato ddo ró sinagogi na. (Lu. 4:16) Ná følu ke ngʉ adi Maandiko le zø nari rr li ndi li ndi dyu ro. w23.02 8 §1-2

Yova ko jirie dhonalo kʉ bí. Loroji na, ni famuri nari kʉ, ke i kʉ “shinga tso ngani ná nga” ndirigoti “krʉ bblo kado ma, krʉ kaka ná ritsi ma na adi si dhó ro ná ke.” (Zb. 36:9; Yak. 1:17) Krʉ ni adi hwè ba dho ná bblo kʉ ná ritsi adi si kodhi ji dhi Mungu dhó ro. Le ødha dhi be kʉ Yova bbʉngʉe ko dho ná bblo pli kʉ ná kado. Fø ká ko ripo addudho? Anzi ngaddi Yova ma kana ngʉe ndidzá ngba na ná bblo pli kʉ ná kau djo di. Yesu pongʉeri ɨ: “Baba jirie ma ji” ndirigoti “ma jirie Baba ji.” (Yoh. 10:17; 14:31) Kpa kana kau ngʉngʉe kpakpa bbo ddinga kpa dingʉe cho bí nari kana. (Mez. 8:22, 23, 30) Addinga ngbaribbai ma, Mungu mbungʉe ndi ndi ungʉe ritso ndidhi Dduna nzani ndirigoti ke dhedhe ro nari djo di. Yova jingʉe ndrŭ tsɨ bbo ná føri tsu ni maddi ndi nǎ, føri dzá lo dho i ke bbʉngʉe ndidhi Dduna bbo ndi ji nari ndiro ri kaka ni ma, nja ndrŭ ma na ba choro nŭnŭ di ná shinga d’e. (Yoh. 3:16; Gal. 2:20) Føri kʉ Mungu ko ka ko ji dho ná ddikpa bbo kʉ ná sababu. w23.03 4-5 §11-13

Ringani nzɨ ko u waasi imani dhó mafundisho. Yesu ongʉe ó Pergamamu nǎ ngʉe ná nja ndrŭ na dhonalo kpa ngʉ ndondo li le-djoi kana. (Ufu. 2:14-16) Ke mangʉe Tiatira nǎ kutaniko nǎ ndrŭ ma kpa pʉngʉe “Shetani dhó rú runi ná ritsi” ndima ró ro nari dho ndirigoti ke lingʉe kpa kpakpa ndiro kpa “tøni kprɨ” bbʉbbʉlo kana d’e. (Ufu. 2:24-26) Kali dhi mafundisho ungʉe ná djødjø ná Wakristo dho ringangʉeni ndima leni le. Nde, ko ronga ká fø lo lø ngbaribbai? Ringani ko gʉ nzá gbani Yova dhó mafundisho na ná lo krʉ gʉ. Waasi imani ka ndima njani nì njínji Biblia nǎ lo na nari bbai, ro kpa dhó njí ka ndi ve ridho nari kʉ kpa nzɨ njínji ri po ná lo nari. (2 Ti. 3:5) Ri ka ndi é sʉsʉ ko d’i kali dhi mafundisho utso ndirigoti ko pʉ ri ko ró ro, njati ko é bblo Mungu dzá lo nanga ne ná ndrŭ ró. (2 Ti. 3:14-17; Yud. 3, 4) Ringani ko liri Yova u ko bbʉ ná madha tso u. Njati ri é ko nji ná lo ka ndi liri nzɨ Yova u ko bbʉ ná madha tso ri ró, ringani ko lé kodhó lo thika lelé ndiro Yova u ko tso u d’e.​—Ufu. 2:5, 16; 3:3, 16. w22.05 4 §9; 5 §11